1. Nivekelo heeni hiyo nneeraahu nixuttere muru ola?

ATTHU antxipale aasuwela nivekelo nna Na-atithihu. Yesu apakakaru nivekelo nna, owo ahaaxuttiha oohusera awe moota woovekela. Vano aavekenle heeni munivekelonimmo? Mwaha wa heeni oraaya wootepa otthuneya wiiwexexa nivekelo nno?

2. Itthu heeni tthaaru sootepa otthuneya Yesu onixuttinhaawe ovekela?

² Yesu enre: “vano nyuwo nvekeleke siso: Tithi, ori wirimu, nsina ná nttelihiwe. Omwen’á orwe, otthuna wá opankiwe siso wirimu ntoko vathi vava.” (Mmusome Matheyo 6:9-13.) Wopatxerani wa nivekelo na atithihu Yesu onixuttiha itthu tthaaru. (1) Weera nsina na Muluku ntteelihiwe. (2) Weera Omwene wa Muluku orwe. (3) Otthuna wa Muluku opakeye wirimu hiiho elapo ya vathi. Nikoho tinna, mwaha wa heeni Yesu onixuttinhaawe ovekela itthu iya? — Nwehe Enoota 20.

3. Eheeni nintthunaahu osuwela voohima sa Omwene wa Muluku?

³ Hiyo noohoona weera nsina na Muluku, Yehova. Nave-tho noosoma ele Muluku ontthunaawe wa atthu ni ya elapo ya vathi. Vano Yesu aatthuna ohima eheeni vaavo onixuttinhaawe weera Omwene wa Muluku orwe? Onnatthuneya osuwela, Omwene wa Muluku, ele oneeraawe opake omwene owo ni moota Muluku oneerawe otteelihe nsinanawe.

4. Omwene wa Muluku tiheeni, ni taani athanliwe weera alamuleleke omwene owo?

⁴ Omwene wa Muluku, eguvernu ya Muluku etikitheriwe wirimu. Muluku oomuthanla Yesu weera akhale Mwene a elamulelo awe. Yesu alamulelaka elapo ya vathi, owo  onrowa wakhavihera atthu waapwaha anamalamulela moota anakhaviheraya atthu olelo. Mene Yesu okhalano owera waapwaha anamalamulela a elapo ya vathi. Tiyeeyonto Biblya oneeraawe, Yesu ti “Mwene a mamwene ni Apwiya àsipwiya.” — 1 Timotheyo 6:15.

5. Omwene wa Muluku onalamuleleke elapo yootheene ya vathi oreene woowi?

⁵ Biblya onniitthana omwene wa Muluku “Omwene wa wirimu” mwaha wooweera ovinyera wirimu wuuwu toneraawe olamuleleke elapo yootheene ya vathi. (2 Timotheyo 4:18, Apokalise 11:15). Mene Yesu avinyererihiwakaru, aatthikela wirimu evirakaru mahiku 40. Anakilaathi awehereraka ovariwa Omwene. — Miteko 2:33.

6, 7. Mwaha wa heeni Yesu oraawe oophwanelela olamulela waapwaha anamalamulela a elapo ela ya vathi?

⁶ Yesu namalamulela oophwanelela weera alamuleleke elapo ya vathi. Mwaha wa heeni? Wopatxera, Yesu khankhwa waapwaha anamalamulela a elapo ya vathi yaawo enkhwa. Nave Biblya onhima weera Yesu “yowo mekhaiye ohinakhwa.” (1 Timotheyo 6:16) Tivaavonto, sootheene oneeraawe opakeke weera aakhavihere atthu, sineereke ovirelela okhala mpaka khalayi.

⁷ Wanaaveli, Yesu anaakhale Mwene axariya ni ooreera murima. Yoolohera ya Biblya enahima weera: “munepa wa Yahvéh [Yehova] onomukhuruwele yowo munepa wosuwela ni womòva Yahvéh. Onomusivele omòva Yahvéh, khathoriha attharaka yònnaya maitho awe, nari khaphuka mulattu attharaka yìwalaya maru awe, Koma anàthorihe ahawi mwa ekhaikhai, anaphuke milattu sa òhaxiwa a elapo, mwa exariya, anamane etthaya ni murepettho wa nlumi nawe ni anamwìve mulavilavi ni nwiya wa mmwanoni mwawe.” (Yesaya 11:2-4) Mwannatthuna okhalano mweene ntoko yoowo?

8. Ninsuwenle hayi weera Yesu khanrowa olamulela meekhaawe?

 ⁸ Yesu khankela olamulela meekhaawe. Ninsuwela hayi? Biblya oneera Muluku tho onnaathanla atthu weera yalamuleleke vamoha ni Yesu wirimu. Mwa ntakihero, murummwa Paulo enre weera owo ni Timotheyo yaathanliwa weera yalamuleleke ni Yesu. Ni Paulo aalempe há, “Navilelá nnahala olamulela vamosá ni yowo tho.” (2 Timotheyo 2:12) Vano Yesu onkelá alamuleleke naatthu ahayi?

9. Atthu akavi anrowa olamulelaka ni Yesu? Yehova opatxenre salini wathanla atthu ene yaawo?

⁹ Muru 7 a buukhweene yoola, nooxuutta weera murummwa Yohani mweeriloni amoona Yesu ntoko Mwene. Onne heeni? Owo amoona Yesu arene wirimu ni mamwene makina 144.000. Nave Yohani onnathaliha: “Ala tiyale anamutthara mwaputthiputthi [eyo-tiyo Yesu] mothemwene onrowaiye’mo ala tiyale yavuluxiwe Variyari va’tthu.” (Mmusome Apokalise 14:1, 4.) Atthu ala 144.000 taani? Atthu ala makristau oororomeleya, yawo Muluku aathanliyaawe weera elamuleleke vamoha ni Yesu elapo yootheene ya vathi. Atthu ala enimweera yakhwavale, enavinyerera enarowa wirimu. (Apokalise 5:10) Atthu ala 144.000, Yehova aapatxenre waathanla ehuhu ya oohusera akhalayi.

10. Ninsuwela hayi weera mamwene 144.000, yawo Yehova athanliyaawe enaasuweleke soovalaveliha sahu?

¹⁰ Yehova amuthanlakaru Yesu ni 144.000, aahonihera weera owo onnanisivela vantxi ni ontthuna mureerelo ahu. Mwaha weera Yesu aakhala elapo yeela ya vathi ni oosuwela moota nnakhalaahu ni mahaawelo ahu. Tivaavo owo onookhala mwene ooreerela. Tihiiho Paulo enraawe Yesu oosuwela itthu sinnithowa. Owo ahaatxerera eeraaka weera Yesu, “omoriwa ikharari ni solosowa sahu,” nave “àhusera wiwelela ahawaka.” (Aheberi 4:15; 5:8) Nave atthu 144.000 enthanliwa weera yalamuleleke ni Yesu, yannahaawa moota ninhaawahu  ni akina yannawanano soottheka ni iretta. Tivaavo, hiyo ninnaroromela weera, Yesu vamoha ni atthu 144.000 aneraawe alamulelekeno, enoosuwela soohawela sahu.

11. Mwaha wa heeni Yesu oxuttinhaawe weera otthuna wa Muluku opakeye wirimu?

¹¹ Yesu ahaaxuttiha oohuseraawe ovekela weera otthuna wa Muluku opakeye wirimu. Mwaha wa heeni? Mwaha wooweera khoiyono weera ootheene yaakhala wirimu yannapaka otthuna wa Muluku. Muru wa 3 buukhu ene yoola ooxuttiha weera Diabo Satana aathatuwa mwittani. Nave-tho malaika makina yaamutthara Satana ni yaaronya ohimwiiwelela Muluku. Awo eneeriwa Mademoni. Yehova aamuhiya Satana ni Mademoni ovirelela okhala wirimu ehuhu yaamoori. Nyuwo munooxuttera itthu sintxipale muru wa 10.

12. Itthu heeni piili sootepa otthuneya siri va Apokalise 12:10?

¹² Mpaka salini Satana ni Mademoni yeeraya evireleleke okhala wirimu? Biblya onoonihera weera, yaarowa okhala mpaka Yesu avarinweene Omwene. Vano avariwakaru omwene, eyo yaaheereya, nto ovenyakaru waakhuma munyakunyaku ni owana ekhotto, Yesu ni Satana. (Mmusome Apokalise 12:7-10.) Apokalise 12:10 ennathaliha itthu piili sootepa otthuneya. Yoopatxera, Yesu ookhala mwene ni oopatxera olamulela. Yanaaveli, Satana ahoomoliwa wirimu ni avonyeriwa elapo yavathi. Ntoko nneraahu nxuttere, sooweereya sene seiyo sooheereya.

13. Satana oomoliwakaru wirimu, neereke malaika oororomeleya yaahakalala?

¹³ Biblya onahima weera malaika oororomeleya yaahakalala vantxi oomoliwakaru Satana ni Mademoniyu awe. Apokalise 12:12 oneera: “Mwa yeyo muhakalale, irimu ni yale anakhala mwemmo.” Mahiku ala nraahu, wirimu khekhanlewo manyakunyaku, mene oriwo murettele ni wiiraana,  mwaha wooweera malaika enkhala wirimu annamwiiwelela Muluku.

14. Satana oomoleliwalakaru elapo ya vathi, eheeni eneereya mulaponi?

¹⁴ Mene mikhalelo sa elapo ela ya vathi siri soovirikana. Itthu sineereya elapo ela ya vathi ti sootepa woopiha ni soomoriha ikharaari “niwoko Satana òhokhuruwelani” nave ori noowali otokotoko. Mwaha woowomoleliwa elapo ela ya vathi ni “osuwelaka wi orino ehuhu vakhani” weera iiviwe. (Apokalise 12:12) Tiyeeyo enamweeriha Satana opaka ele onweraawe weera, atthu ootheene a elapo ya vathi saaphwanyeke itthu soohasula ntoko ikwerere ni wiivana.

15. Muluku onaapake heeni naatthu a elapo ela ya vathi?

¹⁵ Mene naamwi elapo ela ya vathi saattiyeene itthu soopwexiha muru, Muluku ontthuna weera elapo yootheene ekhale eparadiso mpaka khalayi ni yoottheka yaatthu a mulaponi enoovenxiwa ni eneereke okhala mpaka khalayi. (Nsalmu 37:29) Omweneene yoowo onaapake hayi weera seereye itthu iyo?

16, 17. Yoolohera ya Daniyeli 2:44 ennixuttiha eheeni voohima sa omwene wa Muluku?

¹⁶ Yoolohera ya Daniyeli 2:44 enahima weera: “Vano mahiku a mamwene ala, Muluku a wirimu anavinyererihe omwene ohinrowa opwexiwa wa mahiku othene, anyi, omwene ohinrowa okuxiwa ni muloko mukina. Khweli onoswanye ni onopwexe imwene sothene sikina, yowo okhalaka wa mahiku othene.” Yooloheera ela ennixuttiha eheeni voohima sa Omwene wa Muluku?

¹⁷ Woopatxera, eguvernu ya Muluku ehinakuveene olamulela, saamukhala igoverno ikina. Ninnasuwela eyo mwaha wooweera yoolohera enahima weera, Omwene wa Muluku wanpatxera “Vano mahiku a mamwene ale.” Wanaaveli, Omwene wa Muluku omwene ohinrowa opwexiwa eyo  entaphulela weera khotxentxiwa ni omwene mukina. Yanaararu, Omwene wa Muluku onoswanye ni onopwexe imwene sootheene sikina, yoowo okhalaka wa mahiku ootheene. Omwene wa Muluku ori omwene yoowo omphwanela atthu okhalano.

18. Eneeriwa hayi ekhotto ya nihiku ntokotoko na Muluku?

¹⁸ Omwene wa Muluku onrowa omaliha hayi imwene sa mulaponi? Imwene sa mulaponi sinrowa otthunaka owana ni omwene wa Muluku. Moota heeni? Satana onrowa waseseraka mamwene a mulaponi weera “ewane ekhotto ya nihiku ntokwene na Muluku òwerya sothesene”. Nto ekhotto eyo eneeriwa Harmagedoni. Ohima ekhaikhai, imwene sa mulaponi khasinrowa owina. Yavira ekhotto eyo, omwene wa Muluku oneeraaya olamuleleke elapo yootheene ya vathi. — Apokalise 16:14, 16; Nwehe Enoota 10.

19, 20. Mwaha wa heeni hiyo atthu nintthunaahu weera nlamuleliweke ni Omwene wa Muluku?

¹⁹ Mwaha wa heeni nintthuneyaahu olamuleliwa ni Omwene wa Muluku? Etthu yoopatxera eneeriha weera nitthuneke olamuleliwa ni omwene wa Muluku, eri yoowera niyarinwe nitthenkeene, nave-tho hiyo ninnavoreiwa ni ninnakhwa. Nto Omwene owo wa Muluku, onoonivaha eparakha yookhala mpaka khalayi. Yohani 3:16 onahima weera: “Khweli Muluku òtthuna vantxipale elapo ya vathi ophiyera onvaha Mwan’awe mmosaru, wera yeyo eri yothene enamwìwelela, ehiriheye, nto ekhaleno ekumi yoohimala.”

²⁰ Etthu yanaveeli, aakhala atthu antxipale oonanara mirima. Atthu ene yaawo ennootha, nave eri atthu oohiroromeleya ni owaasivela soohureya. Hiyo atthu, khaninwera omaliha itthu iyo, nto Muluku onnaroromeliha waapwexa ni owiiva khuluyi atthu oonanara mirima a elapo ela ya vathi. Nto atthu ene yaawo yaahitxentxa mirima saya, enimwiiviwa ni ekhotto ya Harmagedoni. (Mmusome Nsalmu 37:10.) Etthu  yanaararu, eguvernu yaatthu khenwera omaliha maxupo aatthu ni khenaarerela murima atthu. eguvernu sannaphwanela waakhavihera atthu omwiiwelela Muluku, maxi eguvernu sa mulaponi khasinera. Tiyeeyonto Biblya oneeraawe “mutthu onamulamulaiye mukhw’awe wera amuhoxe” — Koheleti 8:9.

21. Omwene wa muluku onaapake eheeni ni elapo ya vathi?

²¹ Vano omwene wa Muluku onaapake eheeni? Omwene wa Muluku onopakiha weera otthuna wa Muluku opakeye tho elapo ya vathi. Nto onaapake hayi? Mwa ntakihero, ekhotto ya Harmagedoni Satana ni mademoni enoowaleliwa mukaliposo. (Apokalise 20:1-3) Omwene owo tho onootteliha nsina na Muluku. Eyo entaphulela weera, omwene wa Muluku wapatxera olamulela, atthu ootheene eneereke ottittimiha nsina na Muluku, Yehova. — Nwehe Enoota 21.

22. Ninsuwela hayi weera Yesu khaiyono aarimweera aphiyakaru wirimu anavariwa Omwene?

²² Neereke Yesu apatxenre olamulela areene elapo ela ya vathi? Hooye. Ninnasuwela eyo mwaha woowera owo ahaxuttiha ohuseraawe ovekela yeeraka: “omwen’á orwe.” Eyo enthonyihera weera Omwene owo weera ohinaakuveene opatxera, ni waaya okhala wamuhoolo. Vano neereke Yesu  aarimweera aphiyakaru wirimu anavariwa Omwene? Naari. Ninsuwela hayi? Ninnasuwela eyo mwaha wooweera murummwa Pedru ni Paulo yaataphulela yoolepa ya Nsalmu 110:1 weera yoolepa ela yaakwanela wa Yesu. Mu Nsalmu nenna enthaliha weera Yehova aaheera wa Yesu: ‘Mukilathi vantatani vaka nolopwana mpaka kiwiyathi amwittan’anyu vathi va manani vanyu.’ (Miteko 2:32-35; Aheberi 10:12, 13) Vano, salini Yesu avarinwawe Omwene?

23. (a) Yesu ovarinwe salini omwene wa olamulelo wa Muluku? (b) Nave muru ninrowelaahu ninkela oxuttera heeni?

²³ Yesu avarinwe omwene ovinyera eyaakha ya 1914. (Nsalmu 110:2) Ehinaakuveene ophiya ehuhu eyo, anna antxipale yahiwexexa yoolohereene yeela weera soolohera sintxipale saamukwanela eyaakha ya 1914. Ni itthu sineereya elapo yootheene ya vathi ovinyera eyaakha ya 1914 sinoonihera weera, anna ala khayootha. Yesu avariwakaru omwene, owo aamwiikara Satana wirimu amwiikarelaka elapo ela ya vathi. Vano Satana oosuwela weera “orino ehuhu vakhani.” (Apokalise 12:12) Muru ninrowelaahu, ninrowa waakhulela weera ninkhala wa “ehuhu vakhani” yeeyo Satana okhalannaawe. Nave-tho ninrowa oxuttera weera vaanaano vaava, Omwene wa Muluku oneeraaya olamuleleke elapo ya vathi ni weera otthuna wa Muluku onoopakeya elapo ela ya vathi. — Nwehe Enoota 22.