1. Pʋʋs-bʋg yell la d na n gome?

NEB milyõ-rãmb mii a Zeezi pʋʋsg ning b sẽn boond tɩ tõnd Ba sẽn be arzãnã. A Zeezi n wilg a karen-biisã pʋʋs-kãngã, sẽn na yɩl tɩ b bãng b sẽn segd n pʋʋs to-to. Bõe la a yeel tɩ b kos pʋʋsgã pʋgẽ? Bõe yĩng tɩ d segd n bao n wʋm a sẽn yeelã võore?

2. Bũmb a tãabã a Zeezi sẽn yeel tɩ d pʋʋs n kosã la bʋse?

² A Zeezi yeelame yaa: “Ad yãmb sẽn tog n pʋʋs to-to: ‘Tõnd Ba sẽn be arzãna [“saasẽ,” MN], bɩ yãmb yʋʋrã paam waoogre, tɩ yãmb soolmã wa, tɩ yãmb daab maan tẽng zug wa sẽn maand arzãnã.’” (Karm-y Matye 6:9-13.) Bõe yĩng t’a Zeezi yeel tɩ d pʋʋs n kos bõn-kãensã a tãabã?—Ges-y Vẽnegr 19 wã.

3. Bõe la d tog n bao n bãng Wẽnnaam soolmã wɛɛngẽ?

³ Tõnd bãngame tɩ Wẽnnaam yʋʋrã la a Zeova. D leb n bãnga Wẽnnaam sẽn dat tɩ ninsaalbã vɩɩm yɩ to-to tẽngã zugu. La a Zeezi sẽn yeel tɩ d pʋʋs tɩ Wẽnnaam “soolmã wa” wã rat n yeelame tɩ bõe? D na n bao n bãnga Wẽnnaam soolmã sẽn yaa bũmb ninga, a sẽn na n wa maane, la a sẽn na n kɩt tɩ Wẽnnaam yʋʋrã paam waoogr to-to.

4. Wẽnnaam Rĩungã yaa bõe? Ãnd n yaa Rĩungã Rĩmã?

⁴ A Zeova lugla goosneema saasẽ, n yãk a Zeezi t’a yaa Rĩma. Biiblã boonda goosneem kãng tɩ  Wẽnnaam Rĩungã. A Zeezi la “zu-soben-dãmb Zu-soabã la rĩm-dãmb Dĩmã.” (Vẽnegre 17:14) A tõe n maana nebã neer n yɩɩd nanambs nins sẽn yaa ninsaalbã. A leb n tara tõog n yɩɩd nanambsã fãa sẽn naag taaba.

5. Yɛ la Wẽnnaam Rĩungã Rĩm na n zĩnd n dɩ naamã? A na n dɩɩ naamã ãnd dãmb zugu?

⁵ Rasem pis-naas a Zeezi vʋʋgrã poore, a leba saasẽ. A Zeova wa n kɩtame t’a lebg Rĩungã Rĩma. (Tʋʋmã 2:33) Yaa saasẽ la a na n zĩnd n dɩ naam ninsaalbã zugu. (Vẽnegre 11:15) Rẽ n so tɩ Biiblã boond Wẽnnaam Rĩungã tɩ “saasẽ Rĩungã.”—2 Tɩmote 4:18, MN.

6, 7. Bõe n kɩt t’a Zeezi yaa Rĩm sẽn yɩɩd rĩm buudã fãa?

⁶ Biiblã yetame t’a Zeezi yaa Rĩm sẽn yɩɩd rĩm buudã fãa, bala a pa na n tol n le ki ye. (Rom-dãmbã 6:9) Ninsaalbã nanambsã fãa wat n baas n kiime, la a Zeezi pa na n tol n ki ye. Bõn-sõma nins fãa a sẽn na n maan n kõ tõndã na n kaoosa wakat sẽn kõn sa.

⁷ B pĩnd n togsa Biiblã pʋg t’a Zeezi na n yɩɩ Rĩm sẽn yaa nimbãan-zoeta, la sẽn maand tɩrga. B yeelame: “Sẽn-Ka-Saab Sɩɩgã na n siga yẽnda zugu: yaa yam ne bãngr sɩɩga, la saglg ne raood sɩɩga, ne minim la Sẽn-Ka-Saab rabeem zoees sɩɩga. Yẽnda na n zoee Sẽn-Ka-Saab rabeem ne sũ-noogo, yẽnda ka na n kao bʋʋdã wa sẽn zems yẽnda ninã sẽn ne wã ye. Yẽnda ka na n welg yɛlã wa sẽn zems yẽnda tʋb sẽn wʋm ye. Yẽnda na n kaoo ka-pãens rãmbã bʋʋd ne zemsgo.” (Ezayi 11:2-4) Yãmb pa rat rĩm sẽn yaa woto sɩda?

8. Bõe n kɩt tɩ d miẽ t’a Zeezi pa na n dɩ naamã a yembre?

 ⁸ Wẽnnaam yãka neb tɩ b na n dɩ naam ne a Zeezi saasẽ goosneemã pʋgẽ. Wala makre, tʋm-tʋmd a Poll ra yeela a Tɩmote yaa: “Tõnd sã n nang pãnga, tõnd na n dɩɩ naam ne bãmba.” (2 Tɩmote 2:12) Yaa neb a wãn n na n dɩ naam ne a Zeezi?

9. Neb a wãn n na n naag a Zeezi n dɩ naam? Wakat bʋg la Wẽnnaam sɩng b yãkre?

⁹ Wa d sẽn yã sak a 7 pʋgẽ wã, Wẽnnaam vẽnega tʋm-tʋmd a Zã t’a yã a Zeezi sẽn yaa Rĩm saasẽ, tɩ neb 144 000 sẽn yaa a na-rɩt-n-taas be ne-a. Neb 144 000 yaa ãnd dãmba? A Zã yeelame tɩ b ‘tara pe-bilã [a Zeezi] yʋʋr ne a ba wã yʋʋr sẽn gʋls b rĩyẽ wã.’ (Karm-y Vẽnegr 14:1.) A paasame: “Bãmb na n pʋgda pe-bilã n dabd zĩig ning fãa b sẽn dabdã. B raa bãmb n yiis nebã sʋka.” (Vẽnegre 14:4) Neb 144 000 yaa kiris-neb hakɩɩk a Zeova sẽn yãke, tɩ b na n tɩ naag a Zeezi saasẽ n ‘dɩ naam dũni zugu.’ B sã n ki, Wẽnnaam vʋʋgd-b lame tɩ b tɩ vɩɩmd saasẽ. (Vẽnegre 5:10) Pipi kiris-nebã wakatã tɛka, a Zeova yãkda kiris-neb hakɩɩk sẽn na yɩl tɩ neb 144 000 sõorã pidi.

10. Bõe yĩng t’a Zeova sẽn yãk a Zeezi ne neb 144 000 tɩ b na n dɩ naamã wilgd t’a nonga tõndo?

¹⁰ Yaa a Zeova sẽn nong tõnd wʋsgã yĩng la a sẽn yãk neb tɩ b na n tɩ rɩ naam ne a Zeezi wã. A Zeezi na n yɩɩ rĩm-sõngo, bala a yaa wʋmda. A mii ninsaalbã vɩɩm sẽn yaa to-to, la zu-loeesã sẽn namsd-b to-to. A Poll yeelame t’a Zeezi tõe ‘n wʋma tõnd pãn-komsmã võore,’ la t’a ‘paama makr ne bũmb fãa wa tõndo.’ (Ebre-rãmbã 4:15; 5:8) Neb  144 000 me yɩɩ ninsaalba. Bãmb me maoo ne b pãn-komsmã, la bãase. Dẽnd d tõe n kɩsa sɩd t’a Zeezi ne neb 144 000 na n bãng n kʋma ãdem-biisã b zu-loeesã pʋgẽ.

11. Sẽn be-b saasẽ wã fãa ra maanda Wẽnnaam daabã bɩ?

¹¹ Bõe yĩng t’a Zeezi yeel a karen-biisã tɩ b pʋʋs tɩ Wẽnnaam daabã maan tẽngã zug wa sẽn maand saasẽ wã? Sak a 3 pʋgẽ, d bãngame t’a Sʋɩtãan kɩɩsa a Zeova. Rẽ poore, a Zeova basa yẽ ne malɛg-tõatbã bɩ zĩn-dãmbã tɩ b zĩnd saasẽ wakat bilfu. Sak 10 pʋgẽ, d na n maneg n goma a Sʋɩtãan ne zĩn-dãmbã yelle.

12. Togs-y yel-kãsems a yiibã b sẽn bilg Vẽnegr 12:10 pʋgẽ wã.

¹² Biiblã ra pĩnd n togsame t’a Zeezi naamã reegr poore, a na n zaba ne a Sʋɩtãana. (Karm-y Vẽnegr 12:7-10.) Vɛrse 10 togsda yel-kãsems a yiib sẽn na n maane. B yeelame tɩ Wẽnnaam Rĩungã Rĩm sẽn yaa a Zeezi Kirisã na n sɩnga naam dɩɩbo, la t’a na n diga a Sʋɩtãan t’a yi saasẽ n wa tẽngã zugu. D na n yãame tɩ yel-kãensã zoe n maaname.

13. B sẽn dig a Sʋɩtãan saasẽ wã, bõe n maane?

¹³ Biiblã wilgame tɩ b sẽn dig a Sʋɩtãan ne zĩn-dãmbã saasẽ wã, malɛg-sõma wã kɩdma sũ-noogo. A yetame: “Saasẽ la yãmb dãmb sẽn be beenẽ wã maan sũ-noogo!” (Vẽnegre 12:12) Dẽnd masã, laafɩ la bãan hakɩɩk bee saasẽ, bala sẽn be-b be wã fãa maanda Wẽnnaam daabã.

14. B sẽn dig a Sʋɩtãan t’a sig tẽngã zugã, waa ne bõe?

¹⁴ La laafɩ ne bãan kae tẽngã zug ye. Yel-beed n  paamd ninsaalbã, ‘bala, Sʋɩtãanã sig n waa bãmb nengẽ ne sũ-puugri, a sẽn bãng t’a wakatã sẽn ketã ka waoogã yĩnga.’ (Vẽnegre 12:12) A Sʋɩtãan sũur puuda wʋsgo. B rig-a-la saasẽ, t’a leb n miẽ tɩ ka la bilfu b na n sãam-a lame. A maanda a sẽn tõe fãa sẽn na yɩl tɩ ãdem-biisã yã toogo, namsg la zu-loees buud toor-toore.

15. Wẽnnaam datame tɩ vɩɩmã yɩ wãn tẽngã zugu?

¹⁵ La Wẽnnaam sẽn dat tɩ vɩɩmã yɩ to-to wã pa toeem ye. A ket n datame tɩ ninsaalb sẽn zems zãng vɩɩmd arzãnã pʋgẽ tẽngã zug wakat sẽn kõn sa. (Yɩɩn-sõamyã 37:29) Bõe la Wẽnnaam Rĩungã na n maan tɩ rẽ tõoge?

16, 17. Bõe la Dãniyɛll 2:44 yet Wẽnnaam Rĩungã wɛɛngẽ?

¹⁶ Biiblã ra pĩnd n togsa Dãniyɛll 2:44 pʋgẽ yaa: “Rĩm-bãmbã wakatã, saasẽ Wẽnnaamã na n kɩtame tɩ rĩung sẽn ka sãamd zĩndi. La buud a to neb kõn tol n tõog n deeg rĩun-kãng ye. Yẽnda na n wãa soolem-bãmb fãa n menes-ba, la a na n zĩnda wakat sẽn kõn sa.” Bõe la gom-kãensã wilgd tõnd Wẽnnaam Rĩungã wɛɛngẽ?

¹⁷ Pipi, wilgdame tɩ Wẽnnaam Rĩungã Rĩm na n sɩnga naam rɩɩb “rĩm-bãmbã wakate.” Woto rat n yeelame tɩ rẽ tɩ rĩm-dãmb n ket n dɩt naam tẽngã zugu. Yiib-n-soaba, wilgdame tɩ Rĩungã na n kaoosa wakat sẽn pa sate, la tɩ goosneema a to pa na n tol n deeg a zĩig ye. Tãab-n-soaba, wilgdame tɩ zabr n na n zĩnd Wẽnnaam Rĩungã ne dũni-kãngã goosneema rãmbã sʋka, la tɩ yaa Wẽnnaam Rĩungã n na n tõoge, tɩ lebg goosneem kãng bal n na n  dɩ naam ãdem-biisã zugu. Wakat kãnga, ãdem-biisã na n paama goosneem sõmblem sẽn ka to.

18. B boonda zabr ning sẽn na n zĩnd Wẽnnaam Rĩungã ne dũni-kãngã goosneema rãmbã sʋkã tɩ bõe?

¹⁸ Na n sɩnga wãn tɩ Wẽnnaam Rĩungã wa soog tẽngã gilli? Na n tũu ne zabr ning b sẽn boond tɩ Harmagedõ wã. Nand tɩ zabrã sɩnge, zĩn-dãmbã na n belga ‘dũni gill fãa rĩm-dãmbã,’ n “tigs-b Wẽnnaam sẽn tõe fãa ra-kãsenga sẽn yaa zabr daarã yĩnga.” Sɩd me, goosneema rãmbã na n zaba ne Wẽnnaam Rĩungã.—Vẽnegre 16:14, 16; ges-y Vẽnegr a 9 wã.

19, 20. Bõe yĩng tɩ d rat tɩ Wẽnnaam Rĩungã soog tẽngã?

¹⁹ Bõe yĩng tɩ yaa Wẽnnaam Rĩungã la d rata? Bʋʋmã yaa wʋsgo. D gom a tãab yelle. Pipi, d yaa yel-wẽn-maandba, n lʋɩt bãas la d kiidẽ. La Biiblã wilgame tɩ Wẽnnaam Rĩungã sã n wa so tẽngã, d na n vɩɩmda wakat sẽn kõn sa. Zã 3:16 yetame tɩ “Wẽnnaam nonga dũniyã wʋsgo, hal tɩ b kõ b Bi-ribl yendã, tɩ ned ning fãa sẽn na tẽ bãmb kõn sãam ye, la a na paam vɩɩm sẽn kõn sa.”

²⁰ Bũmb a to sẽn kɩt tɩ d rat Wẽnnaam Rĩungã yaa tɩ dũniyã pida ne nin-wẽnse. Neb wʋsg yagda ziri, b zãmbda b taabã, la b tʋmd tʋʋm-dẽgd buud fãa. Tõnd pa tõe tɩ b pa tʋm tʋʋm-wẽns ye. B sẽn pa rat n tek yamã yĩnga, Wẽnnaam na n sãam-b-la Harmagedõ zabrã sasa. (Karm-y Yɩɩn-sõamyã 37:10.) Bũmb a tãab-n-soab sẽn kɩt tɩ tõnd dat Wẽnnaam Rĩungã yaa tɩ goosneema rãmbã sã n pa nin-toose, b yaa zãmb dãmba, wall b pa tõe n kɩt tɩ ãdem-biisã zu-loeesã fãa sa ye. B pa rat me n sõng  nebã tɩ b sak Wẽnnaam ye. Biiblã yetame tɩ “ninsaal tõe a to n maand-a wẽnga.”—Koɛɛg soaba 8:9.

21. Bõe la Rĩungã na n maan n kɩt tɩ Wẽnnaam daabã maan tẽngã zugu?

²¹ Harmagedõ poore, ne Rĩungã maasem, Wẽnnaam daabã na n maana tẽngã zugu. Wala makre, a na n kɩtame t’a Sʋɩtãan ne zĩn-dãmbã pa le nams nebã ye. (Vẽnegre 20:1-3) Ned pa na n le lʋɩ bãag bɩ n ki ye. A Zeezi kũumã sẽn yɩ maoongã yĩnga, wẽn-sakdbã na n tõog n vɩɩmda arzãnã pʋgẽ wakat sẽn kõn sa. (Vẽnegre 22:1-3) Ne Rĩungã maasem, Wẽnnaam yʋʋrã na n paama waoogre. Woto rat n yeelame tɩ Rĩungã sã n wa so tẽngã, nebã fãa na n waoogda a Zeova yʋʋrã.—Ges-y Vẽnegr 20 wã.

22. Bõe n wilgd tɩ pa a Zeezi sẽn wa n be tẽngã zugã, bɩ a sẽn vʋʋgã poor bal la a sɩng naam dɩɩbo?

²² A Zeezi yeela a karen-biisã tɩ b pʋʋs tɩ Wẽnnaam “soolmã wa.” Dẽnd wakat kãng tɩ Wẽnnaam soolmã ra nan pa wa ye. A Zeova ra na n deng n lugla a goosneemã, n yaool n kɩt t’a Zeezi lebg Rĩma. Yaa  a Zeezi sẽn leb saasẽ wã bal la a lebg Rĩm bɩ? Ayo, a ra segd n gũume. A Zeezi vʋʋgrã poore, a Pɩyɛɛr ne a Poll yeelame tɩ gomd ning sẽn be Yɩɩn-sõamyã 110:1 pʋgẽ wã pidsa a Zeezi zugu. A Zeova yeela be yaa: “Zĩnd mam dɩtgo, hal tɩ m kɩt tɩ f bɛɛbã lebg f nao roagendga.” (Tʋʋmã 2:32-35; Ebre-rãmbã 10:12, 13) La a Zeezi ra segd n gũume n tãag wakat bʋgo?

23. a) Wakat bʋg la a Zeezi sɩng naam dɩɩbo? b) Bõe la d na n bãng sak ning sẽn pʋgdã pʋgẽ?

²³ Yʋʋm wʋsg nand tɩ yʋʋmd 1914 ta, neb sull sẽn yaa kiris-neb hakɩɩk n bãng tɩ yʋʋmd 1914, gomd Biiblã sẽn togs n na n pidsi. Sɩd me, yʋʋm-kãng tɛka, yɛlã sẽn yaa to-to dũniyã gill zugã wilgdame tɩ nin-kãensã ra bee bʋʋm. Yaa yʋʋm-kãng la a Zeezi sɩng naam dɩɩbo. (Yɩɩn-sõamyã 110:2) Rẽ poor bilfu, b riga a Sʋɩtãan t’a sig tẽngã zugu, t’a miẽ t’a ‘wakatã sẽn ketã ka waoog’ ye. (Vẽnegre 12:12) Biiblã boonda wakat kãng tɩ “yaoolem wakate.” Sak ning sẽn pʋgdã pʋgẽ, d na n yãa bũmb kẽer sẽn wilgd tɩ d bee wakat kãnga. D na n bãngame me tɩ ka la bilfu, Wẽnnaam Rĩungã na n kɩtame tɩ Wẽnnaam daabã maan tẽngã zugu.—Ges-y Vẽnegr 21 wã.