1. Sain ta puwedeng maaraman an mangyayari sa maabot na panahon?

NASABI mo na daw minsan kan maghiling ka nin bareta, ‘Grabe na talaga!’ Kadakul nin nangyayaring trahedya saka pang-aapi, kaya may mga naniniwala na harani na talaga an katapusan kan kinaban. Totoo daw iyan? May paagi daw para maaraman ta an mangyayari sa maabot na panahon? Igwa. Maski ngani dai kaya kan mga tawo na hulaan iyan, kaya iyan kan Diyos na Jehova. Sa Bibliya, sinasabi niya sa sato an magigin puturo ta asin kan planetang Daga.—Isaias 46:10; Santiago 4:14.

2, 3. Ano an gustong maaraman kan mga disipulo ni Jesus, asin paano niya sinda sinimbag?

² Pag sinasabi sa Bibliya an manungod sa katapusan kan kinaban, bakong katapusan kan planetang Daga an buot sabihon kaiyan, kundi katapusan kan gabos na karatan. Itinukdo ni Jesus sa mga tawo na mamamahala an Kahadian nin Diyos sa bilog na daga. (Lucas 4:43) Gustong maaraman kan mga disipulo niya kun nuarin maabot an Kahadian nin Diyos, kaya hinapot ninda si Jesus: “Nuarin mangyayari an mga bagay na ini, asin ano an magigin tanda kan saimong presensiya asin kan pagtatapos kan sistema nin mga bagay?” (Mateo 24:3) Mayo saindang itinaong eksaktong petsa si Jesus, pero sinabi niya sainda an mga mangyayari pag madali nang mag-abot an katapusan kan kinaban na ini. Nangyayari na ngunyan an mga sinabi sainda ni Jesus.

³ Sa kapitulong ini, pag-uulayan niyato an mga ebidensiya na nabubuhay na kita sa panahon na madali nang mag-abot  an katapusan kan kinaban. Pero aramon ta nguna an manungod sa sarong giyera na nangyari sa langit para maintindihan niyato kun taano ta marauton an mga nangyayari digdi sa daga.

4, 5. (a) Ano an nangyari sa langit dai nahaloy pagkatapos na magin Hadi si Jesus? (b) Uyon sa Kapahayagan 12:12, ano an mangyayari sa daga pagkatapos na ihulog diyan si Satanas?

⁴ Nanudan ta sa Kapitulo 8 na nagin Hadi si Jesus sa langit kan 1914. (Daniel 7:13, 14) Sinasabi sa sato kan libro nin Kapahayagan kun ano an nangyari: “Nagkaigwa nin ralaban sa langit: Si Miguel [buot sabihon, si Jesus] asin an saiyang mga anghel nakipaglaban sa dragon [si Satanas], asin an dragon saka an mga anghel kaini nakipaglaban.” * Nadaog si Satanas pati an saiyang mga demonyo asin ihinulog sinda digdi sa daga. Siguradong ugmahon kaidto an mga anghel! Pero kumusta man an mga tawo digdi sa daga? Sinasabi kan Bibliya na magigin panahon iyan nin kadakul na mga kasakitan. Taano? Huling grabe an kaanggutan kan Diyablo, “palibhasa aram niyang halipot na sana an saiyang panahon.”—Kapahayagan 12:7, 9, 12.

⁵ Ginigibo kan Diyablo an gabos para magdara nin grabeng problema digdi sa daga. Grabe an saiyang kaanggutan huling halipot na sana an saiyang panahon bago siya halion nin Diyos. Pag-ulayan niyato an mga sinabi ni Jesus na mangyayari sa huring mga aldaw.—Hilingon an Dagdag na Impormasyon 24.

6, 7. Ano an masasabi niyato mapadapit sa mga giyera asin kakulangan nin kakanon ngunyan?

⁶ Giyera. Sinabi ni Jesus: “An nasyon makikilaban sa  nasyon asin an kahadian makikilaban sa kahadian.” (Mateo 24:7) Mas dakul an nagadan sa mga giyera sa satong panahon kisa sa arin man na panahon sa kasaysayan. Ipinapahiling kan sarong report hali sa Worldwatch Institute na puon kan 1914, labing 100 na milyon katawo na an nagadan sa mga giyera. Sa laog nin 100 na taon puon 1900 sagkod 2000, labing triple an nagadan sa mga giyera kisa sa mga nagadan sa laog nin 1,900 na taon bago kaiyan. Isipa na sana an grabeng kasakitan asin kulog na namatian kan milyon-milyon na tawo dahil sa giyera!

⁷ Kakulangan nin kakanon. Sinabi ni Jesus: “Magkakaigwa nin sunod-sunod na grabeng gutom.” (Mateo 24:7) Dawa ngani mas dakul ngunyan an produksiyon nin kakanon, dakul man giraray an kinukulang nin kakanon. Taano? Dahil kulang an saindang kuwartang pambakal o dagang matatanuman. Labing sarong bilyon na tawo an pinagkakaigo sa sarong aldaw an kuwartang mayo pang sarong dolyar. Sinasabi kan World Health Organization na milyon-milyon na aki an nagagadan taon-taon, na an panginot na dahilan kulang nin kakanon.

8, 9. Ano an mga nagpapatunay na nauutob na an propesiya ni Jesus manungod sa mga linog asin hilang?   

 ⁸ Mga linog. Sinabi ni Jesus: “Magkakaigwa nin makusog na mga linog.” (Lucas 21:11) Sa ngunyan, inaasahan na magkakaigwa nin dakul na makukusog na linog kada taon. Puon kan taon 1900, labing duwang milyon katawo na an nagadan huli sa linog. Asin dawa ngani nakakatabang ngunyan an teknolohiya para mas amay na maaraman kun magkakaigwa nin linog, dakul pa man giraray an nagagadan.

⁹ Hilang. Sinabi pa ni Jesus na magkakaigwa nin mga “epidemya.” Kadakul na hilang an marikas maglakop asin ikinakagadan nin dakul. (Lucas 21:11) Dawa ngani dakul na hilang na ngunyan an nabubulong kan mga doktor, may mga hilang pa man giraray na dai ninda kayang bulungon. Uyon sa sarong report, milyon-milyon kada taon an nagagadan sa mga hilang, arog nin tuberkulosis (TB), malaria, asin kolera. Apuwera kaiyan, may nadiskubre an mga doktor na 30 bagong mga hilang, asin an nagkapira diyan mayo pa nin bulong.

10. Paano nauutob ngunyan an 2 Timoteo 3:1-5?

¹⁰ Sa 2 Timoteo 3:1-5, sinasabi kan Bibliya: “Sa huring mga aldaw maabot an delikado asin masakit na mga panahon.” Sinabi ni apostol Pablo kun ano an magigin ugali nin mga tawo sa huring mga aldaw. Sinabi niya na an mga tawo magigin

• makasadiri

• makikuwarta

• masinuway sa mga magurang

• bakong maimbod

• mayong pagkamuot sa mga kapamilya

• daing pagpupugol sa sadiri

• madahas asin agresibo

• mahilig sa pagpasiram-siram kisa pagpahiling nin pagkamuot sa Diyos

• maki-Diyos man ngaya pero dai man nagsusunod sa Diyos

11. Uyon sa Salmo 92:7, ano an mangyayari sa mga maraot na tawo?

¹¹ Arog daw kaiyan an mga tawo sa lugar nindo? Dakul nin arog kaiyan sa bilog na kinaban. Pero dai mahahaloy, may gigibuhon an Diyos. Nanuga siya: “Pag nagpaparadakul an maraot siring sa nagtuturubong duot asin nagpaparaasenso  an gabos na paragibo nin maraot, iyan huling nakatagama sindang puhuon nin daing sagkod.”—Salmo 92:7, NW.

12, 13. Ano an mga itinukdo sa sato ni Jehova sa panahon na ini nin huring mga aldaw?

¹² Ihinula kan Bibliya na sa huring mga aldaw, an kinaban mapapano nin kasakitan. Pero sinasabi man kan Bibliya na igwa nin magayon na mga mangyayari.

¹³ Mas masasabutan an Bibliya. Nagsurat si propeta Daniel mapadapit sa huring mga aldaw: “Magigin abunda an tunay na kaaraman.” (Daniel 12:4, NW) Tatabangan nin Diyos an saiyang mga lingkod na maintindihan nin mas malinaw an Bibliya. Risang-risa ini lalo na puon kan 1914. Halimbawa, itinukdo niya sa sato kun taano ta mahalagang maaraman ta an saiyang pangaran asin an katuyuhan niya para sa daga pati man an katotoohan manungod sa pantubos, kun ano an nangyayari sa sato pag nagadan kita, saka an manungod sa pagkabuhay liwat. Nanudan niyato na an Kahadian nin Diyos sana an makakatao nin solusyon sa gabos tang problema. Nanudan ta man kun paano magigin maugma asin kun paano mamumuhay sa paaging nakakapaugma sa Diyos. Pero ano an ginigibo kan mga lingkod nin Diyos sa mga nanudan ninda? Sinisimbag iyan kan saro pang propesiya.—Hilingon an Dagdag na Impormasyon 21 asin 25.

14. Sain ihinuhulit an maugmang bareta kan Kahadian, asin sairisay an naggigibo kaiyan?

¹⁴ Paghuhulit sa bilog na kinaban. May koneksiyon sa huring mga aldaw, sinabi ni Jesus: “An maugmang baretang ini kan Kahadian ihuhulit sa bilog na kinaban.” (Mateo 24:3, 14) An maugmang bareta kan Kahadian ipinapaabot na sa mga 240 kadagaan asin sa mga 1,000 lengguwahe. Iyo, sa bilog na kinaban, tinatabangan kan mga Saksi ni Jehova sa “gabos na nasyon asin tribo” an mga tawo na masabutan kun  ano an Kahadian asin kun ano an gigibuhon kaiyan para sa katawuhan. (Kapahayagan 7:9) Asin ginigibo ninda ini nin daing bayad. Maski ngani dakul an naaanggot saka nagkokontra sa sainda, daing makakapugol sa gibuhon na paghuhulit, arog mismo kan sinabi ni Jesus.—Lucas 21:17.

15. (a) Naniniwala ka daw na nabubuhay na kita sa huring mga aldaw? Taano? (b) Ano an mangyayari sa mga nagsusunod ki Jehova saka sa mga habong magsunod sa saiya?

¹⁵ Naniniwala ka daw na nabubuhay na kita sa huring mga aldaw? Dakul na hula sa Bibliya manungod sa huring mga aldaw an nangyayari na. Dai mahahaloy, papapunduhon na ni Jehova an paghuhulit kan maugmang bareta, dangan maabot “an katapusan.” (Mateo 24:14) Anong katapusan? An Armagedon—an pagpara nin Diyos sa gabos na karatan. Gagamiton ni Jehova si Jesus saka an saiyang makapangyarihan na mga anghel para paraon an siisay man na habong magsunod sa Saiya asin sa saiyang Aki. (2 Tesalonica 1:6-9) Pagkatapos kaiyan, si Satanas asin an saiyang mga demonyo dai na makakapandaya sa mga tawo. Dangan, mahihiling na kan gabos na nagsusunod sa Diyos asin nagpapasakop sa saiyang Kahadian an kautuban kan gabos na ipinanuga nin Diyos.—Kapahayagan 20:1-3; 21:3-5.

16. Huling haranihon na an katapusan, ano an kaipuhan mong gibuhon?

¹⁶ Madali na an katapusan kan kinaban na ini na pinapamahalaan ni Satanas. Kaya importanteng marhay na haputon ta an satong sadiri, ‘Ano an kaipuhan kong gibuhon?’ Gusto ni Jehova na pag-adalan mo pang marhay an Bibliya. Kaipuhan mong seryosuhon an pag-adal mo. (Juan 17:3) May mga pagtiripon an mga Saksi ni Jehova kada semana para tabangan an mga tawo na masabutan an Bibliya. Umatender nin regular sa mga pagtiripon na iyan. (Basahon an Hebreo 10:24, 25.) Pag may naaraman kang mga  dapat mong baguhon, dai ka matakot na gibuhon iyan. Paagi kaiyan, lalo kang magigin harani ki Jehova.—Santiago 4:8.

17. Taano ta mabibigla an kadaklan pag mag-abot an katapusan?

¹⁷ Ipinaliwanag ni apostol Pablo na an pagpara sa mga maraot maabot sa panahon na dai inaasahan kan kadaklan, arog “kan pag-abot nin sarong parahabon sa banggi.” (1 Tesalonica 5:2) Ihinula ni Jesus na babaliwalaon kan dakul na tawo an ebidensiya na nabubuhay na kita sa huring mga aldaw. Sinabi niya: “Kun ano an mga kamugtakan kaidtong mga aldaw ni Noe, magigin siring man kaiyan sa presensiya kan Aki nin tawo [o, sa huring mga aldaw]. Huli ta kun paanong kan mga aldaw bago an Baha, an mga tawo nagkakarakan asin nag-iirinom, an mga lalaki nag-aaragom saka an mga babayi nagpapaaragom, sagkod na uminabot an aldaw na naglaog sa arka si Noe, asin dai sinda nagmangno sagkod na uminabot an Baha asin inaranod sinda gabos, magigin siring man kaiyan an presensiya kan Aki nin tawo.”—Mateo 24:37-39.

18. Anong patanid an itinao sa sato ni Jesus?

¹⁸ Nagpatanid si Jesus na dapat kitang mag-ingat sa mga bagay na makakawara kan satong pokus, arog kan “sobrang pagkakan asin sobrang pag-inom saka mga kahaditan sa buhay.” Sinabi niya na an katapusan maabot nin bigla, na “siring sa siod” o, silo. Sinabi man niya na “maabot iyan sa gabos na nag-iistar sa bilog na daga.” Dangan sinabi pa niya: “Kun siring, magdanay kamong mapagbantay, na nagngangayo-ngayo [o, udok na namimibi] sa gabos na oras tangani na makadulag kamo sa gabos na bagay na ini na kaipuhan mangyari asin na makatindog sa atubangan kan Aki nin tawo.” (Lucas 21:34-36) Taano ta mahalagang marhay na magdangog kita sa patanid ni Jesus? Huling haranihon na an pagpara sa maraot na kinaban ni Satanas. An mga tawo sanang inuuyunan ni Jehova asin ni Jesus an makakaligtas asin mabubuhay nin daing katapusan sa bagong kinaban.—Juan 3:16; 2 Pedro 3:13.