1. Inogne ty vavake malaza hodinehentikagne?

NDATY an-tapetrisa’e ty mahafantatse ty vavake malaza atao tihoe Rae’ay amy i Lagnitsey ao, ndra ty Vavake Nampianare i Tompo. Nampiasa o vavake iohoe ty Jesosy mba hampianaragne i mpiana’e rey hivavake. Ino ty raha nangatahe’e, sady nagninogne ro lahibey amantikagne o vavake iohoe?

2. Raha telo lahibey inogne ty teà i Jesosy hangatahentikagne naho fa mivavake?

² Hoe ty Jesosy: “Le mivavaha hoe izao nareo: ‘Rae’ay amy i lagnitsey ao, hohamasinegne abey ty tahina’o [ndra, holiovegne]. Ho avy abey i Fanjakà’oy! Hanoegne an-tane etoy abey ze zoton’arofo’o hambagne amy ty an-dagnitse agne!’ ” (Vakio Matio 6:9-13.) Nagnino ty Jesosy ro nampianatse antikagne hivavake ty miomba o raha telo rehoe?—Henteo ty Fagnazavagne 20.

3. Inogne ty toko’e ho fantantikagne miomba ty Fanjakàn’Andrianagnahare?

³ Nianarantikagne tie i Jehovah ty tahinan’Andrianagnahare. Fa nahafantatse ty raha hataon’Andrianagnahare miomba ty ndaty naho ty tane toy ka tikagne. Faie inogne ty teà i Jesosy horehafegne amy tihoe: “Ho avy abey i Fanjakà’oy”? Hianarantikagne tie inogne o Fanjakàn’Andrianagnahare zao, naho ty raha hanoe’e sady ty hagnamasina’e ty tahinan’Andrianagnahare.

4. Inogne o Fanjakàn’Andrianagnahare zao, sady ia ty Mpanjaka’e?

⁴ Nagnoregne fitondragne an-dagnitse agne ty Jehovah, le i Jesosy ty jinobo’e ho Mpanjaka’e. Fanjakàn’Andrianagnahare ty irehafa ty Baiboly o fitondragne iohoe. I Jesosy ro ‘Mpanjaka ze mpanjaka naho Tompo ze tompo.’ (1 Timoty 6:15) Mahavita raha soa mandilatse ty vita ze ndaty mpitondra ty Jesosy, sady managne hery ambone ty ahy o mpitondrao reke.

5. Boake aia ty Fanjakàn’Andrianagnahare ro hitondra, sady hatrake aia iaby ty faritse hanjakà’e?

⁵ Niheregne an-dagnitse agne ty Jesosy efapolo andro tafara ty namelomagne aze. Tinendre i Jehovah ho Mpanjaka i Fanjakagney reke tafara izay. (Asan’ny Apostoly 2:33) Boake an-dagnitse agne ty fitondràn’Andrianagnahare ro hinday ty tane toy. (Apokalypsy 11:15) Izay ty mahavy ty Baiboly hirehake ty Fanjakàn’Andrianagnahare tie ‘Fanjakagne an-dagnitse agne.’—2 Timoty 4:18.

6, 7. Inogne ty mampiambake i Jesosy amy ty mpanjaka hafa?

⁶ Rehafe ty Baiboly fa miambake amy ze ndaty mpitondra ty Jesosy fa “ie raike avao ty tsy mete mate.” (1 Timoty 6:16) Fate iaby ty hiafara o mpitondrao, fa i Jesosy tsy ho mate. Haharetse nainai’e ze raha soa hanoe i Jesosy ho antikagne.

⁷ Rehafe ty faminania ty Baiboly fa manao ty rare’e naho miferenaigne ty Jesosy Mpanjaka. Izao ty irehafa’e aze: “Hitoboke ama’eo ty fagnahy i Jehovah, le ty fagnahy mampahilala, mampahira-tsaigne, manoro hevetse, mampaozatse, mampahay raha sady manao ze hatahoragne i Jehovah. Hafaleagne ama’e ty tahotse i Jehovah. Tsy ze trea’e maso avao ro itsarà’e ndra ze rey ty sofi’e avao ro agnanara’e [ndra, anoroa’e hevetse] fa amy ty  raha vantagne avao ty hitsarà’e ty rarake [ndra, mahantra].” (Isaia 11:2-4) Te hanagne mpanjaka manahake izay vao rehe?

8. Akore ty ahafantarantikagne tie tsy i Jesosy raike avao ty hitondra?

⁸ Nijobogne ndaty ila’e ka ty Andrianagnahare hiharo fitondragne amy i Jesosy an-dagnitse agne. Nirehake tamy i Timoty ohatse ty apositoly Paoly tie: “Naho miaretse avao tikagne, le ho mpanjaka hiharo fitondragne ama’e.” (2 Timoty 2:12) Fire ty hiharo fitondragne amy i Jesosy?

9. Fire ty isa ty hiharo fitondragne amy i Jesosy, sady nanomboke ombiagne ty nijobogna i Jehovah iareo?

⁹ Nianarantikagne tamy Toko faha-7 ao, fa nisy fahitagne nahatreava i apositoly Jaona i Jesosy Mpanjaka an-dagnitse agne, niharo amy ty mpanjaka 144 000 ila’e. Ia o 144 000 reo? Nihazavae i Jaona tie “ninday ty agnara i Anak’agnondrỳ [Jesosy] naho ty tahinan-dRae’e sinoratse an-kandry iareo eo” iareo. Le hoe indraike reke: “Nagnorike ze nombà i Anak’agnondrỳ [Jesosy] avao iareo. Vinily boake amo o ndatio eo iareo.” (Vakio Apokalypsy 14:1, 4.) Kirisitianagne tsy mivalike jinobon’Andrianagnahare “ho mpanjaka hifehe ty tane toy” miharo amy i Jesosy, o 144 000 reo. Velomegne hiaigne an-dagnitse agne iareo naho fa mate. (Apokalypsy 5:10) Tamy ty andro o apositolio ty nanomboha i Jehovah nijobogne ty ila’e amo o Kirisitianagne 144 000 tsy mivalike reo mba ho mpanjaka.

10. Nagnino ro porofo ty hatea i Jehovah antikagne ty nanoa’e Mpanjaka i Jesosy naho o 144 000 reo?

¹⁰ Teà i Jehovah vata’e tikagne kanao nanao fandaharagne reke mba hisy ndaty hiharo fitondragne amy i Jesosy. Ho soa ty fitondrà i Jesosy fa mahafantatse ty miomba antikagne reke. Fanta’e ty raha mahazo naho ty fijalea o ndatio. Nirehafe i Paoly fa “mahay  mitrétré amy ty fanagnantikagne handra” ty Jesosy, sady ‘manahake antikagne nitsapaegne hevetse amy ze kila raha’ reke. (Hebreo 4:15; 5:8) Mahafantatse ty raha mahazo o ndatio ka o 144 000 reo. Fa narare naho nialy tamy ty fahalemea’e ka iareo. Atokisantikagne areke fa mahafantatse soa ty raha tsapantikagne naho ty raha manahiragne antikagne ty Jesosy naho o 144 000 reo.

11. Nagnino ty Jesosy ro nampianatse i mpiana’e rey hivavake mba hanoagne ty zoton’arofon’Andrianagnahare an-dagnitse agne?

¹¹ Nampianare i Jesosy hivavake mba hanoagne ty zoton’arofon’Andrianagnahare an-dagnitse agne o mpiana’eo. Inogne ty anto’e? Nianarantikagne tamy ty Toko faha-3 ao fa nanohetse i Jehovah ty Satana Devoly. Mbe nengà i Jehovah hitoboke an-dagnitse agne heike ty Satana naho ze anjely nivalike, ndra demonia, tafara ty nivaliha’e. Ty dika izay, tsy ze tan-dagnitse agne iaby ro nanao ty zoton’arofon’Andrianagnahare. Hahafantatse raha maro miomba i Satana naho o demoniao tikagne amy ty Toko faha-10 ao.

12. Inogne ty raha lahibey roe rehafe ty Apokalypsy 12:10?

¹² Hazavae ty Baiboly fa nialy tamy i Satana ty Jesosy tafara ty nanoagne aze Mpanjaka i Fanjakàn’Andrianagnaharey. (Vakio Apokalypsy 12:7-10.) Misy raha lahibey roe niseho hazavae ty andine’e faha-10. Nanomboke nitondra ty Fanjakàn’Andrianagnahare ty Jesosy Kirisity Mpanjaka, sady tamy io ka ty nanorahagne i Satana boake an-dagnitse agne ho an-tane etoy. Hianarantikagne tie fa niseho vata’e o raha rehoe.

13. Inogne ty raha niseho tan-dagnitse agne naho fa natorake boake agne ty Satana?

¹³ Rehafe ty Baiboly fa nifale ze anjely tsy mivalike naho fa natorake boake an-dagnitse agne ty Satana miharo  o demonia’eo. Izao ty rehafe’e: “Mifalea ry lagnitse naho inareo toboke ama’e ao.” (Apokalypsy 12:12) Miadagne naho miharo hevetse hinane zao ty an-dagnitse agne, fa manao ty zoton’arofon’Andrianagnahare.

14. Inogne ty raha miseho an-tane etoy naho fa natorake boake andagnitse agne ty Satana?

¹⁴ Mifanohetse amy izay ty fiaignagne an-tane etoy. Raha mampatahotse avao ty iaigna o ndatio ‘fa nizotso etoy ty Devoly sady boseke reke, fa fanta’e fa fohe ty fotoagne anagna’e.’ (Apokalypsy 12:12) Boseke mafe ty Satana fa natorake boake an-dagnitse agne, sady fanta’e fa marine ty hamonoagne aze. Manao ze azo’e atao hinane zao ty Satana soa tie feno haoreagne naho fangirifiriagne vaho fijaleagne ty an-tane etoy.

15. Inogne ty fagnirian’Andrianagnahare miomba ty tane toy?

¹⁵ Tsy niova ty fagnirian’Andrianagnahare miomba ty tane toy. Mbe teà’e hisy ndaty voririke hiaigne nainai’e ty amy i paradisa an-tane etoỳ. (Salamo 37:29) Akore ty hanoa ty Fanjakàn’Andrianagnahare izay?

16, 17. Inogne ty rehafe ty Daniela 2:44 miomba ty Fanjakàn’Andrianagnahare?

¹⁶ Rehafe ty faminania i Daniela 2:44 tie: “Amy ty andro o mpanjaka rehoe, le hagnoregne fanjakagne tsy ho rava sasa i Andrianagnahare i lagnitseỳ, sady tsy ho azo o ndaty hafa i fanjakagne zay. Hopotepotehe’e naho hofoagna i fanjakà’ey o fanjakagne rehoe iaby, fa i azey avao ro haharetse nainai’e.” Inogne ty ampianare o faminaniagneo antikagne miomba ty Fanjakàn’Andrianagnahare?

¹⁷ Voaloha’e, “amy ty andro o mpanjaka rehoe” ty anomboha i Fanjakàn’Andrianagnaharey minday. Ty dika izay, mbe eo o fitondrà o ndatio tamy tie nanomboke nitondra i Fanjakagney. Faharoe, haharetse nainai’e ty Fanjakàn’Andrianagnahare sady tsy hisy  fitondràm-panjakagne hafa hisolo aze. Fahatelo, hialy amy ty fitondràm-panjakà ty tontolo toy ty Fanjakàn’Andrianagnahare. Faie ty Fanjakàn’Andrianagnahare ro haharese sady hifehe ty tane toy iaby. Amy izay o ndatio vaho hanagne fitondràm-panjakagne fanjaka hifehe aze.

18. Inogne ty agnaragne irehafagne ty aly hifanoa ty Fanjakàn’Andrianagnahare naho ty fitondrà ty tontolo toy?

¹⁸ Akore ty hahavy ty Fanjakàn’Andrianagnahare hifehe ty tane toy iaby? Aloha ty aly Hara-magedona, le hofitahe o demoniao ‘ty mpanjaka ty tane toy, soa tie hamoria’e iareo ho amy i aly ty andro lahibein’Andrianagnahare Tompo ty Herỳ.’ Ie izay, hialy amy ty Fanjakàn’Andrianagnahare ty fitondrà o ndatio.—Apokalypsy 16:14, 16; henteo ty Fagnazavagne 10.

19, 20. Nagnino tikagne ro mipay ty Fanjakàn’Andrianagnahare hitondra ty tane toy?

¹⁹ Inogne ty ipaliantikagne ty Fanjakàn’Andrianagnahare? Misy anto’e telo. Voaloha’e, marare naho mate tikagne fa mpanota. Faie rehafe ty Baiboly fa hiaigne nainai’e tikagne naho fa mitondra i Fanjakàn’Andrianagnaharey. Magnamaregne izay ty Jaona 3:16 tie: “Lako loatse ty hatean’Andrianagnahare ty tontolo toy, kanao nimei’e i Ana-dahi’e bakotokagney, soa tie tsy ho mate ze manoro ty finoa’e aze, fa ho velogne tsy misy fara’e.”

²⁰ Ty anto’e faharoe ipaliantikagne ty Fanjakàn’Andrianagnahare, le ty fisia ty ndaty raty fagnahy magnodidigne antikagne. Mavande naho mamitake sady raty findesam-batagne ty ankamaroa iareo. Tsy mahavita magnafake izay tikagne, fa i Andrianagnahare avao ty hamonovono ze ndaty raty fagnahy amy i Hara-magedonay. (Vakio Salamo 37:10.) Anto’e fahatelo, tsy azo tavandraegne ty fitondrà o ndatio fa manao aferafera  sady tsy miferenaigne. Tsy mba magnampe o ndatio hahafantatse an’Andrianagnahare iareo. Izay ty mahavy ty Baiboly hirehake tie “nikomandikomandy ty ragne’e iaby o ndatio le nagnoho-doza tama’e.”—Mpitoriteny 8:9.

21. Akore ty agnomea i Fanjakagney toky fa hatao an-tane etoy ty zoton’arofon’Andrianagnahare?

²¹ Magnomey toky ty Fanjakàn’Andrianagnahare fa hatao an-tane etoy ty zoton’arofon’Andrianagnahare, afara i Hara-magedonay. Hafaha’e ohatse ty Satana naho ty demonia’e. (Apokalypsy 20:1-3) Afake hiaigne nainai’e amy i paradisay ao ze ndaty tsy mivalike, fa nimeigne i solovoigney. Tsy harare sady tsy ho mate iareo. (Apokalypsy 22:1-3) Hagnamasigne ty tahinan’Andrianagnahare i Fanjakagney. Inogne ty dika izay? Ty dika izay, hagnomey voninahitse ty tahina i Jehovah ze kila ndaty, naho fa ty Fanjakàn’Andrianagnahare ty mitondra ty tane toy.—Henteo ty Fagnazavagne 21.

22. Akore ty ahafantarantikagne fa mbe tsy tinendre ho Mpanjaka ty Jesosy tamy ie tan-tane etoỳ ndra tafara ty namelomagne aze?

²² Nampianatse i mpiana’e rey hivavake ty Jesosy tie: “Ho avy abey i Fanjakà’oy!” Fa azo antoke tie, fa ho avy vata’e i Fanjakàn’Andrianagnaharey amy ty hoavy. Fa nataon’Andrianagnahare soa oregne i fitondrà’ey, le nanendre  i Jesosy ho Mpanjaka’e reke. Le avy le Mpanjaka vao ty Jesosy naho fa niavy an-dagnitse agne? Tsy izay, fa nandigne heike reke. Fotoagne fohe tafara ty namelomagne i Jesosy, le sambe nagnazava izay ty Paoly naho i Petera naho fa nahafantatse ty faminaniagne miomba i Jesosy amy Salamo 110:1 ao. Izao ty saontsy i Jehovah ao: “Mitoboha ankavanako etoa amparake ty hanoako i fahavalo’oy ho fandià ty tombo’o.” (Asan’ny Apostoly 2:32-35; Hebreo 10:12, 13) Hatrake ombiagne ty nandignasa i Jesosy ty fanendrea i Jehovah aze ho Mpanjaka?

23. a) Ombiagne ty naha Mpanjaka i Jesosy? b) Inogne ty hianarantikagne amy ty toko manonjohy itoy?

²³ Taogne maro taloha ty taogne 1914, le fa nisy Kirisitianagne tea ty hamarenagne, fa nahafantatse tie misy taogne miambake ty amy ty faminania ty Baiboly ao. Ty raha niseho nanomboke tamy ty taogne 1914, ty nagnamaregne izay. Nanomboke tamo o taogne iohoe ty naha Mpanjaka i Jesosy. (Salamo 110:2) Tsy ela tafara izay ty nanorahagne i Satana an-tane etoy sady amy izao reke “fa fanta’e fa fohe ty fotoagne anagna’e.” (Apokalypsy 12:12) Hotreantikagne amy ty toko manonjohy itoy ty raha magnamaregne tie, fa miaigne amo o fotoagne iohoe tikagne. Ho fantantikagne ka, fa marine hanao ty zoton’arofon’Andrianagnahare an-tane etoy i Fanjakagney.—Henteo ty Fagnazavagne 22.