1. Dɔmbɛlɔ diakɔna dia lokumu diayangaso nsɛdingola?

MILIYƆ y’anto mbeyaka dɔmbɛlɔ dia lokumu dielamɛ Disambɛ dia Shɛso kana Dɔmbɛlɔ dia Nkumadiɔndjɔ. Yeso akakambe la dɔmbɛlɔ sɔ dia mbetsha ambeki ande woho wa nɔmbaka. Akambo akɔna wakandalɔmbɛ? Ndo lande na kele dɔmbɛlɔ sɔ diekɔ ohomba le so ɛlɔ kɛnɛ mɛtɛ?

2. Naa akambo asato w’ohomba wakatetsha Yeso dia nɔmbaka?

² Yeso akate ate: “Kanyɔlɔmbake ɔnkɔnɛ nyate: ‘Shɛso lele l’olongo, lokombo layɛ lakidiame. Diolelo diayɛ diaye. Lolango layɛ latshame la nkɛtɛ oko watshamalɔ l’olongo.’” (Adia Mateo 6:9-13.) Lande na kakatetsha Yeso dia sho nɔmba dikambo dia akambo asɔ asato?—Enda nɔtɛ ka la koma 20.

3. Ahombaso mbeya lo dikambo dia Diolelo diaki Nzambi?

³ Tamboshilaka la mbeka dia lokombo la Nzambi ele Jehowa. Ndo tambɛnaka kɛnɛ kele lolango laki Nzambi lo dikambo di’anto ndo lo dikambo dia nkɛtɛ. Ko kakɔna kakalange Yeso mbuta etena kakandate ate: “Diolelo diayɛ diaye”? Tayɛna kɛnɛ kalembetshiya Diolelo diaki Nzambi, kakɔna kayodiosala ndo woho wayodiokidia lokombo la Nzambi.

4. Diolelo diaki Nzambi kɛdikɛdi na, ndo ele Nkumekanga kadiɔ?

⁴ Jehowa akashikikɛ lowandji la l’olongo ndo akasɔnɛ Yeso dia monga Nkumekanga kalɔ. Bible mbelɛka lowandji lɔsɔ ɔnɛ Diolelo diaki Nzambi. Yeso mbele  “Nkumekanga ka wanɛ wolɛ oko nkumi ya dikanga ndo Nkumi ka wanɛ wolɛ oko nkumi.” (1 Timɔte 6:15) Yeso ekɔ l’akoka wa nyomosala akambo w’ɛlɔlɔ ndeka omboledi tshɛ w’ɔna onto ndo nde ekɔ la wolo woleki weolo awɔ tshɛ koyanga vɔ kosanganyemaka kaamɛ.

5. Oma lende ayɔlɔmbɔla lowandji laki Nzambi, ndo lɔ layɔlɔmbɔla na?

⁵ Nshi akumi anɛi l’ɔkɔngɔ wa eolwelo kande, Yeso akakalola l’olongo. L’ɔkɔngɔ diko, Jehowa akayɔɔsɔna oko Nkumekanga ka Diolelo. (Etsha 2:33) Lowandji laki Nzambi layɔlɔmbɔla nkɛtɛ k’otondo oma l’olongo. (Ɛnyɛlɔ 11:15) Diakɔ dielɛ Bible Diolelo diaki Nzambi ɔnɛ “Diolelo . . . dia l’olongo.”—2 Timɔte 4:18.

6, 7. Kakɔna ketɛ Yeso Nkumekanga koleki nkumi ya dikanga tshɛ y’ana w’anto?

⁶ Bible mbutaka dia Yeso ndeka nkumekanga k’ɔna onto tshɛ nɛ dia nde kele “ɔtɔi akɔ lele la eongelo kahavu.” (1 Timɔte 6:16) Emboledi w’ana w’anto tshɛ mvɔka, koko Yeso havɔki pondjo. Ɛlɔlɔ tshɛ wayotosalɛ Yeso wayotshikalaka pondjo.

⁷ Prɔfɛsiya ka lo Bible mbutaka dia Yeso ayonga Nkumekanga k’ɔlɔlɔ ndo kokana kɛtshi: “Nyuma ka Jehowa kayodjasɛ le nde, nyuma ka lomba ndo ka yimba, nyuma ka dako ndo ka wolo, nyuma k’ewo ndo ka wɔma wa Jehowa. Ko nde ayɔngɛnangɛna lo wɔma wa Jehowa. Nde hatolombosha lo ndjela kɛnɛ kɛnande la washo ande, ndo hatohangɔ [Kana mbisha dako] tsho lo ndjela kɛnɛ kokande la atoyi ande. Nde ayolombosha tombolambola [kana ase wola] la losembwe.” (Isaya 11:2-4) Shi wɛ ayɔngɛnangɛna dia nkumekanga kayɛ monga ngasɔ?

8. Ngande weyaso dia Yeso hatolɛ ndamɛ?

⁸ Nzambi akasɔnɛ anto amɔtshi dia vɔ mbolɛ kaamɛ la Yeso lo lowandji la l’olongo. Ɛnyɛlɔ, ɔpɔstɔlɔ Pɔɔlɔ  akatɛ Timɔte ate: “Naka sho ntetemala mbikikɛ, kete ndo sho tayolɛ kaamɛ la nde oko nkumi ya dikanga.” (2 Timɔte 2:12) Anto angana wayolɛ oko nkumi ya dikanga kaamɛ la Yeso?

9. Anto angana wayolɛ kaamɛ la Yeso? Etena kakɔna kakatatɛ Nzambi mbasɔna?

⁹ Oko wakatadiɛnyi lo tshapita 7, wakɛnya ɔpɔstɔlɔ Joani lo ɛnɛlɔ kɛmɔtshi kakandɛnyi Yeso oko Nkumekanga l’olongo kaamɛ la nkumi ya dikanga nkina, 144 000. Anto 144 000 ewɔ? Joani akalembetshiya dia vɔ wekɔ “la lokombo [Yeso] ndo lokombo la She lofundami lo mfumu yawɔ.” Ndo nde akakotsha ate: “Vɔ wele wanɛ watetemala ndjela Ɔna Ɔkɔkɔ [mbuta ate Yeso] l’ahole tshɛ watshɔnde. Vɔ wakasombama oma l’atei w’anto.” (Adia Ɛnyɛlɔ 14:1, 4.) Anto 144 000 wekɔ Akristo wa kɔlamelo wakasɔnama oma le Nzambi ndo “vɔ wayolɛ nkɛtɛ oko nkumi ya dikanga” kaamɛ la Yeso. Etena kavɔwɔ, vɔ mbolɔka dia tɔsɛna l’olongo. (Ɛnyɛlɔ 5:10) Ntatɛ oma ko nshi y’apɔstɔlɔ, Jehowa ekɔ lo nsɔna Akristo wa kɔlamelo dia monga l’atei w’olui wa nkumi ya dikanga 144 000.

10. Lande na kele ekɔ yɛdikɔ yoludi la ngandji le Jehowa dia Yeso nde l’anto 144 000 mbolɛ anto?

¹⁰ Jehowa ndjakiyanyaka efula lo dikambo diaso diakɔ diele nde akalɔngɔsɔla di’anto mbolɛ kaamɛ la Yeso. Yeso ayonga omboledi wa dimɛna nɛ dia nde teyaka dimɛna. Nde shihodiaka elɛwɔ monga onto ndo elɛwɔ nsowa. Pɔɔlɔ akate dia Yeso ndjadjaka lo dihole diaso nde koka “toka kɛtshi lo wɛɔdu aso,” ndo nde “akahembama l’akambo tshɛ oko sho.” (Hɛbɛru 4:15; 5:8) Anto 144 000 mbeyaka nto kɛnɛ kalembetshiya monga onto. Ndo vɔ wakalɔshana la eongelo kele keema kokele ndo wakatate hemɔ. Diakɔ diele sho koka monga l’eshikikelo dia Yeso nde l’anto 144 000  wayoshihodia aha tsho woho wayaokaso koko ndo nto ekakatanu wadiɛnɛso lawɔ.

11. Lande na kaketsha Yeso ambeki ande dia nɔmbaka dia lolango laki Nzambi salema l’olongo?

¹¹ Yeso aketsha ambeki ande dia nɔmbaka dia lolango la Nzambi salema l’olongo. Lande na? Takeke lo tshapita ya 3 dia Satana Diabolo akatɔmbɔkwɛ Jehowa. L’ɔkɔngɔ wa Satana ntɔmbɔkɔ, Jehowa akotshike nde l’andjelo waki komonga la kɔlamelo kana ɛdiɛngɛ dia vɔ ntshikala l’olongo lo tshanda mɔtshi. Ɔnkɔnɛ, aha wanɛ tshɛ waki l’olongo mbakasalaka lolango laki Nzambi. Tayonyomeka akambo efula wendana la Satana nde la ɛdiɛngɛ lo tshapita ya 10.

12. Naa awui ahende w’ohomba watɛkɛtama lo Ɛnyɛlɔ 12:10?

¹² Bible nembetshiyaka dia yema tshitshɛ l’ɔkɔngɔ wa Yeso mbetɛma Nkumekanga ka Diolelo diaki Nzambi, nde akalɔ la Satana. (Adia Ɛnyɛlɔ 12:7-10.) Divɛsa dia 10 kɔndɔlaka awui ahende w’ohomba wakasalema. Diolelo diaki Nzambi diakatatɛ mbolɛ ndo Yeso Kristo mbaki Nkumekanga, ndo Satana akakashema oma l’olongo oya la nkɛtɛ. Oko wayotodiɛna, awui asɔ ahende wamboshilaka salema.

13. Kakɔna kakatombe l’olongo etena kakakashema Satana?

¹³ Bible kɔndɔlaka ɔngɛnɔngɛnɔ waki l’andjelo wa kɔlamelo l’ɔkɔngɔ wa Satana la ɛdiɛngɛ ande mbikashema oma l’olongo. Sho mbadiaka ɔnɛ: “Olongo le, ɔngɛnɛngɛnɛ ndo wanɛ wodjashi lɔkɔ!” (Ɛnyɛlɔ 12:12) Kakianɛ wɔladi wa tshɛ lo tshɛ ndo kaamɛ kaya l’olongo, nɛ dia ditongami tshɛ diele lɛkɔ diekɔ lo nsala lolango laki Nzambi.

14. Kakɔna kakatombe la nkɛtɛ l’ɔtɛ wakakashema Satana oma l’olongo?

¹⁴ Koko lɔsɛnɔ la lanɛ la nkɛtɛ ntshikitana tshɛ lo  tshɛ. Akambo wa kɔlɔ efula wekɔ lo nkomɛ anto, nɛ dia Bible mbutaka ɔnɛ: “Diabolo amboya” ndo ɔnɛ nde “ele la nkɛlɛ k’efula, eeya dia etena kambootshikalɛ kaya mondo.” (Ɛnyɛlɔ 12:12) Satana ekɔ la nkɛlɛ k’efula. Nde akakashema oma l’olongo ndo nde mbeyaka dia kem’edja nde ayanga ndanyema. Nde ekɔ lo nsala kɛnɛ tshɛ kakokande nsala dia mbela efukutanu, paa ndo asui lo nkɛtɛ k’otondo.

15. Naa lolango laki Nzambi lo dikambo dia nkɛtɛ?

¹⁵ Koko lolango laki Nzambi lo dikambo dia nkɛtɛ latatshikitana. Nde aakalange dia anto wa kokele nsɛna pondjo pondjo lo paradiso ka la nkɛtɛ. (Osambo 37:29) Ko ngande wayosala Diolelo diaki Nzambi dia dui sɔ kotshama?

16, 17. Kakɔna katotɛ Danyɛlɛ 2:44 lo dikambo dia Diolelo diaki Nzambi?

¹⁶ Prɔfɛsiya ka lo Danyɛlɛ 2:44 mbutaka ɔnɛ: “Lo nshi ya nkumi ya dikanga yakɔ, Nzambi ka l’olongo ayotondja Diolelo diahalanyemaki pondjo. Diolelo diakɔ hadiotoshama le anto akina. Diɔ diayominola waolelo akɔ tshɛ ndo diayowashila oshiki, ko diɔ diɔamɛ diayotshikala pondjo.” Kakɔna katetsha prɔfɛsiya kɛsɔ lo dikambo dia Diolelo diaki Nzambi?

¹⁷ Dui dia ntondo, tɔ totɛka dia Diolelo diaki Nzambi diayotatɛ mbolɛ “lo nshi ya nkumi ya dikanga yakɔ.” Kɛsɔ nembetshiyaka dia mandji nkina yakahombe monga la nkɛtɛ etena kakahombe Diolelo ntatɛ mbolɛ. Dui dia hende, tɔ totɛka dia Diolelo diaki Nzambi diayotshikala pondjo pondjo ndo ndooko lowandji lokina layodihɛna. Ndo dui dia sato, ta diayonga lam’asa Diolelo diaki Nzambi la mandji ya l’andja ɔnɛ. Diolelo diaki Nzambi diayɔlɛndja ndo diayonga tshɔi ya lowandji layɔlɔmbɔla nkɛtɛ k’otondo. Ko anto  wayonga la lowandji loleki tshɛ dimɛna lakokawɔ monga lalɔ.

18. Naa lokombo la ta di’ekomelo diayɔlɔma lam’asa Diolelo diaki Nzambi la mandji ya lo andja ɔnɛ?

¹⁸ Ngande wayɔlɔmbɔla Diolelo diaki Nzambi nkɛtɛ k’otondo? La ntondo ka ta di’ekomelo dielamɛ ta dia Aramangɛdɔna, ɛdiɛngɛ wayonganyiya “nkumi ya dikanga ya lo nkɛtɛ k’otondo dia mbasanganya dia vɔ ndjɔlɔ ta dia lushi la woke la Nzambi Kanga-Wolo-Tshɛ.” Eelo, mandji y’ana w’anto yayɔlɔsha Diolelo diaki Nzambi.—Ɛnyɛlɔ 16:14, 16; enda nɔtɛ ka la koma 10.

19, 20. Lande na keso l’ohomba dia Diolelo diaki Nzambi nɔmbɔla nkɛtɛ k’otondo?

¹⁹ Lande na keso l’ohomba wa Diolelo diaki Nzambi? L’ɔtɛ w’ɛkɔkɔ esato. Ɔkɔkɔ wa ntondo, tekɔ atshi wa pɛkato, diakɔ diatataso hemɔ ndo diavɔso. Koko Bible mbutaka dia lo ɛlɔmbwɛlɔ ka Diolelo diaki Nzambi, tayɔsɛna pondjo pondjo. Joani 3:16 mbutaka ɔnɛ: “Nzambi akalange andja lo yɛdikɔ y’efula, diakɔ diakandakimɔ Ɔnande ɛtɔi lakandote, dia onto tshɛ longa la mbetawɔ le nde atovɔke, koko akondja lɔsɛnɔ la pondjo.”

²⁰ Ɔkɔkɔ wa hende weso l’ohomba wa Diolelo diaki Nzambi ele nɛ dia sho ningama l’anto wa kɔlɔ. Efula mbutaka kashi, wekɔ akadikadi ndo salaka awui wa mindo. Ndooko kakokaso nsala dia minya anto asɔ, koko Nzambi ayowanya. Anto watetemala nsala awui wa kɔlɔ wayolanyema lo ta diaki Nzambi dia Aramangɛdɔna. (Adia Osambo 37:10.) Ɔkɔkɔ wa sato weso l’ohomba wa Diolelo diaki Nzambi ele nɛ dia mandji y’ana w’anto yekɔ wɔdu, ngala ndo kɔlɔ. Yɔ hayokimanyiya anto dia vɔ monga l’okitanyiya le Nzambi.  Bible mbutaka dia “etena kolɛ onto wonyande onto dia mbosalɛ kɔlɔ.”—Ondaki 8:9.

21. Ngande wayoshikikɛ Diolelo dia lolango laki Nzambi lekɔ lo salema la nkɛtɛ?

²¹ L’ɔkɔngɔ wa Aramangɛdɔna, Diolelo diaki Nzambi diayoshikikɛ dia lolango laki Nzambi lekɔ lo salema la nkɛtɛ. Ɛnyɛlɔ, diɔ diayonya Satana l’ɛdiɛngɛ ande. (Ɛnyɛlɔ 20:1-3) L’ekomelo, ndooko onto layotata hemɔ kana mvɔ. Diɛsɛ l’oshinga w’etshungwelo, anto tshɛ wele la kɔlamelo wayonga l’akoka wa nsɛna pondjo pondjo lo paradiso. (Ɛnyɛlɔ 22:1-3) Diolelo diayokidia lokombo laki Nzambi. Kakɔna kalembetshiya dui sɔ? Diɔ nembetshiyaka dia etena kayɔlɔmbɔla lowandji laki Nzambi nkɛtɛ, anto tshɛ wayɔsa lokombo la Jehowa la nɛmɔ.—Enda nɔtɛ ka la koma 21.

22. Ngande weyaso dia Yeso kokoma Nkumekanga etena kakinde la nkɛtɛ kana mbala kakɔ ɔtɔi l’ɔkɔngɔ wa nde mbolwama?

²² Yeso aketsha ambeki ande dia nɔmbaka ɔnɛ: “Diolelo diayɛ diaye.” Ɔnkɔnɛ, akɛnama hwe dia lowandji laki Nzambi lakahombe ndjoya lo nshi y’otsha la ntondo. Jehowa akahombe ntondo nshikikɛ lowandji lakinde ndo mbetɛ Yeso Nkumekanga kalɔ.  Onde Yeso aketɛma Nkumekanga kam’akandakalola l’olongo? Keema, nde akahombe tokokonga. Etena kɛmɔtshi l’ɔkɔngɔ wa eolwelo ka Yeso, Peteto ndo Pɔɔlɔ wakɛnya dikambo sɔ hwe etena kakawɔtɔnganyiya prɔfɛsiya ka Osambo 110:1 la Yeso. Lo prɔfɛsiya kɛsɔ, Jehowa akate ɔnɛ: “Djasɛ lo lonya lami l’omi polo lam’ayomokitsha atunyi ayɛ oko kihona k’ekolo ayɛ.” (Etsha 2:32-35; Hɛbɛru 10:12, 13) Edja ka ngande kakahombe Yeso nkonga la ntondo ka Jehowa ndjowetɛ Nkumekanga?

23. a) Etena kakɔna kakatatɛ Yeso mbolɛ oko Nkumekanga ka lowandji laki Nzambi? b) Kakɔna kayotɛna lo tshapita yayela?

²³ Ɛnɔnyi efula la ntondo ka 1914, olui w’Akristo wa mɛtɛ wakashihodia dia ɔsɔ ayonga ɔnɔnyi w’ohomba efula wa lo prɔfɛsiya ka lo Bible. Awui weta l’andja ntatɛ 1914 shikikɛka dia vɔ waki la shadiya. Yeso akatatɛ mbolɛ oko Nkumekanga lo ɔnɔnyi ɔsɔ. (Osambo 110:2) Kem’edja oma laasɔ, Satana akakashema la nkɛtɛ, ndo kakianɛ nde ‘mbeyaka dia etena kambootshikalɛ kaya mondo.’ (Ɛnyɛlɔ 12:12) Lo tshapita yayela, tayɛna tolembetelo efula tɛnya dia tekɔ lo nsɛna l’etena kɛsɔ. Tayɛna nto dia kem’edja Diolelo diaki Nzambi diayoshikikɛ dia lolango laki Nzambi lekɔ lo salema la nkɛtɛ.—Enda nɔtɛ ka la koma 22.