第8章
上帝嘅王国系乜嘢？
1．我哋会讨论边个著名嘅祷告？
耶稣曾经作过一个模范祷告，好多人将呢个著名嘅祷告称为天主经或者主祷文。耶稣通过呢个祷告教导门徒点样向上帝祷告。佢祷告求乜嘢？呢个祷告点解对我哋咁重要？
2．耶稣教导我哋要祈求边三件重要嘅事？
2 耶稣话：“所以你哋要噉样祷告：‘我哋喺天上嘅父亲，愿你嘅名彰显为圣。愿你嘅王国来临。愿你嘅旨意喺地上实现，好似喺天上一样。’”（请读马太福音6:9-13）点解耶稣教导我哋要祈求呢三件事？——请睇附注20
3．关于上帝嘅王国，我哋会探讨乜嘢？
3 我哋已经知道上帝嘅名系耶和华，亦都探讨过上帝对人类同地球嘅旨意系乜嘢。噉耶稣话“愿你嘅王国来临”系咩意思？跟住我哋会探讨吓上帝嘅王国系乜嘢，呢个王国会成就乜嘢事，同埋王国会点样使上帝嘅名彰显为圣。
上帝嘅王国系乜嘢？
4．上帝嘅王国系乜嘢？边个系呢个王国嘅君王？
4 上帝嘅王国系耶和华喺天上设立嘅一个政府。耶和华拣选耶稣做呢个王国嘅君王。圣经话耶稣系“万王之王，万主之主”。（提摩太前书6:15）耶稣造福世人嘅能力远胜任何人间统治者，就算最贤明嘅统治者都无法同佢相比。
5．上帝嘅王国政府喺边度施行统治？统治乜嘢地方？
5 耶稣复活40日之后，返到天上。然后，耶和华使佢成为王国嘅君王。（使徒行传2:33）上帝嘅王国政府会喺天上施行统治，统治范围遍及整个地球。（启示录11:15）所以，圣经将呢个政府称为“天上嘅王国”。（提摩太后书4:18）
6,7．点解话耶稣比任何地上统治者优越？
6 耶稣比任何人间统治者都伟大，圣经话“只有佢系不死嘅”。（提摩太前书6:16）所有地上统治者最终都难免一死，而耶稣就永远都唔会死。耶稣贤明嘅统治会永远造福我哋。
7 圣经预言，耶稣会系一位公正嘅君王，对人有怜恤之心。经文话：“耶和华嘅灵必留喺佢身上，使佢有智慧同悟性嘅灵，劝导同大能嘅灵，知识同敬畏耶和华嘅灵。佢以敬畏耶和华为乐。佢行审判唔会单凭眼见，责备［或者告诫］人亦唔系只凭耳闻。佢按正义审判卑微嘅人”。（以赛亚书11:2-4）你希唔希望受噉样嘅君王统治呢？
8．我哋点知道仲有其他人会同耶稣一齐作王？
8 上帝拣选一啲人喺天上同耶稣一齐施行统治。有一次，使徒保罗同提摩太讲：“我哋如果忍耐落去，就必一同作王”。（提摩太后书2:12）有几多人会同耶稣一齐作王呢？
9．有几多人会同耶稣一齐施行统治？上帝从几时开始拣选佢哋？
9 我哋喺本书第7章已经讨论过，使徒约翰喺异象中睇见有14万4000人同耶稣一齐喺天上作王。14万4000人系啲咩人？约翰话：“呢啲人嘅额上都写住［耶稣］嘅名同佢父亲嘅名”。佢又话：“无论绵羊羔［耶稣］去边度，呢啲人都不断跟随佢。佢哋系从人类当中买嚟嘅”。（请读启示录14:1,4）14万4000人都系忠心嘅基督徒。上帝拣选佢哋同耶稣一齐“作王，统治大地”。佢哋死去之后会复活到天上。（启示录5:10）从使徒嘅时代开始，耶和华一直拣选忠心嘅基督徒作为14万4000人嘅一分子，同耶稣一齐施行统治。
10．耶和华任用耶稣同14万4000人统治全人类，点解系仁爱嘅做法呢？
10 耶和华拣选14万4000人同耶稣一齐施行统治，系非常仁爱嘅做法。耶稣系一个贤明嘅统治者，因为佢能够理解我哋，清楚知道人类嘅处境同苦况。保罗话，耶稣明白我哋嘅感受，能够“体恤我哋嘅软弱”，而且佢“同我哋一样喺各方面受过考验”。（希伯来书4:15；5:8）14万4000人亦都体会人类嘅境况，佢哋曾经都要克服唔完美嘅倾向，忍受病痛嘅煎熬。所以，我哋可以肯定耶稣同14万4000人会理解我哋嘅感受，明白我哋要应付嘅难题。
上帝嘅王国会成就乜嘢？
11．点解耶稣教导佢嘅门徒祈求上帝嘅旨意喺天上实现？
11 耶稣教导佢嘅门徒祈求上帝嘅旨意喺天上实现。点解呢？本书第3章谈及魔鬼撒但反叛耶和华，喺反叛事件发生之后，耶和华容许撒但同埋其他不忠嘅天使，又称邪灵，留喺天上一段时间。所以，喺天上唔系所有灵体都遵行上帝嘅旨意。我哋喺第10章会了解更多关于撒但同邪灵嘅事。
12．启示录12:10描述咗边两件重要嘅事？
12 圣经话，耶稣登基成为上帝王国嘅君王之后冇几耐，佢同撒但之间会爆发一场战争。（请读启示录12:7-10）第10节嘅经文描述两件好重要嘅事，就系以耶稣基督为君王嘅上帝王国开始统治，同埋撒但从天上被掟到地上。呢两件事已经发生咗，本书会有进一步嘅解释。
13．撒但被逐出天上之后，天上嘅情况点样呢？
13 撒但同邪灵被逐出天上之后，忠心嘅天使都欢喜雀跃。圣经话：“天同住喺天上嘅，你哋都欢欣啦！”（启示录12:12）而家，天上所有灵体都遵行上帝嘅旨意，天上完全恢复翻和平同团结。
撒但同邪灵被逐出天上之后，地上嘅苦难就越来越多。不过，苦难好快就会终结
14．撒但被逐出天上之后，地上受到点样嘅影响？
14 不过，地上嘅情况就完全唔同。圣经话：“魔鬼知道自己时日无多，就非常愤怒，落到你哋嗰度”。于是，地上发生咗好多可怕嘅事。（启示录12:12）撒但被逐出天上之后，由于知道自己好快会被毁灭，就愤怒若狂。佢用尽一切手段制造祸患，使全人类饱受痛苦煎熬。
15．上帝对地球有乜嘢旨意？
15 但系，上帝对地球嘅旨意并冇改变。佢依然希望完美嘅人永远喺地上嘅乐园生活。（诗篇37:29）噉上帝嘅王国会点样实现呢一切？
16,17．关于上帝嘅王国，但以理书2:44透露乜嘢？
16 但以理书2:44嘅预言话：“呢啲君王在位嘅日子，天上嘅上帝要设立一个永远唔会灭亡嘅王国。呢个王国唔会归俾其他民族，反而要将其他王国全部都打碎灭绝。唯独呢个王国会万世屹立。”关于上帝嘅王国，我哋从呢个预言知道乜嘢？
17 第一，预言话上帝嘅王国会喺“呢啲君王在位嘅日子”开始统治。呢个意味住，上帝王国开始统治嘅时候，地上嘅其他政府依然存在。第二，预言提到上帝王国会永远长存，绝对唔会俾其他政权取代。第三，上帝嘅王国同世上嘅政府之间会爆发一场战争。最终，上帝嘅王国会取得胜利，成为统治全地嘅唯一政府。到时，人类就会受一个最贤明嘅政府统治。
18．上帝嘅王国同世上政府嘅决战叫做乜嘢？
18 上帝王国同世上政府嘅决战叫做哈米吉多顿大战。呢场战争爆发之前会有咩事发生呢？圣经话，邪灵会迷惑“普天下嘅列王……召集佢哋喺全能上帝嘅大日子投入战争”。冇错，世上嘅政府会同上帝嘅王国决战。（启示录16:14,16）——请睇附注10
19,20．点解我哋需要上帝王国嘅统治？
19 点解我哋需要上帝嘅王国？至少有三个原因。首先，我哋都唔完美。由于罪嘅影响，人人都难免患病同死去。不过，圣经话喺上帝王国嘅统治下，我哋会有永远嘅生命。约翰福音3:16话：“上帝深爱世人，甚至赐下自己嘅独生子，使信从佢嘅人都不致灭亡，反得永生。”
20 其次，世上充满恶人恶事。好多人讲大话、呃呃骗骗，做唔道德嘅事。我哋冇能力彻底消除罪恶，不过上帝就可以。唔肯悔改嘅恶人会喺哈米吉多顿大战期间被毁灭。（请读诗篇37:10）第三个原因系，从古至今，世上嘅政府唔系残酷不仁，就系腐败无能，佢哋根本唔会教导人遵行上帝嘅旨意。圣经话：“人辖制人，使人受害”。（传道书8:9）
21．上帝嘅王国会点样彻底实现上帝对地球嘅旨意？
21 哈米吉多顿大战之后，上帝嘅王国会彻底实现上帝对地球嘅旨意。例如，王国会铲除撒但同邪灵。（启示录20:1-3）因为有赎价嘅安排，唔会再有人患病同死去，所有忠心嘅人都会喺乐园永远生活落去。（启示录22:1-3）王国会使上帝嘅名彰显为圣。呢个意味住乜嘢呢？喺上帝王国统治下，所有人都会荣耀耶和华嘅名。——请睇附注21
耶稣几时开始作王？
22．我哋点知道，耶稣唔会喺在世时作王，亦都唔会喺佢复活之后即刻作王？
22 耶稣教导门徒噉样祷告：“愿你嘅王国来临”。显然，上帝嘅王国当时仲未来临。耶和华会首先设立佢嘅王国政府并委任耶稣作为君王。噉耶稣系咪一返到天上就即刻作王呢？唔系，佢仲需要等待。彼得同保罗都讲过，耶稣复活之后，诗篇110:1嘅预言就应验喺耶稣身上。经文话：“你坐喺我嘅右边，直到我使你嘅仇敌成为你嘅脚凳。”（使徒行传2:32-35；希伯来书10:12,13）耶稣需要等几耐先至登基作王？
上帝嘅王国会彻底实现上帝对地球嘅旨意
23．（甲）耶稣几时开始作王统治？（乙）下一章会讨论乜嘢？
23 1914年之前嘅好多年，一群认真研究圣经嘅基督徒已经睇出1914年系圣经所预告嘅重要年份。1914年以来，世界所发生嘅大事证明佢哋嘅理解系正确嘅。耶稣就喺嗰一年登基作王。（诗篇110:2）之后好快，撒但就被驱逐到地上，而家佢已经“时日无多”。（启示录12:12）下一章，我哋会睇到更多证据，表明我哋而家正生活喺呢段特别嘅时期。我哋都会学到，上帝嘅王国好快就会彻底实现上帝对地球嘅旨意。——请睇附注22
