1. Коя молитва ка раздикхас?

БУТ мануша жанен и молитва „Отче наш“ или е Господариескери молитва. О Исусес пхенгяс дайкха молитва, за те сикавел пе ученикиен сар те молинен пес. За соске молисайло? Тай соске дайкха молитва си важно аменге авдиес?

2. Саве трине важноне букиенге сикавгяс амен те молинас амен о Исусес?

² О Исусес пхенгяс: „Адалкхеске молинен тумен ачука: ‘Амаро дад, ковато синян ко небес, те светинел пес торо алав [или те овел свято]. Те авел торо тхагарипе. Те овел тери воля сарто ко небес, ачука ки пхув–да’“. (Четине Матей 6:9–13.) Соске о Исусес сикавгяс амен те молинас амен далкхе трине букиенге? (Дикх и 20 бележка ко крайос далкхе лилесте.)

3. Со требе те жанас е Девлескере Тхагарипнаске?

³ Вече сиклилям, кай е Девлескоро алав си Йехова. Ахалилям давкха–да со мангел о Дел е манушенге тай е пхувяке. Ама со мангелас те пхенел о Исусес, кана пхенгяс „Те авел торо тхагарипе“? Ка ахальовас со си е Девлескоро Тхагарипе, со ка керел ов тай сар ка керел е Девлескоро алав свято.

4. Со си е Девлескоро Тхагарипе тай кова си лескоро Тхагар?

⁴ О Йехова кергяс йекх небесно правителство тай избирингяс е Исусес Тхагареске. Анди Библия давкха правителство пхенел пес е Девлескоро  Тхагарипе. О Исусес си „о Тхагар е тхагаренгоро тай о Господари е господариенгоро“. (Откровение 19:16) О Исусес ащи те керел по–бут лачшипе секоне йекхестар таро манушикане тхагара тай си по–зорало саворе манушикане тхагарендар заедно.

5. Катар ка управлинел е Девлескоро Тхагарипе? Со ка управлинел?

⁵ Саранда диеса палал о възкресение е Исусескоро, о Исусес ирисайло ко небес. По–късно о Йехова кергяс лес Тхагар пере Тхагарипнасте. (Деяния 2:33) Е Девлескоро Тхагарипе ка управлинел и пхув таро небес. (Откровение 11:15) Аке соске анди Библия е Девлескере Тхагарипнаске пхенел пес „небесно тхагарипе“. (2 Тимотей 4:18)

6, 7. Соске о Исусес си по–лачшо саворе манушикане тхагарендар?

⁶ И Библия пхенел, кай о Исусес си по–баро саворе манушикане тхагарендар, соскето ов си „о единствено, ковато нащи те мерел“. (1 Тимотей 6:16) Саворе манушикане тхагара мерен, ама о Исусес нисар нанай те мерел. Саворе лачше букя, колато ка керел о Исусес аменге, ка ачшовен вечно.

⁷ О пророчества тари Библия пхенен, кай о Исусес ка овел справедливо тай лачшо Тхагар: „Упрал лесте ка овел е Йеховаскоро духос. Ашал далкхеске ов ка овел пхаре гогякоро тай ка овел лес разбиране, ка дел шукар съвекя тай ка овел зорало, ка овел лес познание тай дар таро Йехова. И дар таро Йехова ка анел леске лошали. Нанай те съдинел според далкхесте со дикхел, нито ка дел съвекя според далкхесте со шунел. Ка съдинел праведно е чоре манушен.“ (Исаия 11:2–4) Мангес ли те овел тут савка Тхагар?

8. Катар жанас, кай о Исусес нанай те управлинел коркоро?

⁸ О Дел избирингяс десаве манушен те управлинен  е Исусеса андо небесно Тхагарипе. Например о апостол Павел пхенгяс е Тимотейеске: „Ако продължинас те издържинас, ка управлинас сар тхагара леса.“ (2 Тимотей 2:12) Кизом жене ка управлинен сар тхагара е Исусеса?

9. Кизом жене ка управлинен е Исусеса? Кана започнингяс те избиринел лен о Дел?

⁹ Сарто сиклилям андо 7 шеро, о апостол Йоан дикхляс видение, колесте о Исусес уло Тхагар ко небес тай леса уле 144 000 авер тхагара. Кола си о 144 000? О Йоанес пишингяс, кай ленгере „чекатенде сине пишиме [е Исусескоро] алав тай лескере Дадескоро алав“. Палал далкхесте пишингяс: „Он си далкха, колато пхирен палал о Бакро [ковато си о Исусес], кате–да те жал ов. Он уле кинде машкар о мануша.“ (Четине Откровение 14:1, 4.) О 144 000 си верна християня, колен избирингяс о Дел, за те „управлинен сар тхагара упрал и пхув“ е Исусеса. Кана мерен, он възкресингьон, за те живинен ко небес. (Откровение 5:10) Панда таро време, кана живинде о апостоля, о Йехова започнингяс те избиринел верноне християниен те овен таро 144 000 тхагара.

10. Соске давкха, кай о Исусес тай о 144 000 ка управлинен упрал о мануша, сикавел, кай о Йехова дехел амен?

¹⁰ Давкха, кай мануша ка управлинен е Исусеса, сикавел кизом бут дехел амен о Йехова. О Исусес ка овел лачшо Тхагар, соскето ахальовел амен. Ов жанел со си те овес мануш тай те овел тут пхарипе. О Павлес пхенгяс, кай о Исусес чувствинел амари дукх пе илесте, „ахальовел амаре слабоскя“ тай „уло изпитиме всичконасте сар аменде“. (Евреи 4:15; 5:8) О 144 000 също жанен со си те овес мануш. Он–да уле несъвършена тай бориненас пес е насвалипнаса. Адалкхеске ащи те овас сигурна, кай о Исусес  тай о 144 000 ка ахальовен амаре чувства тай амаре проблемя.

11. Соске о Исусес сикавгяс пе ученикиен те молинен пес те овел е Девлескери воля ко небес?

¹¹ О Исусес сикавгяс пе ученикиен те молинен пес те овел е Девлескери воля сарто ко небес, ачука ки пхув–да. Соске о Исусес пхенгяс те овел е Девлескери воля ко небес? Андо 3 шеро сиклилям, кай о Бенг ухтинило мамуй о Йехова. Палал далкхесте о Йехова позволингяс леске тай е неверноне ангеленге, или е демониенге, те ачшовен ко небес известно време. Адалкхеске ма саворе ко небес керенас е Девлескери воля. Андо 10 шеро ка ахальовас по–бут е Бенгеске тай е демониенге.

12. Саве до важноне букиенге хоратинел о стихи Откровение 12:10?

¹² И Библия сикавел, кай о Исусес ка ачшолас Тхагар анде Девлескоро Тхагарипе тай хари палал далкхесте ка водинелас война мамуй о Бенг. (Четине Откровение 12:7–10.) О 10 стихи хоратинел до важноне букиенге. Е Девлескоро Тхагарипе започнинел те управлинел е Исусеса сар Тхагар тай о Бенг си чшивдо таро небес, теле ки пхув. Сарто ка дикхас, далкха букя вече ачшиле.

13. Со ачшило ко небес, кана о Бенг уло гониме отхар?

¹³ И Библия пхенел, кай о верна ангеля бут лошанде, кана о Бенг тай о демоня уле гониме таро небес. Лате четинас: „Лошанен, туме о небеса, тай туме, колато живинен ленде!“ (Откровение 12:12) Акана ко небес никхой нанай мамуй о Дел.

14. Со ачшило ки пхув ашал далкхеске кай о Бенг уло гониме таро небес?

¹⁴ Ама ки пхув о животос си бут различно. Бут кханиле букя ачшон е манушенге, „соскето о Бенг ухлило“  тай си „бут нервериме, соскето жанел, кай ачшол лес хари време“. (Откровение 12:12) О Бенг си бут нервериме, соскето вече си гониме таро небес тай жанел, кай сиго ка овел мудардо. Ов керел всичко со ащи, за те овен проблемя, дукх тай страдания ки цело пхув.

15. Со мангел о Дел е пхувяке?

¹⁵ Ама давкха со мангел о Дел е пхувяке на променисайло. Ов панда мангел и пхув те овел рай тай лате те живинен вечно съвършена мануша. (Псалм 37:29) Сар е Девлескоро Тхагарипе ка керел те ачшол давкха?

16, 17. Со ахальовас таро Даниил 2:44 е Девлескере Тхагарипнаске?

¹⁶ О пророчество андо Даниил 2:44 пхенел: „Андо диеса далкхе тхагаренгере, о небесно Дел ка ваздел тхагарипе, ковато нисар нанай те овел унищожиме. Тай давкха тхагарипе нанай те пренакхел кариг авере народосте. Ов ка пхагел саворе далкха тхагарипнадес, а ов коркоро ка ачшовел завинаги.“ Со сикавел амен давкха пророчество е Девлескере Тхагарипнаске?

¹⁷ Първо, пхенел аменге, кай е Девлескоро Тхагарипе ка започнинелас те управлинел „андо диеса далкхе тхагаренгере“. Давкха означинел, кай о Тхагарипе ка започнинелас те управлинел, бискай ки пхув ка овенас авер правителства. Второ, пхенел аменге, кай е Девлескоро Тхагарипе ка ачшовел завинаги тай нисар нанай те овел авер правителство лескере тханесте. Тринто, ка овел война машкар о правителства далкхе светоскере тай е Девлескоро Тхагарипе. Е Девлескоро Тхагарипе ка побединел тай ка ачшол о единствено правителство, ковато ка управлинел  упрал и пхув. Тогава е манушен ка овел о най–лачшо правителство, ковато ащи те овел лен декхана.

18. Сар пхенел пес и последно война машкар о правителства далкхе светоскере тай е Девлескоро Тхагарипе?

¹⁸ Сар е Девлескоро Тхагарипе ка лел и власт упрал и пхув? Англал и последно война, колаке пхенел пес Армагедон, о демоня ка хохавен е целоне светоскере тхагарен, „за те киден лен ки война, която ка керел о Всемогъщо Дел пере баре диесесте“. О манушикане правителства ка водинен война мамуй е Девлескоро Тхагарипе. (Откровение 16:14, 16; дикх и 10 бележка ко крайос далкхе лилесте.)

19, 20. Соске требел аменге е Девлескоро Тхагарипе те управлинел упрал и пхув?

¹⁹ Соске требел аменге е Девлескоро Тхагарипе? Иси поне трин причинес. И първо си, кай аме синям безехале, адалкхеске насвальовас тай мерас. И Библия пхенел, кай кана ка авел е Девлескоро Тхагарипе, ка живинас вечно. Андо Йоан 3:16 четинас: „О Дел зомкха бут дехингяс о светос, кай диняс пе единородноне Чшавес, за те ащи секой, ковато верувинел лесте, те на овел унищожиме, а те живинел вечно“.

²⁰ И второ причина, ашал колаке требел аменге е Девлескоро Тхагарипе, си, кай живинас машкар кханиле манушенде. Бут лендар хохавен тай си неморална. Аме нащи те спиринас лен далкхестар те керен кханилипе, ама о Дел ащи. О мануша, колато продължинен те керен кханилипе, ка овен унищожиме ко Армагедон. (Четине Псалм 37:10.) И тринто причина, ашал колаке требел аменге е Девлескоро Тхагарипе, си, кай о манушикане правителства си кханиле, корумпирана тай нанай лен и сила те решинен о проблемя андо светос. Он на манген те помагинен е манушенге те шунен е Девлес. И Библия пхенел,  кай „мануш командинел манушес лескере кханилипнаске“. (Еклисиаст 8:9)

21. Сар е Девлескоро Тхагарипе ка керел те ачшол е Девлескери воля ки пхув?

²¹ Палал о Армагедон е Девлескоро Тхагарипе ка керел те ачшол е Девлескери воля ки пхув. Например ка махнинел е Бенгес тай е демониен. (Откровение 20:1–3) Вече никхой нанай те насвальовел тай те мерел. Ашал далкхеске кай о Исусес диняс по животос сар откупи, саворе верна мануша ка живинен вечно андо рай. (Откровение 22:1–3) О Тхагарипе ка осветинел е Девлескоро алав. Со означинел давкха? Давкха означинел, кай кана е Девлескоро правителство ка управлинел упрал и пхув, саворе мануша ка славинен е Девлескоро алав. (Дикх и 21 бележка ко крайос далкхе лилесте.)

22. Катар жанас, кай о Исусес на ачшило Тхагар, кана уло ки пхув нито веднага, кана уло възкресиме?

²² О Исусес сикавгяс пе ученикиен те молинен пес: „Те авел торо тхагарипе.“ Далкхестар ахальовас, кай е Девлескоро Тхагарипе ка авелас андо бъдеще. О Йехова първо ка вазделас поро Тхагарипе тай ка керелас е Исусес Тхагар. Дали о Исусес ачшило Тхагар веднага, кана ирисайло ко небес? На–а, требелас те  жарел. Хари време палал е Исусескоро възкресение, о Петрес тай о Павлес сикавде, кай уло чука, кана пхенде, кай о стихи Псалм 110:1 хоратинел е Исусеске. Лесте о Йехова пхенел: „Беш ме десноне ригатар, бискай на тховав те душманиен телал те пиренде.“ (Деяния 2:32–35; Евреи 10:12, 13)

23. а) Кана о Исусес започнингяс те управлинел сар Тхагар анде Девлескоро Тхагарипе? б) Со ка сикльовас андо следващо шеро?

²³ Кана започнингяс те управлинел о Исусес? Презал о 1914 бреш. Бут бреша англал далкхесте, йекх група искрена християня ахалиле, кай далкхе брешестар ка започнинен те изпълнингьон бут пророчества тари Библия. О букя, колато ачшиле андо светос таро 1914 бреш, сикавен, кай он уле права. О Исусес започнингяс те управлинел сар Тхагар далкхе брешесте. (Псалм 110:2) Хари палал далкхесте о Бенг сине чшивдо теле ки пхув тай акана „ачшол лес хари време“. (Откровение 12:12) Анди Библия далкхе времеске пхенел пес „последна диеса“. Андо следващо шеро ка дикхас авер–да букя, колато сикавен аменге, кай живинас далкхе диесенде. Също ка сикльовас, кай бут сиго е Девлескоро Тхагарипе ка керел те ачшол е Девлескери воля ки пхув. (Дикх и 22 бележка ко крайос далкхе лилесте.)