1. ¿He aha te meꞌe i hāpī e Ietū ki tāꞌana pukuraŋa?

I TE HORA ERA a Ietū i ruŋa i te henua, i hāpī rō e tahi pure māhani e te rahi o te taŋata. Te pure nei ko hāpī ꞌā e Ietū ki tāꞌana pukuraŋa mo ꞌite rāua hē te huru tano mo pure ki te ꞌAtua. ¿He aha te meꞌe i nonoꞌi e Ietū hai pure nei? ¿O te aha e kī era he meꞌe hopeꞌa o te nui⁠-⁠nui mo aŋi⁠-⁠aŋi te haꞌauraꞌa o te pure nei?

2. ¿He aha te meꞌe e toru i hāpī mai e Ietū mo nonoꞌi i te hora era mo pure?

² A Ietū i kī: “Pe nei kōrua ana pure: ‘E te Matuꞌa o mātou o te raŋi ē, ka moꞌa te taŋata taꞌatoꞌa i tuꞌu ꞌīŋoa. Ka tuꞌu mai tuꞌu haka tere iŋa. Ka aŋa taꞌa meꞌe haŋa, i ruŋa i te raŋi, peira ꞌā i ruŋa i te henua’” (Ka taiꞌo Mateo 6:⁠9-13, TNM). ¿O te aha a Ietū i hāpī mai ai mo nonoꞌi te ŋā meꞌe nei e toru? (Ka taiꞌo te Kona 20 mo ata hāpī.)

3. ¿He aha tātou meꞌe ka aŋi⁠-⁠aŋi ena i te hāpī nei?

³ Nā tātou ko hāpī ko oho mai ꞌā, ko Iehoha te ꞌīŋoa o te ꞌAtua mau. Ko uꞌi takoꞌa ꞌā e tātou he aha tāꞌana meꞌe haŋa mo te taŋata ꞌe peira ꞌā mo te henua. ꞌE ¿he aha ia te meꞌe i haŋa mo kī e Ietū hora kī era: “Ka tuꞌu mai tuꞌu haka tere iŋa”? I te hāpī nei he aŋi⁠-⁠aŋi tātou: he aha te Haka Tere o te ꞌAtua, he aha te meꞌe ka aŋa era, ꞌe takoꞌa, pe hē ka aŋa era mo moꞌa te taŋata taꞌatoꞌa i tōꞌona ꞌīŋoa.

4. ¿He aha te Haka Tere o te ꞌAtua ꞌe ko ai tōꞌona ꞌariki?

⁴ Te Haka Tere o te ꞌAtua, he haka tere e tahi haka tuꞌu e Iehoha i ruŋa i te raŋi. He vae e Iehoha i a Ietū mo riro he ꞌariki o he pūꞌoko o te haka tere nei. Te Pipiria e kī rō ꞌā a Ietū “He Pūꞌoko Haka Tere o te pūꞌoko haka tere taꞌatoꞌa ꞌe he ꞌAriki o te ꞌariki taꞌatoꞌa” (Meꞌe Haka Takeꞌa [Apocalipsis] 17:⁠14).  ꞌAta hau a Ietū mo aŋa i te meꞌe riva mo tātou ki te rauhuru puꞌoko haka tere o ruŋa i te henua. Kai atu te piri tahi te pūꞌoko haka tere o te ao taꞌatoꞌa, ata pūai nō a Ietū ki a rāua taꞌatoꞌa.

5. ¿He aha te meꞌe ka haka tere ena e te Haka Tere o te ꞌAtua ꞌe mai hē ka ꞌariki era?

⁵ I te maha ꞌahuru mahana o te haka ora haka ꞌou i a Ietū, he hoki a īa ki ruŋa i te raŋi. I tano era te mahana, he haka ꞌariki e Iehoha i a Ietū pahe ꞌariki o tōꞌona Haka Tere (Aŋa o te ꞌĀpōtoro 2:⁠33). Mo te Haka Tere o te ꞌAtua e haka tere i te henua mai ruŋa i te raŋi (Meꞌe Haka Takeꞌa [Apocalipsis] 11:⁠15). Ōira, te Pipiria e kī era te Haka Tere o te ꞌAtua he haka tere e tahi o ruŋa i te raŋi (2 Timoteo 4:⁠18, TNM).

6, 7. ¿O te aha e kī era ꞌata hau te riva o Ietū pahe ꞌariki ki te taꞌatoꞌa pūꞌoko haka tere taŋata?

⁶ Te Pipiria e kī rō ꞌā ꞌata hau a Ietū te riva pahe ꞌariki ki te taꞌatoꞌa pūꞌoko haka tere taŋata, o te ai “e ko mate haka ꞌou ia ki te hora hopeꞌa” (Rōmano 6:⁠9). Taꞌatoꞌa pūꞌoko haka tere taŋata, e tano ena te mahana he mate, ꞌe a Ietū e ko mate ki te hora hopeꞌa. Oīra, taꞌatoꞌa meꞌe riva ka aŋa era e Ietū mo tātou, ꞌe ko ŋaro ki te hora hopeꞌa.

⁷ Te Pipiria e hāpī takoꞌa rō ꞌā pe nei ē, a Ietū he riro he ꞌariki haŋa ki te meꞌe tano ꞌe ki te meꞌe tītika ꞌe he haka ꞌaroha i te taŋata. O te profeta era ko Itaīa i kī pe nei ē, he vaꞌai ki a Ietū i te vārua maitai o Iehoha, mo haka māramarama i a īa mo aŋi⁠-⁠aŋi riva⁠-⁠riva i te meꞌe taꞌatoꞌa, mo kī pe hē ana haka tere riva⁠-⁠riva ꞌe mo ai tōꞌona pūai, mo ꞌite i te meꞌe taꞌatoꞌa ꞌe i te riꞌa⁠-⁠riꞌa o hape ki a Iehoha. ꞌE i kī takoꞌa rō: “I a īa te parau mo uꞌi i te meꞌe tano ꞌe te meꞌe taꞌe tano ꞌe ꞌina tōꞌona mata e ko uꞌi a ruŋa ꞌā i rā hora ꞌe peira ꞌā tōꞌona tariŋa ki te meꞌe ka haka roŋo era. He tapa i te nuꞌu veve ꞌe he meꞌe tītika nō te meꞌe ka aŋa era ki a rāua” (Isaías 11:⁠2-4). ¿E haŋa rō koe ki te ꞌariki tuꞌu pē nei?

8. ¿Pe hē tātou e ꞌite ena e ko ꞌariki hoko tahi nō a Ietū?

⁸ Ko vae ꞌā te ꞌAtua i te taŋata mo ꞌariki i muri i a Ietū i ruŋa i te raŋi. Te Pipiria e kī rō ꞌā he riro rāua he ꞌariki takoꞌa (2 Timoteo 2:⁠12). ¿E hīa taŋata ka ꞌariki ena i muri i a Ietū?

9. (a) ¿E hīa taŋata ka ꞌariki era i muri i a Ietū? (b) ¿Mai aŋa hē a Iehoha i haꞌamata ai te vae iŋa o te 144.000 taŋata?

 ⁹ I te kau hitu a tātou i hāpī ai pe nei ē, a roto i te uruŋa e tahi a Iovani i tikeꞌa ai i a Ietū, pahe ꞌariki i ruŋa i te raŋi, ꞌe i muri i a īa 144.000 ꞌariki. ¿Ko ai te ŋā ꞌariki nei? A Iovani i kī: “he nuꞌu i oho ꞌi muri i te Māmoe ki te kona nō era o te Māmoe i oho”. ꞌE i kī takoꞌa rō, “a rāua ko haꞌataꞌa ꞌā mai roto i te taŋata taꞌatoꞌa o te ao” (Ka taiꞌo Meꞌe Haka Takeꞌa [Apocalipsis] 14:⁠1, 4). Te māmoe ko Ietū. ꞌE te 144.000 ꞌariki he pukuraŋa a Ietū taꞌe hape ki te ꞌAtua. O te ꞌAtua i vae i a rāua mo ꞌariki i te henua i muri i a Ietū. E mate ena te ŋā nuꞌu nei, i ruŋa i te raŋi rāua e ora haka ꞌou era (Meꞌe Haka Takeꞌa [Apocalipsis] 5:⁠10). Mai te matahiti 33 o te taꞌu era o Ietū pē muꞌa, a Iehoha i haꞌamata i vae ai, mai roto i te pukuraŋa era a Ietū, i te 144.000 taŋata mo riro rāua he ꞌariki.

10. ¿O te aha te rāveꞌa nei o te haka tere e Ietū ananake ko te 144.000 he haka tikeꞌa mai te here o Iehoha mo tātou?

¹⁰ I te rahi o te here o Iehoha mo tātou, i vae ai i te taŋata mo ꞌariki i muri i a Ietū. Mo noho koe mo uꞌi, a Ietū he riro he pūꞌoko haka tere riva o te ai hora era e taŋata nō ꞌā i ŋaroꞌa takoꞌa rō i te mamāe. Pe nei i kī ai e Pablo o ruŋa i a Ietū: “E aŋi⁠-⁠aŋi rō ꞌā i te huru taꞌe pūai nei o tātou o te taŋata”, i te meꞌe era “i haka atu takoꞌa rō i a ia [...] pa he haka atu iŋa mai nei i a tātou” (ꞌEvereo 4:⁠15; 5:⁠8). Peira ꞌā te 144.000 taŋata e aŋi⁠-⁠aŋi takoꞌa rō ꞌā i te meꞌe ŋaroꞌa nei e tātou, i te meꞌe era, a rāua i haka ꞌuhu takoꞌa rō mo taꞌe hape ki te ꞌAtua, ꞌe peira ꞌā i piri takoꞌa rō te maiūi. Oīra tātou e ꞌite riva⁠-⁠riva nei pe nei ē, a Ietū ꞌe peira ꞌā te 144.000 taŋata, e aŋi⁠-⁠aŋi riva⁠-⁠riva rō ꞌā te tātou meꞌe ŋaroꞌa ꞌe peira ꞌā te tātou ꞌati.

11. ¿O te aha a Ietū i hāpī ai mo nonoꞌi mo aŋa te meꞌe haŋa o te ꞌAtua i ruŋa i te raŋi?

¹¹ A Ietū i hāpī rō ki tāꞌana pukuraŋa, mo nonoꞌi ki te ꞌAtua mo aŋa tāꞌana meꞌe haŋa i ruŋa i te henua ꞌe peira ꞌā i ruŋa  i te raŋi. ¿O te aha i hāpī ai e Ietū ki a rāua mo nonoꞌi mo aŋa i te meꞌe haŋa o te ꞌAtua i ruŋa i te raŋi? I te hāpī toru o te puka nei a tātou i hāpī ai pe hē te Tātane i pātoꞌi ai ki te ꞌAtua. No atu nei meꞌe, i haꞌatiꞌa rō e Iehoha ki te Tātane ꞌe peira ꞌā ki tāꞌana merahi rake⁠-⁠rake mo noho rāua i ruŋa i te raŋi i te hora iti⁠-⁠iti nō e tahi. Oīra, o roto i te rahi o te merahi o ruŋa i te raŋi i ai rō te merahi ꞌina kai aŋa i te meꞌe haŋa era o te ꞌAtua. I te hāpī hoꞌe ꞌahuru ka ꞌata aŋi⁠-⁠aŋi nei tātou o ruŋa i te Tātane ꞌe o ruŋa i te merahi rake⁠-⁠rake.

12. Te puka o Apocalipsis [Meꞌe Haka Takeꞌa] 12:⁠10 e vānaŋa rō mai ꞌā o ruŋa i te meꞌe e rua, ¿he aha rā ŋā meꞌe?

¹² O te Pipiria i kī pe nei ē, ka tano era te mahana, mai tōꞌona ꞌariki haŋa i te Haka Tere o te ꞌAtua, he moto a Ietū koia ko te Tātane (Ka taiꞌo Meꞌe Haka Takeꞌa [Apocalipsis] 12:⁠7-10).⁠⁠ * I ruŋa i a Apocalipsis [Meꞌe Haka Takeꞌa] 12:⁠10 e vānaŋa rō ꞌā o ruŋa i te meꞌe nui⁠-⁠nui e rua. Te meꞌe raꞌe, he haꞌamata a Ietū i tōꞌona ꞌariki haŋa. ꞌE te rua meꞌe, he tute i te Tātane mai ruŋa i te raŋi ki ruŋa i te henua. Nā tātou he uꞌi pe hē te ŋā meꞌe nei i tano tahi ai ki ruŋa i te hau ki aŋanirā.

13. ¿He aha te meꞌe i ŋaroꞌa e te merahi i te hora tute era i te Tātane mai ruŋa i te raŋi?

¹³ Hora tute era i te Tātane koia ko tāꞌana vārua rake⁠-⁠rake mai ruŋa i te raŋi he koa tahi te merahi taꞌe pātoꞌi era ki te ꞌAtua. Te Pipiria e kī rō ꞌā: “¡E te meꞌe noho ꞌi te raŋi ē, ka koa kōrua!” (Meꞌe Haka Takeꞌa [Apocalipsis] 12:⁠12). I aŋanirā, nā te merahi i ruŋa i te raŋi e aŋa tahi mai ena i te meꞌe haŋa o te ꞌAtua, ꞌe ꞌina e tahi meꞌe haka tipa⁠-⁠tipa ꞌe haka haꞌataꞌa i a rāua.

14. ¿He aha te meꞌe i piri ki te henua mai te hora tute era i te Tātane mai ruŋa i te raŋi?

¹⁴ I ruŋa i te henua he meꞌe kē te meꞌe tikeꞌa e tātou. Te henua ko rahi atu ana te mamāe i te meꞌe era te Tātane  ko topa mai ꞌā ki raro nei ꞌe ko riri riva⁠-⁠riva ꞌā o te ai ko ꞌite ꞌā “ꞌina ōꞌona hora toe” (Meꞌe Haka Takeꞌa [Apocalipsis] 12:⁠12). Te Tātane ko riri riva⁠-⁠riva ꞌā i te meꞌe era ko tute ꞌā mai ruŋa i te raŋi ꞌe ko ꞌite ꞌā ꞌina he hora toe mo haka kore i a īa. Oīra nā e aŋa mai ena i te rauhuru meꞌe rake⁠-⁠rake mo piri te ꞌati ꞌe mo haka mamāe i te taꞌatoꞌa taŋata.

15. ¿He aha te meꞌe haŋa o te ꞌAtua mo te henua?

¹⁵ Te meꞌe raꞌe haŋa era e te ꞌAtua mo te henua, ꞌina kai kore ꞌā mai roto i tōꞌona manaꞌu. Nā a Īa e haŋa nō ꞌā mo haꞌariro te henua he kona nehe⁠-⁠nehe e tahi, mo haka kore te hara o te taŋata ꞌe mo ora tātou ki te hopeꞌa raꞌa (Salmo 37:⁠29). ¿Pe hē te Haka Tere o te ꞌAtua ka riva era mo aŋa tahi i te ŋā meꞌe nei?

16, 17. ¿He aha te meꞌe hāpī mai o ruŋa i te Haka Tere o te ꞌAtua te vānaŋa kī era i ruŋa i a Daniel 2:⁠44?

¹⁶ Te vānaŋa pāpaꞌi era i ruŋa i a Daniel 2:⁠44, e kī rō ꞌā: “I te mahana o rā ŋā ꞌariki te ꞌAtua o ruŋa i te raŋi he haka tuꞌu e tahi haka tere ꞌe e ko haka kore ki te hora hopeꞌa. ꞌE te haka tere nei e ko haka tere e te rua kaīŋa. He haka huŋa⁠-⁠huŋa ꞌe he haka kore te ŋā ꞌariki nei, ꞌe a īa he noho he oho ki te hopeꞌa raꞌa”. ¿He aha te meꞌe hāpī mai te vānaŋa kī era e te profeta ko Daniel o ruŋa i te Haka Tere o te ꞌAtua?

¹⁷ Te meꞌe raꞌe, e hāpī mai ꞌā pe nei ē, te Haka Tere o te ꞌAtua he haꞌamata tōꞌona ꞌariki haŋa “i te mahana o rā ŋā ꞌariki”. Te haꞌauraꞌa o te vānaŋa nei, ka haꞌamata era te ꞌariki haŋa o te Haka Tere o te ꞌAtua, ko te ai haŋa ꞌā i rā hora te tahi atu haka tere taŋata. Te rua meꞌe, e hāpī rō mai ꞌā pe nei ē, te Haka Tere o te ꞌAtua ꞌina ōꞌona hopeꞌa ꞌe he noho he oho ki te hopeꞌa raꞌa. Te haka tere nei e ko mono e te rua haka tere. ꞌE te toru meꞌe, e hāpī rō mai ꞌā pe nei ē, te pūꞌoko haka tere taŋata o te ao taꞌatoꞌa he tamaꞌi ki te Haka Tere o te ꞌAtua. Mo te Haka Tere o te ꞌAtua e rē, ꞌe koia nō ka topa era mo ꞌariki i te henua taꞌatoꞌa. I rā hora ka ravaꞌa tahi era te taŋata i te haka tere hopeꞌa o te riva⁠-⁠riva mo rāua.

18. ¿Pe hē e raŋi ena ki tamaꞌi era o te ꞌAtua koia ko te pūꞌoko haka tere taŋata?

 ¹⁸ ¿He aha te meꞌe ka piri mai ena raꞌe ki te tamaꞌi te Haka Tere o te ꞌAtua ki te pūꞌoko haka tere taŋata o te ao taꞌatoꞌa? Te vārua rake⁠-⁠rake he reo⁠-⁠reo ki te pūꞌoko haka tere taŋata o te ao taꞌatoꞌa, ꞌe “he eꞌa he oho ananake he haka taka⁠-⁠taka i te ꞌariki taꞌatoꞌa o te ao, mo moto ki te ꞌAtua”. Te ꞌīŋoa o te tamaꞌi nei ko Aramaherone, ꞌe i te tamaꞌi nei te pūꞌoko haka tere taŋata he moto ki te Haka Tere o te ꞌAtua (Meꞌe Haka Takeꞌa [Apocalipsis] 16:⁠14, 16; Ka taiꞌo te Kona 10 mo ata hāpī).

19, 20. ¿O te aha e kī era i te Haka Tere o te ꞌAtua nō te rāveꞌa mau mo haka tere i te taŋata?

¹⁹ ¿O te aha e kī era i te Haka Tere o te ꞌAtua nō te rāveꞌa mau mo haka tere i te taŋata? Ka tahi, i te meꞌe era he taŋata hara tātou, oīra tātou e maiūi nei ꞌe peira ꞌā e mate nei. ꞌE hai Haka Tere o te ꞌAtua he ora tātou ki te hopeꞌa raꞌa. Te Pipiria e kī rō ꞌā: “I te rahi o te here o te ꞌAtua ki te taŋata o te ao taꞌatoꞌa he vaꞌai i tāꞌana poki aŋa era e Īa mau nō, mo te nuꞌu era e ai rō ꞌā te rāua fe i ruŋa i a īa ꞌina e ko mate, he ora ki te hopeꞌa raꞌa” (Juan 3:⁠16, TNM).

²⁰ Ka rua, o te ai te henua noho o tātou ko kau ꞌā e te taŋata rake⁠-⁠rake. Rahi nō te nuꞌu e aŋa e oho ena i te meꞌe taꞌe tano ki te mata o te ꞌAtua ꞌe ꞌina tātou e ko riva mo haka noho mo taꞌe aŋa i te ŋā meꞌe nei. Mā Iehoha nō e riva mo aŋa peira. Mo taꞌe haŋa rāua mo huri te rāua huru manaꞌu o ruŋa i te ŋā meꞌe nei, he toꞌo mai e Īa he haka kore i te tamaꞌi era o Aramaherone (Ka taiꞌo Salmo 37:⁠10). Ka toru, o te ai te haka tere taŋata he haka tere ꞌino, rake⁠-⁠rake ꞌe toke⁠-⁠toke, oīra e taꞌe riva ena mo haka tītika te ꞌati o te taŋata. Peira ꞌā, ꞌina he haŋa mo hāꞌūꞌū ki te taŋata mo riva rāua mo haka roŋo ki te ꞌAtua. Oīra te Pipiria e kī era o te haka tere e te taŋata ki te taŋata ꞌā he meꞌe rake⁠-⁠rake nō te meꞌe piri (Eclesiastés 8:⁠9).

21. ¿Pe hē te Haka Tere o te ꞌAtua ka riva ena mo aŋa te meꞌe haŋa era o te ꞌAtua?

²¹ Ki ꞌoti te tamaꞌi o Aramaherone, i rā hora mo te Haka Tere o te ꞌAtua e aŋa tāꞌana meꞌe haŋa. Pahe meꞌe era, he puru  i te Tātane rāua ko tāꞌana vārua rake⁠-⁠rake (Meꞌe Haka Takeꞌa [Apocalipsis] 20:⁠1-3). Takoꞌa e ko maiūi ꞌe e ko mate haka ꞌou te taŋata. Hai mate o Ietū, taꞌatoꞌa taŋata haka roŋo ki te ꞌAtua, he riva mo ora ki te hopeꞌa raꞌa i ruŋa i te henua nehe⁠-⁠nehe (Meꞌe Haka Takeꞌa [Apocalipsis] 22:⁠1-3; Ka taiꞌo te Kona 21 mo ata hāpī). Takoꞌa, te Haka Tere nei he haka maꞌitaki te ꞌīŋoa o te ꞌAtua. ¿He aha te haꞌauraꞌa o te haka maꞌitaki nei? Ka haka tere ena te henua e te Haka Tere o te ꞌAtua, he haka maꞌitaki te ꞌīŋoa o te ꞌAtua mai te reo⁠-⁠reo ꞌe vāvā kī era o ruŋa i a Īa ꞌe takoꞌa he moꞌa te taŋata taꞌatoꞌa tōꞌona ꞌīŋoa.

22. ¿Pe hē e ꞌite nei tātou pe nei ē, kai haka ꞌariki i tū hora ꞌā e Iehoha i a Ietū hora hoki era ki ruŋa i te raŋi?

²² Hora era i ruŋa i te henua a Ietū, i hāpī rō ki tāꞌana pukuraŋa mo pure, mo nonoꞌi: “Ka tuꞌu mai tuꞌu haka tere iŋa”. Hai vānaŋa nei e aŋi⁠-⁠aŋi nei tātou kai haꞌamata ꞌā te Haka Tere o te ꞌAtua i rā hora. E ai rō ꞌā te meꞌe raꞌe mo aŋa e Iehoha, he haka tuꞌu i tōꞌona Haka Tere ꞌe he haka ꞌariki i a Ietū. ¿Hora hoki era a Ietū ki ruŋa i te raŋi i tū hora ꞌā i haka ꞌariki ai i a īa? ꞌIna, e tiaki a īa he raꞌe. ¿Pe hē e ꞌite nei tātou peira mau ꞌā? I tano era te mahana o te haka ꞌora haka ꞌou i a Ietū a Pētero ꞌe a Pablo i haka tano rō te vānaŋa pāpaꞌi era i ruŋa i a Salmo 110:⁠1 i ruŋa i a Ietū. A rāua i haꞌauraꞌa ai  pe nei ē, te vānaŋa kī era i ruŋa, e vānaŋa rō ꞌā o ruŋa i a Ietū. I ruŋa i nei Salmo a Iehoha i kī: “Ka noho mai koe ꞌi tōꞌoku pāꞌiŋa mataꞌu, ꞌātā ka haka riro rō e au i te nuꞌu taꞌe haŋa atu ki a koe he meꞌe raŋo o tuꞌu vaꞌe” (Aŋa o te ꞌĀpōtoro 2:⁠32-35; ꞌEvereo 10:⁠12, 13). Te haꞌauraꞌa o nei vānaŋa, e tiaki a Ietu ki te hora ka haka ꞌariki era e Iehoha i a īa.

23. (a) ¿I matahiti hē i haꞌamata i ꞌariki ai a Ietū pahe ꞌariki o te Haka Tere o te ꞌAtua? (b) ¿He aha te meꞌe ka hāpī ena tātou ka huri ena te kaka parau nei?

²³ ¿I matahiti hē a Ietū i haꞌamata i ꞌariki ai? I te matahiti 1914. Rahi nō matahiti a tuꞌa ki te matahiti nei, te nunaꞌa māhatu riva e tahi, e hāpī era i te Pipiria, he aŋi⁠-⁠aŋi rāua pe nei ē, te matahiti 1914 e topa kē rō o te ai he haꞌamata he haka tano te vānaŋa kī era e te Pipiria i muꞌa ꞌā. Te ꞌati i piri ki te ao mai rā matahiti pē muꞌa, ko haka aŋi⁠-⁠aŋi mai ꞌā he parautiꞌa mau ꞌā tū meꞌe manaꞌu era o ruŋa i te matahiti 1914 pe nei ē, e topa kē rō rā matahiti, o te ai i rā matahiti i haka ꞌariki ai e Iehoha i a Ietū (Salmo 110:⁠2; Ka taiꞌo te Kona 22 mo ata hāpī). I hini iti era, he tute mai ruŋa i te raŋi i te Tātane ki ruŋa i te henua, ꞌe ko ꞌite ana a īa pe nei ē, hora iti⁠-⁠iti nō tōꞌona hora toe, raꞌe ki tōꞌona puru (Meꞌe Haka Takeꞌa [Apocalipsis] 12:⁠12). Ka huri ena te kaka parau nei, he hāpī pe hē e ꞌite nei tātou he hora iti⁠-⁠iti nō te hora toe. He hāpī takoꞌa tātou, ꞌina he hora toe nā te Haka Tere o te ꞌAtua he aŋa i te meꞌe haŋa o te ꞌAtua i ruŋa i te henua.