1. Olẹ vẹ ma gwọlọ ta ẹme kpahe na?

IMA ahwo buobu a riẹ olẹ nọ a re se olẹ Ọsẹ mai nọ ọ rrọ obọ odhiwu, hayo Olẹ Olori na. Jesu ọ rọ olẹ nana wuhrẹ ilele riẹ epanọ a rẹ lẹ. Eme ọ lẹ kẹ evaọ olẹ nana? Kọ fikieme olẹ nana u ro wuzou kẹ omai nẹnẹ?

2. Didi eware esa nọ i wuzou Jesu o wuhrẹ omai nọ ma lẹ kẹ?

² Jesu ọ ta nọ: “Enẹ wha rẹ lẹ: ‘Ọsẹ mai nọ ọ rrọ obọ idhiwu na, jọ odẹ ra o jọ fuafo [hayo, ru re odẹ ra o jọ ọrẹri]. Jọ Uvie ra o ze. Jọ oreva ra u rugba evaọ otọakpọ na, wọhọ epanọ o rrọ evaọ obọ odhiwu.’” (Se Matiu 6:9-13.) Fikieme Jesu o ro wuhrẹ omai nọ ma lẹ kẹ eware esa yena?​—Rri Ẹme-Oruvẹ 20.

3. Eme u fo nọ ma rẹ riẹ kpahe Uvie Ọghẹnẹ?

³ Ma wuhrẹ no vẹre inọ Jihova họ odẹ Ọghẹnẹ. Yọ ma ta ẹme kpahe oghẹrẹ uzuazọ nọ Ọghẹnẹ ọ gwọlọ nọ ahwo-akpọ a yeri no, gbe oghẹrẹ nọ Ọghẹnẹ ọ gwọlọ nọ otọakpọ na o rẹ jọ. Rekọ eme họ otọ ẹme nọ Jesu ọ ta nọ: “Jọ Uvie ra o ze” na? Obọnana ma bi ti wuhrẹ kpahe eware esa nana, eme họ Uvie Ọghẹnẹ, eme Uvie na u ti ru, gbe oghẹrẹ vẹ u ti ro ru odẹ Ọghẹnẹ fihọ fuafo?

4. Eme họ Uvie Ọghẹnẹ, kọ ono họ Ovie nọ o ti su ei?

⁴ Jihova ọ rehọ egọmeti jọ mu obọ odhiwu, ọ tẹ salọ Jesu re ọ jọ Ovie nọ o wuzou riẹ. Ebaibol na o se  egọmeti yena Uvie Ọghẹnẹ. Jesu họ “Ovie enọ e rrọ ivie gbe Olori enọ e rrọ ilori.” (1 Timoti 6:15) Jesu ọ rẹ sai ru eware iwoma vi ohwo-akpọ kpobi nọ ọ rrọ osu, yọ a tẹ maki ku isu ahwo-akpọ kpobi kugbe dede, Jesu ọ ga vi ai ghele.

5. Bovẹ egọmeti Ọghẹnẹ o ti su no ze? Kọ diẹse o ti su?

⁵ Nọ a kpare Jesu no uki ze no, Jesu ọ rria otọakpọ na edẹ udhuvẹ, kẹsena o te zihe kpobọ odhiwu. Uwhremu na Jihova ọ tẹ rehọ iẹe mu Ovie ọrọ Uvie na. (Iruẹru Ikọ 2:33) Egọmeti Ọghẹnẹ o ti su otọakpọ na no obọ odhiwu ze. (Eviavia 11:15) Oyejabọ nọ a ro se Uvie Ọghẹnẹ inọ “Uvie obọ odhiwu” na.​—2 Timoti 4:18.

6, 7. Ẹvẹ Jesu o ro woma vi ivie ahwo-akpọ kpobi?

⁶ Ebaibol na ọ ta nọ Jesu ọ rro vi ovie kpobi evaọ otọakpọ na keme “ọye ọvo họ ọnọ o re whu hu.” (1 Timoti 6:16) Isu efa kpobi evaọ akpọ na a re whu, rekọ Jesu o re whu vievie he. Ewoma kpobi nọ Jesu o ti ru kẹ omai ọ te jọ bẹdẹ bẹdẹ.

⁷ A jọ Ebaibol ruẹaro kpahe Jesu nọ ọ te jọ Ovie nọ o wo ohrọ-oriọ, ọnọ o re kienyẹ ohwo ho, a ta kpahe iẹe nọ: “Ẹzi Jihova ọ te ruọ ẹe oma, ẹzi areghẹ gbe ọrọ otoriẹ, ẹzi nọ ọ rẹ rọ kẹ ohrẹ gbe ọrọ ogaga, ẹzi eriariẹ gbe ọrọ ozodhẹ Jihova. Ozodhẹ Jihova họ oware nọ o te kẹe evawere. Orọnikọ oware nọ ọ rọ ibiaro riẹ ruẹ o ti ro bruoziẹ hẹ, hayo kọ oware nọ ọ rọ ezọ riẹ yo ọvo ọ te rọ kẹ ọwhọkuo ho [hayo ohrẹ]. O ti bruoziẹ iruori na ababọ okienyẹ.” (Aizaya 11:2-4) Kọ ogbẹrọnọ ovie otiọye na whọ gwọlọ?

8. Ẹvẹ ma rọ riẹ nọ Jesu ọvo o ti su isuẹsu na ha?

 ⁸ Ọghẹnẹ ọ salọ ahwo-akpọ jọ re a lele Jesu su evaọ egọmeti obọ odhiwu na. Wọhọ oriruo, Pọl ukọ na ọ ta kẹ Timoti nọ: “Ma tẹ ruabọhọ bi thihakọ, ma te jọ ivie nọ i ti lele iei su re.” (2 Timoti 2:12) Bro ahwo a te jọ ivie nọ i ti lele Jesu su?

9. Bro ahwo a ti lele Jesu su? Oke vẹ Ọghẹnẹ o ro mu ai họ ẹsalọ?

⁹ Wọhọ epanọ ma wuhrẹ evaọ Uzou avọ 7, Jọn ukọ na ọ jọ eruẹaruẹ ruẹ Jesu nọ ọ rrọ Ovie evaọ obọ odhiwu avọ ivie idu udhuhrẹ-gbene (144,000) efa nọ e rrọ kugbei. Amono họ ahwo idu udhuhrẹ-gbene (144,000) na? Jọn ọ ta nọ: “A kere odẹ [Jesu] avọ odẹ Ọsẹ riẹ họ aruezo rai.” O te je fibae nọ: “Enana họ enọ i bi lele Omogodẹ na [koyehọ Jesu] ẹsikpobi kpohọ oria kpobi nọ ọ be nya. A dẹ enana no udevie ahwo-akpọ ze wọhọ ibi ọsosuọ rọkẹ Ọghẹnẹ gbe Omogodẹ na.” (Se Eviavia 14:1, 4.) Ahwo idu udhuhrẹ-gbene (144,000) na yọ Ileleikristi nọ i wo ẹrọwọ nọ Ọghẹnẹ ọ salọ inọ a kuomagbe Jesu re a “jọ ivie nọ i ti su otọakpọ na.” Nọ a te whu, a rẹ kpare ae kpohọ uzuazọ evaọ obọ odhiwu. (Eviavia 5:10) Anwọ oke ikọ na ze, Jihova ọ be rọ salọ Ileleikristi nọ i wo ẹrọwọ re a jọ usu ivie idu udhuhrẹ-gbene (144,000) na.

10. Fikieme Jesu avọ ahwo idu udhuhrẹ-gbene nọ Jihova ọ salọ re a su ahwo-akpọ na u ro dhesẹ nọ Jihova o you omai?

¹⁰ Jihova ọ gwọlọ ewoma mai te epanọ ọ rọ salọ ahwo-akpọ re a kuomagbe Jesu su omai. Jesu ọ te jọ emamọ ovie keme ọ riẹ oghẹrẹ nọ ma rrọ. Ọ riẹ epanọ ohwo-akpọ ọ rrọ gbe uye nọ o be bẹ ohwo-akpọ. Pọl ọ ta nọ Jesu ‘ọ rẹ sai roro kẹ omai evaọ oria nọ  ma jọ ga ha,’ ọ tẹ jẹ rrọ “ọnọ a dawo no evaọ kabọ kabọ wọhọ omai.” (Ahwo Hibru 4:15; 5:8) Ahwo idu udhuhrẹ-gbene (144,000) na a riẹ oghẹrẹ nọ ohwo-akpọ ọ rrọ re. A riẹ epanọ eware e rẹ thọ ohwo-akpọ obọ te, yọ a mọ ẹyao no re. Fikiere u mu omai ẹro nọ Jesu avọ ahwo idu udhuhrẹ-gbene (144,000) na a ti roro kẹ omai keme a riẹ oghẹrẹ nọ ma rrọ gbe ebẹbẹ nọ ma wo.

11. Fikieme Jesu o ro wuhrẹ ilele riẹ nọ a lẹ inọ jọ a jọ obọ odhiwu ru oreva Ọghẹnẹ?

¹¹ Jesu o wuhrẹ ilele riẹ nọ a lẹ inọ jọ a ru oreva Ọghẹnẹ evaọ obọ odhiwu. Fikieme? Ma wuhrẹ evaọ Uzou avọ 3 nọ Setan Ẹdhọ ọ wọso Jihova. Nọ Setan ọ wọso Jihova no, Jihova ọ kẹ riẹ avọ ikọ-odhiwu hayo idhivẹri nọ i kuomagbei na uvẹ re a jọ obọ odhiwu omoke jọ. Fikiere, evaọ oke nana orọnikọ ikọ-odhiwu na kpobi a je ru oreva Ọghẹnẹ hẹ. Ma te jọ Uzou avọ 10 wuhrẹ eware efa kpahe Setan avọ idhivẹri na.

12. Eware ivẹ vẹ nọ i wuzou gaga a ta ẹme kpahe evaọ Eviavia 12:10?

¹² Ebaibol o dhesẹ nọ okenọ a tẹ rehọ Jesu mu Ovie ọrọ Uvie Ọghẹnẹ no, u ti kri hi o ve ti lele Setan fi ẹmo. (Se Eviavia 12:7-10.) Owọ avọ 10 o ta ẹme kpahe eware ivẹ jọ nọ i wuzou gaga. Orọ ọsosuọ, Jesu Kristi o mu Uvie Ọghẹnẹ họ esuo. Orọ avivẹ, a gbolo Setan no obọ odhiwu ziọ otọakpọ na. Wọhọ epanọ ma be te ruẹ evaọ ewuhrẹ mai na, eware nana e via no.

13. Eme ọ via evaọ obọ odhiwu nọ a gbolo Setan no obei ze no?

 ¹³ Ebaibol na o ta kpahe oghọghọ nọ ikọ-odhiwu nọ i bi yoẹme kẹ Ọghẹnẹ a wo nọ a gbolo Setan avọ idhivẹri riẹ no obọ odhiwu ze no. Ma se nọ: “Wha ghọghọ whai idhiwu gbe enọ e be rria ae eva!” (Eviavia 12:12) Enẹna udhedhẹ gbe okugbe ọvo o rrọ obọ odhiwu keme enọ e be rria obei kpobi a bi ru oreva Ọghẹnẹ.

14. Ẹvẹ otọakpọ na ọ rrọ anwọ okenọ a gbolo Setan no obọ odhiwu ze na?

¹⁴ Rekọ okpẹtu ọvo ọ da otọakpọ na fia. Eware iyoma e be via kẹ ahwo “keme Ẹdhọ ọ ziọ otọ” no, yọ “o wo ofu ọgaga keme ọ riẹ nọ omoke kakao o wo.” (Eviavia 12:12) Ofu ọ rrọ Setan eva. A gbolo i rie no obọ odhiwu ze no, yọ ọ riẹ nọ kẹle na a te raha iẹe kufiẹ. O bi ru oware kpobi nọ ọ rẹ sai ru re ọ wha ẹbẹbẹ, edada, gbe uye fihọ akpọ na kpobi.

15. Iroro vẹ Ọghẹnẹ o wo kpahe otọakpọ na?

¹⁵ Rekọ Ọghẹnẹ o ri nwene iroro riẹ kpahe otọakpọ na ha, Ọ gbẹ gwọlọ nọ ahwo nọ a rrọ gbagba a rẹ rria otọakpọ na bẹdẹ bẹdẹ evaọ aparadase. (Olezi 37:29) Kọ ẹvẹ Uvie Ọghẹnẹ u ti ro ru onana gba?

16, 17. Eme Daniẹl 2:44 ọ ta kẹ omai kpahe Uvie Ọghẹnẹ?

¹⁶ Eruẹaruẹ nọ e rrọ Daniẹl 2:44 e ta nọ: “Evaọ edẹ ivie yena, Ọghẹnẹ obọ odhiwu ọ te rehọ uvie jọ mu, onọ a te raha vievie he. Yọ a te rehọ uvie nana kẹ amọfa ha. O te guọghọ jẹ rehọ ivie nana kpobi te oba, oye ọvo u ve ti dikihẹ bẹdẹ bẹdẹ.” Eme eruẹaruẹ nana i wuhrẹ omai kpahe Uvie Ọghẹnẹ?

¹⁷ Orọ ọsosuọ, eruẹaruẹ na i dhesẹ nọ Uvie Ọghẹnẹ u ti muhọ esuo “evaọ edẹ ivie yena.” Onana u  dhesẹ nọ egọmeti efa e te gbẹ jọ otọakpọ na okenọ Uvie na u te muhọ esuo no. Orọ avivẹ, ma wuhrẹ nọ Uvie Ọghẹnẹ o te jọ bẹdẹ bẹdẹ, yọ egọmeti ọfa ọ te rehọ ẹta riẹ vievie he. Orọ avesa, Uvie Ọghẹnẹ avọ egọmeti akpọ na a ti fi ẹmo. Uvie Ọghẹnẹ u ti fi ai kparobọ, yọ oye ọvo họ egọmeti nọ u ti su akpọ na soso. Uvie na o vẹ te jọ egọmeti nọ ọ mai woma kpaobọ nọ ahwo-akpọ a rẹ sai wo.

18. Didi odẹ ẹmo urere nọ Uvie Ọghẹnẹ avọ egọmeti akpọ na a ti fi?

¹⁸ Ẹvẹ Uvie Ọghẹnẹ u ti ro mi egọmeti akpọ na esuo? Taure ẹmo urere nọ a re se ẹmo Amagidọn na ọ tẹ te ze, idhivẹri na a ti su “ivie otọakpọ na soso, re a koko ae họ kẹ ẹmo ẹdẹ ologbo Ọghẹnẹ Erumeru na.” Ẹhẹ, egọmeti ahwo-akpọ a te họre Uvie Ọghẹnẹ.​—Eviavia 16:14, 16; rri Ẹme-Oruvẹ 10.

19, 20. Fikieme ma rọ gwọlọ nọ Uvie Ọghẹnẹ u su otọakpọ na?

¹⁹ Fikieme ma rọ gwọlọ Uvie Ọghẹnẹ? O tẹ kawo ma wo ẹjiroro esa. Orọ ọsosuọ, mai yọ erahaizi, yọ ma be mọ je whu. Rekọ Ebaibol ọ ta nọ, evaọ Uvie Ọghẹnẹ ma te rria bẹdẹ bẹdẹ. Jọn 3:16 ọ ta vevẹ nọ: “Ọghẹnẹ o you akpọ na gaga te epanọ o ro siobọno Ọmọ ọvo riẹ, re ohwo kpobi nọ o fi ẹrọwọ họ iẹe o gbe whu hu rekọ o ve wo uzuazọ ebẹdẹ bẹdẹ.”

²⁰ Ẹjiroro avivẹ nọ ma rọ gwọlọ Uvie Ọghẹnẹ họ, ahwo omuomu a wariẹ omai họ. Ibuobu e rẹ ta ọrue, wha ahwo re je gbe-ọfariẹ. U wo oghẹrẹ ovuovo nọ ma rẹ sai ro si ai no ho, Ọghẹnẹ ọvo ọ rẹ sai ru onana. A ti kpe ahwo nọ a ruabọhọ eware iyoma evaọ Amagidọn. (Se Olezi 37:10.) Ẹjiroro avesa nọ ma rọ gwọlọ Uvie Ọghẹnẹ họ, egọmeti ahwo-akpọ a  wo ẹgba ha, a geva, jẹ vọ avọ ofruriọ. A gwọlọ fiobọhọ kẹ ahwo re a yoẹme kẹ Ọghẹnẹ hẹ. Ebaibol ọ ta nọ ohwo o “su ọrivẹ riẹ ruọ uye” no.​—Ọtausiuwoma Na 8:9.

21. Eme Uvie na u ti ru re a sae jọ otọakpọ na soso ru oreva Ọghẹnẹ?

²¹ Nọ Amagidọn ọ tẹ vrẹ no, Uvie Ọghẹnẹ u ti ru nọ a te rọ jọ otọakpọ na ru oreva Ọghẹnẹ. Wọhọ oriruo, u ti si Setan avọ idhivẹri riẹ no. (Eviavia 20:1-3) Ukuhọ riẹ, ohwo ọvo ọ gbẹ te mọ hayo whu hu. Ẹtanigbo na o te whae ze nọ ahwo nọ i re yoẹme kẹ Ọghẹnẹ a te rọ rria Aparadase bẹdẹ bẹdẹ. (Eviavia 22:1-3) Uvie na u ti ru odẹ Ọghẹnẹ fo. Eme onana u dhesẹ? U dhesẹ nọ okenọ egọmeti Ọghẹnẹ u ti su otọakpọ na, ahwo kpobi a te rọ ọghọ kẹ odẹ Jihova.​—Rri Ẹme-Oruvẹ 21.

22. Ẹvẹ ma rọ riẹ nọ Jesu o zihe ruọ Ovie he okenọ ọ jọ otọakpọ na hayo nọ a nwane kpare iẹe no uki ze no?

²² Jesu o wuhrẹ ilele riẹ inọ a lẹ nọ: “Jọ Uvie ra o ze.” Fikiere, o rrọ vevẹ nọ egọmeti Ọghẹnẹ u ti su evaọ obaro. Jihova ọ te kake rehọ egọmeti riẹ mu jẹ  rehọ Jesu mu Ovie nọ o ti su ei. Kọ a rehọ Jesu mu Ovie nọ ọ nwani zihe kpobọ odhiwu no? Ijo, ọ hẹrẹ. Nọ a kpare Jesu kpobọ odhiwu no, Pita avọ Pọl a ru onana vẹ nọ a dhesẹ nọ eruẹaruẹ nọ e rrọ Olezi 110:1 na i kiekpahe Jesu. Evaọ eruẹaruẹ yena, Jihova ọ ta nọ: “Keria obọze mẹ bẹsenọ me re ru ewegrẹ ra họ akpala nọ whọ rẹ rọ awọ ra kpahe.” (Iruẹru Ikọ 2:32-35; Ahwo Hibru 10:12, 13) Ẹvẹ o gwọlọ nọ Jesu ọ rẹ hẹrẹ kri te taure Jihova ọ tẹ te rehọ iẹe mu Ovie?

23. (a) Oke vẹ Jesu o ro muhọ esuo wọhọ Ovie ọrọ egọmeti Ọghẹnẹ? (b) Eme ma ti wuhrẹ evaọ uzoẹme notha?

²³ Ikpe buobu taure 1914 o te ti te, utu Ileleikristi jọ nọ i wo emamọ eva a vuhumu nọ 1914 ọ te jọ ukpe nọ u wuzou gaga nọ eruẹaruẹ Ebaibol sa-sa i ti jo rugba. Eware nọ e be via anwọ 1914 ze i dhesẹ nọ a roro gba. Jesu o muhọ esuo evaọ ukpe yena. (Olezi 110:2) U kri hi a te gbolo Setan ziọ otọakpọ na, yọ obọnana “omoke kakao o wo.” (Eviavia 12:12) Evaọ uzoẹme notha, ma te ruẹ eware efa nọ e kẹ imuẹro nọ omoke okakao yena ma be rria na. Ma te jẹ ruẹ nọ kẹle na Uvie Ọghẹnẹ u ti ru re a jọ otọakpọ na ru oreva Ọghẹnẹ.​—Rri Ẹme-Oruvẹ 22.