1. Sala lihe limenyikene rhwaganirako?

BANTU banene baba bamenyere esala liyirikwa sala lya Darha. Yesu alikoleseze elyola sala omu kuyigiriza abanafunzi bage gurhe bakasalira. Yesu alisalirire eju ya bichi? Na bulagurhe elyola sala lirhuherhere akamaro?

2. Bintu bihe bisharhu by’akamaro Yesu alirhuyigirize kusalira eju yabyo?

² Yesu aliderhere, “Mukwanene okusalira ntya: ‘Darha oli omu mbingu, ezino lyawe lichesibwe. Obwami bwawe buyinje. Obulonza bwawe bujirike oku gulu kuguma n’omu mbingu.’” (Osome Matayo 6:9-13.) Bulagurhe Yesu alirhuyigirize okusalira eju y’ebyola bintu bisharhu? Olole amahugulo ma 20, bukurasa bwa 216.

3. Bichi rhukwanene kumenya oku bilolere Obwami bwa Mungu?

³ Rhwayigire oku ezino lya Mungu ye Yehova. Rhwanashuba kuyiga obulonza bwa Mungu buli buhe eju y’abantu n’egulu. Aliko si, bichi Yesu alonzanga kuderha amango aderha, “Obwami bwawe buyinje”? Mu enola sura, rhwabona Obwami bwa Mungu che chichi, ebintu nji bwakola na gurhe nji bwakuza ezino lya Mungu.

4. Obwami bwa Mungu che chichi, na nde Mwami w’Obola Bwami?

⁴ Yehova ashimikire oburhegesi embingu. Ebiblia ebuyirikire Bwami bwa Mungu. Yehova achishogere  Yesu abe Mwami w’obola Bwami. Yesu ali “Mwami wa balala bali barhambula nka bami, na Waliha wa balala bali barhegeka nka bawaliha.” (1 Timoteo 6:15) Aherhe obuhashe b’okujirira abantu ebintu binja bwenene kulusha buli mukulu yeshi w’epolitike. Na chiro boshi bachiheba haguma, Yesu aherhe emisi kubalusha.

5. a) Ngahe Obwami bwa Mungu buli? b) Bichi Obwami bwa Mungu nji bwarhegeka?

⁵ Siku 40, Yesu amala fuka agaluka embingu. Enyuma ya siku zigeke, Yehova amujira Mwami w’Obwami bwage. (Matendo 2:33) Ebiblia ederhere oku Obwami bwa Mungu buli “bwami bw’embingu.” (2 Timoteo 4:18) K’okuderha oku buli embingu, nji bwanarhegeka egulu eyi bowe bunali embingu.​—Ufunuo 11:15.

6, 7. Bulagurhe Yesu ali mwami mwinja bwenene kulusha abami boshi b’egulu?

⁶ Ebiblia ederhere oku Yesu ali mukulu kulusha abami boshi b’egulu, bulala yewe yenyine “yerhakafa.” (1 Timoteo 6:16) Abakulu boshi b’egulu banaluha banafa, s’aliko Yesu yewe arhakafa. Ebintu byoshi nj’arhujirira nji byabaho esiku n’amango.

⁷ Bulebi buguma bwe Biblia buderhere oku Yesu nj’aba Mwami w’okunali na munya bonjo bunene. “Eroho lya Yehova nji lyaba enyanya zage, eroho ly’obwenge n’okurhegera, eroho ly’empanulo n’emisi, eroho ly’obumenyi n’okuyubaha Yehova; nj’agwarha obusime omu kuyubaha Yehova.” Arhakacha olubanja kugerera oku by’ali abona n’amasu mage changwa oku bibamubwirire. “Nj’achirira abarhachigalire [abakene] olubanja omu kunali.” (Isaya 11:2-4) Wakasima ogwarhe omwami oli kuguma naye si?

8. Gurhe rhumenyere oku Yesu nj’arharhambula yenyine?

⁸ Mungu achishogere bantu baguma yi baja kuba  bami embingu haguma na Yesu. Entumwa Paulo y’alibwirire Timoteo ntya: “Nka rhugenderere okulembera, nerhu nji rhwanarhambula haguma naye.” (2 Timoteo 2:12) Bantu banga nji baba bami haguma na Yesu?

9. a) Bami banga nji barhambula haguma na Yesu? b) Kurhenga mango machi Mungu arhonderaga kuchishoga abami nji barhambula haguma na Yesu?

⁹ Esura ya 7 ya chinola chitabu, eyerekene gurhe entumwa Yohana y’abonekerwaga. Abona Omwami Yesu haguma na bandi bami 144 000. Abola bami bali bande? Yohana aderhere oku “ezino lyage [ezino lya Yesu] n’ely’Eshe liyandikirwe oku malanga mabo.” Ashuba kuyongera ntya: “Bali balala bali bagenderera kukulikira Omwana buzi [Yesu] hoshi anajire. Abala bagulirwe omu bantu.” (Osome Ufunuo 14:1, 4.) Abola 144 000 bali bakristu bimana Mungu achishogere yi “barhambula oku gulu” haguma na Yesu. Amango bamafa, banafuka n’okuja kulama embingu. (Ufunuo 5:10) Kurhangira omu siku z’entumwa yi Yehova arhonderaga kuchishoga abakristu bimana, yi baba mw’echila chigusho ch’abami 144 000.

10. Yehova arheganyize oku Yesu n’abola 144 000 barhambule abantu. Bulagurhe eby’ola biyerekene oku anarhusima?

¹⁰ Yehova arhusima bwenene, ch’echarhumire arheganya Abantu oku nji babe Bami haguma na Yesu. Yesu nj’aba murhegesi mwinja, bulala achigerere kuba muntu. Akarhumenyerera bulala naye alibukire kuguma nerhu. Paulo aderhere oku Yesu nj’arhuyunvira obonjo, bulala aba amenyerere obufe bwerhu, “anachigerere geregezwa kuguma nerhu omu bintu byoshi.” (Waebrania 4:15; 5:8) N’abola 144 000, bamenyerere amalibuko merhu, kuguma nerhu, nabo balwisize obufe bwabo, banachigerere kulwala. K’okuderha oku rhwakanihira Yesu  n’abola 144 000 bulala nji bamenyerera oku rhuchiyunva n’amalibuko merhu.

11. Bulagurhe Yesu aliyigirize abanafunzi bage oku basalire obulonza bwa Mungu bujirike embingu?

¹¹ Yesu aliyigirize abanafunzi bage oku basalire obulonza bwa Mungu bujirike embingu. Bulagurhe? Rhwaliyigire omu sura ya 3, oku Shetani Ibilisi achiyahwire ku Mungu. Enyuma y’obola bugamba, Yehova alekerera Shetani n’abandi bamalayika barhaliri bimana [abazimu] bayorhe embingu ku kasanzi kageke. K’okuderha oku arhali bamalayika boshi baliri bajira obulonza bwa Mungu omu mbingu. Omu sura ye 10, nji rhwayiga bintu binene eju ya Shetani n’abazimu.

12. Bintu bihe bibiri by’akamaro biderherwe omu chitabu cha Ufunuo 12:10?

¹² Ebiblia ederhere, oku enyuma wa bisanzi bigeke Yesu ali Mwami, akajirire evita haguma na Shetani. (Osome Ufunuo 12:7-10. *) Ufunuo 12:10 ederhere kuyerekera bintu bibiri by’akamaro: 1) Obwami bwa Mungu burhegekerwe na Yesu, bw’arhondere kurhegeka. 2) Balibirha ku Shetani embingu n’okumukabula oku gulu. Nk’okurhwayiga, ebyola bintu byayenere.

13. Bichi byalibere embingu Shetani amala kulibirhwako?

¹³ Ebiblia ederhere oku bamalayika bimana baliherhe obusime, amango Shetani n’abazimu bage balibirhwako embingu. Ederhere ntya: “Musimage mw’embingu, nenyu mwemulamiremo!” (Ufunuo 12:12) Nantyo, embingu hali omurhula n’obuguma, bulala boshi baliyo yi bakola obulonza bwa Mungu.

14. Bichi byabere kunola gulu kurhenga Shetani alibirhirweko embingu?

 ¹⁴ Arhali kubili oku gulu. Abantu yi balibuka n’ebintu bibi. Bulagurhe? “Bulala Ibilisi ayandagere” oku gulu anaherhe “oburhe bunene, amenyere oku aherhe esiku zigeke bwenene.” (Ufunuo 12:12) Shetani aherhe oburhe bunene. Alibirhirweko embingu, anamenyere oku achibirwa hale hanola hofi. Ali ajira byoshi agalire, y’arhulerhera amalibuko n’ebibazo.

15. Obulonza bwa Mungu eju y’egulu buli buhe?

¹⁵ Obulonza bwa Mungu eju y’egulu burhasaga kuhindamuka. Yehova asimire abantu bashinganene balame esiku zoshi omu Paradizo kunola gulu. (Zaburi 37:29) Aliko si, gurhe Obwami nji bwajira obulonza bwa Mungu buyenere?

16, 17. Bichi olwandiko lwa Danieli 2:44 lurhuyigirize eju y’Obwami bwa Mungu?

¹⁶ Danieli 2:44 emenyeseze ntya: “Omu mango m’abola bami, Mungu w’embingu nj’ayumanza Obwami burhakaharabiswa chiro n’eliguma. N’obola Bwami burhakahabwa oku lwindi lubaga. Nji bwavunangula n’okumala amola mami moshi, nabo bonyine nji bwanarhegeka esiku zirhaherhe buzinda [esiku n’amango].” Bichi obula bulebi bwakarhuyigiriza eju y’Obwami bwa Mungu?

¹⁷ 1) Obwami bwa Mungu bwakarhondere okurhegeka “omu mango m’abola bami.” K’okuderha oku amango Obwami bwa Mungu bwakarhondere kurhegeka, amandi marhegesi makabere machiliho. 2) Obwami bwa Mungu nji bwarhegeka esiku n’amango, na nta bwindi burhegesi nji bwarhegeka ahali habo. 3) Nji haba evita ahakagarhi k’Obwami bwa Mungu n’amarhegesi ma linola gulu. Obwami bwa Mungu nji bwahima evita.  Nantyo, egulu lyoshi lyanarhegekwa na burhegesi buguma; burhegesi bwinja bwenene kuyerekera abantu.

18. Gurhe evita ahakagarhi k’Obwami bwa Mungu n’amarhegesi m’abantu liyirikirwe?

¹⁸ Evita ahakagarhi k’Obwami bwa Mungu n’amarhegesi m’abantu liyirikirwe Armagedoni; (olole amahugulo me 10, bukurasa bwa 210). Gurhe nji byaba embere elyola vita lirhondere? Abazimu [amaroho mabi] nji bashumika “abami boshi bayikere kunola gulu, omu kubagusha haguma oku vita ly’olusiku lukulu lwa Mungu Ogala Byoshi.” (Ufunuo 16:14, 16) Amarhegesi moshi m’abantu nji malwisa Obwami bwa Mungu.

19, 20. Bulagurhe rhukenere Obwami bwa Mungu?

¹⁹ Bulagurhe rhukenere Obwami bwa Mungu? Oku bugeke, eju ya mpanvu esharhu. 1) Rhukenere Obwami bwa Mungu bulala rhuli banyabyaha n’eju y’echola, rhunalwala n’okufa. S’aliko, Ebiblia ederhere oku amango Obwami bwa Mungu nji bwarhondera kurhegeka egulu, rhwanalama esiku n’amango. Yohana 3:16 ederhere ntya: “Mungu alisimire egulu bwenene, ahana Omwana wage w’echinege, yi buliyeshi wamuyemera amenye ahanwa, s’aliko apate akalamo k’esiku n’amango.”

²⁰ 2) Rhukenere Obwami bwa Mungu, bulala rhuturenwe n’abantu babi. Bantu banene balibabesha, n’okulyongofa [kuzimba]. Abandi balibakola eby’obubaraga. Rhurhakababuza okukola ebyola bintu bibi. S’aliko, oku Armagedoni, Mungu nj’ashandaza balala boshi barhalonzeze okuhindamuka. (Osome Zaburi 37:10.) 3) Rhukenere Obwami bwa Mungu bulala marhegesi manene magambirwe, mali malerha ebintu bibi, manali m’obulyalya. Marhaheba abantu omurhima bakenge Mungu.  Ebiblia ederhere ok’omuntu arhegeka owabo omu kumubabaza.​—Muhubiri 8:9.

21. Gurhe Obwami bwa Mungu nji bwajira obulonza bwage bujirike oku gulu?

²¹ Enyuma ye Armagedoni, Obwami bwa Mungu nji bw’ajira obulonza bwa Mungu bujirike oku gulu. Omufano, njakula Shetani n’abazimu. (Ufunuo 20:1-3) Oku buzinda, nta muntu nji wachilwala na nta muntu nji wachifa. Kugerera enchungu, abantu boshi bali bimana embere za Mungu nji balama esiku zoshi omu Paradizo. (Ufunuo 22:1-3) (Olole amahugulo ma 21, bukurasa bwa 216) Obwami bwa Mungu nji bwachesa ezino lya Mungu. Ebyola biderhere oku amango bwarhondera kurhegeka egulu, abantu boshi nji banakuza ezino lya Mungu.

22. Gurhe rhumenyere oku Yesu arhalibere Mwami amango aliri oku gulu n’amango amala fuka?

²² Yesu aliyigirize abanafunzi bage baheme ntya omu sala: “Obwami bwawe buyinje.” Obwami bwa Mungu bwakayinjire omu siku zayinja. Yehova akarhangire kushimika obola Bwami n’okujira Yesu Mwami. Amango Yesu agalukaga omu mbingu, aba Mwami hanahola si?  Nanga. Alikwanene alindire. Gurhe rhumenyere ntyo? Siku zigeke Yesu afukire, Petro na Paulo baderha oku obulebi buli omu chitabu cha Zaburi 110:1 bwaliderhere eju yage. M’obola bulebi, Yehova abwira Yesu “oku ayikale omu kulyo kwage” n’okulindira “kugera amango aheba abashombanyi bage” eshishi y’amagulu mage. (Matendo 2:32-35; Waebrania 10:12, 13) Siku zinga Yesu alilindirire?

23. a) Mango machi Yesu abaga Mwami w’Obwami bwa Mungu? b) Bichi rhwayiga omu sura ekulikireho?

²³ Myaka minene embere y’omwaka gwa 1914, echigusho cha abakristu b’emirhima minja baliyigire amalebi me Biblia, banamenya oku ogola mwaka gwakabere gw’akamaro, (olole amahugulo ma 22, bukurasa bwa 217). Kurhangira omwaka gwa 1914, ebili byajirika omu gulu biyerekene oku baliderhere okuli. Ogola mwaka gu Yesu arhonderaga kurhegeka. (Zaburi 110:2) Siku zigeke enyuma y’ahola, Shetani akabulwa oku gulu. Asigeze “bisanzi bigeke bwenene.” (Ufunuo 12:12) Omu sura ekulikireho, nji rhwabona ebintu biyerekene oku rhulamire ebyola “bisanzi bigeke.” Nji rhwanashuba kuyiga gurhe hanola hofi, obulonza bwa Mungu bwajirika oku gulu kugerera Obwami bwage.