1. Ko ni pemphero iponi yomwe tiyibvesese mumsolo uno?

WANTHU azinji achayidziwa pemphero yodziwika kuti Pemphero ya Ababa Wathu, panango kuti Pemphero ya Ambuya. Yesu adachita pemphero mweyi kuti apfunzise opfunzira wake momwe angambapempherere. Ko iye adakumbira chani mu pemphero mweyi? Ndawa chani nivakudikana kuyibvesesa pemphero mweyi?

2. Ko ni vinthu vitatu viponi vomwe Yesu adatipfunzisa kuti timbavikumbire?

² Yesu adalewa kuti: ‘Mumbapemphere tene: ‘Ababa wathu wakudzulu, dzina yanu ichenesewe. Ufumu wanu ubwere. Kuda kwanu kuchitike ninga kudzulu, chibodzi-bodzimbo pasi pano.’’ (Lewengani Mateyu 6:9-13.) Ndawa chani Yesu adatipfunzisa kumbakumbira vinthu vimwevi?​—Wonani mawu yakumapeto 20.

3. Ko tichadekana kudziwa chani va Ufumu wa Mulungu?

³ Tidawona kale kuti dzina ya Mulungu ni Yahova. Tidapfunzira soti cholinga cha Yahova kwa wanthu na dziko yapasi. Koma ko nichani changada kunena Yesu padatipfunzisa kuti timbakumbire kuti ‘Ufumu wanu ubwere’? Tipfunzire kuti Ufumu wa Mulungu ni chani, vati udzachite na momwe udzachenesere dzina ya Mulungu.

4. Ko Ufumu wa Mulungu nchani, ndipo Mpfumu yake ni mbani?

⁴ Ufumu wa Mulungu ni boma yomwe ili kudzulu. Mulungu adasalula Yesu kuti akhale Mpfumu ya  Ufumu moyu. Yesu ni wotonga wabwino kuposha ntongi aliyese. Iye anamphanvu zizinji kuposha mafumu yose yapadziko yapasi. Ndipomwapa Baibolo ichanena kuti Yesu ni ‘Mpfumu ya wotonga ninge mafumu na Mbuya wa wotonga ninge ambuya.’​—1 Timoteyo 6:15.

5. Ko Ufumu wa Mulungu umbadzatonge dziko yapasi uli kuponi, ndipo umbadzatonge mbani?

⁵ Pazidapita ntsiku 40 kuchokera pomwe Yesu adamukisiwa, iye adabwerera kudzulu. Patsogolo pake, Yahova adamuyikha ninge Mpfumu ya Ufumu wake. (Machitidwe 2:33) Boma ya Mulungu ili kudzulu koma idzatonge dziko yapasi. (Chivumbulutso 11:15) Ndipomwapa Baibolo ichati Ufumu wa Mulungu ni ‘Boma yakudzulu.’​—2 Timoteyo 4:18.

6, 7. Ndawa chani Yesu ni Mpfumu yabwino kuposha mafumu yose ya dziko?

⁶ Yesu ni Mpfumu yabwino kuposha mpfumu iliyose. Ndawa chani? Chakuyamba, iye adzafelini. Koma wotonga wa ntsiku zino ni wochimwa ndipo achafa. Baibolo ichanena kuti Yesu ‘ndiye yekha yemwe anathupi yomwe ingafelini.’ (1 Timoteyo 6:16) Vabwino vose vati adzatichitire vidzaperelini.

⁷ Chachiwiri, Yesu adzakhale Mpfumu yabwino na yachilungamo. Ulosi unango wa m’Baibolo uchati: ‘Mzimu wa Yahova udzakhazikike pa iye, womwe ni mzimu wanzeru, wobvesa vinthu, wolangiza, wamphanvu, wakudziwa na wakugopa Yahova. Iye adzabvere Yahova. Yesu adzaweruzelini mwakuyendera mawonekedwe ya munthu ndipo adzatsuwulelini pakundotengera vawabva. Wanthu wonyozeka [panango kuti wosauka] ambadzatonge mwachilungamo.’ (Yesaya 11:2-4) Ko muchada kudzakhala na mpfumu ninga mweyi?

8. Ko tinkudziwa tani kuti Yesu adzatongelini yekha?

⁸ Mulungu adasalula wanthu anango kuti ambakatonge pabodzi na Yesu kudzulu. Mwakulinganiza, mtumi  Paulo adawuza Timoteyo kuti: ‘Tikapitiriza kupirira, tikatongembo naye pabodzi.’ (2 Timoteyo 2:12) Tsono ni wanthu angasi omwe adzatonge pabodzi na Yesu?

9. Ko ni angasi omwe adzatonge pabodzi na Yesu? Ko nilini pomwe Mulungu adayamba kusalula?

⁹ Mu msolo 7 tidapfunzira kuti mtumi Yohane adawona masomphenya yowonesa Yesu ankutonga pabodzi na wa 144.000. Ko wa 144.000 mwawa ni mbani? Yohane adati iwo ni wonembewa ‘dzina [ya Yesu] na ya Ababa pankuma pawo.’ Adalewa pomwe kuti: ‘Mwawa ndiwo ankutewera mwana wa nkhosa [panango kuti Yesu] kulikose kwangayende. Iwo adaguliwa kuchokera pakati pa wanthu.’ (Lewengani Chivumbulutso 14:1, 4.) Amwawa ni Akhrisitu wokhulupirika womwe Mulungu adawasalula ‘kuti adzatonge padziko yapasi’ pabodzi na Yesu. Iwo akafa, achamukisiwa nkuyenda kudzulu. (Chivumbulutso 5:10) Yesu adayamba kusalula wanthu mwawa wa 144.000 mu nthawe ya atumi.

10. Ndawa chani tingalewe kuti Mulungu adawonesa chikondi pokonza vakuti Yesu na wa 144.000 adzatonge wanthu?

¹⁰ Pomwe Yahova adasalula Yesu na wa 144.000, iye adawonesa kuti achatikonda maninge ndipo achatifunira vabwino. Yesu adzakhale Mpfumu yabwino ndawa kubonera achakudziwa. Paulo adati Yesu achatidziwa bwino ndipo iye ‘achatibvera ntsisi pa vofoka vathu,’ ndawa iye ‘adayesewa mu mbali iliyose ninge isepano.’ (Aheberi 4:15; 5:8) Wa 144.000 achadziwambo momwe ise tichabvera. Iwo adagwebanambo na uchimo  na matenda. Tingakhale na chitsimikizo chakuti Yesu na wa 144.000 adzatibvese momwe tichabvera.

11. Ko ndawa chani Yesu adapfunzisa opfunzira wake kupemphera kuti vomwe Mulungu achada vichitike kudzulu?

¹¹ Yesu adapfunzisa wopfunzira wake kupemphera kuti vomwe Mulungu achada vichitike kudzulu. Ndawa? Ndawa yakuti ni woselini kudzulu omwe angachita vomwe Mulungu achada. Msolo 3 udafotokoza kuti Satana Ndyerekezi, adapandukira Yahova. Angelo anango adamutewedzera nkupandukambo. Ndipo iwo ni viwanda. Yahova adasiya Satana na viwanda vake kuti apitirize kukhala kudzulu kwa kanthawe kadiki-diki. Tidzapfunzire vizinji va Satana na viwanda mu msolo 10.

12. Ko ni vinthu viwiri viponi vakudikana vomwe valewewa pa Chivumbulutso 12:10?

¹² Ko Satana na viwanda vake adakakhala kwa nthawe itali tani kudzulu? Baibolo ichawonesa kuti adakakhala kumuko mpakana Yesu adzakhale Mpfumu. Pomwe vidachitika, Yesu adachita nkhondo yomenyana na Satana. (Lewengani Chivumbulutso 12:7-10.) Vesi 10 ikufotokoza kuti padachitika vinthu viwiri vakudikana. Chakuyamba, Yesu adakhala Mpfumu ndipo adayamba kutonga. Chachiwiri, Satana adathamangisiwa kudzulu nkubwera padziko yapasi.

13. Ko angelo wakukhulupirika adabva tani pomwe Satana na viwanda vake adathamingisiwa?

¹³ Baibolo ichanena kuti angelo wokhulupirika adakondwa maninge pomwe Satana na viwanda vake adathamangisiwa kudzulu. Chivumbulutso 12:12 ichati: ‘Kondwani imwepo kudzulu na mose muchakhala kumuko!’ Manjewuno kudzulu kunantendere na m’bverano ndawa aliyese ankuchita vomwe Mulungu achada.

14. Ko vinthu vidakhala tani pomwe Satana adathamingisiwa kudzulu?

 ¹⁴ Koma vinthu padziko yapasi pano nivosiyana maninge na kudzulu. Vinthu vakuyipa vinkuchitika ‘ndawa Satana Ndyerekezi adabwera’ ndipo anawukali maninge. Iye adathamingisiwa kudzulu ndipo ‘ankudziwa kuti kamusalila kanthawe kadi-diki’ kuti achenekewe. (Chivumbulutso 12:12) Ndipomwapa, iye ankubweresa mabvuto padziko yose.

15. Ko Mulungu achada chani kwa wanthu na dziko yapasi?

¹⁵ Koma Mulungu achada kuti dziko yose ikhale paradaiso nakuti wanthu akhale waungwiro na kukhala na moyo wosapera. (Salimo 37:29) Ko Ufumu wa Mulungu udzachitetani kuti vimwevi vikwanisike?

16, 17. Ko ulosi wa pa Danieli 2:44 uchatipfunzisa chani va Ufumu wa Mulungu?

¹⁶ Danieli 2:44 achati: ‘Mu nthawe ya mafumu mwayo, Yahova Mulungu wakudzulu, adzayikhe Ufumu wake womwe udzadzongewelini. Ndipo udzaperekewelini m’manja mwa wanthu kuti atonge. Koma udzaphwanye na kumalisa mawufumu yose, ndipo ufumu moyu udzakhale mpaka kalekale.’ Ko ulosi moyu uchatipfunzisa chani va Ufumu wa Mulungu?

¹⁷ Chakuyamba, padzakhale maboma yanango Ufumu moyu ukadzayamba kutonga. Tinkudziwa vimwevi ndawa yakuti ulosi moyu uchati Ufumu wa Mulungu udzayambe kutonga ‘mu ntsiku za mafumu mwayo.’ Chachiwiri, Ufumu wa Mulungu udzakhalepo mpakana kale-kale, ndipo udzachinjiwelini  na boma inango. Chachitatu, Ufumu wa Mulungu udzacheneke maboma yose ndipo udzatonge dziko yose. Ufumu wa Mulungu ni boma yabwino yomwe wanthu angakhale nayo.

18. Ko nkhondo yomalizira ya pakati pa Mulungu na wotonga dziko yapasi ichachemerewa chani?

¹⁸ Ko Ufumu moyu udzacheneke tani maboma yose? Maboma yadzafune kumenyana na Ufumu wa Mulungu. Iwo ‘adzapumpsiwe na viwanda ndipo vidzawawunganizire ku nkhondo pa ntsiku ikulu ya Mulungu wa mphanvuzose.’ Nkhondo mweyi ichachemerewa Arumagedo. Koma wolamulira wa dziko adzawinelini.​—Chivumbulutso 16:14, 16; wonani mawu yakumapeto 10.

19, 20. Ko tichadekana Ufumu wa Mulungu pa vifukwa vitatu viponi?

¹⁹ Ndawa chani tichadekana kutongewa na Ufumu wa Mulungu? Chakuyamba, ndawa ndise wochimwa, tichadwala na kufa. Mu Ufumu wa Mulungu tidzakhale na moyo wosapera. Pa Yohane 3:16 pachati: ‘Pakuti Mulungu adakonda maninge dziko mpakana adapereka Mwana wake wakubadwa yekha, kuti aliyese angamukhulupirire, aleke kudzachenekewa koma adzagumane moyo wosapera.’

²⁰ Chachiwiri, pali wanthu azinji wakuyipa, iwo achanama, ni wosakhulupirika na wachigololo. Ise tingakwaniselini kuvimalisa, koma Mulungu wapolomisa kudzawacheneka. Wanthu womwe achinjelini adzachenekewe pa Arumagedo. (Lewengani Salimo 37:10.) Chachitatu, maboma ya wanthu yachachitalini vachilungamo. Iyo yankuthandizalini wanthu kuti ambabvere Mulungu. Ndipomwapa Baibolo ichati  ‘Munthu achapweteka muyake pakumutonga.’​—Mlaliki 8:9.

21. Nchani chomwe Ufumu wa Mulungu udzachite padziko yapasi?

²¹ Manje, ko Ufumu wa Mulungu udzachite chani? Udzachitise kuti kuda kwa Mulungu kuchitike padziko yapasi. Mwakulinganiza, pankhondo ya Arumagedo, Satana na viwanda vake adzamangiwe. (Chivumbulutso 20:1-3) Ndawa ya dipo, wanthu wobvera adzatambire moyo wosapera. Dziko yose idzakhale paradaiso. (Chivumbulutso 22:1-3) Ufumu udzachenese dzina ya Mulungu. Kuthandauza kuti Ufumu moyu ukadzayamba kutonga, wanthu adzalemekeze na kutamanda Mulungu.​—Wonani mawu yakumapeto 21.

22. Ko tinkudziwa tani kuti Yesu alibe kukhaliratu Mpfumu pewenze padziko yapasi olo padandofika kudzulu?

²² Yesu adapfunzisa opfunzira wake kupemphera kuti: ‘Ufumu wanu ubwere.’ Vimwevi vinkuwoneseratu kuti panthawe yadalewa mawu mwaya,  Ufumu moyu wenze ukalibe kubwera. Tsono Yesu adakhaliratu Mpfumu padandobwerera kudzulu? Neye. Tinkudziwa tani vimwevi? Nthawe pang’ono kuchokera pomwe Yesu adabwerera kudzulu, mtumi Petulo na Paulo adafotokoza kuti lemba ya Salimo 110:1 ingakwanirisika kwa Yesu. Pa lemba mweyi Yahova adawuza Yesu kuti: ‘Khala kudjanja yangu yamakulu mpakana niyikhe adani wangu pasi pa mapazi yako.’ Vimwevi vinkuwonesa kuti Yesu angadikana kudikhirira podi kuti wenze kale kudzulu. (Machitidwe 2:32-35; Aheberi 10:12, 13) Tsono nilini pomwe Yesu adakhala Mpfumu?

23. (a) Ko nili pomwe Yesu adakhala Mpfumu? (b) Ko tidzapfunzire chani mu msolo 9?

²³ Yesu adakhala Mpfumu mu 1914. (Salimo 110:2) Magole yazinji kumbuyo, kagulu ka Akhrisitu kangadziwa mawulosi yakudikana yomwe yadadzakwanirisika mu 1914. Vomwe vakhala vinkuchitika kuchokera mu 1914 vinkuwonesa kuti Akhrisitu mwawa angalewa chaivo. Yesu padandokhala Mpfumu adagwesera Satana padziko yapasi. Manjewuno Satana ankudziwa kuti ‘wandosala na kanthawe kadiki-diki.’ (Chivumbulutso 12:12) Mu msolo 9 tidzawone vinthu vowonesa kuti tili kumapeto. Tidzawone pomwe kuti manje-manje Ufumu wa Mulungu udzatonge dziko ndipo vomwe Mulungu achada vidzachitike.​—Wonani mawu yakumapeto 22.