1. Келер ӧйдӧ не болорын кайдаҥ билип аларга јараар?

БӰГӰНГИ солундарды кӧрӱп: «Бу телекейле не болды, кайтты не?» — деп, слер јаҥыс катап айтпаган болороор. Кезик улус калју ла каршулу керектердиҥ, кыйын-шыраныҥ там ла кӧптӧгӧнин кӧрӱп, бу телекейдиҥ учы јууктап келген деп сананат. Је чынынча не болорын кайдаҥ билип аларга јараар? Бу керегинде Иегова Кудай айдып берер. Ол, улуска кӧрӧ, келер ӧйдӧ не болорын билер деп, Агару Бичикте айдылат (Исаия 46:10; Иаков 4:14).

2, 3. Иисустаҥ ӱренчиктери не керегинде сураган ла ол кандый каруу берген?

² Агару Бичикте айдылганыла болзо, телекей тӱгенип калар, је бу дезе бистиҥ болчок Јердиҥ јоголып каларын эмес, јаманныҥ јоголып каларын темдектейт. Иисус Христос јерле Кудайдыҥ Каандыгы башкарар деп айткан (Лука 4:43). Оныҥ ӱренчиктери бу Каандык качан башкарып баштаар деп билерге тыҥ кӱӱнзегендер. Оныҥ учун олор: «Биске айт, бу качан болор, келериҥниҥ [болотоныҥныҥ, ЈТ], чак тӱгенердиҥ темдеги кандый болор?» — деп, Иисустаҥ сурадылар (Матфей 24:3). Је Иисус чактыҥ учы качан келерин чике айтпаган да болзо, чактыҥ алдында не болорын куучындап берген.

³ Бис шак ла бу ӧйдӧ — чак тӱгенериниҥ алдында јадып јадыс. Бу бажалыкта чын ла бу ӧйдӧ јадып турганыстыҥ керелери шӱӱжилер. Је озо баштап, јердиҥ ӱстинде  јаман нениҥ учун болуп турганын оҥдоп аларга, теҥериде кандый јуу-согуш болгонын эске алып ийектер.

4, 5. а) Иисус Каан болуп отурарда, теҥериде не болгон? б) Ачылта 12:12-де бичилген сӧстӧрлӧ болзо, јердеги улусла не болгон?

⁴ 8-чи бажалыктаҥ Иисус 1914 јылда теҥериде Каан болуп отурган деп, билип алганыс (Даниил 7:13, 14). Мыныҥ кийнинде не болгоны керегинде Агару Бичикте мынайып айдылат: «Теҥериде јуу башталган: Михаил [Иисус] * ле оныҥ ангелдери јелбегенге [Сатанага] удура јуулашкан. Јелбеген ле оныҥ ангелдери олорго удура јуулашкан» (Ачылта 12:7). Бу јуу-согушта Иисус јеҥип, Сатананы ла кӧрмӧстӧрди јердӧӧн таштап ийген. Мынаҥ улам теҥеридеги ангелдердиҥ тыҥ сӱӱнгенин сананып ийзегер! Је бу јердеги улуска кӧп кыйын-шыра экелди. Нениҥ учун? Нениҥ учун дезе, Дьявол «ӧйи ас болгонын билип», тыҥ атыйланып калган (Ачылта 12:9, 12).

⁵ Дьявол улуска канча ла кире кӧп јаман эдерге албаданып јат. Ол тыҥ калјуурып калган, нениҥ учун дезе Кудай удабас ла оныҥ башкарар јаҥын айрып алар. Дьяволдо чын ла ӧй ас арткан. Бу ӧй Агару Бичикте калганчы кӱндер деп адалган. Иисустыҥ калганчы кӱндер керегинде нени айтканын билип алактар. (23 Кожултаны кӧрӱгер.)

6, 7. Иисустыҥ јуу-согуш ла ачана-торо керегинде айткан сӧстӧри канайып бӱдет?

⁶ Јуу-согуш. «Калык калыкка, каандык каандыкка удура туруп чыгар» — деп, Иисус айткан (Матфей  24:7). Бӱгӱнги јуу-согуштарда алдындагызына кӧрӧ, коркышту кӧп улус божоп јат. «Уорлдуотч» деген институттыҥ отчедыла болзо, 1914 јылдаҥ ала јуу-согуштарда 100 миллионноҥ ажыра кижи божогон. 1900 јылдаҥ ала 2000 јылга јетире (1 чакка) божогон улустыҥ тоозы 1900 јылга јетире (19 чакка) божогон улустаҥ ӱч катапка кӧп. Бу јуу-согуштар миллиондор тоолу улуска коркышту јаан оору-јобол ло кыйын-шыра экелген!

⁷ Ачана-торо. Иисус: «Ачана-торо болор» — деп айткан (Матфей 24:7). Бӱгӱнги кӱнде курсак-тамак алдындагы ӧйгӧ кӧрӧ, кӧп тӧ болзо, ал-камык улус торолоп јат. Нениҥ учун? Нениҥ учун дезе улуста эмезе акчазы јок, эмезе аш-курсак ӧскӱрип алатан јери јок. Миллиардтаҥ ажыра улус коркышту ас акчага јадат. Улустыҥ су-кадыгын корулаар телекейлик организацияныҥ (ВОЗ) чотогоныла болзо, ачана-тороноҥ улам кажы ла јылда миллиондор тоолу балдар божойт.

8, 9. Иисус Христостыҥ јерсилкиништер ле оору-јобол керегинде судуры канайып бӱдӱп јат?

 ⁸ Јерсилкиништер. Иисус: «Тыҥ јерсилкиништер болор» — деп, озодоҥ айдып салган (Лука 21:11). Тыҥ јерсилкиништер кажы ла јыл болуп турар деп билимчилер де айдып јадылар. 1900 јылдаҥ ала јерсилкиништердеҥ улам эки миллионноҥ ажыра кижи божогон. Эмдиги ӧйдиҥ технологиялары јерсилкиништердиҥ болорын озодоҥ кӧргӱзер аргалу да болзо, тӱҥей ле коркышту кӧп улус божоп јат.

⁹ Оору-јобол. Јердиҥ ӱстинде тӱрген јайылып, кӧп улустыҥ јӱрӱмин айрып турган јеткерлӱ југуш оорулар болор деп, Иисус айткан (Лука 21:11). Эмчилер кӧп ооруларды эмдеерге ӱренип алган да болзо, кезик оорулар тӱҥей ле эмделбей јат. Кажы ла јыл миллиондор тоолу улус туберкулёзтоҥ, маляриядаҥ ла холерадаҥ божоп јат деп, бир отчетто айдылат. Анайда ок эмчилер калганчы 40 јылдыҥ туркунына 30 јаҥы оору таптылар, олордыҥ кезиги эмделбей јат.

10. 2 Тимофейге 3:1—5-теги сӧстӧр канайып бӱдӱп јат?

¹⁰ Агару Бичикте: «Калганчы кӱндерде уур-кӱч ӧйлӧр келер» — деп айдылган (2 Тимофейге 3:1—5). Элчи Павел улустыҥ кылык-јаҥы кандый болорын бичип салган:

• бойын сӱӱр

• акча сӱӱр

• ада-энезиниҥ сӧзин укпас

• сӧзине турбас

• билезин керексибес

• бойын тудунып болбос

• калју, казыр болор

• соот-јыргалды Кудайдаҥ артык сӱӱр

• тыш бӱдӱмиле кудайзак, је чынынча оныҥ сӧзин укпас

11. Сарын 92:7-де айдылганыла, калју улусла не болор?

¹¹ Слердиҥ јадып турган јереерде мындый улус кӧп пӧ? Эйе, бӱдӱн телекей мындый болуп калган. Је удабас Кудай ӱзе бу немениҥ аайына чыгар. Агару Бичикте: «Кинчектӱлер ӧлӧҥ чилеп ӧссӧ дӧ, јаманды эдеечилердиҥ ончозы чечектезе де — бу дезе,  олордыҥ јажын-чакка јоголтылып калары ине» — деп айдылган (Сарын 92:7).

12, 13. Иегова биске калганчы кӱндерде нени оҥдоорго болушкан?

¹² Агару Бичикте калганчы кӱндерде телекей кыйын-шырала, оору-јоболло толор деп айдылган да болзо, анда анайда ок јакшы да немелер болор деп айдылган.

¹³ Агару Бичикти оҥдооры. Судурчы Даниил калганчы кӱндерде «чындык билгир кӧптӧӧр» деп бичиген (Даниил 12:4). Кудай бойыныҥ албатызына Агару Бичикти оҥдоорго болужар. Оныҥ болужы анчада ла 1914 јылдаҥ бери иле кӧрӱнет. Темдектезе, Иегова биске кӧп немени ачып берген: бойыныҥ адыныҥ учурын, јерде нени эдерге турганын, толынтыныҥ учурын, анайда ок ӧлӱм ле тирилиш керегинде чынды ачкан. Бистиҥ бастыра кӱчтеристиҥ аайына јаҥыс ла Кудайдыҥ Каандыгы чыгар деп билип алдыс. Анайда ок канайып ырысту болорын ла Кудайга јараарга канайып јӱрерин билип алдыс. Кудайдыҥ ишчилери мындый билгирлерди алып, нени эдип турганы керегинде база бир судурда бичилген. (20, 24 Кожулталарды кӧрӱгер.)

14. Каандык керегинде сӱӱнчилӱ јар канайып ӧзӱп чыккан, бу јарды кем јарлайт?

¹⁴ Бастыра телекейде болуп турган јарлаар иш. Иисус калганчы кӱндерде «Каандык керегинде Сӱӱнчилӱ Јар» бастыра јер-ӱстине јарлалар деп айткан (Матфей 24:3, 14). Бӱгӱн Каандык керегинде сӱӱнчилӱ јар 240 ороондо ло 900-теҥ ажыра тилге јарлалып јат. «Ончо уктардаҥ [ла] ӱйелердеҥ» турган Иегованыҥ Керечилери Кудайдыҥ Каандыгы улуска нени эдери керегинде бастыра јердиҥ ӱстинде јарлайдылар (Ачылта  7:9). Олор бу иш учун јал албайдылар. Иегованыҥ Керечилерин кӧп улус јаман кӧрӱп, истежип турган да болзо, Иисустыҥ айтканыла Каандык керегинде сӱӱнчилӱ јарды јарлаарын не де токтодып болбос (Лука 21:17).

15. а) Калганчы кӱндерде јададыс деп, слер бӱдӱп турганыгар ба, нениҥ учун? б) Иегованы уккан улусла не болор? Оны укпаган улусла не болор?

¹⁵ Бис калганчы кӱндерде јададыс деп, слер бӱдӱп турганыгар ба? Бӱгӱн калганчы кӱндер керегинде судурлар чыннаҥ ла бӱдӱп јат. Удабас ла Иегова сӱӱнчилӱ јарды јарлаарын токтодып ийер. «Олтушта чак тӱгенер» (Матфей 24:14). Је чак качан тӱгенер? Бастыра јаманды јоголтотон Армагеддон деген јуу-согуш башталза. Бу ӧйдӧ, Иегованыҥ табы аайынча, Иисус ла оныҥ ийде-кӱчтӱ ангелдери Кудайды угарга кӱӱнзебегендердиҥ ончозын јоголтып салар (2 Фессалоникадагыларга 1:6—9). Мыныҥ кийнинеҥ Сатана ла оныҥ кӧрмӧстӧри база кемди де тӧгӱндеп болбос. Кудайдыҥ сӧзин угарга ла оныҥ Каандыгы башкарган ӧйдӧ јадарга кӱӱнзеген улус, Кудайдыҥ судурлалган алкыштарын кӧргилеер (Ачылта 20:1—3; 21:3—5).

16. Телекейдиҥ учы јууктап келгениле колбой, слерге нени эдер керек?

¹⁶ Сатананыҥ башкарып турган телекейи удабас јоголтылар. Оныҥ учун бойыстаҥ: «Меге нени эдер керек?» — деп сураар керек. Анайда ок Иегова бисти Агару Бичикти јакшы билип алзын деп кӱӱнзейт. Оныҥ учун Агару Бичикти јазап шӱӱп сананып ӱренер керек (Иоанн 17:3). Иегованыҥ Керечилериниҥ неделе сайын ӧткӱрилип турган јуундары Агару Бичикти оҥдоорго  болужып јат. Бу јуундарга јаантайын барып турарга албаданыгар. (Еврейлерге 10:24, 25 кычырыгар.) Слерге солынар керек деп оҥдоп ийген болзоор, коркыбай ла солыныгар. Ол тушта Иеговала најылык колбулараар там ла тыҥыыр (Иаков 4:8).

17. Бу калју телекейдиҥ учы кӧп саба улуска нениҥ учун сакыбаган јанынаҥ келер?

¹⁷ Калју телекейди јоголтотон кӱн кӧп саба улуска «тӱнде уурчы чылап» сакыбаган јанынаҥ келер деп, элчи Павел бичиген (1 Фессалоникадагыларга 5:2). Анайда ок кӧп улус калганчы кӱндердиҥ темдегин керекке албас деп, Иисус озолондыра айткан болгон. Ол: «Нойдыҥ кӱндеринде кандый болгон, Кижи Уулыныҥ келери [болотон ӧйи, ЈТ] андый ок болор. Чайык чыгар кӱндердиҥ алдында, Ной ковчегке кирердиҥ киргенче, улус ичип-јип јаткан, кижи алары алып, кижиге барары барып турган. Чайык чыгып, ончозын кырганча, олор нени де сананбай јӱргендер. Кижи Уулыныҥ келери [болотон ӧйи, ЈТ] андый ла болор» — деп јартаган (Матфей 24:37—39).

18. Иисус нени озодоҥ айдып салган?

¹⁸ Калју телекейдиҥ учы «сакыбаган јанынаҥ келип... тузак ошкош» болотон болзо, Иисус: «Бойыгарды тудуныгар, калаҥы ла эзирик болоры, јадын-јӱрӱмниҥ сурактары јӱрегерди олјолоп јоботпозын» — деп айдып салган. Ол: «Келип јаткан ончо тӱбектеҥ кыйып ӧдӧргӧ, Кижи Уулыныҥ алдына турарга, јаантайын сергек болуп, мӱргип јӱрӱгер» — деп кычырган (Лука 21:34—36). Иисустыҥ сӧстӧрин нениҥ учун угар керек? Нениҥ учун дезе, удабастаҥ ла Сатананыҥ калју телекейи јоголтылар. Бу ӧйдӧ јӱк ле Иегова ла Иисустыҥ јарадузын алган албаты тирӱ артып, јаҥы телекейде ӱргӱлјиге јӱрер (Иоанн 3:16; 2 Петр 3:13).