1. ¿Imatataj Jesús yachachisqasninman yachachisqa?

¹ JESUSQA kay jallpʼapi kashaspa, yachachisqasninman yachacherqa imaynatachus Diosmanta mañakunankuta. Chay mañakuytataj ashkha runasqa Padrenuestro ninku.

2. ¿Imasta mañakunatataj Jesús yachachisqa?

² Jesusqa kay jinata mañakunata nerqa: “Cielopi kashaj Tatayku, sutiyki jatunchasqa kachun. Gobiernoyki jamuchun. Munayniykitaj ruwasqa kachun, imaynachus cielopi, ajinallatataj kay jallpʼa patapipis”, nispa (Mateo 6:9-13 leey. Imaraykuchus Jesús ajinata mañakunata yachachisqanta yachanaykipajqa, “Padrenuestro”, nisqata leeriy).

3. ¿Imastataj yachakusunchej Diospa Gobiernonmanta?

³ Yachakunchejña Diospa sutenqa Jehová kasqanta. Yachakullanchejtaj Diosninchejqa wiñaypaj kausakunanchejta munasqanta, jallpʼanchejtapis paraisoman tukuchinanta. Kunantaj yachakusunchej Diospa gobiernonmanta. Yachakullasuntaj imatachus chay Gobierno ruwananta, imaynatachus Diospa sutinta llimphuchanantapis.

4. ¿Pitataj Dios churasqa gobernananpaj?

⁴ Jehová  Diosqa cielopi uj gobiernota sayaricherqa.  Presidente jina gobernananpajtaj Jesusta churarqa. Jesusqa “rey jina kamachejkunaj Reynin, señorkunaj Señornintaj” (1 Timoteo 6:15). Jesusqa ni mayqen presidente jina, may chhika  sumaj  imasta  ruwayta atin, aswan atiyniyojtaj.

5. ¿Maymantapachataj Jesús kay jallpʼata gobernamonqa?

⁵ Jesusqa Dios kausarichisqantawan, 40 diastawanraj kay jallpʼapi karqa, chantá cieloman kutiporqa. Tiemponmantaj  Jehová Diosqa  Jesusta churarqa gobernananpaj (Hechos 2:33). Jesusqa cielomantapacha kay jallpʼata gobernamonqa (Apocalipsis 11:15). Chayrayku Bibliaqa chay Gobiernota ‘cielopi kaj Gobierno’ nispa sutichan (2 Timoteo 4:18).

6, 7. ¿Imaraykutaj nisunman Jesuslla allin gobierno kasqanta?

⁶ Bibliaqa willawanchej, Jesuslla mayqen gobiernomantapis aswan patapi kasqanta. “Paylla mana jaykʼaj wañoj” (1 Timoteo 6:16). Tukuy gobiernosqa wañoj runaslla kanku, Jesustajrí ni jaykʼaj wañonqachu. Allin imasta ruwasqanpis wiñaypaj kanqa.

⁷ Bibliaqa unaymantaña willarqa, Jesusqa cheqan kajtapuni ruwananta, khuyakuyniyojtaj kananta. Biblia nisqanman jina, Diosqa Jesusman atiyta qonqa. Chay atiytaj Jesusman “qonqa yachayta, yuyayta, yuyaychayta, atiyta, tukuy imata rejsiyta, Tata Diosta manchachikuyta ima. Payqa Tata Diosta manchachikuypi miskʼirichikonqa. Payqa mana rikusqanman jinallachu juzganqa,  nitaj uyarisqanman jinallachu justiciata ruwanqa. Manachayqa, cheqan kayman jina wajchasta juzganqa” (Isaías 11:2-4). Maytapuni munasunman ajina Gobiernotaqa.

8. ¿Jesusqa sapallanchu gobernamonqa?

⁸ Diosqa wakin runasta ajllarqa Jesuswan khuska gobernamunankupaj. Chayrayku apóstol Pabloqa Timoteoman nerqa: “Sichus sinchʼita sayasun chayqa, paywan khuskallataj reyes jina kamachisun”, nispa (2 Timoteo 2:12). Qhepan parrafopi yachakusunchej mashkhachus  Jesuswan khuska gobernanankuta.

9. 1) ¿Mashkhataj Jesuswan khuska gobernamonqanku kasqa? 2) ¿Maykʼajmantapachataj Diosninchej paykunata ajllayta qallarisqa?

⁹ Qanchis capitulopi yachakorqanchej, apóstol Juanqa uj mosqoypi jina Jesusta rikusqanta. Juan rikusqanman jina, Jesusqa cielopi rey jina kasharqa, paywantaj 144.000 reyes kasharqanku. Juanqa chay 144.000 reyesmanta nerqa: ‘Paykunaj frentesninkupeqa qhelqasqa  kashan  Jesuspa  sutin, Tatanpa sutinpis’. “Corderoj qhepantataj rishanku mayllamanpis rejtin. Paykunaqa runas ukhumanta rantisqa karqanku”, nispa (Apocalipsis 14:1, 4 leey). Chay 144.000 reyesqa, Diosta kasukoj cristianos kanku. Paykunataqa Dios ajllarqa Jesuswan khuska kay ‘jallpʼata reyes jinaʼ gobernamunankupaj. Paykunamin kanku cielopi kausanankupaj kausarichisqa kajkunaqa (Apocalipsis 5:10). Diosqa  Jesuspa apostolesninpa tiemponkumantapacha chay 144.000 reyesta ajllashan.

10. ¿Imajtintaj Jesuswan 144.000 kajkunawan sumajta gobernamonqanku?

¹⁰ Jehová Diosninchejqa mayta munakuwasqanchejrayku, runasta ajllarqa Jesuswan khuska gobernamunankupaj. Jesusqa sumajtapuni gobernamonqa. Payqa yachan imaynachus kausayninchej kasqanta. Payqa noqanchej jina kausakorqa, ñakʼarerqataj. Apóstol Pablopis Jesusmanta nerqa: “Pantaj runas kasqanchejta yachan, chayrayku khuyakuwanchej. Imaraykuchus paypis, tukuy imaymanamanta pruebaman churasqa karqa”, nispa (Hebreos 4:15; 5:8). Chay 144.000 reyespis runasllataj kasqankurayku, yachallankutaj onqoy, juchasapa runa kaypis ñakʼarichiwasqanchejta. Chayrayku Jesuswan 144.000 kajkunawanqa, imapi pantanayajtinchejpis, ima problemayoj kajtinchejpis yanapayta atiwasunchej.

11. ¿Tukuypunichu Diospa munayninta cielopi ruwasqanku?

¹¹ Jesusqa yachachisqasninman nerqa ajinata mañakunankuta: ‘Munayniyki cielopi ruwasqa kachun’, nispa. Chayta mañakunankuta nerqa, imajtinchus cielopeqa mana tukuypunichu Diospa munayninta ruwasharqanku. Kinsa capitulopi yachakorqanchej jina, Kuraj Supay Satanasqa  Jehová Diospa contranta oqharikorqa. Chay oqharikusqanmanta qhepamantaj, Diosqa Diablota, sajra angelesnintawan saqellarqa cielopi uj tiempotawan quedakunankuta. Chunka capitulopi astawan yachakusunchej Supaymanta, sajra angelesninmantawan.

12. ¿Imatataj Apocalipsis 12:10 versículo sutʼinchan?

¹² Bibliaqa unaymantaña nerqa, Jesusqa rey churasqa kasqanmanta pisi tiemponman Supaywan maqanakunanta (Apocalipsis 12:7-10 leey). Apocalipsis 12:10 versículo sutʼinchan, Cristoqa gobernayta qallarisqanta. Chantá sutʼinchallantaj Supayqa kay jallpʼaman wijchʼuchikamusqanta. Tukuy chaykunataj juntʼakunña.

13. Supay wijchʼuchikamusqantawan, ¿imaynataj ángeles kasharqanku?

¹³ Diosta kasukoj angelesqa mayta kusikorqanku, Supaywan sajra angelesninwan cielomanta wijchʼuchikamusqankumanta. Bibliaqa nin: “Kusikuychej cielos, chaypi tiyakojkunapis”, nispa (Apocalipsis 12:12). Cielopeqa manaña pipis Diospa contranpi churanakojqa kanchu. Cielopi kausakojkunaqa ujchasqa kashanku Diospa munayninta ruwaspa.

14. ¿Imastataj Supay ruwashan kay jallpʼapi?

¹⁴ Jallpʼapitajrí mana ajina kusisqachu kausakushanchej. Runasqa maytapuni ñakʼarishanchej. ‘Imaraykuchus Kuraj Supayqa uraykamun manchay phiñasqa, paypaj pisi  tiempollaña kasqanta yachaspa’ (Apocalipsis 12:12). Supayqa cielomanta wijchʼuchikamorqa, yachantaj pisi tiempomantawan chinkachisqa kananta. Payqa may phiñasqapuni kashan. Chayrayku kay jallpʼapi imaymana llakiykunata, ñakʼariykunata, nanaykunata rikhurichin.

15. ¿Imatataj Dios qallariymantapacha munasqa?

¹⁵ Diostajrí qallariypi jinallapuni munan kay jallpʼanchej paraisoman tukunanta, mana juchayoj runastaj chaypi tiyakunankuta (Salmo 37:29). Diospa Gobiernontaj chayta ruwanqa.

16, 17. ¿Imastataj Biblia willawanchej Diospa Gobiernonmanta?

¹⁶ Bibliaqa unaymantaña nerqa: ‘Chay reykuna gobernashajtinku, cielopi kaj Dios uj gobiernota sayarichenqa, chaytaj mana jaykʼajpis chinkachisqachu kanqa, manataj mayqen gobiernopis payta atipanqachu. Tukuynin waj gobiernosta tukuchenqa, chay atipaj gobiernotajrí wiñaypaj sayanqa’, nispa (Daniel 2:44). ¿Imastataj kay versículo Diospa Gobiernonmanta sutʼinchashan?

¹⁷ Sutʼinchashan ‘chay reykuna gobernashajtinku’, Diospa Gobiernonqa cielopi gobernashanantaña. Nisunman Diospa Gobiernon gobernayta qallarishajtenqa, kay jallpʼapi gobiernos kakushanankutaraj. Chantá sutʼinchallantaj Diospa Gobiernonqa wiñaypaj sayananta, nitaj jaykʼajpis waj gobierno cuentanmanta yaykunanta. Sutʼinchallantaj kay  jallpʼamanta gobiernosqa, Diospa Gobiernonwan maqanakunankuta. Chay maqanakupitaj Diospa Gobiernon atipananta, kay jallpʼatataj chay Gobiernollaña gobernananta. Diospa Gobiernonqa may sumajta gobernamonqa.

18. ¿Imataj kanqa kay jallpʼamanta gobiernos Diospa Gobiernonwan maqanakunankupajña kashajtinku?

¹⁸ ¿Imataj kanqa kay jallpʼamanta gobiernos Diospa Gobiernonwan maqanakunankupajña kashajtinku? Supaypa sajra angelesnenqa imaymana engañoswan ‘jallpʼantinmanta reyesman renqanku, paykunata tantaykunankupaj guerraman, mayqenchus kanqa Tukuy Atiyniyoj Diospa jatun pʼunchayninpi, chayman’. Kay jallpʼamanta gobiernosqa, Diospa Gobiernonwan maqanakonqanku. Chay maqanakuytaj Armagedón sutiwan rejsikun (Apocalipsis 16:14, 16; “Armagedón” nisqata leeriy).

19, 20. ¿Imaraykutaj necesitanchej Diospa Gobiernonta?

¹⁹ Juchasapas kasqanchejrayku onqonchej, wañunchejtaj. Chayrayku Diospa Gobiernonta necesitanchej. Bibliaqa niwanchej, Diospa Gobiernon gobernamushajtenqa wiñaypaj kausakunanchejta. “Diosqa chay jinatapuni kay mundomanta runasta munakusqanrayku, uj kʼata Wawanta qorqa, ajinamanta pillapis paypi creejqa mana wañunanpaj, manachayqa wiñay kausayniyoj kananpaj” (Juan 3:16).

²⁰ Sajra runas chaupipi tiyakusqanchejrayku,  Diospa Gobiernonta necesitallanchejtaj. Runasqa llullakunku, engañanku, millay kausayniyojtaj kanku. Noqanchejtaj mana imatapis ruwayta atisunmanchu, manaña chay imasta ruwanankupajqa. Sichus chay runas Diosman manapuni kutirikonqankuchu chayqa, Dios paykunata Armagedón maqanakuypi chinkachenqa (Salmo 37:10 leey). Diospa Gobiernonta necesitallanchejtaj, imaraykuchus gobiernosqa mana problemasta allinchayta atinkuchu, sajras kanku, manataj cheqantachu ruwanku. Chantapis ni yuyallankupischu, Diosta kasunankupaj runasta yanapaytaqa. Bibliaqa sutʼillata nin: “Runaqa runa masinta chakisnin uraman churan paypa mana allinnillampaj”, nispa (Eclesiastés 8:9).

21. ¿Imastataj Diospa Gobiernon ruwanqa?

²¹ Armagedón pasayta, Diospa Gobiernonqa Diospa munayninta kay jallpʼapi ruwanqa. Chaypajtaj Supayta, sajra angelesnintawan ‘wataykonqa 1.000 wataspaj’ (Apocalipsis 20:1-3). Chaymanta  qhepamantaj manaña pipis onqonqachu, nitaj wañonqachu. Jesús kausayninta qosqanrayku, Diosta kasukoj runasqa paraisopi wiñaypaj tiyakonqanku (Apocalipsis 22:1-3). Chantapis Diospa Gobiernonqa Diospa sutinta llimphuchanqa. Tukuy runastaj Jehová Diospa sutinta jatunchanqanku (“Jesusqa noqanchejrayku wañorqa” nisqata leeriy).

22. ¿Cieloman kutipusqantawanchu Jesusqa presidente jina churasqa kasqa?

²² Jesusqa yachachisqasninman yachacherqa, “Gobiernoyki jamuchun” nispa mañakunankuta. Chay nisqanpi reparanchej Diospa Gobiernonqa mana Jesús kay jallpʼapi kashajtinchu jamusqanta. Jehová Diosqa ñaupajta uj Gobiernotaraj sayarichinan karqa, Jesustataj presidenteta jina churanan karqa. Jinapis Jesusqa mana cieloman kutipusqantawanchu presidente jina churasqa  karqa, manachayqa suyakunanraj karqa. Jesús kausarimusqanmanta aswan qhepaman, Pedrowan Pablowanqa Salmo 110:1 versiculota Jesusmanta sutʼinchanankupaj oqharerqanku. Chay versiculopi Jehová Diosqa Jesusman nin: “Pañayman tiyaykukuy, enemigosniykita banquillota jina chakisniykipaj churanaykama”, nispa (Hechos 2:32-35; Hebreos 10:12, 13).

23. 1) ¿Maykʼajmantapachataj Jesús gobernayta qallarisqa? 2) ¿Imatataj qhepan capitulopi yachakusunchej?

²³ Kay 1870 wata chaynejtaña uj grupo llampʼu sonqo cristianosqa, repararqanku Bibliaj nisqasnin 1914 watamantapacha juntʼakunanta. Chaytaj ajinapuni karqa. Chay watamantapacha guerras, yarqhaykuna, onqoykuna astawan yapakorqa. Jesuspis 1914 watapi presidente jina gobernayta qallarerqa (Salmo 110:2). Chaymanta pisi tiemponman, Supayqa kay jallpʼaman wijchʼuchikamorqa, kunantaj “paypaj pisi tiempollaña” tiyan (Apocalipsis 12:12). Chay pisi tiempotataj Bibliaqa nin: ‘Qhepa pʼunchaykuna’, nispa. Qhepan capitulopeqa yachakusunchej qhepa pʼunchaykunapi kausashasqanchejta. Chantá yachakullasuntaj Diospa Gobiernonqa tumpitamantawan Diospa munayninta kay jallpʼapi ruwananta (“Diosqa 1914 watapi uj Gobiernota sayaricherqa” nisqata leeriy).