1. Ino mupailo nzi uuzyibidwe kapati ngotutiibandike lino?

BANTU banji baluuzyi mupailo uuzyibidwe kapati wa “Taateesu wakujulu” naa Mupailo wa Mwami. Jesu wakaamba mupailo ooyu kutegwa ayiisye basikwiiya bakwe mbokupailwa. Ino nzintu nzi nzyaakapailila? Alimwi ino nkaambo nzi mupailo ooyu ncouyandika kapati kulindiswe mazuba aano?

2. Ino nzintu nzi zyotatwe iziyandika kapati Jesu nzyaakatuyiisya kuti katupailila?

² Jesu wakaamba kuti: “Mboobu mbomweelede kupaila: ‘Taateesu ooli kujulu, alisalazyigwe zina lyako. Abuboole Bwami bwako. Akucitwe kuyanda kwako ansi aano mbubonya mbuli kujulu.’” (Amubale Matayo 6:9-13.) Ino nkaambo nzi Jesu ncaakatuyiisyila kuti katupailila zintu eezyi zyotatwe?—Amubone Bupanduluzi Buyungizyidwe 20.

3. Ino ncinzi ncotweelede kwiiya kujatikizya Bwami bwa Leza?

³ Twakaiya kale kuti zina lya Leza ngu Jehova. Alimwi twakabandika makanze naa ncayanda Leza kujatikizya bantu alimwi anyika. Pele ino Jesu wakali kupandulula nzi naakaamba kuti: “Abuboole Bwami bwako”? Lino tulaiya kujatikizya Bwami bwa Leza kuti ninzi, ncobuyakucita alimwi ambobuyakulisalazya zina lya Leza.

4. Ino Bwami bwa Leza ninzi, alimwi nguni Mwami wambubo?

⁴ Jehova wakabikka mfwulumende yakujulu akusala Jesu kuti abe Mwami wanjiyo. Bbaibbele lyaamba mfwulumende eeyi kuti Bwami bwa Leza. Jesu “ngo Mwami  wabaabo beendelezya kabali bami a Simalelo wabaabo beendelezya kabali basimalelo.” (1 Timoteyo 6:15) Jesu ulakonzya kucita zintu zinji zibotu kapati kwiinda nzyakonzya kucita muleli uuli woonse waanyika, alimwi ulijisi nguzu zinji kapati kwiinda baleli boonse baanyika kubabikka antoomwe.

5. Ino mfwulumende ya Leza yeendelezyela kuli? Ino iyakweendelezya nzi?

⁵ Nokwakainda mazuba aali 40 kuzwa ciindi naakabusyigwa, Jesu wakapiluka kujulu. Mukuya kwaciindi, Jehova wakamubikka kuba Mwami wa Bwami bwakwe. (Milimo 2:33) Mfwulumende ya Leza iyakweendelezya nyika kuzwa kujulu. (Ciyubunuzyo 11:15) Nkakaambo kaako Bbaibbele lyaamba Bwami bwa Leza kuti ‘Bwami bwakujulu.’—2 Timoteyo 4:18.

6, 7. Ino Jesu ubainda buti bami baanyika?

⁶ Bbaibbele lyaamba kuti Jesu mupati kwiinda mwami umbi uuli woonse waanyika akaambo kakuti walo ‘alikke nguutafwi.’ (1 Timoteyo 6:16) Bami boonse baanyika balafwa mukuya kwaciindi, pele walo Jesu takafwi pe. Bubotu boonse mbwayakutucitila Jesu buyookkalilila mane kukabe kutamani.

⁷ Businsimi bwamu Bbaibbele bwaamba kuti Jesu unooli Mwami uutasalululi alimwi silubomba. Bwaamba kuti: “Muuya wa Jehova uyookkala alinguwe, imuuya wabusongo awamaano, muuya walulayo awanguzu, muuya waluzyibo awakuyoowa Jehova. Unookkomanina kuyoowa Jehova. Takabeteki kweelana azintu nzyaabona buyo ameso aakwe, nokuba kusinsa [naa, kupa lulayo] kweelana azintu nzyaamvwa buyo amatwi aakwe. Bantu bapengede [naa, bacete] uyoobabeteka cakutasalulula.” (Isaya 11:2-4) Sena inga tiimwayanda kuba amwami uuli boobu?

8. Ino tuzyi buti kuti Jesu takaleli alikke?

⁸ Leza usalide bantu bamwi kuti bakalele antoomwe a  Jesu mumfwulumende yakujulu. Mucikozyanyo, mwaapostolo Paulo wakaambila Timoteyo kuti: “Ikuti naa twazumanana kuliyumya, andiswe tuyoolela anguwe katuli bami.” (2 Timoteyo 2:12) Ino bali bongaye aabo ibayakulela antoomwe a Jesu kabali bami?

9. Ino bali bongaye aabo ibayakulela antoomwe a Jesu? Ino Leza wakatalika lili kubasala?

⁹ Mbubonya mbotwakaiya mu Cibalo 7, mwaapostolo Johane wakatondezyegwa cilengaano mwalo mwaakabona Jesu kali Mwami kujulu antoomwe abami bambi ibali 144,000. Ino aaba ibali 144,000 mbaani? Johane upandulula kuti “balembedwe zina lyakwe [Jesu] alimwi azina lya Bausyi ankumo zyabo.” Alimwi uyungizya kuti: “Aaba mbambabo bazumanana kutobela Mwanaambelele [nkokuti, Jesu] kufwumbwa ooko nkwaya. Aaba bakaulwa akati kabantu.” (Amubale Ciyubunuzyo 14:1, 4.) Aaba ibali 144,000 Mbanakristo basyomeka aabo Leza mbasalide kuti ‘bakabe bami ibayoolela nyika’ antoomwe a Jesu. Ciindi nobafwa, babusyilwa kubuumi bwakujulu. (Ciyubunuzyo 5:10) Kuzwa kuciindi cabaapostolo, Jehova wali kusala Banakristo basyomeka kuti babe akati kankamu yabami aabo ibali 144,000.

10. Nkaambo nzi ncotukonzya kwaamba kuti Jehova wakatondezya luyando naakabikka bubambe bwakuti Jesu alimwi abali 144,000 bakalele bantu?

¹⁰ Jehova ulatubikkila maano kapati cakunga wabikka bubambe bwakuti bantu bamwi bakalele antoomwe a Jesu. Jesu unooli muleli mubotu nkaambo ulituzyi kabotu. Ulizyi mbocimvwika kuba muntu alimwi akupenga. Paulo wakaamba kuti Jesu ulatufwida lubomba, ulakonzya “kutweetelela mukubula nguzu kwesu,” alimwi “wakasunkwa munzila zyoonse mbulindiswe.” (Bahebrayo 4:15; 5:8) Abalo ibali 144,000 balizyi mbocimvwika kuba muntu. Kumane baliyumya mumapenzi aaboola  akaambo kakutalondoka alimwi akuciswa. Aboobo tulakonzya kuba alusyomo lwakuti Jesu alimwi abali 144,000 bayootumvwisya mbotulimvwa alimwi akwaateelela mapenzi aatujisi.

11. Ino nkaambo nzi Jesu ncaakayiisya basikwiiya bakwe kupailila kuti kuyanda kwa Leza kucitwe kujulu?

¹¹ Jesu wakayiisya basikwiiya bakwe kupailila kuti kuyanda kwa Leza kucitwe kujulu. Nkaambo nzi? Mu Cibalo 3 twakaiya kuti Saatani Diabolosi wakazangila Jehova. Saatani naakazanga, Jehova wakamuleka walo alimwi abangelo batasyomeki, naa madaimona, kuti kabacikkede kujulu kwaciindi cili mbocibede. Aboobo tabali boonse kujulu ibakali kucita ncayanda Leza. Mu Cibalo 10, tuyakwiiya zinji kujatikizya Saatani amadaimona aakwe.

12. Ino nzintu nzi zyobilo zipati izyakacitika zyaambidwe ku Ciyubunuzyo 12:10?

¹² Bbaibbele lyaamba kuti Jesu mbwaakabeda buyo Mwami wa Bwami bwa Leza, wakalwana Saatani. (Amubale Ciyubunuzyo 12:7-10.) Kapango 10 kaamba zintu zyobilo zipati izyakacitika. Cakusaanguna, Bwami bwa Leza bwakatalika kulela kabuli mumaanza aa Mwami Jesu Kristo, alimwi cabili Saatani wakawaalwa ansi kuzwa kujulu. Mbubonya mbotutiiye, zintu eezyi zyakacitika kale.

13. Ino ncinzi cakacitika kujulu ciindi Saatani naakawaalwa ansi?

¹³ Bbaibbele lyaamba mbobakakkomana bangelo basyomeka ciindi Saatani amadaimona aakwe nobakawaalwa ansi kuzwa kujulu. Tubala kuti: “Amusekelele, nywebo nomajulu andinywe nomukkala mulingawo!” (Ciyubunuzyo 12:12) Lino kujulu koonse kuli luumuno alukamantano akaambo kakuti boonse ibali nkuko bacita kuyanda kwa Leza.

14. Ino ncinzi cacitika aanyika akaambo kakuti Saatani wakatandwa kujulu?

 ¹⁴ Pele buumi aano anyika buliindene kapati ambobubede kujulu. Bantu bacitikilwa zintu zibi kapati ‘nkaambo Diabolosi wabaselukila,’ alimwi waboola “abukali bupati, mbwaanga ulizyi kuti ujisi buyo kaindi kaniini.” (Ciyubunuzyo 12:12) Saatani ulinyemede kapati. Wakatandwa kujulu alimwi ulizyi kuti uyakunyonyoonwa lino-lino. Ulifwundumene kuleta manyongwe, macise alimwi amapenzi munyika yoonse mboizulwa.

15. Ino makanze nzi ngajisi Leza kujatikizya nyika?

¹⁵ Pele makanze ngajisi Leza kujatikizya nyika taacincide pe. Uciyanda kuti bantu balondokede bakakkale aanyika muparadaiso mane kukabe kutamani. (Intembauzyo 37:29) Aboobo, ino Bwami bwa Leza buyoopa buti kuti eeci cicitike?

16, 17. Ino lugwalo lwa Daniele 2:44 lutwaambila nzi kujatikizya Bwami bwa Leza?

¹⁶ Businsimi ibuli kulugwalo lwa Daniele 2:44 bwaamba kuti: “Lino mumazuba aabami aabo Leza wakujulu uyoobikka bwami ibutakanyonyoonwi pe. Bwami oobo tabukapegwi kubantu bambi pe. Buyoopwayaula akumanizya mami aaya oonse, mpoonya bwalo bulikke buyakwiima nji mane kukabe kutamani.” Ino businsimi oobu butuyiisya nzi kujatikizya Bwami bwa Leza?

¹⁷ Cakusaanguna, butwaambila kuti Bwami bwa Leza bwakali kuyootalika kulela “mumazuba aabami aabo.” Eeci caamba kuti mfwulumende zimbi zyakali kunoociliko anyika ciindi Bwami oobu nobwakali kuyootalika kulela. Cabili, butwaambila kuti Bwami bwa Leza bunooliko mane kukabe kutamani alimwi tabukanjililwi busena amfwulumende imbi. Mpoonya catatu, butwaambila kuti kuyooba nkondo akati ka Bwami bwa Leza alimwi amfwulumende zyamunyika eeyi. Bwami bwa Leza buyoozunda  alimwi buyooba mfwulumende ilikke buyo iiyakulela nyika. Aboobo, bantu bayooba amfwulumende mbotu kapati iitanabwenwe mubuumi bwabo boonse.

18. Ino yiitwa buti nkondo yamamanino akati ka Bwami bwa Leza alimwi amfwulumende zyamunyika eeyi?

¹⁸ Ino Bwami bwa Leza buyootalika buti kweendelezya nyika yoonse mboizulwa? Kaitanatalika nkondo yamamanino iitegwa Amagedoni, madaimona ayakweena “bami bamunyika yoonse kuti ababunganye antoomwe kunkondo yabuzuba bupati bwa Leza Singuzuzyoonse.” Inzya, mfwulumende zyabantu ziyakulwana Bwami bwa Leza.—Ciyubunuzyo 16:14, 16; amubone Bupanduluzi Buyungizyidwe 10.

19, 20. Nkaambo nzi ncotuyandika Bwami bwa Leza kuti bweendelezye nyika?

¹⁹ Nkaambo nzi ncotuyandika Bwami bwa Leza? Kuli twaambo tutaleli kuli totatwe. Kaambo kakusaanguna nkakuti, tuli basizibi, aboobo tulaciswa akufwa. Pele Bbaibbele lyaamba kuti mubweendelezi bwa Bwami bwa Leza, tuyakupona lyoonse mane kukabe kutamani. Mubwini, lugwalo lwa Johane 3:16 lwaamba kuti: “Leza wakaiyanda kapati nyika cakuti wakapa Mwanaakwe simuzyalwaalikke, kutegwa muntu uuli woonse uumusyoma atanyonyoonwi, pele abe abuumi butamani.”

²⁰ Kaambo kabili ncotuyandika Bwami bwa Leza nkakuti tuzingulukidwe abantu babi. Ibanji mbabeji, mbampelenge alimwi tabalilemeki pe. Swebo tatukonzyi kubagusya bantu aaba, pele Leza uyakucita oobo. Bantu ibazumanana kucita zintu zibi bayakunyonyoonwa lya Amagedoni. (Amubale Intembauzyo 37:10.) Kaambo katatu ncotuyandika Bwami bwa Leza nkakuti mfwulumende zyabantu zyaalilwa, tazikwe nguzu, zilaalunya, alimwi taziluleme. Taziyandi kugwasya bantu kuti bamvwide Leza. Bbaibbele lyaamba kuti ‘muntu  weendelezya muntunyina munzila iimuletela mapenzi.’—Mukambausi 8:9.

21. Ino mbuti Bwami mbobuyoopa kuti kuyanda kwa Leza kucitwe aano aanyika?

²¹ Yaakwiinda Amagedoni, Bwami bwa Leza buyoopa kuti kuyanda kwa Leza kucitwe aano aanyika. Mucikozyanyo, buyoogusya Saatani amadaimona aakwe. (Ciyubunuzyo 20:1-3) Mpoonya mukuya kwaciindi, kunyina uuyakuciswa naa kufwa. Akaambo kacinunuzyo, bantu boonse ibasyomeka bayooba acoolwe cakupona mane kukabe kutamani mu Paradaiso. (Ciyubunuzyo 22:1-3) Bwami oobu buyoosalazya zina lya Leza. Ino eeci caamba nzi? Caamba kuti mfwulumende ya Leza yaakweendelezya nyika, bantu boonse bayoolemeka zina lya Jehova.—Amubone Bupanduluzi Buyungizyidwe 21.

22. Ino tuzyi buti kuti Jesu tanaakaba Mwami naakali aanyika naa mbwaakabusyilwa buyo?

²² Jesu wakayiisya basikwiiya bakwe kupaila kuti: “Abuboole Bwami bwako.” Aboobo cilisalede kuti aciindi eeco mfwulumende ya Leza yakacili kumbele. Jehova wakali kuyoosaanguna kutalisya mfwulumende yakwe akubikka Jesu kuba Mwami wanjiyo. Sena Jesu wakabikkwa kuba Mwami mbwaakapilukila buyo kujulu? Peepe, wakeelede  kulindila. Aciindi cimwi kabusyidwe kale Jesu, Petro alimwi a Paulo bakakasalazya kaambo aaka nobakaamba kuti businsimi ibuli ku Intembauzyo 110:1 bwakali kwaamba Jesu. Mubusinsimi oobu Jehova wakaamba kuti: “Kkala kujanza lyangu lyalulyo kusikila mane ndikabikke basinkondonyoko kuba cilyatilo camaulu aako.” (Milimo 2:32-35; Bahebrayo 10:12, 13) Ino Jesu wakeelede kulindila kwaciindi cilamfwu buti Jehova katanamubikka kuba Mwami?

23. (a) Ino Jesu wakatalika lili kulela kali Mwami wamfwulumende ya Leza? (b) Ino tuyakwiiya nzi mucibalo citobela?

²³ Kwamyaka minji kautanasika mwaka wa 1914, kakamu ka Banakristo basyomeka kakazyiba kuti mwaka ooyu wakali kuyooba mwaka mupati mubusinsimi bwamu Bbaibbele. Zintu izyali kucitika munyika kuzwa mu 1914 zitondezya kuti ncobeni bakaliluzi. Jesu wakatalika kulela kali Mwami mumwaka ooyu. (Intembauzyo 110:2) Kuzwa waawo tiilyakalampa pe, Saatani wakawaalwa ansi, aanyika, alimwi lino “ujisi buyo kaindi kaniini.” (Ciyubunuzyo 12:12) Mucibalo citobela, tuyakubona bumboni bunji ibutondezya kuti tupona mukaindi aaka. Kuyungizya waawo, tuyakwiiya kuti lino-lino Bwami bwa Leza buyoopa kuti kuyanda kwa Leza kucitwe aano aanyika.—Amubone Bupanduluzi Buyungizyidwe 22.