1. Se a te ‵talo lauiloa ka sautala nei tatou ki ei?

E LAU i miliona a tino e iloa ne latou te ‵talo lauiloa telā e taku ko te ‵Talo a te Aliki. Ne fakaaoga ne Iesu te ‵talo tenei ke akoako ana soko ke iloa ne latou o ‵talo. Se a te mea ne ‵talo a ia ki ei? Kae kaia e tāua ei te ‵talo tenei mō tatou?

2. Ne a mea tāua e tolu ne akoako mai ne Iesu ke ‵talo tatou ki ei?

² Muna a Iesu: “E ‵tau mo koutou o ‵talo atu penei: ‘Te motou Tamana telā i te lagi, ke tapu [io me, faka‵malu] tou igoa. Ke oko mai tou Malo. Ke fai te mea e loto koe ki ei i te lalolagi nei e pelā mo te faiga i te lagi.’” (Faitau te Mataio 6:9-13.) Kaia ne akoako ei ne Iesu tatou ke ‵talo ki mea e tolu konā?—Onoono ki te Fakamatalaga Fakaopoopo i te 20.

3. Ne a mea e ‵tau o iloa ne tatou e uiga ki te Malo o te Atua?

³ Ko oti ne tauloto tatou me i te igoa o te Atua ko Ieova. Kae ko oti ne sautala tatou me se a te loto o te Atua mō tino mo te lalolagi. Kae se a te uiga o pati a Iesu i ana pati: “Ke oko mai tou Malo”? Ka tauloto tatou me se a te Malo o te Atua, ne a mea ka fai ne ia, kae ka faka‵malu pefea i ei a te igoa o te Atua.

4. Se a te Malo o te Atua, kae ko oi tena Tupu?

⁴ Ne fakatu aka ne Ieova se malo faka-te-lagi kae filifili ne ia Iesu ke fai mo Tupu i ei. E taku ne te Tusi Tapu a te malo tenei ko te Malo o te Atua. A Iesu ko “te Tupu o latou kolā ka pule e pelā me ne tupu mo te Aliki o  latou kolā ka pule e pelā me ne aliki.” (1 Timoteo 6:15) E uke atu a mea ‵lei e mafai o fai ne Iesu i lō so se tino pule, kae malosi atu a ia i lō tino pule katoa māfai ko ‵kau fakatasi.

5. E pule mai i fea a te malo o te Atua? Se a te mea ka pule ki ei?

⁵ Ne foki atu a Iesu ki te lagi i te fasefulu aso mai tua o tena toetuga. Fakamuli ifo, ne fakasopo ne Ieova a ia ke fai mo Tupu o te Malo. (Galuega 2:33) A te malo o te Atua ka pule mai i te lagi ki luga i te lalolagi. (Fakaasiga 11:15) Tenā te pogai e taku ei ne te Tusi Tapu a te Malo o te Atua se “Malo i te lagi.”—2 Timoteo 4:18.

6, 7. Kaia e ‵lei atu ei a Iesu i lō so se tupu?

⁶ E fai mai te Tusi Tapu me i a Iesu e sili atu i lō so se tupu me ko ia “fua tokotasi telā e se mafai o mate.” (1 Timoteo 6:16) A tino pule katoa ka ‵mate atu fakamuli, kae ko Iesu e se mafai o mate. A mea ‵lei katoa kolā ka fai ne Iesu mō tatou ka tumau ki te se-gata-mai.

⁷ E fai mai se valoaga i te Tusi Tapu me i a Iesu ka fai pelā me se Tupu ‵lei kae alofa atafai: “Te agaga o Ieova ka nofo i luga i a ia, te agaga o te poto mo te malamalama, te agaga o pati fakatonutonu mo te malosi, te agaga o te iloaga mo te mataku ki a Ieova. Kae ka maua ne ia te fiafia i te mataku ki a Ieova. Ka se fai fua ana fakamasinoga e ‵tusa mo mea e lavea ki ana mata, io me polopoloki ‵mafa e ‵tusa mo mea e lagona ki ana taliga. Ka fakamasino ne ia a tino ma‵lalo [io me ma‵tiva] mo te ‵lei.” (Isaia 11:2-4) E mata, e manako koe ki se tupu penā?

8. E iloa pefea ne tatou me ka se pule tokotasi mai a Iesu?

⁸ Ko oti ne filifili aka ne te Atua ne tino ke pule fakatasi mo Iesu i te malo i te lagi. E pelā me se fakaakoakoga, ne fai atu te apositolo ko Paulo ki a Timoteo: “Kafai e tumau tatou i te kufaki, ka pule fakatasi foki tatou e  pelā me ne tupu.” (2 Timoteo 2:12) E tokofia a tino ka pule fakatasi mo Iesu e pelā me ne tupu?

9. E tokofia a tino ka pule fakatasi mo Iesu? Ne kamata anafea te filifiliga o latou ne te Atua?

⁹ E pelā mo te mea ne tauloto ne tatou i te Mataupu e 7, ne lavea ne te apositolo ko Ioane se fakaasiga telā ne lavea ne ia i ei a Iesu e pelā me se Tupu i te lagi fakatasi mo nisi tupu e toko 144,000. Ko oi te toko 144,000 konei? Ne fakamatala mai a Ioane me i tino konei “e maua ne latou tena igoa [Iesu] mo te igoa o tena Tamana e tusi i luga i olotou lae.” Kae ne toe fai mai a ia: “Konei a tino kolā e tau‵tali atu faeloa i te Tamā Mamoe [telā ko Iesu] faitalia me tefea te koga e fano a ia ki ei. A latou konei ne ‵togi mai i tino.” (Faitau te Fakaasiga 14:1, 4.) Te toko 144,000 konei ko Kelisiano fakamaoni kolā ne filifili ne te Atua ke “pule latou ki te lalolagi” fakatasi mo Iesu. Kafai e ‵mate latou, e faka‵tu aka latou ke ola i te lagi. (Fakaasiga 5:10) Talu mai taimi o te kau apositolo, ne kamata o filifili ne Ieova a Kelisiano fakamaoni ke aofia i te potukau o tupu e toko 144,000.

10. Kaia e fai ei pelā me se faifaiga alofa mai i a Ieova ke pule a Iesu mo te toko 144,000 ki luga i tino?

¹⁰ E atafai malosi a Ieova ki a tatou tenā ne fakatoka ei ne ia ke pule fakatasi a tino mo Iesu. Ka fai a Iesu e pelā me se tupu ‵lei me e malamalama a ia i a tatou. E iloa ne Iesu a te olaga e pelā me se tino mo te ola i se olaga logo‵mae. Ne fai mai a Paulo me alofa a Iesu ki a tatou, a ia e “amanaia ki ‵tou vāivāiga,” kae “ko oti ne tofotofogina i feitu katoa e pelā eiloa mo tatou.” (Epelu 4:15; 5:8) E iloa foki ne te toko 144,000 a te olaga e pelā me se tino. Kae ne fakafesagai atu latou mo te tulaga sē ‵lei katoatoa mo masaki. Tela la, e mafai o mautinoa i a tatou me i a  Iesu mo te toko 144,000 ka malamalama i ‵tou lagonaga e pelā foki mo fakalavelave e fe‵paki mo tatou.

11. Kaia ne akoako ei ne Iesu ana soko ke ‵talo ke fai te loto o te Atua i te lagi?

¹¹ Ne akoako ne Iesu ana soko ke ‵talo ke fai te loto o te Atua i te lagi. Kaia? I te Mataupu e 3 ne tauloto tatou me i a Satani te Tiapolo ne ‵teke ki a Ieova. Mai tua o te ‵tekeatuga a Satani, ne talia ne Ieova a ia mo agelu sē fakamaoni, io me ko temoni, ke ‵nofo i te lagi mō se taimi. Tela la, e se ko tino katoa i te lagi ne fai ne latou te loto o te Atua. I te Mataupu e 10, ka tauloto tatou ki mea e uke atu e uiga ki a Satani mo ana temoni.

12. Ne a mea tāua e lua ne ‵tupu, e fakamatala mai i te Fakaasiga 12:10?

¹² E fakamatala mai te Tusi Tapu me mai tua malie loa o te taimi ne fai ei a Iesu mo Tupu o te Malo o te Atua, ne taua atu a ia ki a Satani. (Faitau te Fakaasiga 12:7-10.) E fakamatala mai i te fuaiupu e 10 a mea tāua e lua kolā ne ‵tupu. Ne kamata o pule te Malo o te Atua kae ko Iesu Keliso te Tupu i ei, kae ko Satani ne ‵pei ifo ki te lalolagi. Ko oti ne ‵tupu a mea konei, e pelā mo mea ka tauloto tatou ki ei.

13. Se a te mea ne tupu i te lagi i te taimi ne ‵pei ifo ei a Satani?

¹³ E fakamatala mai i te Tusi Tapu a te fia‵fia o agelu fakamaoni i te ‵peiifoga a Satani mo ana temoni mai te lagi. E fai‵tau tatou penei: “Ke fia‵fia koutou, e te lagi mo koutou kolā e ‵nofo i ei!” (Fakaasiga 12:12) Nei la, ko maua atu i te lagi te filemu kātoatoa mo te ‵kau fakatasi me ko fai ne tino katoa kolā e ‵nofo i ei a te loto o te Atua.

14. Ne a mea ko ‵tupu i te lalolagi ona ko te ‵peiifoga o Satani mai te lagi?

 ¹⁴ Kae ko oko eiloa te ‵kese te olaga i te lalolagi. E ‵tupu a mea matagā ki tino “me ko oti ne fanaifo te Tiapolo” kae “ko oko eiloa i te kaitaua me e iloa ne ia i tena taimi ko toetoe.” (Fakaasiga 12:12) A Satani ko kaitaua malosi. Ko oti ne ‵pei ifo a ia mai te lagi, kae e iloa ne ia me ko pili fua o fakaseai atu a ia. E fai ne ia so se mea e mafai ne ia o fai ke ‵tupu a fakalavelave, tigaina mo logo‵maega i te lalolagi kātoa.

15. Se a te loto o te Atua mō te lalolagi?

¹⁵ Kae e seki mafuli eiloa te loto o te Atua mō te lalolagi. Koi manako eiloa a ia ke ola a tino ‵lei katoatoa ki te se-gata-mai i te lalolagi palataiso. (Salamo 37:29) E fakataunu pefea ne te Malo o te Atua a te mea tenei?

16, 17. Se a te mea e fai mai i te Tanielu 2:44 e uiga ki te Malo o te Atua?

¹⁶ A te valoaga i te Tanielu 2:44 e fai mai: “I aso o tupu konā ka fakatu aka ei ne te Atua o te lagi se malo telā ka se mafai o fakaseai. Kae ko te malo tenei ka se tuku atu ki se isi atufenua. Ka tuki pala kae fakaseai ne ia a malo katoa konei, kae ka tumau eiloa a te malo tenā ki te se-gata-mai.” Ne a mea e tauloto ne tatou mai te valoaga tenei e uiga ki te Malo o te Atua?

¹⁷ Muamua la, e fai mai i ei ki a tatou me i te Malo o te Atua ka kamata o pule mai “i aso o tupu konā.” Ko tena uiga kafai ko kamata o pule te Malo kae koi ‵tu mai eiloa a nisi malo konei i te lalolagi. A te lua, e fai mai me i te Malo o te Atua ka tumau ki te se-gata-mai kae ka se sui eiloa ne se isi malo. A te tolu, ka isi se taua i te va o te Malo o te Atua mo malo o te lalolagi. Ka manumalo te Malo o te Atua kae ko ia fua te malo e tasi telā ka pule  ki luga i te lalolagi. Tenā ko maua ei ne tino a te ‵toe malo tafasili i te ‵lei.

18. Se a te igoa o te taua fakaoti i te va o te Malo o te Atua mo malo o te lalolagi nei?

¹⁸ Ka fakatakavale pefea ne te Malo o te Atua a pulega o te lalolagi? Mai mua o te taua fakaoti, telā e taku ko te taua o Amaketo, ka takitaki ‵se ne temoni a “tupu o te lalolagi nofoaki kātoa, o fakamaopoopo mai latou ki te taua i te aso lasi o te Atua Malosi Katoatoa.” Ao, ka taua atu a malo o tāgata ki te Malo o te Atua.—Fakaasiga 16:14, 16; onoono ki te Fakamatalaga Fakaopoopo i te 10.

19, 20. Kaia e ma‵nako ei tatou ke pule atu te Malo o te Atua ki luga i te lalolagi?

¹⁹ Kaia e ma‵nako ei tatou ki te Malo o te Atua? E tolu a pogai. Muamua la, a tatou ne tino agasala, tela la, a tatou e ma‵saki kae ‵mate. Kae e fai mai te Tusi Tapu me ka ola tatou ki te se-gata-mai mai lalo i te Malo o te Atua. E tonu, e fai mai te Ioane 3:16: “Ona ko te lasi o te alofa o te Atua ki te lalolagi ne tuku mai ei ne ia tena Tama fagasele e tokotasi, ko te mea ke se fakaseai atu so se tino telā e fakaasi atu faeloa te fakatuanaki ki a ia kae ke maua ne ia te ola se-gata-mai.”

²⁰ A te lua o pogai e ma‵nako ei tatou ki te Malo o te Atua me ko sikomia tatou ne tino amio ma‵sei. E kai‵soa kae pati ‵loi kae fai amioga fakatauavaga sē ‵tau a tino e tokouke. E seai se ‵tou mea e mafai o fai ke tapale kea‵tea a latou, kae ka fai ne te Atua te mea tenā. A tino kolā e tumau i te faiga ne latou a mea ma‵sei ka fakaseai atu i Amaketo. (Faitau te Salamo 37:10.) A te tolu o pogai e ma‵nako ei tatou ki te Malo o te Atua ona ko te vāivāi, te ma‵sei mo te faivalevale o malo o tāgata. E se fia fesoasoani atu latou ki tino ke faka‵logo ki te Atua. E fai mai  te Tusi Tapu me ko “pule . . . te tagata ki te suā tagata kae logo‵mae i ei.”—Failauga 8:9.

21. Ka fakamautinoa aka pefea ne te Malo me e fai eiloa te loto o te Atua i te lalolagi?

²¹ Mai tua o Amaketo, ka fakamautinoa aka ne te Malo o te Atua ke fakataunu te loto o te Atua i te lalolagi. E pelā me se fakaakoakoga, ka tapale kea‵tea ne ia a Satani mo ana temoni. (Fakaasiga 20:1-3) Fakamuli loa, ka se toe ai se tino e masaki io me mate. Ona ko te taulaga togiola, ka mafai ei o ola ki te se-gata-mai a tino fakamaoni katoa i te Palataiso. (Fakaasiga 22:1-3) Ka faka‵malu ei ne te Malo a te igoa o te Atua. Se a te uiga o te mea tenei? E fakauiga i ei me kafai ko pule te malo o te Atua ki te lalolagi, a tino katoa ka fakaaloalo atu ki te igoa o Ieova.—Onoono ki te Fakamatalaga Fakaopoopo i te 21.

22. E iloa pefea ne tatou me ne seki fai a Iesu mo fai te Tupu i tena nofoga i te lalolagi io me i te taimi ne fakatu aka ei a ia mai te mate?

²² Ne akoako ne Iesu ana soko ke ‵talo atu penei: “Ke oko mai tou Malo.” Tela la, e manino ‵lei me i te Malo o te Atua ka sae mai i aso mai mua. Muamua la, ka fakatu aka ne Ieova tena malo kae fai a Iesu mo Tupu i ei. E mata, ne fai a Iesu mo Tupu i te taimi ne foki atu ei a ia  ki te lagi? Ikai, ne ‵tau o faka‵tali a ia. I se taimi mai tua o te fakatuakaga o Iesu mai te mate, ne fakamaina faka‵lei mai ne Petelu mo Paulo a te mea tenei i te taimi ne fai mai ei me e fakasino atu te valoaga i te Salamo 110:1 ki a Iesu. I te valoaga tenā, ne fai mai a Ieova: “Sagasaga i toku feitu fakaatamai ke oko ki te taimi e tuku ei ne au ou fili mo fai te mea e tuku ei ou vae.” (Galuega 2:32-35; Epelu 10:12, 13) E pefea te leva e ‵tau ei o faka‵tali a Iesu ki te taimi ka fai ei ne Ieova a ia mo fai te Tupu?

23. (a) Ne kamata anafea o pule mai a Iesu e pelā me se Tupu i te malo o te Atua? (e) Ne a mea ka tauloto ne tatou i te suā mataupu?

²³ I tausaga e uke mai mua o te 1914, ne malamalama se potukau o Kelisiano loto fakamaoni me i te tausaga tenā se tausaga tāua i valoaga i te Tusi Tapu. Ne fakamaoni aka ne mea ‵tupu i te lalolagi talu mai te 1914 te ‵tonu o latou. Ne kamata o pule a Iesu e pelā me se Tupu i te tausaga tenā. (Salamo 110:2) E se leva mai tua ifo, ne ‵pei ifo a Satani ki te lalolagi, kae nei la “tena taimi ko toetoe.” (Fakaasiga 12:12) I te suā mataupu, ka onoono tatou ki fakamaoniga e uke atu me ko ‵nofo eiloa tatou i te vaitaimi tenā. Ka tauloto foki tatou me i se taimi pili mai ka fakamautinoa aka ne te Malo o te Atua ke fakataunu eiloa te loto o te Atua i te lalolagi.—Onoono ki te Fakamatalaga Fakaopoopo i te 22.