1. Ano ang bantog nga pangamuyo nga istoryahan naton?

MINILYON ang nakahibalo sang bantog nga pangamuyo nga ginatawag Amay Namon, ukon Pangamuyo sang Ginuo. Paagi sini, gintudluan ni Jesus ang iya mga disipulo kon paano mangamuyo. Ano ang iya ginpangamuyo? Kag ngaa importante gid sa aton subong ini nga pangamuyo?

2. Ano ang tatlo ka butang nga gintudlo ni Jesus nga ipangamuyo naton?

² Nagsiling si Jesus: “Gani, mangamuyo kamo sing subong sini: ‘Amay namon nga yara sa langit, pakabalaanon ang imo ngalan. Magkari ang imo Ginharian. Matuman ang imo kabubut-on sa duta subong sang sa langit.’” (Basaha ang Mateo 6:9-13.) Ngaa gintudlo ni Jesus sa aton nga ipangamuyo inang tatlo ka butang?—Tan-awa ang Endnote 20.

3. Ano ang dapat naton mahibaluan parte sa Ginharian sang Dios?

³ Natun-an naton nga ang ngalan sang Dios amo si Jehova. Natun-an man naton kon ano ang katuyuan sang Dios para sa mga tawo kag sa duta. Pero ano ang buot silingon ni Jesus sang nagsiling sia: “Magkari ang imo Ginharian”? Tun-an naton subong kon ano ang Ginharian sang Dios, ano ang himuon sini, kag paano sini mapakabalaan ang ngalan sang Dios.

4. Ano ang Ginharian sang Dios, kag sin-o ang Hari sini?

⁴ Naghimo si Jehova sang isa ka gobierno sa langit kag ginpili si Jesus nga mangin Hari sini. Ginatawag ini  sang Biblia nga Ginharian sang Dios. Si Jesus “ang Hari sang mga nagagahom subong mga hari kag Ginuo sang mga nagagahom subong mga ginuo.” (1 Timoteo 6:15) Mas madamo sing mahimo nga maayo si Jesus sangsa kay bisan sin-o nga gumalahom nga tawo. Bisan tingbon pa ang gahom sang tanan nga lider sang kalibutan, mas gamhanan gihapon si Jesus.

5. Halin sa diin magagahom ang gobierno sang Dios? Ano ang gamhan sini?

⁵ Pagligad sang 40 ka adlaw sa tapos ginbanhaw si Jesus, nagbalik sia sa langit. Sang ulihi, gintangdo sia ni Jehova nga Hari sang Ginharian. (Binuhatan 2:33) Ang gobierno sang Dios nga ara sa langit magagahom sa duta. (Bugna 11:15) Amo nga ginatawag sang Biblia ang Ginharian sang Dios nga “langitnon nga Ginharian.”—2 Timoteo 4:18.

6, 7. Ngaa mas maayo si Jesus sangsa bisan sin-o nga tawo nga hari?

⁶ Ang Biblia nagasiling nga si Jesus labaw sa bisan sin-o nga hari kay sia “lamang ang indi mamalatyon.” (1 Timoteo 6:16) Ang tanan nga tawo nga nagagahom mapatay gid, pero si Jesus indi. Ang tanan nga maayo nga butang nga himuon ni Jesus para sa aton magapadayon asta san-o.

⁷ Ang tagna sa Biblia nagasiling nga si Jesus mangin isa ka matarong kag maluluy-on nga Hari: “Magakunsad sa iya ang espiritu ni Jehova, ang espiritu sang kaalam kag paghangop, ang espiritu sa paglaygay kag pagkagamhanan, ang espiritu sang ihibalo kag ang kahadlok kay Jehova. Magakalipay sia sa pagkahadlok kay Jehova. Indi sia maghukom suno lang sa makita niya, ukon magsabdong suno lang sa mabatian niya. Magahukom sia [ukon, magalaygay] sing matarong sa mga kubos [ukon,  mga imol].” (Isaias 11:2-4) Gusto mo bala sing amo sina nga hari?

8. Ngaa masiling naton nga indi lang si Jesus ang magagahom?

⁸ Nagpili ang Dios sing mga tawo nga magagahom upod kay Jesus sa gobierno sa langit. Halimbawa, ginsilingan ni apostol Pablo si Timoteo: “Kon padayon kita nga magbatas, magagahom man kita subong mga hari kaupod niya.” (2 Timoteo 2:12) Pila ang magagahom nga hari kaupod ni Jesus?

9. Pila ang makaupod ni Jesus nga magagahom? San-o nagsugod ang Dios sa pagpili sa ila?

⁹ Natun-an naton sa Kapitulo 7, nga nakita ni apostol Juan sa palanan-awon si Jesus bilang Hari sa langit upod ang 144,000 ka iban pa nga hari. Sin-o ang 144,000? Ginpaathag ni Juan nga “may ngalan [ni Jesus] kag ngalan sang iya Amay sa ila agtang.” Kag nagsiling pa sia: “Padayon sila nga nagasunod sa Kordero [nga, si Jesus] bisan diin sia magkadto. Ginbakal sila halin sa katawhan.” (Basaha ang Bugna 14:1, 4.) Ang 144,000 amo ang matutom nga mga Cristiano nga ginpili sang Dios para ‘gamhan ang duta subong mga hari’ kaupod ni Jesus. Kon mapatay sila, pagabanhawon sila para sa kabuhi sa langit. (Bugna 5:10) Sugod sang panahon sang mga apostoles, nagapili na si Jehova sang matutom nga mga Cristiano para mangin bahin sang 144,000 nga mangin hari.

10. Ngaa ang paggahom ni Jesus kag sang 144,000 sa mga tawo nagapakita nga palangga kita ni Jehova?

¹⁰ Palangga gid kita ni Jehova amo nga nagpili sia sang mga tawo nga magagahom kaupod ni Jesus. Mangin maayo gid nga manuggahom si Jesus kay naintiendihan niya kita. Naeksperiensiahan niya ang pag-antos sang tawo. Nagsiling si apostol Pablo nga naintiendihan ni Jesus ang aton ginabatyag, “makapakita [sia] sing  kahanuklog [ukon, simpatiya] sa aton mga kaluyahon,” kag “natilawan [sia] sa tanan nga paagi kaangay sa aton.” (Hebreo 4:15; 5:8) Nahibaluan man sang 144,000 kon ano ang kabuhi sang tawo. Kag nag-antos man sila bangod sa pagkadiperpekto kag balatian. Gani makasalig gid kita nga indi lang ang aton ginabatyag ang naintiendihan ni Jesus kag sang 144,000 kundi pati na ang aton mga problema.

11. Ngaa gintudluan ni Jesus ang iya mga disipulo nga ipangamuyo nga matuman ang kabubut-on sang Dios sa langit?

¹¹ Gintudluan ni Jesus ang iya mga disipulo nga ipangamuyo nga matuman ang kabubut-on sang Dios sa langit. Ngaa? Natun-an naton sa Kapitulo 3 nga nagrebelde si Satanas nga Yawa kay Jehova. Sa tapos nga nagrebelde si Satanas, ginpasugtan sia ni Jehova kag ang indi matutom nga mga anghel, ukon mga demonyo, nga magpabilin anay sa langit. Gani indi tanan sa langit nagahimo sang kabubut-on sang Dios. Matun-an pa gid naton sa Kapitulo 10 ang parte kay Satanas kag sa mga demonyo.

12. Ano ang duha ka importante nga hitabo nga ginasugid sang Bugna 12:10?

¹² Ginpaathag sang Biblia nga sa tapos magpungko si Jesus bilang Hari sang Ginharian sang Dios, makig-away sia kay Satanas. (Basaha ang Bugna 12:7-10.) Ginasugid sang bersikulo 10 ang duha ka importante nga hitabo. Nagsugod sa paggahom ang Ginharian sang Dios nga ang Hari amo si Jesucristo, kag gintagbong si Satanas sa duta halin sa langit. Sa matun-an pa naton, natabo na ini.

13. Ano ang natabo sa langit sang gintabog si Satanas?

¹³ Ginasugid sang Biblia ang kalipay sang matutom nga mga anghel sa tapos gintabog si Satanas kag ang iya mga demonyo sa langit. Mabasa naton: “Magkalipay  kamo nga mga langit kag kamo nga nagaistar sa sini!” (Bugna 12:12) May paghidait kag paghiusa na sa langit kay ang tanan nagahimo na sang kabubut-on sang Dios.

14. Ano ang natabo sa duta kay gintagbong si Satanas halin sa langit?

¹⁴ Pero lain gid ang kabuhi sa duta. Malain ang nagakatabo sa mga tawo “bangod ang Yawa nagpanaug” nga “may daku nga kaakig, kay nahibaluan niya nga malip-ot na lamang ang iya tion.” (Bugna 12:12) Akig gid si Satanas. Gintagbong sia halin sa langit, kag nahibaluan niya nga malapit na lang sia laglagon. Ginahimo niya ang tanan para manggamo, maghatag sing kasakit, kag paantuson ang mga tawo sa bilog nga duta.

15. Ano ang katuyuan sang Dios para sa duta?

¹⁵ Pero wala nagbag-o ang katuyuan sang Dios para sa duta. Gusto niya gihapon nga mag-istar ang perpekto nga mga tawo sa paraiso sa duta sing wala katapusan. (Salmo 37:29) Paano ina tumanon sang Ginharian sang Dios?

16, 17. Ano ang ginasiling sa aton sang Daniel 2:44 parte sa Ginharian sang Dios?

¹⁶ Ang tagna sa Daniel 2:44 nagasiling: “Sa panahon sini nga mga hari, ang Dios sang langit magatukod sing isa ka ginharian nga indi gid malaglag. Ini nga ginharian indi pag-ihatag kay bisan sin-o nga tawo. Dugmukon sini kag laglagon ining tanan nga ginharian, kag ini lamang ang magapabilin sing dayon.” Ano ang ginatudlo sini nga tagna sa aton parte sa Ginharian sang Dios?

¹⁷ Una, nagasiling ini nga ang Ginharian sang Dios magasugod sa paggahom “sa panahon sini nga mga hari.” Buot silingon, may mga gobierno pa sa duta kon magsugod sa paggahom ang Ginharian. Ikaduha, nagasiling ini nga ang Ginharian sang Dios indi gid malaglag kag indi gid pagbuslan sang bisan ano nga gobierno. Kag ikatlo,  magainaway ang Ginharian sang Dios kag ang mga gobierno sa sini nga kalibutan. Madaug ang Ginharian sang Dios kag ini lamang ang gobierno nga magagahom sa bilog nga duta. Amo ini ang pinakamaayo nga gobierno para sa mga tawo.

18. Ano ang tawag sa katapusan nga inaway sang Ginharian sang Dios kag sang mga gobierno sa sini nga kalibutan?

¹⁸ Paano buslan sang Ginharian sang Dios ang mga manuggahom sa duta? Antes sang katapusan nga inaway nga ginatawag Armageddon, patalangon sang mga demonyo ang ‘mga hari sa bug-os nga duta agod tipunon sa inaway nga mahanabo sa daku nga adlaw sang Dios nga Labing Gamhanan.’ Huo, ang mga gobierno sang tawo makig-away sa Ginharian sang Dios.—Bugna 16:14, 16; tan-awa ang Endnote 10.

19, 20. Ngaa kinahanglan naton ang paggahom sang Ginharian sang Dios sa bilog nga duta?

¹⁹ Ngaa kinahanglan naton ang Ginharian sang Dios? May tatlo ka rason. Una, bangod makasasala kita, nagamasakit kita kag nagakapatay. Pero ang Biblia nagasiling nga sa paggahom sang Ginharian sang Dios, mabuhi na kita sing wala katapusan. Ang matuod, ang Juan 3:16 nagasiling: “Ginhigugma gid sang Dios ang kalibutan amo nga ginhatag niya ang iya bugtong nga Anak, agod ang tanan nga nagatuo sa iya indi malaglag kundi makatigayon sang kabuhi nga wala sing katapusan.”

²⁰ Ikaduha, bangod napalibutan kita sang malain nga mga tawo. Madamo ang nagabinutig, nagapangdaya, kag mga imoral. Ang Dios lamang ang makadula sa ila. Ang mga tawo nga padayon nga nagahimo sing malain laglagon sa Armageddon. (Basaha ang Salmo 37:10.) Ikatlo, bangod ang gobierno sang tawo maluya, mapintas, ukon korap. Wala sila nagabulig sa mga tawo nga magtuman sa  Dios. Ang Biblia nagasiling nga “ginagamhan sang tawo ang iya isigkatawo sa iya kahalitan.”—Manugwali 8:9.

21. Paano siguraduhon sang Ginharian nga matuman ang kabubut-on sang Dios sa duta?

²¹ Pagkatapos sang Armageddon, siguraduhon sang Ginharian sang Dios nga matuman ang kabubut-on sang Dios sa duta. Halimbawa, dulaon sini si Satanas kag ang iya mga demonyo. (Bugna 20:1-3) Sa ulihi, wala na sing magamasakit ukon mapatay. Bangod sa gawad, ang tanan nga matutom nga tawo mahimo na mabuhi sing wala katapusan sa Paraiso. (Bugna 22:1-3) Pakabalaanon sang Ginharian ang ngalan sang Dios. Ano ang buot silingon sini? Buot silingon nga kon maggahom na ang gobierno sang Dios sa bilog nga duta, dayawon na sang tanan nga tawo ang ngalan ni Jehova.—Tan-awa ang Endnote 21.

22. Ngaa makasiling kita nga wala pa naghari si Jesus sang ari sia sa duta ukon pagkatapos gid niya mabanhaw?

²² Gintudluan ni Jesus ang iya mga disipulo nga mangamuyo: “Magkari ang imo Ginharian.” Maathag nga magagahom ang gobierno sang Dios sa ulihi. Tukuron anay ni Jehova ang iya gobierno kag himuon si Jesus nga Hari. Nangin Hari bala dayon si Jesus sang nagbalik  sia sa langit? Wala, kinahanglan pa niya maghulat. Pagkatapos mabanhaw si Jesus, gin-athag ini ni Pedro kag ni Pablo sang gin-aplikar nila ang tagna sa Salmo 110:1 kay Jesus. Sa tagna si Jehova nagsiling: “Pungko ka sa akon tuo tubtob mahimo ko ang imo mga kaaway nga palatungan sang imo mga tiil.” (Binuhatan 2:32-35; Hebreo 10:12, 13) Daw ano kadugay mahulat si Jesus nga himuon sia ni Jehova nga Hari?

23. (a) San-o si Jesus nagsugod sa paggahom bilang Hari sang gobierno sang Dios? (b) Ano ang matun-an naton sa masunod nga kapitulo?

²³ Madamo nga tinuig antes sang 1914, may grupo na sang sinsero nga mga Cristiano nga nakaintiende nga mangin importante ini nga tuig sa tagna sang Biblia. Ang mga natabo sa kalibutan halin sang 1914 nagapamatuod nga insakto gid sila. Si Jesus nagsugod sa paghari sina nga tuig. (Salmo 110:2) Dayon, gintagbong si Satanas sa duta, kag subong “malip-ot na lamang ang iya tion.” (Bugna 12:12) Sa masunod nga kapitulo, hibaluon naton ang dugang nga pamatuod nga nagakabuhi na kita sa sina nga panahon. Tun-an man naton nga sa indi madugay siguraduhon sang Ginharian sang Dios nga matuman ang kabubut-on sang Dios sa duta.—Tan-awa ang Endnote 22.