1. ¿Mbaʼeichagua orasión rehepa ñañeʼẽta ko kapítulope?

HETA hénte oikuaa pe Padrenuéstro. Jesús ojapo vaʼekue upe orasión ohechauka hag̃ua idisipulokuérape mbaʼéichapa oñemboʼe vaʼerã. ¿Mbaʼépa haʼe ojerure vaʼekue upe orasiónpe? ¿Mbaʼérepa iñimportantete ñandéve g̃uarã upe orasión?

2. Jesús ñanemboʼe jajerure hag̃ua mbohapy mbaʼe, ¿mbaʼépa hína umíva?

² Jesús heʼi vaʼekue: “Peẽ peñemboʼe vaʼerã péicha: ‘Ore Ru reiméva yvágape, toñembotuicha nde réra. Tou ne Rréino, tojejapo ne volunta ko yvy ape ári ojejapoháicha yvágape’” (elee Mateo 6:9-13). ¿Mbaʼérepa Jesús ñanemboʼe jajerure hag̃ua koʼã mbohapy mbaʼe? (Ehecha nóta 20).

3. ¿Mbaʼépa jahecháta koʼág̃a?

³ Umi ótro kapítulope ñaaprende kuri Ñandejára heraha Jehová ha avei mbaʼépa oipota ñandéve g̃uarã. Péro, ¿mbaʼépa heʼise raʼe Jesús ojerurérõ guare Ñandejárape: “Tou ne Rréino”? Koʼág̃a jahecháta mbaʼépa hína Ñandejára Rréino, mbaʼépa ojapóta, ha mbaʼéichapa upe Rréino rupive oñemopotĩta Ñandejára réra.

4. ¿Mbaʼépa hína Ñandejára Rréino, ha mávapepa oiporavo Jehová ogoverna hag̃ua?

⁴ Jehová omoĩ yvágape peteĩ goviérno ha oiporavo Jesúspe ogoverna hag̃ua. Upe goviérnope la Biblia ohenói Ñandejára Rréino. Jesús añoite hína “pe  Rréi omandavéva entéro umi ótro rréigui ha Governánte omandavéva entéro umi ótro governántegui” (1 Timoteo 6:15). Jesús ikatu ojapo hetave mbaʼe porã oimeraẽ ótro governántegui, ha haʼeñoiténte voi ipoderosove entéro umi goviérno oĩvagui ko múndope.

5. a) ¿Moõ guivépa ogovernáta Ñandejára Rréino? b) ¿Ogovernátapa avei ko yvy ape ári?

⁵ Cuarenta día Jesús orresusita haguépe oho jey yvágape. Ha tiémpo rire, Jehová omoĩ chupe Rréiramo ogoverna hag̃ua Irréino (Hechos 2:33). Ñandejára Rréino ogovernáta yvága guive ko múndo (Apocalipsis 11:15). Upévare la Biblia heʼi Ñandejára goviérnore pe ‘Rréino yvagapegua’ (2 Timoteo 4:18).

6, 7. ¿Mbaʼérepa jaʼekuaa Jesús haʼetaha pe mehór governánte?

⁶ La Biblia heʼi Jesús ipoderosoveha oimeraẽ ótro governántegui, pórke “haʼe añoite hína pe ikatuʼỹva omano” (1 Timoteo 6:16). Umi ótro governánte ningo kon el tiémpo omano, péro Jesús nomanomoʼãi arakaʼeve. Ha opaite mbaʼe porã Jesús ojapótava ñanderehehápe oduráta pára siémpre.

⁷ Peteĩ profesía oĩva la Bíbliape omombeʼu Jesús haʼetaha peteĩ Rréi ihústo ha imbaʼeporãva enterovéndi. Isaías 11:2-4 heʼi: “Jehová espíritu oĩta hendive, upévare haʼe iñarandu ha iñentendídota. Upe espíritu rupive orekóta podér, ha omeʼẽta konsého porã. Avei oikuaáta heta mbaʼe ha orrespetáta Jehovápe. Haʼe ndohusgamoʼãi umi héntepe ipíntare, ndojesegimoʼãi la ojeʼévarente oporokastiga hag̃ua. Ha orrespeta rupi Jehovápe haʼe ovyʼáta. Ohusga porãta umi imboriahúvape, ojapóta hustísia hesehapekuéra”. ¿Ndereipotáipa nde peteĩ governánte peichagua?

8. ¿Mbaʼéichapa jaikuaa Jesús nogovernamoʼãiha haʼeño?

 ⁸ Ñandejára oiporavo avei unos kuánto yvypóra iñeʼẽrendúvape ogoverna hag̃ua Jesús ndive yvágape. Por ehémplo, apóstol Pablo heʼi vaʼekue Timotéope: “Jasegíramo ñaaguanta, ñagovernáta avei hendive rréiramo” (2 Timoteo 2:12). ¿Ha mboýpepa ojeporavo oho hag̃ua yvágape ogoverna Jesús ndive?

9. ¿Mboýpa oĩ umi ogovernátava Jesús ndive, ha mbaʼe tiémpo guivépa Ñandejára oiporavo chupekuéra?

⁹ Ñaaprende haguéicha kapítulo 7-pe, apóstol Juan ohecha kuri peteĩ visiónpe Jesús ha umi 144.000 ogovernamaha hína yvágape. ¿Mávapa hína umi 144.000? Juan heʼi umíva haʼeha umi orekóva isyváre Jesús réra ha avei Itúa réra. Upéi heʼi avei haʼekuéra osegiha Jesúspe ‘toho ohohápe ha chupekuéra ojejogua hague yvyporakuéra apytégui’ (elee Apocalipsis 14:1, 4). Umi 144.000 haʼe hína umi kristiáno ifiélva Ñandejárape, ha haʼe oiporavo chupekuéra ogoverna hag̃ua Jesús ndive ko yvy. Haʼekuéra omano rire, oñemoingove jey chupekuéra yvágape (Apocalipsis 5:10). Umi apóstol tiémpo guive Jehová oñepyrũ oiporavo umi kristiáno ifiélva apytégui 144.000 persóna ogoverna hag̃ua Jesús ndive.

10. ¿Mbaʼérepa jaʼekuaa Jehová ñanderayhúgui omoĩha Jesús ha umi 144.000-pe ogoverna hag̃ua?

¹⁰ Jehová ningo ñanderayhueterei ha upévare oiporavo unos kuánto yvypórape ogoverna hag̃ua Jesús ndive. Jesús ohasa vaʼekue heta mbaʼe ko yvy ape ári ha upéicha rupi haʼe ñanentende. Haʼe oikuaa porã mbaʼéichapa oñeñandu peteĩ persóna osufríva hína. Upévare haʼe ogoverna porãta yvyporakuérape. Apóstol Pablo heʼi vaʼekue Jesús ‘ñanentendeha ñanekangy jave, pórke haʼe ohasa vaʼekue avei entéro umi pruéva ñande  jahasáva’ (Hebreos 4:15; 5:8). Umi 144.000 yvypóra ojeporavo vaʼekue oikuaa porã avei mbaʼépa ñande jahasa. Haʼekuéra iñimperfékto rupi hasy ha ojavy vaʼekue avei heta vése. Upévare ñaime segúro Jesús ha umi 144.000 ontende porãitereitaha umi provléma jarekóva ha mbaʼéichapa ñañeñandu.

11. ¿Mbaʼérepa Jesús omboʼe vaʼekue idisipulokuérape ojerure hag̃ua Ñandejárape ojejapo hag̃ua hembipota yvágape?

¹¹ Jahecha haguéicha pe kapítulo 3-pe, Satanás opuʼã kuri Ñandejárare yvágape ha upe rire peteĩ tiémpore Jehová opermiti chupe ha avei umi demóniope osegi oiko yvágape. Upéicha rupi, upe tiémpope naentéroi umi oĩva yvágape ojapo vaʼekue Ñandejára rembipota. Upévare Jesús omboʼe vaʼekue idisipulokuérape ojerure hag̃ua tojejapo Ñandejára rembipota yvágape. Kapítulo 10-pe oñeñeʼẽvéta ñandéve Satanás ha umi demóniore.

12. ¿Mbaʼe iñimportántevapa omombeʼu ñandéve Apocalipsis 12:10?

¹² La Biblia heʼi Jesúsgui oiko riremi Rréi Ñandejára Rréinope, oñorairõ hague Satanás ndive (elee Apocalipsis 12:7-10). Apocalipsis 12:10-pe omombeʼu mokõi mbaʼe iñimportantetereíva oiko vaʼekue. Primero, omombeʼu Ñandejára Rréino oñepyrũmaha ogoverna ha Jesucristo haʼeha pe Rréi. Segundo, Satanáspe oñemosẽha yvágagui ha oñembouha chupe ko yvy ape ári. Umi ótro párrafope jahechavéta mbaʼéichapa oiko kuri koʼã mbaʼe.

13. ¿Mbaʼéichapa ojeiko yvágape oñemosẽ rire Satanáspe upégui?

¹³ La Biblia omombeʼu umi ánhel ovyʼaiterei hague Jehová omosẽrõ guare yvágagui Satanás ha umi demóniope. Apocalipsis 12:12 heʼi: “¡Pevyʼákena peẽ yvága ha peẽ peikóva upépe!”. Koʼág̃a ojeikóma pyʼaguapýpe  ha peteĩ ñeʼẽme yvágape pórke enterove oĩva upépe ojapo Ñandejára rembipota.

14. ¿Mbaʼépa oiko ko yvy ape ári oñemosẽ rire Satanáspe yvágagui?

¹⁴ Ko yvy ape ári katu idiferentete la situasión. Hetave mbaʼe vai oiko pórke Satanás ou ko múndope ha “ipochyeterei hína pórke oikuaa mbykypaitemaha pe tiémpo hembýva chupe” (Apocalipsis 12:12). Satanás ipochyeterei oñemosẽ haguére chupe yvágagui ha oikuaa avei koʼẽrõitéma oñehunditaha chupe. Upévare oparupiete ko yvy ape ári haʼe ojapo heta mbaʼe vai, ombohasa asy ha omoingo vaipa la héntepe.

15. ¿Mbaʼépa Ñandejára oipota yvyporakuérape g̃uarã?

¹⁵ Ñandejára ndoipotái jaiko péicha opa árare. Haʼe ojapo vaʼekue yvypórape perfékto ha oiko hag̃ua pára siémpre peteĩ hardín iporãitereívape ko yvy ape ári. Ha koʼag̃aite peve haʼe oipota upéva ñandéve g̃uarã (Salmo 37:29). Péro, ¿mbaʼéichapa ojehupyty jeýta upéva Irréino rupive? Jahechamína.

16, 17. ¿Mbaʼépa heʼi ñandéve Daniel 2:44 Ñandejára Rréinore?

¹⁶ Pe profesía oĩva Daniel 2:44-pe heʼi: “Koʼã rréi ogovernaha tiémpope, Ñandejára omoĩta peteĩ rréino núnka noñehundimoʼãiva. Ko rréino ndopytamoʼãi ótro puévlo poguýpe. Omonguʼíta ha ohundíta enterove koʼã rréino, ha ko rréino añoite opytáta opa ára g̃uarã”. ¿Mbaʼépa ñanemboʼe ko profesía Ñandejára Rréinogui?

¹⁷ Primero heʼi ñandéve Ñandejára Rréino oñepyrũtaha ogoverna “koʼã rréi ogovernaha tiémpope”. Upéva heʼise Ñandejára goviérno oñepyrũvo ogoverna, umi goviérno umáno oĩtaha gueteri ko yvy ape ári. Segundo, omombeʼu ñandéve Ñandejára Rréino añoite ogovernataha opa árare ha ndaiporimoʼãiha ótro ogovernátava hekovia. Tercero, Ñandejára Rréino  oñorairõta umi goviérno ko mundopeguándi, oganáta upe gérra ha ogovernáta ko múndo kompletoite. Upépe ae jarekóta peteĩ governánte ikatupyrýva ha ojapóva opa mbaʼe hekoitépe.

18. ¿Mbaʼéichapa héra pe gérra guasuete oikótava?

¹⁸ ¿Mbaʼépa oikóta Ñandejára Rréino oñepyrũ mboyvemi oñorairõ umi goviérno ko mundopeguándi? Umi demónio ombotavýta ‘entéro umi rréi ko yvy ariguápe’ ombyaty hag̃ua chupekuéra “pe gerrarã oikótava Ñandejára Todopoderóso ára guasúpe”. Péicha umi goviérno umáno oñorairõta Ñandejára Rréinondi, péro Ñandejára Rréino oganáta. Upe gérra héra Armagedón (Apocalipsis 16:14, 16; ehecha nóta 10).

19, 20. ¿Mbaʼérepa ñaikotevẽtereíma Ñandejára Rréino ogoverna ko múndo?

¹⁹ ¿Mbaʼérepa ñaikotevẽte Ñandejára Rréinore? Mbohapy mbaʼére. Primero, pórke ñande enterove pekadór ha upéicha rupi ñanderasy ha ñamano. La Biblia heʼi Ñandejára Rréino ogoverna vove jaikovetaha pára siémpre. Juan 3:16 heʼi voi: “Ñandejára ningo ohayhueterei umi héntepe, upévare ontrega Itaʼýra peteĩete orekóva, péicha entéro umi ohechaukáva ojeroviaha hese noñehundimoʼãi síno ikatúta oikove pára siémpre”.

²⁰ Segundo, ñande jaiko ko múndope umi hénte iñañáva apytépe. Hetaiterei oĩ ijapu, hovamokõi ha hekovaíva. Ñande ndaikatúi ñarremedia umíva, péro Ñandejára Rréino si ikatu. Armagedónpe oñehundipaitéta umi hénte ojapóva mbaʼe vai (elee Salmo 37:10). Tercero, umi goviérno umáno ikorrúpto, iñaña ha ndaipuʼakái heta mbaʼére. Haʼekuéra noipytyvõi la héntepe  iñeʼẽrendu hag̃ua Ñandejárape. La Biblia heʼi: “Yvypóra omanda hapicháre operhudika hag̃uánte chupe” (Eclesiastés 8:9).

21. ¿Mbaʼéichapa Jehová Rréino oñenkargáta ojejapo hag̃ua ivolunta ko múndope?

²¹ Armagedón rire, Ñandejára Rréino oñenkargáta ojejapo hag̃ua Jehová volunta ko múndope. Upearã haʼe oipeʼáta Satanás ha idemoniokuérape (Apocalipsis 20:1-3). Mbeguekatúpe opáta mbaʼasy ha ñemano. Jesús sakrifísio rupive, umi iñeʼẽrendúva Ñandejárape oikóta opa árare peteĩ hardín iporãitereívape ko yvy ape ári (Apocalipsis 22:1-3). Ñandejára Rréino ombotuicháta Ñandejára réra. ¿Mbaʼépa heʼise upéva? Upéva heʼise Ñandejára Rréino ogoverna vove ko yvy ape ári, enterove yvypóra omombaʼeguasutaha Jehovápe añoite (ehecha nóta 21).

22. ¿Mbaʼérepa jaʼekuaa Jesúsgui ndoikói hague Rréi oĩrõ guare ko yvy ape ári ni ohomírente yvágape?

²² Jesús omboʼe vaʼekue idisipulokuérape oñemboʼe jave ojerure hag̃ua Ñandejárape: “Tou ne Rréino”. Upéva ohechauka Ñandejára Rréino nogovernaiha gueteri upérõ. Jehová omoĩ raẽ vaʼerã igoviérno ha onombra Jesúspe Rréi. ¿Oikópa raʼe Jesúsgui Rréi ohomírente  yvágape? Nahániri. Tekotevẽ kuri ohaʼarõʼimi upearã. Jesús orresusita riréma, apóstol Pedro ha Pablo omombeʼu oñekumpliha Jesús rehe pe profesía oĩva Salmo 110:1-pe. Upe profesíape Jehová heʼi vaʼekue: “Eguapy che deréchape amoĩ meve nde py guýpe entéro umi ne enemígope” (Hechos 2:32-35; Hebreos 10:12, 13). ¿Mboy tiémpopa Jesús ohaʼarõ kuri Jehová omoĩ hag̃ua chupe Rréiramo?

23. a) ¿Arakaʼépa oiko Jesúsgui Rréi Ñandejára Rréinope? b) ¿Mbaʼépa jahecháta kapítulo 9-pe?

²³ Heta áño 1914 mboyve, peteĩ grúpo de persóna oservíva Jehovápe ipyʼaite guive, ohechakuaáma kuri áño 1914 haʼetaha peteĩ áño iñimportánteva. Haʼekuéra oikuaa upe áñope oñekumplitaha peteĩ profesía oĩva la Bíbliape. Ha umi mbaʼe oikóva áño 1914 guive ohechauka ndojavýi hague hikuái. Upe áñope Jesúsgui oiko Rréi ha oñepyrũma ogoverna (Salmo 110:2). Upe riremínte, oñemosẽ Satanáspe yvágagui ha oñembou chupe ko yvy ape ári, ha koʼág̃a ‘mbykypaitéma pe tiémpo hembýva chupe’ (Apocalipsis 12:12). Kapítulo 9-pe jahecháta mbaʼérepa jaʼekuaa oñehundi potaitemaha Satanáspe. Jahecháta avei koʼẽrõitéma Ñandejára Rréino oñenkargataha ojejapo hag̃ua Ñandejára volunta ko yvy ape ári (ehecha nóta 22).