1. ¿Kasa wekirajaainjatka anain sünain ekirajaayakat tüü?

WATTA maʼin saalii wayuu aapaka süchiki tü padrenuestro münakat. Sükajee tia, nüküjain Jesuu namüin na nikirajüinkana jamüinjatüin nanüiki noʼuraajapa. ¿Kasa nuchuntaka Jesuu wanaa sümaa nuʼuraajüin? ¿Jamüsü wayaawatüinjatka saaʼu jamaluʼuluin nünüiki soʼu tia?

2. ¿Jarat tü apünüinsükat kasa wachuntajatka maʼin apüleerua naashin Jesuu?

² Müsü nünüiki Jesuu: «Meerü jünüiki juchuntapa nümüin Maleiwa: ‹Taata Maleiwa chakai sirumatuʼu, kasataalejeseʼe shiʼraajüin wayuu tü pünüliakat otta kojutuin pia sutuma. Wachuntuin pümüin Puluwataainjachin chaa iipünaajee. Kasataalejeseʼe saainjünüin tü keeʼireekat paaʼin yaa mmapaʼa maʼaka sukuwaʼipa putuma chaa iipünaa›» (paashajeʼera Mateo 6:9-13, TNM). ¿Jamüshii wachuntajanaka süpüleerua tia apünüinsükat kasa naashin Jesuu? (Paashajeʼera noota 19).

3. Püküja kasain wekirajaainjatüin anain sünain ekirajaayakat tüü.

³ Watüjaaitpa aaʼu Jeʼwaain nünülia Maleiwa, paʼaraiisüinjatüin tü Mmakat nutuma otta aneerüin sukuwaʼipa wayuu mapeena nutuma. Wekirajaajeerü anain jooluʼu tü nüküjeekalü achiki Jesuu wanaa sümaa «Wachuntuin pümüin Puluwataainjachin chaa iipünaajee» nümüin. Sünain ekirajaayakat tüü, wekirajaajeerü anain jamüinjatüin sukuwaʼipa nutuma Maleiwa süpüla nuluwataainjachin saaʼu tü Mmakat, kasain eeinjatüin nutuma otta jamüinjatüin sukuwaʼipa süpüla shiʼraajüinjatüin wayuu tü nünüliakat otta kojutuin nia sutuma.

4. ¿Jarai chi nüneekakai Maleiwa süpüla nuluwataainjachin?

⁴ Nüikaleʼerüin Maleiwa sukuwaʼipa wanee aluwatawaa chaa  iipünaa otta nüneeküin Jesuu süpüla niainjachin aluwataain nutuma. Müsü sünüiki tü Wiwüliakat nüchiki Jesuu: «Nia chi alanaʼaleekai noulia na aluwataashiikana otta chi miyoʼushikai maʼin noulia na sülaülashiikana mma» (1 Timoteo 6:15, TNM). Alanaʼaleeshia Jesuu sünain pülashin noulia napüshuaʼa na sülaülashiikana mma. Wainmaleesia tü kasa eekat süpüla naaʼinrüin Jesuu wapüleerua suulialeʼeya tü eekat süpüla naaʼinrüin na sülaülashiikana mma.

5. ¿Jalejeeinjachi aluwataain Maleiwa? ¿Kasa nuluwataainjatka aaʼu?

⁵ Oʼunushi Jesuu iipünaamüin 40 kaʼi süchikijee nüsoʼiraain aaʼin, shiasaʼa mapa aikalaainjachi nia süpüla nuluwataainjachin nutuma chi Nüshikai (Aluwataaushikana [Hechos] 2:33). Aluwataainjachi Maleiwa saaʼu tü Mmakat chejee iipünaajee (Alateetkat Mapeena [Apocalipsis] 11:15). Müsüjeseʼe sümüin tü Wiwüliakat iipünaajeejatü tü Nuluwataayakat (2 Timoteo 4:18).

6, 7. ¿Jamüshi anaka Jesuu süpüla nuluwataain suulialeʼeya wayuu?

⁶ Saashin tü Wiwüliakat nia anaʼleekalia Jesuu süpüla aluwatawaa saaʼu wayuu süka «matüjain nia outaa» (1 Timoteo 6:16, TNM). Eeshii süpüla outuin na sülaülashiikana mma, akaisaʼa Jesuu matüjainsai nia outaa. Süpüshuaʼa tü kasa anasü naaʼinrüinjatkat Jesuu wapüleerua eejeerü süpüla kaʼikat süpüshuaʼa.

⁷ Lotuinjatü nukuwaʼipa Jesuu sünain aluwatawaa sümaa amüliajülinjachin nia wayuu. Müsü wanee pütchi aküjünatüjütkalia: «Eejeerü nütchin Jeʼwaa naaʼu, kekiijeechi maʼin, atüjeechi süpüleerua ayaawataa saaʼu sukuwaʼipa wanee kasa, atüjeechi achiawaa, pülasheechi nia otta kojuteechi Jeʼwaa nutuma. Talatashaateerü naaʼin süka mmoluwaain nia neema Jeʼwaa, nnojoleerü süsalain saainjala wayuu nutuma sünainjee neʼe tü kasa niʼrakat jee nnojoleerü nüchiaain wayuu sünainjee tü pütchi naapakat neʼe yalapünaa. Wanaaweerü sukuwaʼipa nutuma tü kasa naaʼinrajatkat süsalapa naainjala na müliakana, otta loteerü nutuma sukuwaʼipa nachiaaya na wayuu  anamiakana» (Isaías 11:2-4). ¿Jamüsü saaʼin pümüin niale aluwataain Jesuu paaʼu?

8. ¿Jamüsü watüjaaka saaʼu nnojoleechin aluwataain Jesuu nümüiwaʼa?

⁸ Saashin tü Wiwüliakat, aneekünüshii waneinnua wayuu süpüla aluwatawaa nümaa Jesuu chaa iipünaa. Jamüshijaʼa chi aluwataaushikai Pablo, müshi nümüin Timoteo: «Müleka wachecherüle waaʼin sünain anoujaa nünain, aluwataweena waya wanaa nümaa» (2 Timoteo 2:12). ¿Jeʼrainjana na wayuu chainjanakana aluwataain chaa iipünaa nümaa Jesuu?

9. (1) ¿Jeʼrainjana na wayuu aluwataainjanakana nümaa Jesuu? (2) ¿Joujachi nuʼttaka Jeʼwaa sünain aneeka na aluwataainjanakana nümaa Jesuu?

⁹ Sünain ekirajaayaka 7, wekirajaa anainrü tü kasa pülasü niʼrakat chi aluwataaushikai Juan, niʼrüin Jesuu sünain aluwatawaa chaa iipünaa otta eejana 144.000 wayuu aluwataakana nümaa. ¿Jaralii naya? Nüküjain Juan ichein naya waneepia nünain chi Anneetchonkai sooʼopünaa tü alatakat namüin. Otta taashishii naya nutuma Maleiwa saʼakajee wayuu (paashajeʼera Alateetkat Mapeena 14:1, 4). Nia Jesuu chi Anneetchonkai otta na 144.000 aluwataainjanakana nümaa, naya noʼutku na anoujashii nüneekakana Maleiwa süpüla aluwatawaa nümaa Jesuu. Outapa naya, asoʼiraamaateerü naaʼin chaa iipünaa (Alateetkat Mapeena 5:10). Oʼttüshi Jeʼwaa sünain aneeka na 144.000 chainjanakana iipünaa soʼujee nakalia na aluwataaushikana.

10. ¿Jamüsü watüjaaka saaʼu alin maʼin waya nüpüla Jeʼwaa süka nüneeküin Jesuu otta 144.000 wayuu süpüla naluwataain?

¹⁰ Aitaʼaleeshiijaʼa maʼin waya nüpüla Jeʼwaa süka nüneeküin waneinnua wayuu süpüla naluwataain nümaa Jesuu. Watüjaa aaʼu aneerüin maʼin sukuwaʼipa aluwatawaa nutuma Jesuu. Müsü nünüiki Pablo nüchiki: «Nieechi Jesús amüliajaka waya saaʼu nülatirüitpain süpüshua tü ooʼulakünaakat aaʼin süka kasa mojusü, saaʼu wayuuin nia maa aka waya» (Hebreokana 4:15; 5:8). Müshiʼiya na 144.000, amülialaajeerü naaʼin waalin süka wayuuin naya wanaa wamaa. Süka kaleʼeruʼuin  naya kaainjalaa, nachecherüin naaʼin suulia tü kasa mojusü suchuntaakat naaʼin otta eeshii ayuuire naya. Watüjaa aaʼu niyaawateerü aaʼu Jesuu otta na 144.000 tü kasa müliakalü atuma waaʼin otta tü kasa alatakat wamüin.

11. ¿Jamüsü nüküjaka Jesuu namüin na nikirajüinkana nachuntajanain süpüla saainjünüin tü keeʼireekat naaʼin Maleiwa chaa iipünaa?

¹¹ Nüküjain Jesuu namüin na nikirajüinkana nachuntajanain süpüla saainjünüin tü keeʼireekat naaʼin Maleiwa yaa mmapaʼa maʼaka sukuwaʼipa nutuma chaa iipünaa. Sünain ekirajaaya 3, wekirajaa anainrü niʼrüijaain wayumüin Satanaa. Nuuʼulaain paala Jeʼwaa Satanaa chaa iipünaa namaa na yolujaakana, müsüjeseʼe nnojoluin saainjünüin tü keeʼireekat naaʼin Maleiwa chaa iipünaa otta nnojoluin paaʼinwain napüshuaʼa na aapieekana sünain aaʼinraa tü keeʼireekat naaʼin Maleiwa. Müshiijeseʼe nachuntajanain süpüla saainjünajatüin tü keeʼireekat naaʼin Maleiwa chaa iipünaa. Sünain ekirajaaya 10, wekirajaajeerü anain sooʼomüin nüchiki Satanaa otta nachiki na yolujaakana.

12. Püküja süchiki tü piamasükat kasa aküjünaka suluʼu Alateetkat Mapeena 12:10.

¹² Saashin tü Wiwüliakat wanaa sümaa nuʼttüin Jesuu sünain aluwatawaa, atkaainjachi nia nümaa Satanaa (paashajeʼera Alateetkat Mapeena 12:7-10). Suluʼu Alateetkat Mapeena 12:10 aküjünüsü süchiki piamasü kasa alatajatka. Palajana, oʼttüinjachi Jesuu sünain aluwatawaa otta süchikijee ojutunuinjachi Satanaa mmapaʼamüin. Wekirajaajeerü anain jooluʼu süchiki alatüitpain tia piamasükat kasa.

13. ¿Jamüsü naaʼin na aapieekana nujutunapa Satanaa iipünaajee?

¹³ Talatüshii maʼin na aapiee oonookana nümaa Maleiwa nujutunapa Satanaa otta na yolujaakana chejee iipünaajee. Müsü sünüiki tü Wiwüliakat: «Anakaja müleka talatüle waaʼin wapüshua waya yaakana iipünaa nümaa Maleiwa» (Alateetkat Mapeena 12:12). Süka nujutunuichipain Satanaa iipünaajee,  talatüshii napüshuaʼa na aapieekana sümaa paaʼinwain naya sünain aaʼinraa tü keeʼireekat naaʼin Maleiwa.

14. ¿Kasa alataka saaʼu tü Mmakat sutuma nujutunuin Satanaa iipünaajee?

¹⁴ Naatapejeʼe maʼin tü alatakat yaa saaʼu tü Mmakat, miyoʼu maʼin müliaa shiʼraka wayuu sainküin mmakat süpüshuaʼa «süka nujutünüichipain chi Yolujaakai» otta «jashichishaatashi maʼi nia, süka nütüjaain saaʼu sünain sülüʼülüin nükalia süpüla ataʼünnaa» (Alateetkat Mapeena 12:12). Jashichishaatashi Satanaa süka nujutunuin iipünaajee otta nütüjaa aaʼu sülüʼülüin nükalia süpüla nuʼutunuin aaʼin. Müshijeseʼe naaʼinrüin wainma kasa shiiʼiree müliain maʼin saaʼin wayuu nutuma.

15. ¿Kasa naaʼinrajatka Maleiwa saaʼu tü Mmakat?

¹⁵ Ayateeria naaʼinrüin Maleiwa tü keeʼireetüjütkalia naaʼin paala nukumajaiwaʼaya tü Mmakat. Ayatayülia keeʼireein naaʼin paʼaraiisüinjatüin tü Mmakat otta kepiain wayuu waneepia saaʼu sümaa lotuin maʼin nakuwaʼipa (Salmo 37:29). ¿Jameerü sukuwaʼipa tia nutuma Maleiwa?

16, 17. ¿Kasa watüjaka süchiki nukuwaʼipa Maleiwa sünain aluwatawaa sünainjee tü sümakat Daniel 2:44?

¹⁶ Müsü tü Wiwüliakat suluʼu Daniel 2:44: «Soʼunnaa naluwataain naya wayuukana, nüikaleʼerüinjatü chi Maleiwa sirumatuʼujeʼewaikai sukuwaʼipa wanee aluwatawaa eeinjatka süpüla kaʼikat süpüshuaʼa. Nnojoleerü jaralüin alaülaajaain saaʼu. Sükajee tia aluwataayakat, najaʼttireerü Maleiwa süpüshuaʼa sukuwaʼipa suluwataaya wayuu, shieetkalaka eein waneepia tü nuluwataayakat». ¿Kasa watüjaka süchiki aluwatawaa nutuma Maleiwa sutuma wetsiikulokot tüü?

¹⁷ Tü palajatkat kasa watüjaka shia nüikaleʼerüinjatüin Maleiwa wanee aluwatawaa «soʼunnaa naluwataain» na sülaülashiikana mma. Makalaka eeinjatüin wayuu aluwataain saaʼu tü Mmakat nuʼttapa Jesuu sünain aluwatawaa nutuma Maleiwa chaa iipünaa. Tü piamakat kasa watüjaka sünainjee shia aluwataainjachin Maleiwa süpüla kaʼikat süpüshuaʼa otta nnojoleechi jaraliin aluwataain nüchikumüin. Tü apünüinkat kasa  watüjaka shia peʼipaainjanain na aluwataashiikana saaʼu tü Mmakat nümaa Maleiwa. Najaʼttireerü Maleiwa süpüshuaʼa sukuwaʼipa suluwataaya wayuu, shieetkalaka eein waneepia tü nuluwataayakat. Shikeraajapa tia, anashaateerü sukuwaʼipa wayuu sutuma Nuluwataainjachin Maleiwa.

18. ¿Kasaichi sünülia tü atkawaa nütkaainjachikalü oʼu Maleiwa namaa na sülaülashiikana mma?

¹⁸ ¿Kaseerü alataka süpülapünaa natkaain na sülaülashiikana mma nümaa Maleiwa? Na yolujaakana nemeejeena «napüshua na sülaülashiikana mma süpüla nakotchajiraain na wayuu namaajanakana süpüla atkawaa nümaa chi Maleiwa Pülashikai maʼi». «Armagedón» sünülia tia atkawaakat, atkaweena na sülaülashiikana mma nümaa Maleiwa, nieechi akanajaka Maleiwa (Alateetkat Mapeena 16:14, 16). (Paashajeʼera noota 10).

19, 20. ¿Jamüsü choʼujaaka maʼin nuluwataainjachin Maleiwa saaʼu tü Mmakat?

¹⁹ ¿Jamüsü choʼujaaka maʼin nuluwataainjachin Maleiwa saaʼu tü Mmakat? Wekirajaa sünain apünüinsü kasa choʼujaaka atuma shia. Palajana, ayuuisü jee outusü wayuu sutuma kaainjalaa. Kateetpajaʼa woʼu waneepia nuluwataapeena Maleiwa saaʼu tü Mmakat. Müsü tü Wiwüliakat: «Süka alin maʼin nüpüla Maleiwa na wayuukana, naapüin nikii chi waneeshikai Nüchon süpüla nnojoliinjanain outuin na eʼitaakana naaʼin nünain otta süpüla katüinjatüin noʼu waneepia» (Juan 3:16, TNM).

²⁰ Piama, mojulaasü maʼin tü wayuukalüirua, shia keejiaka namüin naküjain naʼalain sümüin wayuu, nemeejüin wayuu otta namaʼüjiraain nakuwaʼipa, nnojoishii süpüla wooʼuleʼerüin naya suulia tia, nia neʼe Jeʼwaa ooʼuleʼerüinjachikai tia. Nnojorüle nanouteʼerüin nakuwaʼipa, najaʼttireena naya Jeʼwaa soʼu Armagedón (paashajeʼera 2 Tesalónica 1:8). Tü apünüinkat kasa shia mojulaain maʼin na sülaülashiikana mma, nnojotsü lotuin sukuwaʼipa tü kasa naaʼinrakat otta nnojoishii süpüla nanouteʼerüin tü kasa müliakalü atuma saaʼin wayuu. Nnojotsü namüliajüin wayuu süpüla noonooin sümaa nünüiki  Maleiwa, müsüjeseʼe sümüin tü Wiwüliakat nachiki: «Chi wayuukai aluwataashi naaʼu na wayuukana süpüla numojujain nakuwaʼipa» (Eclesiastés 8:9).

21. ¿Kasa naaʼinrajatka Maleiwa süpüla saainjünüin tü keeʼireekat naaʼin saaʼu tü Mmakat?

²¹ Süchikijee Armagedón, aainjüneerü tü keeʼireekat naaʼin Maleiwa süka nuluwataainjachin saaʼu tü Mmakat. Jamüshijaʼa Satanaa namaa na yolujaakana, asürünnüinjana (Alateetkat Mapeena 20:1-3). Müiria nnojoluin eein ayuulii jee outaa. Sükajee taashin wayuu suulia kaainjalaa nutuma Jeʼwaa, eesü süpüla katüin soʼu wayuu suluʼu tü Paʼaraiisükat. Nayainjana na wayuu oonookana nümaa Jeʼwaa na katüinjanakana oʼu (Alateetkat Mapeena 22:1-3). Nuluwataapeena Maleiwa saaʼu tü Mmakat shiʼraajeerü wayuu süpüshuaʼa tü nünüliakat otta kojuteechi nia sutuma wayuu süpüshuaʼa. (Paashajeʼera noota 20).

22. ¿Jamüsü watüjaaka saaʼu nnojoluin nüʼttamaatüin Jesuu sünain aluwatawaa süchikijeechon nuʼunuin iipünaamüin?

²² Wanaa sümaa yaajachin Jesuu Mmapaʼa, nüküjain namüin na nikirajüinkana nachuntajanain süpüla saainjünüin tü keeʼireekat naaʼin Maleiwa saaʼu Mmakat. Sükajee tü nümakat Jesuu, wayaawata aaʼu nnojoyülüin saainjünüin tü keeʼireekat naaʼin Maleiwa saaʼu mmakat soʼu tia. Süpüla nuluwataainjachin Maleiwa saaʼu tü Mmakat, aapünüinjatü palajana shikii  Aluwatawaa nümüin Jesuu nutuma Maleiwa. ¿Oʼttamaatüshiche Jesuu sünain aluwatawaa wanaa sümaa nuʼunuin iipünaamüin? Nnojo, naʼatapajüin saapünüin nümüin Aluwatawaa nutuma Maleiwa. Müsü nünüiki Jeʼwaa suluʼu Salmo 110:1: «Püikalaa tekialuʼujee sümaʼinruʼu tayamülüin tü püʼünüükalüirua», süchikijee süsoʼiraain naaʼin Jesuu nüküjain Pedro otta Pablo shikeraajüin nünain Jesuu tia pütchikat (Aluwataaushikana 2:32-35; Hebreokana 10:12, 13). Müshijeseʼe naʼatapajüinjachin Jesuu süpüla nuluwataainjachin.

23. (1) ¿Joujachi oʼttüin Jesuu sünain Aluwatawaa? (2) ¿Kasa wekirajaainjatka anain sünain tü wane ekirajaayakat?

²³ Oʼttüshi Jesuu sünain aluwatawaa soʼu juyaka 1914. Süpülapünaa tia, nayaawata aaʼu waneinnua anoujashii shikeraajüinjatüin soʼu 1914 waneirua kasa aküjünatüjütkalia achiki paala suluʼu tü Wiwüliakat. Sutuma wainmain kasachiki alataka soʼujee tü juyakat 1914, atüjaana aaʼu pansaain tü nayaawatakalü aaʼu naya anoujashiikana. Makalaka nuʼttüin Jesuu sünain aluwatawaa soʼu 1914 (Salmo 110:2). Süchikijee tia, nujutunaka Satanaa iipünaajee yaa mmapaʼamüin otta alüʼütsü nükalia süpüla ataʼünaa (Alateetkat Mapeena 12:12). Sünain tü wane ekirajaayakat, wekirajaajeerü anain sooʼomüin süchiki tü kasa wayaawatüinjatkalü anainjee sülüʼülüin maʼin nükalia Satanaa süpüla ataʼünaa otta wekirajaajeerü anain sülüʼülüin sükalia süpüla saainjünüin tü keeʼireekat naaʼin Maleiwa yaa mmapaʼa. (Paashajeʼera noota 21).