1. Watwero ngeyo jami ma bitimme i anyim ki kwene?

TIKA dong iwinyo lok angeya ki i redio nyo ineno anena ki i telebijon, ci itamo ni, ‘Lobo-ni dong oballe ma konye pe?’ Peko mogo malit ma poto atura kacel ki tim gero dwong ata mumiyo jo mogo giye ni agikki me lobo-ni dong cok. Itamo ni meno lok ada? Tika tye yo mo me ngeyo gin ma bitimme i anyim? Tye. Kadi bed dano pe giromo byeko gin ma bitimme i anyim, ento Jehovah ngeyo. En tittiwa ki i Baibul anyim pa dano ki anyim pa lobo-ni.—Icaya 46:10; Yakobo 4:14.

2, 3. Ngo ma lupwonnye pa Yecu onong gimito ngeyone, dok Yecu odok iye nining?

² Ka wakwano ki i Baibul lok i kom agikki me lobo-ni, nongo pe kitye ka lok i kom agikki me lobo ma wabedo iye-ni ento agikki me tim maraco. Yecu opwonyo dano ni Ker pa Lubanga biloyo lobo-ni. (Luka 4:43) Lukwena pa Yecu onongo gimito ngeyo awene ma Ker pa Lubanga bibino iye, dok gupenye ni: “Lok man bitimme awene, dok kit gin ango ma binyuto dwogoni, ki agikki piny?” (Matayo 24:3) Yecu pe owaco botgi ninone kikome, ento otito jami ma bitimme i kare ma nongo agikki me lobo-ni dong cok. Gin ma Yecu owaco ni bitimme dong tye ka timme kombeddi-ni.

³ I dul man, wabinyamo lok kom jami mogo ma nyuto ni watye ka kwo i kare me agikki. Mukwongo,  kong wanenu lok i kom lweny mutimme i polo wek waniang pingo jami maraco tye madwong i lobo-ni.

4, 5. (a) Ngo ma otimme i polo i kare ma pud kiketo Yecu aketa macalo Kabaka? (b) Ma lubbe ki Niyabo 12:12, ngo ma onongo bitimme i lobo i nge bolo Catan woko piny?

⁴ I Dul me 8 wapwonyo ni Yecu odoko Kabaka i polo i mwaka 1914. (Daniel 7:13, 14) Buk me Niyabo tito botwa gin mutimme ni: “Lweny ocakke i wi polo, Mikael [ma en Yecu] kacel ki lumalaikane gulwenyo i kom min kulu madit-ti [Catan]. Min kulu madit-ti kacel ki lumalaikane bene gulwenyo.” * Lweny ongayo wang Catan ki jogine, ci kibologi woko i lobo kany. Go kong yomcwiny ma lumalaika gubedo kwede! Ento dano ma i lobo kono? Baibul waco ni meno onongo bibedo kare me can pi dano. Pingo? Pien Catan tye ki akemo madwong kun “ngeyo ni karene tye manok.”—Niyabo 12:7, 9, 12.

⁵ Larac-ci tye ka kelo ayelayela mapol i lobo-ni. En tye ki akemo madwong pien ngeyo ni “karene tye manok” ma peya Lubanga otyeke woko. Kong dong wanenu gin ma Yecu owaco ni bitimme i kare me agikki.—Nen Lok me Giko Buk Man me 24.

6, 7. Kop ma Yecu otito i kom lweny ki kec-ci tye ka cobbe nining i kare-ni?

⁶ Lweny. Yecu owaco ni: “Rok bilweny ki rok wadi, ki ker bene bilweny ki ker wadi.” (Matayo 24:7) Dano  ma guto i lweny i karewa-ni dong gidwong loyo kare mo keken i tekwaro. Dul mo ma kwedo lok i kom jami ma timme i lobo owaco ni nicakke i mwaka 1914, dano makato milion 100 dong kinekogi woko i lweny. Wel dano ma guto i lweny nicakke i mwaka 1900 nio wa i 2000, dodo wel dano ma oto i lweny nicakke i cencwari me acel K.M. nio kwede wa i mwaka 1899 tyen kidek kulu. Tam kong i kom arem malit ki pekki mapol ma dano milion mapol guwok ki iye macalo adwogi me lweny!

⁷ Kec. Yecu owacci: “Kec bene bipoto i lobo.” (Matayo 24:7) Kadi bed ni cam tye mapol ata i kare-ni makato kare mo keken, ento pud inongo ni dano mapol gipe ki cam muromo. Pingo? Pienni pe gitye ki cente muromo me wilo cam nyo ngom me puro cam. Dano makato bilion acel kulu gikwo ki cente manok keken nino ki nino. Dul ma Loyo Yotkom owaco ni lutino milion mapol gito mwaka ki mwaka, tutwalle pien ni gipe ki cam muromo.

8, 9. Ngo ma nyuto ni lok pa Yecu ma dok i kom oyengyeng ki two dong gucobbe ada?

 ⁸ Oyengyeng. Yecu otito con ni: “Oyengyeng madongo biyengo lobo.” (Luka 21:11) Oyengyeng madongo dong tye ka timme mwaka ki mwaka. Nicakke i mwaka 1900, dano makato milion aryo kulu dong guto woko macalo adwogi me oyengyeng. Kadi bed ni i kare-ni diro me tet okonyo me pimo oyengyeng con, ento dano mapol pud gito.

⁹ Two. Yecu otito ni “two gemo mapatpat” bipoto i lobo. Two maraco kobo oyotoyot dok neko dano mapol. (Luka 21:11) Kadi bed ni ludaktari dong gupwonyo yo me cango two mapol, ento two mogo pud gitye ma pe cang. I adane, ripot mo acel otito ni mwaka ki mwaka dano milion mapol gito pi two mogo calo aona-opiyo, maleria, ki kolera. Pe meno keken, ento bene ludaktari dok gunongo two manyen ma romo 30 kulu, ma mogo yat me cangone pe.

10. Lok ma kicoyo i 2 Temceo 3:1-5 tye ka cobbe nining i kare-ni?

¹⁰ I buk pa 2 Temceo 3:1-5, Baibul owacci: “I kare me agikki, piny bibedo marac.” Lakwena Paulo otito kit ma dano mapol bikwo kwede i kare me agikki. En owaco ni dano

• gibibedo lumar komgi kengi

• lumar lim

• pe gibiwinyo lunyodogi

• pe gibibedo jo ma genne

• pe gibimaro jo me odigi

• gibibedo jo ma mitigi pe jukke

• gibibedo jo mager

• gibibedo jo ma maro yomcwiny ma ka maro Lubanga

• gibiporo maro Lubanga ento gikwero winyo doge woko

11. Ma lubbe ki Jabuli 92:7, ngo ma bitimme i kom jo maraco?

¹¹ Dano mapol mono gitye kit meno ka ma in ikwo iye? I twok lobo ducu, dano mapol gitye kumeno. Ento Lubanga cokcok-ki bitimo gin mo iye. En ocikke  ni: “Kadi lubal gidongo macalo lum, dok kadi lutim maraco gibedo ki kwo maber, ento gibityekogi woko matwal.”—Jabuli 92:7.

12, 13. Ngo ma Jehovah opwonyowa i kare man me agikki-ni?

¹² Baibul otito con ni i kare me agikki, lobo bipong ki arem ki peko. Ento Baibul bene tito ni jami mabeco bitimme.

¹³ Niango me Baibul. Lanebi Daniel ocoyo lok kom kare me agikki. En owacci: “Ngec [me ada] bene bimedde.” (Daniel 12:4) Lubanga onongo bikonyo jone me niang Baibul i yo matir makato kit macon. Jehovah obedo ka timo man tutwalle nicakke i mwaka 1914. Me labolle, en opwonyowa kit ma nyinge kacel ki yubbe pi lobo pire tek kwede. Medo i kom meno, en opwonyowa ki lok ada madok i kom ginkok, gin ma timme i komwa ka wato, ki dong nicer. Wapwonyo bene ni Ker pa Lubanga keken aye twero cobo pekkiwa ducu. Wapwonyo kit ma watwero nongo kwede yomcwiny ki kit ma omyero wakwo kwede i yo ma yomo cwiny Lubanga. Ento, lutic pa Lubanga gitimo gin ango ki ngec ma dong gupwonyo-ni? Lok pa lanebi mukene miniwa lagamme.—Nen Lok me Giko Buk Man me 21 ki 25.

14. Kitye ka tito kwena maber me Ker-ri kwene, dok angagi ma gitye ka titone?

¹⁴ Tic me tito kwena i twok lobo lung. Ma lubbe ki kare me agikki, Yecu owaco ni: “Lok man me kwena maber me ker pa Lubanga gibitito i wi lobo ducu.” (Matayo 24:3, 14) Kwena maber me Ker-ri dong kitye ka titone i lobe makato 230 dok i leb makato 700 kulu.  Ada, i wi lobo ducu, Lucaden pa Jehovah ma gia “ki i rok ducu, ki i kaka ducu” gitye ka konyo dano me niang gin ma Ker pa Lubanga obedo ki gin ma bitimone pi dano. (Niyabo 7:9) Dok gitimo man labongo cul mo. Kadi bed dano mapol gidaggi dok giunogi, pe tye gin mo keken ma romo juko tic man me tito kwena-ni, kit ma Yecu otito kwede.—Luka 21:17.

15. (a) Tika iye ni watye ka kwo i kare me agikki, dok pingo? (b) Ngo ma bitimme i kom jo ma giwinyo Lubanga ki jo ma pe giwinyo doge?

¹⁵ Tika iye ni watye ka kwo i kare me agikki? Lok pa lunebi mapol ma dok i kom kare me agikki tye ka cobbe. Cokcok-ki Jehovah bimoko tamme me giko tic me tito kwena maber-ri woko, ci “agikki piny” bibino. (Matayo 24:14) Agikki piny obedo ngo? Obedo Armagedon, kare ma Lubanga bityeko iye jo ducu maraco. Jehovah bitic ki Yecu kacel ki lumalaikane matego me jwero ngat mo keken ma kwero winyo En ki Wode. (2 Jo Tecalonika 1:6-9) I nge meno, Catan ki jogine pe dong gibibwolo dano. Dok jo ducu ma gimito winyo Lubanga ki jolo Ker-re gibineno ka cikke pa Lubanga ducu bicobbe.—Niyabo 20:1-3; 21:3-5.

16. Kit ma agikki piny dong tye macok adada-ni, ngo ma omyero itim?

¹⁶ Lobo man ma Catan tye ka dorone-ni dong cok o i agikkine. Pi meno, pire tek ni wapenye kekenwa ni, ‘Ngo ma myero atim?’ Jehovah mito ni inong ngec mapol ki i Baibul. Omyero iter kwano Baibul calo gin ma pire tek. (Jon 17:3) Lucaden pa Jehovah gibedo ki cokke cabit ducu wek okony dano me niang Baibul. Temme me bedo tye i cokke magi kare ki kare. (Kwan  Jo Ibru 10:24, 25.) Ka iniang ni myero itim alokaloka i kwoni, ci pe ibed ki lworo me timone. Ka iwoto ki timo meno, ci liremwu ki Jehovah bijing doko matek.—Yakobo 4:8.

17. Pingo agikki piny bituro dano mapol atura?

¹⁷ Lakwena Paulo otito ni jwero te jo maraco bitimme atura ma nongo pol pa dano pe gitamo, “macalo lakwo ma bino i dyewor.” (1 Jo Tecalonika 5:2) Yecu owaco ni dano mapol gibicayo lanyut ni watye ka kwo i kare me agikki. En owacci: “Kit macalo ceng otimme i kare pa Nua, bitimme kit meno bene i kare me dwogo pa Wod pa dano. I kare ca ma peya pii aluka ocorre i wi lobo onongo gicamo, gimato, dok awobe ki anyira ginyomme, nio wa i nino ma Nua odonyo kwede i yeya; pe gumedo ki ngeyo gin mo nio ka pii aluka opong, ci omologi woko ducu. Bibedo kit meno bene i kare ma Wod pa dano bidwogo iye.”—Matayo 24:37-39.

18. Yecu ocikowa ningo?

¹⁸ Yecu ocikowa ni pe omyero wawek ‘woro cam, ki mero kongo, ki paro lok me kwo man’ owir tamwa woko. En owaco ni agikki piny bibino atura, “macalo akum.” En bene omedo ni “bibino i kom jo ducu ma bedo i wi lobo.” Ci dok owacci: “Ento wubed ma wangwu twolo i kare ducu, kun wulego ni myero wubed ki tek me bwot ki i lok magi ducu ma bitimme, ki cung i nyim Wod pa dano.” (Luka 21:34-36) Pingo pire tek adada ni wawiny lok ma Yecu ocikowa kwede-ni? Pien cokcok-ki kibityeko lobo pa Catan-ni woko. Jo ma tye ki cwak pa Jehovah gin ki Yecu keken aye gibibwot i agikki me lobo man ci dong gibikwo i lobo manyen pi naka.—Jon 3:16; 2 Petero 3:13.