1. ¿Ima oracionmandata yachajugrinchi?

PADRENUESTRO oraciondaca casi tucui gentecunami yachan. Paipa catijcunata Diosta imashina mañanata yachachingapami Jesusca padrenuestro oracionda yachachirca. ¿Imatallata chai oracionbica mañarca? Cunanbipash ¿imamandata chai oracionga minishtirin?

2. ¿Imacunamandallata Jesusca mañachun yachachirca?

² Jesusca nircami, ‘cashnami mañana canguichi: ‘Jahua pachapi tiajuj ñucanchi Taitalla, cambaj jucha illaj [o, santo] shutiguca, alicachi tucushca cachun. Can mandanaca, ucha chayamuchunmi munanchi. Imashnami jahua pachapica can munashcashna ruranajun, chashnallata cai pachapipash ruranajushpami ali canman’’ nishpa (Mateo 6:9-13, liipangui). Jesusca ¿imacunatata mañachun yachachirca? (Página 216​pi nota 20​ta ricupangui.)

3. Diospa Reinomandaca ¿imatata yachajugrinchi?

³ Taita Diospa shuti Jehová cashcata, Taita Dios cai Alpahuan imata ruragrijujtapash ñami yachajurcanchi. Jesús mañajushpaca nircami, “can mandana” o Reinoca ucha shamuchun nishpa. Shinaca Diospa Reinoca ¿imata can? ¿Imatashi ruranga? ¿Imashinashi Diospa shutitaca jatunyachinga? Cai tapuicunamanda yachajushun.

4. a) Diospa Reinoca ¿imata can? b) Chai Reinopica ¿pita mandanga?

⁴ Diospa Reinoca, Jehová churashca mandana gobiernomi can. Chai Reinopica Jesustami Rey shina mandachun  agllashca. Jesusmi: ‘Jatun mandajcunatapash Jatun Mandaj, amocunapajpash jatun Amo’ can (1 Timoteo 6:15). Jesusca tucui gobiernocunata yali alimi canga. Tucui gobiernocunata yali podertami charin.

5. Diospa Reinoca ¿maipita canga? ¿Picunatata mandanga?

⁵ Jesusta causachishcamanda 40 punllacuna yalijpimi cieloman tigrarca. Chaimanda jipamanmi Jehová Diosca paipa Reinopi Rey cachun Jesustaca churarca (Hechos 2:33). Diospa Reinomi jahua cielomanda cai Alpata mandanga (Apocalipsis 11:15). Chaimandami Bibliapica ‘jahua pachapi [o cielopi] mandana’ can nin (2 Timoteo 4:18).

6, 7. Cai Alpapi gobiernocunahuan ricujpica ¿imamandata Jesusca ashtahuan ali can?

⁶ Bibliapica ninmi, Jesusllami ‘huañuitapash na huañushpa causaita’ ushan. Paica gobiernocunatapash yalimi can nishpa (1 Timoteo 6:16). Cai Alpapi gobiernocunaca shuj punllaca huañungami. Shinapash, Jesusca ima horapash na huañungachu. Chaimandami Jesuspa ali rurashcacunaca nunca na tucuringa.

⁷ Bibliapica nircami, Jesusca tucuita ali ruraj, llaquij Reymi canga nishpa. Shinallata nircami: ‘Paipimi, Mandaj Diospa espirituca causanga. Chai espiritumi ali yachaitapash, alipacha yachajushca causanatapash, ali yuyaita cunatapash, ninan ushaitapash paiman cunga. Chai espiritumi, Mandaj Diosta rijsishpa, manllashpa causana yuyaitapash cunga. Paica, ñavita ricushpallaca na pitapash llaquichingachu. Imata rurana cajpipash, na shujcuna nishcata uyashpallaca rurangachu. Ashtahuangarin imagutapash na charijcunataca, imatapash cashcatapacha rurashpami mandajunga’ nishpa (Isaías 11:2-4). ¿Shina gobierno mandachun munanguimanllu?

8. Jahua cielopica Jesusca ¿paillachu mandanga?

⁸ Taita Diosca huaquingunataca jahua cielopi Jesushuan  mandachunmi agllashca. Apóstol Pabloca, Timoteomanga nircami: “Llaquicunata apanajushpaca, paihuanmi mandagrishun” nishpa (2 Timoteo 2:12). ¿Mashnacunata Jesushuan mandanga?

9. ¿Mashna gentecunata Jesushuan mandanga? Cieloman rinacunataca ¿ima punllamandata Diosca agllajushca?

⁹ Capítulo 7​pica ñami ricurcanchi. Apóstol Juanga shuj muscuipi cuendami, Jesusta jahua cielopi 144 mil mandajcunahuan ricushcata. Paicunaca ¿picunata can? Apóstol Juanga ninmi: ‘Paicunaca, maltun Llamapa [o Jesuspa] shutita, paipa Taitapa shutitapash, frentepi escribishcami carca’. Paicunaca ‘Llamagu [o Jesús] maita rijpipash, paita catishpami purin. Paicunaca, tucui gentecunamanda quishpichishcami can’ nishpa (Apocalipsis 14:1, 4, liipangui). 144 mil gentecunataca Jesusta ali catishcamandami cai Alpata mandachun Jehová Diosca agllashca. Paicunaca, tucuita pactachijcuna caimandami Jesushuan cai Alpata mandanga. Chaimandami paicuna huañujpica cielopi causachun causachinga (Apocalipsis 5:10). Apostolcuna tiashca punllamandapachami Jehová Diosca paita sirvishpa tucuita pactachijcunataca, 144 mil agllashcacuna tucuchun agllajushca.

10. Jehová Diosca ¿imamandata Jesusta, 144 mil gentecunata ñucanchita mandachun agllashca?

¹⁰ Jehová Diosca ñucanchita juyaimandaca Jesusta, 144 milcunatami cai Alpata mandachun agllashca. Jesusca cai Alpapi cashpaca ninandami sufrirca. Paica gentecuna imashina sintirijtaca alimi yachan. Chaimandami shuj ali mandaj canga. Apóstol Pabloca nircami: Jesusca ‘ñucanchi imata na rurai ushajpipash, ñucanchita llaquijmi can. Ashtahuangarin ñucanchitashna pandachingapaj munajpipash, na juchata rurarcachu’ nishpa (Hebreos 4:15; 5:8). Shinallata 144 mil agllashca gentecunapash,  ima ungüipash japijpi ñaupaman catingapaca ninandami esforzarishca. Chaimandami, ima problemacunata gentecuna charijpica Jesuspash, 144 mil gentecunapash tucuita ali intindi ushanga.

11. ¿Imata mañachunda Jesusca paipa catijcunataca yachachirca?

¹¹ Jesusca paita catijcunataca Diospa munai jahua pachapi pactarichun mañanguichi nishpami yachachirca. ¿Imamandata shina yachachirca? Capítulo 3​pica Diablo, Jehovata na cazushcatami yachajurcanchi. Chai jipaca Diablota, ayacunatapash asha tiempota jahua cielopi cachunmi Jehová Diosca saquirca. Shinaca jahua cielopica na tucuicuna Diospa munaita pactachinajurcachu. Capítulo 10​pimi Diablomanda, ayacunamandaca ashtahuan yachajushun.

12. ¿Imatata Apocalipsis 12:10​pica nijun?

¹² Bibliapica yachachinmi, Jesusta Diospa Reinopi mandachun churashca jipaca Diablohuanmi macanajuna tucurca nishpa (Apocalipsis 12:7-10, liipangui). Apocalipsis 12:10​pica imacunalla pasanatami nijun. Callaripica, Diospa Reinomi mandai callaringa, chaipica Jesusmi mandajunga. Jipamanga, Diablota jahua cielomanda cai Alpaman shitanga nijunmi. Imashinami ricunchi cai textopi nishcacunaca ñami pactarishca.

13. Diablota Alpaman shitamujpica ¿imata jahua cielopica tucurca?

¹³ Jahua pachamanda Diablota, ayacunatapash cai Alpaman shitamujpica, ali angelcunaca ninandami cushijurca. Bibliapica ninmi: “jahua pachapash, chaipi causajcunapash, cushijunami canguichi” nishpa (Apocalipsis 12:12). Shinami cunanga jahua cielopica tucuicuna Jehovapa munaita rurashpa tranquilo, cushilla causanajun.

14. Cielomanda cai Alpaman Diablota shitamujpica ¿imata pasashca?

 ¹⁴ Cai Alpapi causaica llaquinayaimi can. Gentecunaca ninandami llaqui apanajun. Bibliapica ninmi: “Diabloca, punllacuna tucurijujta yachashpami, ninanda fiñarishpa” Alpaman urai shamushca nishpa (Apocalipsis 12:12). Diabloca paita jahua cielomanda shitashcamanda, paita ñalla tucuchinata yachashcamandaca manllanaita culirashcami can. Chaimandami mundo enteropi gentecuna problemacunahuan, llaquicunahuan sufrichun imacunatapash ruran.

15. Taita Diosca gentecuna ¿imashina causachunda munan?

¹⁵ Taita Diospa munaica na cambiashcachu. Paica cai Alpa shuj paraíso tucujpi jucha illaj gentecuna para siempre causachunmi munan (Salmo 37:29). Chaitaca ¿imashinashi Diospa Reinoca pactachinga?

16, 17. Diospa Reinomandaca ¿imatata Daniel 2:44​pica nin?

¹⁶ Daniel 2:44​pi profeciaca ninmi: “Chai jatun mandajcuna mandajui punllacunapimi, jahua pachapi causajuj Taita Diosca, ima horapash na tucuchi tucuna mandana llactata churanga. Chai mandana llactataca, na shuj llacta runacunaman cungachu. Chai mandajca, cai tucuilla mandana llactacunatami ñutushpa tucuchinga. Ashtahuangarin paica, causaita causaicaman mandajungallami” nishpa. Cai textopi profeciaca ¿imatata Diospa Reinomandaca yachachin?

¹⁷ Pundapica, “chai jatun mandajcuna mandajui punllacunapimi” Diospa Reinoca mandai callaringa nijunmi. Shinaca shuj gobiernocuna cai Alpapi mandajujpillatami Diospa Reinoca mandai callarina carca. Jipaca, Diospa Reinoca causaita causaicaman o para siempremi mandanga. Maijan gobiernopash na mishangachu, ima horapash na tucuchi ushangachu nijunmi. Shinallata, shuj  jatun macanajuimi tianga, Diospa Reinohuan, cai mundo enteropi gobiernocunahuanmi macanajunga, chaipimi Diospa Reino mishanga. Chai jipaca Diospa Reinollami tucui gentecunata aligutapacha mandajunga. Shinami gentecunaca ima horapash na tiashca ali gobiernota charinga.

18. Taita Dios macanajuna guerraca ¿ima shutita can?

¹⁸ Diospa Reinoca ¿imashinata cai Alpata mandai callaringa? Diospa guerra nara callarijpillatami Diablopa ayacunaca ‘tucui cai pachapi causaj jatun mandajcunapaman rishpa, Tucui Ushaita Charij Taita Diospa llaquichimui punllapi macanajugrichun’ umachinga. Chaipimi Diospa Reinoca, cai Alpapi tucui gobiernocunahuan macanajunga. Chaitami Armagedón guerra nin (Apocalipsis 16:14, 16. Página 210​pi nota 10​ta ricupangui).

19, 20. ¿Imamandata Diospa Reino cai Alpata mandachun minishtinchi?

¹⁹ ¿Imamandata Diospa Reinota minishtinchi? Quimsa yuyaicunata ricushun. Pundapica, juchayucuna caimandami ungüicuna japijpi huañunchi. Shinapash Diospa Reino mandajujpica para siempremi causashun. Bibliapica ninmi: “Taita Diosca, cai pachapi causajcunata ninanda juyashpami, paipaj shujlla Churita caramurca. Pipash paita crishpaca, na chingaita chingagringachu, ashtahuangarin causaitami causagringa” nishpa (Juan 3:16).

²⁰ Shinallata, millai nali gentecunapa chaupipi causaimandami Diospa Reino mandachun minishtinchi. Ashtaca gentecunaca llullan, umachin, nalicunata rurashpami causan. Shina gentecunata tucuchingapaca ñucanchica imatapash na rurai ushanchichu. Shinapash nalicunata rurashpa causajcunataca Armagedón guerrapimi Taita Diosca tucuchinga (Salmo 37:10, liipangui).  Ashtahuanbash, cunanbi gobiernocunaca nali mandajcuna, millaicuna, culqui jahua imatapash rurajcunami tian. Paicunaca gentecuna Diospa munaita pactachichunga na imatapash ruranllu. Chaimandami Bibliapica nin: “Runaca, paipaj llaquipajllata caishuj runata llaquichishpa charin” nishpa (Eclesiastés 8:9).

21. Diospa Reinoca ¿imatata ruranga?

²¹ Armagedón jipaca, Diospa Reino mandashpami Jehovapa munaita cai Alpapi pactachinga. Shinami Diablota, nali angelcunataca tucuchinga (Apocalipsis 20:1-3). Chaipica pipash ima ungüihuanbash ñana huañungachu. Jesús huañushpa salvashcamandami, Jehovata ali sirvijcunaca paraíso Alpagupi para siempre causanga (Apocalipsis 22:1-3). Shinallata Diospa Reinomi, Diospa shutitaca santificanga. ¿Imashinata santificanga? Cai Alpata Diospa Reino mandajujpica tucui gentecunami Diospa shutita jatunyachinga. (Página 217​pi nota 21​ta ricupangui.)

22. ¿Jesusca cieloman tigrashcandichu mandai callarirca?

²² Jesusca paipa catijcunataca ‘can mandanaca, ucha chayamuchun’ nishpa mañanguichi nircami. Chai tiempopica  Diospa Reinoca nara mandajurcachu. Pundapica Jehovami paipa Reinota churarca. Chaipimi Jesustaca Rey cachun agllarca. Shinaca ¿Jesusca cieloman tigrashcandichu Diospa Reinopi mandai callarirca? Na. Ashata shuyanarami carca. Salmo 110:1​pica Jehová Diosca nircami: “Canda fiñajcunata cambaj chaqui ucupi ñuca churangacaman, ñuca ali ladopi tiari” nishpa. Jesusta Jehová Dios causachishca jipallami, apóstol Pedro, apóstol Pablopash chai profecía Jesuspi pactarinata parlarca (Hechos 2:32-35; Hebreos 10:12, 13). Diospa Reinopi mandai callaringapaca ¿mashna tiempotata Jesusca shuyana carca?

23. a) ¿Ima horata Jesusca Diospa Reinopi mandai callarirca? b) ¿Imatata shamuj capitulopica yachajugrinchi?

²³ Jesusta ali catijcunaca, 1914 huata nara chayajpillatami, chai huatapi shuj profecía pactarinata ali intindirca. 1914 huatamanda imacunalla pasashcata ricushpaca, Jesús chai huatapi Diospa Reinopi mandai callarishcatami ricunchi (Salmo 110:2). Chai jipallami Diablotaca cai Alpaman shitamurca, paica ‘punllacuna tucurijujta yachanmi’ (Apocalipsis 12:12). Chai punllacunapi causajushcataca shamuj capitulopimi yachajushun. Shinallata, Diospa Reino ñalla cai Alpapi Jehovapa munaita pactachinatapashmi yachajushun. (Página 217​pi nota 22​ta ricupangui.)