1. ¿Kuna oracionatsa jichhajj yatjjataskañäni?

 WALJA jaqenakaw padrenuestro sasin uñtʼatäki uka oración yatipjje. Jesusajj discipulonakaparuw uka oración mayisipjjañapatak yatichäna. ¿Kunsa Jesusajj uka oracionan mayïna? ¿Kunatsa uka oracionat yatiñajj jichhürunakan wakiskirejja?

2. ¿Kuna kimsa toqetsa Jesusajj mayisiñ yatichäna?

² Jesusasti sänwa: “Jumanakajj akham sasaw mayisipjjañama: ‘Alajjpachankir nanakan Awkija, sutimajj jachʼañchatäpan [jan ukajj santot uñjatäpan]. Reinomajj jutpan. Munañamajj luratäpan, kunjamatï alajjpachan luraski ukhamarak aka oraqens luraspan’” sasa (Mateo 6:9-13 liytʼañataki). ¿Kunatsa Jesusajj uka kimsa toqet mayisiñ yatichäna? (20 qhanañchäwi uñjjattʼäta).

3. ¿Diosan Reinopat kunanak yatiñas wakisi?

³ Kawkïris Diosan sutipajja, kunas Diosan amtapajj jaqenakatakisa aka oraqetakisa ukanak yatjjtanwa. Ukampis “Reinomajj jutpan” sasinjja, ¿kuna toqetsa Jesusajj parlaskäna? ¿Kunas Diosan Reinopajja? ¿Kunsa uka Reinojj jutïrin lurani? ¿Kunjamsa Diosan sutip jachʼañchani? Uka toqenakatwa jichhajj yatjjatañäni.

4. ¿Kunas Diosan Reinopajja, khitis uka gobiernon Reyipajja?

⁴ Jehová Diosajj alajjpachankir mä gobierno uttʼayi, uka gobiernon Reyïñapatakejj Jesusaruw ajlliraki. Biblianjja uka gobiernorojj Diosan Reinopa sasaw uñtʼasi. Jesusaw “reyinakjam apnaqapki ukanakan Reyipajja, juparakiw munañaninakjam apnaqapki ukanakan  Tatitupasa” (1 Timoteo 6:15). Jesusajja akapach apnaqerinakat sipansa jukʼamp sumanak lurani, jupajj taqpach marka apnaqerinakat sipansa jukʼamp chʼamaniwa.

5. ¿Kawkitsa Diosan gobiernopajj apnaqanini?

⁵ Jesusajj jaktayatäjjäna ukhat pusi tunka urunak qhepatjja, alajjpacharuw sarjjäna. Tiempompejja, Jehová Diosajj Reinopan Reyïñapatakiw uttʼayäna (Hechos 2:33). Diosan gobiernopajja, alajjpachatwa aka oraqer apnaqanini (Apocalipsis 11:15). Ukatwa Biblianjja Diosan Reinopajj ‘alajjpachankir Reinowa’ sasin qhanañchi (2 Timoteo 4:18).

6, 7. Jesusajj akapach apnaqerinakat sipansa jukʼamp suma apnaqeriwa sasajj ¿kunatsa sistanjja?

⁶ Jesús “sapakiw jan jiwirïkiti” sasaw Bibliajj qhanañchi, ukatwa akapach apnaqerinakat sipansa jukʼamp suma apnaqerejja (1 Timoteo 6:16). Marka apnaqerinakajj tiempompejj jiwjjapjjakiwa, ukampis Jesusajj janipuniw jiwkaniti. Ukhamasti Jesusajj taqe kuntï jiwasanak layku lurkani ukanakajj wiñayatakïniwa.

⁷ Jesusajj khuyaptʼayasiri, cheqapar uñjiri Reyïniwa sasaw mä profecian qellqasïna, ukansti akham siwa: “Tatitun ajayupasti jupjjankapuniniwa, ukatsti yatiñampi, chʼikhi [amuyumpi], suma amuytʼa chuymampi, chʼamampi, Tatitur uñtʼañampi jupar ajjsarañampwa churani. Jupajj janiw aleq uñkatasaki kunsa uñjkaniti, chʼajjwanaksa janirakiw aleqa parlanak istʼasaki tʼaqjkaniti. Aynachtʼatanakarusti [mä arunjja, pobrenakarusti] cheqa luräwimpiw uñjani” sasa (Isaías 11:2-4). ¿Jumajj ukham reyinïñ munasmati?

8. ¿Jesusajj sapakit apnaqpachäni? Uk qhanañchtʼam.

⁸ Diosajja Jesusamp chik alajjpachankiri gobiernopan apnaqapjjañapatakejj yaqha jaqenakampiruw ajlliraki. Apóstol Pablojj Timoteor akham sänwa: “Jiwasatejj  aguantaskakiñänejja, jupamp chikarakiw reyinakjam apnaqañäni” sasa (2 Timoteo 2:12). ¿Qhawqhanis Jesusamp chikajj reyinakjam apnaqanipjjani?

9. 1) ¿Qhawqhanis Jesusamp chikajj apnaqanipjjani? 2) ¿Kunapachas jupanakarojj Diosajj ajlliñ qalltäna?

⁹ Apóstol Juanajj Jesús Reyimpiru 144.000 reyinakampiruw mä visionan alajjpachankaskiri uñjäna, ukwa 7 yatichäwin yateqktanjja. ¿Khitinakäpjjes uka 144.000 reyinakajja? Apóstol Juanajj akham sasaw qhanañchi: “Jupanakan paranakapanjja [Jesusan] sutipampi Awkipan sutipampi qellqatänwa [...]. Kawkirutejj Corderojj [mä arunjja, Jesusajj] sarki ukaruw jupanakajj arkapjjarakïna [...]. Nayrïr achunakjam jaqenak taypit alatäpjjänwa” sasa (Apocalipsis 14:1, 4 liytʼañataki). 144.000 reyinakajja, Diosat jan jitheqtir cristianonakäpjjewa, jupanakaruw Diosajj Jesusamp chika ‘aka oraqjjar reyinakjam apnaqapjjañapataki’ ajlli. Uka cristianonakajj jiwjjapjje ukhajja, alajjpachan jakañatak jaktayatäpjjewa (Apocalipsis 5:10). Jehová Diosajja, apostolonakajj jakapkäna uka tiempotwa jan jitheqtir cristianonakarojj ajlliñ qalltäna, ukhamat jupanakajj 144.000 reyinak taypina jakhutäpjjañapataki.

10. Diosajj jaqenakar munasitap laykuw Jesusampiru 144.000 ajllitanakampirojj reyinakat uttʼayi sasajj ¿kunatsa sistanjja?

¹⁰ Jehová Diosajj wal munasistu, ukatwa Jesusamp chika apnaqanipjjañapatakejj aka oraqet jaqenakar ajlli. Jesusajj sumwa uñtʼistu, ukhamajj sumwa apnaqestani. Jupajja jaqëñsa tʼaqesiñsa yatiwa. Jesusajj kunjamsa uñjistu ukjja, Pablojj akham qhanañchäna: ‘Jesusajj pantjasitanakasat khuyaptʼayasiwa’, “jupajj jiwasjamarakiw taqe kunan yantʼat uñjasïna” sasa (Hebreos 4:15; 5:8). 144.000 ajllitanakajj kunjamas jaqenakajj jakastan ukjja yatipjjarakiwa. Jupanakajj jiwasjam  pantjasiri usuntiri ukhamäpjjarakïnwa. Ukhamasti Jesusasa 144.000 ajllitanakasa janiw kunjamsa jaqenakajj jikjjatastan ukak yatipkiti, jan ukasti kuna jan walinakansa uñjastan uksa yatipjjarakiwa.

11. ‘Munañamajj alajjpachan luraspan’ sasajj ¿kunatsa Jesusajj discipulonakapar orasiñ yatichäna?

¹¹ Jesusajj discipulonakapar orasiñ yatichkäna ukhajja, akham sänwa: ‘Munañamajj alajjpachan luraspan’ sasa. ¿Kunatsa ukham sispachäna? 3 yatichäwinjja, kunjamsa Supayajj Jehová Dios contra saytʼäna uka toqetwa yateqtanjja. Supayajj Dios contra saytʼkäna uka qhepatjja, Dios contra saytʼir angelanakajja, mä arunjja, demonionakajj alajjpachankasipkänwa. Ukhamajj janiw taqenejj alajjpachan Diosan munañap lurapkänti. 10 yatichäwinwa Supayatsa demonionakapatsa jukʼamp yatjjatañäni.

12. Apocalipsis 12:10 qellqatanjja, ¿kuna pä toqetsa qhanañchistu?

¹² Jesusajj Diosan Reinopan Reyit uttʼayaskani uka qhepatjja, Supay contraw nuwasini sasaw Biblian qhanañchäna (Apocalipsis 12:7-10 liytʼañataki). 10 versiculonjja pä toqenakatwa qhanañchistu. Maya, Jesucristow Diosan Reinopan apnaqañ qallti. Paya, Supayajj alajjpachat aka oraqer jaqoqanitänwa. Kunjamsa ukanakajj phoqasïna uka toqetwa jichhajj yatjjataskañäni.

13. Supayajj jaqoqanitäkäna ukhajja, ¿kunas alajjpachan pasäna?

¹³ Supayampi demonionakapampejj alajjpachat jaqoqanitäpkäna uka qhepatjja, Diosat jan jitheqtir angelanakajj walpun kusisipjjäna. Biblianjja siwa: “Alajjpachanakasa ukan jakirinakasa ¡kusisipjjam!” sasa (Apocalipsis 12:12). Alajjpachanjja taqeniw Diosan munañap lurjjapjje, ukatwa sumankañasa mayachtʼata jakasiñasa alajjpachan utj-jje.

14. Supayajj alajjpachat jaqoqanitäkäna uka qhepatjja, ¿kunas aka oraqen pasäna?

 ¹⁴ Aka oraqenjja janiw alajjpachanjam kusisiñajj utjkiti. Diablojj aka oraqeruw “saraqani”, “jukʼa tiemponikïtap yatisajja wali coleratawa”, ukatwa jaqenakajj kunayman jan waltʼäwinakan uñjasipjje (Apocalipsis 12:12). Supayajj wali coleratapuniwa. Jupajj alajjpachat jaqoqanitäjjewa, niyarakiw tʼunjatäjjani. Ukatwa aka oraqen jan walinaka, chʼajjwañanaka, tʼaqesiñanaka utjañapatakejj wal chʼamachasi.

15. ¿Kunas Diosan amtapajj aka oraqetakejja?

¹⁵ Diosan amtapajj pachpakïskiwa, jupajj perfecto jaqenakajj wiñayatak paraíso oraqen jakasipjjaspa ukwa muni (Salmo 37:29). Ukhamajj ¿kunjamsa Diosan Reinopajj uka amtap phoqasiñapatakejj yanaptʼani?

16, 17. ¿Kunsa Daniel 2:44 qellqatajj Diosan Reinopat qhanañchistu?

¹⁶ Daniel 2:44 qellqatajj siwa: “Uka reyinakan apnaqañapkamasti, alajjpachankiri Diosajj mä yaqha reino saytʼayarakini, uka reinosti janipuniw tukjatäkaniti ni apnaqatäkarakinisa yaqha markanakampejja, jan ukasti jupaw taqe yaqha reinonakarojj tukjani, wiñayan wiñayapaw uka reinojj utjarakini” sasa. ¿Kunsa uka profeciajj Diosan Reinopat yatichistu?

¹⁷ Maya, “reyinakan apnaqañapkamasti alajjpachankiri Diosajj mä yaqha reino saytʼayarakini” sasaw uka profeciajj sistu. Ukhamasti yaqha gobiernonakajj apnaqasipkani ukhaw Diosan Reinopajj apnaqañ qalltañapäna. Paya, Diosan Reinopajj wiñayans wiñayapatakiw apnaqani, janipuniw uka lantejj yaqha gobiernojj uttʼayaskaniti. Kimsa, Diosan Reinopampi akapach gobiernonakampejj guerraruw mantapjjani. Ukanjja Diosan Reinopaw atipjani, uka gobiernow oraqpach apnaqarakini. Ukhamatwa jaqenakajj mä suma gobiernonïpjjani.

18. ¿Diosan Reinopampi akapach gobiernonakampi nuwasipkani uka guerrajj kamsatasa?

 ¹⁸ Diosan Reinopampi akapach gobiernonakampejj guerrar mantapkani uka nayrajja, ¿kunas pasani? Demonionakajj ‘oraqpachankir reyinakaruw engañjapjjani. Ukhamat Taqe Chʼamani Diosan jachʼa urupan guerrajj apaskani ukar tantachthapiñataki’, uka guerrajj Armagedón satawa. Ukanwa oraqpachankir gobiernonakajj Diosan Reinop contra nuwasipjjani (Apocalipsis 16:14, 16; 10 qhanañchäwi uñjjattʼäta).

19, 20. ¿Kunatsa Diosan Reinopampi apnaqatäñ muntanjja?

¹⁹ ¿Kunatsa Diosan Reinopampi apnaqatäñ muntanjja? Kimsa toqet uk uñjañäni. Maya, juchararätas laykojja, taqeniw usunttansa jiwaraktansa. Ukampis Diosan Reinopajj apnaqjjani ukhajj wiñayatakiw jakañäni. Juan 3:16 qellqatanjj siwa: “Diosajj akapachar wal munatap laykuw mä sapa Yoqap churäna, ukhamat taqe khitinakatï jupar confiyapjjatap uñachtʼayapki ukanakajj jan jiwapjjañapataki, jan ukasti wiñay jakañ katoqapjjañapataki” sasa.

²⁰ Paya, akapachanjja jan walinak lurir jaqenak taypinwa jaktanjja, ukatwa Jehová Diosan Reinop munaraktanjja. Jaqenakajj kʼarintasiri, engañjasiri ukhamäpjjewa, jan wali qʼañu lurañanakanwa sarnaqapjjaraki. Jiwasajj janiw jaqenakan jan wali luräwinakap chhaqtayksnati. Jupanakatï uka jan wali luräwinakap jan apanukupkani ukhajja, Jehová Diosajj Armagedonanwa jupanakarojj chhaqtayani (Salmo 37:10 liytʼañataki). Kimsa, akapachankir gobiernonakajj jan walinak chhaqtayañatakejj janiw chʼamanïpkiti, jupanakajj jaqenakar wal tʼaqesiyapjje, janiw kunsa cheqapar uñjapkiti. Jupanakajja janirakiw Diosar istʼapjjañapatakejj  jaqenakar yanaptʼapkiti. Biblianjja siwa: ‘Jaqejj chʼamanïsajja jaqe masiparuw jan walinak luri’ sasa (Eclesiastés 8:9).

21. Diosan munañapajj aka oraqen lurasiñapatakejja, ¿kunjamsa Diosan Reinopajj yanaptʼani?

²¹ Armagedón qhepatjja, Diosan munañap lurasiñapatakiw Diosan Reinopajj aka oraqen yanaptʼani. Supayarusa demonionakaparusa chhaqtayaniwa (Apocalipsis 20:1-3). Tiempompejja janiw khitis usuntjjaniti ni jiwjjanisa. Jesusan jaqenak layku jiwatapatjja, Diosat jan jitheqtir taqe jaqenakaw Paraíso oraqen wiñayatak jakasjjapjjani (Apocalipsis 22:1-3; 21 qhanañchäwi uñjjattʼäta). Uka Reinorakiw Diosan sutip santot uñjasiñapatakis yanaptʼani, mä arunjja, Diosan gobiernopajj aka oraq apnaqjjani ukhajja, taqe jaqenakaw Jehová Diosan sutip jachʼañchapjjani.

22. Jesusajj janiw aka oraqenkkäna ukhasa ni alajjpachar sarjjäna ukaratpachas Reyit uttʼayatäkänti sasajj ¿kunatsa sissna?

²² Jesusajj “Reinomajj jutpan” sasin Diosar mayisipjjañapatakiw discipulonakapar yatichäna. Ukhamajj Diosan gobiernopajj qhepatwa jutaskañapäna. Nayraqatjja, Jehová Diosajj gobiernoparuw sum uttʼayañapäna, Reyitsa Jesusaruw uttʼayañaparakïna. ¿Jesusajj alajjpachar  sarjjäna ukhajja jankʼakiti reyit uttʼayatäpachäna? Janiwa, jupajj walja tiempow suyäna. Jesusajj jiwatat jaktayatäjjäna uka qhepatwa Pedrompi Pablompejj uka toqet sum qhanañchapjjäna, Salmo 110:1 qellqatankir profeciajj Jesusanwa phoqasi sasaw sapjjäna. Jehová Diosajj uka profecianjja akham sänwa: “Kupëjjajar qontʼasim, enemigonakamaru kayunakamampi takjjataykäma ukapachkama” sasa (Hechos 2:32-35; Hebreos 10:12, 13). Reyit uttʼayatäñatakejja, ¿qhawqha tiempos Jesusajj suyäna?

23. 1) ¿Kunapachas Jesusajj Diosan gobiernopan Reyipjamajj apnaqañ qalltäna? 2) ¿Kuna toqetsa jutïr yatichäwin yatjjataskañäni?

²³ Diosar taqe chuyma servir cristianonakajja, walja maranak nayraw 1914 marat parlapjjäna. Profeciarjamajja uka marajj jan armkañ maräniwa sasaw sapjjäna. 1914 marat aksarojj kunanakatï paskäna ukanakajja, kuntï uka cristianonakajj sapkäna ukajj cheqäskapunitap uñachtʼayistu. Jesusajj uka maranwa Reyit uttʼayatäna (Salmo 110:2; 22 qhanañchäwi uñjjattʼäta). Mä qhawqha tiempotjja, Supayajj alajjpachat aka oraqer jaqoqanitänwa, jichhasti ‘jukʼa tiemponikëjjewa’ (Apocalipsis 12:12). Uka tiemporojja “qhepa urunaka” sasaw Biblian uñtʼasi. Uka tiemponwa jichhajj jakasktanjja, uka toqetwa jutïr yatichäwin yatjjatañäni.