FUNDO 8
Umambo wa Mwari Cinyi?
1. Munamato upi waticada kubhuya nge zvawo zvinopano?
ANHU ajinji anouziya munamato unoziikanwa maningi unozwi Baba Edu kana kuti Munamato wa Tenzi. Djesu akaseenzesa munamato uu kuti afundise afundi ake kunamata. Cinyi caakakumbira pamunamato uwona? Uye ngei munamato uwona teciuda maningi mazuwa ano?
2. Ngazvipi zviro zvitatu zvatakafundiswa na Djesu kuti tikumbire?
2 Djesu akati: “Munodikana kunamata kudai: ‘Baba edu ari kudenga, zina renyu ngariceneswe. Umambo wenyu ngauuye. Kuda kenyu ngakuizwe pa nyika hingana zvakunoizwa kudenga.’” (Erengai Mateu 6:9-13.) Ngei Djesu akatifundisa kukumbira zviro zvitatu izvi?—Onai pakazwi Nyasai Kuzwisisa n.o 18.
3. Cinyi catinodikana kuziya ngo pamusoro pe Umambo wa Mwari?
3 Takafunda kuti zina ra Mwari ndi Djehovha. Takafundazve kuti ngacipi cido ca Mwari nekuda ke anhu no nyika. Asi Djesu aida kureyei paakanamata kuti: “Umambo wenyu ngauuye”? Ticafunda kuti Umambo wa Mwari cinyi, cinyi caucaita, uye ucacenesa kudini zina ra Mwari.
UMAMBO WA MWARI CINYI?
4. Umambo wa Mwari cinyi, uye ndiani Mambo wakhona?
4 Djehovha akagadza utongi kudenga uye akasanangura Djesu kuti agare Mambo wakhona. Bhaibheri rinodainza utongi uu kuti Umambo wa Mwari. Djesu “ndiye Mambo we aya anotonga hinga madzimambo uye Tenzi we aya anotonga hinga madzitenzi.” (1 Timoti 6:15) Djesu anokwanisa kuita zviro zvakanaka kupinda mutongi upi hake, uye ano simba maningi kupinda atongi ese kunyazi akabatana.
5. Umambo wa Mwari ucatonga uri kupi, uye ucatonga cinyi?
5 Mu masure me mazuwa makumi marongomuna Djesu amutswa, iyena akahwirira kudenga. Nokuhamba ke nguwa, Djehovha akamugadza kuti agare Mambo we Umambo wake. (Zviito 2:33) Utongi wa Mwari ucatonga nyika uri kudenga. (Zvakapangidzwa 11:15) Ndiyo ndaa Bhaibheri rinodainza Umambo wa Mwari kuti “Umambo wo kudenga.”—2 Timoti 4:18.
6, 7. Cinyi cinoita kuti Djesu agare Mambo akanaka kupinda amweni?
6 Bhaibheri rinobhuya kuti Djesu mukuru kupinda mambo upi hake we pa nyika ngokuti ndiye “ega asikafi.” (1 Timoti 6:16) Atongi ese e pa nyika anofa, asi Djesu aazombofi. Zvese zvaacatiitira zvicarumbwa zviripo nokusikaperi.
7 Uphorofiti we Bhaibheri unobhuya kuti Djesu acagara Mambo asikasananguri uye ano usisi unoti: “Mwiya wa Djehovha ucagara paari, mwiya we uzii no mwiya wokuzwisisa, mwiya we kupasa mazano no we simba, mwiya wokuziya no wokuthya Djehovha. Aazotongi no zvaanokwanisa kuona no madziso ake, kana kusumurura no zvaanozwa basi. Acatonga zvakanaka akaterera [kana arombo].” (Isaya 11:2-4) Munoda kugara na mambo akadaro here?
8. Tinoziya kudini kuti Djesu aazotongi ega?
8 Mwari akasanangura anhu anganani kuti atonge na Djesu kudenga hinga madzimambo. Ngo muezaniso, muphostori Pauro akati kuna Timoti: “Kana tikarumbwa tecishingirira, ticazotongawo pamwepo hinga madzimambo.” (2 Timoti 2:12) Anhu angana acatonga hinga madzimambo na Djesu?
9. Anhu angana acatonga na Djesu? Mwari akatanga kuasanangura kubvira riini?
9 Hinga zvatakafunda mu Fundo 7, muphostori Juau akaona cioneso ca Djesu paainga aa mambo kudenga ano madzimambo 144 000. Madzimambo 144 000 ndianani? Juau anopanganidza kuti awona “ainga ano zina ra [Djesu] ne zina ra Baba ake rakatarhwa pa hope dzawo.” Anoenderera mberi eciti: “Aya ndiwo anorumbwa eciteera bira [kureya Djesu] kwese karinoenda. Aya akatengwa pakati pe anhu.” (Erengai Zvakapangidzwa 14:1, 4.) Madzimambo 144 000 maKristu akatendeka akasanangurhwa na Mwari kuti “atonge hinga madzimambo pa nyika” na Djesu. Paanofa, anomutswa kuti ararame kudenga. (Zvakapangidzwa 5:10) Kubvira pa nguwa yo aphostori, Djehovha aciri kusanangura maKristu akatendeka kuti agare madzimambo anokwana 144 000.
10. Ngei tingati Djehovha akapangidza rudo pakuita kuti Djesu no 144 000 atonge anhu?
10 Djehovha anotida maningi zvokutoti akaita urongwa wokuti anhu atonge na Djesu kudenga. Djesu acagara mambo wakanaka ngokuti anotizwisisa. Iyena anozviziya kuti cinyi kugara munhu we nyama uye kushuphika. Pauro akabhuya kuti Djesu anotizwisisa uye ‘anoziya kutama kedu simba,’ uye ‘akaedzwa hingana isusu pa zvese.’ (Ahebheru 4:15; 5:8) Madzimambo 144 000 anoziyawo kuti cinyi kugara munhu we nyama. Akarhwisana no citema uye akarhwarawo. Hino tinogonda kuti Djesu no madzimambo 144 000 acatizwisisa zvakanaka.
UMAMBO WA MWARI UCAITEI?
11. Ngei Djesu akafundisa afundi ake kuti anamate kuti kuda ka Mwari kuizwe kudenga?
11 Djesu akafundisa afundi ake kuti anamate kuti kuda ka Mwari kuizwe kudenga. Ngei? Takafunda mu Fundo 3 kuti Sathani Dhiyabhorosi akapandukira Mwari. Mu masure me kupanduka ka Sathani, Djehovha akasiya kuti iyena ne madhimoni ake agare kudenga ke nguwa yakati kuti. Ngokudaro aesepi aiita kuda ka Mwari kudenga. Mu Fundo 10, ticafunda zvakawanda pamusoro pa Sathani ne madhimoni ake.
12. Zviro zvipi zviiri zvikuru zvinopanganidzwa pana Zvakapangidzwa 12:10?
12 Bhaibheri rinopanganidza kuti mu masure me kugadzwa hinga Mambo we Umambo wa Mwari, Djesu aizoita hondo na Sathani. (Erengai Zvakapangidzwa 12:7-10.) Vherisikuro 10 inopanganidza zviro zviiri zvikuru zvaizoitika. Umambo wa Mwari unotanga kutonga wecitungamirirhwa na Djesu Kristu hinga Mambo, uye Sathani anokhandirhwa pasi pano kubva kudenga. Hingana zvaticafunda, zviro izvi zvakatoitika.
13. Cinyi cakaitika kudenga Sathani paakakhandirhwa pasi ecibva kudenga?
13 Bhaibheri rinopanganidza kupfara kakaita ngirozi dzakatendeka pa nguwa yokuti Sathani no madhimoni ake akakhandirhwa pasi pano kubva kudenga. Tinoerenga kuti: “Pfarai, imwi matenga nemwi munogaremo!” (Zvakapangidzwa 12:12) Zvino uno kune rugariko no rubatano zvakakwana kudenga ngokuti ese ari ikona anoita kuda ka Mwari.
Kubvira pakakhandirhwa Sathani no madhimoni ake pa nyika, zviro zviri kumbambirira kushata. Matambudziko aya mbai-mbai pano acapera
14. Zvinyi zviri kuitika pa nyika nge ndaa yekukhandirhwa kakaita Sathani pasi pano?
14 Asi upenyu pa nyika pano wakasiyana maningi. Pa nyika pano pari kuitika zviro zvakashata maningi “ngokuti Dhiyabhorosi akacita pasi” uye “akanyangadzwa maningi, eciziya kuti ano nguwa doko.” (Zvakapangidzwa 12:12) Sathani akafututa. Akadzingirhwa kudenga, uye anoziya kuti acaparadzwa mbai-mbai pano. Iyena ari kuita zvese zvaanokwanisa kuti nyika idzare no zviro zvinoshupha anhu.
15. Mwari akasikirei nyika?
15 Asi zvaida Mwari paakasika nyika azvizi kucinja. Aciri kuda kuti anhu akakwana ararame nokusikaperi mu paradhizo pa nyika pano. (Pisarema 37:29) Hino, Umambo wa Mwari ucaita kudini kuti izvi zviitike?
16, 17. Dhanyeri 2:44 inotibvunzei nge zve Umambo wa Mwari?
16 Uphorofiti uri pana Dhanyeri 2:44 unoti: “Mu mazuwa e madzimambo awona, Mwari we kudenga acaita kuti pamuke umambo usikazombotsakatiswi. Umambo wakhona auzopaswani. Ucaputsa, wopedza umambo wese uu, uye ndiwo wega ucagara uripo nokusikaperi.” Uphorofiti uu unoda kutifundisei nge zve Umambo wa Mwari?
17 Cokutanga, unotibvunza kuti Umambo wa Mwari waizotanga kutonga mu “mazuwa e madzimambo awona.” Izvi zviri kuda kureya kuti Umambo wa Mwari waizotanga kutonga utongi ye anhu iciripo pa nyika. Cecipiri, unotibvunza kuti Umambo wa Mwari unozogara nokusikaperi uye auzocinjwi no utongi umweni. Cecitatu, paizomuka hondo pakati pe Umambo wa Mwari no utongi ye anhu. Umambo wa Mwari ndiwo waizowina uye waizogara woga wecitonga nyika yese. Anhu anozogara no utongi wakanakisisa waasati akamboona.
18. Ndiripi zina re hondo yekupedzesera pakati pe Umambo wa Mwari ne utongi ye anhu?
18 Umambo wa Mwari ucaita kudini kuti utonge nyika yese? Hondo yekupedzesera isati yaitika, inozwi hondo ye Amagedhoni, madhimoni acacengedzera “madzimambo e nyika yese inogarhwa kuti aaunganidzire ku hondo ye zuwa guru ra Mwari we Masimba Ese.” Kubhuya kuti utongi ye anhu icada kurhwisana ne Umambo wa Mwari.—Zvakapangidzwa 16:14, 16; onai pakazwi Nyasai Kuzwisisa n.o 9.
19, 20. Ngei tecida kuti Umambo wa Mwari utonge pa nyika pano?
19 Ngei tecida Umambo wa Mwari? Pano zviro zvakawanda zvinoita kuti tide Umambo wa Mwari, asi ngatione zviro zvitatu basi. Cokutanga, tiri anhu ano citema, ndiyo ndaa tinorhwara no kufa. Asi Bhaibheri rinobhuya kuti pasi pe Umambo wa Mwari ticararama nokusikaperi. Zvirokwazvo, Juau 3:16 inoti: “Mwari akada maningi nyika, zvokuti akapasa Mwana wake umwe ega, kuitira kuti munhu wese anomutenda asatsakatiswe, asi aone upenyu usikaperi.”
20 Cecipiri, takatendererhwa no anhu anoita zvakashata. Anhu akawanda anonyepa, anotsotsa uye ano maitiro anopsverudza. Apana catinokwanisa kuita kuti tizvipedze, asi Mwari acazviita. Anhu anobambirira kuita zvakashata acatsakatiswa pa Amagedhoni. (Erengai Pisarema 37:10.) Ciro cecitatu cinoita kuti tide Umambo wa Mwari ndecekuti utongi ye anhu aina simba, ino bvinga, uye inodyekerhwa. Aina cido cokubetsera anhu kuti aite kuda ka Mwari. Bhaibheri rinobhuya kuti “munhu unotonga munhu ecimubata zvakashata.”—Muparidzi 8:9.
21. Umambo ucaita kudini kuti kuda ka Mwari kuizwe pa nyika?
21 Mu masure me hondo ye Amagedhoni, Umambo wa Mwari ucaita kuti kuda ka Mwari kuizwe pa nyika. Ngo muezaniso, ucabvisa Sathani ne madhimoni ake. (Zvakapangidzwa 20:1-3) Pakupedzesera, apana munhu acarhwara kana kufa. Nge ndaa ye rusudzunuro, anhu ese akatendeka acakwanisa kurarama mu Paradhizo nokusikaperi. (Zvakapangidzwa 22:1-3) Umambo ucacenesa zina ra Mwari. Izvi zviri kuda kureyei? Zviri kuda kureya kuti utongi wa Mwari paunonga wecitonga pa nyika, anhu ese acakudza zina ra Djehovha.—Onai pakazwi Nyasai Kuzwisisa n.o 19.
DJESU AKAGARA MAMBO RIINI?
22. Tinoziya kudini kuti Djesu aazi kugara mambo paainga ari pa nyika pano kana paakatomutswa?
22 Djesu akafundisa afundi ake kuti anamate kudai: “Umambo wenyu ngauuye.” Izvi zvakabudisa pamhene kuti utongi wa Mwari waizouya mberiyo. Cokutanga Djehovha akagadza umambo pedzepo akazoita Djesu Mambo wakhona. Kodi Djesu akagara Mambo paakandoguma kudenga here? Haiwa, aidikana kumboimirira. Nguwa imweni mu masure me kumutswa ka Djesu, Pedru na Pauro akadjekesa izvi paakaseenzesa uphorofiti uri pana Pisarema 110:1 kuna Djesu. Apona Djehovha anoti: “Gara ku muoko kwawo wangu dakara ndaita kuti azondi ako agare pasi pe tsoka dzako.” (Zviito 2:32-35; Ahebheru 10:12, 13) Djesu aidikana kuimirira nguwa yakareba kudini kuti Djehovha amugadze mambo?
Umambo wa Mwari ucaita kuti kuda ka Mwari kuizwe pa nyika
23. (a) Djesu akatanga riini kutonga hinga Mambo we Umambo wa Mwari? (b) Ticafundei mu fundo inoteera?
23 Cikwata cimweni ce maKristu cakazwisisa gore ra 1914 risati ratoguma kuti raizogara gore rinodikana maningi pa uphorofiti we Bhaibheri. Zviro zviri kuitika pa nyika kubvira muna 1914 zvinopangidza kuti awona akareketa zvirokwazvo. Djesu akatanga kutonga kubvira mu gore irona kamare. (Pisarema 110:2) Pedzepo, Sathani akakhandirhwa pasi pano uye zvinopano “ano nguwa doko.” (Zvakapangidzwa 12:12) Mu fundo inoteera, ticaona zvakawanda zvinopangidza kuti tiri kurarama mu nguwa iyona. Ticaonazve kuti mbai-mbai pano Umambo wa Mwari ucaita kuti kuda ka Mwari kuizwe pa nyika.—Onai pakazwi Nyasai Kuzwisisa n.o 20.
