1. Ni oha ori kubasa kutugambira ebirabeho nyensakare?

MBEHI wararebire amakuru rero okebuza ngu: ‘Obu shi ebintu biryagumizamu batiya?’ Omuri obu bwire hariho akabi kingi n’obugomi kandi nibituma abantu bamwe bagamba ngu ‘noshwa emperu y’ensi eri hihi!’ Mbwenu shi ni amazima? Mbwenu shi twine oku turi kubasa kumanya ebiribaho omu biro by’omu misho? Yego. N’obu abantu batari kubasa kumanya ebirabeho nyensakare, Yehova Ruhanga we nabimanya. Natugambira omuri Bibuli ebirije kutuhikaho n’ebirahike ahari egi nsi.—Isaaya 46:10; Yakobo 4:14.

2, 3. Ni enki eki abegi ba Yesu babire nibenda kumanya, kandi shi Yesu akabagarukamu ngu enki?

² Ku turi kushoma omuri Bibuli ngu emperu y’ensi, tikiri kuba nikimanyisa emperu y’ensi, ahobwe nikiba nikimanyisa okwihwaho kw’ababi. Yesu akegesa abantu ku Obukama bwa Ruhanga bwabire burije kutegeka ensi. (Luka 4:43) Abegi beye bakaba nibenda kumanya obwire obu Obukama bwa Ruhanga bwabire burijireho, ni ko kubuza Yesu bati: ‘Tugambire ebi ahu biriberaho, n’akamanyiso k’okwija kwawe oku kariba, n’ak’obunaku obu ensi egi erihweraho.’ (Matayo 24:3) Yesu tarabagambire ekiro eki emperu yabire erije kwijiraho, konka akabagambira ebintu ebyabire birabeho mbere y’emperu y’egi nsi. Ebyo bintu ebi Yesu yagambire biri kubaho hati.

³ Omuri eki kicweka twaza kwega ebihamya biri kwereka ku twahikire omu biro by’emperu y’egi nsi. Ec’okubanza, tushemerire kubanza twamanya orutaro orwabireho  omu iguru kugira ngu bitukwase kushoborocerwa enshonga embera ziri mbi munonga omu nsi.

4, 5. (a) Ni enki ecabireho omu iguru bwanyima kace Yesu amazire kuba Omugabe? (b) Tukuratize ebiri omu Okushuuruurwa 12:12, ni enki ecabire kirabeho omu nsi Sitaane yamara kunagwamu?

⁴ Omu Kicweka ca 8 tukega ku Yesu yabire Omugabe omu mwaka gwa 1914, akatandika kutegecera omu iguru. (Danieli 7:13, 14) Ekitabo c’Okushuuruurwa nikitugambira ecabireho kiri kugira kiti: ‘Hakabaho orugamba omu iguru, Mikaeli na ba marayika beye barwanisa ekijoka; kandi ekijoka na ba marayika baco babarwanisa.’ * Sitaane na ba dayimoni bakasingwa kandi banagwa omu nsi. Tekateka oku ba marayika bahurire bashemererwa! Konka shi ni enki ecabire kirahike aha bantu abatwire omu nsi? Bibuli negamba ku abantu bona babire barahikweho n’okubonabona. Ahabw’enki? Ahabw’okuba Sitaane ayine ekiniga kingi, kandi ‘namanya ku ayine omwanya muce.’—Okushuuruurwa 12:7, 9, 12.

⁵ Sitaane ari kubonabonesa abantu omu nsi atireho amani. Ayine ekiniga ahabw’okuba asigize akire kace rero Ruhanga akamwihaho. Reka turebe ebi Yesu yagambire ku byabire birabeho omu biro by’emperu.—Reba Enyongezo ya 24.

6, 7. Ni enki ekiri kugambwa aha ntaro n’enjara ebiriho erizoba?

⁶ Entaro. Yesu akagira ngu: ‘Ihanga riryatera erindi ihanga, n’obugabe buryatera obundi bugabe.’ (Matayo  24:7) Omuri obu bwire abantu bingi bakafera omu ndwano kukira obundi bwire bwona obwabireho. Ripoti emwe eri kugamba aha by’entaro neyereka ku kwiha omu mwaka gwa 1914, entaro zisire abantu abari kukira miriyoni 100. Eco nikimanyisa ku abantu abaferire omu ndwano ezabireho omu myaka 100, kwiha omu gwa 1900 kuhisya omu gwa 2000, ari emirundi ishatu y’abafire bona omu myaka 1,900. Tekateka n’iwe obusasi obw’abantu bingi munonga bine ahabw’entaro!

⁷ Enjara. Yesu akagira ati: “Haryabaho enjara.” (Matayo 24:7) N’obu erizoba hariho ebyokurya byingi kukira kare hona, abantu bingi tibine ebyokurya ebiri kubamara. Ahabw’enki? Ahabw’okuba tibine esente zo kugura ebyokurya ninga shi itaka ery’okubihingamu. Abantu bingi munonga tibine esente eziri kumara z’okugura ebyokurya by’izoba rimwe. Ekitongore c’eby’amagara omu nsi, nikigamba ku abana bingi munonga bari kufa buri mwaka, na munonga ahabw’okubura ebyokurya ngu bagire amagara marungi.

8, 9. Ni enki ekiri kwereka ngu ebi Yesu yahanwire aha bikwatirine n’emisisa n’endwara byahikirire?

 ⁸ Emisisa. Yesu akahanura ati: ‘Haryabaho emisisa y’amani.’ (Luka 21:11) Buri mwaka nihabaho emisisa myingi kandi y’amani. Kuruga omu mwaka gwa 1900, abantu abari kukira miriyoni ibiri bakafa ahabw’emisisa. Kandi n’obu hariho ebyoma ebiri kureba emisisa etakabireho, na hati abantu bingi bacagumizemu kufa.

⁹ Endwara. Yesu akaba yahanwire ku habire harije kubaho “orufu” ninga shi endwara. Endwara z’akabi zikaba zirije kuturira kandi zita bingi. (Luka 21:11) N’obu ba dokita bayegire kukiza endwara nyingi, hacariho endwara ezitarikukira. Hine ripoti eyashoborwire ku buri mwaka, abantu abari kuhika omuri za miriyoni nyingi bari kwitwa endwara, harimu nka kakonko, omushwija na korera. Ti eco conka, ba dokita bakajumbura n’ezindi ndwara nsya 30, kandi ezimwe tiziri kubasa kukira.

10. Ni bata oku ebiri kugambwa omuri 2 Timoseo 3:1-5 biri kuhikirira hati?

¹⁰ Omuri 2 Timoseo 3:1-5, Bibuli negira ngu: ‘Omu biro by’aha mperu, haryabaho ebiro by’akabi kingi.’ Entumwa Paulo akashoborora oku abantu bingi babire barije kwetwara omu biro by’aha mperu. Akagamba ngu abantu bakaba nibaza kuba

• abari kwekunda

• abari kukunda esente

• abari kugomera abazire

• abatari kwera

• abatari kukunda abanyabuzare

• abatari kumanya kwekwata

• ensharizi

• abari kukunda kweshemeza okukira Ruhanga

• abari kwereka ku nibakunda Ruhanga konka batari kumworobera

11. Tukuratize ebiri omuri Zaaburi ya 92:7, ni enki ekirihika aha bantu babi?

¹¹ Mbehi omu kacweka ak’otwiremu abantu bingi nibetwara basyoya? Omu nsi yona, abantu bingi ni ko oku bari. Konka Ruhanga ari hihi  kugira eki yakora. Naraganisa ngu: ‘Ababi n’obu bamera nk’obunyasi, n’enkozi z’ebibi zikagogera, konka ni ab’okuhwerekerera ebiro byona.’—Zaaburi 92:7.

12, 13. Ni enki eki Yehova yatwegesize omu biro by’aha mperu?

¹² Bibuli ekaba yahanwire ku omu biro by’aha mperu habire harije kubaho obusasi bwingi n’okubonabona. Konka nambwenu Bibuli negamba ku habire harije kubaho ebintu birungi.

¹³ Kushoborocerwa Bibuli. Omuhanuzi Danieli akahandika aha biro by’aha mperu, yagira ati: ‘Okumanya kuryayeyongera.’ (Danieli 12:4) Ruhanga akaba arahe abantu beye obushoborozi bw’okushoborocerwa ge Bibuli kukiza kare hona. Eco Yehova akakikora na munonga kwiha omu mwaka gwa 1914. Ecokureberaho: Akatwegesa omugasho gw’izina ryeye n’ekigendererwa eki ayinire ensi, amazima agakwatirine n’ekitambo, ekiri kubaho twafa, n’okuzoka. Tukega ku Obukama bwa Ruhanga bwonka ari bwo buri kubasa kwitwihiraho ebiri kutubonabonesa. Nambwenu tukega eki turi kubasa kukora ngu tutunge okushemererwa n’oku turi kubasa kubaho nk’oku Ruhanga ari kwenda. Konka shi ni enki eki abahereza ba Ruhanga bari kukoresa ebyo ebi bayegire? Hariho obundi buhanuzi oburi kugarukamu eco kibuzo.—Reba Enyongezo ya 21 n’eya 25.

14. Obutumwa burungi buri kuburirwa nkahe, kandi shi ni baha abari kububurira?

¹⁴ Omurimo g’okuburira omu nsi yona. Yesu akagamba aha biro by’aha mperu, yagira ati: ‘Engiri egi ey’Obukama eryagambwa omu nsi zona.’ (Matayo 24:3, 14) Obutumwa burungi bw’Obukama buri kuburirwa omu mahanga agari kukira 230, omu ndimi eziri kukira 700. Ni amazima! Omu nsi yona, Abahamya ba Yehova b’‘omu  mahanga gona n’enganda zona’ barimu kwegesa abantu Obukama bwa Ruhanga n’eki burije kukorera abantu. (Okushuuruurwa 7:9) Kandi nibegeseza busha. N’obu abantu bingi bari kubanga kandi bakabahiganisa, tihine ekintu ekiri kubasa kwemereza omurimo g’okuburira, nk’oku Yesu yabihanwire.—Luka 21:17.

15. (a) Mbehi noyikiriza ku turi omu biro by’aha mperu, kandi shi ahabw’enki? (b) Ni enki ekirihika aha bantu abari korobera Yehova, n’ah’abatari kumworobera?

¹⁵ Mbehi noyikiriza ku turi omu biro by’aha mperu? Obuhanuzi bwingi bw’omuri Bibuli oburi kugamba aha biro by’emperu bukamara kuhikirira. Juba aha, Yehova yaza kwemereza omurimo g’okuburira obutumwa burungi rero “emperu” ehike. (Matayo 24:14) Konka shi emperu ni enki? Ni orutaro oruri kwetwa Haramagedoni, obu Ruhanga ariba ari kumariraho kimwe ebibi byona. Yehova aryakoresa Yesu na ba marayika beye b’amani bamareho omuntu wena ori kwanga kumuhurira, kandi akanga n’okuhurira Omwana weye. (2 Abatesalonika 1:6-9) Ebyo ku birimara kubaho, Sitaane na ba marayika beye tibarishuba kuhabisa abantu. Abantu bona abari korobera Ruhanga kandi bakikiriza n’Obukama bweye baryayerebera endagano zona ezi Ruhanga yaturaganisize ziri kuhikirira.—Okushuuruurwa 20:1-3; 21:3-5.

16. Hati shi ku emperu eri hihi, ni enki eki oshemerire kukora?

¹⁶ Egi nsi eri kutegekwa na Sitaane yaza kwihwaho. Ni ahabw’eco ni ec’omugasho kwebuza ngu: ‘Ni enki eki nshemerire kukora?’ Yehova nayenda ngu oyege Bibuli nk’oku ori kubasa, kugira ngu omanye byona. Oshemerire kutamu amani okagumizamu kwega. (Yohaana 17:3) Abahamya ba Yehova nibagira amateraniro buri sande kugira ngu bakwase abantu kushoborocerwa Bibuli. Guma  oyije omuri ago materaniro burijo. (Shoma omu Baheburaayo 10:24, 25.) Wayega ekintu kisya okamanya ku oshemerire kukoramu empinduka, otatina kubita omu bikorwa. Ku oragende ori kukoramu empinduka, obunywani bwawe na Yehova buryakizaho kuhama.—Yakobo 4:8.

17. Ahabw’enki abantu bingi baritangara ku baribona emperu yahika?

¹⁷ Entumwa Paulo akashoborora ku okucwekerezibwa kw’ababi kuryija obu abantu bona bariba batari kukitekateka, “nk’omushuma wa nyekiro.” (1 Abatesalonika 5:2) Yesu akahanura ku bingi babire barayehuzye ebihamya ebiri kwereka ku twahikire omu biro by’aha mperu. Akagira ati: ‘Nk’ebiro bya Noa oku byabire biri, ni ko n’okwija k’Omwana w’omuntu kuriba. Aha kuba nk’oku babire bari omu biro ebyo ebyabandize omwegemure gw’amizi, nibarya kandi nibanywa, nibashwera, nibahingira, okuhisya aha kiro eki Noa yatahireho omu bwato; bakaba bari aho batine eki bari kumanya, okuhisya obu omwegemure gw’amizi gwizire, gukabatwara bona; n’okwija k’Omwana w’omuntu ni ko kuriba kutyo.’—Matayo 24:37-39.

18. Ni kuha kurabura oku Yesu yatuhire?

¹⁸ Yesu akaturabura ngu tutariremesibwa n’‘omururu, obusinzi n’amagara g’amaganya.’ Akagamba ku emperu erije kwija ahonaho, nk’omutego. Nambwenu akagamba ku ‘erihika aha bantu bona abatwire omu nsi yona.’ Akongeraho ati: ‘Mugume nimureba obutwire bwona, nimushaba ngu mubase kukira ebyo byona ebiribaho, n’okwemerera omu misho g’Omwana w’omuntu.’ (Luka 21:34-36) Ahabw’enki kiri ec’omugasho kuhurikiza okurabura kwa Yesu? Ni ahabw’okuba juba aha ensi mbi ya Sitaane yaza kumarwaho. Abantu abu Yehova na Yesu bari kwikiriza ni bo bonka abarirokoka emperu kandi bakabaho ebiro byona omu nsi ensya.—Yohaana 3:16; 2 Petero 3:13.