1. ¿Chew feypingekey taiñ chumlerputual?

ALLKÜTUN mu noticia, eymi ramtuwafuymi: “¿Chumlerputuaiñ?”. Fentren wedake dungu ruparupangey, feymu pu che rakiduamkey ñi pichilewen apümkangeal Mapu. ¿Rüfngepey may tüfa? ¿Kimafuiñ taiñ chumlerputual küpalechi antü mu? Kimafuiñ llemay. Welu pu che kimlay chem rupayay, Chaw Jewba müten kimniey tüfa. Biblia mu kidu feypi taiñ chumlerputual iñchiñ ka ti Mapu (Isaías 46:⁠10; Santiaw 4:⁠14).

2, 3. 1) Pu inakefilu ta Jesus, ¿chem küpa kimfuyngün? 2) ¿Chem feypifi Jesus?

² Biblia feypilu ñi afal ta Mapu, küpa feypilay ñi apümkangeal tüfachi Mapu. Welu may küpa feypi ñi afal ti wedake dungu Mapu mu. ¿Chumngechi? Jesus feypi Chaw Dios ñi gobierno ngünenietuafi ti Mapu (Luka 4:⁠43). Feymu pu inakefilu ta Jesus küpa kimfuyngün chumül küpayay tüfachi gobierno. Fey ramtufingün ta Jesus: “¿Chumül rupayay tüfachi dungu? ¿Chumngechi kimaiñ tunten mu ngünenietuaymi? Ka ¿chumngechi kimaiñ ñi fülkülepan ñi apümkangeal müleyechi dungu Mapu mu?” (Matew 24:⁠3, TNM). Jesus feypilay chumül ñi rupayal tüfa. Welu feypifi chem rupayay epe puwkülele ñi afal wedake dungu Mapu mu. ¡Famülke mu ruparupangey Jesus ñi feypin! (Inaduamnge kimelün dungu 22).

 ³ Welu, ¿rüf pichilewey tañi afal wedake dungu Mapu mu? ¿Chumngechi kimafuiñ tüfa? Tüfachi chillkatun mu inaduamaiñ. Ka taiñ kimal chumngelu doyelküley ti dungu Mapu mu, wüne inaduamaiñ kiñe awkan (weychan) ñi rupan wenu mapu mew.

4, 5. 1) Jesus elungelu ñi ngünenieal, ¿chem rupay wenu mapu mu? 2) Apokalipsi 12:⁠12 ñi feypin mu, ¿chem rupay Mapu mu ütrüfnakümngepalu Weküfü?

⁴ Jesus elungey ñi ngünenieal 1914 tripantu mu. Ti 8 chillkatun mu inaduamiyiñ tüfa (Daniel 7:⁠13, 14). Fey Biblia feypi chem rupay: “Rupalu kom tüfachi dungu müley kiñe fütra weychan ta wenu mapu. Miguel ka tañi pu werken püllü weychafi engün tati fütra filu. Tati fütra filu ka tañi pu werken püllü weychaeyew engün”. Miguel fey ta Jesus, ka tati fütra filu fey ta Weküfü. * Weküfü ka pu wedake püllü wewngeyngün, fey ütrüfnakümngepay Mapu mu. Feymu, ¡müna ayüwingün pu kümeke püllü wenu mu! Welu, ¿chem rupay Mapu mu? Weküfü rume lladküley ka kimniey ñi pichilewen ñi antü, feymu pu che rume kutrankawküley (Apokalipsi 12:⁠7, 9, 12).

⁵ Weküfü ñi duam mu müley fentren kutrankawün Mapu mu. Welu pichin mu, Jewba katrütuafi ñi weda femwenoal, feymu pofo illkuley Weküfü. Fewla inaduamaiñ chem feypi Jesus tañi rupayal epe puwkülele ñi afal wedake dungu Mapu mu.

6. Jesus feypi tañi müleal awkan ka weychan. ¿Chumngechi femtripamekey tüfa famülke mu?

⁶ “Kiñe trokiñ mapu ta weychayalu kangelu trokiñ mapu engu” (Matew 24:⁠7). Akulu 1914 tripantu ka fantepu mu, doy fentren che lakey mülen mu awkan ka weychan. Femngechi fente rupakelafuy kuyfi. Petu ñi puwnon 1914, 30 millon che lay awkan ka weychan mu, doy 1.900 tripantu ñi rupan mu. Welu epe pataka tripantu mew müten, 100 millon che lay awkan mu, 1914 puwlu 2000 tripantu mu.

7. Jesus feypi tañi müleal ngüñün. ¿Chumngechi femtripamekey tüfa famülke mu?

⁷ “Müleay ta ngüñün” (Matew 24:⁠7). Femtripamekey Jesus ñi feypin. Fentren che kutrankawkey mülenon mu iyael. Nielayngün plata ñi ngillayal iyael kam nielayngün mapu ñi nganal. Wall Mapu mu, doy warangka millon che rume pofrengeyngün, ka pepi kullikelayngün ñi nieal mongewe. Kafey fill tripantu lakey fentreken millon pichikeche nienon mu ñi duamnieelchi iyael.

8. Jesus feypi tañi müleal nüyün. ¿Chumngechi kimnieiñ ñi ruparupangen tüfa?

 ⁸ “Müleay ta fütrake nüyün” (Luka 21:⁠11). Fill tripantu müley fentren fütrake nüyün, feymu fentren che lakey. Ka 1900 tripantu ka fantepu mu, doy epu millon che lay nüyün ñi duam mu.

9. Jesus feypi tañi müleal kutran. ¿Chumngechi kimnieiñ ñi ruparupangen tüfa?

⁹ “Müleay [...] kutran fill mapu püle” (Luka 21:⁠11). Famülke mu müley wedake tuluwün-ngechi kutran, fey lakey fentren che. Pu doctor kimniefuy chumngechi lawentuafiel fentren kutran, welu kiñeke petu nielay lawen. Fillke tripantu lakey fentren che nielu kanser, tuberculosis kam kakelu kutran. Kafey doy 30 we kutran tripay, ka kiñeke petu kimüñmangelay lawen.

10. Ñi feypin 2 Timotew 3:⁠1-5, ¿chumngechi femtripamekey famülke mu?

¹⁰ Apostol Pablo wirintukuy Biblia mu chem pin 2 Timotew 3:⁠1-5: “Epe puwkülele ñi afael ta  antü müleay ta kuñiwünngechi dungu”. Fey pengeli chumngechi feleal pu che pichilewele ñi afal wedake dungu:

• Re kidu falintunieay tañi dungu.

• Diñmatuafi plata.

• Allkütulayafi tañi fütakeche.

• Kim mañumlayay.

• Piwkeyelayafi kidu tañi pu che.

• Kim ngüneniewlayay.

• Weda piwkengeay ka kewatucheay.

• Duamnieay tañi küme rupaleal müten, welu famentuay Chaw Dios ñi dungu.

• Feypiay ñi poyekefiel ta Chaw Ngünechen, welu rüf allkütulayafi.

11. Salmo 92:⁠7 ñi feypin mu, ¿chem femngeay pu wedake che?

¹¹ ¿Femngechi felekey pu che chew tami mülen? Wall Mapu mu müley femngechi che. Welu taiñ Wenu Chaw küme elkünutuafi tüfa. Feymu feypikünuy: “Tripale tati pu wedake che wedake kachu reke, ka rayüle kom pu weda femkelu, fey puway chi antü ñi rumel apümkangeal engün” (Salmo 92:⁠7).

12, 13. Chaw Jewba ñi kellun mu, ¿chem kimiyiñ?

¹² Chumngechi ngüneduamiyiñ, Biblia feypikünuy ñi rume kutrankawal pu che pichilewele ñi afal wedake dungu. Welu ka feypi ñi rupayal kümeke dungu.

¹³ Doy küme adümkeiñ Biblia. Kiñe wentru poyekefilu ta Jewba, Daniel pingelu, ka feypi chem ñi rupayal pichilewele ñi afal wedake dungu. Kidu feypi: “Tati rüf kimün alün-ngerpuay” (Daniel 12:⁠4). Femngechi pengeli Chaw Dios ñi eluafiel tañi pu che ñi doy küme adümafiel Biblia. Tüfa femtripay, doyelchi may 1914 tripantu ka fantepu mu. Feymu kimiyiñ ñi fente falin-ngen Jewba tañi üy ka chumngechi ayükey ñi feleal ta Mapu. Kafey kimiyiñ Jesus ñi wülün tañi mongen iñchiñ mu, chumleketuy pu layelu ka ñi wiñomongetual engün. Kafey kimürpuiñ taiñ rüf kümelkayaetew Chaw Ngünechen ñi gobierno müten. Ka kimürpuiñ chumngechi ayüwküleal ka chumngechi küme yenieal taiñ mongen Jewba ñi adkiñ mu. Welu, ¿ellkanakümngekey tüfachi kimün? Biblia ka feypikünuy ñi chumken Jewba ñi pu che (inaduamnge ti kimelün dungu 19, ka ti kimelün dungu 23).

14. 1) ¿Chew amuldungungekey Chaw Ngünechen ñi dungu? 2) ¿Iney femkey tüfachi küdaw?

¹⁴ Wall Mapu mu amuldungungekey Chaw Dios ñi dungu. Jesus nütramkalu chem rupayal pichilewele ñi afal wedake dungu, feypi: “Tüfachi kümeke dungu [Chaw Ngünechen] ñi Ngünenien mu, kimelngeay ta kom Mapu mew” (Matew 24:⁠3, 14, TNM). Tüfachi kümeke dungu petu amuldungungekey 240 trokiñke mapu mu ka doy 900 kewün dungu mew. Wall Mapu mu, pu Dungukelu Iney Ngen Jewba kimeltumekefi pu che ñi chumal Chaw Ngünechen ñi gobierno. Tüfa engün ‘kom  trokiñke mapu tuwi, ka fillke tuwün-ngey’ (Apokalipsi 7:⁠9). Kofrakelayngün ñi femal tüfachi küdaw. Fentren che üdekeeyew ka kayñetukeeyew engün, welu pepi katrütukelaeyew engün tañi amuldungun. Femngechi feypikünuy Jesus (Luka 21:⁠17).

15. 1) ¿Pichilewepey may ñi afal wedake dungu? ¿Chumngelu pimi tüfa? 2) ¿Chem femngeay pu allkütukefilu ta Jewba ka pu allkütukenofilu?

¹⁵ ¿Pichilewepey may ñi afal wedake dungu? ¿Chem pimi kay? Biblia feypikünuy fillke dungu ñi rupayal. Ka tüfa femtripamekey famülke mu. Pichin mu Jewba feypiay ñi amuldungungewenoal kidu tañi dungu, “fey wüla akuay ñi afael ta antü” (Matew 24:⁠14). ¿Chumül rupayay tüfa? Armagedon awkan mu. Fey mu Chaw Jewba apümafi wedake dungu. Kidu werküafi ta Jesus ka pu newen-ngechi püllü, fey apümkayafingün kom pu küpa allkütukenofilu ta Chaw Ngünechen ka tañi Fotüm Jesus (2 Tesalonisense 1:⁠6-8). Rupale tüfa, Weküfü ka pu wedake püllü ngünenkawelayafi pu che. Fey kümelkangeay pu che allkütukefilu ta Chaw Dios ka kelluntukufilu Kidu ñi gobierno, fey peayngün chumngechi femtripayay kom ñi feypikünuel Chaw Jewba (Apokalipsi 20:⁠1-3; 21:⁠3-5).

16. Kimürpuymi ñi pichilewen tañi afal wedake dungu, feymu ¿chumaymi kay?

¹⁶ Pichilewey ñi apümkangeal kom ñi ngünenieel Weküfü. Feymu falin-ngey tami ramtuwal: “Iñche kay, ¿chuman?”. Küdawkülenge tami küme kimafiel Biblia, tüfa ayükey Jewba. Ka rüf inaniefinge tami kimürpuel (Juan 17:⁠3). Pu Dungukelu Iney Ngen Jewba fill semana femkeyngün trawün, femngechi kellukefingün pu che ñi doy adümafiel Biblia. Feymu eluwkülenge tami rumel amual feychi trawün mu (papeltunge Ebrew 10:⁠24, 25).  Ka duamfalngele küme elkünutual tami femken, femaymi llemay. Femngechi femülmi, doy weniyeafimi tami Wenu Chaw (Santiaw 4:⁠8).

17. Akule ñi apümkangeal wedake dungu, ¿chumngelu afmatuleweay pu che?

¹⁷ Akule ñi apümkangeal wedake dungu, pu che afmatuleweay. Tüfa akurumeay “kiñe weñefe reke akualu ta pun mew”. Femngechi feypi apostol Pablo (1 Tesalonisense 5:⁠2, TNM). Kimfalkülelu rume ñi pichilewen tañi apümkangeal wedake dungu, Jesus feypikünuy fentren che ñi wallkünuafiel. Wüne pengeli ñi chumün pu che Noe ñi antü mew, feypi: ‘Feychi tripantu mew petu ngenolu tati fütra tripakon, tati pu che ikawmekey ka putumekey ka kurengemekey engün. Fey konlu wüla ta Noe tañi wampo ruka mew, fentepuy engün ñi fill meken. Welu petu tañi chem rakiduamkülenon engün, akuy tati tripakon, fey kom lay engün’. Fey wüla Jesus pengeli ñi ka femngechi femal pu che kidu ngüneniele wenu mapu mu, epe puwkülele ñi afal wedake dungu (Matew 24:⁠37-39).

18. Jesus, ¿chem ngüfetueiñmu?

¹⁸ Jesus ngüfetueiñmu, femngechi taiñ doyümnoafiel in dungu, “putun dungu” ka ‘taiñ rume küdawnoal tüfachi mongen mew’. Jesus feypi akurumeay ñi apümkangeal wedake che. Ka pengeli ñi küpayal ‘kom feychi müleyelu mapu mew’. Fey feypi: “Eymün ta pewütuwküleaymün, fill antü ngillatulekeaymün, femngechi tamün montuael kom tati küpalechi dungu mew ka femngechi tamün küme llowaetew tati Wentrukünuwpalu” (Luka 21:⁠34-36). ¿Chumngelu falin-ngey femal taiñ feypietew Jesus? Pichilewey ñi apümkangeal kom ñi ngünenieel Weküfü. Ka tati ayüwelkefilu müten ta Jewba ka Jesus montuayngün. Feymu aflayay ñi mongen Mapu mu, küme mülewe ngetule (Juan 3:⁠16; 2 Pedro 3:⁠13).