1. Ẹrhovwo vọ ra riẹnre mamọ yen che roro kpahen?

IDUDURU rẹ ihwo riẹn kpahen ẹrhovwo re seri nẹ Ọsẹ rẹ Avwanre, yẹrẹ Ẹrhovwo rẹ Ọrovwori na. Jesu vwẹ ẹrhovwo na vwo yono idibo rọyen obo ra nẹrhovwo wan. Die yen ọ nẹrhovwo kpahen? Diesorọ ẹrhovwo na vwọ ghanre kẹ avwanre nonẹna?

2. Erọnvwọn erha vọ yen Jesu tare nẹ a nẹrhovwo kpahen?

² Jesu tare nẹ, “Enẹ ovwan nẹ ẹrhovwo, Ọsẹ rẹ Avwanre rọ hẹ obo odjuvwu, Jẹn avwanre vwẹ ọghọ kẹ ọde wẹn [yẹrẹ, e ru odẹ wẹn fon]. Jẹn Uvie wẹn rhe, ru ẹguọnọ wẹn vwẹ akpọ na kirobo re ruẹ vwẹ obo odjuvwu.” (Se Matiu 6:9-13.) Diesorọ Jesu vwọ tanẹ a nẹrhovwo kpahen erọnvwọn erha yena?—Ni Eta rẹ Odjefiotọ 20.

3. Die yen ofori nẹ avwanre riẹn kpahen Uvie rẹ Ọghẹnẹ?

³ Avwanre yonori nẹ odẹ rẹ Ọghẹnẹ Jihova. Avwanre ji yono kpahen ọhọre rẹ Ọghẹnẹ vwọ kẹ ihworakpọ vẹ otọrakpọ na re. Die yen Jesu mudiaphiyọ rọ vwọ tanẹ, “Jẹn Uvie wẹn rhe”? Avwanre che yono kpahen oborẹ Uvie rẹ Ọghẹnẹ mudiaphiyọ, obo ro che ru, kugbe obo ro che ru odẹ Ọghẹnẹ fon.

4. Die yen Uvie rẹ Ọghẹnẹ, ono yen Ovie rọyen?

⁴ Jihova vwẹ usuon mu vwẹ odjuvwu, ọ da vwẹ Jesu ru Ovie rọyen. Baibol na se usuon nana Uvie rẹ  Ọghẹnẹ. Jesu yen “Ovie ro vwo ivie ejobi kugbe Ọrovwohwo ro vwo ihwo ejobi.” (1 Timoti 6:15) O vwo ohworakpọ vuọvo ro se ru erhuvwu kerẹ Jesu-u, o ji vwo ẹgba nẹ isun rẹ akpọneje.

5. Tivọ yen usuon Ọghẹnẹ na che sun nurhe? Tivọ yen uvie na che sun?

⁵ Ra vwọ rhọvwọn Jesu nu, ẹdẹ ujuvẹ yen wanre tavwen o ki kpo odjuvwu. Jihova da reyọ vwo mu Ovie rẹ Uvie na. (Iruo Rẹ Iyinkọn Na 2:33) Usuon rẹ Ọghẹnẹ che sun vwo nẹ odjuvwu rhe otọrakpọ na. (Ẹvwọphia 11:15) Kọyensorọ Baibol vwo se Uvie rẹ Ọghẹnẹ nẹ “Uvie rọyen vwẹ obo odjuvwu.”—2 Timoti 4:18.

6, 7. Diesorọ Jesu vwo yovwin vrẹ isun rẹ ihworakpọ?

⁶ Baibol na tare nẹ Jesu rho vrẹ ivie rẹ akpọ na ejobi kidie ọyehẹ “ọvuọvo ro je ghwo na.” (1 Timoti 6:16) Isun rẹ ihworakpọ ghwẹ, ẹkẹvuọvo Jesu cha dia bẹdẹ. Erhuvwu rẹ usuon rẹ Jesu cha dia bẹdẹ.

⁷ Aroẹmrẹ rẹ Baibol na tare nẹ Jesu cha dia Ovie ro vwo erorokẹ, ro ji che brorhiẹn rẹ abavo: “[“Ẹwẹn,” NW] rẹ Ọrovwohwo kọ cha rhan muo, [“ẹwẹn,” NW] rẹ ẹghwanre vẹ ẹruọ; [“ẹwẹn,” NW] rẹ iroro vẹ ẹgba, [“ẹwẹn,” NW] rẹ erianriẹn vẹ oshọ ẹdjẹ rẹ Ọrovwohwo. Ẹguọnọ rọyen kẹ evun rẹ oshọ ẹdjẹ rẹ Ọrovwohwo ọ dia. Ọ dia obo rẹ ẹro rọyen mrẹre o che ni vwo guẹdjọ-ọ eyẹ ọ cha vwẹ obo ro nyori brorhiẹ-ẹ; ẹkẹvuọvo ọvwata o vwo guẹdjọ rẹ ivwiogbere.” (Aizaya 11:2-4) Wọ guọnọ oka rẹ ovie yena?

8. Mavọ yen avwanre ru riẹn nẹ ọ dia Jesu ọvo yen che su-un?

⁸ Ọghẹnẹ sane ihwo evo ri che nene Jesu sun vwẹ  odjuvwu. Kerẹ udje, ọyinkọn Pọl vuẹ Timoti nẹ, “Ọ da dianẹ avwanre vẹ ọyen chiri, avwanre vẹ ọyen ke je re uvie kugbe.” (2 Timoti 2:12) Bro ihwo yen che nene Jesu sun?

9. Bro ihwo yen che nene Jesu sun? Ọke vọ yen Ọghẹnẹ vwọ ton ẹsanọ rayen phiyọ?

⁹ Kirobo rẹ avwanre yonori vwẹ Uyovwinrota 7, ọyinkọn Jọn mrẹ emramrẹ rẹ Jesu kerẹ Ovie vwẹ odjuvwu vẹ ivie 144,000 efa. Amono yen 144,000 na? Jọn djere nẹ e “si odẹ rọyen [Jesu] kugbe odẹ rẹ Ọsẹ rọyen phihọ arhare rayen.” Ọ da je ta: “Enana hẹ ihwo ri nene Omogodẹ na [kọyen, Jesu] kpo asan kasan rọ rare; a tan enana nẹ uherevie rẹ ihwo rẹ akpọ na rhe.” (Se Ẹvwọphia 14:1, 4.) Ihwo 144,000 na, Inenikristi re fuevun rẹ Ọghẹnẹ sanere, re vẹ Jesu “cha re vwẹ akpọ na” kerẹ ivie. Ọke ayen de ghwu, ka rhọvwọn ayen kpo odjuvwu. (Ẹvwọphia 5:10) Vwo nẹ ọke rẹ iyinkọn na rhe, ọyen Jihova vwọ sane Inenikristi re fuevun vwọba ẹko rẹ ivie 144,000 na.

10. Diesorọ ọ vwọ dia emu rẹ ẹguọnọ nẹ Jihova sane Jesu vẹ ihwo 144,000 na, nẹ ayen sun ihworakpọ?

¹⁰ Jihova vwo ọdavwẹ avwanre mamọ te ẹdia rọ vwọ sane ihworakpọ nẹ ayen nene Jesu sun. Jesu cha dia omamọ rẹ osun kidie ọ nabọ vughe avwanre. Ọ riẹn obo rọ pha ra vwọ dia ohworakpọ, ra je vwọ rioja. Pọl tare nẹ Jesu roro kẹ avwanre, ọ dia ohwo “ro jẹ ọdavwẹ rẹ avwanre ẹriẹ-ẹn,” ọyen jẹ “ohwo ra davwini dẹvure kerẹ ekpuyovwi rẹ avwanre.” (Hibru 4:15; 5:8) Ihwo 144,000 na je riẹn obo rọ hepha ra vwọ dia ohworakpọ. Ayen ji nene jẹgba vẹ ega muabọ re. Kọyensorọ o vwo mu avwanre ẹro nẹ Jesu  kugbe 144,000 na cha riẹn ebẹnbẹn kugbe ọdavwẹ rẹ avwanre.

11. Diesorọ Jesu vwo yono idibo rọyen nẹ ayen nẹrhovwo nẹ e ru ọhọre rẹ Ọghẹnẹ vwẹ odjuvwu?

¹¹ Jesu yono idibo rọyen nẹ ayen nẹrhovwo nẹ e ru ọhọre rẹ Ọghẹnẹ vwẹ odjuvwu. Diesorọ? Avwanre yonori vwẹ Uyovwinrota 3 nẹ Eshu rọ dia Idẹbono na vwọso Jihova. Ọke rẹ Eshu vwo gbevwọso nu, Jihova da vwẹ uphẹn vwọ kẹ vẹ emekashe ri gbe nene nẹ ayen dia odjuvwu ọmọke krẹn. Kọyen, ọ dia emekashe na eje yen ruẹ ọhọre Ọghẹnẹ vwẹ odjuvwu ọke yena-a. Vwẹ Uyovwinrota 10, avwanre che yono kpahen Idẹbono vẹ emekashe na kpobarophiyọ.

12. Erọnvwọn eghanghanre ivẹ vọ yen djisẹ rayen vwẹ Ẹvwọphia 12:10?

¹² Baibol na djerephia nẹ a da vwẹ Jesu mu Ovie rẹ Uvie Ọghẹnẹ nu, ko che nene Idẹbono phi ofovwin. (Se Ẹvwọphia 12:7-10.) Owọ 10 djisẹ rẹ emu eghanghanre ivẹ re phiare. Usuon rẹ Ọghẹnẹ ton phiyọ vẹ Jesu Kristi rọ dia Ovie rọyen, a djẹ Idẹbono nẹ odjuvwu rhe otọrakpọ na. Kirobo rẹ avwanre che yono, erọnvwọn nana phia nure.

13. Die yen phiare ọke ra vwọ djẹ Idẹbono nẹ odjuvwu nu?

¹³ Baibol na djisẹ rẹ aghọghọ rẹ emekashe re fuevun na ọke ra vwọ djẹ Idẹbono vẹ emekashe rọyen nẹ odjuvwu. Avwanre de se: “Ghọghọ, E odjuvwu kugbe ovwan re dia evun rọyen!” (Ẹvwọphia 12:12) Obọdẹn ufuoma kugbe oyerinkugbe rhe dia vwẹ odjuvwu kidie emekashe na eje ruẹ ọhọre rẹ Ọghẹnẹ re.

14. Die yen phia vwẹ otọrakpọ na kidie nẹ a djẹ Idẹbono nẹ odjuvwu rhe?

 ¹⁴ Ẹkẹvuọvo, akpeyeren vwẹ otọrakpọ na fẹnẹre mamọ. Erọnvwọn ebrabra phia kẹ ihwo “kidie Idẹbono wotọ bru ovwan rhire,” vẹ “ophu rode, fikiridie ọ riẹnre nẹ ọke rọyen pha krẹkrẹ.” (Ẹvwọphia 12:12) Ophu mu Idẹbono mamọ. Kidie nẹ a djẹrẹ nẹ odjuvwu, ọ je riẹn nẹ ọmọke krẹn yen chekọ ka cha ghwọrọ. Ọ davwẹngba rọyen eje rọ vwọ so okpetu, emiavwe vẹ ojaẹriọ vwẹ otọrakpọ na eje.

15. Die yen ọhọre rẹ Ọghẹnẹ vwọ kẹ akpọ na?

¹⁵ Ọhọre rẹ Ọghẹnẹ kpahen akpọ na ji rhi wene-e. Ọ je guọnọ nẹ ihworakpọ re gbare dia otọrakpọ na bẹdẹ bẹdẹ vwẹ iparadaisi. (Une Rẹ Ejiro 37:29) Ọtiọyena, mavọ yen Uvie rẹ Ọghẹnẹ se vwo ru ọnana?

16, 17. Die yen Daniẹl 2:44 vuẹ avwanre kpahen Uvie rẹ Ọghẹnẹ?

¹⁶ Aroẹmrẹ rẹ Daniẹl 2:44 da ta: “Vwẹ ọke rẹ ivie yena, Ọghẹnẹ rẹ odjuvwu na cha vwẹ uvie ọvo mu, ra sa guọghọ-ọ eyẹ e che siobọ nẹ ekete rọyen kẹ ihwo ọfa-a. Ọ cha guọghọ ivie nana ejobi ibribro ọ me vwẹ ayen te oba, ko mudia bẹdẹ.” Die yen aroẹmrẹ nana yono avwanre kpahen Uvie rẹ Ọghẹnẹ?

¹⁷ Ẹsosuọ, ọ tare nẹ Uvie Ọghẹnẹ ton usuon phiyọ “vwẹ ọke rẹ ivie yena.” Ọnana mudiaphiyọ nẹ isuon efa ji ke rhe suẹn vwẹ otọrakpọ na ọke rẹ Usuon rẹ Ọghẹnẹ cha vwọ tonphiyọ. Ọrivẹ, ọ vuẹ avwanre nẹ Uvie Ọghẹnẹ cha dia bẹdẹ, nẹ e che siobọnu ekete rọyen kẹ ihwo efa-a. Ọrerha, ofovwin cha dia uvwre rẹ Uvie rẹ Ọghẹnẹ kugbe usuon rẹ akpọ na. Uvie rẹ Ọghẹnẹ yen che phikparobọ, kọyen cha dia usuon vuọvo ro che sun akpọneje. Vwẹ ọke yena,  ihworakpọ ki che vwo omamọ rẹ usuon ro me yovwin kparobọ.

18. Die yen odẹ rẹ ofovwin rọ koba rẹ Uvie rẹ Ọghẹnẹ vẹ isun rẹ akpọ na che phi?

¹⁸ Idjerhe vọ yen Uvie rẹ Ọghẹnẹ cha vwọ reyọ ẹdia rẹ usuon rẹ akpọ na? Tavwen ofovwin rọ koba re se Amagidọn ki rhi phi, emekashe rẹ Idẹbono cha phiẹn “ivie rẹ akpọ na ejobi, ri se ayen koko ra hẹrhẹ ofovwi rẹ ẹdẹ rode rẹ Ọghẹnẹ Ọrovwoẹgba na.” E, isun rẹ akpọ na che nene Uvie Ọghẹnẹ phi ofovwin.—Ẹvwọphia 16:14, 16; ni Eta rẹ Odjefiotọ 10.

19, 20. Diesorọ avwanre vwọ guọnọ Uvie rẹ Ọghẹnẹ nẹ o sun akpọ na?

¹⁹ Diesorọ avwanre vwọ guọnọ Uvie rẹ Ọghẹnẹ? Iroro erha, siẹrẹ e da hanvwe. Ẹsosuọ, avwanre irumwemwu, avwanre muọga, ji ghwẹ. Ẹkẹvuọvo, Baibol na tare nẹ avwanre cha dia bẹdẹ siẹrẹ Uvie Ọghẹnẹ da rhe. Jọn 3:16 tare nẹ: “Ọghẹnẹ guọnọ akpọ na ọ da vwẹ Ọmọ ọvuọvo rọyen na kẹ, rere ohwo kohwo ro sere gbuyota vwo jẹ ghwọrọ ẹkẹvuọvo ko vwo arhọ ri bẹdẹ.”

²⁰ Ọrivẹ, irumwemwu rẹ ihwo riariẹ avwanre phiyọ. Ihwo buebun gun efian, ghwa ihwo ria, ji gbe ọfanrhiẹn. Avwanre che se si ihwo nana no-o, jokpanẹ Ọghẹnẹ ọvo. A cha ghwọrọ irumwemwu re rhọnvwe kurhẹriẹ-ẹ vwẹ Amagidọn. (Se Une Rẹ Ejiro 37:10.) Ọrerha, usuon rẹ ihworakpọ pha brabra, ayen ji vọn vẹ ọkon. Ayen guọnọ chọn ihwo uko vwọ kerhọ rẹ Ọghẹnẹ-ẹ. Baibol na tare nẹ “ohwo da tua ohwo muotọ kẹ umiovwo rọyen.”—Aghwoghwo 8:9.

21. Mavọ yen Uvie na cha nẹrhẹ e ru ọhọre Ọghẹnẹ vwẹ akpọ na?

 ²¹ Amagidọn da wan nu, Uvie Ọghẹnẹ cha nẹrhẹ e ru ọhọre rẹ Ọghẹnẹ vwẹ akpọ na. Kerẹ udje, ọ cha ghwọrọ Idẹbono kugbe emekashe rọyen. (Ẹvwọphia 20:1-3) Ohwo vuọvo rha cha muọga-a. Ihworakpọ re fuevun cha dia bẹdẹ vwẹ Iparadaisi fikirẹ ọtanhirhe na. (Ẹvwọphia 22:1-3) Uvie na che ru odẹ rẹ Ọghẹnẹ fon. Die yen ọnana mudiaphiyọ? O mudiaphiyọ nẹ usuon rẹ Ọghẹnẹ de sun akpọ na re, ihworakpọ eje che muọghọ kẹ odẹ rẹ Jihova.—Ni Eta rẹ Odjefiotọ 21.

22. Mavọ yen avwanre ru riẹn nẹ a vwẹ Jesu mu Ovie vwẹ otọrakpọ-ọ, yẹrẹ ugege ra vwọ rhọvwọn nẹ ushi-i?

²² Jesu yono idibo rọyen nẹ ayen nẹrhovwo: “Jẹn Uvie wẹn rhe.” Ọyena djerephia nẹ usuon rẹ Ọghẹnẹ cha rhe vwẹ obaro na. Jihova cha reyọ usuon na vwo mu, ọ me rha vwẹ Jesu vwo mu Ovie rọyen. Ugege rẹ Jesu vwo rhivwin kpo odjuvwu yen a vwọ reyọ mu Ovie? Ẹjo, ọ hẹrhẹre. Ọke ra vwọ rhọvwọn Jesu nẹ ushi nu, Pita vẹ Pọl de djephia phephẹn oborẹ  aroẹmrẹ rẹ Une Rẹ Ejiro 110:1 shekpahen Jesu. Vwẹ aroẹmrẹ na, Jihova da ta: “Tidia vwẹ obọrhe mẹ, bẹsiẹye me vwọ vwẹ ivwighrẹ wẹn hwaotọ kẹ wẹ chiyi.” (Iruo Rẹ Iyinkọn Na 2:32-35; Hibru 10:12, 13) Mavọ o che kri te tavwen Jihova ki vwẹ Jesu mu Ovie?

23. (a) Ọke vọ yen Jesu vwọ ton usuon phiyọ kerẹ Ovie? (b) Die yen e che yono vwẹ uyovwinrota rọ vwọ kpahen ọnana?

²³ Ikpe buebun tavwen a ke rhe mrẹ 1914, ẹko rẹ Inenikristi evo vwo ẹruọ rẹ ọghanrovwẹ rẹ ukpe yena kirobo rẹ Baibol na mraro rọyen. Obo re phia vwẹ akpọ na vwo nẹ 1914 rhe, djerephia nẹ ẹruọ rayen na gbare. Jesu ton usuon phiyọ vwẹ ukpe yena. (Une Rẹ Ejiro 110:2) O rhe kri-i, a da djẹ Idẹbono rhe otọrakpọ na, asaọkiephana “ọke rọyen pha krẹkrẹ.” (Ẹvwọphia 12:12) Vwẹ uyovwinrota rọ vwọ kpahen ọnana, avwanre cha mrẹ erọnvwọn efa ri djerephia nẹ avwanre yerẹn vwẹ ọke yena re. Avwanre ji che yono nẹ Uvie rẹ Ọghẹnẹ cha nẹrhẹ e ru ọhọre rẹ Ọghẹnẹ vwẹ akpọ na kẹrẹkpẹ.—Ni Eta rẹ Odjefiotọ 22.