1. Che orassion ndaremo considerar adesso?

GESÙ el ga doperà una orassion modelo, ciamada de Padre Nostro, par insegnar ai so dissìpoli come pregar. Cossa Gesù el ga domandà in questa orassion? E parché la è importante par noantri ancoi?

2. Che tre robe importanti Gesù el ne ga insegnà a domandar?

² Gesù el ga dito: “Alora, gavé de orar cossita: ‘Pare nostro che te sì ntei cieli, santificà sia el to nome. Vegna el to Regno. Sia fata la to volontà, come ntel cielo, anca ntela Tera.’” (Lesi Mateus 6:9-13.) Parché Gesù el ga insegnà a far orassion sora queste tre cose? —Vedi la Nota Final 20.

3. Cossa gavemo de saver sora el Regno de Dio?

³ Gavemo imparà che el nome de Dio l’è Geovà. E gavemo considerà quala la è la volontà de Dio par i umani e par la Tera. Ma cossa Gesù el volea dir cole parole: “Vegna el to Regno”? Ndaremo imparar cossa l’è el Regno de Dio, cossa sto Regno ndarà far e come ndarà santificar el nome de Dio.

4. Cossa l’è el Regno de Dio e chi l’è el so Rè?

⁴ Geovà el ga stabilio un governo celestial e el ga scoliesto Gesù par esser el Rè de sto governo. La Bìblia la ciama questo governo de Regno de Dio. Gesù l’è “el Rè de quei che i governa come rè e el Signor de quei che i governa come  signori”. (1 ­Timóteo 6:15) No ghen’è governante meio che Gesù. Lu l’è pi poderoso che tuti i governanti umani insieme.

5. De ndove governa el Regno de Dio? E sora cossa ndarà governar?

⁵ Quaranta giorni dopo dela so ressuression, Gesù el ga ritornà al cielo. Par fin Geovà lo ga nominà el Rè del Regno. (Atos 2:33) El governo de Dio ndarà governar tuta la Tera dal cielo. (Apocalipse 11:15) Par quela, la Bìblia la ciama el Regno de Dio de “Regno celestial”. —2 Timóteo 4:18.

6, 7. Parché podemo dir che no ghen’è Rè meio che Gesù?

⁶ La Bìblia la dise che Gesù l’è “el ùnico che el ga imortalità”, par quela lu l’è superior a tuti i rè umani. (1 Timóteo 6:16) Tuti i governanti umani par fin i more, ma Gesù mai el morirà. Gesù el farà par noantri tuto quel che l’è bon e questo el sarà par sempre.

⁷ La professia dela Bìblia la dise che Gesù el sarà un Rè giusto e compassivo: “El spìrito de Geovà el vegnerà sora lu, el spìrito de sapiensa e comprension, el spìrito de consìlio e de potensa, el spìrito de cognossensa e de temor de Geovà. E lu el sentirà piaser nel temor de Geovà. Lu no’l giudicarà d’acordo con quel che se vede, gnanca el darà reprension sol secondo quel che el scolta. Lu el giudicarà i poareti con giustìssia.” ­(Isaías 11:2-4) Te piaseria gaver un Rè cossita?

8. Come savemo che Gesù no ndarà governar lu sol?

⁸ Dio el ga scoliesto arquanti umani par governar con Gesù ntel governo celestial. El apòstolo  Paolo el ga dito a Timòteo: “Se seitemo tirarse avanti, ­ndaremo anca governar insieme come rè.” (2 Timóteo 2:12) Quanti i governarà come rè insieme con Gesù?

9. (a) Quanti i ndarà governar con Gesù? (b) Quando Geovà el ga scominsià a scòlier questo grupo?

⁹ Come gavemo imparà ntel capìtolo 7, el apòstolo Gioani el ga bio una vision ndove el ga visto Gesù come Rè ntel cielo con altri 144.000 rè. Chi ze i ­144.000? Gioani el ga spiegà che lori “i ga el so nome [de Gesù] e el nome de so Pare scriti su la fronte.” E el ga dito ancora: “Questi i ze quei che i seita ndar drio al Piegoreto [che l’è Gesù] no importa ndove lu el va. Lori i ze stati compradi intrà la umanità.” (Lesi Apocalipse 14:1, 4.) I 144.000 i ze cristiani fedeli che Dio el ga scoliesto “par governar come rè sora la Tera” con Gesù. Quando i more, lori i ze ressussitadi par viver ntel cielo. (Apocalipse 5:10) Dal tempo dei apòstoli, Geovà l’è drio scòlier cristiani fedeli par far parte del grupo dei 144.000 rè.

10. Parché l’è amoroso da parte de Geovà scòlier Gesù e i 144.000 par governar i umani?

¹⁰ Geovà el se importa tanto con noantri che Lu el ga scoliesto umani par governar con Gesù. Gesù el sarà un bon governante parché el ne capisse. Lu el sa cossa vol dir viver e sofrir come umano. Paolo el ga dito che Gesù el se importa con noantri, el pol “capir le nostre fiachesse” e lu “l’è stà proà in tuti i aspeti come noantri”. (Hebreus 4:15; 5:8) Anca i 144.000 i sa cossa vol dir viver come umani. Lori i  ga tribulà cole imperfession e le malatie. Alora podemo esser sicuri che Gesù e i 144.000 i ndarà capir come se sentimo e anca i problemi che infrontemo.

11. Parché Gesù el ga insegnà i so dissìpoli a far orassion che la volontà de Dio la sia fata ntel cielo?

¹¹ Gesù el ga insegnà i so dissìpoli a far orassion che la volontà de Dio la sia fata ntel cielo. Parché? Gavemo imparà ntel capìtolo 3 che Sàtana el Diaol el se ga rebelà contra Geovà. Dopo dela rebelion de Sàtana, Geovà el ga assà lu e i àngeli infedeli, ciamadi demoni, restar ntel cielo par un tempo. Cossita ntel cielo gnanca tuti i era drio far la volontà de Dio. Ntel capìtolo 10, ndaremo imparar de pi sora Sàtana e i demoni.

12. Che due importanti eventi i ze descriti in Apocalipse 12:10?

¹² La Bìblia la spiega che Gesù, pena dopo de deventar Rè del Regno de Dio, l’è ndà far guera contra Sàtana. (Lesi Apocalipse 12:7-10.) El verseto 10 el descrive due eventi tanto importanti. Primo, el Re­gno de Dio el ga scominsià a governar quando Gesù Cristo l’è stà fato Rè. Secondo, Sàtana l’è stà butà zo dal cielo ala Tera. Come ndaremo imparar, questi eventi i ze belche sucedesti.

13. Cossa l’è sucedesto ntel cielo quando Sàtana l’è stà butà zo?

¹³ La Bìblia la descrive la alegria dei àngeli fedeli quando Sàtana e i so demoni i ze stati butadi zo dal cielo. Podemo leser: “Sé contenti, ò cieli e valtri che sé de star lì!” (Apocalipse 12:12) Adesso ghen’è pace e union ntel cielo parché tuti quei che i vive là i ze drio far la volontà de Dio.

14. Cossa l’è sucedesto ntela Tera quando Sàtana l’è stà butà zo dal cielo?

 ¹⁴ Ma la vita ntela Tera la è pròpio difarente. L’è drio suceder robe rugne “parché el Diaol l’è vegnesto zo” e el ga “granda ràbia parché el sa che el ga una s-cianta de tempo.” (Apocalipse 12:12) Sàtana l’è inrabià. Lu l’è stà butà zo dal cielo e el sa che presto el sarà destruto. Lu el fà tuto quel che el pol par causar problemi, dolor e sofrimento in tuta la Tera.

15. Quala la è la volontà de Dio par la Tera?

¹⁵ Ma la volontà de Dio par la Tera no la ga mia cambià. Lu ancora el vol che i umani perfeti i viva ntel Paradiso qua ntela Tera. (Salmo 37:29) Ma come el Regno de Dio el farà questo?

16, 17. Cossa Daniel 2:44 el dise sora el Regno de Dio?

¹⁶ La professia de Daniel 2:44 la dise: “Nei giorni de quei rè, el Dio del cielo el stabilirà un regno che no’l sarà mai destruto. E sto regno no’l sarà passà a nissun altro pòpolo. El schissarà e el finirà con ­tuti sti regni, e sol sto regno el restarà par sempre.” Cossa ne insegna questa professia sora el Regno de Dio?

¹⁷ Primo, la ne dise che el Regno de Dio el scominsiaria a governar “nei giorni de quei rè”. Questo vol dir che ghen saria ancora altri governi ntela Tera quando sto Regno el scominsiasse a governar. ­Secondo, la ne dise che el Regno de Dio ndaria durar par sempre e no’l saria mai cambià par un altro governo. E terso, ghen saria una guera tra el Regno de Dio e i governi de sto mondo. El Regno de Dio ndaria vinser  e el saria el ùnico governo sora la Tera. Alora i umani i gavarà el meio governo che se podaria ­gaver.

18. Qual l’è el nome dela guera final tra el Regno de Dio e i governi de sto mondo?

¹⁸ Come el Regno de Dio ndarà rivendicar la autorità sora tuta la Tera? Vanti dela guera final, ciamada de guera del Armagedon, i demoni i ndarà inganar “i rè de tuta la Tera abitada, par riunirli par la guera del grando giorno del Dio Tuto Poderoso.” Si, i governi umani i farà guera contra el Regno de Dio.—Apocalipse 16:14, 16; vedi la Nota Final 10.

19, 20. Parché gavemo bisogno che el Regno de Dio el governe sora la Tera?

¹⁹ Parché gavemo bisogno del Regno de Dio? Ghen’è al manco tre motivi. Primo, semo pecadori, par quela restemo maladi e morimo. Ma la Bìblia la dise che soto el Regno de Dio viveremo par sempre. Infati, João 3:16 el dise: “Dio el ga amà tanto el mondo che el ga dato el so Fiol unigénito, cossita tuti quei che i pratica la fede in lu no i sia destruti ma i gàpia vita eterna.”

²⁰ Un secondo motivo che gavemo bisogno del Regno de Dio l’è parché intorno de noantri ghen’è tanti umani rugni. Tanti i dise busie, i ingana e i fà cose imorai. No podemo far gnente par finir fora con ste persone, ma Dio lo farà. Le persone che le seita far cose rugne le sarà destrute ntel Armagedon. (Lesi Salmo 37:10.) Un terso motivo che gavemo bisogno del Regno de Dio l’è che i governi umani i ze fiachi, crudeli e disonesti. Lori no i ga interesse de giutar le persone a obedir a Dio. La Bìblia la dise  che el “omo el ga dominà el omo par el so pròpio dano.” —Eclesiastes 8:9.

21. Cossa el Regno de Dio el farà?

²¹ Dopo del Armagedon, el Regno de Dio el farà che la volontà de Dio la sia fata ntela Tera. Par esémpio, lu el finirà fora con Sàtana e i so demoni. (Apocalipse 20:1-3) Par fin, nissun mai pi el restarà malà o el morirà. Par via del risgate, tuti i umani fedeli i podarà viver par sempre ntel Paradiso. (Apocalipse 22:1-3) El Regno el santificarà el nome de Dio. Cossa questo vol dir? Vol dir che quando el governo de Dio el governarà la Tera, tuti i umani i darà onor al nome de Geovà.—Vedi la Nota Final 21.

22. Come savemo che Gesù no l’è mia deventà Rè quando l’era ntela Tera o suito dopo de esser ressussità?

²² Gesù el ga insegnà i so dissìpoli a far questa orassion: “Vegna el to Regno.” Alora l’era evidente che el governo de Dio el vegnaria nel futuro. Geovà prima ndaria stabilir el so governo e ndaria far de Gesù el so  Rè. Sarà che Gesù l’è suito deventà Rè quando el ga ritornà al cielo? Nò, lu el gavaria de spetar par un tempo. Un tempo dopo dela ressuression de Gesù, tanto Piero come Paolo i ga spiegà questo quando i ga aplicà a Gesù la professia del Salmo 110:1. In questa professia Geovà el dise: “Séntate ala me drita fin quando vao meter i to nemighi soto i to pié.” (Atos 2:32-35; Hebreus 10:12, 13) Quanto ­tempo Gesù el gavaria de spetar vanti de Geovà farlo Rè?

23. (a) Quando Gesù el ga scominsià a governar come Rè del Regno de Dio? (b) Cossa ndaremo imparar ntel pròssimo capìtolo?

²³ Tanti ani vanti del 1914, un grupo de cristiani sinceri el ga capio che arquante professie dela Bìblia le ndaria realisarse in quel importante ano. Dal 1914 in qua, i eventi mondiai i ga provà che lori i gavea rason. Gesù el ga scominsià a governar come Rè in quel ano. (Salmo 110:2) Pena dopo, Sàtana l’è stà butà zo ala Tera e adesso “lu el ga una s-cianta de tempo”. (Apocalipse 12:12) Ntel pròssimo capìtolo, ndaremo veder de pi prove che semo drio viver in questo perìodo de tempo. Anca ndaremo imparar che presto el Regno de Dio el farà che la so volontà la sia fata ntela Tera. —Vedi la Nota Final 22.