1. Nivekelo taani noovuwa nnahaalaahu othokororya hiihaano?

ACHU ancipale aasuwela nivekelo noovuwa nenlo nniichaniwa Atiithihu a Wirimu, naari Nivekelo na Apwiya. Yesu aaloca nivekelo nla wi aahusihe oomuchara awe mukhalelo wa ovekela. Ichu taani aavenkeiye? Nave ntakhara heeni nivekelo nla ti noochuneya wa hiyo olelo?

2. Ichu taani raru soochuneya Yesu onihusinheiye oveka?

² Yesu aaloca: “Mwavekelaka mwereke ha: Atithihu muri wirimu, nsina nanyu nèlihiwe. Omwene anyu orwe. Okhwela wanyu wereye, ntoko wirimu hiha vathiva.” (Mwaalakhanye Mateu 6:9-13.) Ntakhara heeni Yesu oonihusiha oveka ichu seiha raru?—Moone Yooleeliherya 20.

3. Tiheeni eri yoochuneya osuwela vooloca sa Omwene wa Muluku?

³ Hiyaano noohuserya wi nsina na Muluku ti Yehova. Nave noothokororya yookhwela ya Muluku ntakhara achu ni elapo yavathi. Nyenya tiheeni Yesu aachuneiye oloca ariki: “Omwene anyu orwe”? Nnahaala ohuserya Omwene wa Muluku tiheeni, nave tiheeni onahaalaya weera, ni ti mwawiihai onahaalaya weeliha nsina na Muluku.

4. Omwene wa Muluku tiheeni, nave taani ori Mwene?

⁴ Yehova ootikitherya olamulelo wa wirimu nave oomuthanla Yesu wi akhale Mwene. Piipiliya oniichana olamulelo owo ntoko Omwene wa Muluku. Yesu “Mwene a mamwene ni pwiya a asipwiya.” (1 Timóteo 6:15) Yesu onnawerya opaka ichu sincipale saphaama  ompwaha mulamuleli ori oothene, nave owo toowerya opwaha ikuru sa alamuleli oothene a elapo.

5. Omwene wa Muluku onahaala olamulela orweela woowi? Nave onahaala olamulela eheeni?

⁵ Mahiku makhumi maxexe Yesu amanle oviihiwa mookhwani, owo aakookela wirimu. Voocharela, Yehova aamuthanla okhala ntoko Mwene a Olamulelo awe. (Saweriwa T’arummwa 2:33) Omwene wa Muluku onahaala olamulela elapo yavathi orweela wirimu. (Wupulula 11:15) Ti nthowa nene Piipiliya oniichaneiye Omwene wa Muluku ntoko “Omwene . . . wa wirimu.”—2 Timóteo 4:18.

6, 7. Tiheeni enamweeriha Yesu okhala oophwanelela waapwaha mamwene a elapo?

⁶ Piipiliya onnaloca wi Yesu tooweryaxa waapwaha mamwene oothene a achu, ntakhara “ti yowo pahi ohinakhwa.” (1 Timóteo 6:16) Mweeparipari achu analamulela annakhwa, nyenya Yesu harwaru akhwa. Ichu soothene Yesu onahaaleiye weera sinahaala wiikhalelaru okhala wookhala.

⁷ Sooloherya sa Piipiliya sinnaloca wi Yesu onahaala okhala Mwene eekhaikhai ni oomoriwa ikharari: “Va yowo onamukayavo munepa w’Apwiya [Yehova], munepa wa miruku ni wosuwela, munepa wa ikano ni wolipiha, munepa wawasuwela ni wawatxitximihano Apwiya. Onahawela osiveliweke ni watxitximiha Apwiya. Yowo hokathorihaka ntoko anonelayavo mitho; hokathorihaka mulatxu wa nthowa na masu awiwa. Oni onamwathoriha atxhu òhawa ni wokololowa, ni oni onan’wakiha atxhu ohosiwa.” (Isaiya 11:2-4) Hamunachuna wi mwene anyu akhale ntoko yoola?

8. Nnasuwela hai wi Yesu halamulela meekheiye?

⁸ Muluku ohaathanla achu wi elamulele ni Yesu wirimu  ntoko mamwene. Ntoko yootakiherya, murummwa Paulo aamuleela Timóteo ariki: “Navilelà, nnarwa nlamula ni yowo.” (2 Timóteo 2:12) Nave ari akavi yaawo anaya olamulela ni Yesu ntoko mamwene?

9. Ari akavi yaawo anaya olamulela ni Yesu? Muluku opacenrye liini waathanla?

⁹ Hiiha ntoko nihusenryaahu mmwaha 7, va yawoona, murummwa Yohani aamoona Yesu ntoko Mwene a wirimu ni mamwene makina awaakhwana 144.000. Taani yaala 144.000? Yohani onnathariha wi ti yaawo “yarempwe vayutxi nsina na Eputxeputxhe [Yesu] ni na Atithi aya.” Nave aahaaceererya: “Yawo annatxhara Eputxeputxhe [Yesu] mapuro othene enayayawo. Àhopoliwa mwa atxhu.” (Mwaalakhaye Wupulula 14:1, 4.) Yaala 144.000 Akiristu oororomeleya yaawo Muluku aathanlileiye wi ‘elamulele elapo ya vathi’ ni Yesu. Vaavaa anakhwaaya, annaviihiwa moohilekela wi eye wirimu. (Wupulula 5:10) Ovinyerya elukuluku ya arummwa, Yehova onnaathanla Akiristu oororomeleya wi epake makupa a mamwene yaala 144.000.

10. Ntakhara heeni eryaaya yaphaama Yehova omuthanla Yesu vamoha ni achu 144.000 wi yaalamuleleke achu?

¹⁰ Yehova onnanipwacha ophiyerya opaka marehereryo wi achu elamulele vamoha ni Yesu. Yesu onahaala okhala mulamuleli aphaama ntakhara onnasuwela makhalelo ahu. Owo oosuwela makacamiho a achu. Paulo aaloca wi Yesu onnanipwacha, owo onahaala “omoriwa ikharari wa nthowa na sotxetxheya sahu,” nthowa nawi “yowo ene òhereryiwa mwa sothene ntoko hiyo.” (Ahebri 4:15; 5:8) Nave a 144.000 tho aasuwela mukhalelo wa achu. Nave awo tho aheeteteya ni ohiphaameya vamoha ni masooso. Mwawiihiiha nnaphwanela  ororomela wi Yesu vamoha ni a 144.000 anahaala oniiwexexaka ohiya pahiru muupuwelo ahu, nyenya tho makacamiho nnakumanaahuno.

11. Ntakhara heeni Yesu aahaahusiha oomuchara awe ovekela wi yookhwela ya Muluku yeereyeke wirimu?

¹¹ Yesu aahaahusiha oomuchara awe ovekela wi yookhwela ya Muluku yeereye wirimu. Ntakhara heeni? Noohuserya Mmwaha 3 wi Satana Musaserya aammwareela Yehova. Amaanle omwaryeya, Yehova aheemererya wi Satana ni ankeelo oomwaryeya, naari masololo ekhale wirimu mu elukuluku vakhaani. Mwawiihiiha, tahi wi oothene wirimu yaaneera yookhwela ya Muluku. Mmwaha 10, nnahaala ohuserya vooloca sa Satana ni masololo awe.

12. Saweereya taani piili soochuneya iri mu Wupulula 12:10?

¹² Piipiliya onnaloca wi Yesu amanle okhala Mwene a Omwene wa Muluku, mwawaakuveya owo aawana ni Satana. (Mwaalakhanye Wupulula 12:7-10.) Eciciri 10 ennaloca saweereya piili soochuneya. Yoopacerya, Omwene wa Muluku onnapacerya olamulela ni Yesu Kiristu ntoko Mwene, yanaawiili, Satana onniikariwa wirimu oya veelapo yavathi. Ntoko nnahaalaahu woona, saweereya seiha sohaakhwanela.

13. Tiheeni yeeren’ye wirimu Satana amanle wiikariwawo?

¹³ Piipiliya onnathariha ohakalala ankeelo oororomeleya yaaraayano amanle Satana ni masololo awe wiikariwa wirimu. Piipiliya onii: “Tiva muhakalale nyuwo irimu ni nyuwano mmankemo!” (Wupulula 12:12) Vano wookhalawo murecele ni wiiwanana wirimu ntakhara oothene wirimu anneera yookhwela ya Muluku.

14. Tiheeni eneereya veelaponi yavathi nthowa na Satana wiikariwa wirimu?

 ¹⁴ Nyenya mukhalelo wa okumi veelaponi yavathi ti woohiyana. Achu annaphacuweliwa ichu sawoopiha “ntakhara musaserya okhuruwela” veelaponi ya vathi, nave owo ookhalano ‘owali otokwene vosuwela wi elukuluku awe ehanle vakhani.’ (Wupulula 12:12) Satana ori oosarasareya nthowa na wiikariwa wirimu ni osuwela wi onahaala otoloxiwa moohilekela. Owo onneera yoothene onaweryeiye wi atannye ipahu, masooso, ni makacamiho mmakupa oothene a elapo.

15. Yoochuna ya Muluku ntakhara elapo ya vathi tiivi?

¹⁵ Nyenya yoochuna ya Muluku ni elapo yavathi hetoroken’ye. Owo nlelo onachuna wi achu oophaameya ekhaleke mparataiso veelaponi yavathi okhala wookhala. (Salumu 37:29) Mano, Omwene wa Muluku onii owerye hai waakhwaniherya yeela?

16, 17. Tiheeni Daniyeli 2:44 onanleeleiye sa Omwene wa Muluku?

¹⁶ Yooloherya enaphwanyeya mu Daniyeli 2:44 enii: “Mahiku a mamwene awo Muluku a Wirimu onamoneiha Omwene wohiweryeyaru omwaryiwa nave havoru mwene oni akuse yowo. Nto omwene owo onammaliha omwene okina nave onamukhala mahiku othene.” Yooloherya ela enanihusiha eheeni vooloca sa Omwene wa Muluku?

¹⁷ Yoopacerya, yoorepa ennanleela wi Omwene waahaala opacerya olamulela mu “mahiku a mamwene awo.” Ela enataphulela wi Omwene waahaala opacerya olamulela veelaponi yavathi, nlelo orivovo olamulelo wa achu. Yanaawiili, eciciri ela ennanleela wi Omwene wa Muluku onahaala okhala wa elukuluku yoothene nave horwa oraceeliwa ni olamulelo okina. Yaneeraru, enahaala okhalavo ekhoco variyari va Omwene wa  Muluku ni olamulelo weelapo yavathi. Omwene wa Muluku onahaala ovootha ni okhala olamulelo omoharu veelaponi yoothene. Voocharela, achu enarwa ekhalano olamulelo waphaama yoowo anachunaaya.

18. Ekhoco ya Omwene wa Muluku ni olamulelo wa elapo eniichaniwa hai?

¹⁸ Omwene wa Muluku onii olamulele hai elapo yavathi? Ehaakumve ekhoco yookuchula eniichaniwa Armaketo, masololo anahaala waawopa “mamwene a elapo yothene wi yathukumanye, wi ewane ekhotxo ya nihiku ntokotoko na Muluku a ikuru sothene.” Aai, mamwene a elapo anahaala owana ni Omwene wa Muluku.—Wupulula 16:14, 16; moone Yooleeliherya 10.

19, 20. Ntakhara heeni ninnachuna wi Omwene wa Muluku olamulele elapo yavathi?

¹⁹ Ntakhara heeni nnachunaahu Omwene wa Muluku? Aakhalavo mathowa mararu. Noopacerya, na achu oocheka, ninniiceliwa ni okhwa. Nyenya Piipiliya onnaloca wi Omwene wa Muluku, onahaala wiikhalelaru. Yohani 3:16 onnaloca: “Muluku òtepa wakhwela atxhu a mwelaponi, ophiyerya onvaha Mwana awe mmoharu, wi mutxhu onamwemererya yowo, ahirimele, nto akhaleno ekumi yohimala.”

²⁰ Nthowa nanaawiili nnaneeriha ochuna Omwene wa Muluku ti nawi, nri oorukureryiwa ni achu oonanara. Ancipale annootha ni weera soonanara. Hannawerya omaliha ichu seiha, nyenya Muluku tonnawerya. Achu aneera soonanara anahaala otoloxiwa mu Armaketo. (Mwaalakhanye Salumu 37:10.) Nthowa naneeraru nnaneeriha ochuna Omwene wa Muluku tiwii alamuleli a elapo tootakhala, awuuma murima, naari oosiveliwa makhwankwa. Hanaaceenyerya achu wi emwiiweleleke Muluku. Piipiliya onnaloca wi “atxhu akina àkhalano  othokhwene, eniha akina ekhalaka òhosiwa.”—Eklesiyaste 8:9.

21. Ti mwawiihai Omwene onahaalaaya weeriha wi yookhwela ya Muluku yeereyeke veelaponi yavathi?

²¹ Amanle Armaketo, Omwene wa Muluku onahaala weeriha wi yookhwela ya Muluku yeereyeke veelaponi yavathi. Ntoko yootakiherya, onahaala omviihavo Satana ni masololo awe. (Wupulula 20:1-3) Mwawiihiiha, haavo muchu onii iceliweke naari okhwa. Nthowa na woopola, achu oothene oororomeleya anahaala okhalano ekumi yoohimala Mparataiso. (Wupulula 22:1-3) Omwene onamweeliha nsina na Muluku. Ela enataphulela eheeni? Enataphulela wi vaavaa Omwene wa Muluku oneeraaya olamuleleke elapo yavathi, achu oothene anahaala ocicimihaka nsina na Muluku, Yehova.—Moone Yooleeliherya 21.

22. Nnasuwela hai wi Yesu haakhanle Mwene vaavaa aareiye veelapo yavathi naari amanle oviihiwa mookhwani?

²² Yesu aahaahusiha oomuchara awe ovekela: “Omwene anyu orwe.” Ela yawooniherya wi olamulelo wa Muluku waahaala orwa omwaahiyu. Woopaceryani Yehova ootikitherya olamulelo awe nave ni Yesu ntoko Mwene.  Apwanne Yesu aakhanle Mwene arikimphiyaru wirimu? Hooye, owo aawehererya. Murummwa Pedro ni Paulo yaavaha onamoona yooloherya ya Salumu 110:1 yaaloca sa Yesu. Mu yooloherya yeela, Yehova onnaloca: “Okirathi omononi waka wolopwana, ophiyerya miyo wàkuha amwitxana-à vathi va inani sà.” (Saweriwa T’arummwa 2:32-35; Ahebri 10:12, 13) Ophiyerya liini Yesu aahaaleiye owehererya wi Yehova amvahe Omwene?

23. (a) Ti liini Yesu okhanleiye Mwene a Omwene wa Muluku? (b) Ti heeni nnahaalaahu ohuserya mmwaha onacharela?

²³ Mu iyaakha sincipale ehaakumve eyaakha ya 1914, nikhuuru na Akiristu oororomeleya yaaniiwexexa phaama wi eyaakha 1914 yaahaala okhala yoochuneya mu sooloherya sa Piipiliya. Saweereya seelapo ovinyerya 1914 saahooniherya wi Akiristu ale yaaloca eparipari. Mu eyaakha yeele Yesu aapacerya olamulela ntoko Mwene. (Salumu 110:2) Nave voocharela, Satana aavonyeryiwa veelaponi yavathi, vano “elukuluku awe ehanle vakhani.” (Wupulula 12:12) Mmwaha onacharela, nnahaala ohuserya saweereya inooniherya wi nnakhala mmahiku yaawo ookuchula. Nnahaala tho ohuserya wi Omwene wa Muluku onahaala weeriha wi yookhwela ya Muluku yeereyeke veelaponi yavathi.—Moone Yooleeliherya 22.