1. ¿Mbae yerurerepa yayemboeta?

JESÚS oiporu metei yerure oechauka jemimboe reta oyerure vaerä. ¿Mbaepa jei jókuae yerurepe? ¿Maerapa ikaviete jókuae yerure yandeveguarä?

2. ¿Mbae mboapɨ mbae ikaviete vaepa Jesús yandemboe yayerure vaerä?

² Jesús jei: “OreRu ara pe reï vae, toyemboeteuka nderee. Tou ndeporookuaía [ndeReino]. Nderemimbota ara pe oyeapo oï rami, toyeapo vi kuae ɨvɨ pe” (emongeta Mateo 6:9-13). ¿Maerapa Jesús yandemboe yaiporu jókuae mboapɨ mbaere? (Emae nota 20).

3. ¿Mbaepa yayemboeta kuae yemboepe?

³ Yayemboema Tumpa jee Jehová vae. Jaeramiñovi yayemboema Tumpa oipota vae kia reta peguarä jare ɨvɨ peguarä. Ërei ¿mbaepa oipota jei Jesús jei yave: “Tou ndeporookuaía”? Yayemboeta Tumpa iReino regua, mbae oyapota jare këraita oyemboeteuka Tumpa jee.

4. ¿Mbaepa Tumpa iReino, jare kiapako Juvicha?

⁴ Jehová oñono metei gobierno arape jare oiparavo Jesús Mburuvicharä. Bibliape jei kuae Reino jaeko Tumpa igobierno. Jesús jaeko “mburuvicha guasu reta Juvicha guasu, Imbaepuere yae ete  mbaepuere güɨnoi vae reta güi vae” (1 Timoteo 6:15). Jesús ipuere oyapo jeta mbae ikaviete vae oipotagüe ïru mburuvicha retagüi jare imbaepuere yae vae opaete ïru retagüi.

5. ¿Kiagüipa omogobierna Tumpa iReino? jare ¿kia retarepa omogobiernata?

⁵ Cuarenta ara oasama oikoveye yave, Jesús ojoye arape. Jaɨkue rupi Jehová oñono iReinope Mburuvicharä (Hechos 2:33). Tumpa igobierno omogobiernata ara güive ɨvɨre (Apocalipsis 11:15). Jáeramo Biblia oñeenɨi Reino “ara pegua” (2 Timoteo 4:18).

6, 7. ¿Maerapa Jesús ikaviete ïru mburuvicha retagüi?

⁶ Biblia jei Jesús imbaepuere yae ïru mburuvicha retagüi echa “jaeño ete ko omanombae vae” (1 Timoteo 6:16). Opaete mburuvicha ɨvɨ pegua reta opa omano, ërei Jesús ngaraai omano. Opaete mbae ikavi oyapo vae ngaraai omokañɨ.

⁷ Bibliape profecía jei Jesús oikota Mburuvicha jupi vae jare iporoparareko vae: “Jese oïta yandeYa iEspíritu; espíritu pɨaarakuaa katu pegua jare arakuaa katu, espíritu yemboarakuaa pegua jare mbaepuere pegua, espíritu oikuaa yae mbae vae, jare oipoɨu yandeYa güi vae. Jare oikuaaukata chupe, oyepoɨu vaerä yandeYa güi. Ngaraa oporojäa oechagüe reño, ani ngaraa mbae jei oendugüe reño; oporojäata ko jupi rupi paravete vae reta re” (Isaías 11:2-4). ¿Reipotapa metei mburuvicha omogobierna vaerä jökorai?

8. ¿Këraipa yaikuaa Jesús ngaraa omogobierna jaeño?

 ⁸ Tumpa oiparavo amogüe kia reta omogobierna vaerä Jesús ndive arape. Echa, apóstol Pablo jei Timoteope: “Jekuaeño ñañemomɨ̈rata yave, jaenungavi ñamogobierna päveta” (2 Timoteo 2:12, NM). ¿Mbovɨpa omogobiernata mburuvicha rami Jesús ndive?

9. a) ¿Mbovɨpa omogobiernata Jesús ndive? b) ¿Kërai yavepa Tumpa omboɨpɨ oiparavo 144.000 vae reta?

⁹ Yayemboema yemboe 7 pe, Tumpa omboyekuaa apóstol Juan oecha vaerä Jesús Mburuvicha rami arape jare jae ndive 144.000 mburuvicha reta. ¿Kia retapa jókuae 144.000? Juan omoësaka “jae reta jesɨva re oyekuatía oï [Jesús] jee jare Tu jee”. Jare jei: “Jae reta yogüɨraja Vecha kuimbae taɨrusu vae ndive [jókuae Jesús] kerupi ojoa rupi. Kuae reta ko Cristo oepɨ ɨvɨ pegua reta ipɨte güi vae” (emongeta Apocalipsis 14:1, 4). 144.000 jaeko cristiano jupi vae Tumpa oiparavo omogobierna vaerä ɨvɨre Jesús ndive. Omano reta yave, oikoveye arape (Apocalipsis 20:4, 6). Apóstol reta iara rupive, Tumpa oiparavo 144.000 cristiano jupi vae mburuvicharä.

10. ¿Këraipa Jehová oechauka yanderaɨu vae oiparavo yave Jesús jare 144.000 vae reta omogobierna vaerä ɨvɨre?

¹⁰ Jehová oyemoambeko yae yanderé jáeramo oiparavo kuimbae reta omogobierna vaerä Jesús ndive. Jesús ikavi yaeta omogobierna echa yandekuaa kavi. Jae oikose kuimbae rami jáeramo oikuaa yaiporara vae. Pablo jei Jesús yandeparareko, ipuere “yandeparareko ko ñanepɨ̈ratambae re” jare  “oiporara opaete morojäa reta yande rami” (Hebreos 4:15; 5:8). 144.000 jaeramiñovi oikuaa kërai ñañemosiente vae. Oiporaravi mbaeyoa jare mbaerasɨ reta. Jáeramo yaikuaa kavi Jesús jare 144.000 vae reta oikuaa kavi kërai ñañemosiente jare yemboavai reta ñanoi vae.

11. ¿Maerapa Jesús omboe jemimboe retape oyerure oyeapo vaerä Tumpa oipota vae arape?

¹¹ Jesús omboe jemimboe retape oyerure vaerä jare oyeapo vaerä Jehová jei vae arape. ¿Maerapa? Yayemboema yemboe 3 pe, Aña guasu Satanás oñemopüa Jehová kotɨ. Satanás jare iaña reta oñemopüa yave, Jehová omaeño yogüɨreko vaerä arape michi pegua. Jáeramo arape mbaetɨko opaete oyapo reta Tumpa jei vae. Yemboe 10 pe yaikuaata Satanás regua jare iaña retare.

12. ¿Mbae mókoi ikaviete vaepa omombeu Apocalipsis 12:10?

¹² Biblia omoësaka oyeapoma Jesús Mburuvicharä Tumpa iReinope yave, oñeraro Aña guasu ndive (emongeta Apocalipsis 12:7-10). Versículo 10 omombeu kavi mókoi mbae oasata vaere. Tumpa iReino omboɨpɨ omogobierna Cristo ndive Mburuvicha rami jare Aña guasu oyemombouka aragüi ɨvɨpe. Yayemboeta, kuae reta oasama vae.

13. ¿Mbaepa oasa arape Aña guasu oyemombouka jokogüi yave?

¹³ Biblia omombeu Aña guasu jare iaña reta oyemombouka aragüi, ángel reta jupi vae oyerovia. Jáeramo jei: “¡Peyerovia ara jare pɨpegua reta!” (Apocalipsis 12:12). Añave oime pɨakatu metei ramiño  arape echa opaete jokope ñogüɨnoi vae oyapo Tumpa oipota vae.

14. Aña guasu oyemombouka rupive aragüi, ¿mbaepa oasa ɨvɨpe?

¹⁴ Ërei, ɨvɨpe mbaetɨ yaiko jökorai. Mbae ikavimbae vae oasa kia retare “echa aña guasu ogüeyɨ ma” jare “iyarasɨ yae reve, echa jae oikuaa michi peguaño ma oikota” (Apocalipsis 12:12). Aña guasu iyarasɨ yae oï. Oyemombouka aragüi jare oikuaa ɨmaäma oata oñemokañɨ vaerä. Jáeramo opaete ɨvɨ rupi oyapo mbae ikavimbae vae oiporarauka vaerä kia retape.

15. ¿Mbaepa oipota Tumpa ɨvɨ peguarä?

¹⁵ Ërei Tumpa oipota vae ɨvɨ peguarä mbaetɨ oipoepɨ. Jae jekuaeño oipota kia reta sɨmbi vae oiko avei vaerä metei paraíso ɨvɨpe (Salmo 37:29). Jayave, ¿këraitapa oyapo kuae Tumpa iReino?

16, 17. ¿Mbaepa jei Daniel 2:44 pe Tumpa iReino regua?

¹⁶ Profecía Daniel 2:44 pe jei: “Kuae mburuvicha guasu reta iara rupi, Tumpa ara pe oï vae omopüata metei mborookuaía mbaetɨ eteita oyemboai vae, jare mbaetɨta kuae mborookuaía oyeeya ïru tëta ipo pe; omonguruvita jare omokañɨteita opaete kuae mborookuaía reta, ërei jae oikota jekuae avei”. ¿Mbaepa yandemboe kuae profecía Tumpa iReino regua?

¹⁷ Tenonde, omombeu Tumpa iReino omogobiernama “kuae mburuvicha guasu reta iara rupi”. Kuae oipota jei Tumpa iReino omboɨpɨ omogobierna yave oimetavi ɨvɨpe ïru gobierno reta. Jaɨkue rupi omombeuvi, Tumpa iReino oiko aveita jare  ngaraai oyepoepɨ ïru gobierno ndive. Jare taɨkuete, omombeu Tumpa iReino oñerarota gobierno reta ɨvɨ pegua ndive. Tumpa iReino omoamɨrita jare jaeño opɨtata omogobierna vaerä ɨvɨpe. Jayave kia reta güɨnoita metei gobierno ikavi yae vae.

18. ¿Mbaepa jee ñeraro guasu Tumpa iReino jare gobierno reta ɨvɨ pegua ndive?

¹⁸ ¿Mbaepa oyapota Tumpa iReino omogobierna vaerä ɨvɨre? Ndei oväe ñeraro guasu iyapɨ vae mbove, Armagedón jee vae, aña reta ombotavɨta “mburuvicha guasu reta jëta guasu ñavo rupi omboatɨ oñeraro vaerä Tumpa Imbaepuere yae vae iporojäa iara pe”. Jökoraiko, gobierno ɨvɨ pegua reta oñerarota Tumpa iReino kotɨ (Apocalipsis 16:14, 16; emae nota 10).

19, 20. ¿Maerapa ñamonecesita Tumpa iReino omogobierna vaerä ɨvɨre?

¹⁹ ¿Maerapa ñamonecesita Tumpa iReino? Ñamonecesita kuae ramo: Tenonde, yandeyoa ramo, jáeramo yandembaerasɨ jare ñamano. Ërei Biblia jei Tumpa iReino igüɨpe yaiko aveita. Jáeramo Juan 3:16 pe jei: “Tumpa oaɨu yae ɨvɨ pegua reta. Jáeramo omee Taɨ jaevaeño vae, oipotagüe güɨrovia jese vae güɨnoi vaerä tekove opambae vae, ngaraa ojo kañɨtei pe”.

²⁰ Mokoía, ñamonecesita Tumpa iReino yaiko kia reta pochɨ yae vae reta ipɨtepe ramo. Oime jeta iyapu vae, ombotavɨ vae jare iyaguasa pota vae. Yande mbaetɨ yandepuere yamboai, ërei Tumpa omboaita. Kia reta jekuaeño oyapo mbae ikavimbae vae  oyemboaitako Armagedónpe (emongeta Salmo 37:10). Mboapɨa mbaere ñamonecesita Tumpa iReino ramo jaeko mburuvicha ɨvɨ pegua reta pochɨ yae jare oporombotavɨ vae. Mbaetɨ omborɨ kia reta oyapo vaerä Tumpa jei vae. Biblia jei: “Kuimbae güɨnoi mbaepuere ïru reta re vae rupi oyapo ikavimbae iyeupe” (Eclesiastés 8:9).

21. ¿Këraipa kuae Reino oyapoukata Tumpa oipota vae ɨvɨpe?

²¹ Oasama Armagedón yave, Tumpa iReino oyapoukata Tumpa oipota vae ɨvɨpe. Omokañɨta Aña guasu jare iaña reta (Apocalipsis 20:1-3). Mbegüepe, ngaraama kia imbaerasɨ ani omano. Yandereepɨ ramo, opaete kia reta jupi vae ipuereta oiko avei paraísope (Apocalipsis 22:1-3). Kuae Reino oyemboeteukata Tumpa jee. ¿Mbaepa oipota jei jókuae? Oipotako jei Tumpa igobierno omogobiernama ɨvɨre yave, opaete kia reta omboeteta Jehová jee (emae nota 21).

22. ¿Këraipa yaikuaa Jesús mbaetɨko oyeapo Mburuvicharä oiko ramboeve ɨvɨpe jare mbaetɨvi oikoveye rupive?

²² Jesús omboe jemimboe retape oyerure vaerä:  “Tou ndeporookuaía”. Kuae oechauka Tumpa igobierno outa kuri vae. Tenonde Jehová oñonota igobierno jare oyapota Jesús Mburuvicharä. ¿Arape ojo rupivepa oyeapo mburuvicharä? Mbaetɨ, oäroko. Jesús oikoveye yave, Pedro jare Pablo omoësaka kavi profecía Salmo 110:1 pe oï vae oyembopo Jesúsre. Kuae profecíape Jehová jei: “Eguapɨ cheakatu kotɨ, nderovaicho reta opa regua añono ndepɨ igüɨ pe” (Hechos 2:32-35; Hebreos 10:12, 13). ¿Mbovɨpa oäro Jesús, Jehová oñono vaerä Mburuvicharä?

23. a) ¿Kërai yavepa omboɨpɨ Jesús omogobierna Mburuvicha rami Tumpa iReinope? b) ¿Mbaepa yayemboeta ïru yemboepe?

²³ Ndei 1914 mbove, metei atɨ cristiano ipɨakavi vae reta oikuaa jókuae año ikavieteko profecía reta Bibliape oï vae. Opaete mbae oasa ɨvɨre vae 1914 güive oechauka jae reta jei vae añeteteko. Jesucristo omboɨpɨ omogobierna jókuae añope (Salmo 110:2). Jaɨkue rupi, Aña guasu oyemombouka ɨvɨpe jare añave “michi peguaño ma oikota” (Apocalipsis 12:12). Ïru yemboepe yaechata yaikoma jókuae ara rupi. Jaeramiñovi yayemboeta Tumpa iReino oyapoukata Tumpa oipota vae ɨvɨpe (emae nota 22).