1. Хайдағ пазырысты ӱзӱрербіс?

ПРАЙ чир ӱстӱнде миллионнар «Отче наш» тіп пазырысты пілчелер. Пу пазырыста Иисус ӱгренҷілеріне нимедеңер пазырарға кирек полчатханын кӧзіт пирген. Аны чахсы арах ӱзӱрібізеелер паза ноға ағаа хайығ саларға кирек полчатханын піліп алаалар.

2. Иисус, пазырарға ӱгреткенде, хайдағ ӱс сурынысха хайығ айландырған?

² Иисус теен: «Сірер, тізең, піди пазырыңар: „Тигірдегі Пабабыс! Синің Адың сабланзын; Синің хан-ӱлгӱң пеер килзін. Чир ӱстӱнде дее, тигірдегӧк чіли, Синің кӧңніңҷе прай ниме ползын“». (Матфей 6:9—13 хығырыбызыңар.) Ноға Иисус пу ӱс сурыныстаңар пазырарға ӱгреткен? (20 приложениені кӧріңер.)

3. Худайның Хан-ӱлгӱзінеңер ниме пілерге кирек?

³ Піс Худайның адын, аның кізілердеңер паза чирдеңер сағын салған сағызын піліп алғабыс. Че «Синің хан-ӱлгӱң пеер килзін» тіп, Иисус нимедеңер чоохтирға иткен? Худайның Хан-ӱлгӱзі нимедір ол? Ниме ол ит салар? Худайның адын ол хайди сабландырар? Пу сурығларны ӱзӱрібізеелер.

4. Худайның Хан-ӱлгӱзі нимедір ол паза кем аның Ханы?

⁴ Иегова тигірде ӱлгӱ тӧстеп алып, Иисусты аның Ханы поларға турғыс салған. Библияда ол ӱлгӱ  Худайның Хан-ӱлгӱзі тіп адалча. Иисус, тізең, «пиглернің Пигі, ханнарның Ханы полча» (Азых чоох 17:14). Иисус кізілерге чир-чалбахтағы ноо даа ӱлгӱдең хай-хай кӧп ниме пир полар. Прай ӱлгӱлерні хада алза даа, Иисус олардаң кӱстіг.

5. Худайның Хан-ӱлгӱзі хайда? Нименең ол устир?

⁵ Иисус тірілген соонда, хырых кӱн пазынаң тигірзер айланған. Анаң, нинҷе-де тус ирт парғанда, Иегова аны позының Хан-ӱлгӱзінің Ханына турғыс салған (Илҷілернің 2:33). Худайның тигірдегі Хан-ӱлгӱзі чирнең устир (Азых чоох 11:15). Аннаңар ол Хан-ӱлгӱ «тигірдегі хан-чирі» тіп адалча (2 Тимофейге 4:18).

6, 7. Ноға Иисус хайдағ даа устағҷыдаң артых?

⁶ Библияда Иисустаңар пазылча: «Ӧлім ағаа ӱлгӱзін тут полбас», аннаңар Иисус хайдағ даа устағҷыдаң артых (Римдегілерге 6:9). Чирдегі устағҷылар прайлары хаҷан полза ӱреп парчалар, че Иисус хаҷан даа ӧлбес. Иисустың кізілерге иткен нимелері мӧгі туза ағыларлар.

⁷ Иисус сын паза айаачы Хан полчатханнаңар Библиядағы ухаанҷыласта піди пазылча: «Анда Иегованың худы, хыйғазы паза піліп оңнааны, чӧп паза илбек кӱс, піліс паза Иеговадаң хорыхханы. Ол, Иеговадаң хорығып, ӧрініс табар. Ол харахтары кӧрчеткенінің хоостыра ла чарғылабас паза хулахтары исчеткенінің хоостыра ла тӱзетпес. Ол чох кізілерні сынның хоостыра чарғылир» (Исаия 11:2—4). Сірернің андағ устағҷы ползын тіп хынчазар ба?

8. Иисуснаң хада пасха даа устағҷылар поларын хайдаң пілчебіс?

⁸ Худай Иисуснаң хада тигірде устирға нинҷе-де кізі таллап алған. Кӧзідімге, Павел илҷі Тимофейге пасхан:  «Ирееленістерні сыдас парыбыссабыс, Аннаңох хада ӱлгӱ тударбыс» (2 Тимофейге 2:12). Иисуснаң хада нинҷе кізі устир?

9. Иисуснаң хада нинҷе кізі устир? Хаҷан Худай ол кізілерні чыып пастаан?

⁹ 7-ҷі пастағда Иисуснаң хада 144 000 хан устирынаңар піліп алғабыс. 144 муңның санына кем кірче? Иоанн илҷі кӧспекте ол ханнарны Иисуснаң хада турчатханнарын кӧрген. Иоанн теен: «Оларның хамахтарында Хурағанның [Иисустың] паза аның Пабазының аттары пазыл парған полғаннар». Анаң хосхан: «Олар, Хураған [Иисус] хайдар парза, андар Аның соонҷа чӧргеннер». (Азых чоох 14:1, 4 хығырыбызыңар.) Ол ханнар — 144 000 Худайға киртістіг христианнар. Худай оларны Иисуснаң хада «чир ӱстӱнде ӱлгӱ тударға» турғыс салған. Ол кізілер ӱреен соонда тигірде чуртирға тірілчелер (Азых чоох 5:10). Иегова ол киртістіг христианнарны илҷілер тузынаң ала чыып пастаан.

10. Иисус Христоснаң хада 144 000 устирында Иегованың хынызы хайди кӧрінче?

¹⁰ Христоснаң хада кізілер устирлар, анзында Иегованың хынызы кӧрінче. Иисус кізі полған паза иреелер кӧрген, аннаңар ол чахсы устағҷы полар. Иисус «читпестерібіске чӱрексир» паза «пістің прайзыбызох чіли, Ол сынатхан» тіп Павел илҷі пасхан (Еврейлерге 4:15; 5:8). 144 000 ідӧк толдыра нимес, чазыхтығ полғаннар паза ағырығлар кӧргенннер. Аннаңар Иисус паза анынаң хада устапчатханнар чувстволарыбысты паза хайдағ сидіктерге урунчатханыбысты чахсы пілчеткеннерінде ікінҷілебеске чарир.

11. Ноға Иисус, тигірде Худайның кӧңні толзын тіп, пазырарға ӱгреткен?

¹¹ Иисус ӱгренҷілерін, Худайның кӧңні тигірде толзын тіп, пазырарға ӱгреткен. Ноға? Сайтан Диавол Иеговадаң тоғыр парғанда, Худай Сайтанға паза айналарға, киртістіг нимес ангеллерге, нинҷе-де тус тигірде чуртирға чаратханнаңар ӱзінҷі пастағдаң піліп алғабыс. Аннаңар тигірдегі чайаахтарның прайлары Худайның кӧңнін толдырғаннар тіп полбас. Пу киндеде 10-ҷы пастағдаң Сайтаннаңар паза айналардаңар кӧп арах піліп аларбыс.

12. Хайдағ ікі улуғ киректеңер Азых чоох 12:10-да чоохталча?

¹² Библияда Иисус, Худайның Хан-ӱлгӱзінің Ханы пол парған соонда, Сайтаннаң тоғыр чаа пастаан тіп чоохталча. (Азых чоох 12:7—10 хығырыбызыңар.) 10-ҷы стихта ікі улуғ киректеңер чоохталча. Пастағы кирек: Худайның Хан-ӱлгӱзі устап пастапча паза Иисус Христос ол Хан-ӱлгӱнің Ханы пол парча. Ікінҷі кирек: Сайтанны тигірдең чирзер тастабысчалар. Пу ікі кирек пол парған. Аннаңар соонаң піліп аларбыс.

13. Сайтан тигірдең тасталғанда, ниме анда алыс парған?

¹³ Библияда пазылча: «Ӧрініңер зе тигірдегілер!» (Азых чоох 12:12). Сайтаннаң айналар тигірдең чирзер тасталғанда, Худайға киртістіг ангеллер тың ӧрінгеннер! Амды Худайның кӧңнін тигірде прай чайаахтар толдырчалар. Олар амыр паза пір чӧптіг чуртапчалар.

14. Сайтан тигірдең тастаттырған ӱчӱн, чирде ниме полча?

¹⁴ Че чир ӱстӱндегі чуртас андағ нимес. Диавол «позының тузының асхынах халғанын піліп... улуғ ӧкпеде»,  аннаңар кізілер тың ирееленчелер (Азых чоох 12:12). Тигірдең сӱрдірген соонда ӱр ниместең чох иттірерін Сайтан пілче, аннаңар ол улуғ ӧкпеде. Чир ӱстӱнде чобағ, ағырсыныс паза ирее кӧп ползын тіп, ол прай кӱзін салча.

15. Худайның чирдеңер сағын салған сағызы хайдағ?

¹⁵ Худайның чирдеңер сағызы алыс парбаан. Чир рай ползын паза анда чазых чох, толдыра кізілер чуртазыннар тіп, ол ам даа хынча (Псалом 37:29). Хайди Худайның Хан-ӱлгӱзі анзын ит салар?

16, 17. Даниил 2:44-те Худайның Хан-ӱлгӱзінеңер ниме чоохталча?

¹⁶ Даниил ухаанҷының киндезінде пазыл парған: «Ол ханнарның кӱннерінде тигірдегі Худай хаҷан даа иңзерілбес Хан-ӱлгӱ турғызыбызар. Ол Хан-ӱлгӱ пасха чоннарға пирілбес. Ол прай чирдегі ӱлгӱлерні иңзерібізер паза хырыбызар, че позы, тізең, мӧгі тус турар» (Даниил 2:44). Худайның Хан-ӱлгӱзінеңер пу ухаанҷыластаң ниме піліп алчабыс?

¹⁷ Пастағызын: Хан-ӱлгӱ «ол ханнарның кӱннерінде» устап пастир. Анзы чир ӱстӱнде кізілернің ӱлгӱлері турчатхан туста Хан-ӱлгӱ устап пастирын кӧзітче. Ікінҷізін: Худайның Хан-ӱлгӱзі мӧгі тус устир паза аның орнына пасха ӱлгӱ турғызылбас. Ӱзінҷізін: Худайның Хан-ӱлгӱзінің паза пасха ӱлгӱлернің аразында чаа полар. Ол чаада Хан-ӱлгӱ, чиңіп алып, чир ӱстӱнде чалғыс ла, иң чахсы ӱлгӱ пол парар.

18. Чир-чалбахтағы ӱлгӱлернің паза Худайның Хан-ӱлгӱзінің аразында полар чаа хайди адалча?

¹⁸ Хайди Худайның Хан-ӱлгӱзі чирнең устир? Айналар, «Прай нимедең кӱстіг Худайның илбек кӱнінде полар чааға чир ӱстӱндегі прай ханнарны чыып  аларға тіп», прай чир-чалбахтағы ханнарны алаахтырарлар. Аннаңар чир-чалбахтағы ӱлгӱлер Худайның Хан-ӱлгӱзінең тоғыр чаалазарға парарлар, че Худайның Хан-ӱлгӱзі оларны чиңіп алар. Ол чаа Армагеддон тіп адалча (Азых чоох 16:14, 16; 10 приложениені кӧріңер).

19, 20. Ноға піске Худайның Хан-ӱлгӱзі кирек?

¹⁹ Ноға піске Худайның Хан-ӱлгӱзі тың кирек? Анзына ӱс сылтағ пар. Пастағы сылтағ: прай кізілер чазыхтығлар, аннаңар ағырчалар паза ӱрепчелер. Че Худайның Хан-ӱлгӱзі устаза, піс мӧгі чуртирбыс. Иоанн 3:16-да чоохталча: «Худай, прай кізілерге тың хынғаннаңар, Позының чалғыс Оолғын даа ӧлімге ысхан. Іди ызып, Оолғына киртінчеткен полған на кізее ӧлбеске, мӧгі чуртастығ поларға оңдай пирген».

²⁰ Ікінҷі сылтағ: піс уғаа чабал чир-чалбахта чуртапчабыс, аннаңар Худайның Хан-ӱлгӱзі піске уғаа кирек. Ибіре кізілер кӧп чойланчалар, алаахтырчалар паза сайбах тудынчалар. Піс постарыбыс чабалны чох ит полбаспыс, Худай ла аны ит полар. Чабал кізілерні ол Армагеддон чаада чох идібізер. (Псалом 37:10 хығырыбызыңар.) Ӱзінҷі сылтағ: кізілернің ӱлгӱлері хазырлар паза сын тудынминчалар, аннаңар піске Худайның Хан-ӱлгӱзі кирек. Чир-чалбахтағы ӱлгӱлер кізілернің сидіктерін пӧк полбинчалар. Олар Худайның чооғынҷа чуртирға полыспинчалар. Библияда чоохталча: «Кізі кізінең устааны кізее сайбағ ла ағылча» (Экклезиаст 8:9).

21. Хайди Хан-ӱлгӱнің сылтаанда Худайның кӧңні чирде толар?

²¹ Армагеддон соонда Хан-ӱлгӱ устаанынаң сылтаанда чирде Худайның кӧңні толар. Сайтан паза  айналар чох пол парарлар (Азых чоох 20:1—3). Кізілер ағырбастар паза ӱребестер. Толығның сылтаанда Худайның чооғын исчеткен кізілер чирде мӧгі чуртирлар (Азых чоох 22:1—3). Іди Хан-ӱлгӱ Худайның адын сабландырар. Ол Хан-ӱлгӱ устаза, прай кізілер Худайның адын саблирлар. (21 приложениені кӧріңер.)

22. Иисус, чирде полғанда, Хан полбаанын паза, тірілгенде, сах андох Хан пол парбаанын хайдаң пілчебіс?

²² Иисус чирде чуртаанда, ӱгренҷілерін: «Синің хан-ӱлгӱң пеер килзін», — тіп пазырарға ӱгреткен. Пу сӧстердең кӧрінче: ол туста Худайның Хан-ӱлгӱзі килгелек полған, пасха сӧстернең чоохтаза, Иегова позының Хан-ӱлгӱзін тӧстеелек полған паза Иисусты Ханға турғысхалах полған. Иисус тигірзер нандыра килгендӧк, Хан пол парған ма? Чох, ол нинҷе-де тус сахтаан. Анзын піс хайдаң пілчебіс? Аннаңар Псалом 110:1-де ухаанҷылас пазыл парған. Анда Иегованың сӧстері пазыл парғаннар: «Ыырҷыларыңны азааң алтына салғанымҷа, оң саримда одыр». Пу ухаанҷылас  тірілген Иисустаңар чоохтапчатханын Пётр паза Павел илҷілер чарыт пиргеннер (Илҷілернің 2:32—35; Еврейлерге 10:12, 13). Тірілген соонда, Иегова аны Ханға турғызарын Иисус нинҷе-де тус сахтаан. Ағаа нинҷе тус сахтирға кирек полған?

23. а) Хаҷан Иисус Худайның Хан-ӱлгӱзінің Ханы пол парған? б) Мының соондағы пастағдаң ниме піліп аларбыс?

²³ Арығ чӱректіг христианнар 1914 чылның алнындох, Библиядағы ухаанҷыластарны кӧріп, ол чыл улуғ таныхтығ поларға кирек тіп піліп алғаннар. Ол чылдаң сығара чир-чалбахта полған киректер ол христианнар хап-орта чоохтааннарын кӧзіткеннер. Иисус Христос 1914 чылда Хан пол парған (Псалом 110:2). Иисус, Хан пол парғанда, Сайтанны чирзер тастабысхан, аннаңар Диаволның тузы асхынах халған (Азых чоох 12:12). Хан-ӱлгӱ Худайның кӧңнін чирде толдырар тус уғаа чағын. Мының соондағы пастағдаң піс сах ол туста чуртапчатханыбыстаңар кӧп арах киречілестер піліп аларбыс. (22 приложениені кӧріңер.)