1. Di nke kwélél nano inyu mambe masoohe ngandak bôt i nyi?

DIDUN di bôt di nyi mana masoohe le “A Tata wés nu a nyé ngii.” Yésu a bi gwélél bibuk bi inyu niiga banigil bé i soohe. Inyu mambe mam Yésu a bi soohe? Inyuki masoohe mana ma yé nseñ inyu yés i len ini?

2. Yésu a bi niiga bés le di soohe inyu mam maa. Mambe?

² Yésu a kal le: “Jon soohana ni lana le: ‘A Tata wés nu a yé ngii, jôl joñ li tééba lipubi. Ane yoñ i loo, sômbôl yoñ i bôña isi kiki ngii.’” (Añ Matéô 6:9-13.) Inyuki Yésu a bi niiga bés le di nlama soohe inyu mam mana mo maa?​—Béñge Ndoñi 20, i mamélél ma kaat.

3. Kii di nlama yi inyu Ane Djob?

³ Di mal nigil le jôl li Djob li yé le Yéhôva. Di nigil ki kii yé sômbôl i Djob inyu bôt ba binam ni inyu hisi. Ndi kii Yésu a bééna mahoñol ngéda a bi kal le: “Ane yoñ i loo”? Di ga nigil kii yé Ane Djob, kii i ga boñ, ni lelaa i ga téé jôl li Djob lipubi.

4. Kii yé Ane Djob, ni njee a yé Kiñe?

⁴ Yéhôva a bi téé bôt i énél kiki ngomén nyoo i ngii, a pohol Yésu le a ba Kiñe. Bibel i nsébél énél i le Ane Djob. Yésu a yé “Kiñe i bikiñe, Nwet nu bet.” (1 Timôtéô 6:15) Mut binam nye kiki nye nu a yé  ñénél, a nla bé boñ loñge i likala Yésu a nla boñ. A gwé ki lipémba li nlel ngui i baane bobasôna ba nkoñ isi.

5. Hee Ane Djob i yéne? Ndi i ga énél hee?

⁵ Môm mana ma dilo mbus bitugne gwé, Yésu a bi témb i ngii. Mbus ha, Yéhôva a bi téé nye kiki Kiñe i Ane. (Minson mi baôma 2:33) Ane Djob i yé i ngii, ndi i ga énél hisi. (Masoola 11:15) Inyu hala nyen Bibel i nsébél yo le ‘Ane i ngii.’​—2 Timôtéô 4:18.

6, 7. Inyuki Yésu a nlel to numbe ñane nu nkoñ isi?

⁶ Bibel i nkal le Yésu a nlel bikiñe gwobisôna inyule “nyetama nyen a nwo bé.” (1 Timôtéô 6:16) Baane ba nkoñ isi bobasôna ba ga sôk ba wo, ndi Yésu a ga wo bé kekikel. Loñge yosôna Yésu a ga boñ inyu yés i ga nom i boga ni boga.

⁷ Mbañ i Bibel i nkal le Yésu a ga ba Kiñe i téé sép, a ban-ga ki konangoo. Bibel i nkal le: “Mbuu Yéhôva w’a kahap ki ngii yé, mbuu pék ni u ndoñol mam, mbuu bagal mam ni u ngui, ni mbuu u yi Yéhôva ni i kon nye woñi. A’ kéés bé bôt kingéda binunul bi mis, to pémés mbagi kingéda binôgôl bi maôô; ndi a’ kéés diyeyeba ndôñ i téé sép, a pémhenege ki ba ba nsamp hana isi mbagi tete [tole i téé sép].” (Yésaya 11:2-4) Baa u ngwés bé le kiñe yoñ i ba hala?

8. Lelaa di nyi le Yésu a ga énél bé nyetama?

⁸ Djob a bi pohol ndék bôt inyu énél ni Yésu i Ane i ngii. Kii héga, ñôma Paul a bi kal Timôtéô le: “Ibale di nhônba, wee d’a ane ki lôñ yada ni  nye.” (2 Timôtéô 2:12) Bôt bañen ba ga énél kiki bikiñe ni Yésu?

9. Bôt bañen ba ga énél ni Yésu? Ngéda mbe Djob a bi bôdôl pohol bo?

⁹ Kiki di nigil i Pes 7, ñôma Yôhanes a bi kôhna yiinda, het a bi tehe Yésu a yé Kiñe i ngii ni 144 000 bikiñe bipe. Bonjee ba yé 144 000 ma bikiñe bini? Ñôma Yôhanes a ntoñol le “ba gwé jôl [li Yésu] ni jôl li Isañ wé nkédlak mu mbom yap.” A nkal ki le: “Bo ki bon ba yé ba noñ Man Ntômba [le Yésu] to hee a nke. Bo yaga bon ba bi sômba mukété bôt.” (Añ Masoola 14:1, 4.) I 144 000 bôt Yéhôva a mpohol le “ba ane hisi” ni Yésu, i yé bikristen bi bi ntéñbe ni Djob. Ngéda ba nwo, ba nkôhna bitugne inyu niñ i ngii. (Masoola 5:10) Ibôdôl ngéda baôma, Yéhôva a bi bôdôl pohol bikristen bi bi ntéñbe ni nye inyu ba mu ntôñ u 144 000 bikiñe.

10. Inyuki di nla kal le gwéha i Yéhôva yon i tinde nye i ti Yésu ni 144 000 bôt, le ba énél bôt ba binam?

¹⁰ Yéhôva a ntôñ bés ngandak, jon a bi kôôba ngim bôt le ba ane ni Yésu. Yésu a ga ba loñge ñane inyule a nok bés. A nyi kii yé libak li mut binam ni ndutu yé. Paul a bi kal le Yésu a nyi bés loñge loñge, a nla “nôgda njiiha i bomb yés,” ni le a “mal noodana manjel momasôna nlélém yaga kiki bés.” (Lôk Héber 4:15; 5:8) Yak 144 000 bôt i nyi bibomb bi bôt ba binam. Ba bi jo ni minheña mi bikwéha bi bôt, yak ni makon. Jon di nla ba nkwoog nkaa le Yésu ni 144 000 bôt, ba ga nok lelaa di nôgda, ba nogok ki mandutu di nihbe hiki kel.

11. Inyuki Yésu a bi niiga banigil bé i soohe le sômbôl i Djob i bôña i ngii?

¹¹ Yésu a bi niiga banigil bé i soohe le sômbôl i Djob i bôña i ngii. Inyuki? Di bi nigil i Pes 3 le Satan Nsohop a bi kolba Yéhôva. Ngéda Satan a bi ndogop, Yéhôva a nwas nye ni bibéba bi biañgel, tole mimbuu mimbe, le ba yén i ngii inyu ngim ngéda. Jon, bôt bobasôna i ngii bé bon ba bé boñ sômbôl i Djob. I Pes 10, di ga kônde nigil bonjee ba yé Satan ni mimbuu mimbe.

12. Kaat Masoola 12:10 i ntoñol mbiñ mam iba. Mambe?

¹² Bibel i ntoñol le ndék ngéda mbus bibôdle bi énél i Yésu kiki Kiñe i Ane Djob, a bé lama jôs Satan gwét. (Añ Masoola 12:7-10.) Nlôñ 10 u ntoñol mbiñ mam iba. Jam li bisu li yé le Yésu a mbôdôl énél kiki Kiñe i Ane Djob. Jam li nyônôs iba li yé le ba mbuñga Satan i ngii, ba leñ nye hana isi. Kiki di ga nigil, mam mana ma bi mal tagbe.

13. Kii bi tagbe i ngii ngéda ba bi buñga Satan?

¹³ Bibel i ntoñol maséé biañgel bi bi ntéñbe ni Djob bi bééna ngéda ba bi buñga Satan ni mimbuu mimbe i ngii. Bibel i nkal le: “Jon a ngii yosôna, yak bé ba ni yiine mukété, sôbhaga [tole ni ba maséé]!” (Masoola 12:12) Nano nsañ i mbuma ñañ won u yé nyoo i ngii inyule bôt bobasôna ba mboñ sômbôl i Djob.

14. Kii ntagbe hana isi inyule ba bi buñga Satan i ngii?

¹⁴ Ndi hana isi, mam ma ta bé nlélém. Mam  mabe ma nkwél bôt “inyule Nsohop a mal sôs [isi]” ni le “a nyai ngandak, lakii a nyi le a ngi gwé ndigi ndék isii ngéda.” (Masoola 12:12) Satan a yé ñunbak ngandak, inyule ba mbuñga nye ngii, a nyi ki le ndék ngéda a ga kôs tjiba. Jon a mboñ kii yosôna a nla inyu lona mpungu, mandutu, ni njôghe hana isi.

15. Kii yé sômbôl i Djob inyu hisi?

¹⁵ Ndi Djob a nhéñha bé sômbôl yé inyu nkoñ isi. A ngi gwé ngôñ le bôt ba binam ba ba peles, ni le ba niñ i boga ni boga hana isi. (Tjémbi 37:29) Ndi lelaa Ane Djob i ga yônôs jam li?

16, 17. Kii kaat Daniel pes 2:44 i nkal inyu Ane Djob?

¹⁶ Mbañ i Daniel 2:44 i nkal le: “I dilo di bikiñe bi nyen Nyambe nu ngii yosôna a’ téé ngim ane i yé le y’a tjiba bé kekikel. To pot yé mbok ki y’a yégle bé i moo ma loñ ipe, ndi y’a bôk biane bi gwobisôna ngéñ ngéñ ni tjé gwo hies, ndi yomede y’a tééba mba ni mba.” Kii mbañ ini i niiga bés inyu Ane Djob?

¹⁷ Jam li bisu mbañ ini i niiga bés li yé le Ane Djob y’a bôdôl énél yé “i dilo di bikiñe bi.” Hala a nkobla le biane bipe bi mba hana isi ngéda Ane Djob i ga bôdôl énél. Jam li nyônôs iba li yé le Ane Djob i ga nom boga ni boga ni le kekikel, ane ipe i ga héa bé yo. Jam li nyônôs aa li yé le gwét bi ga ba ipôla Ane Djob ni biane bi nkoñ isi. Ane Djob y’a yémbél, i yila ki mpom Ane ikété nkoñ isi wonsôna. Ha nyen bôt ba binam ba ga bana Ane i nlôôha ba loñge, ntén Ane ba bak ngi kôs.

18. Lelaa ba nsébél gwét bi nsôk bi bi mba ipôla Ane Djob ni biane bi nkoñ isi?

 ¹⁸ Lelaa Ane Djob i ga bôdôl énél i nkoñ isi? Ilole gwét bi nsôk ba nsébél le gwét bi Armagédôn bi mbôdôl, mimbuu mimbe mi ga yumus “bikiñe bi nkoñ isi i kot gwo inyu gwét bi ngwa nkeñi u Nyambe Bayemlikok.” Ñ, biane bi nkoñ isi bi ga jôs Ane Djob gwét.​—Masoola 16:14, 16; béñge Ndoñi 10, i mamélél ma kaat.

19, 20. Inyuki i mbéda le Ane Djob i énél nkoñ isi?

¹⁹ Inyuki i mbéda le Ane Djob i énél bés? I bititigi gwobisô, inyu manjom maa. Njom bisu i yé le di yé baboñbéba, inyu hala nyen di nkwo kon, di wok ki. Ndi Bibel i nkal le, isi Ane Djob, di ga niñ i boga ni boga. Ni maliga, kaat Yôhanes 3:16 (MN) i nkal le: “Nyambe a lôôha gwés nkoñ isi jon a tine pombe yé Man, le tonjee a nhémle nye a’ nimil bé, ndi a bana niñ boga.”

²⁰ Njom i nyônôs iba i yé le, di gwé ngôñ ni Ane Djob inyule di yé nkéñég ni bibéba bi bôt. Ngandak i ntembee, i bak bôt ba matjañg ni bôt ba ndéñg. Di nla bé boñ to yom inyu héa bo, ndi Djob nye a ga tjé bo. Bôt ba ba nke ndik ni bisu i boñ béba ba ga tjiba i Armagédôn. (Añ Tjémbi 37:10.) Njom i nyônôs aa i yé le biane bi nkoñ isi bi gwé bé ngap, bi nkôp matjél, bi nai ki ni makala pati. Ba ntehe bé nseñ wo ki wo i hôla bôt i nôgôl Djob. Bibel i nkal le “mut wada a ntét numpe i boñ nye béba.”​—Ñañal 8:9.

21. Lelaa Ane Djob i ga boñ le sômbôl i Djob i bôña hana isi?

²¹ Mbus Armagédôn, Ane Djob i ga yoñ yaga  bitelbene le sômbôl i Djob i bôña hana isi. Kii héga, i ga tjé Satan ni mimbuu nwé mimbe. (Masoola 20:1-3) Mbus ha nyen mut nye ki nye a ga kon ha bé, to wo, a ga wo ha bé. Ni njel binoñ, bôt ba binam bobasôna ba ba ntéñbe ni Djob, ba ga niñ i boga ni boga ikété Paradis. (Masoola 22:1-3) Ane i ga yilha jôl li Djob lipubi. Baa hala a nkobla le kii? Hala a nkobla le ngéda Ane Djob i ga énél hisi, bôt ba binam bobasôna ba ga ti jôl li Yéhôva lipém.​—Béñge Ndoñi 21, i mamélél ma kaat.

22. Lelaa di nyi le Yésu a bi yila bé kiñe ngéda a bé hana isi, to kunda yada mbus bitugne gwé?

²² Yésu a bi niiga banigil bé i nsoohe le: “Ane yoñ i loo.” Hala a bé sômbôl kal le Ane Djob i bé ngi lo ha ngéda i. Yéhôva a bé lama ndugi téé Ane yé ni yilha Yésu Kiñe i Ane i. Baa Yésu a bi tééba Kiñe nlélém ngéda a bi bet i ngii? Heni. A bé lama bem. Ndék ngéda mbus bitugne gwé, baôma Pétrô bo Paul ba bi unda le ini mbañ i  kaat Tjémbi 110:1 i bé lama yon i ngii Yésu. Mu mbañ i, Yéhôva a nkal le: “Yén i woo wem walôm, letee me yilha babala boñ kéhne makôô moñ.” (Minson mi Baôma 2:32-35; Lôk Héber 10:12, 13) Limbe jôga li ngéda Yésu a bé lama bem ilole a nyila Kiñe?

23. (a) Imbe ngéda Yésu a bi bôdôl énél kiki Kiñe i Ane Djob? (b) Kii di ga nigil i pes i noñ?

²³ Ngandak ñwii ilole ñwii 1914 u nlo, ntôñ bikristen wada, u u ngwés maliga, u bi nok le ñwii u, u ga ba tôbôtôbô ikété mbañ i Bibel. Mam ma ntagbe ikété nkoñ isi ibôdôl i ñwii 1914 ma ñunda le ba bé pot maliga. Yésu a bi bôdôl énél kiki Kiñe mu ñwii u. (Tjémbi 110:2) Ndék ngéda mbus ha, Satan a bi léña hana isi. Jon i len ini, “a ngi gwé ndigi ndék isii ngéda.” (Masoola 12:12) I pes i noñ, di ga kônde tehe mam mape ma ñunda le di niñil mu isii ngéda i. Di ga nigil ki le, ndék ngéda Ane Djob i ga boñ yaga le sômbôl i Djob i bôña hana isi.​—Béñge Ndoñi 22, i mamélél ma kaat.