1. ¿Ja ga xiji nu jñaa ke e Jesús o jichi kʼo discípulo?

NA PUNKJꞸ ntee pa̱ra̱ji nu padrenuestro. Nge nu jñaa kʼꞹ go jichi e Jesús kʼo o discípulo, go xipjiji ja rgua dyøtꞹji Mizhokjimi. ¿Pje go xipjiji ke ro dyøtꞹji? Ñe ¿pjenga me na mubi yo mama ne padrenuestro yo padya?

2. ¿Pje go mama e Jesús kʼꞹ ra øtꞹji e Jehová?

² E Jesús go xipji ko mi teñe angeze: “Nutsʼkʼeji ri dyøtꞹji Mizhokjimi ga kjagua: ‘Mi Tatatsʼꞹgøjme kʼꞹ gi bʼꞹnkʼe ajensʼe, ni jyodʼꞹ kʼꞹ texeji ra respetao in chju̱ge. Penkejme in reino ngekʼo nrrexe yo ka̱ra̱ ajensʼe ñe kja ne xoñijomꞹ ra dyⱥtkʼⱥji’” (Mateo 6:9, 10, TNM) (xørꞹ Mateo 6:11-13). ¿Pje nee ra mama yo jñaa ke e Jesús o jizhi ja rga øtꞹji Mizhokjimi? (Jñanrra nu nota 20 kja nu página 216).

3. ¿Pje ni jyodʼꞹ ra pjechiji ja ga ngeje nu Reino Mizhokjimi?

³ Ya ro pjechiji ke e Mizhokjimi ni chju̱u̱ Jehová, xo ro nuji pje ra tsjaa angeze kja ne xoñijomꞹ ñe pjenga go dyakꞹji ro ka̱rgøjiba. E Jesús go mama: “Penkejme in reino”. ¿Pje ngeje nu Reino Mizhokjimi? ¿Pje ra tsjaa ma ra manda ñe pje ra tsjaa ngekʼua nrrexe yo ntee ra respetaoji o trju̱u̱ angeze?

4. ¿Pje ngeje nu Reino Mizhokjimi ñe kjo ngeje nu Rey kʼꞹ ra mandanu?

⁴ E Mizhokjimi Jehová o ñʼeme na Reino ajensʼe ñe go  ñʼesʼenu e Jesús ra manda. Ne Biblia mama ke o Reino Mizhokjimi nge na gobierno ke ra manda kja ne xoñijomꞹ. E Jesús ngeje nu Rey ñe ra “manda texe kja yo jmuʼu ñe texe kja yo rey” (Apocalipsis 17:14). E Jesús ra tsjaa kʼo me na joo kʼo dya bʼe kjaa ni ri na gobierno yo mandaba, e Jesús me na zɇzhi ngekʼo nrrexe yo gobierno dya søø ra tsjaji kʼo ra tsjaa angeze.

5. ¿Ja bʼꞹbʼꞹ nu gobierno Mizhokjimi ñe ja nge kʼua ra manda?

⁵ Ma e Jehová go xosꞹ e Jesús, go kjogꞹ cuarenta paa ma kja go nzhogꞹ ajensʼe. Nunu e Jehová go ñʼesʼe e Jesús ro tsjaa Rey (Hechos 2:33). Nu gobierno Mizhokjimi kʼꞹ bʼꞹbʼꞹ ajensʼe, ra manda kja ne xoñijomꞹ (Apocalipsis 11:15). Ngekʼua ne Biblia mama ke nu gobierno Mizhokjimi ngeje na “Reino ajensʼe” (2 Timoteo 4:18, TNM).

6, 7. ¿Pjenga dya chjenjui e Jesús yo ntee yo manda kja ne xoñijomꞹ?

⁶ Ne Biblia mama ke e Jesús dya chjenjui yo ntee yo manda kja ne xoñijomꞹ, nange angeze “dya kja søø xe ra nrru̱u̱, sido ra bʼꞹbʼꞹtrjo” (Romanos 6:9). Yo bʼɇzo yo manda nrre tu̱ji, pe e Jesús dya ra nrru̱u̱ ngekʼo ra mbøxkꞹji nrrexe yo kjɇɇ.

⁷ Ne Biblia mama ke e Jesús ra ngeje na Rey kʼꞹ ra tsjaa kʼo na joo ñe ra juentsʼkøji. Ne Biblia mama ga kjaba: “O espíritu e Jehová ra ne̱ bʼꞹbʼꞹ ko angeze, ngekʼua ra ngijñi na joo ñe me na joo rga mbeñe, na espíritu kʼꞹ ra pjechi ja rga zopjꞹ kʼo ntee ñe me rra̱ zɇzhi, na espíritu kʼꞹ ra mbøsʼꞹ ra mba̱ra̱ na joo ñe ra dyⱥtⱥ e Jehová. Angeze me na joo rga zøʼø ma ra tsjaa kʼo nee e Jehová. Angeze dya ngextrjo ra jñanrra ja ga jñetse na ntee ma ra jñꞹnpꞹ nguarꞹ, dya xo ra tsjapꞹ nguenrra texe kʼo ra xiji ma ra zopjꞹ na ntee. Ra tsjaa na joo ma ra jñꞹnpꞹ nguarꞹ kʼo ntee kʼo dya chala” (Isaías 11:2-4). ¿Gi nee na rey kʼꞹ ra tsjaa ga kjanu?

8. ¿Pjenga ri mangøji ke e Jesús dya ra mandatsjɇ?

 ⁸ E Mizhokjimi o juajnꞹ ntee kja ne xoñijomꞹ ngekʼua ra moji ajensʼe ra ma mandaji ko e Jesús. Kʼe apóstol Pablo go xipji e Timoteo: “Zø ra supjregøji, pero ma ra sɇchkøji, ra mandajima ko e Jesucristo” (2 Timoteo 2:12). ¿Janzi ntee ra mandaji ko e Jesús?

9. ¿Janzi ntee ra mandaji ko e Jesús? ¿Jingua go mbꞹrꞹ go juajnꞹ e Mizhokjimi kʼo ra moji ajensʼe?

⁹ Kja nu xørꞹ 7 ro nuji ke e Jehová go tsjapꞹ kʼꞹ nu apóstol Juan ro jñanrra kʼo go kjogꞹ ajensʼe, mi mandajinu e Jesús ñe kʼo ciento cuarenta y cuatro mil (144.000). ¿Kjo mi ngekʼo? E Juan go mama ke angezeji “nu kʼo mi tʼopjꞹ a nzhe̱e̱, mi ngeje o tju̱u̱ ne Tsʼime [e Jesús], ko nu Tata”. Xo go mama “ngeje yo tjꞹntʼꞹ axꞹtjꞹ ne tsʼime texe kʼua ja nzhodʼꞹ. Ngeje yo otʼꞹ o juajnꞹ kja yo bʼɇzo” (xørꞹ Apocalipsis 14:1, 4, NTD). E Jehová o juajnꞹ 144.000 ntee kʼo kjaji kʼo nee angeze ngekʼua “ra mandaji kja ne xoñijomꞹ” ko e Jesús. Ma ga nrru̱ji, e Jehová xosꞹji ngekʼua ra moji ajensʼe (Apocalipsis 5:10). Mi jingua ma go mimi kʼo apostole, e Mizhokjimi o mbꞹrꞹ o juajnꞹ kja ne xoñijomꞹ kʼo 144.000 ntee kʼo ra moji ajensʼe ngekʼua ra mandaji.

10. ¿Pjenga jñetse ke me nezgøji e Jehová ma o juajnꞹ e Jesús ñe yo 144.000 ngekʼua ra mandazꞹji?

¹⁰ E Jehová me nezgøji ngekʼua o juajnꞹ ntee ke ra ngeji rey ko e Jesús ra mandazꞹji. E Jesús ra ngeje na Rey kʼꞹ ra manda na joo, nangeje me sichʼi kja o mꞹbʼꞹ ma pje kjogꞹzꞹji. Angeze pa̱ra̱ ja ga søgøji ma ri supjreji. E Pablo go mama ja ga zøʼø e Jesús, go mama ga kjaba: “Søø ra sentio ma pje kʼo ra supjregøji. Nangeje o ñe̱ mba̱ra̱ yo ri supjregøji yo xo o supjre angeze” (Hebreos 4:15; 5:8). Yo 144.000 xo pa̱ra̱ji na joo ja ga kjazgøji nange angezeji ma mi bʼꞹnji kja ne xoñijomꞹ mi ngeji ntee  nzakjazgøji, mi pɇsʼiji pekado ñe mi sødyeji. Ngekʼua søø ra enchʼeji in mꞹbʼꞹji ke e Jesús ñe yo 144.000 pa̱ra̱ji ja ga søgøji ma ri kjogꞹji nrrumꞹ ñe ra mbøxkꞹgøji.

11. ¿Pjenga go xipji e Jesús kʼo discípulo ro dyøtꞹji Mizhokjimi ngekʼua kʼo mi ka̱ra̱ ajensʼe xo ro dyⱥtⱥji angeze?

¹¹ Ma e Jesús go jichi kʼo discípulo ja rgua dyøtꞹji Mizhokjimi, ¿pjenga go mama ro dyøtꞹji Mizhokjimi ngekʼua kʼo mi ka̱ra̱ ajensʼe xo ro dyⱥtⱥji Mizhokjimi? Kja nu xørꞹ 3 ro nuji ke e Satanás ñe kʼo anxe kʼo dya joo kʼo xiji demonio dya kja go nee ro dyⱥtⱥji e Jehová, pe xe go jyɇzi ro mimiji ajensʼe. Ngekʼua e Jesús go mamakʼo nange ajensʼe mi ka̱ra̱ kʼo dya mi ⱥtⱥji Mizhokjimi. Kja nu xørꞹ 10 ra pjechiji kjo ngeje e Satanás ñe yo demonio.

12. Kja Apocalipsis 12:10 mama yeje jñaa kʼꞹ go kjogꞹ ajensʼe, ¿pje ngeje?

¹² Ne Biblia mama ke ma kja o ñʼemeji e Jesús ro tsjaa Rey kja o Reino Mizhokjimi, angeze go chu̱bi e Satanás (xørꞹ Apocalipsis 12:7-10). Kja nu versículo 10 ri xørꞹji pje go kjogꞹ. Kʼꞹ otrʼꞹ o kjogꞹ nge ke e Jesús o ñʼesʼeji Rey kja o Reino Mizhokjimi, nu na yeje kʼꞹ o kjogꞹ nge ke o pa̱ntrʼa̱ji e Satanás kja ne xoñijomꞹ. Ra pjechiji ke na kjuana ya kjogꞹkʼo.

13. ¿Ja ba zøji kʼo ka̱ra̱ ajensʼe ma go pa̱ntrʼa̱ji e Satanás kja ne xoñijomꞹ?

¹³ Ne Biblia mama ke ma go pa̱ntrʼa̱ji e Satanás ñe yo demonio kja ne xoñijomꞹ me ko mⱥji kʼo anxe Mizhokjimi. Ne Biblia mama ga kjaba: “Mⱥjⱥgejidya, texetsʼꞹgeji i ka̱ra̱ji ajensʼe” (Apocalipsis 12:12). Nudya, kʼo bʼꞹbʼꞹji ajensʼe ka̱ra̱ji na joo, texeji ⱥtⱥji Mizhokjimi.

14. ¿Pje go kjogꞹ kja ne xoñijomꞹ ma o sjøbꞹji e Satanás?

¹⁴ Pe dya nge ga kjanu yo ntee kja ne xoñijomꞹ. Kja ne  xoñijomꞹ kjogꞹ na punkjꞹ kʼo na sʼoo “nangeje e Satanás kʼꞹ dya ga joo ya zøbꞹ” kja ne xoñijomꞹ, angeze “me ꞹdʼꞹ na punkjꞹ nangeje pa̱ra̱ na joo kʼꞹ dya kja ra mezhe paa kʼꞹ xe søø ra tsjaa texe kʼo na sʼoo” (Apocalipsis 12:12). E Satanás me mbɇkuɇ nangeje o pjongꞹji ajensʼe ñe pa̱ra̱ na joo ke dya ra mezhe ra kjuatꞹji. E Satanás me jodʼꞹ ja rga tsjapꞹ ngekʼua ra mbɇsʼi nrrumꞹ texe yo ntee kja ne xoñijomꞹ.

15. ¿Pje ra tsjaa Mizhokjimi kja ne xoñijomꞹ?

¹⁵ Ra zⱥdʼⱥ nrrexe kʼo mi nee ro tsjaa e Mizhokjimi kja ne xoñijomꞹ. Angeze nee ke yo ntee dya kja ra mbɇsʼiji nzhubꞹ ñe ra mimiji texe yo paa kja ne xoñijomꞹ ma me rga zøø (Salmo 37:29). ¿Ja rga tsjakʼo nu Reino Mizhokjimi?

16, 17. ¿Pje mama kja Daniel 2:44 ke ra kjogꞹ ma ra manda nu Reino Mizhokjimi?

¹⁶ Kja Daniel 2:44 mama ga kjaba kʼo ra kjogꞹ: “Ma xe ra manda kʼo reykʼo, e Mizhokjimi ajensʼe ra ñʼesʼe naja kʼꞹ ra manda kja o reino, dya ra nguarꞹ rga manda. Kʼe reino ra chjotꞹ texe kʼo dyaja reino. Dya kjo xe ra bʼꞹbʼꞹ kʼꞹ ra manda, ngextrjo o reino Mizhokjimi ra manda”. ¿Pje go mama e Daniel ke ra tsjaa o Reino Mizhokjimi?

¹⁷ Nu kʼo otrʼꞹ go mama e Daniel nge kʼꞹ nu Reino Mizhokjimi ra mbꞹrꞹ ra manda “ma xe ra manda kʼo reykʼo”. Nujyo nee ra mama ke ma ro mbꞹrꞹ ro manda nu Reino Mizhokjimi, xe ro mandaji yo gobierno kja ne xoñijomꞹ. Nu kʼo xe go mama e Daniel kʼꞹ ro kjogꞹ nge kʼꞹ ngextrjo o Reino Mizhokjimi ra manda texe yo paa. Xo go mama ke nu Reino Mizhokjimi ñe yo gobierno ra chu̱ji, pe ra nrro̱jo̱ nu Reino Mizhokjimi ñe ra manda kja ne xoñijomꞹ texe yo paa. Ga kjanu ra mandazꞹji na gobierno ke me na joo.

18. ¿Ja ga jñuspʼꞹji ma ra chu̱bi nu Reino Mizhokjimi nu yo gobierno?

 ¹⁸ ¿Pje ra tsjaa nu Reino Mizhokjimi ngekʼua ra manda kja ne xoñijomꞹ? Ma dya bʼe ra tsʼaa kʼe chu̱ʼu̱ kʼꞹ xiji Armagedón, yo demonio ra jyotrʼꞹji texe “yo rey yo ka̱ra̱ texe kja ne xoñijomꞹ, [ra] ma xipjiji ra e̱ji texeji ra ñe̱ chu̱ji Mizhokjimi. Pero ra bʼɇzhiji, ra nrro̱jo̱ Mizhokjimi. Nangeje me na zɇzhi Mizhokjimi”. Ja̱a̱, ra nge ga kjanu, texe yo gobierno ra nee ra chu̱ji nu Reino Mizhokjimi ñe nge nu rgi nguarꞹ texe yo chu̱ʼu̱ (Apocalipsis 16:14, 16; jñanrra nu nota 10 kja nu página 210).

19, 20. ¿Pjenga ri negøji ke ra manda nu Reino Mizhokjimi?

¹⁹ ¿Pjenga ri negøji ke ra manda nu Reino Mizhokjimi? Ri negøjikʼo nangeje nu Reino Mizhokjimi ra mbøxkꞹji ngekʼua dya kja ra sødyeji ñe dya kja ra tu̱ji. Ne Biblia mama ke ma ra manda nu Reino Mizhokjimi, nutsʼkøji ra mimiji texe yo paa. Kja Juan 3:16 mama ga kjaba: “Mizhokjimi me sʼiya texe yo ka̱ra̱ kja ne xoñijomꞹ. Ngekʼua ba nzhøø kʼꞹ nu Tʼii kʼꞹ natjo para o ndu̱u̱ ba ngontʼkꞹ in nzhubꞹji, ngekʼua texe kʼo ra ñenchʼe o mꞹbʼꞹ angeze, dya ra ndu̱ji, ra bʼꞹbʼꞹtjoji”.

²⁰ Ri negøji ra manda nu Reino Mizhokjimi nangeje ka̱ra̱ na punkjꞹ kʼo na sʼonte, yo ntee manji kʼo dya ga kjuana, ompꞹji yo ntee, obʼꞹji ko yo dya nge nu su̱u̱ o nu xira. Nutsʼkøji dya pje søø ra kjapꞹji, pe e Mizhokjimi søø ra kjuatꞹyo. Nrrexe yo ntee yo kjaji yo na sʼoo ñe dya jɇziji, e Mizhokjimi ra chjotꞹyo kja Armagedón (xørꞹ Salmo 37:10). * Xo ri negøji ra manda nu Reino Mizhokjimi nangeje yo gobierno dya pa̱ra̱ji ja rga mbøxkꞹji, me na sʼoo ga tsjaji, ponꞹji ñe dya xipjiji yo ntee ra dyⱥtⱥji  Mizhokjimi. Ne Biblia mama: “Yo bʼɇzo dya mandaji na joo, kjapꞹji ra supjre in minte” (Eclesiastés 8:9).

21. ¿Pje ra tsjaa nu Reino Mizhokjimi ngekʼua ra zⱥdʼⱥ kʼo mi nee ro tsjaa kja ne xoñijomꞹ?

²¹ Ma ra nguarꞹ nu Armagedón, nu Reino Mizhokjimi ra pɇpji ngekʼua ra zⱥdʼⱥ kʼo mi nee ro tsjaa Mizhokjimi mi jingua kja ne xoñijomꞹ. Xo ra chjotꞹ e Satanás ñe yo demonio (Apocalipsis 20:1-3). Ma ra kjogꞹ yo paa dya kjo ra zødye ni kjo ra nrru̱u̱. Ra mimiji texe yo paa kja ne xoñijomꞹ, nangeje e Jesús o unꞹ o bida por nuzgøji (Apocalipsis 22:1-3). Nu Reino Mizhokjimi ra tsjaa ke texeji ra respetaoji o trju̱u̱ Mizhokjimi. ¿Ja rga tsjakʼo? Ma ra manda o Reino Mizhokjimi kja ne xoñijomꞹ, texe yo ntee ra dyⱥtⱥji Mizhokjimi Jehová (jñanrra nu nota 21 kja nu página 216).

22. ¿Pjenga ri pa̱rgøji ke e Mizhokjimi dya go tsjapꞹ Rey e Jesús ma mi bʼꞹbʼꞹ kja ne xoñijomꞹ o ma go nzhogꞹ ajensʼe?

²² E Jesús go jichi kʼo o discípulo ke ro dyøtꞹji Mizhokjimi ga kjaba: “Penkejme in reino”. Nujyo ne ra mama ke nu Reino Mizhokjimi ra manda yo paa yo ba e̱je̱. Nu kʼꞹ otrʼꞹ ro tsjaa Mizhokjimi nge kʼꞹ ro ñʼeme e Jesús ro tsjaa Rey. ¿Go tsjapꞹji Rey e Jesús ma go nzhogꞹ ajensʼe?  Iyo, e Jesús go nrrebʼe. Ma ya bi kjogꞹ paa ma e Jesús go yepe go mimi, e Pedro ñe e Pablo go mamabi ja rgua zⱥdʼⱥ kʼo junsʼꞹ kja Salmo 110:1. Kja nu profecía mama ke e Jehová ro xipji e Jesús: “Mimi kja in jodyɇgø ri chebʼe ma kja ra kjapꞹgø o trjujnꞹ in kuaa yo nukʼꞹ na ꞹꞹ” (Hechos 2:32-35, TNM; Hebreos 10:12, 13). ¿Janzi go nrrebʼe e Jesús ngekʼua e Jehová ro tsjapꞹ Rey?

23. a) ¿Jingua go ñʼemeji e Jesús ro tsjaa Rey kja o Reino Mizhokjimi? b) ¿Pje ra nuji kja nu xørꞹ nu ba e̱je̱?

²³ Ma dya bʼe ma sⱥjⱥ nu kjɇɇ 1914, go bʼꞹbʼꞹ janzi cristiano ke go unꞹji nguenrra ke nu kjɇɇ 1914 ro zⱥdʼⱥ kʼo mi mama ne Biblia. Nuʼma kja ne xoñijomꞹ o kjogꞹ kʼo dya ja mi janrraji, ga kjanu go jñetse ke ma kjuana bi zⱥdʼⱥ kʼo mi mama ne Biblia, e Mizhokjimi go ñʼesʼe e Jesús ro tsjaa Rey ajensʼe (Salmo 110:2). Dya go kjogꞹ na punkjꞹ paa ma go pjongꞹji ajensʼe e Satanás ñe o sjøbꞹji kja ne xoñijomꞹ ñe angeze pa̱ra̱ ke “dya kja ra mezhe paa kʼꞹ xe søø ra tsjaa texe kʼo na sʼoo” (Apocalipsis 12:12). Kja nu xørꞹ nu ba e̱je̱, ra nuji ke a ri bʼꞹnji kja kʼo pakʼo ñe dya kja ra mezhe ra nguarꞹkʼo. Xo ra nuji ke dya kja ra mezhe ma nu Reino Mizhokjimi ra tsjaa ne xoñijomꞹ me rga zøø ja nzi ma nee Mizhokjimi (jñanrra nu nota 22 kja nu página 217).