1. Fu sortu begi wi o taki?

MILYUNMILYUN sma sabi a Wi Tata begi. Nanga a begi disi, Yesus ben wani leri den disipel fu en fa den musu begi. Fu san a ben begi? Fu san ede a begi disi prenspari gi wi na ini a ten disi?

2. Fu sortu dri sani Yesus leri wi fu begi?

² Yesus ben taki: „Fu dati ede un musu begi so: ’Wi Tata na hemel, meki yu nen de santa. Meki yu Kownukondre kon. Meki yu wani pasa na grontapu soleki fa a e pasa na hemel.’” (Leisi Mateyus 6:9-13.) Fu san ede Yesus leri wi fu begi fu den dri sani dati?—Luku „Ete wan tu sani” 20.

3. San wi musu sabi fu Gado Kownukondre?

³ Wi leri taki Gado nen na Yehovah. Wi ben leri tu san Gado wani gi libisma nanga grontapu. Ma san Yesus ben wani sori wi di a taki: „Meki yu Kownukondre kon”? Wi o leri san na a Kownukondre fu Gado, san a o du, èn fa a o meki a nen fu Gado kon santa.

4. San na a Kownukondre fu Gado èn suma na a Kownu fu en?

⁴ Yehovah seti wan regering na ini hemel èn a poti Yesus leki Kownu fu a regering disi. Bijbel e kari a regering disi a Kownukondre fu Gado. Yesus na „Kownu fu den wan di e tiri leki kownu èn Masra fu den wan di e tiri leki masra” (1 Timoteyus 6:15). Nowan enkri  libisma tiriman man du den bun sani di Yesus man du gi libisma. Èn awinsi yu tyari ala libisma tiriman kon na wán, toku Yesus abi makti moro den alamala.

5. Pe a Kownukondre fu Gado de, èn san a o tiri?

⁵ Fotenti dei baka di Yesus kisi wan opobaka, a drai go baka na hemel. Te fu kaba Yehovah poti en leki Kownu fu a Kownukondre (Tori fu den apostel 2:33). A Kownukondre fu Gado de na hemel èn a o tiri heri grontapu (Openbaring 11:15). Dati meki Bijbel e kari en, wan „Kownukondre na hemel”.—2 Timoteyus 4:18.

6, 7. Fu san ede Yesus bun moro ala libisma kownu?

⁶ Bijbel e sori taki Yesus bun moro iniwan kownu na grontapu fu di „en na a wan-enkri sma di no man dede” (1 Timoteyus 6:16). Ala libisma tiriman e dede te fu kaba, ma noiti Yesus o dede. Ala den bun sani di Yesus o du gi wi, o tan fu ala ten.

⁷ Bijbel profeititori e taki dati Yesus o de wan Kownu di e du san reti èn di abi sari-ati. „A yeye fu Yehovah o de na en tapu. Fu dati ede a o koni, a o frustan sani bun, a o gi bun rai, a o tranga, a o abi furu sabi èn a o abi bigi lespeki gi Yehovah. A o feni en wan prisiri sani fu sori lespeki gi Yehovah. Te a o koti krutu, a no o poti prakseri nomo na san en ai si. Te a o piri-ai gi sma, a no o poti prakseri nomo na san en yesi yere. Na wan reti fasi a o koti krutu gi den mofinawan” (Yesaya 11:2-4). Yu no ben o wani so wan kownu?

8. Fa wi du sabi taki a no Yesus wawan o tiri?

⁸ Gado teki son libisma fu tiri nanga Yesus ini hemel. Dati meki na apostel Paulus ben taigi Timoteyus:  ’Efu wi tan horidoro, dan wi o tiri leki kownu makandra nanga Yesus tu’ (2 Timoteyus 2:12). Omeni sma o tiri leki kownu makandra nanga Yesus?

9. Omeni sma o tiri makandra nanga Yesus? O ten Gado bigin teki den sma disi?

⁹ Soleki fa wi ben leri na ini kapitel 7, dan na apostel Yohanes ben kisi wan fisyun pe a ben si Yesus leki Kownu na ini hemel makandra nanga 144.000 tra kownu. Suma na den 144.000 kownu disi? Yohanes taki: „Den e tan waka na baka a Pikin Skapu [dati na Yesus] awansi pe a e go. Den na den fosiwan di bai puru na mindri libisma.” (Leisi Openbaring 14:1, 4.) Den 144.000 sma disi na Kresten di tan gi yesi na Gado èn di a teki fu „tiri grontapu leki kownu” makandra nanga Yesus. Te den dede, den e kisi wan opobaka fu libi na ini hemel (Openbaring 5:10). Sensi a yari 33, Yehovah bigin teki reti-ati Kresten fu de na ini a grupu fu den 144.000 sma di o tiri leki kownu.

10. Yehovah poti Yesus nanga 144.000 libisma fu tiri wi. Fa a seti disi e sori taki Yehovah lobi wi?

¹⁰ Yehovah lobi wi so te taki a teki libisma fu tiri nanga Yesus. Yesus o de wan bun tiriman fu di a e frustan wi. A sabi san a wani taki fu nyan pina leki libisma. Paulus ben taki dati Yesus e firi gi wi, a e „frustan den swakifasi fu wi” èn a „kisi tesi na ala fasi neleki wi” (Hebrewsma 4:15; 5:8). Den 144.000 sma di o tiri nanga Yesus ben de libisma neleki wi. Den ben e siki tu èn den ben e feti nanga den sondu firi fu den. Sobun, wi kan de seiker taki Yesus nanga den 144.000 tra kownu no o frustan nomo fa wi e firi, ma den o frustan tu sortu problema wi abi.

11. Na ala ten a ben de so taki ala sma na ini hemel ben e du a wani fu Gado?

¹¹ Fu san ede Yesus ben leri den disipel fu en fu begi taki a wani fu Gado pasa na grontapu soleki fa a e pasa ini hemel? Na ini kapitel 3, wi ben leri taki Satan Didibri no ben wani arki Yehovah moro. Di dati pasa, dan Yehovah no yagi Satan nanga den tra engel di ben trangayesi en komoto fu hemel wantewante. Sobun, na a ten dati a no ala engel na ini hemel ben e du a wani fu Gado. Na ini kapitel 10, wi o leri moro fu Satan nanga den engel dati di Bijbel e kari ogri yeye.

12. Fu sortu tu prenspari sani Openbaring 12:10 e taki?

¹² Bijbel e sori taki syatu baka di Gado poti Yesus leki Kownu fu Gado Kownukondre, a go feti nanga Satan. (Leisi Openbaring 12:7-10.) Vers 10 e taki fu tu prenspari sani di pasa. Yesus bigin tiri leki Kownu fu Gado Kownukondre èn a trowe Satan komoto fu hemel kon na grontapu. Soleki fa wi o leri, dan den sani disi pasa kaba.

13. San pasa na ini hemel di den fringi Satan komoto fu drape?

¹³ Bijbel e sori fa den tra engel na ini hemel ben prisiri baka di Satan nanga den ogri yeye fringi komoto fu hemel. Openbaring 12:12 e taki: „Prisiri, un hemel èn unu di e libi drape!” Now freide nanga wánfasi de na ini hemel, fu di ala sma drape e du a wani fu Gado.

14. San e pasa na grontapu fu di den fringi Satan komoto fu hemel?

¹⁴ Ma a libi na grontapu kon moro ogri. Furu sari sani e pasa nanga libisma fu di „Didibri saka kon” na grontapu. „A abi bigi atibron fu di a sabi taki en ten syatu” (Openbaring 12:12). Satan abi bigi atibron.  Den ben trowe en komoto fu hemel èn a sabi taki heri esi a o kisi pori. A e du ala san a man fu tyari problema, pina, nanga sari kon na heri grontapu.

15. San Gado wani gi grontapu?

¹⁵ Ma Gado no kenki prakseri. Te nanga now a wani taki libisma libi fu têgo na ini wan paradijs na grontapu (Psalm 37:29). Sobun, fa Gado Kownukondre o sorgu taki a sani disi pasa?

16, 17. San Danièl 2:44 e leri wi fu Gado Kownukondre?

¹⁶ A profeititori na Danièl 2:44 e taki: „Na ini a ten fu den kownu dati, a Gado fu hemel o seti wan kownukondre di noiti no o kisi pori. A kownukondre srefi no o gi na nowan tra pipel. A o broko ala den kownukondre disi pisipisi èn a o tyari wan kaba kon na den. A kownukondre srefi o tan fu têgo.” San a profeititori disi e leri wi fu Gado Kownukondre?

¹⁷ A fosi sani, na taki Gado Kownukondre ben o bigin tiri „na ini a ten fu den kownu dati”. Disi e sori taki tra regering ben o tiri grontapu ete, te Gado Kownukondre bigin tiri. A di fu tu sani, na taki Gado Kownukondre ben o tan fu ala ten èn noiti wan tra regering ben o kon na en presi. A di fu dri sani, na taki feti ben o de na mindri Gado Kownukondre nanga den regering fu a grontapu disi. Gado Kownukondre ben o wini a feti disi èn a ben o tron a wan-enkri regering di e tiri grontapu. Dan libisma o abi a moro bun regering di de.

18. San na a nen fu a lasti feti fu Gado Kownukondre nanga den regering fu grontapu?

¹⁸ San o pasa syatu fosi a feti na mindri den regering fu grontapu nanga a Kownukondre fu Gado? Fosi a  lasti feti dati, di Bijbel e kari Armagedon, den ogri yeye o kori „ala den kownu na heri grontapu, so taki den kan kon na wán fu feti a feti na a bigi dei fu Gado na Almaktiwan”. Iya, den kownu fu grontapu o go feti nanga Gado Kownukondre, ma Gado Kownukondre o wini.—Openbaring 16:14, 16; luku „Ete wan tu sani” 10.

19, 20. Fu san ede wi abi Gado Kownukondre fanowdu?

¹⁹ Fu san ede wi abi a Kownukondre fu Gado fanowdu? Wi o taki fu dri sani. A fosiwan, na taki wi na sondusma èn dati meki wi e siki èn wi e dede. Ma Bijbel e taki dati te Gado Kownukondre o tiri, wi o libi fu têgo. Dati meki Yohanes 3:16 e taki: „Gado ben lobi grontapu so te, taki a gi en wan-enkri Manpikin, so taki ala sma di e bribi na ini en no sa dede, ma sa kisi têgo libi.”

²⁰ A di fu tu sani fu san ede wi abi Gado Kownukondre fanowdu, na taki ogri sma lai na grontapu. Furu fu den e lei, den e bedrigi trawan, èn den libi wan huru libi. Wi no man tapu den sma disi fu du ogri. Ma fu di den no wani kenki, meki Gado o kiri den na ini Armagedon. (Leisi Psalm 37:10.) A di fu dri sani fu san ede wi abi Gado Kownukondre fanowdu, na taki den regering fu libisma no abi nofo makti fu lusu den problema fu libisma, den e pina sma èn den kruka. Den no wani yepi sma fu gi yesi na Gado. Bijbel e taki dati „sensi di libisma bigin tiri tra libisma, sani no waka bun gi den”.—Preikiman 8:9.

21. Fa a Kownukondre o sorgu taki a wani fu Gado pasa na grontapu?

²¹ Baka Armagedon, Gado Kownukondre o sorgu  taki a wani fu Gado pasa na grontapu. Wan fu den sani di a o du, na taki a o fringi Satan nanga den ogri yeye go na ini wan dipi peti èn a o sroto den dusun yari (Openbaring 20:1-3). Te fu kaba, nowan sma o kon siki noso dede moro. A lusu-paiman o meki taki ala libisma di e gi yesi na Gado o libi fu têgo na ini Paradijs (Openbaring 22:1-3). A Kownukondre o santa a nen fu Gado. San disi wani taki? Disi wani taki dati te Gado Kownukondre o tiri grontapu, dan ala libisma o lespeki Yehovah nen. Nowan sma no o du noso taki wan sani di o gi Gado porinen.—Luku „Ete wan tu sani” 21.

22. Fa wi du sabi taki Yesus no tron Kownu di a ben de na grontapu noso wantewante baka di a kisi wan opobaka?

²² Yesus ben leri den disipel fu en fu begi: „Meki yu Kownukondre kon.” Disi e sori krin taki Gado Kownukondre ben musu kon ete. Yehovah ben o seti en Kownukondre fosi, èn baka dati a ben o poti Yesus leki Kownu. Yesus ben tron Kownu wantewante di a go baka na hemel? Nôno, a ben musu wakti. Petrus  nanga Paulus ben tyari a tori disi kon na krin. Wan pisi ten baka di Yesus kisi wan opobaka, den sori taki a profeititori fu Psalm 110:1, ben abi fu du nanga Yesus. Na ini a profeititori dati Yehovah e taki: „Sidon na mi reti-anusei, teleki mi poti yu feanti leki wan bangi gi yu futu” (Tori fu den apostel 2:32-35; Hebrewsma 10:12, 13). O langa Yesus ben musu wakti fosi Yehovah meki a tron Kownu?

23. (a) O ten Yesus bigin tiri leki Kownu fu Gado Kownukondre? (b) San wi o leri na ini a tra kapitel?

²³ Furu yari fosi 1914, wan grupu reti-ati Kresten ben frustan taki prenspari Bijbel profeititori ben o kon tru na ini a yari disi. Den sani di pasa na grontapu sensi a yari 1914, ben sori taki den ben abi leti. Yesus bigin tiri leki Kownu na ini a yari dati (Psalm 110:2). Syatu baka dati, a trowe Satan kon na grontapu. Bijbel e taki dati Satan „en ten syatu” (Openbaring 12:12). Na ini a tra kapitel, wi o si moro krin taki wi e libi na ini a syatu ten dati. Wi o leri tu taki heri esi Gado Kownukondre o sorgu taki a wani fu Gado pasa na grontapu.—Luku „Ete wan tu sani” 22.