1. Ngumupailo nshi ushibikitwe ngweshi tubandike?

BANTU baanji baliushi kabotu mupailo wa NoBeeshiwesu, na Mupailo wa Mwaami. Yesu wakaamba mupailo uyu kwaamba ayi aiishe bashikwiiya bakwe mbobeelete kupaila. Ino nshiinshi nshaakapailila? Alimwi ino nceebonshi mupailo uyu ncoyandikila munshiku shino?

2. Ino nshintunshi shotatwe shiyandika Yesu nshaakatulwiita kupailila?

² Yesu wakaamba ayi: “mbulya mbomweelete kupaila: ‘NoBeeshiwesu nomuli kwiculu, alisalashikwe liina lyanu. Abwise Bwaami bwanu. Kuyanda kwanu akucitwe panshi pano bweenka mbuli kwiculu.’” (Amubelenge Mateyo 6:9-13.) Ino nceebonshi Yesu ncaakatwiisha kupailila shintu shotatwe ishi?—Amubone Makani Aamwi 20.

3. Ino nshiinshi nshotweelete kushiba pa Bwaami bwakwe Lesa?

³ Tweeya kwaamba ayi liina lyakwe Lesa ngu Yehova. Alimwi tweeya Lesa ncaakabumbila bantu acishi ca panshi. Ono ino Yesu wakalinga kusansulula nshi ndyaakaamba ayi: “Abwise Bwaami bwanu”? Tutokwiiya Bwaami bwakwe Lesa ncocaamba, nsheshi bukacite, ambweshi bukasalashe liina lyakwe Lesa.

4. Ino Bwaami bwakwe Lesa nciinshi, alimwi ino Mwaami wa Bwaami ubu ngani?

⁴ Yehova wakabamba mfulumeende yakwe akusala Yesu kwaamba ayi abe Mwaami. Baibo ileeta mfulumeende iyi ayi Bwaami bwakwe Lesa. Yesu ngu  “mweendeleshi wa beendeleshi alimwi Mwaami wa baami.” (1 Timoti 6:15) Taakuwo muntu weenga weendelesha kabotu bantu kwiinda Yesu, alimwi nabi twababika pomwi, beendeleshi boonse ba bantu inga tabeendi Yesu nkusu.

5. Ino Bwaami bwakwe Lesa bulaakunokweendelesha kuswa kuli? Ino bunanokweendelesha baani?

⁵ Ndipakeenda nshiku 40 kuswa ciindi ndyaakabushikwa, Yesu wakaboolela kwiculu. Mukuya kwaciindi Yehova wakamubika pa Bwaami. (Milimo 2:33) Mfulumeende yakwe Lesa ilaakweendelesha cishi ca panshi kuswa kwiculu. (Ciyubululo 11:15) Nceceeco Baibo ncoyaambila Bwaami bwakwe Lesa ayi “Bwaami bwakwiculu.”—2 Timoti 4:18.

6, 7. Ino nceebonshi Yesu alipusene a mwaami uli woonse?

⁶ Baibo ilaamba ayi taakuwo mwaami weenga weelana a Yesu mukwiinga “lakwe eenkabo ngootafwi.” (1 Timoti 6:16) Beendeleshi ba bantu boonse mukuya kwaciindi balafwa, ono Yesu teshi akafwewo. Shintu shibotu shoonse Yesu nsheshi akatucitile shilaakubaako kwamuyayaya.

⁷ Bushinshimi bwamu Baibo bulaamba ayi Yesu alaakuba Mwaami ululeme alimwi ucite nkumbu: “Mushimu wakwe Yehova ulaakuba pali nguwe, mushimu wabusongo akunyumfwishisha, wakupanda maano akupa nkusu, Mushimu walushibo akuloonda Yehova. Ulaakunoosangalala mukuloonda Yehova. Teshi akanokoombolosha kweelana anshabonabo kumeenso akwe, nabi kululika kweelana ashintu nshaanyumfwabo amatwi akwe. Bantu bapengete alaakunoobombolosha cakutasalulula.” (Isaya 11:2-4) Sa inga mwasuna kuba a mwaami uli boobo?

8. Ino tulishi buyani ayi Yesu teshi akanokweendelesha eenka?

⁸ Lesa wakasala bantu bamwi kwaamba ayi bakanokweendelesha a Yesu kwiculu. Kucakubonenaako, mutumwi  Paulo wakalwiita Timoti ayi: “Na tutolelele kuliyumya, tulaakweendelesha anguwe mbuli baami.” (2 Timoti 2:12) Ino mbongaye beshi bakanokweendelesha a Yesu mbuli baami?

9. Ino mbongaye beshi bakanokweendelesha pomwi a Yesu? Ino Lesa wakatalika lili kubasala?

⁹ Bweenka mbuli mbotwakeeya mu Mutwi 7, mutumwi Joni kwiinda mucili anga nciloto wakabona Yesu mbuli Mwaami kwiculu abaami bamwi bali 144,000. Ino baami aba mbaani? Joni wakaamba ayi “balilembetwe liina lyakwe [Yesu] alimwi aliina lya Baishi pankumo shabo.” Wakatolelela akwaamba ayi: “Aba mbaabo batolelela kukonkela Mwanaambelele [Yesu] kuli koonse nkwaaya. Bakoolwa kuswa pakati kabantu.” (Amubelenge Ciyubululo 14:1, 4.) Likoto lya 144,000 mBeneklistu bashomeka Lesa mbwaakasala kwaamba ayi ‘bakanoolela mbuli baami pacishi ca panshi’ pomwi a Yesu. Na bafwa, balabushikwa akuya kwiculu. (Ciyubululo 5:10) Yehova wakatalika kusala Beneklistu bashomeka beshi bakabe lubasu lwa baami bali 144,000 kuswabo ciindi ca batumwi.

10. Ino nceebonshi mbubaambo bwa lusuno lwakwe Yehova kwaamba ayi Yesu aba 144,000 bakeendeleshe bantu?

¹⁰ Yehova alatubikila maano abuumbi, nceceeco ncaakabikila bubaambo bwa kwaamba ayi bantu bakanokweendelesha pomwi a Yesu. Yesu alaakuba mweendeleshi mubotu mukwiinga alitushi kabotu. Alicishi mbocibete kuba muntu akupenga. Paulo wakaamba ayi Yesu alatuyeeyelaako, “akutunyumfwila nkumbu mukulefuka kwesu,” alimwi “wakeeleshekwa munshila shoonse bweenka mbotweeleshekwa.” (Bene Ebulu 4:15; 5:8) Ba 144,000 abalo balicishi kabotu mbocibete kuba muntu. Abalo bakapengaawo ceebo cakutasalala. Aboobo inga twashooma kwaamba ayi Yesu aba 144,000 balaakunyumfwisha mbotulinyumfwa amapensho ngotwiindaamo.

11. Ino nceebonshi Yesu ncakaiishila bashikwiiya bakwe kupaila ayi kuyanda kwakwe Lesa kucitwe kwiculu?

¹¹ Yesu wakaiisha bashikwiiya bakwe kupaila ayi kuyanda kwakwe Lesa kucitwe bweenka mbuli kwiculu. Ino nceebonshi? Mumutwi 3 twakeeya ayi Satana wakapondokela Yehova. Pesule lyakupondoka, Yehova wakasuminisha Satana abashikaswa bakwe na baanjelo bakapondoka kukala ciindi ciniinibo kwiculu. Aboobo teshi boonse kwiculu bakalinga kucita kuyanda kwakwe Lesa. Mumutwi 10, tulaakwiiya shiinji pali Satana abashikaswa bakwe.

12. Ino nshakucitika shobilo shili shiyandika shaambwa pa Ciyubululo 12:10?

¹² Baibo ilatulwiita ayi Yesu ndyaakabikwabo kuba Mwaami wa Bwaami bwakwe Lesa, wakalinga kweelete kulwana Satana. (Amubelenge Ciyubululo 12:7-10.) Vesi 10 itoosansulula shakucitika shobilo shiyandika abuumbi. Kutalika kwa bweendeleshi bwa Bwaami bwakwe Lesa a Yesu Klistu mbuli Mwaami, akuwaala Satana pacishi ca panshi kuswa kwiculu. Ono bweenka mbuli mbotwabandikawo kale, ishi shintu shakacitika kale.

13. Ino nciinshi cakacitika kwiculu Satana ndibakamutanda?

¹³ Baibo ilaamba ayi baanjelo bashomeka bakakondwa abuumbi Satana abashikaswa bakwe ndibakatandwa kuswa kwiculu. Baibo ilaamba ayi: “Sekelela, webo oliculu alimwi abaabo boonse bakalaamo!” (Ciyubululo 12:12) Mukwiinga uli woonse kwiculu utoocita kuyanda kwakwe Lesa ano, kuli luumuno alucatano.

14. Ino buumi buli buyani pacishi ca panshi ceebo cakwe Satana?

¹⁴ Ono buumi pacishi ca panshi bulipusene abuumbi. Bantu balacitikilwa shintu shibiibi abuumbi ‘mukwiinga Satana wakesa waano’ alimwi “alicite bukali butaambiki, ceebo ulishi ayi wacaashabo kaciindi kaniini.” (Ciyubululo  12:12) Satana alikalalite. Bakamutanda kwiculu, alimwi alicishi ayi ulaakunyonyoolwa conoonobo. Nceceeco ncaatoletela mapensho, kucisa, akupenga pacishi coonse.

15. Ino nciinshi Lesa ncaakapangila cishi ca panshi?

¹⁵ Ono luyaando Lesa ndwaakapangila cishi ca panshi taluna kucinja. Ucisuni kwaamba ayi bantu basalalite bakekale buumi butamaani mupaladaiso pacishi ca panshi. (Kulumbaisha 37:29) Ino Bwaami bwakwe Lesa bulaakucita nshi kwaamba ayi ici cikakonsheke?

16, 17. Ino lilembo lyakwe Danyelo 2:44 lilatulwiita nshi pa Bwaami bwakwe Lesa?

¹⁶ Bushinshimi bucanika pa Danyelo 2:44 bulaamba ayi: “Muciindi ca baami abo Lesa wakwiculu alaakubika bwaami ubo bweshi bukabule kunyonyoolwa. Alimwi bwaami ubu teshi bukapekwe kubantu bamwi sobwe. Bulaakupwayoola akumanisha maami aya oonse, mpeeke bwalo bweenka mbweshi bukekale kwamuyayaya.” Ino bushinshimi ubu butootwiisha nshi pa Bwaami bwakwe Lesa?

¹⁷ Cakutaanguna, tutokwiiya kwaamba ayi Bwaami bwakwe Lesa bulaakutalika kweendelesha “muciindi ca baami abo.” Nkokwaamba ayi mfulumeende shimwi shilaakunokweendelesha pacishi, ciindi Bwaami bwakwe Lesa ndyeshi bukatalike kulela. Cabili, tutokwiiya kwaamba ayi Bwaami bwakwe Lesa bulaakwikala muyayaya alimwi taakuwo mfulumeende yeshi ikabupyaane sobwe. Catatu, kulaakuba nkondo pakati ka Bwaami bwakwe Lesa amfulumeende sha pacishi ca panshi. Bwaami bwakwe Lesa bulaakukoma akucalabo bweenka bweshi bukanoolela pacishi coonse. Lyalo tulaakuba amfulumeende ibotu kwiindaawo.

18. Ino nkoondo yeshi ikalwanwe pakati ka Bwaami bwakwe Lesa amfulumeende sha pacishi iletwa ayi nshi?

¹⁸ Ino Bwaami bwakwe Lesa bulaakutalika buyani  kweendelesha pacishi ca panshi? Inkondo yakweelaako iitwa ayi Amagedoni kaitana kutalika, bashikaswa balaakuyunga ‘bamaami boonse ba mucishi ca panshi, akubabunjika pomwi kunkondo yabushiku bunene bwakwe Lesa Shinkusu Shoonse.’ Ncakwiila, mfulumeende sha pacishi ca panshi shilaakulwana aBwaami bwakwe Lesa.—Ciyubululo 16:14, 16; amubone Makani Aamwi 10.

19, 20. Ino nceebonshi ncetutoyandila Bwaami bwakwe Lesa pacishi ca panshi?

¹⁹ Ino nceebonshi ncetutoyandila Bwaami bwakwe Lesa? Ceebo ca shintu shotatwe. Cakutaanguna, tatusalalite, aboobo tulaciswa akufwa. Sombi Baibo ilaamba ayi tulaakuba abuumi butamaani mu Bwaami bwakwe Lesa. Lilembo lyakwe Joni 3:16 lilaamba ayi: “Lesa wakasunisha bantu boonse ba mucishi ca panshi abuumbi. Aboobo wakatuma Mwanaakwe wakashalwabo eenka kwaamba ayi uyo woonse umushoma ataloobi, sombi abe abuumi butamaani.”

²⁰ Cabili ncetutoyandila Bwaami bwakwe Lesa ncakwaamba ayi tulishingulukitwe abantu bacita shibiibi. Bantu baanji mbabeshi, balacenjeeka alimwi balacita shabufuule. Swebo inga tatucikoonshi kubakushawo, sombi Lesa ngweshi akacite boobo. Abo batootolelela kucita shibiibi balaakunyonyoolwa pabushiku bwa Amagedoni. (Amubelenge Kulumbaisha 37:10.) Catatu ncetutoyandila Bwaami bwakwe Lesa ncakwaamba ayi mfulumeende sha bantu shaalilwa, tashibete kabotu, alimwi shilalita bantu masuku pamitwi. Tabasuniiwo kucafwa bantu kunyumfwila Lesa. Baibo ilaamba ayi ‘muntu aleendelesha muntunyina munshila imuletela mapensho.’—Shikushimikila 8:9.

21. Ino Bwaami bwakwe Lesa bulaakushinisha buyani ayi kuyanda kwakwe Lesa kutoocitwa pacishi ca panshi?

²¹ Pesule lya Amagedoni, Bwaami bwakwe Lesa bulaakushinisha  kwaamba ayi kuyanda kwakwe Lesa kutoocitwa pacishi ca panshi. Kucakubonenaako, bulaakukusha Satana abashikaswa bakwe. (Ciyubululo 20:1-3) Mukuya kwaciindi lufu akuciswa shilaakumana. Bantu boonse bashomeka balaakuba abuumi butamaani mu Paladaiso pamulandu wacilubula. (Ciyubululo 22:1-3) Bwaami bulaakusalasha liina lyakwe Lesa. Ino ici cilaambanshi? Cilaamba ayi mfulumeende yakwe Lesa ndyeshi ikanokweendelesha pacishi ca panshi, bantu boonse balaakulemeka liina lyakwe Lesa.—Amubone Makani Aamwi 21.

22. Ino tulishi buyani ayi Yesu taakwe kuba Mwaami ndyaakalinga pacishi ca panshi na ndyaakabushikwabo?

²² Yesu wakaiisha bashikwiiya bakwe kupaila ayi: “Abwise Bwaami bwanu.” Aboobo tacakalinga cakutoonsha ayi mfulumeende yakwe Lesa ilaakusa kunembo. Cakutaanguna Yehova wakalinga kweelete kubika Bwaami bwakwe a Mwaami Yesu. Sa Yesu wakapekwa Bwaami ndyakaboolelabo kwiculu? Sobwe, wakalinga kweelete kulindila. Pesule lyakubushikwa kwakwe Yesu, Pita a Paulo bakasansulula kabotu makani aya kusebensesha bushinshimi bucanika pa Kulumbaisha 110:1. Yehova wakalwiita Yesu ayi: “Kala kulyaansa lyangu lyalulyo kushikila  nkaalule balwani bako kwaamba ayi babe mpopakulyata myeendo yako.” (Milimo 2:32-35; Bene Ebulu 10:12, 13) Ino nciindi cilaamfu buyani Yesu ncaakalinga kweelete kulindila kwaamba ayi Yehova akamubike pa bwaami?

23. (a) Ino ndilili Yesu ndyaakatalika kweendelesha mbuli Mwaami wa Bwaami bwakwe Lesa? (b) Ino tulaakwiiya nshi mumutwi utokonkelaawo?

²³ Kwa myaaka iinji 1914 kaitana kushika, likoto lya Beneklistu bashomeka bakeshiba kwaamba ayi mwaaka uyu ulaakuba uyandika kweelana abushinshimi bwamu Baibo. Shintu shakacitika pacishi kuswabo mu 1914 shakatondesha ayi nshobakalinga bashoma shakalinga shancine. Uyu ngomwaaka Yesu ndyaakatalika kweendelesha mbuli Mwaami. (Kulumbaisha 110:2) Ndipakeendabo ciindi ciniini, Satana wakawaalwa pacishi ca panshi, alimwi pacecino ciindi “wacaashabo kaciindi kaniini.” (Ciyubululo 12:12) Mumutwi utokonkelaawo, tulaakwiiya makani aanji atootondesha ayi ici nceciindi ncetutookalaamo. Alimwi tulaakwiiya ayi conoonobo Bwaami bwakwe Lesa bulaakushinisha kwaamba ayi kuyanda kwakwe Lesa kutoocitwa pacishi ca panshi.—Amubone Makani Aamwi 22.