1. Tuli kulondoluela lipepo ki limanikile saana?

 MAMILIONI a bantu bamanine lipepo limanikile saana lili lyakuutua lipepo lya Baba Weetu, ao Lipepo Lyakue Mulopue. Yesu waabombiizie leelio lipepo eevi kubasambilizia basambi bakue vya kupepa. Waalombele ki mu lipepo lyakue? Kabili, juu ya ki leelio lipepo ni lya mana kuli fwefue leenu?

2. Yesu waatusambiliziizie tupepe palua bintu ki bitatu bya mana?

² Yesu waalandile nangue: “Kansi, mupalile kupepa eevi: ‘Wee Baba weetu wa ku muulu, liina lyobe liswesiiwe [ao, lyalulue litakatiifu]. Bukolo bobe buize. Kutona kobe kukitike, ku muulu, kabili ni pa kyalo.’” (Soma Mateo 6:9-13, NWT.) Juu ya ki Yesu waatusambiliziizie kupepa palua beebio bintu bitatu?​—Mona Bulondolozi Bunge bwa 20 ku lubali lwa 216.

3. Tukabiile kumana ki palua Bukolo bwakue Leeza?

³ Twakisambilila nangue liina lyakue Leeza ni Yehova. Kabili twakilondoluela kutona kwakue Leeza palua bantu ni kyalo. Inzi, Yesu waali wakebele kulanda ki musita lwaalandile nangue: “Bukolo bobe buize”? Twakaba kusambilila kine Bukolo Bwakue Leeza ni kiki, bwakaba kukita ki, kabili vibwakaba kuswesia liina lyakue Leeza.

4. Bukolo Bwakue Leeza ni kiki, ni Likolo wa Bukolo bobo naani?

⁴ Yehova waaimikile buteeko ku muulu ni kumusaakula Yesu kuba Likolo wa buteeko bobo. Bibilia ili yakuuta buteeko bobo kuba Bukolo Bwakue Leeza. Yesu  ni “Mulopue wa balopue ni Likolo lya makolo.” (Nfyulo 17:14) Yesu ali ni buviinde bwa kukita bintu bingi biweeme kukila muntu yeyonse ali kateeka, kabili ali ni maka engi kukila bantu bonse bakateeka bakolonghaniiziwe pamo.

5. Bukolo Bwakue Leeza bwakateeka bwali ku pi? Bwakateeka kiki?

⁵ Nsiku makumi ana kisia kutuntumunua kwakue, Yesu waabwelele ku muulu. Kupuako, Yehova waafikiile kumwalula Likolo wa Bukolo. (Miilo 2:33) Bukolo Bwakue Leeza bwakaba kuteeka kyalo kyonse bwali ku muulu. (Nfyulo 11:15) I kilengele Bibilia iye yakuuta Bukolo Bwakue Leeza kuba “Bukolo bwa ku muulu.”​—2 Timoteo 4:18, NWT.

6, 7. Ni kiki kilengele Yesu akile kuwaama kukila ba makolo bange bonse?

⁶ Bibilia ili yalanda nangue Yesu ni mukulu kukila muntu yeyonse kateeka paantu ni “weene bunke bwakue asiviinda kufua.” (1 Timoteo 6:16, NWT) Bantu bonse bali bateeka bali bafua, inzi Yesu takafuapo ata limo. Bintu byonse biweeme byakatukitila Yesu, byakatwalilila loonse.

⁷ Bukabika bwa mu Bibilia buli bwalanda nangue Yesu wakaba Likolo wa nsaambu ni nkumbu: “Mupasi wakue Yehova wakeekala pali weene, mupasi wa mulangue ni wa kwinika, mupasi wa musoko ni wa maka, mupasi wa kumana ni wa kumutiina Yehova. Kabili wakasekelela mu kumutiina Yehova. Takapingula kukoonkana ni keelia kyamoneka pa menso akue, aosie kusasilila [ao, kusoka] kukoonkana ni bintu byaunvuasie na matui akue. Wakapingula muntu wa pansi [ao, mupabi] mu nsaambu.” (Isaya 11:2-4) Eba, uli kutona Likolo obe aye waali evio?

8. Twamana siani nangue Yesu takateeka walisie bunke?

⁸ Leeza asakuile bantu kampanda bakuteeka pamo ni  Yesu, mu buteeko bwa ku muulu. Kwa mufuano, mutumua Paulo waamulandile Timoteo nangue: “Kine twatwalilila kusipikizia, twakateeka pamo twali ba makolo.” (2 Timoteo 2:12, NWT) Ni bantu banga bakateeka pamo ni Yesu baali ba makolo?

9. Ni bantu banga bakateeka pamo ni Yesu? Leeza waatendekele kubasaakula mu nsita ki?

⁹ Nga vitwakisambilila mu Lyasi lya 7, mutumua Yoane baamulangisiizie mu kimonua, Yesu waali Likolo ku muulu pamo ni makolo ange mia makumi ana na bana elufu (144 000). Baba bantu 144 000 ni baani? Yoane walondolola nangue “baali ni Liina lyakua Mwana mukooko [Yesu] ni Liina lyakua Se [ao, Baba wakue] pa mpala yabo.” Kabili watwalilila kulanda eevi: “Baali bamukonkele Mwana mukooko [i kulanda Yesu] konse kuali waya. Balubuilue [ao, basitilue] mu bantu.” (Soma Nfyulo 14:1, 4.) Bakristu bakisinka mia makumi ana na bana elufu (144 000), basaakuilue eevi “kuteeka pa kyalo kyonse baali ba makolo,” baali pamo ni Yesu. Musita ubali bafua, bali batuntumunua ni kuya kwikala ku muulu. (Nfyulo 5:10, NWT) Kutendeka mu nsita ya batumua, Yehova akitwaliliile kusaakula Bakristu bakisinka baye baali seemu ya leelio libumba lya ba makolo 144 000.

10. Juu ya ki Yesu kuya waali pamo ni bantu 144 000 eevi kuteeka bantu, kulangiliile nangue Yehova atutonene?

¹⁰ Paantu Yehova ali watwemena saana, waakuete mupaango wa kukeba bantu bakuteeka pamo ni Yesu. Yesu wakaba kateeka aweeme paantu atumanine buino. Amanine buino bantu ni kwema kwabo. Paulo waalandile nangue Yesu ali watunvuila nkumbu, kunti “waunvuila nkumbu butope bwetu,” kabili “waeziiziwe mu bintu byonse nga fwefue benka.” (Baebrania 4:15, NWT; 5:8, NWT) Bantu mia makumi ana na  bana elufu (144 000) ni beene, bamanine aali ya bumuntu. Kabili baaluisiizie kusipuililika ni maluele. Pakaako kunti twaaluka ni kisinka nangue Yesu pamo ni bantu mia makumi ana na bana elufu (144 000), bakenika buino apana sie vituli twaunvua, inzi ni maavia atuli twasipikizia.

11. Juu ya ki Yesu waabasambiliziizie basambi bakue bapepe kutona kwakue Leeza kukitike ku muulu?

¹¹ Yesu waabasambiliziizie basambi bakue bapepe, eevi kutona kwakue Leeza kukitike ku muulu ni pa kyalo. Juu ya ki waabalandile baloombe kutona kwakue Leeza kukitike ku muulu? Mu Lyasi lya 3 twasambiliile nangue Sataana Kibanda waasangukile kuli Yehova. Kisia Sataana kusanguka, Yehova waamulekeleele weene pamo ni ba malaika basili bakisinka ao bibanda, beekale ku muulu mu nsita kampanda. Kansi te bonse baali baakita kutona kwakue Leeza, ku muulu. Mu Lyasi lya 10, twakasambilila bingi palwakue Sataana ni bibanda.

12. Ni bintu ki bibili bya mana bilondolwelue mu Nfyulo 12:10?

¹² Bibilia ili yalondolola nangue kisiasie Yesu kwalulua Likolo wa Bukolo Bwakue Leeza, waali wa kuluana ni Sataana. (Soma Nfyulo 12:7-10.) Mulongo wa 10 walondolola bintu bibili bya mana. Bukolo Bwakue Leeza bwatendeka kuteeka Yesu wali Likolo, kabili Sataana wakumbua ku muulu ni kupoozua pa kyalo. Nga, vitwakaba kusambilila, bintu beebio byakitikile kale.

13. Ku muulu kwaalukile siani musita Sataana lwaakumbilueko?

¹³ Bibilia ili yalondolola nsaansa yaunvuile bamalaika bakisinka, musita lwakumbilue Sataana ni bibanda byakue kufuma ku muulu. Twasoma eevi: “Mwe myulu ni bekeelemo bonse waminue [ao, saansamuke]!” (Nfyulo 12:12) Loonu, ku muulu kuli mutende wine-wine ni  buumo paantu kila umo kooko, ali mukukita kutona kwakue Leeza.

14. Ku kyalo kwaaluka siani paantu Kibanda wakumbua kufuma ku muulu?

¹⁴ Inzi buikazi pa kyalo bwibeleele kakiine. Bintu bibiipile bili mukukitika ku bantu “paantu Kibanda wakookela pansi” kabili onvuile “kipuki kikata, paantu amanine nangue asialiiluesie na musita uniini.” (Nfyulo 12:12, NWT) Sataana afipilue. Akumbilue kufuma ku muulu, kabili amanine nangue wakaba kwinoonua leenusie. Ali mukukita maka akue onse eevi kuleeta maavia, misa ni bukyuzi pa kyalo kyonse.

15. Kutona kwakue Leeza ni kiki palua kyalo?

¹⁵ Inzi, kutona kwakue Leeza palua kyalo tekunapilibuke. Akitonenesie bantu bapuililikile beekale loonse mu paradiso pa kyalo. (Malumbo 37:29) Pakaako, Bukolo Bwakue Leeza bwakafikilizia siani kutona kwakue?

16, 17. Danieli 2:44 ili yatubuila ki palua Bukolo Bwakue Leeza?

¹⁶ Bukabika buli mu Danieli 2:44 buli bwalanda eevi: “Mu nsiku ya ba makolo babo, Leeza wa ku muulu waakemika Bukolo busikenoonuapo ata limo. Kabili Bukolo bobo tebukapeelua muntu unge yeyonse. Bwakavunga ni kupwisia aza ma bukolo ange, ni buene bunke bwakeemana loonse.” Bukabika bobo bwatusambiliziaki palua Bukolo Bwakue Leeza?

¹⁷ Kya mambo, twabuilua nangue Bukolo Bwakue Leeza ni bwa kutendeka kuteeka “mu nsiku ya ba makolo babo.” I kulanda nangue buteeko bunge bupalile kuya bwakilipo pa kyalo, musita Bukolo lubwatendeka kuteeka. Kya bubili, bukabika bwatubuila nangue Bukolo Bwakue Leeza ni bwakutwalilila loonse, kabili te bukapyanua na buteeko bunge. Ni kya butatu, kupalile kuya kwali vita pakati ka Bukolo Bwakue Leeza ni buteeko bwa  keenu kyalo. Bukolo Bwakue Leeza bwakuanzia, kabili ni kwaluka buene bunke, buteeko bwa kyalo kyonse. Kupuako, bantu bakapata buteeko buweeme bubasinapatepo ata limo.

18. Vita ya mpeleezio pakati ka Bukolo Bwakue Leeza ni buteeko bwa keenu kyalo ili yakuutua siani?

¹⁸ Bukolo Bwakue Leeza bwakafumiapo siani buteeko bwa pa kyalo? Ntaanzi ya vita ya mpeleezio ili yakuutua Armagedoni, bibanda byakaba kubeepa ‘makolo a mu kyalo kyonse kuti bibakolonghanie ku bului bwa [ao, vita ya] busiku bukata bwakue Leeza Wamaka Onse.’ Een, buteeko bwa bantu bwakaba kuluana ni Bukolo Bwakue Leeza.​—Nfyulo 16:14, 16; mona Bulondolozi Bunge bwa 10 ku lubali lwa 210.

19, 20. Juu ya ki tukabiile Bukolo Bwakue Leeza buteeke kyalo kyonse?

¹⁹ Juu ya ki tukabiile Bukolo Bwakue Leeza? Kuli nsaambu itatu eevi. Ya kuanza, tuli ba mazaambi, pakaako tuli twaluala ni kufua. Inzi Bibilia ili yalanda nangue mu Bukolo Bwakue Leeza, twakeekala loonse. Lileembo lya Yoane 3:16 lili lyalanda eevi: “Paantu Leeza waatonesie bantu ba mu kyalo, i kiapeeleele Muana wakue lyonga, eevi kubalua muntu wamuketekela tekuti azeeze, inzi aye wali ni bukose bwa muyayaya.”

²⁰ Nsaambu ya bubili ilengiizie tuye twakabiile Bukolo Bwakue Leeza, ni paantu tuzyungulukiilue na bantu babiipile. Bantu bengi bali babeepa ni kwiba ni kukita bintu bya bupungue. Tetuviinda kukita ata kantu eevi kubafumiapo bantu baabo, inzi Leeza weene wakaviinda. Bantu batwaliliile kukita bintu bibiipile, bakaba kwinoonua musita wa Armagedoni. (Soma Malumbo 37:10.) Ni ya butatu ilengiizie tuye twakabiile Bukolo Bwakue Leeza ni paantu ma buteeko a bantu te ali na buviinde, te ali na nkumbu, ali atona bitulilo. Teezi kupooza maano mu  kukwasia bantu bamunakile Leeza. Bibilia ili yalanda nangue “muntu ateekele muntu mwinakue eevi kumukisia.”​—Kasimika 8:9.

21. Bukolo Bwakue Leeza bwakasininkizia siani nangue kutona kwakue Leeza kwakitika pa kyalo?

²¹ Kisia Armagedoni, Bukolo Bwakue Leeza bwakasininkizia nangue kutona kwakue Leeza kwakitika pa kyalo. Kwa mufuano, bwakamufumiapo Sataana ni bibanda byakue. (Nfyulo 20:1-3) Kupuako, tekuli muntu wakaluala ao kufua. Kupitila kilubula mulandu, Bantu bonse bakisinka bakaviinda kwikala loonse mu Paradiso. (Nfyulo 22:1-3) Bukolo bwakaswesia liina lyakue Leeza. I kulanda siani? I kulanda nangue musita buteeko bwakue Leeza lubwakateeka kyalo, bantu bonse bakakindika liina lyakue Yehova.​—Mona Bulondolozi Bunge bwa 21 ku lubali lwa 216.

22. Twamana siani nangue Yesu taalukile Likolo musita lwaali pa kyalo ao kisiasie kutuntumunua?

²² Yesu waabasambiliziizie basambi bakue kupepa eevi: “Bukolo bobe buize.” Pakaako, ni paswetele nangue buteeko bwakue Leeza ni bwakuiza musita uli mukuiza. Yehova wa kutendekezia buteeko bwakue ni kumwalula Yesu Likolo wa Bukolo bobo. Eba, Yesu waalwilue Likolo kisiasie kubuela ku muulu? Ata, waali wa kupembelelanke.  Musita kampanda kisia kutuntumunua kwakue Yesu, Paulo ni Petro baalangiliile kaako paswetele musita lubalandiile bukabika buli mu Malumbo 110:1 palwakue Yesu. Mu bukabika bobo Yehova walanda eevi: ‘Ikala pano ku kulio kwane mpaka mbiike balwani bobe nga kinyantilo pensina makasa obe.’ (Miilo 2:32-35; Baebrania 10:12, 13) Eba, Yesu waali wapalile kupembelela nsita inga ntaanzi Yehova amwalule Likolo?

23. (a) Yesu waatendekele kuteeka musita ki waali Likolo wa buteeko bwakue Leeza? (b) Twakaba kusambilila ki mu lyasi likoonkelepo?

²³ Miaka ingi ntaanzi ya muaka wa elufu imo mia kenda ni likumi na tuna (1914), kikundi kya Bakristu bakisinka, baamanine nangue ozo wakaba muaka wa mana saana mu bukabika buli mu Bibilia. Bintu bili mukukitika mu kyalo kutendeka mu 1914 bilangiliile nangue baalandile kisinka. Yesu waatendekele kuteeka waali Likolo mu ozo wenka muaka. (Malumbo 110:2) Nsita iniinisie kisia paapo, Sataana waapoozelue ku kyalo, ni loonu ‘musita wakue wakeepa.’ (Nfyulo 12:12, NWT) Mu lyasi likoonkelepo, twakaba kumona bintu bingi bisininkiziizie nangue twikeele mu nsita ezio. Twakaba kabili kusambilila nangue leenusie Bukolo Bwakue Leeza bwakasininkizia nangue kutona kwakue Leeza kwakitika pa kyalo.​—Mona Bulondolozi Bunge bwa 22 ku lubali lwa 217.