1. Khu wevbi nombelo nya ndruma hi na ganeyago khuwo nugunugu?

VATHU nya dzimiliyoni va ngu wuti nombelo nya ndruma wu ranwago pwani Nombelo wa Pfhumu, mwendro Babe Wathu. Jesu thumiside nombelo wowu gasi gu hevbhudza vapizane vaye gu gira nombelo. Silo muni esi a gombedego khiso? Nigu khu ginani nombelo wowo wu gu wa lisima gwathu muhuno?

2. Silo muni nya siraru si gu na ni lisima esi Jesu a hi hevbudzidego gu gombeya khiso?

² Jesu a di khuye: “Khu kharato, lombelelani, kharati: ‘Baba wathu u guromo Ndzadzini, lina lago li na rungudzwe [mwendro, li na agiswe, NM]. Mufumo wago wu nate; gudzina gwago gu na girege mafuni kha nga Ndzadzini.’” (Leri Matewu 6:9-13.) Khu ginani Jesu a hi hevbudzidego gu gombeya khu silo soso sa siraru? — Wona Tshamuselo 20.

3. Ginani gi vbwetegago gu hi giti khu Mufumo wa Nungungulu?

³ Hi hevbude gu khethu lina la Nungungulu khu Jehovha. Nigu hi ganede gambe gu khethu khu gwevbi gugola ga Nungungulu khu vathu ni mafu. Ganiolu Jesu a di vbweta khuye ginani tepo a nga khuye: “Mufumo wago wu nate”? Hi na hevbula gu khethu ginani Mufumo wa Nungungulu, ginani wu na girago nigu wu na agisa kharini lina la Nungungulu.

4. Ginani Mufumo wa Nungungulu nigu khu mani Pfhumu yakona?

⁴ Jehovha emiside mufumo ndzadzini a bwe a hatha Jesu gasi a khala Pfhumu yakona. Bhibhiliya yo rana mufumo wowo khiyo Mufumo wa Nungungulu. Jesu khuye  “Pfhumu nya dzipfhumu, Mufumeli nya vafumeli.” (1 Thimoti 6:15) Jesu na ni makodzelo nyo gire silo nya singi nya sadi guvbindra ni yevbi pfhumu nya mafu, nigu uye na ni tshivba guvbindra dzatshavbo dzipfhumu khu gumogo.

5. Mufumo wa Nungungulu wo fuma na wu khugeya hayini? Wu na fumeya ginani?

⁵ Magumi mana matshigu hwane nyo ba a wusidwe, Jesu a di bweleya ndzadzini. Khu guhegisa, Jehovha a di mu emisa kha nga Pfhumu nya Mufumo wa Nungungulu. (Mithumo 2:33) Mufumo wa Nungungulu wu na fumeya mafu gukhugeya ndzadzini. (Gutuledwa 11:15) Khu ndziya yoyo Bhibhiliya yo rana Mufumo wa Nungungulu khiyo ‘Mufumo wa ndzadzini.’ — 2 Thimoti 4:18, NM.

6, 7. Ginani gi girago Jesu ari tshukwana guvbindra ni yevbini pfhumu nya nyama?

⁶ Bhibhiliya yari khiyo Jesu khongolo guvbindra ni yevbi pfhumu nya nyama kholu “khuye basi a sifigo.” (1 Thimoti 6:16) Dzatshavbo dzipfhumu dzo hegisa khu gufa, ganiolu Jesu gima kha na ngafa. Wuwadi watshavbo owu Jesu a na hi gireyago wu na pindruga.

⁷ Siprofeto nya Bhibhiliya so ganeya gu khiso Jesu a na ba ari Pfhumu nyo lulame na a pweya wusiwana: “Liphuvbo la PFHUMU Nungungulu, li na mbaka vatshani gwaye, a gu Liphuvbo nya guti ni mapimo, Liphuvbo nya wusingalagadzi ni tshivba, Liphuvbho nya wugengeli ni githawo ga PFHUMU Nungungulu. A na nengela khu guthava PFHUMU Nungungulu; kha na lamula gukhedza khu khovbe nya muthu, mwendro gu kona gu khedza khu gu pwa ndzeve; aholu, a na lamula sisiwana khu nayo.” (Isaya 11:2-4) Ina u ngu yina pfhumu nya makhalelo yoyo?

8. Ho dziti kharini gu khethu Jesu kha na nga fuma enga?

⁸ Nungungulu hathide vathu nyo khaguri gasi va ya fuma ni Jesu mufumoni wa ndzadzini. Khu giyeyedzo,  mupostoli Pawulo embede Thimoti khuye: “Ha gu saniseka gumogo naye, hi na fuma naye.” (2 Thimoti 2:12) Vathu vangani va na fumago gumogo ni Jesu?

9. Vathu vangani va na fumago gumogo ni Jesu? Nungungulu phede lini gu hatha vathu vovo?

⁹ Kha nga hi si hevbudego omu nya Gipimo 7, mupostoli Johane ningidwe giwoniso avba a nga wona Jesu nari Pfhumu ndzadzini gumogo ni dzimbe dzipfhumu nya 144.000. Khu vamani ava nya 144.000? Johane o tshamuseya gu khuye avo va di “bani va lovidwe vbagiwombotunu lina Laye [Jesu] ni la Babe Waye.” A bwe a engedzeya khuye avovo khu vale “va landrelago Nvutana [Jesu] malangani yatshavbo. Va di dzegiswa vbakari nya vathu nga matiwula ga Nungungulu ni ga Nvutana.” (Leri Gutuledwa 14:1, 4.) Ava nya 144.000 maKristo nyo tumbege aya Nungungulu a ma hathago gasi ma “fuma mafuni” ni Jesu. Tepo va fago, vo wuswa gasi va ya vbanya ndzadzini. (Gutuledwa 5:10) Gukhugeya teponi ya vapostoli, Jehovha a nguta na hatha maKristo nyo tumbege gasi ma gira gipandre nya tsawa wowo nya 144.000 dzipfhumu.

10. Khu ginani malulamiselo nya gu Jesu ni ava nya 144.000 va fumeya vathu ma gu giyeyedzo nya lihaladzo la Jehovha?

¹⁰ Jehovha a ngu hi khathaleya ngudzu kholu a nga kala a gira malulamiselo nya gu vathu va fuma gumogo ni Jesu. Jesu a na khala pfhumu nya yadi kholu a pwisisago gwadi makhalelo yathu. Uye a ngu dziti gu khuye so thula ginani gu khala muthu nya nyama nigu ginani gutshaniseka. Pawulo a di khuye Jesu a ngu theya kota khethu, kholu “a ngu dzi kodza gu hi pwela wusiwana nya sighoho sathu,” nigu “uye nuye lingidwe kha nga ethu.” (Vahebheru 4:15; 5:8) Anavo ava nya 144.000 va ngu dziti gu khavo so thula ginani gu khala muthu nya nyama. Nigu anavo va dwanide ni gu mba vbeleya gumogo ni madwali. Khu kharato hi ngu tiyisega gu khethu Jesu ni ava nya 144.000 kha va  pwisisi basi edzi hi dzi pwago khidzo ganiolu va ngu si pwisisa gambe sigaradzo hi emisanago naso.

11. Khu ginani Jesu a hevbudzidego vapizane vaye gu gombeya gasi gugola ga Nungungulu gu girega ndzadzini?

¹¹ Jesu hevbudzide vapizane vaye gu gombeya gasi gugola ga Nungungulu gu girega ndzadzini. Khu ginani? Omu nya Gipimo 3 hi hevhude gu khethu Sathane Dhiyabhulosi wugede Jehovha. Hwane nyo ba Sathane a mu wugede, Jehovha mu dzumelede gumogo ni dzingilozi nya mba tumbega, mwendro madhemoni, gu khala ndzadzini khu tepo nyo khaguri. Khu kharato, khandri vatshavbo ndzadzini va nga ba va gira gugola ga Nungungulu. Omu nya Gipimo 10, hi na hevbula gambe khu Sathane gumogo ni madhemoni.

12. Sigiro muni nya sivili nya lisima si tshamusedwago omu nya Gutuledwa 12:10?

¹² Bhibhiliya yo tshamuseya gu khiyo gitepwana hwane nyo ba Jesu a emisidwe kha nga Pfhumu nya Mufumo wa Nungungulu, uye a di hadzi dwana nyimbi ni Sathane. (Leri Gutuledwa 12:7-10.) Livhesi 10 lo tshamuseya sigiro sivili nya lisima ngudzu. Mufumo wa Nungungulu wo pheya gu fuma na wu thangedwa khu Jesu Kristo kha nga Pfhumu, nigu hwane nya isoso Sathane o tutumiswa ndzadzini ata mafuni. Kha nga hi na hevbulago, sigiro sesi dza si dugelede.

13. Ginani gi nga dugeleya ndzadzini tepo Sathane a nga tutumiswa?

¹³ Bhibhiliya yi ngu tshamuseya gutsaka ogu dzingilozi nyo tumbege dzi gu pwidego hwane nyo ba Sathane ni madhemoni yaye va tutumisidwe ndzadzini. Ho leri esi: “Nengelani mu tsaka, uwe ndzadzini, ni enu mwatshavbo mu vbanyago umo.” (Gutuledwa 12:12) Olu ndzadzini gomo gupwanana ni gurula nya gukhongolo kholu  vatshavbo va gomogo iyo va ngu gira gugola ga Nungungulu.

14. Ginani gi dugeleyago mafuni kholu Sathane a nga tutumiswa ndzadzini?

¹⁴ Ganiolu guvbanya ga mafuni gu ngu hambana ngudzu ni ogu ga ndzadzini. Singi si dugeleyago vathu “kholu Sathane tshigide” nigu uye “tade khu likhulo nya likhongolo ngudzu, kholu a dzitigo nya gukhuye gikhati gyaye gidugwana ngudzu.” (Gutuledwa 12:12) Sathane na ni likhulo. Tutumisidwe ndzadzini nigu a ngu dziti gu khuye a na fuviswa nugunugu. Uye o gira ni gevbi a gi kodzago gasi gu vanga sigaradzo, wuvi ni gutshaniseka mafuni gwatshavbo.

15. Khu gwevbi gugola ga Nungungulu khu mafu?

¹⁵ Ganiolu gugola ga Nungungulu khu mafu kha ga vbindrugedza. Uye a ngo vbweta gu khuye vathu nyo vbeleye va vbanya kala gupindruga paradhesini mafuni. (Dzindzimo 37:29) Ina ka, Mufumo wa Nungungulu wu na gira kharini silo sesi?

16, 17. Ginani egi Dhaniyeli 2:44 a hi embeyago khu Mufumo wa Nungungulu?

¹⁶ Giprofeto gi gomogo omu ga Dhaniyeli 2:44 gyari khigyo “Khu matshiguni ya vafumeli vovo, Nungungulu wa ndzadzini a na emisa wumbe mufumo nya gu gima kha wu na khoziswa khu mambe mafumbu. A na pfhungumula ni gu mbembisa mifumo yatshavbo ya vafumeli vale, mufumo waye wu na tiya kala gupindruga.” Giprofeto gegi gyo hi hevbudza ginani khu Mufumo wa Nungungulu?

¹⁷ Gupheya, igyo gyo hi embeya gu khigyo Mufumo wa Nungungulu wu na pheya gu fuma “matshiguni ya vafumeli vovo.” Isoso so thula gu khiso yi na ba yi romo yimbe mifumo mafuni tepo Mufumo wa Nungungulu wu na pheyago gu fuma. Nya wuvili, igyo gyo hi embeya gu khigyo Mufumo wa Nungungulu wu na fuma kala gupindruga nigu gima kha wu na nga tshikedzwa khu wumbe  mufumo. Nya wuraru, Mufumo wa Nungungulu wu na dwana ni mifumo yi gomogo mafuni. Mufumo wa Nungungulu wu na yi pala wu bwe wu tshala wonga wu fuma mafuni. Khavbovbo, vathu va na mana mufumo nya wadi ngudzu guvbindra yatshavbo.

18. Khu levbi lina nya nyimbi nyo hegise nya Mufumo wa Nungungulu ni mifumo nya mafu yaya?

¹⁸ Ina Mufumo wa Nungungulu wu na wandra kharini wufumu nya mafu? Na yi si gu giregi nyimbi nyo hegise, yi ranwago pwani Harimagedhoni, madhemoni ma na sengedzeya “vafumeli vatshavbo va mafuni gasi gu va tshanganisa va ta dwana nyimbi nya Litshigu Likhongolo la Nungungulu nya Tshivba Yatshavbo.” Khu ndziya yoyo, mifumo nya vathu yi na dwana ni Mufumo wa Nungungulu. — Gutuledwa 16:14, 16; wona Tshamuselo 10.

19, 20. Khu ginani hi vbwetago gu Mufumo wa Nungungulu wu fumeya mafu?

¹⁹ Khu ginani hi vbwetago Mufumo wa Nungungulu? Gu na ni sighelo siraru khu vbadugwana gakona. Gupheya, ethu hi sighohi, khu kharato hi ngu dwala hi bwe hifa. Ganiolu Bhibhiliya yo ganeya khiyo Mufumoni wa Nungungulu hi na vbanya kala gupindruga. Khu lisine, Johane 3:16 wari khuye: “Kholu Nungungulu haladzide ngudzu litigo gu kala a ningela Mwanaye wa moyo, gasi ni wevbi a khodwago gwaye a si mbembi, aholu a mane gu vbanya nya gupindruge.”

²⁰ Gighelo nya wuvili gi hi girago hi vbweta Mufumo wa Nungungulu khugu hi randredwe khu vathu nyo vivbe. Nya vangi va nya malipha, vakanganyisi nigu va na ni mavbanyelo nyo vivbe. Kha hi kodzi gu gira ni gevbini gilo gasi gu vbedza silo sesi, ganiolu Nungungulu a na si fuvisa. Vathu vale va simamago gu gira silo nyo vivbe va na fuviswa nyimbini nya Harimagedhoni. (Leri Dzindzimo 37:10.) Gighelo nya wuraru gi hi girago hi vbweta Mufumo wa Nungungulu khugu mifumo nya vathu yi mwalo  tshivba, yi ngu tshanisa, ambari gu kanganyisa. Iyo kha yi khathali khu gu phasa vathu gu engisa Nungungulu. Bhibhiliya yari khiyo “muthu nya tshivba a gu fumela mumbe muthu gasi gu mu tshanisa.” — Muhevbudzi 8:9.

21. Ginani egi Mufumo wu na girago gasi gugola ga Nungungulu gu girega mafuni?

²¹ Hwane nya Harimagedhoni, Mufumo wa Nungungulu wu na gira satshavbo si vbwetegago gasi gugola ga Nungungulu gu girega mafuni. Khu giyeyedzo, wu na fuvisa Sathane ni madhemoni yaye. (Gutuledwa 20:1-3) Khu guhegisa, mwalo muthu a na dwalago mwendro gufa. Khu kotani nya gudzegiswe, vathu vatshavbo nyo tumbege va na kodza gu vbanya kala gupindruga Paradhesini. (Gutuledwa 22:1-3) Mufumo wowo wu na agisa lina la Nungungulu. So thula ginani isoso? Sari khiso tepo mufumo wa Nungungulu wu na fumeyago mafu, vathu vatshavbo va na rungudza lina la Jehovha. — Wona Tshamuselo 21.

22. Ho dziti kharini gu khethu Jesu kha khala Pfhumu na a ngari mafuni mwendro gitepwana hwane nyo ba a wusidwe khu ga vafudego?

²² Jesu hevbudzide vapizane vaye gu gombeya kharati: “Mufumo wago wu nate.” Isoso so thula gu khiso mufumo wa Nungungulu wu di hadzi guta mindru wa tshigu. Gupheya Jehovha a di hadzi gu emisa mufumo waye a bwe a emisa Jesu kha nga Pfhumu yakona. Ina Jesu a di ya dzegeya  gu khala Pfhumu tepo a nga bweleya ndzadzini? Ahihi, a di hadzi vireya. Hwane nya tepo nyo khaguri Jesu na wusidwe, Pedro ni Pawulo va tshamusede lisine lolo tepo va nga thumisa giprofeto gi ganeyago khu Jesu gi gomogo omu nya Dzindzimo 110:1. Umomo nya giprofeto gyogyo, Jehovha wari khuye: “Khala khu nyamudye gwangu, kala nyi vega valala vago vbavbatshi nya migondro yago.” (Mithumo 2:32-35; Vahebheru 10:12, 13) Tepo muni Jesu a nga ba a hadzi vireya na a si girwi Pfhumu khu Jehovha?

23. a) Lini Jesu a phedego gu fuma kha nga Pfhumu nya Mufumo wa Nungungulu? b) Ginani hi na hevbulago omu nya gipimo gi landreyago?

²³ Khu myaga nya yingi na a si vbohi 1914, tsawa nya maKristo nyo tumbege wu pwisiside gu khuwo mwaga wowo wu diri ni lisima omu nya siprofeto nya Bhibhiliya. Sigiro sa tigoni gukhugeya 1914 so yeyedza gu khiso esi va nga ba va si khodwa si diri lisine. Jesu phede gu fuma kha nga Pfhumu khu mwaga wowo. (Dzindzimo 110:2) Gitepwana hwane nya isoso, Sathane a di rinywa mafuni, nigu olu “gikhati gyaye gidugwana ngudzu.” (Gutuledwa 12:12) Omu nya gipimo gi landreyago hi na wona simbe siyeyedzo nyo khiso ho vbanya omu nya tepo yoyo. Hi na hevbula gambe gu khethu nugunugu Mufumo wa Nungungulu wu na gira gilogyo gasi gugola ga Nungungulu gu girega mafuni. — Wona Tshamuselo 22.