8ǁÎ Danaǃâs
Elob Gaosiba a tae?
1. Mâ ǂanǂansa ǀgoresa da nî ǃhoaǃgao?
MILIUNDI khoen ge ǂanǂansa ǀgores Sida Îtse tamas ka io ǃKhūb ǀGores di ra ǂgaihesa a ǂan. Jesub ge nē ǀgoresa gere sîsenū îb ǁîb di ǁkhāǁkhāsabega ǁkhāǁkhā mati gu nî ǀgoresa. Tae-eb gere ǀgoreba? Tsî tae-i ǃaromas nē ǀgoresa sada a ǂhâǂhâsaba nētsē?
2. Mâna ǃnona xūn hînab ge Jesuba ǁkhāǁkhā dana î da ǀgoreba?
2 Jesub ge ge mî: “Nēti ǁnâi ǀgore du re: Sida Îtse ǀhommi ǃnâ hâtse, sa ǀonsa as khaihe re. Sa gaosiba ab hā re, sa ǂâisa as ī, ǀhommi ǃnâs ra īs ǁkhās khami ǁnāti ǃhūbaib on ai.” (Khomai re Mateub 6:9-13.) Tae-i ǃaromab ge Jesuba ǁkhāǁkhā da î da nē ǃnona xūn ǃaroma ǀgore?—20ǁÎ ǀArosa ǃgāsasiba mû re.
3. Tae-e da Elob Gaosib xa nî ǁkhāǁkhāsen?
3 ǁKhāǁkhāsen da ge go Elob ǀons a Jehova ǃkhaisa. Tsî da ge go ǁkhāǁkhāsen Elob ǂâis a taesa khoen tsî ǃhūbaib ǃaroma. Xawe Jesuba tae-e gere ǂâibasen mîb ge o: “Sa gaosiba ab hā re”? ǁKhāǁkhāsen da ge nî Elob Gaosib a taesa, tae-eb nî dīs tsî matib Elob di ǀonsa nî ǃanuǃanu ǀgaus tsîna.
ELOB GAOSIBA A TAE?
4. Elob Gaosiba a tae tsî hamma a Gao-ao?
4 Jehovab ge ǀhomsi ǂhanuba ge ǂnûikhâi tsî Jesuba Gao-aose ge ǁgaumâi. Elobmîs ge nē ǂhanuba Elob Gaosib di ra ǂgai. Jesub ge ‘gao-aogu di Gao-aoba, tsî ǃkhūgu di ǃKhūba.’ (1 Timoteub 6:15) Jesub ge ǁkhāsiba ūhâ ǃnāsase ǃgâina dīsa khoesi ǂgaeǂgui-aogu hoagu xa tsî ǃnāsase a ǀgaisa hoa khoesi ǂgaeǂgui-aogu xa.
5. Elob Gaosiba mapa xu nî ǂgaeǂgui? Tae-i ǂamab nî ǂgaeǂgui?
5 Disihakaǀā tsēdi ǁîb ǁōb khaoǃgâb ge Jesuba ǀhommi ǃoa ge oa. Jehovab ge ǁîba Gao-aob Gaosib dib ase ge a ǁgaumâi. (ǃNaeǃkhaidi 2:33) Elob di ǂhanub ge ǃhūbaiba ǀhomma xu nî ǂgaeǂgui. (ǂHaiǂhais 11:15) ǁNā-amagas ge Elobmîsa Elob Gaosiba “ǀhomsi gaosib” ti ra ǂgai.—2 Timoteub 4:18.
6, 7. Tae-e Jesuba ra mâǂoa kai khoesi ǂgaeǂgui-aogu xa?
6 Elobmîs ge ra mî Jesub a ǀgaisa khoesi gao-aogu xa tsîb “ǀguri ǁōǁoasiba” ūhâsa. (1 Timoteub 6:16) Hoa khoesi ǂgaeǂgui-aogu ge ra ǁō xawe Jesub ge tātsēs tsîna ǁō tide. Jesub nî dība da ǃgâib ge nî hâhâ ǀamosib kōse.
7 Elobmîs ge ra kēbo Jesub nî ǂhanu-ai tsî ǀkhomxaǃnâ Gao-aosa: “Tsî ǁîb aib ge Gagab ǃKhūb [“Jehovab,” NW] diba nîra sâ, Gagab gā-aisib tsî ǁnâuǃāb tsîkha dib, Gagab ǀapes tsî ǀgaib tsîra dib, Gagab ǂans tsî ǃKhūb di ǃaoǃgâb tsîra diba. Tsî dâb âb ge ǃKhūb ǃaoǃgâb ǃnâ nîra ī, tsîb ge mûra âb ra mû khami ǀgoraǃgâ tide; ǁîb ge ǁkhāti ǂgaera âb ra ǁnâu khami ǂgōǀau tide. Tsîb ge ǀgâsana ǂhanu-aisib ǀkha nîra ǀgoraǃgâ.” (Jesajab 11:2-4) ǂHâba î du nî îb sadu gao-aoba di ī?
8. Mati da a ǂan Jesub ǀguri ǂgaeǂgui tidesa?
8 Elob ge ǀnî khoena ge ǁhûi în Jesub ǀkha ǀguiba ǀhomsi ǂhanub ǃnâ sī ǂgaeǂgui. Aiǁgause, apostel Paulub ge Timoteuba ge mîba: “Sâsase da ga hâo, o da nîra gaoǀhao.” (2 Timoteub 2:12) Matikōna Jesub ǀkha ǀguiba nî sī gaose ǂgaeǂgui?
9. Matikōna Jesub ǀkha ǀguiba nî ǂgaeǂgui? Eloba mâǁaeba xu ǁîna ge ǁhûi tsoatsoa?
9 Hûǁî danaǃâs ǃnâ da ge go ǁkhāǁkhāsen apostel Johaneb ge ǁhapos ǃnâ a mûsa Jesub ǀhommi ǃnâ a Gao-aosa tsî ǁîb ǀkhan ge 144 000 [ǀguikaidisi tsî hakadisihakaǀaǀoadisi] nau gao-aona ge mâ i. Hamna nē 144 000 [ǀguikaidisi tsî hakadisihakaǀaǀoadisina]? Johaneb ge ge ǁguiǃā Jesub tsî ǁgûb di ǀon ra ǁîn “ǃūdi ai . . . xoamâihe” hâsa. Tsîb ge ge ǀaro: “ǁÎn ge ǁnān, ǁKhaoba ǃgûb ra ǃkhais hoas ǁga ra saona; ǁîn ge khoena xu Elob tsî ǁKhaob tsîkha ǂgurosan ase ǁamaǂuihe hâ.” (Khomai re ǂHaiǂhais 14:1, 4.) ǀGuikaidisi tsî hakadisihakaǀaǀoadisin ge ǂgomǂgomsa Xristeǁîna hînab ge Eloba a ǁhûina în “ǃhūbaib” ǂama “gaosîsen” Jesub ǀkha. ǁŌn ga ra o, on ge ǀhomsi khâisa ra ǃkhōǃoa. (ǂHaiǂhais 5:10) Apostelgu di ǁaeba xub ge Jehovaba ǂgomǂgomsa Xristeǁîna ra ǁhûi în 144 000 [ǀGuikaidisi tsî hakadisihakaǀaǀoadisin] di ǃâ kai.
10. Tae-i ǃaroma i a ǀnamxaǃnâ Jehovab ǀkhāba xu îb Jesub tsî 144 000 âna khoena ǂgaeǂgui?
10 Jehovab ge kaise sada ra ǂhansenba ǁnā-amagab ge ge dī în khoena Jesub ǀkha ǂgaeǂgui. Jesub ge nî ǃgâi ǂgaeǂgui-ao kai sadab da ǁnâuǃā amaga. ǁÎb ge a ǂan mati ī ra tsâsa khoese ǃgomma hōǃâsa. Paulub ge ra mî Jesub sada ra tsâbasa, tsîb ge “sada ǂkhabusasigu ǀkha ǀkhomǀkhomsi-e ūhâ” tsî ǁîb ge “hoa ǃkhaidi ǃnâ sada khami ǃâitsâhe” hâ. (Hebreǁîn 4:15; 5:8) Nē 144 000 ân tsîn ge a ǂan mati ī khoe-e ra tsâsa. Tsî ǁîn ge ǃgomma gere hōǃâ ǀoasa kurusan ūhâ tama hâ ǃkhais ǃaroma tsî ǀaeb tsînan ge ūhâ i amaga. ǁNā-amaga da ge ǂgomǁapo ǁkhā Jesub tsî 144 000 ân nî ǁnâuǃāsa mati da ra tsâ ǀgaus tsî ǃgomsin hîna da ūhân xas tsîna.
ELOB GAOSIBA TAE-E NÎ DĪ?
11. Tae-i ǃaromab ge Jesuba ǁîb di ǁkhāǁkhāsabena ǁkhāǁkhā în ǀgore is Elob di ǂâisa ǀhommi ǃnâ ī?
11 Jesub ge ǁîb di ǁkhāǁkhāsabena ge ǁkhāǁkhā în ǀgore is Elob di ǂâisa ǀhommi ǃnâ ī. Tae-i ǃaroma? ǃNonaǁî danaǃâs ǃnâ da ge go ǁkhāǁkhāsen Satanni hîna a ǁGâuab ge Jehovaba a mâǃoa ǃkhaisa. Satanni di mâǃoas khaoǃgâb ge Jehovaba ge mā-am bi, ǁîb tsî ǂgomoǃnâ ǀhomǃgāgu tamas ka io demongu tsîna îgu ǂkharirose ǀhommi ǃnâ hâ. Hoa taman ge ǀhommi ǃnâ Elob ǂâisa gere dīna. Disiǁî danaǃâs ǃnâ da ge Satanni tsî ǁîb demongu xa nî ǁkhāǁkhāsen.
12. Mâ ǀgam ǂhâǂhâsa xūna ǂHaiǂhais 12:10 ǃnâ ge ǁguiǃāhe?
12 Elobmîs ge ra mî Jesub ge Gao-aose Elob Gaosib dib ase ǁgaumâhes khaoǃgâ, ob ge Satanni ǃoagu ge toroǃkham. (Khomai re ǂHaiǂhais 12:7-10.) Disiǁî ǁaraǃās ge ǀgam ǂhâǂhâsa xūna ra ǁguiǃā. Elob Gaosib ge ge ǂgaeǂgui tsoatsoa Jesub Xristub ge Gao-ao kai tsî Satanni ge ǀhomma xu ǃhūbaib ǃoa a aoǁnâhe o. ǁKhāǁkhāsen da ra khami da ge nî mû nē ǁaxasigu ǀnai ge īsa.
13. Tae-e ge ī ǀhommi ǃnâ Satanni ge aoǁnâhe o?
13 Elobmîs ge ra ǁguiǃā ǂgomǂgomsa ǀhomǃgāgu gere ǃgâiaǂgao ǀgausa Satanni tsî ǁîb demongu ge ǀhomma xu a aoǁnâhe o. Khomai da ge ra: “Nēs ǃaroma ǃgâiaǂgao, ǀhomgo, tsî sadu ǁîgu ǃnâ ǁan hâdo.” (ǂHaiǂhais 12:12) ǁNāpa i ge nēsi ǀoasa ǂkhîb tsî ǀguiǃnâxasib tsîna ǀhommi ǃnâ hâ, hoan ge Elob ǂâisa ra dī.
Satanni tsî ǁîb demongu ge ǀhomma xu a aoǁnâhe sa xu i ge ǃgomsiga ǃhūbaib ai ge ǁgaoǂnû. Nē ǃgomsigu ge ǀgūǁae nî ǀam
14. Tae-e ǃhūbaib ai ra ī Satanni ge ǀhomma xu aoǁnâhes khaoǃgâ?
14 Xawe ûib ge ǃhūbaib ai kaise a ǀkhara. Tsū xūn ge khoen ǀkha ra ī “ǁGâuab go sadu ǃoa ǁgôa,” ǃkhais ǃaroma tsî ǁîb ge “kai ǁaiba ūhâ, ǂkhari ǁaerobab ūhâ ǃkhaisa ǂan tsî.” (ǂHaiǂhais 12:12) Satanni ge ǁaixa hâ. ǁÎb ge ǀhomma xu a aoǁnâhe ǃkhais ǃaroma tsî ǁîb ge a ǂan ǀgūǁaeb nî dīkākāhesa. ǁÎb ge ǁkhāb ân hoana ra dī îb tsūb tsî ǃgomsigu tsîna hoaraga ǃhūbaib ai ǃaroma.
15. Elob di ǂâisa a tae ǃhūbaib ǃaroma?
15 Xawe Elob di ǂâis ǃhūbaib ǃaromab ūhâs ge ǀkhara tama hâ. ǁÎb ge noxoba ra ǂhâba în dīǀoaǀoasa kurusa ūhâ khoena paradais ǃhūbaib ai ǁan. (Psalmdi 37:29) Matib Elob Gaosiba nēn hoana nî ī ǁkhā kai?
16, 17. Danieli 2:44 sa tae-e Elob Gaosib xa ra mîba da?
16 Danieli 2:44 ǃnâ hâ kēbos ge ra mî: “Xawe ǁnā gao-aogu di tsēdi ǃnâb ge Elob ǀhommi diba, gaosiba nîra ǂnûikhâi, ǀamosib kōse hîkākāhe tideba; tsîb ge ǁnā gaosiba ǀkhara ǁae-i xare-e ǁnābahe tide: ǁÎb ge nau gaosidi hoade nîra ǂkhūǂkhū tsî hîkākā, xawe ǁîb ge ǀamosib hoab kōse nîra hâhâ.” Nē kēbosa tae-e Elob Gaosib xa ra ǁkhāǁkhā da?
17 ǂGurose, ǁîs ge ra mîba da Elob Gaosib nî ǂgaeǂgui tsoatsoasa “ǁnā gao-aogu di tsēdi” ǃnâ. Nēs ge ra ǂâibasen ǀnî hâ ǂhanugu ǃhūbaib ai ra ǂgaeǂgui hînab Elob Gaosiba nî ǂgaeǂgui tsoatsoasa. ǀGamǁîses ge ra mîba da Elob Gaosib ǀamosib kōse nî hâhâsa tsî tātsēs tsîna ǀnî hâ ǂhanu i ǀkha ǃkhōǃkhunihe tidesa. Tsî ǃnonaǁîse i ge toroba nî hâ Elob Gaosib tsî khoesi ǂhanugu tsîn ǁaegu. Elob Gaosib ge nî dan tsî nî hoara hâ ǂhanu kai ǃhūbaib ǂama nî ǂgaeǂguiba. ǁNāpaxūn ge khoena ǃgâi ǂgaeǂguisa nî ūhâ.
18. ǀUniga toroba mati ra ǂgaihe Elob Gaosib tsî khoesi ǂhanugu ǁaegu nî ība?
18 Elob Gaosiba mati ǂgaeǂguisa ǃhūbaib ǂama nî ū? ǀUniga torob Armagedons di ra ǂgaiheb aiǃâgu ge demonga “ǃhūbaib di gao-aogu tsî ǃhūbaib hoaragab kōse ra ǂoaga, ǁnā kaitsēs Hoaǀgaixa Elob dis di torob ǃoa gu nî ǁîna ǀhaoǀhaose,” tsî ǁîga ǁkhā ǁaeb ai ra ǂgaehapu. Î, Khoesi ǂhanugu ge Elob Gaosib ǃoagu nî ǃkham.—ǂHaiǂhais 16:14, 16; 10ǁî ǀArosa ǃgāsasiba mû re.
19, 20. Tae-i ǃaroma da Elob Gaosiba ǂhâba hâ îb ǃhūbaib ǂama ǂgaeǂgui?
19 Tae-i ǃaroma da Elob Gaosiba ǂhâba hâ? ǃNona ǃaromadi ge hâ. ǂGurose, hoa da ge a ǁore-ao, ǀaesen tsî da ge ra ǁō. Xawe Elobmîs ge ra mî Elob Gaosib ǃnaga da ge ǀamosib kōse nî ûi. Ama as ge Johaneb 3:16 ge ra mî: “ǁNātikōseb ge Eloba ǃhūbaiba ge ǀnam, ob ge ǁîb di ǀguise ǃnae hâ ǀGôaba ge mā, ǁîb ǃnâ ra ǂgomn hoan kāǁō tidese, xawen nî ǀamo ûiba ūhâse.”
20 ǀGamǁî ǃaromas Elob Gaosiba da ǂhâba hâs ge eloxoresa khoen ǂnamipe da ge ra hâ. ǂGuin ge ra ǂhumi, gāxaǃnâ tsî a ǁgauoǃnâ. Xū-e da ge a dīǁoa ǁîna ūbēsa xawe Elob ge ǁîna nî ūbē. Khoen hîna ǁgai xūna ra dīn ge Armagedons torob tawa nî dīkākāhe. (Khomai re Psalmdi 37:10.) ǃNonaǁî ǃaromas Elob Gaosiba da ǂhâba hâs ge khoesi ǂhanugu ge a ǂkhabusa, karoǂgaoxa tsî a ǀhôakhao. ǁÎgu ge ǃgâiǃgâibasen-e ūhâ tama hâ khoena huisa în Eloba ǁnâuǀnam. Elobmîs ge ra mî “ǁîb ǃnâb ra nē khoeba nau khoeba gaoǂamma ǁîb di tsūǃgâse.”—Aoǁnâ-aob 8:9.
21. Gaosiba mati nî ǁapoǁapo Elob di ǂâis nē ǃhūbaib ai nî dīhesa?
21 Armagedons khaoǃgâb ge Elob Gaosiba nî ǁapoǁapo Elob di ǂâis nē ǃhūbaib ai nî dīhesa. Aiǁgause, ǁîb ge Satanni tsî ǁîb di demongu tsîna nî ūbē. (ǂHaiǂhais 20:1-3) ǀAms ai i ge khoe-e ǀaesen tsî ǁō tide. Xoremarib ǃaroman ge hoa ǂgomǂgomsa khoena Paradais ǃnâ ǀamosib kōse nî ûi. (ǂHaiǂhais 22:1-3) Nē Gaosib ge Elob ǀonsa nî ǃanuǃanu. Nēsa tae-e ra ǂâibasen? Nēs ge ra ǂâibasen Elob ǂhanub ga ǃhūbaiba ǂgaeǂgui tsoatsoa o, on ge hoa khoena Jehovab ǀonsa nî ǃgôa.—21ǁÎ ǀArosa ǃgāsasiba mû re.
JESUBA MÂǁAE GE GAO-AO KAI?
22. Mati da a ǂan Jesub ge Gao-aose ǁgaumâihe tama hâ isa ǃhūbaib aib ge hâ io tamas ka io ǁîb khâis khaoǃgâ?
22 Jesub ge ǁîb di ǁkhāǁkhāsabega ge ǁkhāǁkhā îgu ǀgore: “Sa gaosiba ab hā re.” Nēs ge ra ǁgau Elob ǂhanub ǃgoaxaǁae nî hāsa. Jehovab ge aibe ǁîb ǂhanuba nî ǁapoǁapo tsî ǀgui Jesuba nî Gao-ao kai. Jesuba ǀhommi ǃoab ge oa o, ǃkhais aib ge Gao-aose ǁgaumâihe? Hî-î, ǁîb ge ge ǃâu. Jesub di khâis khaoǃgâ kha ge Petrub tsî Paulub tsîkha nēsa ge ǃgāsa kai, Psalmdi 110:1 ǃnâ hâ kēbos Jesub ǃoa ra ǁnaeǁgausa. Nē kēbos ǃnâb ge Jehovaba ra mî: “ǂNû ti amǀkhāb ǁôab ai, tita nî sa khākhoena sa ǂaira di ǂnûi-aixūse dīs kōse.” (ǃNaeǃkhaidi 2:32-35; Hebreǁîn 10:12, 13) Matikō ǁaebab ge Jesuba ǃâu Jehovab nî Gao-aose ǁgaumâi bis aiǃâ?
Elob Gaosib ge nî ǁapoǁapo îb Elob di ǂâisa ǃhūbaib ai dīhe
23. (a) Jesuba mâǁae Elob Gaosib di Gao-aose ge ǂgaeǂgui tsoatsoa? (b) Tae-e da sao ra danaǃâs ǃnâ nî ǁkhāǁkhāsen?
23 ǂGui kurigu 1914ǁî kurib aiǃân ge ǂhauǃnâ Xristeǁîna gere ǁnâuǃā ǁnā kurib a ǂhâǂhâsasa Elobmîs kēbos ǃnâ. ǃHūbaib di mâsib 1914ǁî kuriba xub ge ra ǁgau ǁîn ge ǂhanu isa. Jesub ge Gaob ase ǁnā kurib ǃnâ ge ǂgaeǂgui tsoatsoa. (Psalmdi 110:2) ǁNās khaoǃgâb ge Satanna ge aoǁnâhe ǃhūbaib ǃoa tsî ǁîb ge nēsi ‘ǂkhari ǁaeroba ūhâ.’ (ǂHaiǂhais 12:12) Sao ra danaǃâs ǃnâ da ge ǁgauǁgauna nî mû, ǁnāti ī ǁaeb ǃnâ da ûi hâsa. ǁNāpas tsîna da ge nî ǁkhāǁkhāsen Elob Gaosib ǀgūǁae nî ǁapoǁaposa îb Elob di ǂâisa ǃhūbaib ai dīhe.—22ǁÎ ǀArosa ǃgāsasiba mû re.
