IKAPIITULU 8
Umwene wa Nluku isiyani?
1. Nivekeloni ninhaleehu usoma nhina ila ikapiitulwiila wiira niiweehe?
ATTHU enci anaacuwela nivekelo nineehaniya “Paapeehu, nri wiirimu.” Ukati Yesu waapankilyaawe nna nivekelonna, uyo aanawiira uwiitthuciha attharyaawe ulompa. Isiyani Yesu yaalepenlyaawe nhina nna nivekelonna? Kontha isiyani iryaaya itthu yofayita ucuweleeha itthu inhimyaaya nna nivekelonna?
2. Citthuni tthaaru cofayita Yesu ciniitthucihilyaawe ulepela?
2 Yesu aheera: “Vano, nhaana nlompaka co: ‘Paapeehu, nri wiirimu, ncina ninyu nikhale nootteelihiya. Umweneenyu uwe. Ipankiye impheeleenyu wiirimu, ciicammo vathi va.’” (Nsome Matewus 6:9-13.) Wuupaceroni nivekelo nineehaniya Paapeehu, nri wiirimu, Yesu honiitthuciha ulepela citthu tthaaru. (1) Nilepele wiira ncina na Nluku nitteelihiye. (2) Wiira Umwene wa Nluku uwe. (3) Wiira ipankiye impheelaawe Nluku wiirimu ni vathi. Kontha isiyani Yesu niitthucihilyaawe ulepela nnya citthunnya?— Nwehe Niwehero n.° 20.
3. Isiyani inlamuliyeehu ucuwela nhina Umwene wa Nluku?
3 Hiiva niheetthuca wiira Nluku ncina nawe Yehova. Ciicammo niheetthuca itthu Nluku inaapheelelaawe apinaatamu ni ituninya. Masi, isiyani Yesu yaapheelaawe uhimya uniitthuciha wawe ulepela wiira Umwene wa Nluku uwe? Nihaana nicuwelaka Umwene wa Nluku isiyani, isiyani inhalaaya upanka ni manannani unhalaaya utteeliha ncina na Yehova.
UMWENE WA NLUKU ISIYANI?
4. Umwene wa Nluku isiyani? Ni tipani khanle Mwene o uyo Umwennyooyo?
4 Umwene wa Nuku ikhanle ikuvernu Nluku itthenkacilyaawe wiirimu. Nluku honthanla Yesu wiira akhale Mwene o uyo Umwennyooyo. Ukati Yesu nohalaawe wancera ulamulela intuninya, uyo naahala waakavihera atthu nimananna omaana uvikana mananna yaahalaaya ukaviheriya ni nhooleli nkhwaawe. Uyo haana ikuru cinene waavikana akhulupale otheene o watuninyani. Phimaana Ibiiblya ineera wiira Yesu khanle “Mwene aale anlamulela ni Pwiiya aale anhoolela.”— 1 Timotiyu 6:15.
5. Kontha isiyani Umwne wa Nluku Ibiiblya ineehanaaya ‘Umwene wo wiirimu’?
5 Umwene wa Nluku, Ibiiblya ineehana “Umwene wo wiirimu” kontha unhala ulamulela ituninya yotheene unaryeene wiirimu. (2 Timotiyu 4:18; Apokalipise 11:15) Yesu aaturuwenle wiirimu uvira waya mahuku 40 nonwelelihiye. Uphiya wawe, ahanriiha uphiya ukati wiira akhale Mwene. —Miteko 2:33.
6, 7. Kontha isiyani Yesu khanlyaawe Mwene omaana waavikana ahooleli otheene ari watuninyani?
6 Yesu khanle nhooleli omaana unvikana nhooleli nkinaku owatuninyani. Kontha isiyani? Yoopacera, kontha Yesu khanhala ukhwa. Masi ahooleli o mahukwaala akhanle atthu oopahuwa ni anaakhwa. Ibiiblya ineera wiira Yesu phirina “ukumi uhinkhwa.” (1 Timotiyu 6:16) Phimaana, yotheene ile inhalaawe upanka wiira aakavihere apinaatamu inhala ukhala yoohimalela mahukwaaya.
7 Yonayeeli, Yesu khanle Mwene oweettela isariya ni namaana. Inatiri imoca yo mbiiblyani ineera wiira “nnepa wa Yehova unhala ukhala ni uyo.” Yesu naahala ulamulela niikuru cirinaawe, nankhili ni ucuwelaca. Uyo nohala ulamulela amwiiwelelaka Yehova. Yesu “khanhala unhukhumu ntthu anweheraka ikhovyaawe” hataa khanhala unlaka ntthu nlattu wowiiwa paasi wiira ntthuuyo hopanka itthu yootakhala. Ciicammo uyo “naarwaa waahukhumu niisariya ale aneeyeviha [awula ahuvi].” (Isaiya 11:2-4) Nyuuva waanoocivela nnarina Mwene toko uyo?
8. Nincuwela cani wiira Yesu khanhala ulamulela veekha?
8 Yesu khanhala ulamulela veekha. Nincuwela cani? Ibiiblya ineera wiira Nluku holakela waathanla atthu akiina wiira yalamulele wiirimu wamoca ni Yesu. Wootakihera, apostolu Paulu ahoolumaca wiira uyova ni Timotiyu yahothanliya wiira yalamulele ni Yesu. Apostolu Paulu ahantikha: “Naahihiyeke uvilela, ciicammo ninaahala ulamulela nkhayi nuuyo.” (2 Timotiyu 2:12) Masi, anhala ukhala atthu akavi anhala ulamulela ni Yesu?
9. a) Makristau anhala ulamulela ni Yesu anhala ukhala akavi? b) Yehova ancenre waathanla ukatini?
9 Nhina ikapiittulu 7, niheetthuca wiira iwooni imoca apostolu Joau yaarinaawe uyo ahomoona Yesu nari Mwene. Isiyani yoonilyaawe? Uyo ahomoona Yesu wiirimu ni mamwene akhwaawe 144.000. Uyo ahotaphulela eeraka: “Ala thi ale antthara Ikhontwa [awula Yesu] khula nipuro inrwaaya. Ala athumiye iriyari yaapinaatamu.” (Nsome Apokalipise 14:1, 4.) Mamwene 144.000 yaawonnyaawe Joau phaapani? Ayo akhanle makristau ookhuluvelya Nluku lakenlyaawe waathanla wiira alamulele ituninya wamoca ni Yesu. Ayo yakhwaaka, anonwelelihiya wiira yakhale wiirimu. (Apokalipise 5:10) Yehova ancenre waathanla ayo makristau ookhuluvelyaayo ukati wo maapostolu.
10. Nincuwela cani wiira mamwene Yehova aathanlilyaawe anaahala ucuwela itthu inniira?
10 Yehova unthanla wawe Yesu ni atthu 144.000 wiira anilamulele, uyo hoonihera wiira naanifenta cinene ni nopheela wiira nikhale saana. Yesu nohala ukhala nlamuleli omaana kontha uyo naacuwela ukhala watuninyani isiyani ni uhuva. Apostolu Paulu hohimya wiira Yesu naacuwela itthu inniira ni hohimya wiira Yesu naakhitiri ‘ucuwelela uhiicoorya wihu’ ni ‘hottehiya mananna menci khampa hiiva.’ (Maberewu 4:15; 5:8) Ciicammo atthu 144.000 anthanliya, anaacuwela itthu inniira. Kontha ayo ahotoko waanana itampi ni uwerennya. Nihaana nikupliki wiira Yesu ni atthu 144.000, anaahala ucuwela sana-saana itthu inniira.
ISIYANI UMWENE WA NLUKU INRWAAYA UPANKA?
11. Kontha isiyani Yesu aawiitthucihilyaawe attharyaawe ulepela wiira ipankiye wiirimu ile impheelaawe Nluku?
11 Yesu ahowiitthuciha attharyaawe ulepela wiira ipankiye wiirimu ile impheelaawe Nluku. Kontha isiyani? Kontha uyo ukatyuuyo wiirimu akiina khayaapanka ile impheelaawe Nluku. Nhina ikapiitulu 3, uhohimiya wiira Sotwani, ahonrukunuwela Yehova. Malayikha makiina yaholakela untthara Sotwani ni yahohiya umwiiwelela Yehova. Ayo ahokhala maciini. Yehova ahonhiya Sotwani ni Maciini ukhala wiirimu ukati vakaani paasi. Nyuuva nnaahala wiitthuca sana-saana uyo mwahooyo nhina ikapiitulu 10.
12. Ilivuru ya Apokalipise 12:10 citthuni piili inttonkaaya?
12 Sotwani ni maciini yaahala ukhala wiirimu mpaka mwaani? Ibiiblya inaahimya wiira yaahala ukhala paasi mpaka Yesu waahalaawe ukhala Mwene. Ukhala wawe Mwene, Yesu ahowana ikhotto ni Sotwani. (Nsome Apokalipise 12:7-10.) Ilivuru ya Apokalipise 12:10 inaattonka citthu piili cuulupale ciirannyeele. Yoopacera, Yesu hokhala Mwene ni hancera ulamulela. Yonayeeli, Sotwani hoomoleliya watuninyani.
13. Sotwani woomoliya wawe wiirimu, malayikha ookhuluvelya yaakhanle cani?
13 Ibiiblya ineera wiira malayikha ookhuluvelya ari wiirimu, yahotteeliya venci ukati Sotwani ni maciini woomoliyaaya wiirimu. Ilivuru ya Apokalipise 12:12 ineera: “Ntteeliyeke owiirimu vaa.” Nna coo wiirimu wotheene nihaavo nnema ni waataana, kontha malayikha otheene ari wiirimu anaamwiiwelela Nluku.
Makhalelo o watuninyani atepacile urikarika ikhumelo Sotwani ni maciinnyaawe yoomoliyaaya wiirimu, masi woohipica ayo makhalelwaayo anaahala umalamala
14. Makhalelo o watuninyani ari cani woomoliya wawe Sotwani wiirimu?
14 Masi makhalelo o watuninyani anaavirikana cinene naayo owiirimu. Mu cinaakhumelela citthu cootakhala ‘kontha hookhuruwa Tiyapu’ ni hooviruwa cinene. Uyo hoomoliya wiirimu ni ‘naacuwela wiira ukatyaawe uhonkhuvyaacera’ wiira akwanyulaciye. (Apokalipise 12:12) Phimaana, uyo naapanka itthu intthunaawe wiira apinaatamu ntuninyani motheene yaaphwanye masakha, iretta, ni uhuva.
15. Isiyani Yehova naapheelelaawe apinaatamu ni ituninya?
15 Masi Nluku nanlelo nopheela wiira ituninya yotheene ikhale ipeephoni ni wiira apinaatamu akhale oohipahuwa ni akhale mpaka. (Isaalimu 37:29) Isiyani Umwene wa Nluku inhalaaya upanka wiira ciirannye nnyo citthunyo?
16, 17. Inatiri iri nhina Daniele 2:44, inniitthuciha isiyani yo Umwene wa Nluku?
16 Ilivuru ya Daniele 2:44 ineera: “Mahuku o yaala mamwennyaala, Nluku o wiirimu, naarwaa utikitherya umwene uhinhala utankanyiya. Ni uyo umwennyooyo khanhala uvahiya-tho apoovu akhwaawe. Unaahala waattikittha ni waamalamaliha mamwene otheene ala, ni uyo paahi phinrwaa ulamulela mpaka.” Ila inatiriila inniitthuciha isiyani yo Umwene wa Nluku?
17 Yoopacera, Umwene wa Nluku waahala wancera ulamulela cinarivo ntuniyani ikuvernu cikhwaawe. Nincuwela cani? Nincuwela iyo itthwiiyo kontha iyo inatiriiyo, ineera wiira Umwene wa Nluku waahala wancera ulamulela “mahuku o yaala mamwennyaala.” Yonayeeli, Umwene wa Nluku unhala ulamulela mpaka, khunhala waakakhanihiya niikuvernu ikhwaawe. Yoneeraru, Umwene wa Nluku unaahala utankanya ikuvernu cikhwaawe ni uyo paasi, phinhala ulamulela ituninya yotheene. Umwene wa Nluku ikhanle ikuvernu yomaana apinaatamu inhalaaya ukhalana!
18. Ikhotto nohalaawe Nluku waana ni ikuvernu caapinaatamu ineehaniya cani?
18 Masi Umwene wa Nluku unhala upanka cani wiira umalamalihe ikuvernu caapinaatamu wiira uyo wancere ulamulela? Ikuvernu caapinaatamu cinaahala upheela umwaanana Nluku. Kontha isiyani? Kontha cinaahala ukurumiciya ni maciini uthukumana wiira caane “ikhotto yo nihuku nuulupale na Nluku, Nakuru-Cotheene.” Iyo ikhottweeyo ineehaniya Harmacetom. Masi ikuvernu caapinaatamu khacinhala utthema. Vano, Umwene wa Nluku unaahala ulamulela ituninya yotheene.—Apokalipise 16:14, 16. Nwehe Niwehero n.° 10.
19, 20. Citthuni tthaaru cinniiriha upheela ulamuleliya Nuumwene wa Nluku?
19 Kontha isiyani nimpheeleehu ulamuleliya Nuumwene wa Nluku? Yoopacera, kontha hiiva naatthu oopahuwa, ninaawerennyaka ni ninaakhwa. Umwene wa Nluku unaanivaha iparakha yoohala ukhala mpaka. Ilivuru ya Joau 3:16 ineera: “Kontha Nluku haafenta cinene apinaatamu, phimaana haavaha Mwanawe mmoca, wiira nhala umwamineela otheene hitankanyiye masi aphwanye ukumi woohimala.”
20 Yonayeeli, ntuninyani ahoocara atthu ampanka citthu coohinamaana. Ayo akhanle atthu owootha, oohikhuluvelya ni ooraruwa. Hiiva khaninkhitiri umaliha nnyo citthunnyo, masi Nluku naakhuluveliha wiira naahala waamalamaliha atthu ampanka citthu cootakhala. Atthu ootakhala nrima yaahihiyeke citthu cimpankaaya, anaahala ukhwa ukhottoni yo Harmacetom. (Nsome Isaalimu 37:10.) Yoneeraru, ikuvernu caapinaatamu khacinkhitiri umalamaliha masakha ankhumelela ni khacinhimya ikhweeli. Ikuvernu yomaana inlamuliya waakavihera atthu umwiiwelela Nluku, masi ikuvernu caapinaatamu khacimpanka iyo itthwiiyo. Ibiiblya ihaana isariya wiirawaya “pinaatamu nanhoolela pinaatamu nkhwaawe wiira eephwanyihe masakha.”—Eklesyaste 8:9.
21. Isiyani Umwene wa Nluku inhalaaya upanka?
21 Vano, isiyani Umwene wa Nluku inhalaaya upanka? Umwene wa Nluku unaahala upanka citthu wiira ntuninyani motheene ipankiye ile impheelaawe Yehova. Wootakihera, ukhottoni yo Harmacetom, Sotwani ni maciini anaahala utthukeliya. (Apokalipise 20:1-3) Ni nlattu wo woopoliya, atthu ammwiiwelela Nluku anaahala ukhalana ukumi womaana ni iparakha yoohala ukhala mpaka. Ilapo inaahala ukhala ipeephoni. (Apokalipise 22:1-3) Uyo umwennyooyo, ciicammo unaahala utteeliha ncina na Nluku. Iyo maanaaya wiira Umwene wa Nluku wanceraka ulamulela, atthu otheene anhala unswalela ni unhisimu Yehova paasi. Nwehe Niwehero n.° 21.
YESU KHANLE MWENE MWAANI?
22. Nincuwela cani wiira Yesu khaakhanle Mwene ukati waaryaawe watuninyani ni hataa aphiyakaru wiirimu?
22 Yesu khancenre ulamulela ukati waaryaawe watuninyani. Nincuwela iyo itthwiiyo, kontha ukati uyo waaryaawe watuninyani ahowiitthuciya attharyaawe ulepela yiiraka: “Umweneenyu uwe.” Iyo maanaaya wiira uyo Umwennyooyo waahala uwa wahoolo. Vano, niireke wiira Yesu aphiyakaru wiirimu phaakhanlyaawe Mwene? Mena. Nincuwela cani iyo? Unavinreene ukati Yesu naturuwenle wiirimu, apostolu Peturu ni Paulu yahottonkaca wiira inatiri iri nhina Isaalimu 110:1 yaamwaaca Yesu. Iyo inatiriiyo imphwanyannya itthu Yehova imuulumenlyaawe Yesu: “Wonkome moonwaaka wonlopwana, mpaka wanhalaaka uweesa awanannyaa vathi inyaa caa.” (Miteko 2:32-35; Maberewu 10:12, 13) Vano, Yesu ancenre ulamulela mwaani?
Umwene wa Nluku unaahala upanka citthu wiira watuninyani ipankiye ile impheelaawe Nluku
23. a) Yesu khanle Mwene Owuumweneni wa Nluku mwaakhani? b) Isiyani inhaleehu usoma nhina ikapiitulu inhaleehu ukela?
23 Yesu khanle Mwene mwaakha wo 1914. (Isaalimu 110:2) Uhinaaya uphiya uyo mwaakhooyo, myaakha cinci uttuli ikhurupu imoca yo makristau yahocuwela wiira inatiri cuulupale caahala wiirannya mwaakha wo 1914. Ni citthu cinkhumelela ikhumelo yo 1914, cinoonihera wiira iyo ikhurupwiiyo yahaana isariya. Yesu akhalihiyakaru Mwene, uyo ahomoomolela Sotwani watuninyani. Nna coo, Sotwani naacuwela wiira “ukatyaawe uhonkhuvyaacera.” (Apokalipise 12:12). Ikapiitulu inhaleehu ukela, ninaahala woona wiira khweeliini ninkhala mahuku vakaani anhalenle Sotwani. Ciicammo ninaahala woona wiira woohipica, Umwene wa Nluku unaahala ulamulela ituninya ni ile impheelaawe Yehova inaahala upankiya va vathi va.—Nwehe Niwehero n.° 22.
