1. Lipepo nshi ilyaishibikwa sana ilyo twalasambililapo muli cino cipandwa?

ABANTU abengi balishiba ukupepa ipepo ilyaishibikwa sana ilya, We Shifwe. Yesu apepele ili pepo pa kusambilisha abasambi bakwe ifya kupepa. Finshi alandilepo mwi pepo? Na kabili, mulandu nshi cawamina ukwishibila ili pepo?

2. Fintu nshi fitatu ifyacindama ifyo Yesu atwebele ukulapepela?

² Yesu atile: “E ico imwe mufwile ukupepa ifi, amuti: ‘Shifwe wa mu muulu, ishina lyenu libe ilya mushilo. Ubufumu bwenu bwise. Ukufwaya kwenu kucitwe pano isonde nga mu muulu.’” (Belengeni Mateo 6:9-13.) Cinshi Yesu alandile ukuti tufwile ukulapepela ifi fintu fitatu?—Belengeni Ifyebo na Fimbi pa 20.

3. Finshi tulingile ukwishiba pa Bufumu bwa kwa Lesa?

³ Twalisambilila ukuti ishina lya kwa Lesa ni Yehova. Na kabili, twalisambilila ifyo Lesa afwaya abantu baleikala ne fyo afwaya isonde ukuti libe. Lelo, ni mwi Yesu aloseshe ilyo atile: “Ubufumu bwenu bwise”? Muli cino cipandwa, twalayasuka aya mepusho: Bushe Ubufumu bwa kwa Lesa ni cinshi? Finshi bukacita? Bukalenga shani ishina lya kwa Lesa likabe ilya mushilo?

4. Ubufumu bwa kwa Lesa ni cinshi, kabili Imfumu nani?

⁴ Yehova alikwata ubuteko ubwaba ku muulu kabili Yesu e o asala ukuba Kateka nelyo Imfumu. Baibolo ita ubu buteko ukuti Ubufumu bwa kwa Lesa. Yesu “ni  Mfumu ya shamfumu kabili ni Shikulu wa bashikulu.” (1 Timote 6:15) Takwaba umuntu nangu umo uwingateka bwino abantu ukucila Yesu kabili wa maka sana ica kuti nangu nga twabika bakateka bonse aba pano isonde pamo, te kuti balingane nankwe amaka.

5. Ni kwi Ubufumu bwa kwa Lesa bukaba ilyo bukalateka? Finshi bukalateka?

⁵ Pa numa ya nshiku 40 ukutula apo Yehova abuushishe Yesu ku bafwa, Yesu alibwelelemo ku muulu. Mu kupita kwa nshita, Yehova asalile Yesu ukuba Imfumu ya ubu Bufumu. (Imilimo 2:33) Ubufumu bwa kwa Lesa ubwaba ku muulu e bukalateka isonde na fyonse ifyabamo. (Ukusokolola 11:15) E mulandu wine Baibolo ilandila pa Bufumu bwa kwa Lesa ukuti “Ubufumu bwa ku muulu.”—2 Timote 4:18.

6, 7. Finshi fyalenga Yesu abe imfumu iisuma sana ukucila imfumu shonse isha pano isonde?

⁶ Baibolo ilanda ukuti Yesu alicila imfumu shonse pantu ‘eka fye e ushifwa.’ (1 Timote 6:16) Bakateka bonse balafwa, lelo Yesu ena takatale afwa. Ifintu fyonse ifisuma ifyo Yesu akacitila abantu fikabako umuyayaya.

⁷ Calisobelwe mu Baibolo ukuti Yesu akaba ni Mfumu ya mulinganya no luse. Baibolo itila: “Umupashi wa kwa Yehova ukekala pali ena, umupashi wa mano kabili uwa kwiluka, umupashi wa kupanda amano kabili uwa maka, umupashi wa kwishiba kabili uwa kutiina Yehova; kabili akalasekelela mu kutiina Yehova. Ena takapingule ukulingana ne fyo amona fye, nangu ukukalipila ukulingana ne fyo aumfwa fye. Lelo akapingula abalanda mu bulungami.” (Esaya 11:2-4) Bushe te kuti mufwaye umuntu wa musango uyu aba imfumu yenu?

8. Twaishiba shani ukuti Yesu takaleteka eka?

⁸ Lesa alisala abantu bamo abakalateka pamo na Yesu mu buteko bwa ku muulu. Ku ca kumwenako, Umutumwa  Paulo aebele Timote ati: “Nga twatwalilila ukushipikisha, tukaba ishamfumu no kutekela capamo nankwe.” (2 Timote 2:12) Bushe abakalateka na Yesu bakaba banga?

9. Bushe abakalateka pamo na Yesu bakaba banga? Ni lilali Lesa atampile ukubasala?

⁹ Nga fintu twasambilile mu Cipandwa 7, umutumwa Yohane balimulangile icimonwa kabili amwene Yesu ku muulu aleteka pamo ne mfumu na shimbi shonse pamo 144,000. Bushe ba 144,000 ni bani? Yohane atile “pa mpumi shabo palembelwe ishina lya Mwana wa mpaanga ne shina lya kwa Wishi.” Na kabili atile: “E bakonka Umwana wa mpaanga [e kutila Yesu] konse uko aya. Aba bashitilwe mu bantu.” (Belengeni Ukusokolola 14:1, 4.) Ba 144,000 Bena Kristu aba cishinka abo Lesa asala ‘ukulateka isonde,’ pamo na Yesu. Nga bafwa, balabuushiwa no kuya mu kwikala ku muulu. (Ukusokolola 5:10) Ukutula fye lintu abatumwa bali pano isonde, Yehova alasala Abena Kristu aba cishinka aba kuba imfumu, ba 144,000.

10. Cinshi twingalandila ukuti Yehova alitutemwa pa kupeela Yesu na ba 144,000 amaka ya kututeka?

¹⁰ Yehova alitutemwa sana ica kuti alisala na bantunse abakalateka pamo na Yesu. Yesu akaba kateka umusuma sana pantu alitwishiba bwino. Alishiba ifyo caba ukuba umuntunse ne fyo cumfwika ukucula. Paulo atile Yesu “alatulangulukilako pa kukanapwililika kwesu.” Na kabili ‘alyeshiwa muli fyonse nga ifwe.’ (AbaHebere 4:15; 5:8) Ba 144,000 nabo balishiba ifyo caba ukuba umuntunse. Na kabili, baliculapo ku malwele e lyo balishiba ne fyo cakosa ukuba uushapwililika. Ukwabula no kutwishika, Yesu na ba 144,000 balishiba ifyo tumfwa kabili balishiba na mafya ayo tukwata.

11. Cinshi Yesu aebele abasambi bakwe ukulapepa ukuti ubufwayo bwa kwa Lesa bucitwe ku muulu?

¹¹ Yesu aebele abasambi bakwe ukuti balingile ukulapepa ukuti ukufwaya kwa Lesa kucitwe mu muulu. Cinshi abebele aya amashiwi? Mu Cipandwa 3 twasambilile ukuti Satana Kaseebanya alipondokele Yehova. Ilyo Satana apondweke, Yehova alilekele Satana na bamalaika babipa nelyo ifibanda baikala ku muulu pa nshita iinono. Kanshi te bonse abali mu muulu abalecita ukufwaya kwa kwa Lesa. Mu Cipandwa 10, tuli no kusambilila na fimbi pali Satana ne fibanda.

12. Fintu nshi fibili ifyacindama ifyalembwa pa Ukusokolola 12:10?

¹² Baibolo ilondolola ukuti ilyo fye Yesu bamusontele ukuba Imfumu ya Bufumu bwa kwa Lesa, aali no kuulwa na Satana. (Belengeni Ukusokolola 12:7-10.) Icikomo 10 cilanda pa fintu fibili ifyacindama nga nshi. Ica kubalilapo, Ubufumu bwa kwa Lesa bwatendeka ukuteka kabili Yesu Kristu e Mfumu. Ica bubili, Satana bamutamfya ku muulu kabili aisa pano isonde. Tukasambilila ukuti ifi fintu fyalicitika kale.

13. Finshi fyacitike ku muulu ilyo Satana bamutamfishe?

¹³ Baibolo itila bamalaika ba cishinka balitemenwe sana ilyo Satana ne fibanda fyakwe babatamfishe ku muulu. Tubelenga ukuti: “Sansamukeni, mwe myulu na mwe baikalamo!” (Ukusokolola 12:12) Kanshi pali lelo ku muulu kwaliba umutende kabili bonse ababako balikatana pantu balacita ukufwaya kwa kwa Lesa.

14. Finshi ficitika pano isonde apo nomba Satana balimufumya ku muulu?

¹⁴ Lelo pano isonde pena tapaba umutende. Abantu pano isonde balacula ‘pantu Satana Kaseebanya alikila,’ kabili aliba “ne cipyu icikalamba, pa kwishiba ukuti ali  fye ne nshita inono.” (Ukusokolola 12:12) Satana aliba ne cipyu pantu balimufumya ku muulu kabili alishiba ukuti nomba line bali no kumonaula. Alacita ifintu ifingi pa kuti abantu mwi sonde balecula, balekalipwa, kabili balekwata na mafya.

15. Bushe Lesa afwaya isonde likabe shani?

¹⁵ Nomba ifyo Lesa afwaya ukuti isonde likabe fyena tafyayaluka. Acili alafwaya abantu abapwililika bakekale umuyayaya pano isonde. (Amalumbo 37:29) Bushe Ubufumu bwa kwa Lesa bukalenga shani ifi fikacitike?

16, 17. Finshi tusambilila pali Daniele 2:44 pa Bufumu bwa kwa Lesa?

¹⁶ Baibolo pali Daniele 2:44 yasobele ukuti: “Mu nshiku sha shamfumu isho, Lesa wa mu muulu akemya ubufumu ubushakonaulwe nakalya. Kabili ubo bufumu tabwakashiilwe ku bantu bambi. Bukashonaula no kupwisha aya mabufumu yonse, kabili bwena bukeminina umuyayaya.” Bushe ifi kasesema Daniele asobele fitusambilisha finshi pa Bufumu bwa kwa Lesa?

¹⁷ Ica kubalilapo, tulesambililako ukuti Ubufumu bwa kwa Lesa bwali no kutendeka ukuteka “mu nshiku sha shamfumu isho.” Aya mashiwi yalola mu kuti kwali no kuba amabuteko yambi ayali no kulateka pe sonde pa nshita Ubufumu bwali no kutendeka ukuteka. Ica bubili, tulesambililako ukuti Ubufumu bwa kwa Lesa bwali no kuteka umuyayaya kabili tabwali no kupyanikwapo no buteko bumbi. Ica butatu ca kuti, Ubufumu bwa kwa Lesa bwali no kulwa na mabuteko ya cino calo. Ubufumu bwa kwa Lesa bwali no kucimfya aya mabuteko kabili e buteko fye bweka ubwali no kulateka isonde. Lyena, abantunse bakalatekwa no buteko ubusuma sana ubushatala abubako pe sonde.

18. Bushe inkondo ya kulekeleshako umo Ubufumu bwa kwa Lesa bukalwa na mabuteko ya cino calo baita shani?

 ¹⁸ Bushe Ubufumu bwa kwa Lesa bukatendeka shani ukuteka isonde? Ilyo inkondo ya kulekelesha iyo iitwa ukuti Armagedone ishilatendeka, ifibanda fili no kulufya “ishamfumu sha ba pano isonde shonse, ku kushilonganika ku nkondo ya bushiku bukalamba ubwa kwa Lesa Wa Maka Yonse.” E fyo amabuteko ya bantunse yakalwa no Bufumu bwa kwa Lesa.—Ukusokolola 16:14, 16; belengeni Ifyebo na Fimbi pa 10.

19, 20. Cinshi tufwaila ukuti Ubufumu bwa kwa Lesa bukateke isonde?

¹⁹ Cinshi tufwaila Ubufumu bwa kwa Lesa? Kwaliba imilandu nalimo itatu. Uwa kubalilapo, tatwapwililika, e co tulalwala kabili tulafwa. Lelo Baibolo itila ilyo Ubufumu bwa kwa Lesa bukalateka, tukalaikala umuyayaya. Na kuba, Yohane 3:16 itila: “Lesa atemenwe nga nshi aba pano calo ica kuti apeele Umwana wakwe uwafyalwa eka, ukuti onse uumutetekela ekonaika lelo akabe no mweo wa muyayaya.”

²⁰ Umulandu wa bubili uo tufwaila Ubufumu bwa kwa Lesa wa kuti muno calo twikala na bantu abacita ifyabipa. Abantu abengi balabepa ubufi kabili imibele yabo tayawama. Takuli ico twingacita pa kuti tubafumyepo, lelo Lesa ena akabafumyapo. Bonse abatwalilila ukucita ifyabipa bakabakanda pa Armagedone. (Belengeni Amalumbo 37:10.) Umulandu walenga butatu uo tufwaila Ubufumu bwa kwa Lesa wa kuti amabuteko ya bantunse tayakwata amaka ya kutungulula bwino abantu, yalabacusha kabili aba mu buteko balacita amafisakanwa. Na kabili, tabafwaya ukwafwa abantu ukwishiba Lesa. Baibolo itila, “umuntu atekela umuntu munankwe ku kumucusha.”—Lukala Milandu 8:9.

21. Bushe Ubufumu bukalenga shani ukufwaya kwa kwa Lesa kukacitike pano isonde?

 ²¹ Pa numa ya Armagedone, Ubufumu bwa kwa Lesa bukalenga ukufwaya kwa kwa Lesa kukacitike pano isonde. Ku ca kumwenako, Ubufumu bukafumyapo Satana ne fibanda fyakwe. (Ukusokolola 20:1-3) Lyena, takwakabe ukulwala no kufwa. Icilubula e cikalenga abantu bonse aba cishinka bakekale umuyayaya mu Paradaise. (Ukusokolola 22:1-3) Ubufumu bukalenga ishina lya kwa Lesa likabe ilya mushilo. Bushe ici calola mwi? Calola mu kuti ubuteko bwa kwa Lesa nga bwatendeka ukuteka isonde, abantu bonse bakalacindika ishina lya kwa Yehova.—Belengeni Ifyebo na Fimbi pa 21.

22. Twaishiba shani ukuti Yesu tali Imfumu ilyo aali pano isonde nelyo lilya line fye abuushiwe no kubwelelamo ku muulu?

²² Yesu aebele abasambi bakwe ukulapepa ukuti: “Ubufumu bwenu bwise.” Kanshi te kuti tutwishike ukuti ubuteko bwa kwa Lesa bwali no kwisa ku ntanshi. Ico Yehova aali no kubalilapo ukucita, kubikako ubuteko no kulenga Yesu aba Imfumu. Bushe Yehova asontele Yesu ukuba Imfumu ilyo fye abweleele ku muulu? Awe, aali no kulolela. Ilyo papitile imyaka iingi ninshi  Yesu alibuushiwa kale, Petro na Paulo balilandile bwino bwino pali ili lyashi ilyo balandile ifyasobelwe pali Yesu pa Amalumbo 110:1. Muli ubu busesemo Yehova aebele Yesu ati: “Ikala ku kwa kulyo kwandi, mpaka nkalenge abalwani bobe ukuba nga kapuna ka kunyantapo amakasa yobe.” (Imilimo 2:32-35; AbaHebere 10:12, 13) Bushe Yesu aali no kulolela mpaka lilali pa kuti Yehova amusonte ukuba Imfumu?

23. (a) Ni lilali Yesu atendeke ukuteka mu Buteko bwa kwa Lesa? (b) Finshi tukasambililapo mu cipandwa cikonkelepo?

²³ Pa myaka iingi ninshi no mwaka wa 1914 taulafika, ibumba lya Bena Kristu aba cishinka balishibe ukuti uyu mwaka wali no kuba uwacindama ukulingana no busesemo bwa mu Baibolo. Ificitika mu calo ukutula ulya mwaka, filanga ukuti ifyo baishibe fishinka. Muli ulya wine mwaka e lyo Yesu atendeke ukuteka. (Amalumbo 110:2) Tapapitile na nshita, Satana balimupoosele pa nshi kabili pali ino nshita “ashele fye ne nshita iinono.” (Ukusokolola 12:12) Mu cipandwa cikonkelepo tukasambilila ifishinka na fimbi ifilanga ukuti tuleikala muli iyi yine nshita iinono. Na kabili, tukasambilila ukuti nomba line Ubufumu bwa kwa Lesa buli no kulenga ubufwayo bwa kwa Lesa bukacitike pano isonde.—Belengeni Ifyebo na Fimbi pa 22.