1. ¿Ima alläpa reqishqa mañakïpitataq kë capïtuluchö yachakushun?

PÏ MË nunakunam padrenuestru nishqan mañakïtaqa reqiyan. Tsë alläpa reqishqa mañakïtaqa Jesusmi qateqninkunata yachatsirqan. Tsë mañakïchöqa, ¿imakunapaqtaq Jesus mañakurqan? ¿Imanirtaq alläpa precisan imakunapaq mañakunqanta alleq entiendinantsik?

2. ¿Ima kima asuntukunapaq mañakunantsikpaqtaq Jesus yachatsikurqan?

² Jesusqa kënö nirmi qateqninkunata yachatsirqan: “Qamkunaqa kënömi Diosta mañakuyänëki: ‘Ciëluchö këkaq Teytalläkuna, jutiki alläpa respëtuwan rikashqa katsun. Gobiernïki shamutsun. Ciëluchö y patsachö munëniki rurakätsun’” (leyi Mateu 6:9-13). ¿Imanirtaq Jesusqa yachatsikurqan tsë kiman (kimsan) asuntukunarëkur mañakunantsikpaq? (Rikäri 20 kaq nötata).

3. ¿Imatataq kë capïtuluchö yachakushun?

³ Yachakurquntsiknam Diospa jutinqa Jehovä kanqanta. Jina yachakurquntsikmi llapan nunakunapaq y kë Patsapaq Diosnintsik imata munanqanta. Peru “Gobiernïki shamutsun” nishpa mañakunapaq yachatsikurqa, ¿imanö gobiernupaqtaq Jesusqa parlëkarqan? Kë capïtuluchömi yachakushun Diospa Gobiernun imanö kanqanta, imakunata ruramunampaq  kaqta y Diospa jutin respetashqa kanampaq imata ruramunampaq kaqta.

4. ¿Imanötaq Diospa Gobiernun, y pitaq tsë Gobiernuchö mandakun?

⁴ Diospa Gobiernunqa kikin Diosnintsik ciëluchö patsätsinqan Gobiernum. Diosqa Jesustam akrashqa tsë Gobiernuchö Mandakoq o Rey kanampaq. Jesuspaqqa, ‘mandakoqkunapa Reynin y señornö gobernaqkunapa Señornin’ ninmi Bibliaqa (1 Timoteu 6:15). Jesusqa pï gobernaq nunapitapis masmi yanapamënintsikta puëdin. Jinamampis, pëqa kë Patsachö llapan gobernaq nunakunapitapis mas puëdeqmi.

5. ¿Mëpita patsëtaq Diospa Gobiernunqa gobernamunqa?

⁵ Jesusqa wanurir kawarinqampita 40 junaq pasariptinmi ciëluta kutikurqan. Y tsëpita atska tiempu pasariptinmi Jehoväqa Gobiernunchö Mandakoq kanampaq pëta churarqan (Hëchus 2:33). Diospa Gobiernunqa ciëlupita patsëmi kë Patsaman gobernamunqa (Revelacion [Apocalipsis] 11:15). Tsëmi Bibliaqa nin Diospa Gobiernunqa ‘ciëluchö Gobiernu’ kanqanta (2 Timoteu 4:18).

6, 7. ¿Imanirtaq Jesusqa pï nunapitapis mas alli gobernamunqa?

⁶ Bibliaqa nin, Jesusqa pï nunapitapis mas alli gobernamunampaq kaqtam, porqui pëllam “mana ushakaq kawëyoq” (1 Timoteu 6:16). Llapan gobernaq nunakunam wanoqlla kayan, peru Jesusqa manam ni imëpis wanunqatsu. Tsëmi shamoq tiempuchö noqantsikrëkur imëka allikunata ruramunqanqa ni imëpis ushakanqatsu.

 ⁷ Jinamampis Bibliaqa nin, Jesusqa llakipäkoq kanampaq kaqta y justiciata ruramunampaq kaqtam. Unënam Bibliaqa kënö nirqan: “Jehoväpa santu espïritunmi pëchö kanqa, imëkata yachanampaq y entiendinampaq, alli consejakoq kanampaq, poderyoq kanampaq, imëkata musyanampaq y Jehoväta respetanampaq”. Jina kënömi nin: “Pëqa manam janampa rikanqanllawantsu pitapis juzganqa, ni wiyanqanllawantsu pitapis correginqa. Waktsakunapaqmi justiciata ruranqa” (Isaïas 11:2-4). ¿Manatsuraq munankiman tsënö mandakoq Rey gobernamänantsikta?

8. ¿Imanötaq musyantsik Jesusqa japallan mana gobernamunampaq kaqta?

⁸ Jesusqa manam japallantsu gobernamunqa, porqui Bibliaqa yachatsikun pëwan gobernayämunampaq wakin nunakunata Jehovä akranqantam. Tsëmi apostol Pablupis Timoteuta kënö nirqan: “Tsarakurnin sïguirqa, jina juntum gobernashun” (2 Timoteu 2:12). Rikärishun ëkaq nunakunawan Jesus gobernamunampaq kaqta.

9. (1) ¿Ëkaq nunakunawantaq Jesus gobernamunqa? (2) ¿Imëtaq Jehoväqa ciëluta ëwaqpaq kaqkunata akrar qallëkurqan?

⁹ Kë librupa 7 kaq capïtulunchö yachakunqantsiknöpis, apostol Juanmi imëka suëñïninchönö Jesusta ciëluchö rikarqan. Jesusqa mandakur täkunanchönam këkarqan, y pëwanmi 144.000 gobernaqkuna këkäyarqan. ¿Pikunataq tsë gobernaqkuna kayan? Kikin Juanmi kënö nirqan: “Pëkunam kayan mëpa ëwaptimpis Achkasta qateq kaqkuna”. Nïkurmi nirqan pëkunaqa “nunakunapita rantishqa” kayanqanta  (leyi Revelacion 14:1, 4). Achkas nirqa Jesuspaqmi parlëkan. Y 144.000 gobernaqkunaqa kayan, Jesuswan juntu ‘patsata gobernayämunampaq’ Diosnintsik akranqan nunakunam. Pëkunaqa wanurirllam ciëluchö kawaririyan (Revelacion 5:10). Apostolkuna kawayanqan witsanchömi Jehoväqa ciëluta ëwaqpaq kaqkunata akrar qallëkurqan.

10. ¿Imanirtaq Jehoväqa patsätsishqa Jesus y 144.000 nunakuna gobernayämunampaq?

¹⁰ Alläpa kuyamarnintsikmi Jehoväqa patsätsishqa Tsurin Jesus y 144.000 nunakuna gobernayämunampaq. ¿Y imanirtaq tsëta nintsik? Jesusqa noqantsiknö nuna këmanmi charqan y alläpam sufrirqan, tsëmi imanö sientikunqantsikta y ‘pishipanqantsikta’ (dëbil kanqantsikta) cuentaman churarnin shumaq gobernamäshun, porqui apostol Pablu ninqannöpis, pëqa “llapanchömi noqantsiknölla pruëbaman churashqa kashqa” (Hebrëus 4:15; 5:8). Jina tsënöllam 144.000 gobernaqkunapis imanö sientikunqantsikta cuentaman churayanqa, porqui pëkunapis musyayanmi jutsa ruraq kë y qeshyapäkï imanö kanqanta. Tsëmi alleq musyantsik Jesuswan 144.000 gobernamoqkunaqa sentimientuntsikkunata y problëmantsikkunata entiendiyänampaq kaqta.

11. ¿Imanirtaq Jesusqa qateqninkunata yachatsirqan “ciëluchö munëniki rurakätsun” nishpa mañakuyänampaq?

¹¹ Jesusqa, “ciëluchö y Patsachö munëniki rurakätsun” nishpa mañakuyänampaqmi qateqninkunata  yachatsirqan. Y, ¿imanirtaq mañakuyänan karqan ciëluchö Diospa munënin rurakänampaq? Porqui ciëluchöqa manam llapankunatsu Diospa munëninta rurëkäyarqan. Kë librupa 3 kaq capïtulunchö yachakunqantsiknöpis, juk angelmi Diospa contran tikrakurirqan. Y Jehovämi permitirqan tsë angel o Diablu, y mana wiyakoq angelkuna o demoniukuna ciëluchö juk tiempupa kayänanta. Diablupaq y demoniukunapaqqa 10 kaq capïtuluchömi masllata yachakurishun.

12. ¿Ciëluchö imakuna pasakunqantataq Revelacion 12:10 textu willakun?

¹² Bibliaqa willakushqanam karqan Jesusqa Diospa Gobiernunchö Mandakoq tikrarirlla, juk guërrachö Diabluwan pelyanampaq kaqta (leyi Revelacion 12:7-10). Revelacion 12:10 textum willakun ishkë precisaq cösaskuna pasakunqanta: puntataqa willakun, Jesucristu gobernar qallanqantam. Tsëpitanam, ciëlupita Diabluta Patsaman Jesus qarpumunqanta willakun. Tsë ishkan cösaskuna pasakushqana kanqantam yachakurishun.

13. Diabluta Patsaman Jesus qarpumunqampita patsëqa, ¿imanötaq ciëluchö kawakïkäyan?

¹³ Diabluta y demoniukunata Jesus Patsaman qarpuramuptinqa, llapan alli kaq angelkunam kushishqa sientikuyarqan. Bibliam kënö nin: “¡Kushikuyë ciëlukuna, y tsëchö täraqkuna!” (Revelacion 12:12). Ciëluchöqa llapanmi kananqa Diospa munëninta rurëkäyan, tsëmi llapankuna unïdu kayan y yamë kawakuyan.

14. Diabluta Jesus ciëlupita qarpumunqampita patsëqa, ¿imataq Patsachö pasakïkan?

 ¹⁴ Patsachöqa imëka mana allikunam pasakïkan, porqui Diablum “alläpa piñashqa” kë Patsaman urämushqa, y jinamampis “wallka tiempullana” karinampaq kaqtam musyan. Tsëmi imëka sufrimientukunapa pasantsik (Revelacion 12:12). Awmi, Jesus ciëlupita qarpumushqa kaptinmi Diabluqa alläpa piñashqa (cölerashqa) këkan, porqui musyanmi wallka tiempullana karinampaq kaqta. Tsëmi llapan nunakunata sufritsinampaq imëka mana allikunata rurëkan.

15. ¿Imatataq Diosnintsikqa imëpis munashqa?

¹⁵ Entëru Patsa juk shumaq huertaman tikrananta, llapan nunakuna jutsannaq kayänanta y mana wanushpa kawakuyänantam Diosnintsikqa imëpis munashqa (Salmus 37:29). ¿Imanötaq tsë llapanta Diospa Gobiernun ruramunqa?

16, 17. ¿Imatataq yachatsimantsik Daniel 2:44 textuqa?

¹⁶ Daniel 2:44 textum kënö willakun: “Tsë gobernaqkunapa tiempunchömi, ciëluchö këkaq Dios, juk mana ushakaq gobiernuta patsätsinqa. Tsë gobiernuqa manam ni pipa makinman pasanqatsu. Y chipyëpam ushakätsinqa tsë llapan gobiernukunata, y tsë gobiernullanam imëyaqpis kanqa”. Kë textuqa, ¿imatataq Diospa Gobiernumpaq yachatsimantsik?

¹⁷ Kima (kimsa) cösastam yachatsimantsik: 1) Diospa Gobiernunqa, “tsë gobernaqkunapa tiempunchömi” gobernar qallanan karqan. Y tsënömi  pasakurqan, Diospa Gobiernunqa Patsachö mëtsika gobiernukuna këkäyaptinmi gobernar qallarqan. 2) Diospa Gobiernunqa manam ni imëpis ushakanqatsu, y mananam juk gobiernuqa kanqanatsu. 3) Kë Patsachö këkaq gobiernukunam Diospa Gobiernumpa contran sharkuyanqa. Peru Diospa Gobiernunmi vencinqa, y juk gobiernullanam Patsata gobernanqa. Tsëkuna cumplikäriptinqa, ¡alläpa alli Gobiernum nunakunata gobernanqa!

18. ¿Ima guërrataq kanqa?

¹⁸ Patsachö gobiernukunam Diospa Gobiernumpa contran guërrata rurayanqa. Y tsënö pasakunampaqqa demoniukunam ‘entëru patsachö llapan reykunata’ engañayanqa. Llapan gobiernukunatam ëlluyanqa ‘Llapanta Puëdeq Diospa jatun junaqninchö guërraman’. Tsë guërrapaqmi Bibliaqa Armagedon guërra nin, y tsë guërrachömi Diospa Gobiernunqa nunakunapa gobiernunkunata ushakäratsinqa (Revelacion 16:14, 16; rikäri 10 kaq nötata).

19, 20. ¿Imanirtaq Diospa Gobiernunta necesitantsik?

¹⁹ Llapantsikmi jutsa ruraq karnin qeshyantsik y wanuntsik, tsëmi Diospa Gobiernunta necesitantsik, porqui Diospa Gobiernun gobernamuptinqa mana wanushpanam kawakushun. Tsëmi Bibliaqa kënö nin: “Nunakunata alläpa kuyarninmi Diosqa japallan Tsurinta pëkunarëkur qorqan, tsënöpa pëman markäkuyanqanta rikätsikoqkuna mana ushakätsishqa kayänampaq, sinöqa imëyaqpis kawëyoq kayänampaq” (Juan 3:16).

 ²⁰ Jina, ¿imanirtaq Diospa Gobiernunta necesitantsik? Porqui entëru Patsachömi mana alli nunakuna chipyëpa mirashqa. Mëtsikaqmi ulikuyan (llullakuyan), engañakuyan y jukwan jukwan lluta kakuyan, y noqantsikqa manam tsë mana alli rurëkunata ushakätsita puëdintsiktsu. Peru Jehoväqa puëdinmi. Vïdankunata cambiëta mana munaq nunakunataqa Armagedonchömi chipyëpa ushakäratsinqa (leyi Salmus 37:10). Jina, ¿imanirtaq Diospa Gobiernunta necesitantsik? Porqui llapan gobernaq nunakunam imëka mana allikunata rurayan, y manam nunakunapa sufrimientunkunata ushakätsita puëdiyantsu. Jinamampis, manam nunakunata yanapayantsu Diosta cäsukuyänampaq. Awmi, Biblia ninqannöpis, nunakunaqa sufritsiyänanllapaqmi nuna mayinkunata dominayan (Eclesiastes 8:9).

21. Diospa munënin kë Patsachö rurakänampaqqa, ¿imatataq Diospa Gobiernun ruramunqa?

²¹ Armagedon nishqan guërra pasariptinqa, ¿imatataq  Diospa Gobiernun ruramunqa Diospa munënin Patsachö rurakänampaq? Satanaswan demoniunkunam wanwanyarëkaq uchkuchö wichqashqa kayanqa (Revelacion 20:1-3). Y tiempuwanqa mananam ni pipis qeshyanqanatsu ni wanunqanatsu. Porqui salvamänantsikpaq Jesus wanunqanrëkurmi, llapan nunakuna Shumaq Patsachö mana wanushpa kawakuyanqa (Revelacion 22:1-3; rikäri 21 kaq nötata). Jinamampis, Diospa Gobiernun Patsata gobernamunqan tiempuchöqa, llapan nunakunam Diospa jutinta respetayanqa.

22. ¿Imanötaq musyantsik Jesusqa gobernar qallanampaq juk tiempuraq shuyanqanta?

²² “Gobiernïki shamutsun” nishpa mañakuyänampaqmi Jesusqa qateqninkunata yachatsirqan. Porqui tsë tiempuchöqa manaran Diospa Gobiernun gobernar qallarqanraqtsu. Puntataqa tsë Gobiernutaran Jehoväqa patsätsinan karqan, y Mandakoq kanampaqmi Jesusta churanan karqan. ¿Jesustaqa  ciëluman kutirinqanllachöku mandakoq kanampaq Jehovä churarqan? Manam, porqui Jesusqa juk tiempuran shuyararqan. Tsëtam rikätsikun Salmus 110:1 textu willakunqan. Tsë textum willakun Jesusta Jehovä kënö ninqanta: “Derëcha kaq lädüman täkamï, chikishoqnikikunata chakikipaq bancutanö churamunqäyaq”. Tsëmi apostol Pëdruqa cläru nirqan tsë textuqa Jesuschö cumplikanqanta. Y apostol Pablupis tsënöllam nirqan (Hëchus 2:32-35; Hebrëus 10:12, 13). Tsëmi rikätsikun Mandakoq këman Jehovä churanampaqqa, juk tiempuraq Jesus shuyaranqanta.

23. (1) ¿Imëtaq Jesusqa gobernar qallarqan? (2) ¿Imatataq qateqnin kaq capïtuluchö yachakushun?

²³ ¿Imëtaq Jesusqa gobernar qallarqan? 1914 watachömi. 1914 watapaq atska watakunaraq pishikaptinmi, Jehoväta sirweq nunakunaqa cuentata qokuriyarqan tsë watapita patsë Bibliapa atska willakïninkuna cumplikänampaq kaqta. Y tsënömi pasakushqa, tsë watapita patsëmi guërrakuna, mallaqë y qeshyakuna mirashqa. Jina Jesuspis tsë watachömi gobernar qallashqa (Salmus 110:2; rikäri 22 kaq nötata). Y gobernar qallanqampita pöcu tiempullatanam Jesusqa Diabluta Patsaman qarpumurqan “wallka tiempullana” Patsachö karinampaq (Revelacion 12:12). Qateqnin kaq capïtuluchömi yachakushun, Diabluta Jesus llawirkunampaq “wallka tiempullana” faltanqanta imakuna rikätsikunqanta. Jina pöcu tiempullachöna Diospa munënin Patsachö rurakänampaq kaqtam yachakushun.