TLAMACHTIL 8
¿Tlen kijtosneki iTekiuajkayo toTajtsin Dios?
1. ¿Tlen timomachtiskej?
SAPANOA miakej kimatij padrenuestro. Non okijto Jesús uan ijkon okinmititi imachtijkauan ken omonekiaya motlatlaujtiskej. ¿Tlen okitlajtlanki Jesús ijkuak ijkon omotlatlaujti? ¿Tleka moneki tikajsikamatiskej tlen okijto?
2. ¿Tlen eyi tlamantli otechmachti Jesús ma tiktlajtlanilikan toTajtsin Dios?
2 Jesús okijto: “Namejuan, moneki ijkin nanmotlatlaujtiskej: ‘ToTajtsin tlen tika iluikak, ma mochipaua motoka. Ma uiki moTekiuajkayo. Ma mochiua motlanekilis ompa iluikak uan noijki nikan tlaltikpak’” (xiktlajtolti Mateo 6:9-13, TNM). ¿Tleka Jesús otechmachti ma tiktlajtlanikan nin eyi tlamantli? (Xikita nota 20).
3. ¿Tlen tikitaskej itech nin tlamachtil?
3 Yotimomachtijkej toTajtsin Dios itoka Jehová. Noijki yotikitakej ken kineki ma tiyetokan uan tlaltikpak kikopas se xochitlali. Pero ¿tlen okinekiaya kijtos Jesús ijkuak okijto: “Ma uiki moTekiuajkayo”? Itech nin tlamachtil tikitaskej tlen kijtosneki iTekiuajkayo toTajtsin Dios, tlen kichiuas uan ken kichipauas itoka toTajtsin Dios.
¿TLEN KIJTOSNEKI ITEKIUAJKAYO TOTAJTSIN DIOS?
4. ¿Tlen kijtosneki iTekiuajkayo toTajtsin Dios uan akin tlanauatia?
4 ITekiuajkayo toTajtsin Dios se gobierno tlen kajki ompa iluikak. Ye okipejpenki Jesús ma yeto ueyi tekiua noso ma tlanauati itech iTekiuajkayo. Biblia kijtoa Jesús “Ye n tekowa non okachi Weletini de nochteh n tlanawatijkeh” (Apocalipsis 17:14). Jesús okachi techpaleuis amo ken se tekiua uan san ye kipia chikaualistli amo ken nochtin tekiuajkej.
5. ¿Kanin kajki iTekiuajkayo toTajtsin Dios uan tlen kiualnauatis?
5 Ijkuak Jehová okiyoliti Jesús, opanok cuarenta tonalmej uan Jesús oyajki iluikak. Ijkuak opanok miak xiuitl, Jehová okitlali ken ueyi tekiua itech iTekiuajkayo (Hechos 2:33). Non Tekiuajkayotl ualtlanauatis nikan tlaltikpak (Apocalipsis 11:15). Ik non, Biblia kijtoa iTekiuajkayo toTajtsin Dios kajki iluikak (2 Timoteo 4:18, TNM).
6, 7. ¿Tleka Jesús okachi kuali tlanauatis amo ken tekiuajkej?
6 Biblia kijtoa Jesús ye akin okachi kuali tlanauatis, amo ken tekiuajkej porque san “Ye Akin ayik mikki” (1 Timoteo 6:16). Nochtin tekiuajkej ixpoliuij pero Jesús amo keman ixpoliui. Ik non, nochi tlen kichiuas Jesús nochipa techpaleuis.
7 Noijki Biblia kijtoa Jesús yetos se ueyi tekiua yolmelauak uan teiknomatki. Se profecía kijtoa “iespíritu Jehová ipan yetos, kimakas ixtlamatilistli uan ajsikamatilistli, kimakas tlanojnotsalistli uan chikaualistli, kimakas tlamatilistli uan kimatis ken kimauilis Jehová”. Noijki kijtoa: “Amo tlaixkomakas san ika tlen kitas nion tlayektlalis san ika tlen kikakis. Kinmixkomakas ika melajkayotl akinmej amitlaj kipiaj” (Isaías 11:2-4). ¿Mitspaktiskia ma tlanauati se tekiua ken ye?
8. ¿Ken tikmatij Jesús amo iselti tlanauatis?
8 Biblia kijtoa toTajtsin Dios yokinpejpenki sekimej tlen tlanauatiskej iluikak iuan Jesús. Ijkon kiteititia tlen Pablo okilui Timoteo: “Tla tikxikoah n tlaijyowílistli, noiwa titlanawatiskeh iwan Ye” (2 Timoteo 2:12). ¿Keski tlanauatiskej iuan Jesús?
9. 1) ¿Keski tlanauatiskej iuan Jesús? 2) ¿Keman opejki kinpejpena Jehová 144,000?
9 Itech tlamachtil 7 yotimomachtijkej Juan okitak Jesús ken se ueyi Tekiua ompa iluikak uan iuan noijki okatkaj 144,000 (ciento cuarenta y cuatro mil) tekiuajkej. ¿Akinmej ninmej 144,000? Juan okiyekijto yejuan “yawih iwan Ichkatsi san kan ik Ye yawi”. Noijki okijto: “Yejwah non okinkojkeh itech nochteh n tlaltikpaktlakah” (xiktlajtolti Apocalipsis 14:1, 4). “Ichkatsi” ye Jesús. ToTajtsin Dios yokinpejpenki 144,000 yolmelajkej para tlanauatiskej iuan Jesús “ipan nochi n tlaltíkpaktli”. Ijkuak yejuan ixpoliuij san niman kinyolitiaj ompa iluikak (Apocalipsis 5:10). Ijkuak okatkaj tlatitlanilmej, Jehová opejki kinpejpena akinmej pouiskiaj itech 144,000.
10. ¿Tleka Jehová okiteititi sapanoa techtlasojtla ijkuak okipejpenki Jesús uan 144,000 ma tlanauatikan?
10 Jehová okinpejpenki sekimej tlaltikpaktlakamej para ma tlanauatikan iuan Jesús uan ijkon okiteititi sapanoa techtlasojtla. Jesús kuali tlanauatis uan techajsikamatis porque okatka tlakatl uan sapanoa otlajyoui. Tlatitlanil Pablo okijto Jesús kimati ken timomachiliaj uan “techiknomati, porke Ye inewia okiyejyekojkeh kemi tejwah techyejyekoah” (Hebreos 4:15; 5:8). Noijki 144,000 kajsikamatij tlen tikmachiliaj porque kimatij tlen kijtosneki se yetos tlajtlakole uan se mokokos. Ik non, ika nochi toyolo tikneltokaj Jesús uan 144,000 kajsikamatiskej tlen tikmachiliaj uan tlen techtlajyouiltia.
¿TLEN KICHIUAS ITEKIUAJKAYO TOTAJTSIN DIOS?
11. ¿Tleka Jesús okijto omonekiaya kitlajtlaniskej ma mochiua itlanekilis toTajtsin Dios ompa iluikak?
11 Jesús okinmilui imachtijkauan ma kitlajtlanikan ma mochiua itlanekilis toTajtsin Dios nikan tlaltikpak uan ompa iluikak. ¿Tleka omonekiaya kitlajtlaniskej ma mochiua itlanekilis ompa iluikak? Itech tlamachtil 3 otikitakej Satanás okixnamik toTajtsin Dios. Ijkuakon, Jehová okikauili Satanás uan oksekimej ángeles tlen amo otetlakamatkej noso amo kuali ejekamej, ma mokauakan seki kauitl ompa iluikak. Ik non, amo nochtin tlen okatkaj iluikak okichiuayaj itlanekilis toTajtsin Dios. Itech tlamachtil 10 okachi timomachtiskej tlen kichiua Satanás uan amo kuali ejekamej.
12. ¿Tlen ome tlamantli moijtoa itech Apocalipsis 12:10?
12 Biblia yokijtojka ijkuak Jesús yetoskia ueyi Tekiua itech iTekiuajkayo toTajtsin Dios, satepan moteuiskia iuan Satanás (xiktlajtolti Apocalipsis 12:7-10). Itech Apocalipsis12:10 moijtoa ome tlamantli tlen miak ipati. Achto kijtoa Jesucristo opejki tlanauatia. Satepan kijtoa Satanás okiualtlamotlakej nikan tlaltikpak. Timomachtiskej yomochi non ome tlamantli.
13. ¿Tlen opanok ompa iluikak ijkuak okikixtijkej Satanás?
13 Ángeles tlen kitlakamatij toTajtsin Dios sapanoa oyolpakej ijkuak okikixtijkej Satanás ompa iluikak uan amo kuali ejekamej. Biblia kijtoa: “¡Mayeto miak pakílistli ilwikak, iwa xiyolpakikah nomejwah akimeh ompa nonchantitokeh!” (Apocalipsis 12:12). Axkan ompa iluikak nochtin san sekan katej ika yolseuilistli porque nochtin kichiuaj itlanekilis toTajtsin Dios.
Tinochtin titlajyouiaj porque Satanás uan amo kuali ejekamej okinualtlamotlakej pero amo miak poliui uan ayakmo titlajyouiskej.
14. ¿Tlen panotok nikan tlaltikpak desde ijkuak Satanás okikixtijkej iluikak?
14 Pero nikan tlaltikpak amo kuali tikatej. Tinochtin titlajyouiaj porque “diablo yotemok” nikan tlaltikpak uan “kualankamiki, ken kimatok [amo] ok wejkawitl nentinemis” (Apocalipsis 12:12). Satanás kualantok porque okikixtijkej ompa iluikak uan kimatok san niman kixpoloskej. Ik non, sapanoa techtlajyouiltijtok.
15. ¿Ken kineki toTajtsin Dios ma tiyetokan?
15 Pero amo mopatla tlen kineki kichiuas toTajtsin Dios. Ye ok kineki tlaltikpak ma yeto se xochitlali, ayakmo ma tikpiakan tlajtlakoli uan nochipa ma tiyoltokan (Salmo 37:29). ¿Ken kichiuas iTekiuajkayo toTajtsin Dios nochi non tlamantli?
16, 17. ¿Tlen techmachtia Daniel 2:44 itech iTekiuajkayo toTajtsin Dios?
16 Profecía tlen ijkuilitok itech Daniel 2:44 kijtoa: “Ijkuak tlanauatijtoskej nonmej uejueyij tekiuajkej toTajtsin Dios tlen kajki iluikak kitlalis se tekiuajkayotl tlen amo keman kitlajtlamiskej. Nin tekiuajkayotl amo kiuikaskej itech okse altepetl. Kintlajtlamis uan kinmachiuas nochi ninmej tekiuajkayomej uan ye nochipa yetos”. ¿Tlen techmachtia non profecía itech iTekiuajkayo toTajtsin Dios?
17 Achto, techmachtia iTekiuajkayo peuaskia tlanauatiskia “ijkuak tlanauatijtoskej nonmej uejueyij tekiuajkej”. Non kijtosneki ok yetoskiaj okseki tekiuajkayomej nikan tlaltikpak ijkuak iTekiuajkayo toTajtsin Dios peuas tlanauatiskia. ITekiuajkayo toTajtsin Dios nochipa yetos uan amikaj kipatkayotis. Noijki techmachtia tekiuajkayomej kinekiskej kipojpoloskej iTekiuajkayo toTajtsin Dios pero ye tlatlanis uan san ye tlanauatis itech nochi tlaltikpak. Ijkuak mochiuas non profecía, tinochtin technauatis nin Tekiuajkayotl tlen okachi kuali.
18. ¿Ken itoka guerra kanin moteuiskej tekiuajkej iuan iTekiuajkayo toTajtsin Dios?
18 ¿Tlen panos ijkuak ayakmo miak poliuis moteuiskej tekiuajkej iuan iTekiuajkayo toTajtsin Dios? Ijkuakon, amo kuali ejekamej kinkajkayauaskej ‘wejweyi reyes non tlanawatijtokeh ipan nin tlaltíkpaktli, para motekilmakaskeh iwa n Dios nochi weletini itech neká weyi tonati non Ye yokitlali’. Non guerra itoka Armagedón uan ijkuakon moteuiskej tekiuajkej iuan iTekiuajkayo toTajtsin Dios (Apocalipsis 16:14, 16; xikita nota 10).
19, 20. ¿Tleka moneki ma tlanauati iTekiuajkayo toTajtsin Dios?
19 ¿Tleka moneki ma tlanauati iTekiuajkayo toTajtsin Dios? Ma tikitakan eyi tlamantli. Se, titlajtlakolejkej, ik non, timokokoaj uan tiixpoliuij. Pero nochipa tiyoltoskej ijkuak ualtlanauatis iTekiuajkayo toTajtsin Dios. Biblia kijtoa: “Totajtsi Dios saikpanoa okintlasojtlak n tlaltikpaktlakah, yika okitemakti non sanwel Ye se Ikone, para nochteh akimeh kineltokaskeh amo mamoixpolokah, yej makipiakah se yankuik nemílistli non ayik tlami” (Juan 3:16).
20 Ome, axkan katej miakej tlen amo yolkualmej. Sekimej tlakajkayauaj, auilnemij uan amo uelis tikinchiualtiskej ayakmo ijkon ma kichiuakan. Pero Jehová uelis kinnejmachtis uan tla amo kipatlaj inyelis, kinmixpolos itech Armagedón (xiktlajtolti 2 Tesalonicenses 1:8). Eyi, moneki ma tlanauati iTekiuajkayo toTajtsin Dios porque tekiuajkej amo yolkualmej, amo tlanauatiaj ika melajkayotl nion kiyektlaliaj tlen techtlajyouiltia. Noijki amikaj kipaleuiaj ma kitlakamati toTajtsin Dios. Ik non, Biblia kijtoa “nochtin san nochipa motlajyouiltiaj” (Eclesiastés 8:9).
21. ¿Ken tlapaleuis Tekiuajkayotl ma mochiua itlanekilis toTajtsin Dios nikan tlaltikpak?
21 Ijkuak tlamis Armagedón, iTekiuajkayo toTajtsin Dios tlapaleuis ma mochiua itlanekilis nikan tlaltikpak. Satanás uan amo kuali ejekamej kintsakuaskej (Apocalipsis 20:1-3). Ijkuakon, ayakmo ikaj mokokos nion ixpoliuis. Jesús topatka omotemakak, ik non, akinmej tetlakamatiskej nochipa yoltoskej itech xochitlali (Apocalipsis 22:1-3; xikita nota 21). Tekiuajkayotl tlapaleuis ma mochipaua itoka toTajtsin Dios. ¿Tlen kijtosneki non? Ijkuak ualtlanauatis, nochtin kitlakaitaskej itoka.
¿KEMAN OPEJKI TLANAUATIA JESÚS?
22. ¿Ken tikmatij Jesús amo opejki tlanauatia ijkuak okatka nikan tlaltikpak nion ijkuak oyajki iluikak?
22 Ijkuak Jesús okatka nikan tlaltikpak okinmilui imachtijkauan ijkin ma motlatlaujtikan: “Ma uiki moTekiuajkayo”. Non kijtosneki Tekiuajkayotl ayamo otlanauatijtoka. Achto omonekiaya Jehová ma kitlali Tekiuajkayotl uan ma kitlali Jesús ken ueyi tekiua. ¿San niman okitlali ijkuak oyajki iluikak? Amo, Jesús omochixki. Satepan ijkuak Jehová okiyoliti Jesús, tlatitlanil Pedro uan Pablo okijtojkej ijkon panoskia. Okiyekijtojkej tlen kijtoa Salmo 110:1, omochi itech Jesús. Itech non profecía Jehová okijtojka: “Ximoyayanti noyekma, asta manikintlali non mitskokolia itlampa mokxiwah” (Hechos 2:32-35; Hebreos 10:12, 13). Non kijtosneki Jesús mochiaskia hasta ijkuak Jehová kitlaliskia ken ueyi tekiua.
Tekiuajkayotl kichiuas ma mochiua itlanekilis toTajtsin Dios nikan tlaltikpak.
23. 1) ¿Keman opejki tlanauatia Jesús ken ueyi tekiua itech iTekiuajkayo toTajtsin Dios? 2) ¿Tlen timomachtiskej?
23 ¿Keman opejki tlanauatia Jesús? Itech xiuitl 1914. Seki xiuitl achto, sekimej tlen okichiuayaj ken Cristo okajsikamatkej itech xiuitl 1914 mochiuaskiaj seki profecías tlen miak ipati. Tlen opejki panoa, okiteititi melauak tlen yejuan okijtojkej. Jesús opejki tlanauatia non xiuitl (Salmo 110:2, xikita nota 22). Satepan, okiualtlamotlakej Satanás nikan tlaltikpak uan axkan amo “ok wejkawitl nentinemis” (Apocalipsis 12:12). Itech okse tlamachtil tikitaskej okseki tlamantli tlen kiteititia tikatej itlamian tonalmej. Noijki timomachtiskej Tekiuajkayotl kichiuas itlanekilis toTajtsin Dios nikan tlaltikpak.
Xamo noijki mitspaktis
¿Keman opejki tlanauatia iTekiuajkayo toTajtsin Dios? (Parte 1)
Tla tikmati keman, ¿uelis ikaj tikyekiluis ika Biblia?
