سەگىزىنشى تاراۋ
قۇدايدىڭ پاتشالىعى دەگەن نە؟
1. ٴبىز قانداي دۇعانى قاراستىرامىز؟
بىردە يسا ٴماسىح شاكىرتتەرىنە قۇدايعا نە تۋرالى دۇعا ايتۋ كەرەكتىگىن ۇيرەتتى. كوپكە تانىمال بولىپ كەتكەن وسى دۇعانىڭ ٴبىز ٷشىن دە ماڭىزى زور. ولاي بولسا، قازىر وسى دۇعانىڭ مازمۇنىنا توقتالايىق.
2. يسا قانداي ٷش جايت تۋرالى دۇعا ايتۋدى ۇيرەتتى؟
2 يسا دۇعاسىندا بىلاي دەگەن: «كوكتەگى اكەمىز، سەنىڭ ەسىمىڭ كيەلى تۇتىلسىن! سەنىڭ پاتشالىعىڭ كەلسىن! سەنىڭ ەركىڭ كوكتەگىدەي جەر بەتىندە دە ورىندالسىن!» (ماتاي 6:9—13 وقىڭىز). وسى ٷش جايت تۋرالى دۇعا ايتۋ نە ٷشىن ماڭىزدى؟ (20-تۇسىندىرمەنى قاراڭىز.)
3. وسى تاراۋدا قۇداي پاتشالىعى تۋرالى نە بىلەمىز؟
3 ٴبىز قۇدايدىڭ ەسىمى ەحوبا ەكەنىن بىلدىك. ەحوبانىڭ جەر مەن ادامزات ٷشىن قانداي ەركى نەمەسە نيەتى بار ەكەنىن دە قاراستىردىق. ال يسانىڭ «سەنىڭ پاتشالىعىڭ كەلسىن!» دەگەن سوزدەرى نەنى بىلدىرەدى؟ قۇدايدىڭ پاتشالىعى دەگەن نە؟ ول بولاشاقتا نە ىستەيدى؟ ول قۇدايدىڭ ەسىمىن قالاي كيەلى ەتەدى؟ بۇل تاراۋدا وسى سۇراقتاردىڭ جاۋابىن بىلەمىز.
قۇداي پاتشالىعى دەگەن نە؟
4. قۇداي پاتشالىعى دەگەن نە جانە ونىڭ پاتشاسى كىم؟
4 ەحوبا كوكتە ٶز ۇكىمەتىن ورناتتى. بۇل ۇكىمەت كيەلى كىتاپتا قۇداي پاتشالىعى دەپ اتالادى. ونىڭ پاتشاسى يسا — «پاتشالاردىڭ پاتشاسى، يەلەردىڭ يەسى» (تىموتەگە 1-حات 6:15). ول جەر بەتىندەگى كەز كەلگەن بيلەۋشىدەن دە كوپ جاقسىلىق جاساي الادى، ٶنىڭ كۇشى سول پاتشالاردىڭ ٴبارىنىڭ كۇشىنەن اسىپ تۇسەدى.
5. قۇداي پاتشالىعى قايدا؟ ول نەنىڭ ۇستىنەن بيلىك ەتەدى؟
5 يسا تىرىلگەننەن كەيىن 40 كۇن وتكەن سوڭ كوككە ورالدى. ۋاقىت وتە ەحوبا ونى پاتشالىعىنىڭ پاتشاسى ەتىپ تاعايىندادى (ەلشىلەردىڭ ىستەرى 2:33). بۇل ۇكىمەت جەر بەتىنە كوكتەن بيلىك ەتەتىن بولادى (ايان 11:15). سوندىقتان كيەلى كىتاپتا ول «كوكتەگى پاتشالىق» دەپ تە اتالادى (تىموتەگە 2-حات 4:18).
6، 7. يسا جەردەگى پاتشالاردان نەسىمەن ەرەكشە؟
6 كيەلى كىتاپتا يسا تۋرالى «ولمەستىككە سول عانا يە» دەلىنگەن. سول ٷشىن دە يسا جەر بەتىندەگى كەز كەلگەن بيلەۋشىدەن اسىپ تۇسەدى (تىموتەگە 1-حات 6:16). ەل بيلەۋشىلەرىنىڭ بارلىعى ەرتەلى-كەش ومىردەن وتەدى. ال يسا ەشقاشان ولمەيدى. ونىڭ جاسايتىن يگى ىستەرى دە ماڭگىگە جالعاسادى.
7 يشايا پايعامبار يسانىڭ ٵدىل ٵرى جاناشىر پاتشا بولاتىنىن الدىن الا ايتقان. ول بىلاي دەگەن: «وعان ەحوبانىڭ رۋحى قونىپ، دانالىق پەن مول تۇسىنىك دارىتادى، ول كەرەمەت كەڭەسشى، زور كۇش پەن مول ٴبىلىم يەسى بولادى، ٵرى ەحوبانى بارىنشا قاستەرلەيتىن بولادى. ەحوبادان قورقۋ وعان قۋانىش سيلايدى. ول تەك كورگەنىنە ساي تورەلىك ەتپەيدى، تەك ەستىگەنىنە ساي تۇزەتپەيدى. قايتا، جارلىعا ٵدىل ۇكىم شىعارادى» (يشايا 11:2—4). ٴسىز وسىنداي پاتشانىڭ قول استىندا ٶمىر سۇرگىڭىز كەلە مە؟
8. يسانىڭ جالعىز ٶزى عانا بيلىك ەتپەيتىنىن قايدان بىلەمىز؟
8 قۇداي يسامەن بىرگە كوكتەگى ۇكىمەتتە بيلىك ەتۋگە كەيبىر ادامداردى دا تاڭداعان. مىسالى، ەلشى پاۋىل تىموتەگە: «تاباندىلىق تانىتا بەرسەك، ونىمەن بىرگە پاتشا رەتىندە بيلىك ەتەمىز»،— دەگەن (تىموتەگە 2-حات 2:12). يسامەن بىرگە پاتشالىق ەتەتىندەردىڭ سانى قانشا؟
9. يسامەن بىرگە تاعى قانشا پاتشا بولادى؟ قۇداي ولاردى تاڭداۋىن قاشان باستادى؟
9 جەتىنشى تاراۋدان بىلگەنىمىزدەي، ەلشى جوحان ايان العاندا يسامەن بىرگە 144000 پاتشانىڭ تۇرعانىن كورگەن. بۇلار كىمدەر؟ جوحان ولاردىڭ «ماڭدايلارىنا توقتىنىڭ [ياعني يسانىڭ] ەسىمى مەن ونىڭ اكەسىنىڭ ەسىمى جازىلعانىن» ايتقان (ايان 14:1 وقىڭىز). جوحان ولار جايىندا تاعى بىلاي دەدى: «بۇلار... توقتى قايدا بارماسىن، وعان ەرىپ جۇرەتىندەر. ولار ادامدار اراسىنان... ساتىپ الىندى» (ايان 14:4). قۇداي 144000 پاتشانى ادال ماسىحشىلەردىڭ اراسىنان تاڭداپ العان. ولار قايتىس بولعان سوڭ، كوكتە ٶمىر ٴسۇرۋ ٷشىن ٴتىرىلىپ، يسامەن بىرگە «جەر بەتىنە بيلىك جۇرگىزەدى» (ايان 5:10). ەحوبا 144000 ادامدى تاڭداۋدى ٴبىرىنشى عاسىرداعى ەلشىلەردىڭ زامانىنان باستادى.
10. ادامزاتتىڭ ۇستىنەن يسا مەن 144000 پاتشانىڭ بيلىك ەتەتىنىنەن ەحوبانىڭ سۇيىسپەنشىلىگى قالاي كورىنەدى؟
10 يسانىڭ جانە 144000 ادامنىڭ بيلىك ەتەتىنى ەحوبانىڭ قامىمىزدى ويلايتىنىن كورسەتەدى. يسانىڭ جاقسى پاتشا بولاتىنىندا كۇمان جوق. ويتكەنى ول ٴبىزدى تۇسىنەدى، ول ادام بولىپ ٶمىر ٴسۇرۋدىڭ، قيىندىق كورۋدىڭ نە ەكەنىن بىلەدى. ەلشى پاۋىل يسانىڭ السىزدىكتەرىمىزگە جاناشىرلىقپەن قارايتىنىن، «ٶزىمىز سياقتى بارلىق جاعىنان سىنالعانىن» ايتقان (ەۆرەيلەرگە 4:15؛ 5:8). 144000 پاتشامىز دا ٴبىزدى جاقسى تۇسىنەدى. ويتكەنى ولار دا كەمەلسىزدىكتىڭ، اۋرۋدىڭ زاردابىن تارتقان. ٴبىز يسا مەن 144000 پاتشانىڭ سەزىمدەرىمىزدى دە، قيىنشىلىقتارىمىزدى دا جاقسى تۇسىنەتىنىنە سەنىمدىمىز.
قۇداي پاتشالىعى بولاشاقتا نە ىستەيدى؟
11. كوكتە قۇدايدىڭ ەركى بارلىق كەزدە ورىندالعان با؟
11 يسا شاكىرتتەرىنە قۇداي ەركىنىڭ كوكتەگىدەي جەر بەتىندە دە ورىندالۋىن دۇعادا سۇراۋدى ۇيرەتكەن. ٴبىراق كوكتە بارلىعى بىردەي قۇدايدىڭ ەركىن ورىنداماعان كەز بولعان. 3-تاراۋدان بىلگەنىمىزدەي، شايتان ەحوباعا قارسى شىقتى. وسى بۇلىكتەن كەيىن ەحوبا شايتان مەن جىنداردىڭ، ياعني ادالدىقتان تايعان پەرىشتەلەردىڭ بەلگىلى ٴبىر ۋاقىت كوكتە قالۋىنا جول بەرگەن. سوندىقتان كوكتە بارلىق كەزدە قۇدايدىڭ ەركى ورىندالعان دەي المايمىز. ٴبىز شايتان مەن جىندار تۋرالى 10-تاراۋدان كوبىرەك بىلەمىز.
12. ايان 12:10 دا قانداي ەكى ماڭىزدى وقيعا جايىندا جازىلعان؟
12 كيەلى كىتاپتا يسانىڭ قۇداي پاتشالىعىنىڭ پاتشاسى بولعان سوڭ كوپ ۇزاماي شايتانمەن سوعىسقانى جازىلعان (ايان 12:7—10 وقىڭىز). 10-تارماقتان ماڭىزدى ەكى وقيعا جايلى وقيمىز: كوكتە پاتشالىق ورناپ، يسا بيلىك ەتۋىن باستادى جانە شايتان كوكتەن جەرگە لاقتىرىلدى. الدا بىلەتىنىمىزدەي، بۇل وقيعالار ورىندالىپ قويعان.
13. شايتان قۋىلعاندا، كوكتە نە بولدى؟
13 كيەلى كىتاپتا شايتان مەن جىندار كوكتەن قۋىلعاندا، ادال پەرىشتەلەردىڭ قاتتى قۋانعانى سيپاتتالعان. وندا: «كوك جانە ونى مەكەندەيتىندەر، قۋانىڭدار!»— دەلىنگەن (ايان 12:12). كوكتە قۇدايدىڭ ەركىن ورىندايتىن جاراتىلىستار عانا قالعاندىقتان، ەندى وندا تىنىشتىق پەن بىرلىك بار.
شايتان مەن جىن-پەرىلەر كوكتەن قۋىلعاننان بەرى جەر بەتىندە قاسىرەت كوبەيدى. ٴبىراق جاقىندا قايعى-قاسىرەت اتىمەن بولمايدى
14. شايتاننىڭ جەرگە تۇسكەنى ادامزاتقا قالاي اسەر ەتتى؟
14 بىراق جەردەگى جاعداي مۇلدەم باسقا. كيەلى كىتاپتا: «ٸبىلىس سەندەرگە ٴتۇستى. ول ٶز ۋاقىتىنىڭ از قالعانىن بىلگەندىكتەن قاتتى اشۋلى»،— دەپ ايتىلعان (ايان 12:12). شايتاننىڭ جەرگە تۇسكەنى ادامدارعا كوپ قاسىرەت اكەلدى. ونىڭ ۇستىنە، شايتان وتە ىزالى، سەبەبى كوكتەن قۋىلدى جانە جۋىردا وزىنىڭ جويىلاتىنىن بىلەدى. ول بۇكىل جەردى ازاپقا، قاسىرەت پەن قيىندىققا تولتىرۋ ٷشىن بارىن سالۋدا.
15. قۇدايدىڭ جەرگە قاتىستى نيەتى قانداي؟
15 بىراق قۇدايدىڭ جەرگە قاتىستى نيەتى ەش وزگەرگەن جوق. ول جۇماق ورناعان جەر بەتىندە كەمەلدى ادامداردىڭ ماڭگى ٶمىر سۇرگەنىن ٵلى دە قالايدى (ٴزابۇر 37:29). مۇنى قۇدايدىڭ پاتشالىعى جۇزەگە اسىرادى.
16، 17. دانيال 2:44 تەن قۇدايدىڭ پاتشالىعى جايلى نە بىلەمىز؟
16 دانيال 2:44 تە مىناداي پايعامبارلىق جازىلعان: «سول پاتشالاردىڭ كۇندەرىندە كوكتەگى قۇداي ەشقاشان جويىلمايتىن پاتشالىق ورناتادى. بۇل پاتشالىق باسقا حالىقتىڭ قولىنا وتپەيدى. ول سول پاتشالىقتاردىڭ ٴبارىن قيراتىپ، ٶزى ماڭگى تۇرادى». بۇل سوزدەردەن قۇدايدىڭ پاتشالىعى جايلى نە بىلەمىز؟
17 بىرىنشىدەن، قۇدايدىڭ پاتشالىعى «سول پاتشالاردىڭ كۇندەرىندە» ورنايدى. دەمەك، قۇدايدىڭ پاتشالىعى جەردەگى ۇكىمەتتەردىڭ تۇسىندا بيلىك ەتۋىن باستايدى. ەكىنشىدەن، ول ماڭگى تۇرادى جانە باسقا ەشقانداي ۇكىمەت ونى الماستىرمايدى. ۇشىنشىدەن، قۇدايدىڭ پاتشالىعى مەن جەردەگى ۇكىمەتتەردىڭ اراسىندا سوعىس بولادى. بۇل سوعىستا قۇدايدىڭ پاتشالىعى جەڭىسكە جەتىپ، بۇكىل جەرگە بيلىك ەتەتىن جالعىز ۇكىمەت بولادى. سول ۋاقىتتا ادامدار تەڭدەسى جوق ۇكىمەتتىڭ قول استىندا ٶمىر سۇرەدى.
18. قۇدايدىڭ پاتشالىعى مەن جەردەگى ۇكىمەتتەردىڭ اراسىنداعى شەشۋشى سوعىس قالاي اتالادى؟
18 قۇداي پاتشالىعى مەن جەردەگى ۇكىمەتتەردىڭ اراسىنداعى سوعىس قالاي باستالادى؟ ارماگەددون دەپ اتالاتىن بۇل شەشۋشى سوعىستىڭ الدىندا جىندار جەرجۇزىنىڭ پاتشالارىن اداستىرادى. ٴسۇيتىپ، ولاردى «قۇدىرەتى شەكسىز قۇدايدىڭ ۇلى كۇنى بولاتىن سوعىسقا جيناپ اكەلەدى». سوندا جەردەگى ۇكىمەتتەر قۇدايدىڭ پاتشالىعىنا قارسى سوعىسقا شىعادى (ايان 16:14، 16؛ 10-تۇسىندىرمەنى قاراڭىز).
19، 20. ٴبىز قۇدايدىڭ پاتشالىعىنا نە سەبەپتى مۇقتاجبىز؟
19 ادامزات قۇدايدىڭ پاتشالىعىنا وتە مۇقتاج. مۇنىڭ كەم دەگەندە ٷش سەبەبى بار. بىرىنشىدەن، ٴبىز كۇناكار پەندەلەرمىز، اۋىرامىز جانە ولەمىز. الايدا كيەلى كىتاپتا قۇداي پاتشالىعىنىڭ قول استىندا ٴبىزدىڭ ماڭگى ٶمىر سۇرەتىنىمىز ايتىلعان. جوحان 3:16 دا: «قۇداي ادامزاتتى سونداي قاتتى سۇيگەندىكتەن، وزىنىڭ جالعىز ۇلىن قۇربان ەتتى. ەندى وعان سەنگەن اركىم جويىلماي، ماڭگىلىك ومىرگە يە بولا الادى»،— دەلىنگەن.
20 بىزگە قۇدايدىڭ پاتشالىعى قاجەت ەكەندىگىنىڭ ەكىنشى سەبەبى — زۇلىم ادامداردىڭ كوپتىگى. ولار وتىرىك ايتىپ، الاياقتىق پەن ازعىندىققا بارادى. ولاردى توقتاتۋ ٴبىزدىڭ قولىمىزدان كەلمەيدى. رايىنان قايتپايتىن بۇل زۇلىمداردى قۇداي ارماگەددوندا جويادى (ٴزابۇر 37:10 وقىڭىز). ال ۇشىنشىدەن، جەردەگى ۇكىمەتتەر دۇنيەدەگى قيىندىقتاردى تولىعىمەن شەشۋگە دارمەنسىز، ولار ٴتىپتى قاتىگەز ٵرى ادىلەتسىز. ولار حالىققا قۇدايعا مويىنسۇنۋعا مۇلدەم كومەكتەسپەيدى. كيەلى كىتاپتا: «ادامنىڭ ادامعا بيلىك ەتۋى تەك زيان كەلتىرەدى»،— دەپ بەكەر ايتىلماعان (ۋاعىزداۋشى 8:9).
21. كوكتەگى پاتشالىق جەر بەتىندە قۇدايدىڭ ەركىن قالاي جۇزەگە اسىرادى؟
21 ارماگەددوننان كەيىن قۇداي پاتشالىعى جەر بەتىندە قۇدايدىڭ ەركىن جۇزەگە اسىرادى. مىسالى، جەردى شايتان مەن جىنداردان تازارتادى (ايان 20:1—3). ادامداردىڭ ەشقايسىسى اۋىرمايتىن، ولمەيتىن بولادى. تولەمنىڭ ارقاسىندا بارلىق ادال جاندار جەردەگى جۇماقتا ماڭگى جاساي الادى (ايان 22:1—3). سونداي-اق قۇداي پاتشالىعى قۇدايدىڭ ەسىمىن كيەلى ەتەدى. بۇل — وسى ۇكىمەتتىڭ تۇسىندا بارلىق ادام قۇدايدىڭ ەسىمىن قۇرمەت تۇتادى دەگەن ٴسوز (21-تۇسىندىرمەنى قاراڭىز).
يسا قاشان پاتشا بولدى؟
22. يسا جەردە بولعان كەزىندە نەمەسە تىرىلە سالىسىمەن پاتشا بولماعانىن قايدان بىلەمىز؟
22 يسا شاكىرتتەرىن قۇدايعا: «سەنىڭ پاتشالىعىڭ كەلسىن!»— دەپ دۇعا ەتۋدى ۇيرەتكەن. دەمەك، قۇداي پاتشالىعى بولاشاقتا كەلمەك ەدى. بۇل ٷشىن ەحوبا ۇكىمەتىن ورناتىپ، يسانى سول ۇكىمەتتىڭ پاتشاسى ەتۋى كەرەك ەدى. ال يسا قاشان پاتشا بولدى؟ كوككە بارا سالىسىمەن بە؟ جوق، وعان ٴبىراز ۋاقىت كۇتۋ كەرەك بولدى. يسا تىرىلگەننەن شامالى ۋاقىت وتكەن سوڭ، ەلشى پەتىر مەن پاۋىل بۇل جايتتى ناقتىلاي ٴتۇستى. ولار ٴزابۇر 110:1 دە جازىلعان پايعامبارلىقتىڭ يساعا قاتىستى ەكەنىن ايتتى. وندا ەحوبانىڭ: «جاۋلارىڭدى اياعىڭنىڭ استىنا سالىپ بەرگەنىمشە، وڭ جاعىمدا وتىر»،— دەگەن سوزدەرى جازىلعان (ەلشىلەردىڭ ىستەرى 2:32—35؛ ەۆرەيلەرگە 10:12، 13).
قۇداي پاتشالىعى قۇدايدىڭ جەر بەتىنە قاتىستى نيەتىن جۇزەگە اسىرادى
23. ا) يسا قاشان قۇدايدىڭ ۇكىمەتىنىڭ پاتشاسى بولدى؟ ٵ) كەلەسى تاراۋدان نە تۋرالى بىلەمىز؟
23 سونىمەن، يسا پاتشا رەتىندە بيلىك ەتۋىن قاشان باستادى؟ 1914-جىلى. بۇدان كوپ جىل بۇرىن شىنايى ماسىحشىلەردەن قۇرالعان شاعىن توپ 1914-جىلدىڭ ماڭىزدى جىل بولاتىنىن زەرتتەپ ٴبىلدى. ولار وسى جىلدان باستاپ كيەلى كىتاپتاعى كوپ پايعامبارلىق ورىندالاتىنىن ٴتۇسىندى. 1914-جىلدان بەرى الەمدە بولىپ جاتقان وقيعالار مۇنى راستادى. يسا دا پاتشا رەتىندە بيلىك ەتۋىن وسى جىلى باستادى (ٴزابۇر 110:2). سوسىن شايتان جەرگە قۋىلدى. ونىڭ وتە از ۋاقىتى قالدى (ايان 12:12). بۇل ۋاقىت ارالىعى كيەلى كىتاپتا «سوڭعى كۇندەر» دەپ اتالادى. كەلەسى تاراۋدا ٴبىزدىڭ وسى كەزەڭدە ٶمىر ٴسۇرىپ جاتقانىمىز تۇسىندىرىلەدى. سونداي-اق جاقىن ارادا قۇداي پاتشالىعى جەر بەتىندە قۇدايدىڭ نيەتىن ىسكە اسىراتىنى ايتىلادى (22-تۇسىندىرمەنى قاراڭىز).
قىزىقتى بولار مالىمەتتەر
كۇزەت مۇناراسى
قۇداي پاتشالىعى قاشان بيلىك ەتە باستادى؟ (1-ٴبولىم)
جاۋابىن بىلسەڭىز، باسقا بىرەۋگە كيەلى كىتاپتىڭ كومەگىمەن ٴتۇسىندىرىپ بەرە الاسىز با؟
