1. Lusego lukizi lwizi ma milioni ma bantu lutwatendele?

MA MILIONI ma bantu bizi lusego lukumanwa lusego lwa Tateiswe. Yesu akambizye lusego lwongo, kwa kwigisya beigisibwa bage bwakusega. Asegile ku kabamba ka bikizi? Nu kabamba kakizi lulo lusego luli lwa mutali ku beiswe?

2. Bitondo bikizi bisatu bya mutali byatwigisizye Yesu tubisege?

² Yesu atendile bunee: “Segazi ku Kalaga anga bubuno: ‘Tateiswe uli mwigulu, izina lyobe liganunwe. Bukota bwobe buvwe, kusombola kwobe kukitwe ku kisi anga bukukukitwa mwigulu.’” (Sanzula Matayo 6:9-13.) Kabamba ka kizi Yesu atwigisizye tusege ku bibyo bitondo bisatu?​—Sanzula mukanda 20.

3. Twatunganana kumenya kikizi ku kabamba ka Bukota bwa Kalaga?

³ Twijigisizye buno izina lya Kalaga u Yehowa. Twijigisizye lingo buni buli makengelelo ma Kalaga ku banakantu nu ku kesé. Yesu atundaga kutenda buni gatendile bunee: “Bukota bwobe buvwe”? Mu zeno sula, twamenye kikizi u Bukota bwa Kalaga, bikizi bikakita Bukota bwongo nu buni bubukaswagya izina lya Kalaga.

4. Bukota bwa Kalaga u kikizi, nu nazi uli Mukota wa Bukota bwongo?

⁴ Yehowa abikile Bukota mwigulu. Biblia byamana Bukota bwa mwigulu: Bukota bwa Kalaga. Yehowa asombwede Yesu kuba Mukota wa bubo Bukota. Yesu u  “Mwangati wa bangati, Mukota wa bakota.” (1 Timoteo 6:15) Eli na magala makukita bitondo byeingé bisoga kutinga aba mukota musoga wa politike. Nu eli na magala nunsania kutinga bakota bansania ba politike.

5. a) Kuni kuli Bukota bwa Kalaga? b) Bukota bwa Kalaga bukangata kikizi?

⁵ Yesu ayukizibwe, nu kusila bindi 40, asubile mwigulu. Kuzinda, Yehowa amwimikile kuba Mukota wa Bukota bwage. (Misako 2:33) Biblia byatenda buno guvernema za Kalaga zili “Bukota [. . .] bwa mwigulu.” (2 Timoteo 4:18) Kasi buli mwigulu. Nu kutukila mwigulu, bukangata kesé.​—Kulolesibwa 11:15.

6, 7. Ku kabamba ka buni Yesu eli Mukota munene kutinga bakota bansania banakantu?

⁶ Yesu eli Mukota munene kutinga bakota bansania banakantu. Ukinsa Biblia byatenda buno Yesu wenyene u uli na “kalamo katanakuzinda.” (1 Timoteo 6:16) Bakota bansania ba politike bekukuaga, tondo Yesu ntekakua. Binsania byekatukitila bikizizya milyalya.

⁷ Bulengania bumozi bwa Biblia bwatenda buno Yesu ekaba Mukota wisanana nu wiyala lutundo: “Nu muuza wa Yehowa wikale gantanta gage, u muuza wa menge nu bumenyinino, muuza wa lwango nu magala, muuza wa bumenyinino nu wakukua Yehowa boba. Mbogimbogi zage zikaba ku kabamba ka kukua Yehowa boba. Ntekasungya ku bubo bwekumonako na meiso mage, aba ntekazugila ku kabamba ka bwekungwa na matuzi mage. Ku kwisanana ekasungya bazambi.” (Isaya 11:2-4, NWT) Unatunda kuangatwa na mukota anga Yesu?

8. Buni butwamenya buno Yesu ntekangata winyene?

⁸ Kalaga asombwede banakantu buno babe bakota  mwigulu gamozi na Yesu. Musengwa Paulo abwide Timoteo bunee: “Ndi tatwasiga kwikalila, nti tukaangata gamozi nage.” (2 Timoteo 2:12, NWT) Bantu banga bekaba bakota gamozi na Yesu?

9. a) Bakota banga u bekangata gamozi na Yesu? b) Kutukila nkungu nkizi Yehowa alingile kusombola bakota bekangata gamozi na Yesu?

⁹ Sula 7 za kino kitabu zatendela kalolesyo kamozi kamonine musengwa Yoana. Amonine Yesu mwigulu gamozi na bango bakota 144 000. Banazi u babo bakota? Yoana isula buno babezaga “basanzwa izina lyage [izina lya Yesu] nu izina ly’Isi ku malanga mabo.” Nu Yoana ataleka lingo bunee: “Babo [. . .] bekuyanga Kyana kya Mukoko [Yesu] kunsania kwekwenda. Bakunzilwe munkantini mwa bantu.” (Sanzula Kulolesibwa 14:1, 4.) Babo bakrito balandania 144 000 basombwedwe na Yehowa buno “bangate kisi” gamozi na Yesu. Ndi umozi kubo akua, nti ayukibwa nu kwenda mwigulu. (Kulolesibwa 5:10) Kutukila nkungu (nkiko) za basengwa, Yehowa ekusombola bakristo balandania buno babe mu lusumba lwa bakota 144 000.

10. Buni bwatulosya Yehowa lutundo kwa kusombola Yesu nu babo ba 144 000 bangate banakantu?

¹⁰ Kwa kusombola banakantu babe bakota gamozi na Yesu, Yehowa alosia buno atutunda lebelebe. Yesu ekaba Mwangati musoga. Anema kutukwila kyombo kubuno abezaga mwanakantu nu asungizibwe. Paulo asolile buno Yesu ikile na kyombo ku beiswe. Asolile lingo buno enema kumenya mutambo witu nu “alindikilwe anga iswe” mu bitondo binsania. (Baebrania 4:15; 5:8) Nu babo 144 000 tondi banema kumenya mankunku meitu: anga beiswe, balwanaga na makosa  nu basambaga. Kasi tunakatizya buno Yesu nu babo 144 000 bekamenya buni butukwijungwa nu mankunku meitu.

11. Kabamba ka buni Yesu igisizie basengwa bage buno basege kusombola kwa Kalaga kukitwe mwigulu?

¹¹ Yesu igisizie basengwa bage basege buno ntu ndo za Kalaga zikitwe mwigulu. Kabamba ka buni? Mu sula 3, twajigisizie buno Satana Diabolo agunine Yehowa. Kusila buguni bubo, Yehowa asigile Satana nu banzelo babi (basumbu) basigale mwigulu bindi kishembe. Kasi bansania mwigulu tabakitaga kusombola (ntundo za) kwa Kalaga. Mu sula 10, twijigisye bitondo byengé ku kabamba ka Satana nu basumbu.

12. Bitondo bikizi 2 bya mutali byatendelwa mu Kulolesibwa 12:10?

¹² Kulembana na Biblia, Yesu enabede Mukota nu kusila nkungu nkeke, enakitile bita na Satana. (Sanzula Kulolesibwa 12:7-10 *.) Kulolesibwa 12:10 lyatendela bitondo 2 bya mutali nunse: 1) Bukota bwa Kalaga, bukwangatwa na Yesu Kristo buse bwalinga kwangata. 2) Satana atukizibwa mwigulu nu alekedwe ga kesé. Bitondo bibyo bise byabaséla. Twabitendele ku lwabusyo.

13. Gatukizibwe Satana mwigulu, kikizi u kyabaside?

¹³ Biblia byatenda buno, gabatukizibwe mwigulu, Satana gamozi na basumbu, banzelo balandania babogilebogile nunse. Biblia byatenda bunee: “Bogazibogazi, meigulu nu inyuwe bekwikalagamo.” (Kulolesibwa 12:12) Ukinsa mwigulu kuli bubobelelo nu bumozi kubuno  bansania kuko bekukita kusombola (ntundo za) kwa Kalaga.

14. Buni buse kalamo mu kisi kutukila nkungu zatukizibwe Satana mwigulu?

¹⁴ Tondo ta bubo mu kesé: bitondo byakubabazia bikubasela bantu. Kabamba ka buni? “Kubuno diabolo agelile [agelilwe, NWT]” ga kisi nu eli na “bongoa bunene, kubuno eizi buno eli na nkungu nkeke.” (Kulolesibwa 12:12) Satana eli na bongoa bukali, kubuno atukizibwe mwigulu nu izi buno bwigi gano azikibwe. Ukinsa ekukita magala mage mansania kwa kulisizya banakantu mankunku nu mbabazio.

15. Buni buli makengelo ma Kalaga ku kesé?

¹⁵ Makengelo mabezaga na Kalaga ku kisi tamagalukile. Yehowa ekutunda banakantu basililila balame milyalya mu paradizo ga kesé. (Nimbo 37:29) Tondo buni bukazindilizia Bukota kusombola (ntundo za) kwa Kalaga?

16, 17. Danieli 2:44 lyatwigisya kikizi ku kabamba ka Bukota bwa Kalaga?

¹⁶ Bulengania buli mu Danieli 2:44 bwatenda bunee: “Mu bindi bya babo bakota, Kalaga wa kwigulu ekabika bukota butakazikibwa nu tabukangatwa na bango bantu. Bukabungula nu kuzikya mamo makota mansania nu bobwenyene bukasigala ku milyalya.” Bulengania bubo bwatwigisya kikizi ku kabamba ka Bukota bwa Kalaga?

¹⁷ 1) Bukota bwa Kalaga bunalingile kwangata “mu bindi bya babo bakota.” Bubo bwisulilwa buno, genalingile kwangata Bukota bwa Kalaga, mango makota menabede mekwangata. 2) Bukota bwa Kalaga bukasigala ku milyalya nu tabukatikibwa na bungo bukota.  3) Kukaba bita gesamba Bukota bwa Kalaga nu makota mansania ma ga kisi. Bukota bwa Kalaga bwakinde bita. Kasi, kesé kinsania kikangatwa na Bukota bumozi tugu: Bukota busoga nunse kutinga makota mansania mese mangata kino kesé.

18. Buni bukumanwa bita gesamba Bukota bwa Kalaga nu makota ma banakantu?

¹⁸ Bita gesamba Bukota bwa Kalaga nu makota ma banakantu byamanua Harmagedoni (Sanzula mukanda 10). Bikizi bikabasela lwabusio lwa bita? Basumbu bekengelela “bakota ba kisi kinsania, buno babakundamanie gamozi ku bita bya busi bunene bwa Kalaga Mwiya Mayombo [Mwiya Magala Mansania, NWT].” (Kulolesibwa 16:14, 16) Makota mansania malwanie Bukota bwa Kalaga.

19, 20. Kabamba ka buni tukwiyanina Bukota bwa Kalaga?

¹⁹ Kabamba ka buni twiyanina Bukota bwa Kalaga? Kuli tubamba tusatu. 1) Twiyanina Bukota bwa Kalaga kubuno tuli bagi nu ku kabamba ka bwagi, unukinsa tukusamba nu kukua. Tondo Biblia byatenda buno, gekangatwa kesé na Bukota bwa Kalaga, tukalama milyalya. Yoana 3:16 lyatenda bunee: “Kubuno Kalaga itide nunse kutunda ba ga kisi, akasenne Mwana wage wa ngomo, buno muntu unsania wamukatizia, ntazimine, tondo abe na kalamo katanakuzinda [kamilyalya].”

²⁰ 2) Twiyanina Bukota bwa Kalaga kubuno twatimbwa na bantu babi. Bantu beingi bekutenda buza nu beli biibi. Nu bango bekuketa butazi. Tatunema kubazugela kukita bubi, tondo ku Harmagedoni, Kalaga ekazikya babi bansania betekutunda kugaluka. (Sanzula Nimbo 37:10.) 3) Twiyanina lingo Bukota bwa Kalaga kubuno makota mansania ma banakantu tameli na  magala, miyala bwiti nu rushwa. Tamekukasia bantu banze Kalaga. Biblia byatenda buno muntu ekwangata ungo ku bubi.​—Musambazi 8:9.

21. Buni bwakite Bukota bwa Kalaga kwa kukita ntundo za Kalaga ku kesé?

²¹ Kuzinda kwa Harmagedoni, Bukota bwa Kalaga bukakita ntundo za Kalaga zikitwe ga kesé. Anga, Bukota bubo bukazikia Satana nu basumbu. (Kulolesibwa 20:1-3) Kuzinda, takuli muntu ukasamba lingo aba kukua. Kutingila kisansa kya bukuluzi, bantu bansania beli balandania ku Kalaga bekalama milyalya mu Paradizo (Kulolesibwa 22:1-3) (Sanzula mukanda 21). Bukota bwaswagye izina lya Kalaga. Bubo bwisulilwa buno, mu nkungu zikangata Bukota bwa Kalaga, bantu bansania bekanza izina lya Kalaga.

22. Buni butwamenya buno Yesu nt’imikilwe kuba Mukota gabezaga mu kesé nu gasubile mwiglu mu kazanga kongo?

²² Yesu igisizie basingwa bage basege bunee: “Bukota bwobe buvwe.” Kasi Bukota bwa Kalaga bunavule kutinga miaka na gatendile Yesu bubo. Yehowa enabikile tangi Bukota nu kwéméka Yesu kuba Mukota. Gasubile Yesu mwigulu andi kazanga kongo imikilwe Mukota?  Nu kilo. Atungananine kulendela. Buni butwamenya bubo? Nkungu nkeke nagayukizibwe Yesu, Petro nu Paulo batendile buno bulengania bwalenganizibwe mu Nimbo 110:1 bwatendelaga Yesu. Mu bulengania bubo, Yehowa abulaga Yesu bunee: “Ikala ku kuboko kwane kwa seidume aaba nu ganabike beiti bobe kunsi kwa magulu mobe.” (Misako 2:32-35; Baebrania 10:12, 13) Yesu enalindide kutinge nkungu zigezye gani?

23. a) Mu mwaka mukizi Yesu abende Mukota wa Bukota bwa Kalaga? b) Twijigisye kikizi mu sula zalemba?

²³ Miaka neingé lwabusio lwa mwaka wa 1914, kibombo kimozi kya bakriso ba bulili bijigisizye bulengania bwa Biblia nu bamenyile buno mwaka wa 1914 unabede mwaka wa mutali nunse (Sanzula mukanda 22). Kutukila mwaka wa 1914, bikutinga ono lelo mu kisi, byalosia buno makengelo mabo mabezaga ma bulili. Mu gozo mwaka, u mwalingile Yesu kwangata. (Nimbo 110:2) Kusila kwa nkungu nkeke, Satana agelilwe ku kisi. Asigala tugu na “nkungu nkeke.” (Kulolesibwa 12:12) Mu sula zalemba, twamone tulolesio twatutitikizia buno tukulama mu bindi byongo bya “nkungu nkeke.” Twijigisye lingo buno bwigi gano, kutingila Bukota bwa Kalaga, ntundo za Kalaga zakitwe mu kesé.