1. Kansi tikambilane pemphelo yotyani m’mutu uno?

ŴANTHU mamiliyoni anyinji oziŵa pemphelo yoziŵika ngako yuitiwa kuti Pemphelo ya Chisanzo olo kuti Pemphelo ya Ambuye. Yesu pechichita pemphelo yamene iyi, yove enzephunzisa ophunzila ŵake mwangapemphelele. Kansi yove esenga chinji m’pemphelo yamene iyi? Ndipo ndaŵa yanji pemphelo yamene iyi niyofunika kuli sewo masiku ŵano?

2. Kansi nivinthu vitatu votyani vechitiphunzisa Yesu kuti tikosenga?

² Yesu enena kuti: “Koma mwewo mukopemphela teti: ‘Atata ŵasu muli kululu, zina yanu ituŵishiwe [olo, kuti inkhale ituŵa]. Ufumu wanu uwele. Kufuna kwanu kuchitike, monga nikululu, chimozi-mozisoti na pano pansi.’” (Ŵelengani Mateyu 6:9-13.) Ndaŵa yanji Yesu etiphunzisa kusenga vinthu vitatu vamene ivi?—Onani Mawu Akumapeto 20.

3. Kansi tufunika kuziŵa chinji ponena za Ufumu wa Mulungu?

³ Tiphunzila kale kuti zina ya Mulungu ni Yehova. Ndipo tiphunzila kale vakufuna Mulungu kuli sewo taŵanthu komasoti kuli chalo. Kansi Yesu enzefuna kutanthauza chinji pechitiphunzisa kusenga kuti: “Ufumu wanu uwele”? Tiphunzile kuti Ufumu wa Mulungu n’chinji, vaukuti uzachite, komasoti mwaukuti uzatuŵishile zina ya Mulungu.

4. Kansi Ufumu wa Mulungu n’chinji, ndipo Mfumu yake niŵani?

⁴ Ufumu wa Mulungu ni boma yechinkhazikisha kululu, ndipo esankha Yesu kunkhala Mfumu. Baibolo yutomola boma yamene iyi kuti Ufumu wa Mulungu. Yesu  ni “Mfumu yutonga ya ŵala otonga monga mafumu komasoti ni Mbuye kuli ŵala otonga monga ambuye.” (1 Timoteyo 6:15) Yesu angachite vinthu vinyinji viweme kupambana aliyense wotonga waumunthu, yove ali na mphamvu kupambana maboma onse aumunthu.

5. Kansi boma ya Mulungu ikotonga ilikuni? Ndipo izatonge chinji?

⁵ Pepapita masiku 40 kufumila pechiushiwa, Yesu ejokela kululu. Pavuli pake, Yehova emusankha kuti ankhale Mfumu ya Ufumu wake. (Machitidwe 2:33) Boma ya Mulungu ili kululu, ndipo izatongesoti pano pachalo. (Chivumbulutso 11:15) N’chifukwa chake Baibolo yunena kuti Ufumu wa Mulungu ni “Ufumu wakululu.”—2 Timoteyo 4:18.

6, 7. Ndaŵa yanji tinganene kuti Yesu ni Mfumu iweme ngako kupambana mafumu onse?

⁶ Baibolo yunena kuti Yesu ninkulu ngako kupambana mfumu iliyonse yaumunthu, chifukwa ni yove “yeka wamene ali na moyo wakuti angafwelini.” (1 Timoteyo 6:16) Otonga onse aumunthu akufwa, koma Yesu azafwelini. Ndipo, vinthu viweme vonse vati azachite poyavya ŵanthu vizankhalepo mpaka kale-kale.

⁷ Ulosi wa m’Baibolo unena kuti Yesu azankhale Mfumu yachilungamo komasoti yachifundo ndipo unena kuti: “Mzimu wa Yehova uzankhazikike pali yove, mzimu wanzelu, womvwisha vinthu, wolangiza, wamphamvu, woziŵa vinthu na woyopa Yehova. Yove azakondwele noyopa Yehova. Azaweluzelini potolela vawaona na menso ŵake, kapena kuzuzula potolela vawamvwa na matu ŵake. Azaweluze mwachilungamo ŵanthu osauka [olo, owoneka onyozeka] ndipo azaweluze ŵanthu mwachilungamo.” (Yesaya 11:2-4) Kansi mungakondelini kunkhala na Mfumu iweme teti?

8. Kansi tuziŵa tyani kuti Yesu azatongelini yeka?

⁸ Mulungu esankha ŵanthu ayakine kuti akatonge na  Yesu mu boma ya kululu. Mwachisanzo, ntumwi Paulo euja Timoteyo kuti: “Tikapitilija kupilila, tizatonge naye yove monga mafumu.” (2 Timoteyo 2:12) Kansi niŵanthu angani akuti azatonge pamozi na Yesu monga mafumu?

9. Kansi ni ŵanthu angani akuti azatonge pamozi na Yesu? Lomba Mulungu eyamba nthawe yanji kusankha ŵanthu amene aŵa?

⁹ Monga mwetiphunzilila m’Mutu 7, ntumwi Yohane ewona mensomphenya owonesha Yesu otonga monga Mfumu kululu pamozi na mafumu ayakine okwanila 144.000. Kansi ŵanthu amene aŵa a 144.000 niŵani? Yohane efotokoza kuti ŵanthu amene aŵa elembewa “zina [ya Yesu] na zina ya Atata ŵake pamphumi pawo.” Enenasoti kuti: “Amene aŵa niye okonkhelela Mwana wa mbelele [wamene ni Yesu] kulikonse kwakuya. Amene awo eguliwa kufumila pakati pa ŵanthu.” (Ŵelengani Chivumbulutso 14:1, 4.) Ŵanthu amene aŵa a 144.000 ni Akhilisitu okhulupilika ŵechisankha Mulungu kuti ankhale “mafumu kuti azatonge chino chalo” pamozi na Yesu. Ŵanthu amene aŵa akamwalila, oushiwa noluta kululu. (Chivumbulutso 5:10) Kufumila m’nthawe ya atumwi, Yehova wankhala osankha Akhilisitu okhulupilika kuti azankhale mu gulu ya mafumu a 144.000.

10. Ndaŵa yanji tinganene kuti Yehova ewonesha chikondi posankha Yesu na a 144.000 kuti azatonge ŵanthu?

¹⁰ Yehova otiganizila ngako, n’chifukwa chake esankha ŵanthu ayakine kuti azatonge pamozi na Yesu. Yesu azankhale wotonga muweme chifukwa yove otimvwisha luweme. Yove enkhalapo kale munthu ndipo mavuto oŵaziŵa luweme. Paulo enena kuti Yesu “otimvwila chisoni pa vofoka vasu” ndipo “eyesewa m’njila zosiyana-siyana.” (Aheberi 4:15; 5:8) A 144.000 nawo oziŵa mwatumvwila. Ove evutikapo na matenda komasoti na mavuto owela chifukwa cha uchimo. Tetyo tingakaikilelini kuti Yesu pamozi na ayake a 144.000 azatiyavye ngako chifukwa oŵaziŵa mavuto ŵatukumana nawo.

11. Ndaŵa yanji Yesu ephunzisa ophunzila ŵake kuti akosenga kuti chifunilo cha Mulungu chichitike kululu?

¹¹ Yesu ephunzisa ophunzila ŵake kuti akosenga kuti chifunilo cha Mulungu chichitike kululu. Ndaŵa yanji? Ndaŵa yakuti Satana Mdyelekezi epandukila utongi wa Yehova. M’Mutu 3 tiphunzila kuti Satana pechiyamba kupandukila utongi wa Mulungu, Yehova elola kuti yove pamozi na viŵanda vake ankhale kululu kwa ka nthawe katontho. Koma pa nthawe yamene iyo ni onselini kululu enzechita chifunilo cha Mulungu. M’Mutu 10, tizaphunzile vinthu vinyinji vokhuza Satana na viŵanda vake.

12. Kansi ni vinthu viŵili votyani vofunika ngako vayufotokoza lemba ya Chivumbulutso 12:10?

¹² Baibolo yunena kuti Yesu akazaikiwa kunkhala Mfumu ya Ufumu wa Mulungu, azamenye nkhondo yolimbana na Satana. (Ŵelengani Chivumbulutso 12:7-10.) Vesi 10 yufotokoza vinthu viŵili vofunika ngako. Yufotokoza za kuyamba kutonga kwa Yesu Khilisitu monga Mfumu komasoti kuchosewa kwa Satana kululu noponyewa pano pansi. Monga mwetiphunzilila, vinthu vamene ivi vichitika kale.

13. Kansi chichitika n’chinji Satana pechichosewa kululu?

¹³ Baibolo yufotokoza mwamene angelo okhulupilika mwechikondwelela Satana na viŵanda vake pechichosewa kululu. Tuŵelenga kuti: “Kondwelani kululu mwewo na mwewo munkhala kwamene uko!” (Chivumbulutso 12:12) Pali pano kululu kuli ntendele na mgwilizano chifukwa aliyense kululu kwamene uko ochita vakufuna Mulungu.

14. Kansi n’chinji chichitika Satana pechiponyewa pano pachalo?

¹⁴ Koma moyo pano pachalo ni wosiyana ngako. Ŵanthu okumana na mavuto anyinji “chifukwa chakuti  Mdyelekezi waselukila” pano pachalo, ndipo yove “niwokalipa ngako chifukwa oziŵa kuti wasala na kanthawe katontho.” (Chivumbulutso 12:12) Satana niwokalipa ngako. Chifukwa epitikishiwa kululu ndipo oziŵa kuti lombapano awonongewe. Yove oyeja-yeja kuyambisha mavuto osiyana-siyana pachalo chonse.

15. Kansi Mulungu alinacho na cholinga chotyani chino chalo?

¹⁵ Koma Mulungu aliye chinje cholinga chake chenze nacho polenga chino chalo. Yove akalifuna kuti chalo chinkhale chiweme ngako komasoti kuti ŵanthu ankhale na moyo wosasila m’paladaiso pano pachalo. (Salimo 37:29) Kansi Ufumu wa Mulungu uzachite chinji kuti vamene ivi vizakwanishike?

16, 17. Kansi lemba ya Danieli 2:44 yutiuja chinji za Ufumu wa Mulungu?

¹⁶ Ulosi wa pa Danieli 2:44 unena kuti: “M’masiku a mafumu amene awo, Mulungu wakululu azankhazikishe ufumu wamene uzawonongewelini mpaka kale-kale. Ndipo ufumu wamane uyo uzapelekewelini kwa ntundu uliwonse wa ŵanthu. Koma uzafwaye nosilijilatu maufumu onse, ndipo uzankhalepo mpaka kale-kale.” Kansi ulosi wamene uyu utiphunzisa chinji ponena za Ufumu wa Mulungu?

¹⁷ Choyamba, utiuja kuti Ufumu wa Mulungu uzayambe kutonga “m’masiku a mafumu amene awo.” Ivi vutanthauza kuti maufumu ayakine amene ali pano pachalo azankhale akalipo pa nthawe yaukuti uzayambe kutonga Ufumu wa Mulungu. Chachiŵili, utiuja kuti Ufumu wa Mulungu uzankhalepo mpaka kale-kale ndipo uzaloŵewelini m’malo na boma iyakine. Chachitatu, utiuja kuti pazankhale nkhondo pakati pa Ufumu wa Mulungu na maufumu apano pachalo. Ufumu wa Mulungu uzapambane pa nkhondo yamene iyi ndipo niye ukuti uzatonge pachalo chonse. Pa nthawe yamene iyo ŵanthu azatongewe na boma iweme ngako kupambana maboma onse.

18. Kansi nkhondo yosilijila ya pakati pa Ufumu wa Mulungu na otonga achino chalo ina zina yakuti tyani?

 ¹⁸ Kansi Ufumu wa Mulungu uzayambe tyani kutonga pachalo chonse? Nkhondo yosilijila ikaliye yamba, yamene yuitiwa kuti nkhondo ya Aramagedo, viŵanda vizayambe kuluŵilisha “mafumu onse apachalo kwamene kuli ŵanthu, kuti aŵasonkhanishile pamozi kunkhondo ya nsiku ikulu ya Mulungu Wamphamvuzonse.” Vamene ivi vuwonesha kuti otonga a pano pachalo azaniyatane na Ufumu wa Mulungu.—Chivumbulutso 16:14, 16; onani Mawu Akumapeto 10.

19, 20. Ndaŵa yanji Ufumu wa Mulungu ufunikila kutonga pachalo chonse?

¹⁹ Kansi ndaŵa yanji tufunikila Ufumu wa Mulungu? Pali vifukwa vitatu. Choyamba, nise ochimwa n’chifukwa chake tulwala na kufwa. Koma Baibolo yunena kuti Ufumu wa Mulungu ukazayamba kutonga, ŵanthu azankhale na moyo mpaka kale-kale. Lemba ya Yohane 3:16 yunena kuti: “Pakuti Mulungu ekonda ngako chalo mwakuti etwala Mwana wake wovyalika yeka, kuti aliyense akuti akhulupilile yove osati awonongeke, koma ankhale na moyo wosasila.”

²⁰ Chifukwa chachiŵili n’chakuti muno m’chalo muli ŵanthu anyinji aipa. Amene otalawenye, ochita vaukhuluku komasoti vachiwelewele. Paliye vatingachite kuti tichose ŵanthu amene aŵa, koma Mulungu azaŵachose. Ŵanthu ochita viipa azawonongewe pa nthawe ya Aramagedo. (Ŵelengani Salimo 37:10.) Chifukwa chachitatu n’chakuti otonga amasiku ŵano aliye mphamvu, ni ŵankhanza, komasoti ni makhuluku. Otonga amene aŵa ofunalini kuyavya ŵanthu kuti akomvwila Mulungu. Baibolo yunena kuti “munthu otamanisha munthu muyake pomutonga.”—Mlaliki 8:9.

21. Kansi Ufumu wa Mulungu uzachitishe tyani kuti chifunilo cha Mulungu chichitike pano pachalo?

 ²¹ Pavuli pa nkhondo ya Aramagedo, Ufumu wa Mulungu uzachitishe kuti vakufuna Mulungu vikochitika pachalo chonse. Mwachisanzo, uzachose Satana na viŵanda vake. (Chivumbulutso 20:1-3) M’kupita kwa nthawe, ŵanthu akolwalalinisoti olo kumwalila. Nsembe ya Yesu izayavye kuti ŵanthu okhulupilika ankhale na mwayi wonkhala m’Paladaiso mpaka kale-kale. (Chivumbulutso 22:1-3) Ufumu wamene uyu uzatuŵishe zina ya Mulungu. Kansi vamene ivi vutanthauza chinji? Vutanthauza kuti boma ya Mulungu ikazayamba kutonga pano pachalo, ŵanthu onse azayambe kulemekeza zina ya Mulungu.—Onani Mawu Akumapeto 21.

22. Kansi tuziŵa tyani kuti Yesu aliyeyambe kutonga pa nthawe yamene yenze pano pachalo olo pechingoushiwa?

²² Yesu euja ophunzila ŵake kuti akopemphela kuti: “Ufumu wanu uwele.” Vamene ivi vuwonesha kuti pa nthawe yenzelaŵila mawu amene aŵa Yesu, Ufumu wa Mulungu wenze ukaliyewela. Poyamba Yehova enkhazikisha Ufumu wake komasoti kuika Yesu kuti ankhale Mfumu. Kansi Yesu pechijokela kululu echiyankhalilatu Mfumu? Yayi, eyamba walindilila. Papita nthawe kufumila  pechiushiwa Yesu, Petulo na Paulo enena kuti ulosi wamene uli pa Salimo 110:1 wenzenena za Yesu ndipo vechifotokoza ove vuwonesha kuti Yesu enzefunika kulindilila poyamba. Mu ulosi wamene uyu Yehova enena kuti: “Nkhala kumbali yangu kukwanja ngayo mpaka nizaike adani ŵako monga chokandapo mapazi ŵako.” (Machitidwe 2:32-35; Aheberi 10:12, 13) Kansi Yesu enzefunika kulindilila kwa nthawe itali tyani kuti Yehova amupase Ufumu wamene uyu?

23. (a) Kansi Yesu eyamba nthawe yanji kutonga monga Mfumu ya Ufumu wa Mulungu? (b) Kansi tizaphunzile chinji m’mutu wokonkhapo?

²³ Kukali vyaka vinyinji kuti chaka cha 1914 chifwike, gulu ya Akhilisitu okhulupilika yenzeziŵa kuti maulosi ofunika ngako a m’Baibolo azakwanilishiwe m’chaka chamene ichi. Vinthu vuchitika pano pachalo kufumila mu 1914 vuwonesha kuti enzenena vachendi. Chifukwa m’chaka chamene ichi Yesu eyamba kutonga monga Mfumu. (Salimo 110:2) Papita nthawe itontho, Satana eponyewa pano pachalo ndipo palipano “wasala na kanthawe katontho.” (Chivumbulutso 12:12) M’mutu wokonkhapo tizaone vinthu vinyinji vamene vutisimikijila kuti Satana wasala patontho kuwonongewa. Komasoti tizaphunzile kuti lombapano Ufumu wa Mulungu uzaonesheshe kuti venzefuna Mulungu vuchitika pano pachalo.—Onani Mawu Akumapeto 22.