1. Ohutililo yipi ya kũlĩhĩwa tu konomuisa cilo?

OMANU valua voluali va kũlĩha ohutililo yi tukuiwa hati, a Isietu, ale Ohutililo ya Ñala. Yesu wa linga ohutililo yaco oco a longise olondonge viaye ndomo via sukilile oku likutilila. Ovina vipi a tukula vohutililo? Momo lie ohutililo yaco yi kuetele esilivilo kokuetu koloneke vilo?

2. Ovina vipi vitatu Yesu a tu longisa okuti ovio tu sukila oku pinga vohutililo?

² Yesu wa popia hati: “Likutilili ndoco: ‘A Isietu o kasi kilu, onduko yove yi sumbiwe. Usoma wove wiye. Ocipango cove ci lingiwe palo posi, ndeci ci lingiwa kilu.’” (Tanga Mateo 6:9-13.) Momo lie Yesu a tu longisila oku pinga vohutililo ovina viaco vitatu?—Tala Etosi 20 kesulilo lielivulu lilo.

3. Nye tu sukila oku kũlĩha catiamẽla Kusoma wa Suku?

³ Tua lilongisa okuti onduko ya Suku Yehova. Tua lilongisavo ocipango ca Yehova Suku catiamẽla komanu kuenda kongongo. Pole, olondaka Yesu a tukula poku popia hati: “Usoma wove wiye,” vi lomboloka nye? Tu konomuisa eci ci lomboloka Usoma wa Suku, eci Usoma waco u ka linga, kuenda ndomo u ka kemãlisa onduko yi kola ya Suku.

4. Usoma wa Suku u lomboloka nye, kuenda helie Soma yaco?

^{4 4} Yehova wa tumbika uviali waye kilu, kuenje wa nõla Yesu oco a linge Osoma yaco. Embimbiliya li tukula uviali waco hati, Usoma wa Suku. Yesu “eye Soma yolosoma haeye  Ñala yoloñala yava va viala.” (1 Timoteo 6:15) Yesu o pondola oku linga ovina vialua viwa okuti layimue ombiali yoluali lulo yi tẽla oku vi linga. Yesu o kuetevo unene wa velapo okuti ka u sokisiwa lunene wolombiali viosi violuali lulo.

5. Uviali wa Suku u ka viala oku upisa pi? U ka viala nye?

⁵ Noke yoku pita akũi akuãla koloneke tunde eci Yesu a pinduiwa, wa tiukila kilu. Kuenje, Yehova wo nõla oco a linge Soma Yusoma. (Ovilinga 2:33) Uviali wa Suku u ka viala ongongo oku upisa kilu. (Esituluilo 11:15) Eli olio esunga lieci Embimbiliya li tukuila Usoma waco hati: ‘Usoma wo kilu.’—2 Timoteo 4:18.

6, 7. Nye ci pondola oku velisapo Yesu okuti olosoma violuali lulo vi sule?

⁶ Embimbiliya li popia hati, Yesu wa velapo okuti olosoma viomanu vi sule, momo “eye lika ka fi.” (1 Timoteo 6:16) Olombiali viosi violuali via siata oku fa, pole Yesu lalimue eteke a ka fa. Ovina viosi viwa Yesu a ka tu lingila vi ka kala otembo ka yi pui.

⁷ Ocitumasuku Cembimbiliya ci lekisa okuti, Yesu o ka kala Osoma yimue ya sunguluka haeye ukuahenda poku popia ndoco: “Espiritu lia Yehova li kala laye, Espiritu liolondunge luloño, Espiritu lielungulo lunene, Espiritu liukũlĩhĩso lusumba wa Yehova. Esanju liaye li kala koku sumbila Yehova; Ka tetulula ndeci ci lete ovaso aye, pamue oku teta onimbu [ale oku lungula] ndeci ci yeva ovatũi aye, puãi o tetuluila olosuke lesunga.” (Isaya 11:2-4) Ove hẽ o yongola okuti soma yove o kala nda Yesu?

8. Tua kũlĩha ndati okuti Yesu ka ka viala likaliaye?

⁸ Suku wa nõla omanu vamue oco va ka viale la Yesu vuviali wo kilu. Upostolo  Paulu wa sapuila Timoteo hati: “Nda tu pandikisa, tu ka vialavo kumosi ndolosoma.” (2 Timoteo 2:12) Omanu vañami va ka viala kumue la Yesu?

9. Omanu vañami va ka viala la Yesu? Otembo yipi Suku a fetika oku nõla omanu vaco?

⁹ Ndomo tua lilongisa kocipama 7, upostolo Yoano vocinjonde a kuata wa mola Yesu wa vialekiwa komangu Yusoma kilu kumue leci ci soka 144.000 kolosoma vikuavo. Velie va panga onepa kueci ci soka144.000 komanu? Yoano wa lombolola hati: “Kovipolo viavo kua sonehiwa onduko ya [Yesu] londuko ya Isiaye.” Noke wa amisako hati: “Ovo va kasi oku kuama Kameme [okuti Yesu] kuosi a enda. Va landiwa pokati komanu.” (Tanga Esituluilo 14:1, 4.) Ci soka 144.000 Kakristão vakuekolelo Suku a nõla, “va ka viala ndolosoma koluali luosi” kumue la Yesu. Poku fa, va pinduiwa oco va ka kale kilu. (Esituluilo 5:10) Tunde kotembo yovapostolo, Yehova wa siata oku nõla Akristão vakuekolelo oco va pange onepa kocimunga comanu va soka 144.000 kolosoma.

10. Momo lie tu popela okuti Yehova wa lekisa ocisola poku nõla Yesu kumue leci ci soka 144.000 oco va viale omanu?

¹⁰ Omo okuti Yehova wa siata oku tu tata ciwa, wa linga esokiyo lioku nõla omanu vamue oco va ka viale kumue la Yesu kilu. Yesu o ka kala ombiali yimue yiwa, momo o kuete elomboloko liekalo lietu. Eye wa kũlĩha eci ci lomboloka oku kala omunu, kuenda oku tala ohali. Paulu wa popia hati, Yesu o tu kuetele ocikembe okuti, wa “kapako oku hongua kuetu,” kuenda wa “setekiwa kovina viosi ndetu.” (Va Heveru 4:15; 5:8) Ci soka 144.000 komanu va kũlĩhavo eci ci lomboloka oku kala omunu. Momo, va siatavo oku liyaka locitangi cekambo lioku lipua, kuenda ovovei. Omo liaco, tu pondola oku  kolela okuti Yesu kumue leci ci sola 144.000 komanu, ka va ka kuata lika elomboloko liekalo lietu. Pole, va ka kuatavo elomboloko liovitangi tua siata oku liyaka lavio.

11. Momo lie Yesu a longisila olondonge viaye oku likutilila oco ocipango ca Suku ci lingiwe kilu?

¹¹ Yesu wa longisa olondonge viaye oku likutilila, oco ocipango ca Suku ci lingiwe kilu. Momo lie? Kocipama 3 tua lilongisa okuti Satana Eliapu wa lekisa esino ku Yehova. Noke liesino liaco, Yehova wa ecelela okuti Satana kumue lovangelo vãvi okuti olondele, va kala kilu vokuenda kuotembo yimue. Omo liaco, vokuenda kuotembo yaco kilu kua kala ovangelo vamue ka va endele oku linga ocipango ca Suku. Kocipama 10, tu ka lilongisa ovina vikuavo viatiamẽla ku Satana kuenda kolondele.

12. Ovolandu api a kuete esilivilo lia velapo a tukuiwa kelivulu Liesituluilo 12:10?

¹² Embimbiliya li lombolola okuti, eci Yesu a linga Soma Yusoma wa Suku, wa laikele oku linga uyaki la Satana. (Tanga Esituluilo 12:7-10.) Ocinimbu 10, ci lombolola ovolandu avali a kuete esilivilo lia velapo. Usoma wa Suku wa fetika oku vialiwa la Soma Yesu Kristu, kuenje Satana wa tundisiwa kilu, noke wa imbiwa palo posi. Ndomo tu ka ci konomuisa, ovolandu aco a tẽlisiwa ale.

13. Eci Satana a tundisiwa kilu nye ca pitako?

¹³ Embimbiliya li lombolola esanju ovangelo vakuekolelo va kuata, eci Satana kumue lolondele viaye va tundisiwa kilu. Olio li popia hati: “Yoleli ene ailu lene wa tungimo!” (Esituluilo 12:12) Omo liaco, cilo kilu pokati kovangelo pali ombembua yalua kuenda va likuete omunga, momo vosi yavo va kasi oku linga ocipango ca Suku.

14. Omo okuti Satana wa tundisiwa kilu nye ca siata oku pita palo posi?

 ¹⁴ Ocili okuti omuenyo palo posi wa litepa calua. Omanu va siata oku liyaka lovitangi vialua, momo ‘Eliapu lia lokila kokuetu,’ kuenda li kuete ‘onyeño yalua, omo lia kũlĩha okuti li kuete otembo yitito.’ (Esituluilo 12:12) Satana o kuete onyeño yalua. Eye wa tundisiwa kilu, kuenda wa kũlĩha okuti ndopo o ka nyõliwa. Satana wa siata oku linga ovina vialua vi koka ovitangi, evalo, kuenda ohali voluali luosi.

15. Cipi ocipango ca Suku catiamẽla kongongo?

¹⁵ Ocipango ca Suku catiamẽla kongongo ka ca pongolokele. Eye o yongola okuti omanu va lipua, oco va kale otembo ka yi pui voluali luokaliye palo posi. (Osamo 37:29) Usoma wa Suku u ka tẽlisa ndati ovina viaco?

16, 17. Elivulu lia Daniele 2:44, li tu sapuila nye catiamẽla Kusoma wa Suku?

¹⁶ Ocitumasuku ci sangiwa kelivulu lia Daniele 2:44, ci popia hati: “Koloneke violosoma viaco, Suku yokilu o katula usoma, kuenje ka u nyolẽha, ka u tambuiwa lomanu vofeka yiñi; puãi owo u nyõla loku lia ovosoma aco osi, haiwo u kala muẽle hũ oloneke ka vi pui.” Ocitumasuku eci ci tu longisa nye catiamẽla Kusoma wa Suku?

¹⁷ Catete, ci tu longisa okuti Usoma wa Suku wa laikele oku fetika oku viala “koloneke violosoma viaco.” Eci ci lomboloka okuti olosoma vikuavo via laikele handi oku kala palo posi eci Usoma wa fetika oku viala. Cavali, ci tu longisa okuti Usoma wa Suku wa laikele oku kala  otembo ka yi pui, kuenda ka u ka piñanyiwa lombiali yikuavo. Catatu, kua laikele oku kala uyaki pokati Kusoma wa Suku kuenda olombiali violuali lulo. Usoma wa Suku wa laikele oku yula okuti owo lika u viala ongongo yosi. Noke omanu va ka kuata ombiali ya velapo va sukila.

18. Uyaki wa sulako u ka lingiwa pokati Kusoma wa Suku kuenda olombiali violuali lulo u tukuiwa ndati?

¹⁸ Usoma wa Suku u ka viala ndati oluali luosi? Osimbu uyaki wa sulako u tukuiwa hati o Harmagedo ka wa fetikile handi, olondele vi ka yapuisa ‘olosoma violuali luosi, oco viongoluiwile uyaki weteke linene lia Suku Ukuonene Wosi.’ Ocili okuti, olombiali violuali lulo vi ka linga uyaki Lusoma wa Suku.—Esituluilo 16:14, 16; tala Etosi 10 kesulilo lielivulu lilo.

19, 20. Momo lie tu sukilila Usoma wa Suku oco u viale ongongo?

¹⁹ Momo lie tu sukilila Usoma wa Suku? Kuli asunga atatu a lekisa eci tu sukilila Usoma waco. Liatete, lieli okuti ka tua lipuile, tua siata oku vela, kuenda oku fa. Pole, Embimbiliya li popia hati, vemẽhi Liusoma wa Suku tu ka kala otembo ka yi pui. Omo liaco, elivulu lia Yoano 3:16 li popia hati: “Omo Suku a sola calua oluali, wa eca Omõlaye wongunga, okuti wosi o kolela kokuaye ka nyõliwa, [pole] o kuata omuenyo ko pui.”

²⁰ Esunga liavali lieci tu sukilila Usoma wa Suku lieli okuti, tua ñualiwa lomanu valua va siata oku linga ovina vĩvi. Valua pokati kavo olohembi, vakuakunyana, kuenda va siata oku linga ovina via vĩha. Ndaño okuti ka tu pondola oku linga cimue oco tu va kundule, pole Suku o ka ci linga. Omanu vana va siata oku amamako oku linga ovina via vĩha, va ka kunduiwa vokuenda kuyaki wo Harmagedo. (Tanga Osamo 37:10.) Esunga liatatu lieci tu sukilila Usoma wa Suku lieli okuti, olombiali violuali lulo via hongua, olongangala, ale vakuavitukiko. Ovio ka vi yongola oku kuatisa omanu oco va pokole ku Suku. Embimbiliya li popia  hati: “Omunu poku kangisa ukuavo o lilinga eye muẽle cĩvi.”—Ukundi 8:9.

21. Usoma u ka ecelela ndati oco ocipango ca Suku ci lingiwe palo posi?

²¹ Noke liuyaki wo Harmagedo, Usoma wa Suku u ka ecelela okuti ocipango caye ci lingiwa palo posi. Momo, u ka kundula Satana kumue lolondele viaye. (Esituluilo 20:1-3) Noke, lomue omunu o ka vela vali, ale oku fa. Omo liocisembi, omanu vosi vakuekolelo va ka kuata esumũlũho lioku kala Voluali Luokaliye otembo ka yi pui. (Esituluilo 22:1-3) Usoma u ka kemãlisa onduko ya Suku. Eci ci lomboloka nye? Ci lomboloka okuti, eci uviali wa Suku u ka viala oluali, omanu vosi va ka sumbila onduko ya Yehova.—Tala Etosi 21 kesulilo lielivulu lilo.

22. Tua kũlĩha ndati okuti Yesu ka lingile Osoma eci a kala palo posi ale ceci a pinduiwa?

²² Yesu wa longisa olondonge viaye oco vi likutilile ndoco: “Usoma wove wiye.” Olondaka evi vi lekisa okuti Usoma wa Suku wa laikele oku iya kovaso yoloneke. Tete Yehova wa laikele oku tumbika uviali waye okuti  Yesu eye Soma yaco. Anga hẽ Yesu wa vialekiwa komangu Yusoma eci a tiukila kilu? Sio, momo wa sukilile oku talamẽla. Noke liotembo yimue tunde eci Yesu a pinduiwa, Petulu kumue la Paulu, va lombolola ocitumasuku ci sangiwa kelivulu Liosamo 110:1 okuti va ci tiamisila ku Yesu. Vocitumasuku caco Yehova wa popia hati: “Tumãla kondio yange toke hu lingila ovanyãli vove ociliatelo cove.” (Ovilinga 2:32-35; Va Heveru 10:12, 13) Yesu wa sukilile oku talamẽla toke otembo yipi oco a tumbikiwe komangu Yusoma?

23. (a) Otembo yipi Yesu a linga Osoma okuti oco a fetika oku viala Vusoma wa Suku? (b) Nye tu ka lilongisa vocipama ci kuãimo?

²³ Vokuenda kuanyamo alua osimbu unyamo wo 1914 ka wa pitĩlile handi, ocimunga cimue Cakristão vocili va kuata elomboloko liokuti unyamo waco wa laikele oku kuata esilivilo lia velapo vocitumasuku Cembimbiliya. Tunde kunyamo wo 1914, ovolandu a siata oku eca uvangi wokuti ovisimĩlo viavo via suapo. Yesu wa linga Osoma vunyamo waco. (Osamo 110:2) Noke, Satana wa imbiwa palo posi, kuenje cilo o “kuete otembo yitito.” (Esituluilo 12:12) Vocipama ci kuãimo, tu ka lilongisa ovina vikuavo vi lekisa okuti tu kasi kotembo yaco. Tu ka lilongisavo okuti Usoma wa Suku ndopo u ka tẽlisa ocipango caye palo posi.—Tala Etosi 22 kesulilo lielivulu lilo.