1. Tangiang na dia do na laho siparsiajaranta?

MARJUTA halak mamboto tangiang na niajarhon ni Jesus, na jotjot digoari Tangiang Hatopan. Marhite tangiang hatopan on, diajari Jesus do siseanna martangiang. Aha do na ditangiangkon? Jala, boasa tangiang hatopan on ringkot di hita?

2. Aha do tolu pangidoan na ringkot na diajarhon Jesus asa tatangiangkon?

² Didok Jesus, ”Songon on ma tangiangmuna: Ale Amanami na di banua ginjang! Sai pinarbadia ma Goarmu! Sai ro ma harajaonmu! Sai saut ma lomo ni roham di banua tonga on songon na di banua ginjang!” (Jaha Mateus 6:9-13.) Boasa diajari Jesus hita manangiangkon tolu pangidoan na ringkot on?​—Ida Lampiran 20.

3. Aha do na ringkot taboto taringot tu Harajaon ni Debata?

³ Nunga taparsiajari goar ni Debata, i ma Jahowa. Jala, nunga taboto sangkap ni Debata tu jolma dohot tu portibi on. Alai, didok Jesus do muse, ”Sai ro ma harajaonmu.” Aha do lapatanna? Parsiajaranta ma aha do Harajaon ni Debata i, aha na laho ulahononna jala songon dia i pabadiahon goar ni Debata.

4. Aha do Harajaon ni Debata i jala ise do rajana?

⁴ Harajaon ni Debata, i ma sada pamarentaon na dipajongjong ni Jahowa di surgo jala Jesus dipillit gabe rajana. Jesus ma ”Raja ni angka raja, Tuhan ni  angka tuan”. (1 Timoteus 6:15) Dumenggan do harajaon ni Jesus sian sude harajaon ni jolma jala gumodang do huaso ni Jesus sian huaso ni sude jolma na mamarenta.

5. Sian dia do Harajaon ni Debata mamarenta? Jala, sahat tudia do pamarentaonNa i mamarenta?

⁵ Opatpulu ari dung dipahehe, manaek ma Jesus tu surgo. Dung i, dimiahi Jahowa ma ibana gabe raja ni harajaonNa. (Ulaon ni Apostel 2:33) On ma pamarentaon ni Debata na laho mamarenta portibi on sian surgo. (Pangungkapon 11:15) I do alana, Harajaon ni Debata i didok ”harajaonna na di banua ginjang i”.​—2 Timoteus 4:18.

6, 7. Aha do na mambahen Jesus i raja na dumenggan sian raja na asing?

⁶ Bibel mandok, Jesus do na dumenggan sian angka raja di portibi on ala, ”Sasadasa do na so olo mate”. (1 Timoteus 6:16) Sude jolma na mamarenta ujungna mate do, alai Jesus ndang na laho mate. Angka na denggan siulahonon ni Jesus tu hita, hilalaonta ma i salelenglelengna.

⁷ Surirang ni Bibel paboahon, Jesus i raja parasi roha jala raja na tigor. Bibel mandok, ”Jadi songgop ma tu ibana Tondi ni Jahowa, Tondi ni habisuhon dohot hapistaran, Tondi ni panuturion dohot hagogoon, Tondi ni parbinotoan dohot biar maradophon Jahowa. Jala halomohononna do hadaulaton maradophon Debata jala ndang manguhum ibana marguru tu parnida ni matana, jala ndang manguhum ibana marguru tu na binege ni pinggolna. Marhitehite hatigoran tahe uhumonna angka na pogos.” (Jesaya 11:2-4) Lomo do rohamu tu raja sisongon i?

8. Sian dia do taboto ndang sahalak ni Jesus mamarenta?

 ⁸ Dipillit Jahowa do jolma laho rap mamarenta dohot Jesus. Songon na didok apostel Paulus tu si Timoteus, ”Anggo benget hita manaon, rap mangarajai ma hita sogot.” (2 Timoteus 2:12) Piga halak do dongan ni Jesus rap mamarenta sian surgo?

9. Piga halak do dongan ni Jesus mamarenta? Jala, mulai nandigan do dipillit Debata nasida?

⁹ Songon naung taparsiajari di Pasal 7, apostel Johannes mandapot parnidaon. Diida ibana adong 144.000 rap dohot Jesus gabe raja di surgo. Ise do 144.000 on? Dipaboa apostel i, nasida i ma, ”angka naung tarsurat Goarna dohot Goar ni Amana di pardompahannasida.” Didok muse, ”Diihuthon nasida do birubiru i, manang tudia pe i laho. Nasida do angka naung tartobus sian hajolmaon.” (Jaha Pangungkapon 14:1, 4.) Si 144.000 on ma halak Kristen na pinillit ni Debata asa ”manggomgomi nasida di atas tano i” rap dohot Jesus. Dung mate nasida, dipahehe ma nasida tu surgo. (Pangungkapon 5:10) Mulai sian masa ni angka apostel ma nasida dipillit Jahowa gabe dohot tu punguan ni raja si 144.000 on.

10. Boasa tadok na dihaholongi Jahowa do hita ala dipillit Ibana Jesus dohot si 144.000 halak gabe raja?

¹⁰ Ala disarihon Jahowa do hita, i do alana umbahen dipillit sian angka jolma laho mamarenta dohot Jesus di surgo. Diboto Jesus do songon dia pangkilalaan ni jolma dohot hasusaan na masa di hajolmaon. Alani i, Jesus ma raja na dumenggan tu hita. Apostel Paulus mandok, boi do Jesus ”mangkilala di angka hagaleonta”, jala ”diguruhon do pangoloion marhite sian na tinaonna i”. (Heber 4:15; 5:8) Diboto si 144.000 i do songon dia  hasusaan ni jolma. Dihilala nasida do hagaleon dohot sahit. Alani i, boi do pos rohanta, diantusi Jesus dohot si 144.000 i do pangkilalaan dohot hasusaan na masa tu  hita.

11. Boasa diajari Jesus angka siseanna martangiang asa saut sangkap ni Debata di surgo?

¹¹ Diajari Jesus angka siseanna martangiang asa saut sangkap ni Debata di surgo. Boasa? Songon naung taparsiajari di Pasal 3, Sibolis mangalo tu Jahowa. Alai, dipaloas Jahowa dope Sibolis dohot surusuruanna maringanan di surgo. Alani i, ndang sude na maringanan di surgo tingki i mangulahon sangkap ni Jahowa. Di Pasal 10, taparsiajari ma taringot tu Sibolis dohot surusuruan na mangihuthon ibana na digoari angka begu.

12. Aha do dua na masa na dipatorang di Pangungkapon 12:10?

¹² Bibel paboahon, ndang sadia leleng dung mamarenta Jesus di Harajaon ni Debata, poranganna ma Sibolis. (Jaha Pangungkapon 12:7-10.) Di ayat 10, dipatuduhon adong dua na laho masa. Dung mamarenta Jesus Kristus gabe raja di Harajaon ni Debata, didabu ma Sibolis sian surgo tu tano on. Songon na laho taparsiajari, nunga masa be on sude.

13. Aha do na masa dungkon didabu Sibolis sian surgo?

¹³ Dipatorang Bibel ma songon dia las ni roha ni surusuruan di surgo dung didabu Sibolis dohot angka surusuruanna sian surgo. Tajaha ayat na mandok, ”Marlas ni roha ma hamu, angka banua ginjang dohot pangisina!” (Pangungkapon 12:12) Las ni roha dohot hadameon ma di surgo ala sude pangisina nunga mangulahon lomo ni roha ni Debata.

14. Aha do na masa tu tano on ala naung didabu Sibolis sian surgo?

 ¹⁴ Alai, marjea ma tano on. Masa ma hasusaan, ”ai nunga tuat Sibolis i tu hamu”, jala ”marrimas situtu; ai diboto, otik nama tingkina!” (Pangungkapon 12:12) Sibolis marrimas ala naung didabu sian surgo jala diboto ndang sadia leleng nai ripashononNa ma ibana. Diulahon ibana ma sude na mambahen hasusaan dohot parungkilon di sandok tano on.

15. Aha do sangkap ni Debata tu tano on?

¹⁵ Alai, ndang muba sangkap ni Debata. Marsangkap do Ibana asa mangolu salelenglelengna jolma di Paradeiso di tano on. (Psalmen 37:29) Songon dia do Harajaon ni Debata boi pasauthon i?

16, 17. Aha do na dipaboa surirang di Daniel 2:44 taringot Harajaon ni Debata?

¹⁶ Surirang na disurat di Daniel 2:44 mandok, ”Alai di tingki hinarajahon ni angka raja i, padirion ni Debata, na di surgo i, sada harajaon na so tarpapatu [hot] ro di salelenglelengna, gomgomanna pe ndang pasahatonna tu bangso na asing; ropuhanna do tahe sogot saluhut angka harajaon i, jala pasingkononna, alai hot do anggo na sasada i ro di saleleng ni lelengna.” Aha do na pinaboa ni surirang on taringot Harajaon ni Debata?

¹⁷ Na parjolo, dipaboa tu hita molo Harajaon ni Debata i, mulai mamarenta ”di tingki hinarajahon ni angka raja i”. Lapatanna, jongjong dope angka pamarentaon ni jolma tingki Harajaon ni Debata mulai mamarenta. Na paduahon, hot do Harajaon ni Debata i salelenglelengna ndang adong na boi manaluhon harajaon i. Jala na patoluhon, Harajaon ni Debata marporang mangalo sude pamarentaon na adong di tano on. Alai, monang do Harajaon ni Debata jala  sasada pamarentaon i nama mamarenta di liat portibi on. On ma pamarentaon na denggan na hinirim ni sude jolma.

18. Aha do goar ni porang na parpudi tingki Harajaon ni Debata mangalo pamarentaon ni portibi on?

¹⁸ Songon dia do Harajaon ni Debata i manaluhon sude harajaon na adong di tano on? Andorang so masa porang na parpudi na digoari Armagedon, liluhonon ni angka surusuruan na mangihuthon Sibolis ma ”angka raja ni liat portibi on, laho papunguhon nasida tu hamusuon na di ari na bolon i, ari ni Debata, Sigomgom saluhutna”. Songon i ma pamarentaon ni jolma di portibi on marporang mangalo Harajaon ni Debata.​—Pangungkapon 16:14, 16; ida Lampiran 10.

19, 20. Boasa tahaporluhon Harajaon ni Debata mamarenta portibi on?

¹⁹ Boasa tahaporluhon Harajaon ni Debata? Adong tolu alana. Na parjolo, mardosa dope hita, alani i gabe marsahit jala mate. Alai Bibel mandok, mangolu salelenglelengna ma hita di Harajaon ni Debata. Songon na didok di Johannes 3:16, ”Ai songon on do holong ni roha ni Debata di portibi on, pola do Anakna na sasada i dilehon, asa unang mago ganup na porsea di Ibana, asa hangoluan salelenglelengna di ibana.”

²⁰ Na paduahon, tahaporluhon Harajaon ni Debata, ala mangolu dope hita di tongatonga ni angka na jahat. Angka pargabus, panipu dohot na mangulahon parmainanon pe lam godang. Ndang tolap ni jolma laho padengganhon on, holan Harajaon ni Debata do na boi pasohothon i. Ripashonon ni Debata ma angka na mangulahon hajahaton di Armagedon. (Jaha Psalmen 37:10.) Na patoluhon, tahaporluhon Harajaon  ni Debata ala pamarentaon ni jolma ndang tigor, kejam jala jotjot korupsi. Angka pamarentaon on, ndang mangajari jolma asa mangkirim tu Harajaon ni Debata. Songon na didok Bibel muse, molo ”jolma mangarajai donganna jolma mambahen ibana marhinamago”.​—Parjamita 8:9.

21. Songon dia do Harajaon ni Debata pasauthon sangkap ni Debata di tano on?

²¹ Dungkon porang Armagedon, pasauton ni Harajaon ni Debata ma sangkapNa di tano on. Ranteonna ma Sibolis dohot angka surusuruanna, dung i ripashononna. (Pangungkapon 20:1-3) Ujungna, ndang adong be na marsahit manang na mate. Marhite tobusan, sude jolma mangkirim mangolu salelenglelengna di Paradeiso. (Pangungkapon 22:1-3) Harajaon i pabadiahon goar ni Debata. Lapatanna, tingki mamarenta Harajaon ni Debata, sude jolma di tano on pasangaphon goar ni Jahowa.​—Ida Lampiran 21.

22. Sian dia do taboto ndang pintor jongjong Jesus gabe raja dungkon manaek ibana tu surgo?

²² Diajari Jesus angka siseanna martangiang, ”sai ro ma harajaonmu”. On patuduhon na laho ro dope  Harajaon ni Debata i. Jahowa do na pajongjongkon harajaon on jala na mamillit Jesus gabe rajana. Alai, pintor raja do Jesus dungkon manaek tu surgo? Ndang, adong dope na dipaima. Apostel Petrus dohot apostel Paulus patorangkon surirang di Psalmen 110:1 taringot Jesus. Di ayat i didok, ”Hundul ma Ho tu siamunhon, paima hupatunduk angka musum, bahen sidegedegean ni patmu!” (Ulaon ni Apostel 2:32-35; Heber 10:12, 13) Sadia leleng do Jesus paimahon andorang so dipajongjong ibana raja?

23. (a) Andigan do Jesus mamarenta gabe raja? (b) Aha do na laho taparsiajari di pasal na mangihut?

²³ Leleng andorang so taon 1914, adong sada punguan ni halak Kristen naung mamboto taon 1914 i, taon na ringkot di Bibel. Angka na masa mulai sian taon 1914 patuduhon na tutu do na didok ni nasida. Mamarenta ma Jesus gabe raja di taon i. (Psalmen 110:2) Dung i, didabu ma Sibolis tu tano on jala saonari, ”otik nama tingkina”. (Pangungkapon 12:12) Di pasal na mangihut, idaonta ma angka tanda na patuduhon naung mangolu hita di masa i. Jala, ndang sadia leleng nai pasauton ni Harajaon ni Debata ma sangkapNa di tano on.​—Ida Lampiran 22.