1. Mungu ziza amani muzu e’yo onizu drinia ri ngo i?

’BA IZITA ’bani omve Ama Ata ’Buari, kaniku A’iza Opi ni Imbale ri nipi ra ’diyi ma kalafe milioni milioni. Yesu imba izita ’di ’ba ima vuti bipi ’diyi ni eyini ecozu geri ’bani Mungu zizu ri onizu. Afa erini ece izita ’di ma alea ’diyi a’duni? Izita ’di sa ’disi amani orodriru a’dusi?

2. Afa orodriru na Yesu ni ama imbazu Mungu zizu eyi ma dria ’diyi a’duni?

² Yesu ’yo ’dini: “Emi zi ’dini; ‘Ata amani ovupi ’buari, Ru mini ma ovu inzizaru. Suru mini ma emu, E’yo mini leleri ma ’ye i Nyakua ekile ’buarile.’” (Mi la Matayo 6:9-13.) Yesu imba ama Mungu zizu afa na ’diyi si a’dusi?​—Mi ne E’yo O’bazaru ’Diyi 20 ri.

3. Ama di mu e’yo oni a’du ma dria?

³ Ama oni di Mungu ma ru Yehova i ri ’bo. Ama oni vini Mungu ma asisile ’ba ada yini azini nyaku ’dini ri ’bo. Te di Yesu ni ’yozu “Suru mini ma emu” ri ma efi ngoni? Ama di mu e’yo oni Suru Mungu niri ma dria, afa Suru nde ni nga ’ye ri ma dria, azini geri erini ngazu Mungu ma ru ’bazu alatararu ri ma dria.

4. Suru Mungu niri a’duni, azini Opi niri a’di i?

⁴ Yehova e’do opi nyaza azi ’bua, pe Yesu ni ovuzu Opi niri ru. Biblia omve opi nyaza ’di Suru Mungu niri. Yesu ni ‘Opi ’ba opi nyapi ’diyi niri azini Meleki  ’ba melekiru ’diyi niri.’ (1 Timoteo 6:15) Yesu eco e’yo muke ri ’ye aga ’ba ada azi ni eco ’ye ri ra, dika aga ’ba opi nyapi nyakua ’dia ’diyi okpo si dria ra.

5. Suru Mungu niri ni nga opi nya engazu ngoa? Eri nga opi nya a’du ma dria?

⁵ O’du kali su Yesu ni engazu idriru ’bo ri ma vutia, da dri ’bua. Sa azi ma vutia, Yehova pe di eri ovuzu Suru ’buari ma Opiru. (’Yeta 2:33) Opi nyaza Mungu niri ni nga ’ba nyakua ’diyi ma dri ce engazu ’bua. (E’yo Eceza 11:15) ’Di di bani asisile Biblia ni Suru Mungu niri omvezu ‘Suru ’buari’ i ri.​—2 Timoteo 4:18.

6, 7. Yesu aga opi ’ba adaru ’diyi onyi si ra a’dusi?

⁶ Biblia ’yo kini Yesu aga opi ’ba adaru ’diyi dria ra a’dusiku “ngani dra dika ku.” (1 Timoteo 6:16) ’Ba opiru ’diyi nga dria odra ra, te Yesu econi nga dra ku. E’yo onyiru erini nga ’ye amani ’diyi nga awi ’dani ’dani.

⁷ E’yo Biblia ni ondri ri ece kini Yesu ni nga e’yo ’ye kililiru azini eri nga ovu Opi asi ndriza be ri i: “Orindi Yehovaniri nga ovu eri ma dria, orindi onduani e’yo vazaniri be, orindi e’yo amazani azini okponiri be, orindi nitani azini orindi Yehova ruzuri be. Te ayiko erini nga ovu ruta Yehovani ma alia. Eri ngani ’ba ma e’yo li ekile erini ndrele i ma milesirile ku, eri ngani vini ega ’ba ma dria erini e’yoni erile i ma bilesirile ku; te eri nga ’ba alioru ma e’yo li onyisi.” (Isaya 11:2-4) Mi le opi mivu ri ni ovuzu ’dile ra ya?

8. Ama ni ngoniru Yesu ngani opi nya a’dule ku?

⁸ Mungu ope ’ba azi yi engazu nyakua ’dia muzu opi nyazu ’bua Yesu be. Eceta si, ’ba ti pele Paulo ’yo Timoteo ni: “Ama ka candi a’i asi teza be, ama nga opi  nya eri be indi.” (2 Timoteo 2:12) ’Ba ngapi opi nyapi Yesu be ’diyi ma kalafe ni nga ovu si?

9. ’Ba Yesu ni ngazu opi nyazu yi be tualu ’diyi ma kalafe si? Mungu e’do eyi ope sa ngosi?

⁹ Amani ndra oni Capita 7 ma alea ’bo rile, ’ba ti pele Yohana ne e’yo ndreza ma alea Yesu ni Opiru ’bua ’ba azi opiru 144,000 ’diyi be. ’Ba azi 144,000 ’diyi a’dipi ya? Yohana ece kini ’ba ’diyi “ru [Yesu] ni be azini Ati ma ru be sizaru yi ma andretia.” ’Yo vini ’dini: “’Ba ’diyi yi ’ba Kabilomva ma vuti bipi geri dria erini muzuria ’diyi; je ndra yi ’ba ma eselia.” (Mi la E’yo Eceza 14:1, 4.) Kristiani a’ita be Mungu ni ope 144,000 ’diyi nga “opi nya” Yesu be nyaku ’di ma dri cezu. Eyini odrazu ’bo ria, ’ba eyi enga o’azu ’bua. (E’yo Eceza 5:10) E’dozu sa ’ba ti opele ’diyi vuri si, Yehova ebi Kristiani a’ita be ’diyi ma azi ope muzu ovuzu opi 144,000 ’diyi ru.

10. Yesu ni opi nyazu ’ba ada ma dria ’ba 144,000 ’diyi pie ri otita azi Yehova ni letaru ni a’dusi?

¹⁰ Yehova ni asizu amasi saaru risi, ope ’ba azi yi engazu nyakua, muzu opi nyazu Yesu be tualu. Yesu ni nga ovu opi kililiru ni a’dusiku va e’yo amani ovuzu alenia ’diyi ra. Ni e’yo ovuzu ’ba ada ru azini ’bani candi nyazu ri ma azo ngoni yari ra. Paulo ’yo kini Yesu ni e’yo ama azopi saaru ’diyi ra, ni “okpoako amani ma candi” ra, azini “ovu ndra obezaru e’yo driasi ekile amale.” (’Ba Ebraniani 4:15; 5:8) ’Ba 144,000 ’diyi ni vini o’azu ’ba ada ru ri ma ewa ngole yari ra. Eyi vini ’ba ebipi dri cipi okpoako si azini azo si ra ’diyi. Ama eco di ni ra Yesu i, azini ’ba 144,000 ’diyi e’yo ama azopi saaru ’diyi va ra, azini eyi vini e’yo ewaru amani muzu alenia si ’diyi va indi.

11. Yesu imba ’ba ima vuti bipi ’diyi izizu e’yo Munguni leleri ni i ’yezu ’bua ’dini a’dusi?

¹¹ Yesu imba ’ba ima vuti bipi ’diyi Mungu zizu e’yo Munguni leleri ni i ’yezu ’bua. A’dusi? Amani ndra oni Capita 3 ma alea ’bo ri le, Satani ’Ba asu Supiri ga Yehova ma ti eriko si. Satani ni Yehova ma ti gazu ’bo ri ma vutia, ’ba awini eri ofu malaika azi a’ita kokoru, ecapi orindi onziru ’diyi pie ’bua risi coti coti ku. Sa ’dasi adrini malaika ’bua ’diyi ndra woro e’yo Mungu ni leleri ’ye ’dini ku. Ama nga e’yo oni Satani ma dria azini orindi onzi ’diyi ma dria angiri Capita 10 ma alea.

12. E’yo okporu iri yi ’yepi ’bani e’yoni ece E’yo Eceza 12:10 ma alea ’diyi ngo yi?

¹² Biblia ece amani kini, ’bani Yesu ni ’bazu Opiru Suru Mungu niri ma dri cezu ’bo ria, mu a’di ’di Satani be. (Mi la E’yo Eceza 12:7-10.) Vasi 10 ece amani e’yo okporu iri yi ’yepi ’diyi. Suru Mungu niri e’do opi nya, Yesu Kristo ni Opi niri ru ni. ’Ba e’be di vini Satani ni engazu ’bua risi va. Ama nga e’yo ’di ’ye yi ’bo ri oni drile ’dale ra.

13. A’du ’ye ndra i ’bua ’dale ni sa ’bani Satani ni e’bezu ’bua risi va ria?

¹³ Biblia ece amani e’yo ayiko malaika a’ita be ’diyi fupi, sa ’bani Satani ni e’bezu orindi onzi erini ’diyi pie ’bo ri ma vutia ri ma dria ra. ’Yo amani ’dini: “Mi ’bu la, emi ma ovu ayikosi ’ba ovupi mi alea ’diyi be!” (E’yo Eceza 12:12) ’Bua ’dale asianzu azini ti ecita adari di ci a’dusiku malaika ’bua ’diyi sa ’disi woro e’yo Mungu ni leleri ’ye.

14. A’du afa ni di sa ’disi i ’ye nyakua ni, ’bani Satani ni e’bezu ’bua risi va ’boria?

 ¹⁴ Te e’yo nyakua ri co nga kiri esele e’yo ’bua ri be ra. E’yo nyakua ’diyi candiru ‘a’disiku ’Ba asu Supiri esi va’ ’bo, dika eri “adra amboru be tu, erini nile ewu ini ace wererisi.” (E’yo Eceza 12:12) Satani ni aoko si tu. ’Ba e’be eri ’bua risi va, dika ni ra ace were ’ba nga ima dri ja ra. Eri e’yo ci ini eco ra ri ’ye ecozu e’yo onzi ’diyi ’yezu, azini rua suza ejizu candi nyaza be wudrikuru drisi dria.

15. Asisile Mungu ni nyaku ’di ma dria ri ngoni?

¹⁵ Te asisile Mungu ni nyaku ’di ma dria ri ojani nga i ku. Le nga kiri ’ba yi ma o’a paradisia nyakua ’dia rua alaru si ’dani ’dani. (Zaburi 37:29) Suru Mungu niri ni di nga fe e’yo ’di ni i ’yezu ngoniru?

16, 17. Danieli 2:44 ece amani Suru Mungu niri ma dria a’du ma e’yo ni?

¹⁶ E’yo ondriza Danieli 2:44 ma alea ri ’yo ’dini: “Ewu opi ’dayinirisi, Mungu ’buari nga suru ngapi dri japi ewu vusi ewu vusi ku ri ’ba ra, yi ngani vini suru nde ma opi nyaza ku suru azini dri ku. Te suru nde nga suru awa’dini ’diyi onyo dria nyingiriki, yi dri jazu dria ra, te suru nderi nga pa so ’dani.” E’yo ondriza ’di ece amani Suru Mungu niri ma dria a’du ma e’yo ni?

¹⁷ Okori si, ece amani kini Suru Mungu niri ni e’do opi nya “ewu opi ’dayinirisi.” Efini si Suru Mungu niri ni e’dozu opi nyazu risi, opi nyaza nyakua ’dia ’diyi nga kiri ovu ci. Irizu ri, ece amani Suru Mungu niri econi nga dri ja ku azini eri nga opi nyaza azi ’diyi ma dri ja te. Nazu ri, a’di ’diza ni nga ovu Suru Mungu niri pi ma eselea opi nyaza nyakua ’diyi pie ci. Suru  Mungu niri ni nga a’di ’diza ’da nde ra, eri di nga opi nya ’ba nyakua ’diyi ma dria ni. ’Ba eyi di nga ovu opi nyaza onyiru ndepi ra ri be.

18. A’di ’diza asizu Suru Mungu niri pi ma eselea opi nyaza nyakua ’dia ’diyi pie ri ma ru a’duni?

¹⁸ Suru Mungu niri ni nga e’do opi nya ’ba nyakua ’diyi ma dria ngoniru? De nga a’di Amagedoni niri e’do ni ku, orindi onzi yi nga mu “opi amboru wudrikurua ’diyi vusi dria, yi okuzu tualu omba ’bazu o’du amboru Mungu Okpo E’iruni pelerisi.” Opi nyaza ’ba ada ni ’diyi nga a’di ’di Suru Mungu niri be ra.​—E’yo Eceza 16:14, 16; mi ne E’yo O’bazaru ’Diyi 10 ri.

19, 20. Ale Suru Mungu niri ma emu opi nya nyakua ’dia ra a’dusi?

¹⁹ Ale Suru Mungu niri ra a’dusi? Asisile ni yi na. Aluzu ri, azo ni ama obi azini ama odra amani ovuzu ezata be risi. Te di Biblia ece amani Suru Mungu niri ma palaa, ama nga o’a ’dani ’dani. Adani si, Yohana 3:16 ’yo ’dini: “Munguni ’ba nyakua ’diyi lele turisi, eri fe Mvi erini tile aluri, ’dini ’ba dria alu alu eri a’ipiri ma ja dri ku, te ma ovu idri ’dani ’dani be.”

²⁰ Asisile irizu amani Suru Mungu niri lezu ra ri, ’ba onzi ’diyi ma kalafe di amba amba. ’Ba eyi inzo nze, eyi aramu nya, azini eyi ali o’ba. Ama econi ’ba ’dile ’diyi ma dri ja ku, te Mungu eco ra. ’Ba e’yo onzi ’yepi ’diyi nga dri ja Amagedoni si dria ra. (Mi la Zaburi 37:10.) Asisile nazu amani Suru Mungu niri lezu ri, opi nyaza ’ba ada ni ’diyi okpo kokoru, adraru, azini eyi anyamgbolo ru. Eyi ma asisile azi ecozu ’ba yi ma aza kozu e’yo Mungu ni leleri ’yezu ni yo. Biblia ’yo kini ’ba alu ni ‘ovu okpo be ’ba azini ma drilia eri ’yezu onzi.’​—Eklesiaste 8:9.

21. Suru Mungu niri di nga fe e’yo Mungu ni leleri ni i ’yezu nyakua ’dia ecekokoru ngoniru?

 ²¹ Amagedoni ma vutia, Suru Mungu niri ni nga fe e’yo Mungu ni leleri ma ’ye i nyakua ecekokoru. Eceta si, eri nga Satani ma dri ja orindi onzi ’diyi pie ra. (E’yo Eceza 20:1-3) E’yere e’yere, ’ba azi econi di nga eca azoru kaniku dra ku. Orodri amani isu onzeta ma alea risi, ’ba dria a’ita be ’diyi di nga o’a ’dani ’dani Paradisia ra. (E’yo Eceza 22:1-3) Suru ’di ni di nga fe Mungu ma ru ni ovuzu inziza ru. ’Di ma efi ngoni? Efinisi opi nyaza Mungu niri ka e’do nyaku ’di ma dri ce ’bo, ’ba dria ni di nga Yehova ma ru inzi ra.​—Mi ne E’yo O’bazaru ’Diyi 21 ri.

22. Ama ni ngoniru Yesu ecani ndra Opiru sa erini ovuzu nyakua ’dia risi ku?

²² Yesu imba ’ba ima vuti bipi ’diyi Mungu zizu ’dini: “Suru mini ma emu.” Opi nyaza Mungu niri nga emu adaru ra ri e’da di ndra i nditiri. Oko risi Yehova ni opi nyaza ’di e’do ra, dika eri Yesu ni ’ba Opi niri ru. Yesu eca Opiru erini tuzu ’bua ’bo ri ma vutia coti coti ya? Yo, le ndra ma te nga were. O’du ka mu aga were  Yesu ni engazu ’bo ri ma vutia, Petero pi e’da e’yo ’di Paulo be nditiri eyini e’yo Zaburi 110:1 ma alea ri ’ye i Yesu be ngoniru yari ecezu risi. E’yo ondriza ’di ma alea, Yehova ’yo ’dini: “Mi ri ma dri ndiria, de nga ma ’bani ari’ba mini ovuzu afa mi pa ’bazu driniariru ku.” (’Yeta 2:32-35; ’Ba Ebraniani 10:12, 13) Le ndra Yesu ma te di ngopi Yehova ni ngazu eri ’bazu Opiru?

23. (a) Yesu eca Suru Mungu niri ma Opiru eli ngosi? (b) Ama nga a’du ma e’yo oni capita ’di ma drilea ri ma alea?

²³ Eli kakau de nga eli 1914 ecani ku, Kristiani azi were asi ada be ni va ndra eli ’dari nga ovu orodriru e’yo ondriza azi Biblia ma alea nini muzu i ’yezu ri ra. E’yo yi ’yepi wudrikurua e’dozu eli 1914 si ri e’da di nditiri e’yo eyini ndra oni ’dari ada. Yesu eca Opiru eli ’dasi. (Zaburi 110:2) ’Da ma vutia, e’be Satani ni nyakua, dika sa ’disi ewu Satani niri “ace were.” (E’yo Eceza 12:12) Ama nga e’yo e’dapi ama di sa ’disi ewu nde ma alea ’diyi oni angiri capita ’di ma drilea ri ma alea. Ama vini nga oni ace di were Suru Mungu niri nga fe e’yo Mungu ni leleri ni i ’yezu nyakua ecekokoru.​—Mi ne E’yo O’bazaru ’Diyi 22 ri.