1. ¿Xi oración ni nabé runibiáʼ binni chiguizíʼdinu lu capítulo riʼ?

MILLÓN de binni runibiáʼ oración de padrenuestro. Biquiiñeʼ Jesús oración riʼ para gusiidiʼ ca discípulo stiʼ guni orarcaʼ. ¿Xi gunabaʼ Jesús lu oración riʼ? ¿Xiñee risaca guiénenu ni raca significar ni yaʼ?

2. ¿Xi chonna cosa risaca bisiidiʼ Jesús laanu naquiiñeʼ guinábanu ora guni orarnu?

² Jesús guníʼ: «Naquiiñeʼ guni orartu sicaríʼ: “Bixhózedu ni nuu guibáʼ, gaca santificar laluʼ. Gueeda Reinu stiluʼ. Gaca ni naluʼ ndaaniʼ guidxilayú, cásica raca ni guibáʼ”» (biindaʼ Mateo 6:9-13). ¿Xiñee bisiidiʼ Jesús laanu guinábanu guionnaʼ cosa riʼ? (Biindaʼ nota 20, «Padrenuestro»).

3. Bisiene xi chiguidúʼyanu lu capítulo riʼ.

³ Maʼ bizíʼdinu Jehová nga láʼ Dios. Ne laaca maʼ bidúʼyanu xi naguixhe íquebe gúnibe para binni ne para Guidxilayú riʼ. Peru ¿xii nga racalaʼdxiʼ Jesús guiníʼ ora bizeeteʼ: «Gueeda Reinu stiluʼ»? Lu capítulo riʼ chiguidúʼyanu xii nga Reinu stiʼ Dios, xi chigúnini ne ximodo zaca santificar lá Dios pur laani.

4. ¿Xii nga Reinu stiʼ Dios, ne tuu nga Rey stini?

⁴ Reinu stiʼ Dios nga ti gobiernu ni gudixhe Jehová chuʼ guibáʼ. Ne maʼ gulibe Jesús para gaca Rey o gobernante stiʼ Reinu ca. Biblia ná Jesús nga «Rey stiʼ  guiráʼ rey ni runi mandar ne Señor stiʼ guiráʼ señor ni runi mandar» (1 Timoteo 6:15). Zanda guni Jesús stale cosa pur laanu que tutiica gobiernu. Ne jma nápabe poder que guiráʼ gobiernu ni nuu yanna riʼ.

5. ¿Xi chiguni mandar Reinu stiʼ Dios, ne dede paraa chiguni mandarni?

⁵ Bibiguetaʼ Jesús guibáʼ 40 dxi despué de biasa de lade gueʼtuʼ. Tiempu despué, gudixhe Jehová gácabe Rey lu Reinu stiʼ (Hechos 2:33). Dede guibáʼ nga chiguni mandar Reinu stiʼ Dios Guidxilayú (Apocalipsis 11:15). Pur nga, Biblia ná Reinu stiʼ Dios nga ti Reinu «ni nuu guibáʼ» (2 Timoteo 4:18).

6, 7. ¿Xiñee gástiruʼ sti gobernante casi Jesús?

⁶ Biblia ná gástiruʼ sti gobernante casi Jesús purtiʼ «laasibe nga ni qué ziuu dxi gatiʼ» (1 Timoteo 6:16). Guiráʼ ca gobernante nuu lu Guidxilayú riʼ rati, peru Jesús qué ziuu dxi gatiʼ. Nga runi, qué ziuu dxi guiluxe guiráʼ ca cosa galán ni chiguni Jesús pur laanu.

⁷ Ne laaca rusiidiʼ Biblia naca Jesús ti Rey ni runi ni jneza ne riá binni. Ti profecía ná zacaa Jesús: «Espíritu stiʼ Jehová, nga runi zácabe tobi ni nuu xpiaaniʼ, zácabe tobi ni guizáʼ riene, zudiibe conseju ni galán, zápabe poder, zánnabe stale, ne guizáʼ zápabe respetu Jehová. Ne ziéchebe purtiʼ ridxíbibe Jehová. Qué zuni juzgarbe binni pur ca ni gúʼyasibe, qué zuni corregirbe pur ca ni gunadiágasibe. Jneza zuni juzgarbe ca pobre» (Isaías 11:2-4). ¿Ñuuláʼdxiluʼ ñápaluʼ ti rey zacá la?

8. ¿Xiñee nánnanu cadi stubi Jesús chiguni mandar?

⁸ Biblia ná maʼ gulí Dios caadxi binni para guni mandárnecaʼ Jesús guibáʼ. Guzéʼtenu ti ejemplu, gudxi  apóstol Pablo Timoteo ca diidxaʼ riʼ: «Pa qué gusaana de guni huantarnu la? laaca zuni mandarnenu laabe» (2 Timoteo 2:12). ¿Panda binni chiguni mandarné Jesús yaʼ?

9. a) ¿Panda binni chiguni mandarné Jesús? b) ¿Padxí bizulú cabí Jehová ca 144,000?

⁹ Casi bizíʼdinu lu capítulo 7 que, lu ti visión gupa apóstol Juan biʼyaʼ naca Jesús Rey guibáʼ né 144,000 rey (biindaʼ Apocalipsis 14:1). ¿Tuu nga 144,000 riʼ yaʼ? Laaca Juan bicabi pregunta riʼ ora guníʼ: «Laacabe nga ca ni rinanda Dendxuhuiiniʼ que ra tiica cheʼ. [...] bixuíʼcabe lade binni guidxilayú» (Apocalipsis 14:4). Dendxuhuiiniʼ riʼ nga Jesús. Ne 144,000 ca nga ca xpinni Cristu ni maʼ gulí Jehová para guni mandárnecaʼ Jesús Guidxilayú riʼ. Ora ráticabe, ribánicabe para chécabe guibáʼ (Apocalipsis 5:10). Dede lu primé siglu bizulú cabí Jehová 144,000 binni.

10. ¿Xiñee bisihuinni Jehová nadxii laanu ora gulí Jesús ne 144,000 binni para guni mandar laanu?

¹⁰ Cumu guizáʼ nadxii Jehová laanu la? gulibe caadxi binni para guni mandárnecaʼ Jesús. Guizáʼ galán modo zuni mandar Jesús purtiʼ laaca gúcabe binni ne laaca guizáʼ biʼniʼ sufrirbe. Apóstol Pablo guníʼ riene Jesús xi runi sentirnu ne riá laanu «purtiʼ nanna xi raca nagana para laanu», ne laaca «maʼ gudiʼdiʼ guiráʼ ra cadídinu» (Hebreos 4:15; 5:8). Ne 144,000 riʼ nánnacaʼ xi runi sentirnu. Purtiʼ laaca guca huarácabe ne bidxiilúcabe imperfección stícabe. Nga runi, nanna dxíchinu ziene Jesús ne 144,000 binni riʼ ni runi sentirnu ne ca guendanagana cadídinu.

11. ¿Xiñee bisiidiʼ Jesús guinábanu gaca ni ná Dios guibáʼ?

¹¹ Bisiidiʼ Jesús ca discípulo stiʼ guinábacaʼ gaca ni ná Dios lu Guidxilayú riʼ ne guibáʼ. ¿Xiñee naquiiñeʼ guinábacabe gaca ni ná Dios guibáʼ yaʼ? Lu capítulo 3 que bizíʼdinu bicaalú Binidxabaʼ Dios. Bidii Jehová lugar guiaana Binidxabaʼ ne ca demonio stiʼ guibáʼ ti tiempu si. Ndiʼ rusihuinni cadi guiráʼ diʼ ca ni guyuu guibáʼ bíʼnicaʼ ni ná Jehová. Lu capítulo 10 stiʼ libru riʼ zazíʼdinu jma de Binidxabaʼ ne ca demonio stiʼ.

12. ¿Xi chupa cosa nabé risaca riete lu Apocalipsis 12:10?

¹² Maca cá lu Biblia zadindené Jesús Binidxabaʼ despué de gaca Rey lu Reinu stiʼ Dios (biindaʼ Apocalipsis 12:7-10). Lu Apocalipsis 12:10 riete chupa cosa nabé risaca. Primé, bizulú biʼniʼ mandar Jesús. Ne guiropa, guládxibe Binidxabaʼ de guibáʼ ne bilaabe laa lu Guidxilayú riʼ. Casi chiguizíʼdinu, maʼ bizaaca guiropaʼ cosa riʼ.

13. ¿Xi bizaaca guibáʼ dxi guladxi Jesús Binidxabaʼ de raqué?

¹³ Guizáʼ biecheʼ ca ángel ni ruzuubaʼ stiidxaʼ Dios dxi guladxi Jesús Binidxabaʼ ne ca demonio stiʼ de guibáʼ. Biblia ná: «¡Guiecheʼ guibáʼ ne ca ni nabeza racá!» (Apocalipsis 12:12). Yanna riʼ maʼ nuu paz guibáʼ ne maʼ nuucabe tobi si purtiʼ cayúnicabe ni ná Dios.

14. ¿Xi guiráʼ cazaaca lu Guidxilayú riʼ despué de guladxi Jesús Binidxabaʼ guibáʼ?

¹⁴ Peru gadxé modo nabani binni lu Guidxilayú. Guizáʼ cayuni sufrir binni «purtiʼ maʼ biete Binidxabaʼ» ndaaniʼ ni «ne guizáʼ cadxiichi, purtiʼ nanna maʼ huaxiéʼ tiempu napa» (Apocalipsis 12:12). Guizáʼ cadxiichi Binidxabaʼ purtiʼ guládxicabe laa guibáʼ ne  nanna maʼ cadi candaa zanitilú. Nga runi, cayuni stale cosa para gapa binni yuubaʼ ne guni sufrir.

15. ¿Xi naguixhe ique Dios guni lu Guidxilayú riʼ?

¹⁵ Caʼruʼ diʼ guchaa Dios ni naguixhe ique guni lu Guidxilayú riʼ. Racaláʼdxirube gúnibe ni ti paraísu, gácanu binni perfectu ne guibáninu para siempre (Salmo 37:29). ¿Ximodo zuni Reinu stiʼ Dios guiráʼ ndiʼ yaʼ?

16, 17. ¿Xi rusiidiʼ Daniel 2:44 laanu de Reinu stiʼ Dios?

¹⁶ Profecía ni zeeda lu Daniel 2:44 ná: «Lu ca dxi stiʼ ca rey que, Dios ni nuu guibáʼ zucuí ti reinu ni qué ziuu dxi guinitilú. Ne reinu riʼ qué zadiʼdiʼ ni lu náʼ sti guidxi. Zunideni ne zunduuxeni guiráʼ reinu riʼ, ne laasini ziaanani para siempre». ¿Xi rusiidiʼ profecía riʼ laanu de Reinu stiʼ Dios yaʼ?

¹⁷ Primé, rusiidini laanu zuzulú zuni mandar Reinu stiʼ Dios «ca dxi stiʼ ca rey». Ndiʼ riníʼ nuuruʼ gobiernu ni cayuni mandar lu Guidxilayú riʼ dxi guzulú guni mandar Reinu stiʼ Dios. Guiropa, rusiidini laanu qué ziuu dxi guinitilú Reinu riʼ ne qué zadiʼdiʼ ni lu náʼ sti gobiernu. Ne guionna, rusiidini laanu zadindené ca gobiernu nuu lu Guidxilayú riʼ Reinu stiʼ Dios. Zuni ganar Reinu stiʼ Dios ne laasini zuni mandarni Guidxilayú riʼ. Dxi gaca cumplir profecía riʼ, zapa binni ti gobiernu guizáʼ galán ne ni qué huayuu dxi chuʼ.

18. ¿Xi láʼ guerra ra chitindené Reinu stiʼ Dios ca gobiernu nuu lu Guidxilayú riʼ?

¹⁸ ¿Xi zazaaca ante guzulú guerra ra chitindené Reinu stiʼ Dios ca gobiernu nuu lu Guidxilayú riʼ yaʼ? Zaguite ca demonio stiʼ Binidxabaʼ «ca rey nuu lu guidubi guidxilayú para guni reunircaʼ laacabe lu  guerra ni chigaca dxi roʼ stiʼ Dios ni jma napa poder». Guerra riʼ lani Armagedón, ne lu guerra riʼ nga chitindené Reinu stiʼ Dios ca gobiernu nuu lu Guidxilayú riʼ (Apocalipsis 16:14, 16). (Biindaʼ nota 10, «Armagedón»).

19, 20. ¿Xiñee caquiiñenu Reinu stiʼ Dios?

¹⁹ ¿Xiñee caquiiñenu Reinu stiʼ Dios yaʼ? Guidúʼyanu chonna razón. Primé, cumu binni ruchee laanu la? raca huaranu ne rátinu. Peru dxi guni mandar Reinu stiʼ Dios zabáninu para siempre. Biblia ná: «Nabé gunnaxhii Dios guidxilayú, nga runi bidii tobi lucha Xiiñiʼ, ti guiráʼ tu gapa fe Xiiñibe cadi guinitilú, sínuque guicaa guendanabani ni qué zaluxe» (Juan 3:16).

²⁰ Guiropa razón nga purtiʼ nuu stale binni malu ndaaniʼ Guidxilayú riʼ. Stale binni rusiguii, riguítecaʼ xcaadxi binni, cadi jneza modo nabánicaʼ ne qué zanda gucueezanu laacabe. Peru Jehová zanda. Pa qué guchaacabe modo laacabe la? zunitilube laacaʼ lu Armagedón (biindaʼ Salmo 37:10). Ne guionna razón nga purtiʼ guizáʼ malu ca gobiernu nuu yanna, ribáʼnacaʼ ne qué randa runi chaahuicaʼ ca guendanagana rapa binni. Ne qué rizaaláʼdxicaʼ gacanecaʼ binni guni ni ná Dios. Nga runi Biblia ná «binni huayuni mandar binni para si gacanacaʼ» (Eclesiastés 8:9).

21. ¿Ximodo zacané Reinu riʼ para gaca ni ná Dios lu Guidxilayú?

²¹ Despué de Armagedón, zacané Reinu riʼ gaca ni ná Dios lu Guidxilayú. Ti ejemplu de laani nga, zadeguyoo Binidxabaʼ ne ca demonio stiʼ (Apocalipsis 20:1-3). Ne despué, maʼ qué zaca huará binni ne maʼ  qué zati. Cumu guti Jesús pur laanu la? zabani guiráʼ ca ni guzuubaʼ stiidxaʼ Dios para siempre ndaaniʼ ti paraísu (Apocalipsis 22:1-3). Ne laaca zacané Reinu riʼ gaca santificar o guiá lá Dios. ¿Xi riníʼ ndiʼ yaʼ? Ora guni mandar Reinu riʼ Guidxilayú, zuni respetar guiráʼ binni lá Dios. (Biindaʼ nota 21, «Rescate»).

22. ¿Xiñee nánnanu qué nuzulú Jesús ñuni mandar dxi guyuu lu Guidxilayú riʼ ninca casi yendá guibáʼ?

²² Dxi guyuu Jesús lu Guidxilayú riʼ, bisiidibe ca discípulo stibe guinábacaʼ lu oración: «Gueeda Reinu». Ndiʼ riníʼ caʼruʼ guni mandar Reinu stiʼ Dios ca dxi que. Primeru naquiiñeʼ quixhe Jehová gobiernu riʼ ne cuibe Jesús casi Rey. ¿Ñee casi yendá Jesús guibáʼ biʼniʼ Dios laa Rey la? Coʼ. Naquiiñeʼ cuézabe ti tiempu. Lu profecía ni zeeda lu Salmo 110:1, guníʼ Jehová: «Gurí ladu derechu stinneʼ dede ora maʼ gudixheʼ ca enemigu stiluʼ casi banguhuiiniʼ para quixhe ñeeluʼ». Qué nindaa, biasa si Jesús de lade gueʼtuʼ bisiene  apóstol Pedro ne Pablo guca cumplir profecía riʼ luguiáʼ Jesús (Hechos 2:32-35; Hebreos 10:12, 13). Ndiʼ riníʼ naquiiñeʼ cueza Jesús dede dxi guni Jehová laa Rey.

23. a) ¿Padxí bizulú Jesús cayuni mandar casi Rey lu Reinu stiʼ Dios? b) ¿Xi chiguidúʼyanu lu sti capítulo ca?

²³ ¿Padxí bizulú Jesús cayuni mandar yaʼ? Lu iza 1914. Stale iza ante, biene ti grupu de xpinni Cristu nabé risaca iza 1914 purtiʼ zuzulú zaca cumplir ca profecía ni zeeda lu Biblia. Ne guiráʼ ca ni maʼ cazaaca lu Guidxilayú riʼ dede iza 1914, rihuinni napa ca xpinni Cristu riʼ razón. Bizulú cayuni mandar Jesús lu iza ca (Salmo 110:2). Qué nindaa, bilaa Jesús Binidxabaʼ ndaaniʼ Guidxilayú riʼ, ne yanna «maʼ huaxiéʼ tiempu napa» (Apocalipsis 12:12). Lu sti capítulo ca chiguidúʼyanu xcaadxi prueba ni rusihuinni nabáninu lu tiempu ni bizéʼtenu riʼ. Ne laaca zazíʼdinu maʼ cadi candaa zacané Reinu riʼ gaca ni ná Dios lu Guidxilayú riʼ. (Biindaʼ nota 22, «¿Xiñee guizáʼ risaca iza 1914?»).