CIPAUKO 8
Umambo hwa Mwari i Cinyi?
1. Mukumbiro wapi unozivika maningi watinozopopora?
ZVIURU no zviuru zvo vandhu vanoziva mukumbiro unozivika ngo vese unodaninjwa kuti Baba Wedu, kana kuti Mukumbiro wa Tenji. Iyena wakakumbirenyi? Zve ngenyi mukumbiro uwu unosisira maningi nyamasi?
2. I zviro zvapi zvitatu zvakajijisa Jesu kuti tizvikumbire?
2 Jesu wakati: “Munozokumbira kudari: ‘Baba wedu muri nyezuru, zina renyu ngarikojeswe, [kana kuti ngariceneswe] Umambo hwenyu ngahuze kwedu, kuda kwenyu ngakuitwe pasi pano inga nyezuru.’” (Verenganyi Mateu 6:9-13.) Ngenyi Jesu anotijijisa kuti tikumbire zviro zvitatu izvi?—Verenganyi Masoko o Kupejisira civerengo 20.
3. Zvicinyi zvatinodikana kuziva ngo pamusoro po Umambo hwa Mwari?
3 Takajija kuti zina ra Mwari ndi Jehovha. Zve takajija kuda ka Mwari kuno vandhu no pasi pano. Asi Jesu wairevenyi paakananga kuti: “Umambo hwenyu ngahuze”? Tinozojija kuti Umambo hwa Mwari i cinyi, zvicinyi zvaunozoita, zve unozoitisa kudini kuti ucenese zina ra Mwari.
UMAMBO HWA MWARI I CINYI?
4. Umambo hwa Mwari i cinyi, zve ndiyani Mutongi waho?
4 Jehovha wakagaja utongi hwake kudenga zve wakakheta Jesu kuti ave Mambo waho. Bhaibheri rinodaninja utongi uhu inga Umambo hwa Mwari. Jesu ndiyena “Mambo wo majimambo no Tenji wo majitenji.” (1 Timoti 6:15) Jesu anokwanisa kuita zvakanaka maningi kupinda mutongi ari wese wo kunyama, zve iyena anosimba maningi kupinda masimba o vatongi vese akadihwa pamwepo.
5. Utongi hwa Mwari hunozotonga hwecibva ngo kwapi? Hunozotonga cinyi?
5 No papera 40 o njiku Jesu naapera kumuswa, Jesu wakahwirira kudenga. Perapo, Jehovha wakamugaja inga Mambo wo Umambo. (Maitiro o Vapostori 2:33) Utongi hwa Mwari unozotonga pasi pano hwecibva ngo kudenga. (Apokalipsi 11:15) Ngo zvinoitisa kuti Bhaibheri ridaninje Umambo hwa Mwari inga “Umambo . . . hwo mu gore.”—2 Timoti 4:18.
6, 7. Zvicinyi zvinoitisa kuti Jesu ave mambo wakanaka maningi?
6 Bhaibheri rinonanga kuti Jesu mukuru kupinda mambo ari wese wo umundhu ngo kuti ndiyena “ano uhomi hucikaperi basi.” (1 Timoti 6:16) Vatongi vese vo vandhu vanofa, asi Jesu aazombofi. Zvakanaka zvese zvinozoithwa ndi Jesu zvinozogara mbhera na rini.
7 Zviporofita zvo Bhaibheri zvinonanga kuti Jesu anozova Mambo wakanaka zve anousizi: “Panyezuru pake panozomata [‘mujimu wa Jehovha: mujimu’, Shanduro yeNyika Itsva] wo uzivi no ungwaru, [‘mujimu’, Shanduro yeNyika Itsva] wo kupangira no kuvanga, [‘mujimu’, Shanduro yeNyika Itsva] wo kuziva no kuthya Tenji. Anozovangiswa ngo ndava yo kuthya Mwari. Aazotongi [kana aazopangiri] vandhu inga bzo vanovoneka, aazoimisiri ngokuteveja bzaanozwa. Ngo kusiana, anozotonga vakaremba [kana varombo] ngo kururama.” (Isaia 11:2-4) Maizoda kuti mambo wenyu adari here?
8. Tinozvizivisa kudini kuti Jesu aazotongi ega?
8 Mwari wakakheta vandhu vamweni kuti vatonge na Jesu mu utongi hwo mugore. Inga muezaniso, Mupostori Pauro wakabvunja Timoti kuti: “Tikatamba nyatwa na yena, tinozoita majimambo na yena; tikamuramba, na yena anozotirambavo.” (2 Timoti 2:12) Vangana vanozotonga na Jesu?
9. Vangana vanozotonga na Jesu? Mwari wakatanga rini kuvakheta?
9 Inga zvatakajija mu Cipauko 7, mupostori Johani wakapekeja civoniso caainga ecivona Jesu inga Mambo mugore no 144.000 zvo vatongi vamweni. 144.000 ndivanaani? Johani wakadurujira kuti ivona “vainga no zina [ra Jesu] no zina ra Baba waro rakatahwa pa huma.” Zve wakaengejera kudari: “Ndivona vanotevera Bvuta [kana kuti Jesu], kwese korinoenda. Vakaripihwa inga matangwe o vandhu.” (Verenganyi Apokalipsi 14:1, 4.) 144.000 i maKristu akagondeka akakhethwa ndi Mwari kuti ‘vazotonge pasi pese.’ (Apokalipsi 5:10) Kubvira pa nguva yo vapostori, Jehovha ari kusana vaKristu vakagondeka kuti vaite divi ro mushambi wo majimambo anokwana 144.000.
10. Ngenyi i rudo hwa Jehovha kuva na Jesu no 144.000 kuti vatonge vandhu?
10 Jehovha anotitaja maningi zvo kuti iyena wakasana vandhu vo kunyama kuti vatonge na Jesu. Jesu anozova mambo wakanaka ngo kuti iyena anotizwisisa ushoni. Iyena anoziva kuti kuva mundhu no kutambujika kudini. Pauro wakananga kuti Jesu anotizwira pena, iyena “anokwanisa kuzwira unyaxa kurembejeka kwedu,” zve iyena “wakaejwa ko bzes.” (Vaheberi 4:15; 5:8) 144.000, vanozivavo kuti kuva mundhu kudini. Ivona vakatambujikavo ngo kutama kuperera pomwe no ndhendha. Waro tinogwinyiso rokuti Jesu no 144.000, vanozonasa kutizwisisa, zve avazwisisi mazwiro edu basi asi vanozwisisa zvineso zvatinazvo.
UMAMBO HWA MWARI HUNOZOITENYI?
11. Ngenyi Jesu wakjijisa vajiji vake kuti vaite mukumbiro wo kuti kuda ka Mwari kuitike kudenga?
11 Jesu wakajijisa vajiji vake kuti vaite mukumbiro wo kuti kuda ka Mwari kuitike kudenga. Ngenyi? Takajija mu Cipauko 3 kuti Sathana Dhiabho wakapandukira Jehovha. Pasure po kupandukira ka Sathana, Jehovha wakamutendera pomwe no ngirozi jicizivi kugondeka, kana madhimoni, kuti vagare kudenga mu cinguva cidoko. Ngo kudaro asipi vese kudenga vaiita kuda ka Mwari. Mu Cipauko 10, tinozojija zvizinji ngo pamusoro pa Sathana no madhimoni.
12. Zviitiko zvapi zviviri zvinonangwa pana Apokalipsi 12:10?
12 Bhaibheri rinodurujira kuti mu nguva shomani Jesu naapera kuva Mambo wo Umambo hwa Mwari, waizova muhondo ecihwisana na Sathana. (Verenganyi Apokalipsi 12:7-10.) Vhesi 10 inobhuya zviitiko zviviri zvinosisira maningi. Kutanga kutonga ko Umambo hwa Mwari, Jesu Kristu ari Mambo, no kukhandihwa ka Sathana kuviya pasi pano. Inga zvatinozojija, zviitiko izvi zvakapera kuitika kare.
13. Cicinyi cakaitika kudenga Sathana paakakandihwa kubveyo?
13 Bhaibheri rinonanga mudakaro wo ngirozi jakagondeka Sathana no madhimoni ake paakapera kukandihwa kubva kudenga. Tinoverenga kudari: “Dakaranyi gore no mwese munogaremo.” (Apokalipsi 12:12) Wari kudenga kuno rugarisiko hwakaperera no rubatano ngo kuti vese vari kuita kuda ka Mwari.
Kubvira pakakhandihwa Sathana no madhimoni ake kubva kudenga, pasi pano pakazara ngo matambujiko. Matambujiko aya anopera sambi-sambi
14. Zvicinyi zvakaitika pasi pano ngo kukhandihwa ka Sathana kubva kudenga?
14 Asi zvakasiana maningi no upenyu hwo pasi pano. Zviro zvakashata maningi zviri kuitika no vandhu ngo kuti “Sathana wakaderuka pasi,” zve iyena “wakazara ngo runya, anoziva kuti nguva yaanayo i doko.” (Apokalipsi 12:12) Sathana wakanyangajwa. Iyena wakakhandihwa kubva kudenga, zve anoziva kuti anozoparajwa sambi-sambi. Iyena anoita zvaanokwanisa kuti abare matambujiko, kusuruvara, no kutambuja vandhu vese pasi pano.
15. Ngo kwapi kuda ka Mwari no pasi pano?
15 Asi kuda ka Mwari no pasi pano akuzivi kucinja. Aciri kuda kuti vandhu vakakwana vararame pasi pano mbhera na rini. (Nduyo 37:29) Waro Umambo hwa Mwari hunozozviitisa kudini?
16, 17. Danieli 2:44 inotibvunjenyi ngo pamusoro po Umambo hwa Mwari?
16 Ciporofita ca Danieli 2:44 cinoti: “Mu mukuvo wo majimambo aya, Mwari wo mugore anozozisa umambo hucikazopejwi, umambo hucikazotohwi ngo vandhu vamweni. Hunozokwiya-kwiya no kupeja humambo humweni hwese; asi ihwona hunozogara mbhera narini.” Ciporofita ici cinotijijisenyi ngo pamusoro po Umambo hwa Mwari?
17 Cokutanga, cinotibvunja kuti Umambo hwa Mwari hwaizotanga kutonga “mu mukuvo wo majimambo aya.” Izvi zvinoreva kuti utongi umweni unonga uciripo pasi pano Umambo paunotanga kutonga. Cocipiri, cinotibvunja kuti Umambo hwa Mwari unozogara no kucingaperi zve auzocinjwi ngo utongi umweni. Cocitatu, kunozova no hondo pakati po Umambo hwa Mwari no utongi hwo nyika. Umambo hwa Mwari, unozowina zve pasi pano pova no utongi umwe basi wecitonga. Zve vandhu vanozova no utongi hwakanaka maningi.
18. Ngorapi zina ro hondo yo kupejisira yo kuhwisana ko Umambo hwa Mwari no utongi hwo nyika ino?
18 Umambo hwa Mwari hunozoitisa kudini kuti utonge pasi pese? Hondo yo kupejisira icito yaviya, inodaninjwa kuti hondo yo Armagedhoni, madhimoni anozopausa “majimambo o pasi pese kuti imaunganije pa njiku huru yo hondo na Mwari, Mambo wo bzese.” Hina, utongi hwo vandhu hunozohwisana no Umambo hwa Mwari.—Apokalipsi 16:14, 16; vonanyi Masoko o Kupejisira civerengo 10.
19, 20. Ngenyi tinoda kuti Umambo hwa Mwari hutonge pasi pano?
19 Ngenyi tinoda Umambo hwa Mwari? Ngo mathangwe matatu pakati po mazinji. Rokutanga, tiri vashaishi, waro tinohwaja, no kufa. Asi Bhaibheri rinotibvunja kuti pasi po Umambo hwa Mwari, tinozorarama mbhera na rini. Zvokadi, Johani 3:16 inoti: “Mwari wakadisa nyika yo pasi, kokuti wakapa Mwana wake umwe ega, kuti vese vanomutenda vatame kufa, kaveta vave no uhomi hucingaperi.”
20 Thangwe rocipiri rinotiitisa kuti tide Umambo hwa Mwari ngo ro kuti itisu takatendenejwa ngo vandhu vakashata. Vazinji vanonyepa, vanoba zve vanomufambiro wakashata. Apana catingaita kuti tivabvise, anovabvisa ndi Mwari. Vandhu vanoramba veciita zvakashata vanozoparajwa pa Armagedhoni. (Verenganyi Nduyo 37:10.) Thangwe rocitatu rinotiitisa kuti tide Umambo hwa Mwari ngo ro kuti utongi hwo vandhu ahukwanisi, zve hwakashata. Ihwona ahudakariri kubesera vandhu kuti vazwire Mwari. Bhaibheri rinonanga kuti “vandhu vanotonga panyezuru po vamweni, kuti vavaxuphe.”—Mucumaeri 8:9.
21. Umambo hunozoitisa kudini kuti huite kuda ka Mwari?
21 Pasure po Armagedhoni, Umambo hwa Mwari hunozoita kuti kuda ka Mwari kuithwe pasi pano. Inga muezaniso, unozobvisa Sathana no madhimoni ake. (Apokalipsi 20:1-3) Perapo akuna anozohwaja no kufa. Ngo pamusoro po muripo, vandhu vese vakagondeka vanozorarama mbhera na rini mu Paradhiso. (Apokalipsi 22:1-3) Umambo hunozocenesa zina ra Mwari. Izvi zvinorevenyi? Izvi zvinoreva kuti utongi hwa Mwari paunozotonga pasi pano, vandhu vese vanozokuja zina ra Jehovha.—Vonanyi Masoko o Kupejisira civerengo 21.
NDIRINI JESU WAKAVA MAMBO?
22. Tinozvizivisa kudini kuti Jesu aazivi kuva Mambo paainga pasi pano, kana paakandokhwira kudenga pakupera kumuswa?
22 Jesu wakajijisa vajiji vake kuti vakumbirise kudari: “Umambo hwenyu ngahuze kwedu.” Waro zvainga pambhene kuti utongi hwa Mwari hwaizoviya kumbejiyo. Jehovha waidikana kutanga kugaja utongi hwake zve wogaja Jesu inga Mambo waho. Jesu wakagajwa kuva Mambo paakandokhwira kudenga here? Haiwa, waidikana kuvetera. Nguva jimweni Jesu naapera kumuswa, Pedhru na Pauro vakazvijekesa ushoni pavakashandisa ciporofita ciri pana Nduyo 110:1 vecinangira Jesu. Muciporofita ici Jehovha wakananga kuti: “Garai pa mukono muho wangu, mbhera kuti ndidire vakorore vako pasi po soka jako.” (Maitiro o Vapostori 2:32-35; Vaheberi 10:12, 13) Jesu waidikana kuvetera mbhera rini, Jehovha acito amugaja inga Mambo?
Umambo hwa Mwari hunozoita kuti kuda ka Mwari kuithwe pasi pano
23. (a) Jesu wakatanga kutonga rini inga Mambo wo utongi hwa Mwari? (b) Tinozojijenyi mu cipauko cinotevera?
23 Makore mazinji sure ko 1914, cikwata co maKristu okadi kamare cakazwisisa kuti gore ro 1914 raizova gore rinosisira maningi mu ciporofita co Bhaibheri. Zviitiko zvo nyika kubvira mu gore ro 1914 zviri kuvonesa kuti vainga vakazwisisa ushoni. Jesu wakatanga kutonga mu gore iri. (Nduyo 110:2) Nguva shomani yakatevera, Sathana wakakhandihwa pasi pano, zve wari “nguva yaanayo i doko.” (Apokalipsi 12:12) Mu cipauko cinotevera, tinozovona zvitatijo zvizinji zvinovonesa kuti tiri kurarama mu nguva yo kupejisira. Tinozojijazve kuti sambi-sambi Umambo hwa Mwari hunozoita kuti kuda ka Mwari kuithwe pasi pano.—Vonanyi Masoko o Kupejisira civerengo.
