1. Ninasunze wuvi dha musogorho?

WAROMAGA wengesa jornal obe ovuruwana dhopadduwa nanda buvivuza, ‘Dhimpadduwelani dhilobo dhowopiha dhahene?’ Ngovi dhili gwé, obure nanda attu enjene anorumeelaga wi nili omagomo wa elabo. Koddi ejoya ebaribari? Ohikalawo mukalelo wa oziwa dhinapadduwe musogorho? Ndde. Vowi attu kanwodha ologa vina woona dhinapadduwe musogorho, Yehova Mulugu onowodha. Iyene ononaddela modhela Bibilia ejile enapadduwe na elabo musogorho.—Izaiya 46:10; Tiago 4:14.

2, 3. Anamafara a Yezu afuna aziwe eni, nanda iyene wawakulile dhavi?

² Nigengesaga mBibiliani sabwa ya omamalelo wa elabo, kintapulela wi omagomo wa Elaboya, mbwenye wa obure. Yezu wahasunziha attu wi Omwene wa Mulugu ogahilamulela elabo ya vati. (Luka 4:43) Anamafara aye afuna aziwe mudhidhi ogadhile Omwene wa Mulugu, noona awene ahinvuza Yezu: “Munaddeleto nsaka ninapadduwe vilobo eso, munaddele vina ezinddiyelo ya odha wenyu, ya ogoma wa elabo?” (Mateu 24:3) Yezu kalogile labona, mbwenye wahiloga dhizinddiyelo dha esile dhigapadduwile omagomo wa elabo. Esile dhalogile Yezu wi dhigahipadduwa, dhinowireya ovanene.

³ Va kapitulo eji, ninele osunza mikalelo dhinlagiha wi nili omagomo wa elabo. Vamaromo ninfuna nisunze sabwa ya koddo yapadduwile wirimu masaka  a mundduni, modhela ejuwene ninele ononelamo sabwa okalelani obure vaddiddi velaboni ya vati.

4, 5. (a) Txini epadduwile wirimu mumalile Yezu ottomiwa ninga Mwene? (b) Mowiwanana na Ovuhulela 12:12, txini epadduwile velaboni ya vati mumalele Satana oponyedhiwavo?

⁴ Va kapitulu 8 iyo nihisunza wi Yezu ohikala Mwene yaka ya 1914. (Daniyel 7:13, 14) Nivuru na Ovuhulela ninologa yapadduwile: “Novenya, wirimu otatamuwa koddo. Migeli [Yezu] na anju aye araba koddo na nowa ejo. Nowa [Satana] na anju aye awana na awene.” * Satana na adomonyo kapemberile koddoya nanda aponyedhiwa velaboni ya vati. Kobuwela ohagalala wana angelo wirimu! Kito attu a velaboni ya vati? Bibilia onloga wi ogaali mudhidhi wa makattamiho wa attu otene. Sabwaya jani? Sabwani Ddiabo agaali wonyonyeya vina n’owali onddimuwa, “aziwaga wi ohalilena malabo mañgonovi.”—Ovuhulela 12:7, 9, 12.

⁵ Ddiabo onodhowavi bagatota makattamiho menjene velaboni. Oli wonyonyeyene sabwani “ohalilena malabo mañgonovi” wi Mulugu amutolotxe. Ndoweni nitanaalele esile dhalogile Yezu wi dhigahipadduwa mwari mwa malabo omariha.—Koona Yowenjedha 24.

6, 7. Dala na owali oli dhavi ovanene?

⁶ Koddo. Yezu wahiloga: “Nlogo ninere owana koddo na nlogo nina, elabo na elabo yina.” (Mateu 24:7) Attu enjene ahipiwa na koddo mwari mwa  mudhidhi mung’onovi opitta mudhidhi mwina wa mapadduwo. Muselu ondha o Institutu ya Worldwatch onloga wi oroma yaka ya 1914, koddo dhihapa attu muttengo wa miliau 100. Okwaranya dila ttaru attu enjene ahipiwa mukoddoni mwari mwa vyaka 100 oromana yaka ya 1900 mpaka 2000 dhahene ninga mupiwani mwari mwa vyaka 1.900 dha munddunimwa. Kobuwela goi na otabuwa wana attu enjene sabwa ya koddo!

⁷ Dala. Yezu ohiloga: “Dala enere ottidda motho.” (Mateu 24:7) Masiki dhikalagawo milima dhinjene ovanene opitta masaka a mundduni, attu enjene kana yoja enakwana. Sabwaya jani? Sabwani awene kana kobiri wi agulena vina kana vego volimavo. Okwaranya attu biliau mmodha ankana dolar modha bahi wa kadda labo. Nikuru na Organização Mundial da Saúde ninloga wi matxikwi na matxikwi a aima anokwa vyaka dhotene, sabwani amambaliwa kaana kobiri vina dhoja wi asapelena.

8, 9. Txini enlagiha wila mavuhulo a Yezu sabwa ya ottekenyeya wa elabo na maredda anowakwanela?

 ⁸ Ottekenyeya wa elabo. Yezu wahittaga ologa “Mmimburoni minjene munere opadduwa otekenyeya wa elabo.” (Luka 21:11) Kadda yaka onojedheliwa ottekenyeya wa elabo wawopiha vaddiddi. Oromana yaka ya 1900, okwaranya attu matxikwi meeli ahikwa sabwa ya ottekenyeya wa elabo. Masiki tekinolojia [masunzo a vadhulu] vanakamihedhani attu ozinddiyela ottekenyeya wa elabo ohinatti opadduwa, attu anokwavi.

⁹ Maredda. Yezu wahiloga wila ogahikala “viredda dhoraveya” Eji entapulela wila ogahikala viredda dhinji dhigawazeyile vina badhapa attu enjene. (Luka 21:11) Masiki vansunza adotoro enjene marhe a ovoliha dhiredda, ohikala maredda menji ahinwodheya ovola. Noona, muselu dhahi onologa wi kadda yaka, matxikwi menjene a dhiredda ninga, okotomola, malaria na kolera [eredda ya ovaluwa] dhinowapa attu. Ottiya esuwenevi adotoro ahifanya dhiredda 30 dhiswa, dhiinadhà mwa esene kadhina murobwe.

10. 2 Timóteo 3:1-5 onakwanihedheya dhavi ovanene?

¹⁰ Va 2 Timóteo 3:1-5, Bibilia onologa: “Masaka omariya aner’odhana dhawopiha.” Murumiwi Paulo wabaza ologa mweddelo wa attu enjene mmasikuni omariha. Iyene wahiloga wi attuya anere okala . . . 

• anamakumbela vawa

• anamajiwa murima na kobiri

• owasadduwela amambalawa

• ohikuluveleya

• owuma murima

• ohittiddeya myeddo

• owali anidda dhapama

• omageya n’ojavo elabo opitta omukurumuwela Mulugu

• anoneyana ekalelo y’omuriha Mulugu, oku akoddaga guru ya nroromelo elimo

11. Mowiwanana na Masalmo 92:7, txini enapadduwele attu awopiha?

¹¹ Mmuruddani munkaliwe munowooneya attu anna mweddelo ninga obwene? Mwilaboni mwetemwene  ahikalamo. Masiki dhawene, Mulugu onele wagomiha. Iyene ohilibela dhahi: “Masiki athu otakala murima arubudhe ninga makupu, anira dhabure afufume, enajyedha otolotxiwa ohimmala.”—Masalmo 92:8, Malebo Okoddela.

12, 13. Malabo abano omariha Yehova onnisunziha eni?

¹² Bibilia wabaza ologa wi malabo omariha, elabo egahidhala goi na opa. Bibilia vina wahiloga wila ogahikala dhilobo dhaderetu.

¹³ Omuziwelamo Bibilia. Namavuhulela Daniyel wahileba dhigapadduwile malabo omariha. Ohiloga: ‘Eziwelo y’ebaribari enokala gwé (NM).’ Mulugu agahavaha adhari aye ewodhelo ya omuziwelamo Bibilia vaddiddi opitta mudhidhi mwina wa mundduni. (Daniyel 12:4) Yehova ohilagiha ejuwene oromana yaka ya 1914. Ninga motagiha, iyene onisunziha ttima ya nzina naye, efunelo yaye na elabo ya vati, vina ebaribari ya yobolo, ennipadduwela nigakwa, vina ononiziwiha wi onele okala ovenyihiwa mu okwani. Nihisunza wila Omwene wa Mulugu bahi bunwodha ogomiha makattamiho ehu. Nihisunza vina marhe a ofanya ohagalala, okalawo n’omuhagalaliha Mulugu. Txini enakose adhari a Mulugu mwa dhetene esi dhinsunzani? Nivuhulo niina ninele onakula.—Koona Yowenjedha 21 vina 25.

14. Muttaka wapama wa Omwene onlaleyiwa wuvi, nanda bani onlaleya?

¹⁴ Olaleyiwa elabo yotene. Yezu valogiye dha malabo omariha, wahiloga dhahi: “Muthaka wapama onele olaleyiwa mwilaboni mwetemwene, wi malogo otene aziwe.” (Mateu 24:3, 14) Muttaka wapama wa Omwene wa Mulugu onolaleyiwa okwaranya dhilabo  230 vina mwa dhilogelo dhowakwana 700. Elabo yotene ya vati Anamoona a Yehova a “malogo otene na mahimo otene” anowakamihedha attu oziwa entapulela Omwene wa Mulugu vina ejile enakoselani malogo otene. (Ovuhulela 7:9) Ankosa ejene mwa mahala. Ninga mwalogeli Yezu, attu enjene anowafarafara vina anowawidda, masiki dhawene kayiwo elobo enawodhe wattiyiha.—Luka 21:17.

15. (a) Weyo onorumeela wi ninkalawo malabo omariha, sabwaya jani? (b) Txini enapadduwele abale animwiwelela Yehova na ahinimwiwelela?

¹⁵ Onorumela wi ninkalawo malabo omariha? Mavuhulo menjene a Bibilia, anloga wi ninkalawo malabo omariha. Ovanene Yehova onele otximiha mabasa a olaleya muttaka wapama ngamala panafiye “ogoma wa elabo”. (Mateu 24:14) Ogoma wa elabo txini? Ji koddo ya Armagedón, enfuna Mulugu oselana dhabure dhetene. Yehova ohimuttoma Yezu na angelo a guru wi amutolotxe muttu ddi muttu onkodda omwiwelela. (2 Tesalónika 1:6-9) Nomala, Satana na adomonyo aye kananyegette viina attu. Nanda otene abale anfuna omwiwelela Mulugu arumela Omwene waye, anele woona malibelo otene a Mulugu bagakwanela.—Ovuhulela 20:1-3; 21:3-5.

16. Vowi omagomo onowaddamela, txini enfanyeliwe okosa?

¹⁶ Elabo eji enlamuleliwa na Satana enele ofiya omagomo ovanene. Noona jamakamaka ovivuza dhahi, ‘Txini enfanyelimi okosa?’ Yehova onfuna wila weyo omusunzegevi Bibilia. Weyo onofanyela olibiha nsunzo nawo. (Joau 17:3) Anamoona a Yehova anotugumana sumana dhetene wi akamihedhe attu omuziwelamo Bibilia. Katagiha otugumana na  awene mudhidhi wotene. (Kengesa Ahebreu 10:24, 25.) Ogoona wila onofanyela okosa masadduwo ovanene kakosa. Ogamala okosa, omarho wawo na Yehova onele oliba.—Tiago 4:8.

17. Sabwaya jani attu enjene anele orurumuwa omagomo ogafiya?

¹⁷ Murumiwi Paulo wahiloga wila onongiwa wa atabala ogafiyile mudhidhi wohijedheleya, sabwani onkala ninga, “mbava onda na mathiyu.” (1 Tesalónika 5:2) Yezu wahittaga ologa wila attu enjene agahipwaza dhizinddiyelo dhinlagiha wi ninkalawo malabo omariha. Ologile dhahi: “Dhipadduwile nsaka na Nowé sinapadduwe nsaka nineyele Mwana-muthu [obe sinapadduwe malabo omariha]. Masiku abo muneri ohinapadduwa athu anja, ammwa, antelana, antelihana ahubuwelaga yafuna wagwela, ofiyedha siku nivolowile Nowé mpangayani. Kaliwo warohedha mpaka mpulo ovinga, ofiyedha wamedha otene. Yokokene jenereye nsaka ninadhe Mwana-Muthu.”—Mateu 24:37-39.

18. Txini ennaddela Yezu sabwa ya masiku omariha?

¹⁸ Yezu wahiloga wila mirima dhehu dhihizuzumiheye “n’ojetxavo elabo, n’othabwiha olezela, n’ozuzumeletxa dha vati.” Vina ohiloga wi omagomo onofiya morurumutxa, ninga “nthavi.” Ohenjedhedha wila ninowarurumutxa “athu etene a mwilaboni.” Vina bela: “Porhe-porhe muhigone; didelaní olobela wi mukane guru dhorabelana dhawopiha dhetene dhinapadduwe, muwodhe ofiya vamentoni va Mwana Muthu.” (Luka 21:34-36) Ekaleli eni yamakamaka ovuruwana malago a Yezu? Sabwani ovanene apa elabo eji ya Satana enele otolotxiwa. Anaviluwe nanda akalawo na mukalakala babale animwiwelela Yehova na mwanaye Yezu.—Joau 3:16; 2 Pedro 3:13.