1. Sambela mɛ ahĩngangbi gba mɛ e na tɛnɛngɔ tɛnɛ na ndo ni nɛ?

AMILIƆ̃ tɛ azi ahĩnga sambela mɛ ndo ili ni ya, To e mɛ ka yayu. Ni adu sambela mɛndó Yezo ha na ava lo ya, ala sambela la. Ala sambelandó na ndombali nɛ? Ndani nɛ la sambela niko nga ngbondoni na ndombali e nɛ?

2. Aye taa ti ngbondoni mɛ Yezo tɛnɛ ya ale e sambela na lo ni nɛ?

² Yezo tɛnɛ ya: “Wa ĩ ba se mɛ ale ĩ ndo sambela na ni lo mɛ: “To e mɛ ka yayu, azi atɔndɔ bɛ ili mɔ mɛ santo ma ke! Mɔ ga bɛ mɔ lɛ gbia na ndo azi zu ma ke! Azi ali bɛ ye ge tise na se bɛ mɔ, nga ma se mɛ ando li na ni ka yayu ma ke!” (Di Matie 6:9-13.) Nda mɛ Yezo tɛnɛ ya ale e sambela na ndo ye taa olo nɛ?​—Ba Nɔti ti 20.

3. Ye mɛ elengbi ti hĩngangɔ na ndo Lo-Gbia tɛ Nzapa nɛ?

³ E manda ya ili Nzapa la Yehova. E manda nga dangɔ bɛ tɛ Nzapa na ndo azi nga na ndo lɛ sese. Na tɛnɛngɔ ya: “Mɔ ga bɛ mɔ lɛ gbia na ndo azi zu ma ke!” Yezo yendó tɛnɛngɔ ya nɛ? Na ya shapitrɛ mɛ e na mandangɔ bere Lo-Gbia tɛ Nzapa adu nɛ, ye mɛ ni na lingɔ, nga na se mɛ ni na lingɔ yako ili Nzapa ati santo.

4. Lo-Gbia tɛ Nzapa adu nɛ, zo mɛ Gbia ni na?

⁴ Yehova kpã guvɛrnɛma kɔi ka ndozu. Ngbangɔ ili guvɛrnɛma ni ya, Lo-Gbia tɛ Nzapa. Yehova pɔna  Yezo ti dungɔ Gbia ti Lo-Gbia ni. Yezo du “Gbia tɛ agbia.” (1 Timɔte 6:15) Lo na ngunu ti lingɔ anzɔ̃ kpale ɔngɔ agbia zu ti politikɛ. Yezo nga na ngunu lo ɔ agbia zu ti politikɛ, bɛse du yako ala bombi ndala ndo lo.

5. (a) Lo-Gbia tɛ Nzapa ndo du kawa? (b) Lo-Gbia ni na lengɔ gbia na ndo nɛ?

⁵ Bi 40 na pɛ kwá tɛ Yezo, lo dirindó lo gwe ka ndozu. So pɛni ko, Yehova kpãndó lo Gbia ti Lo-Gbia tɛ lo. (Awa Pangɔ Kwa 2:33) Ngbangɔ tɛnɛ ya Lo-Gbia tɛ Nzapa adu “Lo-Gbia ti ndozu.” (2 Timɔte 4:18) Ni ka ndozu, ni na lengɔ Gbia na ndo lɛ sese.​—Suma 11:15.

6, 7. Nda mɛ Yezo ɔ agbia zu ti lɛ gegi nɛ?

⁶ Yezo ɔ agbia zu ti lɛ gegi. Ngbangɔ tɛnɛ nga ya bo lo kɔi la “lo ndongbã kaka.” (1 Timɔte 6:16) Agbia zu ti politikɛ ndo kpili, kanda ta Yezo lengbi ti kpingɔ ma. Ye zu mɛ lo na lingɔ na ndombali e na ngbãngɔ bwai na bwai.

⁷ Ngbangɔ piandó tɛnɛ ya Yezo na dungɔ Gbia ti mbilimbili nga ti songo: “Nyingɔ tɛ Yehova na dungɔ na ndo lo, nyingɔ ti ndara nga na ti kɔdɛ, nyingɔ ti wangɔ nga na ti ngunu, nyingɔ ti hĩngangɔ ndo nga na ti tɔndɔngɔ Yehova; kpɛngɔ Yehova na dungɔ ye mɛ ndo hɛ̃ lo dengɔ bɛ. Ta lo na fangɔ ngbanga na bangɔ ye mɛ lo hũ na lɛ lo ma, bere na ye mɛ lo ma na ma lo ma. Lo na fangɔ ngbanga tɛ awa yɛlɛ na mbilimbili.” (Yisaya 11:2-4) Mɔ na dungɔ na gwɛ̃ ti dungɔ na gbia mabere lo?

8. E hĩnga ngasia ya ta Yezo kɔi la na lengɔ Gbia ma nɛ?

⁸ Nzapa pɔna azi ti nɛngɔ ya ala le gbia ndoni kɔi  na Yezo ka ndozu. Toma Polo tɛnɛndó hɛ̃ Timɔte ya: “Se e gbe bɛ e ko, gbanda ko e na lo e lɛ nga gbia kɔi.” (2 Timɔte 2:12) Azi kɛ̃ la na lengɔ gbia ndo ni kɔi na Yezo nɛ?

9. (a) Azi kɛ̃ la na lengɔ gbia ndoni kɔi na Yezo nɛ? (b) Ngoi mɛ wa la Yehova bandandó pɔnangɔ azi mɛ le gbia ndoni kɔi na Yezo wa?

⁹ Shapitrɛ ti 7 ti buku mɛ atɛnɛ tɛnɛ ti suma kɔi mɛndó toma Yoanɛ ahũ. Lo hũ Gbia Yezo ndoni kɔi na agbia mɛndɛ̃ 144000 ka ndozu. Agbia ni ko la ana? Yoanɛ kambisa ya asu “ili Nyi ngasã Ngbaga [ili Yezo] nga na ili To lo na ndo lɛ azi ni ko.” Lo di tɛnɛ ya: “Na ndo zu mɛ ndo Nyi Ngasã Ngbaga ndonɔ da ko, ala ndonɔ ndali lo. Nzapa atɔ̃ ndo la na popo tɛ azi.” (Di Suma 14:1, 4.) Azi 144 000 ala du awakristo ti mbilimbili mɛ Nzapa pɔna ala ti “lɛ ngɔ gbia na ndo azi ti lɛ sese” ndoni kɔi na Yezo. Ngoi mɛ ala kpi ko, ala so gwe ndozu. (Suma 5:10) Yehova bandandó pɔnangɔ awakristo ti mbilimbili ni 144 000 na ngoi tɛ atoma ti nɛngɔ ya ala du agbia.

10. Ye mɛ afa ya Yehova ndo ye e na ndenge mɛ lo pɔna azi 144 000 ya, ala le gbia ndoni kɔi na Yezo na ndo azi nɛ?

¹⁰ Yehova ndo ye e mawoma nda mɛ lo ye ya azi a lenga gbia ndoni kɔi na Nyilo Yezo la. Yezo na dungɔ nzɔ̃ Gbia. Lo na kpãngɔ tɛrɛ lo na ndo tɛ e na lo mɛ ya lo ngandó zo, lo hũ ngandó pɛnɔ nga ma e. Polo kambisa ya Yezo na “dungɔ na vundu tɛ e.” Lo tɛnɛ nga ya Yezo nga na hĩngangɔ yako e du azi mɛ na tɛrɛ ti woni “Satana tarandó bɛ lo nga ma se mɛ lo ndo tara na bɛ e” na ya alo zu. (Aebreo 4:15; 5:8) Azi 144 000 ni nga na hĩngangɔ pɛnɔ tɛ e: ala ngandó azi ti siɔ kpale, ala hũngandó pɛnɔ  nga ma e. Elengbi ti yengɔ yako Yezo na azi 144 000 na hĩngangɔ se mɛ e ndo ma na tɛrɛ e, ala nga na hĩngangɔ pɛnɔ tɛ e.

11. Yezo fandó na ava lo ya ala sambela ya se bɛ Nzapa ali ka ndozu. Na lo nɛ ndó la Yezo tɛnɛ ngaso nɛ?

¹¹ Yezo fandó na ava lo ya ala sambela ya se bɛ Nzapa ali ka ndozu. Na lo nɛndó la Yezo tɛnɛ so nɛ? Kaya shapitrɛ ti 3, e mandandó ya, Satana tɔmbɔkɔndó tɛrɛ Yehova. Na pɛ tɔmbɔkɔngɔ ni, Yehova zi lége hɛ̃ Satana nga na aangelo mɛ ala zanga mbilimbili (ademo) ya ala du ka ndozu na pɛ yakere ngoi. Na ngoi ni kondó ko, ta aangelo zundó la ndo li se bɛ Yehova ma. Kaya shapitrɛ ti 10, e na mandangɔ aye gba na ndo Satana na ademo tɛ lo.

12. Akpale sɛ ti ngbondoni mɛ Suma 12:10 tɛnɛ tɛnɛ na ndoni nɛ?

¹² Ngbangɔ tɛnɛ ya na pɛ tingɔ Gbia, Yezo tirindó to na Satana. (Di Suma 12:7-10.) Suma 12:10 tɛnɛ tɛnɛ sɛ ti ngbondoni: ti (1) Yezo mɛ Gbia ti Lo-Gbia tɛ Nzapa abanda lengɔ gbia wɛ. Ti (2) Atoma Satana ka ndozu, abi lo ge tise. Akpale niko ali tɛrɛ londó wɛ. Ni la e na tɛnɛngɔ tɛnɛ na ndoni gesi.

13. Ngoi mɛ atoma Satana ka ndozu, ye mɛndó ali tɛrɛ lo nɛ?

¹³ Ngbangɔ kambisa ya atomandó Satana na ademo tɛ lo asa ala ge tise, aangelo ti mbilimbili amandó dengɔ bɛ. Apa ya: “Ĩ azi mɛ Ka yayu, ĩ́ saba!” (Suma 12:12) Na olo mɛ, ka ndozu ko, siriri na nzɔ̃ mangbi ka popo tɛ aangelo zu na lo mɛ ya ala zu ndo li se bɛ Nzapa.

14. Bandandó la atomandó na Satana ka ndozu, ye mɛ ndo ɔ ge lɛ sese nɛ?

 ¹⁴ Kpale ndo li tɛrɛ lo ndenge mɛndɛ̃ ge lɛ sese: asiɔ kpale ndo si na azi. Ndombali nɛ? “Na lo mɛ ya Satana azu ka tɛ ĩ” ka lɛ sese, wa “ngɔnzɔ agbɔ̃ lo sĩ, ta sanga ma lo hĩnga ya ngoi tɛ ni angbã bo yakere.” (Suma 12:12) Satana na kpengba ngɔnzɔ. Atomandó lo ka ndozu, lo hĩnga nga ya na hongɔ ni. Lo ndo lo li zu ti nɛngɔ ya azi tengbi na kpengba kpale na pɛnɔ.

15. Dangɔ bɛ tɛ Nzapa na ndo lɛ sese adu nɛ?

¹⁵ Dangɔ bɛ tɛ Nzapa na ndo lɛ gegi mɛ ta agbinyangbi ma. Yehova ye ya azi mɛ na tɛrɛ ti lengbingɔ adu ka Paradizo mɛ na dungɔ ge lɛ sese bwai na bwai. (Nzembo 37:29) Ndenge mɛ ngasia la Lo-Gbia tɛ Nzapa na lingɔ ya se bɛ Nzapa ati na seni nɛ?

16, 17 Ye mɛ Danyele 2:44 aha na e na ndo Lo-Gbia tɛ Nzapa nɛ?

¹⁶ Danyele 2:44 tɛnɛ ya: “Na ngoi tɛ agbia ni ko, Nzapa ti ndozu na kpãngɔ Lo-Gbia kɔi mɛ ta na gbɛ̃ngɔ ma. Ta kɔdɔrɔ mɛndɛ̃ na mungɔ Lo-Gbia ni ma. Ni na kalangɔ nga na gbɛ̃ngɔ alo-gbia mɛndɛ̃ zu, bo ni la na ngbãngɔ bwai na bwai.” Ye mɛ tɛnɛ niko aha na e na ndo Lo-Gbia tɛ Nzapa nɛ?

¹⁷ Ti 1)Lo-Gbia tɛ Nzapa abandandó lingɔ kwa na “ngoi tɛ agbia niko.” Afa ya, ngoi mɛ Lo-Gbia tɛ Nzapa abanda lengɔ gbia ko, alo-gbia mɛndɛ̃ na dungɔ da ge tise. Ti 2)Lo-Gbia tɛ Nzapa na ngbãngɔ bwai na bwai, ta lo-gbia mɛndɛ̃ na mungɔ ndo ti lo ma. Ti 3) to na dungɔ ka popo tɛrɛ Lo-Gbia tɛ Nzapa na lo-gbia tɛ azi ti lɛ sese. Lo-Gbia tɛ Nzapa na nwɔ̃ngɔ to ni. Lɛ sese zu na dungɔ bo na Guvɛrnɛma kɔi: ni na dungɔ Guvɛrnɛma ti nzɔ̃ni na lo tɛ azi.

18. To mɛ na dungɔ na popo tɛ Lo-Gbia tɛ Nzapa na guvɛrnɛma tɛ azi ili ni la nɛ?

 ¹⁸ Armagedona adu to mɛ Lo-Gbia tɛ Nzapa na tiringɔ na guvɛrnɛma tɛ azi. Ye mɛ na lingɔ tɛrɛ lo uzu ti to niko nɛ? Ademo na handangɔ “Agbia ti lɛ sese zu so bombingɔ la ndoni kɔi ya, na lá ko gbanda Nzapa mɛ lombe aga ko, ani na lo ani tiri to.” (Suma 16:14, 16) Guvernɛma zu tɛ azi na tiringɔ to na Lo-Gbia tɛ Nzapa.​—Ba Nɔti ti 10.

19, 20. Nda mɛ e na gwɛ̃ ti Lo-Gbia tɛ Nzapa nɛ?

¹⁹ Nda mɛ e na gwɛ̃ ti Lo-Gbia tɛ Nzapa nɛ? Na ndo aye taa. Ti (1) e na gwɛ̃ ti Lo-Gbia tɛ Nzapa na lo mɛ ya, e du awa siɔ kpale, ndani la e ndo e ti na ngã e ndo e kpili nga. Kanda Ngbangɔ tɛnɛ ya ngoi mɛ Lo-Gbia tɛ Nzapa na mungɔ lɛ sese ko, e na dungɔ na lɛ ngɛ̃ bwai na bwai. Yoanɛ 3:16 tɛnɛ ya: “bɛ Nzapa aye ndo azi ti lɛ sese ma wo ma, la lo to ngbongi Nyilo hɛ̃ la ya, se zo aye lo tɛ lo ko, ta lo kpi ma, ko lo lua du ti kaka.”

²⁰ Ti (2) e na gwɛ̃ ti Lo-Gbia tɛ Nzapa ma sanga ma e du ndoni kɔi na asiɔ azi. Azi gba awa nvɛ̃nɛ nga na awa nzi. Ambɛni ndo li ngbabo. Ta elengbi ti gbanzingɔ ala na lingɔ asiɔ ye ni ko ma. Yehova na kpɔngɔ azi mɛ kɛ̃ gbinyangbingɔ bɛ la na to ti Armagedona. (Di Nzembo 37:10.) Ti (3) e na gwɛ̃ ti Lo-Gbia tɛ Nzapa na lo mɛ ya guvɛrnɛma tɛ azi zanga ngunu, ni ndo hɛ̃ azi pɛnɔ asĩ nga na nvɛ̃nɛ. Ta ala ndo za azi ya ala tɔndɔ Nzapa ma. Ngbangɔ tɛnɛ ya, zo ndo le gbia ndo fɔ̃ lo zo bo ti hɛ̃ngɔ lo pɛnɔ.​—Mosakoli 8:9.

21. Ngasia la Lo-Gbia na lingɔ ya se bɛ Nzapa ati na seni ge lɛ sese nɛ?

²¹ Na pɛ Armagedona, Lo-Gbia tɛ Nzapa na lingɔ  zu ya se bɛ Nzapa ati na seni ge lɛ sese. Ni na hongɔ Satana na ademo tɛ lo. (Suma 20:1-3) So pɛni ta tɛrɛ azi adi sɔ gbanda ma, ta azi di kpili nga gbanda ma. Na lége ti tɔ̃ngɔ azi, azi ti mbilimbili na dungɔ lɛ la ngɛ̃́ bwai na bwai ka Paradizo. (Suma 22:1-3) Lo-gbia na lingɔ ya ili Nzapa adu Santo. Aye fangɔ ya ngoi mɛ ni na lengɔ gbia na ndo lɛ sese, azi zu ti lɛ sese na hɛ̃ngɔ ili Nzapa ndima.​—Ba Nɔti ti 21.

22. E hĩnga ngasia ya ta Yezo tindó Gbia ngoi mɛ lo ge lɛ sese ma, nga na pɛ diringɔ mbala kɔi ka ndozu ma nɛ?

²² Yezo fandó na ava lo ya, ala yɔ Kaya sambela tɛ la ya: “Mɔ ga bɛ mɔ lɛ gbia ndo lɛ sese ma ke.” Afa ya lo-gbia tɛ Nzapa ta dɛ gandó ma, ni na gangɔ na gesi. Ayɔndó ya Yehova kpã lo-gbia ni, ko lo kpã nga Yezo gbia ti lo-gbia ni. Yezo tindó gbia mbala kɔi na pɛ diringɔ ka ndozu? Ipɔ. Lo kũndó yakele. E hĩnga ni ngasia? Abulu yakele na pɛ songɔ kwá tɛ Yezo, Petro  na Polo ala tɛnɛndó ya tɛnɛ mɛ kaya Nzembo 110:1 abandó Yezo. Kaya tɛnɛ ni ko Yehova tɛnɛndó hɛ̃ Yezo ya “Du na ndo kɔti ti mbi, wa kũ nga gbanda mbi nwɔ̃ awa kɛ̃ngɔ mɔ.” (Awa Pangɔ Kwa 2:32-35; Aebreo 10:12, 13) Yezo kũndó pɛ bulu kɛ̃?

23. (a) Yezo tindó gbia ti Lo-Gbia tɛ Nzapa na bulu ti kɛ̃? (b) Ye mɛ e na mandangɔ kaya shapitrɛ mɛ na gangɔ nɛ?

²³ Bulu gba uzu ti 1914, ndambu tɛ awakristo ti mbilimbili, ala mandandó atɛnɛ ti ya Ngbangɔ, ala gbɔ̃ndó ndani ya bulu ti 1914 na dungɔ bulu kɔi mɛ ngbondoni mawoma. Bandangɔ na bulu ti 1914, aye mɛ ndo ɔ ge lɛ gegi afa ya ala tɛnɛndó bɛta tɛnɛ. Yezo bandandó lengɔ Gbia na bulu ni ko. (Nzembo 110:2) So pɛni abi Satana ge lɛ sese. “Lo hĩnga ya, ngoi tɛ ni angbã bo yakere.” (Suma 12:12) Na ya shapitrɛ mɛ na gangɔ ko, e na hũngɔ aye mɛ ndo fa ya e na ndangba bi. E na mandangɔ nga ya, angbã yakele na lége ti Lo-Gbia, se bɛ Nzapa na tingɔ na se ni ge lɛ sese.​—Ba Nɔti ti 22.